Украинага ҳужум: Сбербанк доллар жўнатмаларини тўхтатди. Уруш хроникаси

март 07, 2022

Россиянинг Украинага босқинининг тўртинчи ҳафтаси бошланди.
16 март куни Мариуполь шаҳрида юзлаб одам яширинган Драма театри бомбаланди. Украина ҳукумати рус ҳарбийлари ўғирлаб кетган Мелитополь мэрини озодликка чиқаришга муваффақ бўлди.
Владимир Зеленский видеоалоқа орқали АҚШ Конгрессининг иккала палатаси олдида нутқ сўзлаб, уларни Украинага ҳарбий ёрдамни оширишда давом этишга чақирди ва тез орада катта миқдорда қурол-яроғ олишга эришди.
БМТ Халқаро суди Россиядан Украинадаги урушни дарҳол тўхтатишни талаб қилди. Россия 26 йил аъзо бўлиб келган Европа Кенгашидан четлатилди.
Путин Украинадаги “амалиёт” муваффақиятли олиб борилаётгани ва Россия жамиятини урушга қарши чиқаётган “миллат хоинлари”дан тозалаш кераклиги ҳақида гапирди.
Британия Мудофаа вазирлиги Россия жанглардаги талафотлари ўрнини тўлдириш учун янги кучларга тобора муҳтож бўлаётганини маълум қилди. Вазирликка кўра, эндиликда Россия қаттиқ ҳимояланаётган Украина армиясига қарши ҳужум амалиётларини олиб боришда қийналиши турган гап.
Украина ҳудудига бостириб кирган кундан бери Россиянинг етти мингдан зиёд ҳарбий хизматчиси ҳалок бўлди. Бу 20 йил давомида Ироқ ва Афғонистондаги жангларда ўлдирилган америкалик аскарларнинг умумий сонидан кўп, деб ёзади The New York Times АҚШ разведкаси маълумотларига таянган ҳолда.
Россия аҳолисининг қарийб тўртдан уч қисми Украина билан урушни қўллаб-қувватлайди ва бундан ғурур, қувонч, ҳурмат, ишонч ва умид каби ижобий ҳисларни туяди. Россиядаги мустақил социологлар гуруҳи томонидан февраль ойи охирлари ва мартнинг ўрталарида ўтказилган икки сўровнома натижалари шуни кўрсатмоқда.

АҚШ Россияни Украинада ядровий хавфсизлик тамойилларини бузганликда айблади

Қўшма Штатлар Россияни Украинада ядровий хавфсизлик тамойилларини бузганликда айблаб, рус қўшинларидан атом электр станцияларини ўққа тутишни тўхтатишни талаб қилди.

АҚШ Энергетика вазири Женнифер Гранҳолм Твиттерда, радиация мониторинги тизимлари Украинанинг аксарият қисмида ҳамон ишлаяпти, деб ёзди.

Гранхолм Вашингтон Чернобил АЭС, шунингдек, Запорожье АЭСларида радиация мониторинги маълумотлари йўқлигидан хавотирда эканини қўшимча қилди.

Иккала объект ҳам ҳозир Россия кучлари назорати остида.

Украина энергетика вазири Герман Галушченко ҳам аввалроқ мамлакатдаги атом электр станциялари ва электр тармоқларининг аҳволи ҳақида гапирган: "Ишғол остидаги ҳар қандай ядровий иншоот аллақачон хавф туғдиради", - деган эди Украина вазири.

Украина Бош прокуратураси: Уруш бошланганидан бери 79 нафар бола ҳалок бўлди

Украинада давом этаётган урушнинг дастлабки 16 кунида 79 нафар бола ҳалок бўлди, юзга яқин бола яраланди.

Бу ҳақжа Украина Бош прокуратураси хабар берди.

Бош прокуратура баёнотида келтирилишича, 280 дан ортиқ таълим муассасаси вайрон бўлган, улардан 9 таси ер билан яксон қилинган.

Уруш туфайли Украинада етти миллион бола ўқиш имкониятидан маҳрум қолган.

Рэпер Face Россияни тарк этганини маълум қилди

Рэпер Face (ҳақиқий исми Иван Дремин) Россияни тарк этди ва Украинадаги урушга қарши чиқди.

"Мен ҳозир фуқаро сифатида деярли йўқман. Мен энди Россияга солиқ тўламайман, кетдим ва энди Россияга келмайман, Россияда бошқа концерт бермайман", - деб ёзди Рэпет ўз саҳифасида.

Путин, Шольц ва Макрон телефон мулоқоти ўтказяпти

Россия президенти Владимир Путин, Германия Канцлери Олаф Шольц ва Франция раҳбари Эммануэль Макрон ўртасида телефон мулоқоти бўляпти.

Франс-пресс агентлиги тарқатган бу хабарни Россия президентининг матбуот котиби Дмитрий Песков тасдиқлади.

Давомини ўқинг