ОАВ: “Ёпиқ эшиклар ортида” Зеленскийни Путин билан музокарага ундашди
Пайшанба куни Франция, Германия, Италия ва Руминия етакчилари Киевга борди. Франция президенти Эммануел Макрон, Германия канцлери Олаф Шолц, Италия бош вазири Марио Драги ва Руминия президенти Клаус Ёханнис Украина президенти Владимир Зеленский билан учрашди.
Учрашувлардан сўнг Украинага ЕИ аъзолигига номзод мақоми берилишини қўллаб-қувватлашини эълон қилишди.
Айни пайтда, бу учрашувлардан сўнг Франция президенти Макроннинг, Украина президенти Владимир Зеленский билан қўл сиқишиб тушган сурати жамоатчилик диққатини тортди.
Чунки, шу ой бошида Макроннинг, Украинага бостириб киришига қарамай, Россияни “камситмаслик” керак деган сўзлари Зеленскийнинг норозлигига сабаб бўлганди.
Германияда чиқадиган Die Welt нашрининг хабар қилишича, Европа лидерлари “ёпиқ эшиклар ортида” Украина президенти Владимир Зеленскийни Россия президенти Владимир Путин билан музокара олиб боришга ундаган.
Зеленскийга кўра, учрашувларда Украинанинг мудофаа қудратини бирликда кучайтириш, мамлакатнинг Европага қўшилиши ва Россияга қарши янги санкцияларни қўллаш каби бир қанча масалаларни кўриб чиқилган.
Bloomberg: ЕИга аъзолик муаян шартлар эвазига тавсия қилинди
Bloomberg нашрининг жараёндан хабардор манбаларига таяниб хабар қилишича, Европа комиссияси, муайян шартларни бажариш мажбуриятини юклаган ҳолда Украина билан Молдовага ЕИ аъзолигига номзод мақомини беришни тавсия қилган.
“Ижроия ҳокимияти Украина ва Молдовага ЕИ аъзолигига номзод мамлакат мақомини беришни тавсия этмоқчи. Бу бир рамзий қадам ва узоққа чўзиладиган Евроиттифоқ таркибига кириш жараёнининг бир қисмидир”, деб ёзади агентлик.
Айни пайтда, Германияда чиқадиган Die Welt нашрининг хабар қилишича, Европа лидерлари “ёпиқ эшиклар ортида” Украина президенти Владимир Зеленскийни Россия президенти Владимир Путин билан музокара олиб боришга ундаган.
Зеленскийга кўра, учрашувларда Украинанинг мудофаа қудратини бирликда кучайтириш, мамлакатнинг Европага қўшилиши ва Россияга қарши янги санкцияларни қўллаш каби бир қанча масалаларни кўриб чиқилган.
"Мен Италиядан принципиал сиёсий қўллаб-қувватлаши, макромолиявий ва мудофаа ёрдами учун миннатдорман. Ҳозир биз тарихан энг яхши муносабатларга эгамиз. Ишончим комилки, биз халқимиз учун кўп нарсаларни қила оламиз. Руминиядан ҳам мудофаа ёрдами ва ғалла транзитига кўмаклашгани учун миннатдорман. Биз Руминия ҳудуди орқали экспорт салоҳиятини оширишга келишиб олдик.Франция қўшимча Цезарь артиллерия тизимларини тақдим этади. Бу бизнинг мудофаамиз учун жуда муҳим. Бугун президент Макрон очиқ айтганидек, Европанинг Украинани қўллаб-қувватлаши шундай бўлиши керакки, биз биргаликда умумий қадриятларни ҳимоя қилаётганимизни, Европани ҳимоя қилаётганимизни ҳақиқатан ҳам ҳис қилишимиз керак. Германия мамлакатимизни ҳаво ҳужумидан мудофаа тизимлари билан таъминлашини ва бундан кейин ҳам қўллаб-қувватлашини билдирди”, деди Зеленский.
Учрашувдан сўнг Макрон, Украина Европа оиласининг бир қисми экани ва тўрт давлат етакчилари Украинага, ЕИ аъзолигига номзод мақоми берилишини қўллаб-қувватлашини айтди.
Шунингдек, Макрон давом этаётган можаро, бир кун якунланиши ва охир-оқибат, музокара қилиш заруратини бўлишини қўшимча қилди.
Музокаралар шароити ва форматини Украина белгилайди, Германия ва Франция ҳеч қачон Украина ортидан музокара олиб бормайди, деди Макрон.
Россия Мудофаа вазирлиги: Украина ҚК тарафида бир нафар ўзбекистонлик ёлланма аскар бор
Бугунги кунда Украинада дунёнинг 64 мамлакатидан борган 3,2 мингдан ортиқ ажнабий ёлланма аскар жанг қилмоқда. Украина қуролли кучлари сафида жанг қилиш учун Ўзбекистондан бир нафар ёлланма аскар келган. Бу ҳақда Россия Мудофаа вазирлиги маълумотларига таяниб Podrobno.uz хабар қилди.
Вазирлик ҳар бир чет эллик ёлланма жангчи кузатилишини ва қайд этилишини урғулаган. “Махсус амалиёт” бошланганидан бери Украинага 6956 нафар ёлланма аскар келгани, улардан 1956 нафари йўқ қилингани, 1779 нафари ватанига қайтиб кетгани айтилмоқда.
Россия Мудофаа вазирлигига кўра, ёлланма жангчилар сони бўйича Европа мамлакатлари орасида – Польша (1831 киши: 378 нафари ўлдирилган, 272 киши қайтиб кетган), Шимолий Америкада эса Канада (601 киши келган: 162 нафари ўлдирилган, 169 нафари қайтиб кетган) етакчилик қилади.
Бошқа постсовет мамлакатлардан Украина ҚК тарафида Озарбайжон (1 киши), Қозоғистон (1) ҳамда Грузия (355) фуқаролари ҳам жанг қилишмоқда.
Ўзбекистон Жиноят кодексининг 154-моддасига (“Ёлланиш”) кўра, хорижий мамлакат ҳудудидаги қуролли можаролар ёки ҳарбий ҳаракатларда қатнашганлик учун беш йилдан ўн йилгача озодликдан маҳрум этиш жазоси белгиланган.
Ёлланма шахсни ёллаш, ўқитиш, молиялаштириш ёки унга бошқа моддий таъминот бериш, худди шунингдек ундан ҳарбий тўқнашув ёки ҳарбий ҳаракатларда фойдаланиш эса етти йилдан ўн икки йилгача озодликдан маҳрум қилиш билан жазоланади.
Ўзбекистонликларнинг чет элдаги ҳарбий можароларида иштирок этишига доир ҳар қандай хабарлар мамлакатнинг ҳуқуқ-тартибот идоралари ва махсус хизматлари томонидан синчиклаб текширилади.
Одесса вилоятида иккита ракета уриб туширилди
Одесса вилоятида тунда иккита қанотли ракета уриб туширилди, деб билдирди вилоят ҳарбий маъмурияти вакили Сергей Братчук.
"Тунда душман вақтинча босиб олинган Қрим ҳудудидан Одесса вилоятига қанотли ракеталар билан ҳужум қилди. Ҳарбийларимизга раҳмат - иккита ҳалокатли ракета йўқ қилинди", - деди Братчук.
Украина қўшинлари жанубий оператив қўмондонлиги ҳам кейинчалик иккита "Оникс" ракетаси ҳаво ҳужумидан мудофаа бўлинмаси томонидан ҳавода аниқ йўқ қилинганини маълум қилди.