Украинага ҳужум: Сбербанк доллар жўнатмаларини тўхтатди. Уруш хроникаси

март 07, 2022

Россиянинг Украинага босқинининг тўртинчи ҳафтаси бошланди.
16 март куни Мариуполь шаҳрида юзлаб одам яширинган Драма театри бомбаланди. Украина ҳукумати рус ҳарбийлари ўғирлаб кетган Мелитополь мэрини озодликка чиқаришга муваффақ бўлди.
Владимир Зеленский видеоалоқа орқали АҚШ Конгрессининг иккала палатаси олдида нутқ сўзлаб, уларни Украинага ҳарбий ёрдамни оширишда давом этишга чақирди ва тез орада катта миқдорда қурол-яроғ олишга эришди.
БМТ Халқаро суди Россиядан Украинадаги урушни дарҳол тўхтатишни талаб қилди. Россия 26 йил аъзо бўлиб келган Европа Кенгашидан четлатилди.
Путин Украинадаги “амалиёт” муваффақиятли олиб борилаётгани ва Россия жамиятини урушга қарши чиқаётган “миллат хоинлари”дан тозалаш кераклиги ҳақида гапирди.
Британия Мудофаа вазирлиги Россия жанглардаги талафотлари ўрнини тўлдириш учун янги кучларга тобора муҳтож бўлаётганини маълум қилди. Вазирликка кўра, эндиликда Россия қаттиқ ҳимояланаётган Украина армиясига қарши ҳужум амалиётларини олиб боришда қийналиши турган гап.
Украина ҳудудига бостириб кирган кундан бери Россиянинг етти мингдан зиёд ҳарбий хизматчиси ҳалок бўлди. Бу 20 йил давомида Ироқ ва Афғонистондаги жангларда ўлдирилган америкалик аскарларнинг умумий сонидан кўп, деб ёзади The New York Times АҚШ разведкаси маълумотларига таянган ҳолда.
Россия аҳолисининг қарийб тўртдан уч қисми Украина билан урушни қўллаб-қувватлайди ва бундан ғурур, қувонч, ҳурмат, ишонч ва умид каби ижобий ҳисларни туяди. Россиядаги мустақил социологлар гуруҳи томонидан февраль ойи охирлари ва мартнинг ўрталарида ўтказилган икки сўровнома натижалари шуни кўрсатмоқда.

Россия кучлари Мариуполда масжидни ўққа тутган

Россия қўшинлари Мариуполнинг Приморский туманидаги масжидни ўққа тутган. Бу ҳақда Украина Ташқи ишлар вазирлиги хабар берди. Вазирликнинг билдиришича, масжидда саксондан ортиқ одам, жумладан аёл ва ёш болалар ўқ ҳужумидан яширинган. Улар орасида Туркия фуқаролари ҳам борлиги айтиляпти.

Португалияда Абрамовичга фуқаролик олишда ёрдам бергани гумон қилинаётган раввин қўлга олинди

Раввин Даниел Литвак россиялик миллиардер Роман Абрамовичга ноқонуний равишда Португалия фуқаролигини олишда ёрдам берганликда гумон қилинмоқда.

Литвак Португалия ва Испанияда қувғин қилинган Пиреней ярим оролидаги яҳудий жамоаси Сефардим авлодларини сертификатлаш учун масъул бўлган. Тахминларга кўра, ҳибсга олинган шахс Абрамовичга Сефард яҳудийларининг авлоди эканлиги ҳақида гувоҳнома берган. Бу миллиардерга Португалия фуқаролигини олиш ва Европа Иттифоқининг 27 давлатидан исталган бирида яшаш ҳуқуқини олиш имконини берди.

Зеленский: "Бу Ватан уруши. Бу халқ уруши"

Украина президенти Владимир Зеленский 12 март кунги видео мурожаатида: "Босқинчилар бизнинг еримизда, улар Украина ерида бегона эканликлари ва ҳеч қачон қабул қилинмаслигини кўришлари керак", - деди.

"Илтимос, уларни эшитинг, Москвада! Агар Мелитополда ишғолга қарши икки минг киши чиқса, урушга қарши қанча одам бўлиши керак? Тўғриси, адолатли бўлсин?", - дея қўшимча қилди Зеленский.

Зеленский ҳукумат парламентга ёқилғига қўшилган қиймат солиғи ва акцизларни бекор қилишни таклиф қилгани, бунинг натижасида армия, аҳоли ва экиш мавсумида бензин ва дизел етарли бўлиши кераклигини айтди.

"Бу Ватан уруши. Бу халқ уруши. Бу бизнинг урушимиз. Мустақиллигимиз учун уруш, " деди Зеленский.

Шольц ва Макрон Путинга яна қўнғироқ қилди, натижа аввалгидай

Европа Иттифоқининг икки йирик давлати Франция ва Германия раҳбарлари Россия президенти Владимир Путин билан яна телефон орқали гаплашиб, украиналикларни ўққа тутиш ва ўлдиришни тўхтатишни сўрашди.

Уч кишилик суҳбат тахминан бир соат давом этди, деди Германия канцлери Олаф Шольцнинг матбуот вакили.

Бунгача Франция ва Германия раҳбарлари Украина президенти Владимир Зеленский билан гаплашган.

Европа етакчиларининг бундан олдинги мулоқотлари ҳам натижасиз якун топган эди.

Уруш пайтида Макрон Путин билан тўққиз марта гаплашган. Франция президенти ташқи дунё билан алоқа қилишдан қочадиган Россия раҳбари билан алоқа каналини сақлаб қолиш муҳимлигини айтиб келади.

Давомини ўқинг