БМТ халқаро суди Москва олдига Украинадаги урушни тўхтатиш талабини қўйди
БМТ халқаро суди Россия Украинадаги урушни зудлик билан тўхтатиши лозимлиги ҳақида қарор қабул қилди. Суд Россия ва Киевдан тўқнашув кучайишига олиб бориши мумкин бўлган қадамлардан тийилишни ҳам талаб қилган.
“БМТ халқаро судида Украина Россияга қарши иш бўйича тўлиқ ғалабага эришди. Суд Россия зиммасига Украинага босқинни зудлик билан тўхтатиш мажбуриятини юклади. Халқаро ҳуқуқ меъёрларига мувофиқ, суд қарори Россия томонидан бажарилиши мажбурий бўлиб ҳисобланади. Қарорни эътиборсиз қолдириш РФнинг янада кўпроқ иҳоталанишига олиб келади”, деб ёзди Украина президенти Владимир Зеленский Твиттер микроблогидаги ўз саҳифаси орқали.
Ҳаагадаги БМТ суди Россияга қарши даъво аризасини Москва томонидан Украинада 24 февраль куни бошлатилган уруш туфайли 7 мартда кўриб чиқа бошлаган. Даъво аризаси Киев томонидан Россия хуружининг иккинчи куни берилган ҳамда жуда қисқа вақт ичида кўриб чиқиш учун қабул қилинган. Украина делегацияси Россия ҳужум учун баҳонани (Донбассда рус тилида сўзлашувчиларнинг қирғин қилинаётгани) шунчаки уйдирганини иддао қилган.
БМТ халқаро суди Украина ўз ҳудудида геноцидни амалга ошираётганига оид ҳеч қанақа далил-исбот топган эмас.
Россия Европа кенгаши аъзолигидан чиқарилди
Европа кенгаши Вазирлар қўмитаси 16 март куни Россияни Европа кенгаши аъзолигидан чиқариш ҳақида қарор қабул қилди. Бунгача Россия Европа кенгашига 26 йил аъзо бўлган.
Россияни ташкилот аъзолигидан чиқаришни Вазирлар қўмитасига Европа кенгаши Парламент ассамблеяси (ЕКПА) тавсия қилган.
Бир кун аввал Россия Ташқи ишлар вазирлиги РФ Европа кенгашидан расман чиқишини эълон қилган. ТИВ баёнотида, агар Россия конституциясига зид келмаса, Москва Инсон ҳақлари бўйича Европа суди қабул қилган қарорларни бажаришда давом этиши билдирилган.
Россия Давлат думаси раисининг ўринбосари Пётр Толстой Россия Европа кенгашидан чиқиш қарорини “ўз ихтиёри билан” қабул қилгани, “бу вазмин ва ўйлаб туриб олинган қарор” эканини маълум қилган эди.
Куни кеча ЕКПА Россияни Европа кенгашидан “зудлик билан” чиқаришни бир овоздан маъқуллаган. Ассамблея баёнотида айтилишича, Россия Европа кенгаши низомини қўпол равишда бузадиган ҳаракатларни содир этган.
Украина президенти АҚШ Конгрессига мурожаат қилди
Украина президенти Владимир Зеленский АҚШ Конгрессига мурожаат қилди, деб хабар берди “Настояшчее время” телеканали 16 март куни.
Хабарда айтилишича, Зеленский ўз мурожаатида Вашингтонни Москвага нисбатан санкцияларни жорий этишда бардавом бўлишга чақирган. Зеленский фикрича, санкцияларнинг кучайтирилиши, Кремлга Украинага қарши урушни молиялаштиришга қўйилган энг катта тўсиқлардан бири бўлади.
Зеленский, шунингдек, Украина осмони узра парвозсиз ҳудудни яратиш, авиация ва зенит-ракета тизимлари билан таъминлаш борасида АҚШ ҳукуматидан ёрдам сўради.
Украинада рус босқини қурбонлари ҳар куни ёдга олинадиган бўлди
Украина президенти Владимир Зеленский Россия босқини оқибатида ҳалок бўлганларни бир дақиқа давомида сукут сақлаш билан ёдга олиш тўғрисидаги фармонни имзолади.
Фармонга асосан, бундан буён ҳар куни соат 9:00 да ҳалок бўлганлар бир дақиқа сукут сақлаш билан ёдга олиниши шарт. Бу ҳақда Озодлик радиосининг “Настояшчее время” телеканали 16 март куни хабар берди.
Телеканал хабарида таъкидланишича, Зеленский Украина халқига мурожаатида: “Ўз умрини берган украиналикларни эслаймиз. Ҳарбийларни ва фуқароларни, катта ёшдагиларни ва болаларни. Агар Россия бу урушни бошламаганида яшаши мумкин бўлган ҳаммани эслаймиз”, -деб айтган.