Россия армияси Северодонецк ва Бахмут йўналишларида катта йўқотишларга учраган
Украина Қуролли кучлари Бош штаби маълумотига кўра, ўтган кун давомида Россия армияси Северодонецк ва Бахмут йўналишларида энг катта йўқотишларга учраган.
Хусусан, Северодонецк йўналишида рус армияси Новотошковское ва Орехов аҳоли пунктлари ҳудудларига ҳужум қилмоқда. Россия кучларининг Северодонецкга ҳужумлари ҳам давом этмоқда.
Бахмут йўналишида Россия Николаевка ва Камишевахага ҳужум қилиш учун қўшинларни қайта тўпламоқда.
Украина Қуролли кучлари билдирувига кўра, ўтган кун давомида Донецк ва Луганск йўналишларида Украина армияси Россияемен 14 та ҳужумни қайтарган.
Уруш шароитида Озодлик расмийлар маълумотини дарҳол текшира олмайди.
Арестович: кунига 200-300 рус аскари ўлмоқда
Уруш бошланганидан бери 10 мингга яқин украиналик аскар ҳалок бўлди. Бу ҳақда Украина президенти девонининг маслаҳатчиси Алексей Арестович таъкидлади.
Арестовичнинг сўзларига кўра, можаро бошида кунига ўртача 100 га яқин украина аскари ҳалок бўлган.
"Аммо урушнинг дастлабки 20-30 куни ичида кунига 1000 рус аскари ўлди. Ҳозир кунига 200-300 рус аскари ўлмоқда, бундан кам эмас", деди у.
Апрел ойи ўрталарида Украина президенти Владимир Зеленский уруш пайтида 2500 дан 3000 гача украиналик аскар ҳалок бўлганини айтган эди.
Шу билан бирга, Россия томони бир вақтнинг ўзида Украинанинг ўрнини босиб бўлмайдиган йўқотишлари 23 367 кишини ташкил этганини маълум қилганди. Бу рақамга нафақат ҳалок бўлганлар, балки асирга олинган, бедарак йўқолган ва оғир яраланган аскарлар ҳам киради.
Йўқотишлар ҳақида айтилаётган бу рақамларни уруш шароитида бошқа манбалар орқали текшириш имконсиз.
Зеленский Украина шарқидаги жангларда оғир артиллерия зарурлигини айтди
Украина президенти Владимир Зеленский 10 июнь, жума куни Донбас жануби-шарқида рус қўшинлари билан “шафқатсиз жанглар” давом этаётганини айтди ва Ғарб давлатларини Киевни кўпроқ қурол-яроғ билан таъминлашга чақирди.
Зеленский ўзининг тунги нутқида Россия “Донбасдаги ҳар бир шаҳарни ер билан яксон қилиб юборишга” уринаётгани ва Украина армияси фақат оғир қуроллар билан қаршиликни давом эттириши мумкинлигини айтди.
"Севиеродонецк, Лисичанск, Бахмут, Словянск. Бошқа кўп номлар . Бу харобаларнинг барчаси бир вақтлар кўркам шаҳарлар эди", деди Зеленский.
Россия Украинадан Донецк ва шарқий Луганск вилоятининг тўлиқ ҳудудини қўлга киритишга умид қилмоқда. Шу мақсадда Россия ўз кучларини Севиеродонецк учун жангга жалб этганини айтади Зеленский.
Украина қўшинлари асосан шаҳардаги турар-жойлардан чиқиб кетган, бироқ Северодонец дарёсининг шарқий қирғоғида ўз таянчларини қўлга киритмаган.
Россия кучлари ҳам шимол ва жанубдан украиналикларни ўраб олишга ҳаракат қилмоқда, бироқ ҳозирча у қадар чекланган муваффақиятга эришди.
Ҳар икки томон кўплаб қурбонлар келтиргани айтилмоқда.
Уруш бошланганидан бери Украинада 287 бола ҳалок бўлган
Украинадаги уруш пайтида 287 нафар бола ҳалок бўлган, 490 дан ортиқ бола жароҳатланган, дея хабар берди мамлакат Бош прокуратураси.
Бош прокуратура баёнотида айтилишича, болаларнинг аксарияти Донецк, Харьков, Киев, Чернигов, Луганск, Херсон, Николайев ва Запорожье вилоятларида жабрланган. Ҳафталардан бери тинимсиз ўққа тутилаётган Мариуполда ҳозиргача 24 боланинг ўлими тасдиқланди.
Бу маълумотлар якуний эмас. Украинанинг кўп жойларида, жанговар ҳаракатлар давом этаётган минтақаларда ва босиб олинган ҳудудларда ҳисоблаш имконсиз.