Россия АҚШ президенти Жо Байденнинг мамлакатга киришини тақиқлади
Россия Ташқи ишлар вазирлиги АҚШ президенти Жо Байден, унинг ўғли Хантер ва Давлат котиби Энтони Блинкенга нисбатан санкциялар жорий этилганини билдирди. Москва мазкур шахсларнинг Россияга киришини тақиқлади.
Россия снкциялари рўйхатига АҚШ собиқ давлат котиби Хиллари Клинтон, Байденнинг матбуот котиби Жен Псаки, АҚШ президентининг хавфсизлик бўйича маслаҳатчиси Жейк Салливан, МРБ раҳбари Ульям Бёрнс ҳам киритилди.
Россия Ташқи ишлар вазирлигининг билдиришича “АҚШнинг амалдаги маъмурияти ўта қатъий русофобча курс”ни танлагани оқибатида юқорида номи келтирилган расмийларга санкция жорий этилган.
Зеленский НАТОдан кўнгли совуганини расман эълон қилди
Украина президенти Владимир Зеленский Joint Expeditionary Force саммитида сўзлаган нутқида Киев НАТО аъзоси бўлишга интилмаслигини, бироқ мамлакат хавфсизлигини ҳимоя қилиш масаласида халқаро ҳамжамиятдан янгича ҳамкорликни кутаётганини айтди.
Озодлик радиоси украин хизматининг хабар беришча, Зеленский Россиянинг Украинага ҳужуми “Европадаги хавфсизлик тамойилларини абсолют даражада вайрон қилган”ини эътироф этган. Зеленский фикрича, Европа хавфсизлигига оид эски кафолатлар бугунги кунда ўз кучини йўқотди.
“Биз умид қилган ташкилотларнинг, халқаро конвенцияларнинг ва ҳаттоки НАТО каби жаҳоннинг энг кучли бирлашмаси нуфузи бугунги кунда шубҳа остида қолди. Бу бирлашманинг айрим аъзолари Россия агрессиясидан гипнозга тушиб қолганга ўхшайди. Бугун биз Учинчи жаҳон уруши тўғрисида кўплаб таҳминларни эшитмоқдамиз. Учинчи жаҳон уруши НАТО Украина осмонини Россия ракеталари ва самолётлари учун ёпса бошланиб кетар эмиш”,- деди Зеленский.
Зеленскийнинг фикрича, НАТО Украина осмонини ёпишдан воз кечгани оқибатида Россия украин шаҳарларини бомбардимон қилиб, тинч фуқароларни ўлдиришда давом этмоқда.
“Украина НАТО аъзоси эмас. Биз буни тушунамиз. Биз адекват одамлармиз. Йиллар мобайнида гўёки очиқ эшиклар тўғрисидаги гапларни эшитиб келдик ва эндигина бу очиқ эшикдан кира олмаслигимизни тушуниб етдик. Бу ҳақиқат ва бу ҳақиқатни тан олишимиз шарт. Мен халқимиз бу ҳақиқатни тушуна бошлаганидан ва фақат ўз кучига ҳамда бизга кўмак бераётган ҳамкорларга ишониш мумкинлигини англаётганидан мамнунман”,-деди Зеленский.
БМТ: Украиналик қочқинлар сони 3 миллион кишига яқинлашди
Россия Украинага қарши уруш очган 19 кун ичида Украинадан 2 миллион 952 минг киши қочиб чиқди.
БМТ Қочқинлар иши бўйича Олий комиссарлигининг 14 март куни билдиришича, қочқинларнинг 60,7% Польшага келган. Бу билан Кремль Украинага қарши уруш очган 24 февралдан бери Польшага қочиб ўтган украинлар сони 1 миллион 791 мингдан ошди.
Бундан ташқари 454 мингга яқин украин Руминияга, 264 минг украин Венгрияга, 213 минг украин Словакияга ва 86 минг украин Молдовога ўтган.
Мариуполда 9 март куни Россия ҳарбийлари ўққа тутган туғруқхонада оғир яраланган хомиладор аёл вафот этди, деб хабар берди Озодлик радиоси рус хизмати.