Россиядаги шаҳар ва регионлар раҳбарлари Украинада ҳалок бўлган рус аскарлари тўғрисида хабар бермоқда
Сўнгги кунларда Россия шаҳарлари ва регионлари раҳбарлари Украинада ҳалок бўлган аскарлар тўғрисидаги маълумотларни эълон қила бошлади.
Бурятия раҳбари Алексей Циденов 5 март куни Украинада бурятиялик 8 аскар ҳалок бўлгани ва 40 нафари яраланганини билдирди.
6 март куни Норильск шаҳри мэри Дмитрий Карасев Украинада норильсклик бир аскар ҳалок бўлгани тўғрисида ўзининг инстаграм саҳифасида ёзди.
Тува республикаси рахбари Владислав Ховалиг тувалик 4 аскар, Амурск вилояти губернатори Василий Орлов амурлик 1 аскар ҳалок бўлганини хабар қилди.
Аввалроқ Доғистон, Чеченистон, Қалмиқистон, Красноярск, Ёқутистон, иркутск раҳбарлари ҳам Украинада ҳалок бўлган ватандошлари тўғрисида хабар берган эди.
Россия Мудофаа вазирлиги 2 март куни Украинада 498 рус аскари ҳалок бўлгани ва 1 600 га яқини яраланганини билдирганди. Украина ҳукумати эса урушнинг 11 кунида ўн мингдан ортиқ рус аскари ҳалок бўлгани ва яралангани тўғрисида маълум қилган.
Европада газ ва нефть нархи рекорд даражада қимматлади
Европада бир минг куб метр газ нархи 3600 долларга етди. 7 март куни эрталаб ICE биржаси очилиши пайтида газ нархи илк маротаба 3 минг доллардан юқори баҳоланди.
Газ нархи нефть баҳоси кўтарилгани ортидан ошиб кетди. АҚШ Россиядан нефть олишни тақиқлаши кутилаётгани ортидан 1 баррель Brent маркали нефть нархи 2008 йилдан бери биринчи марта 140 долларга кўтарилди.
Ҳаага халқаро судида Украинанинг Россияга қарши аризасини кўриб чиқиш бошланди
БМТнинг Ҳаагадаги халқаро суди Украинанинг Россияга қарши даъво аризасини кўриб чиқиш жараёнини бошлади.
7 март куни Украина Россияга қарши ўз даъвосини изхор қилади, 8 март куни Россия Украина даъволарига қарши ўз асосларини тақдим этиши мумкин.
"Ассошиэйтед пресс" агентлигининг билдиришича, 7 март куни Россия вакиллари судга келмаган. Россиянинг Нидерландиядаги элчиси эса "рус ҳукумати муҳокамаларда иштирок этиш ниятида эмас”, деб билдирди.
Киев томонинг билдиришича, Москванинг гўёки Украина ҳукумати мамлакат шарқидаги ўзларини “ДХР” ва “ЛХР” деб номлаб олган сепаратчи ҳудудларда геноцидни амалга оширганини баҳона қилиб уруш очгани асоссиздир.
Украина Ҳаага судидан Россия урушни тўхтатиши шартлигига оид қарор чиқариб беришни талаб этмоқда. Қарор яқин кунларда қабул қилиниши кутилмоқда. Лекин Кремль бу қарорни бажариши шубҳа остида қолмоқда.
Россия бомбардимон қилган “Винница” аэропортида камида 9 киши ҳалок бўлди
Россия бомбардимон қилган “Винница” аэропортида камида 9 киши ҳалок бўлди, деб хабар берди Украина Фавқулодда вазиятлар хизмати 7 март куни.
Расман билдирилишича, “Винница” аэропорти вайроналари остидан 15 киши олиб чиқилган, улардан 9 нафарининг ўлгани айтилмоқда. Ҳалок бўлганлардан 5 нафари тинч аҳоли, 4 нафари ҳарбий. Айни пайтда вайроналар остида қолганларни қидириш ишлари давом этмоқда.
Бу ердаги қутварув-қидирув ишларига Фавқулодда вазиятлар хизматининг 143 ходими, 23 та махсус техника ва Львов Фуқаролар ҳимояси олий билим юртининг 30 курсанти жалб қилинган.
“Винница” аэропорти 6 март куни Россия ҳарбийлари томонидан ўққа тутилган эди.