Украина Қуролли Бош Штабининг 13 март кунги маълумоти
Мудофаа кучларининг аҳволи, тузилиши ва ҳаракатлари характери ўзгаришсиз қолмоқда.
Қўлга киритилган маълумотларда, Россиянинг кўплаб ярадор бўлган аскарлари Беларуснинг жануби-шарқидаги тиббиёт муассасаларида даволанмоқда.
Хирургик операцияларни ўтказиш учун қон етишмаяпти. Фуқаролар орасида қон топширишни уюштириш бўйича ишлар олиб борилмоқда.
Россия ўз йўқотишлари ўрнини тўлдириш учун янги бўлинма ташкил этмоқда. Жумладан, Петропавлоска-Камчатскийдаги Тинч океани флотининг 40-алоҳида денгиз пиёда бригадаси таркибидан 1500 аскар Украина уришига жалб қилинмоқда.
Украина ҳарбийлари бир сутка ичида Россиянинг иккита вертолёти, иккита қиручи самолёти ва иккита дронини уриб туширди.
Россиянинг Украинадаги урушнинг 17 куни тўғрисидаги маълумоти
Россия Мудофаа вазирлигида 13 март куни ўтган брифингда қуйидагилар билдирилди:
Россия армияси Украинада 14 километрга силжишга муваффақ бўлди. Донецк вилоятига қарашли Благодатное, Владимировка, Павловка ва Никольское аҳоли пунктлари устидан назорат ўрнатилди.
Шу кунгача Украинанинг 3 687 объекти ишдан чиқарилди.
Украинанинг Су-24 самолёти ва иккита учувчисиз бошқариладиган аппарати уриб туширилди.
Россия Яворив полигонини ўққа тутгани оқибатида камида 35 киши ҳалок бўлди
Россия Яворив полигони сифатида танилган Тинчликпарварлик ва хавфсизлик халқаро марказига ҳаводан берган зарба оқибатида камида 35 киши ҳалок бўлди, 134 киши яраланди. Бу ҳақда Львов вилоят давлат маъмурияти 13 март куни маълум қилди.
Россия полигонга отган ракеталарнинг бир қисмини ҳаводан мудофаа тизими уриб туширишга муваффақ бўлган. Львов расмийларига кўра, рус самолётлари Саратовдан учиб, Қора денгиз акваториясига кирган ва ўша ҳудуддан ракета отган.
Мариуполнинг қамал қилиниши оқибатида тинч аҳолининг 1,5 мингдан кўпроғи ҳалок бўлди
Россия қўшинлари Мариуполни қамал қилгани оқибатида 1 582 тинч аҳоли ҳалок бўлди, деб хабар берди 13 март куни Украина Ички ишлар вазирлиги.
“12 кундан бери давом этаётган қамал пайтида аҳоли яшовчи бинолар аёвсиз ўққа тутилди. Бунинг оқибатида рус ҳарбийлари томонидан1582 мариполлик ҳалок бўлди. Россия 2014 йилдан бери Украинага содиқлигини айтиб, ўз аҳдидан чекинмаётган тинч аҳолидан шундай йўл билан ўч олди. Бундай ҳаракатни ҳарбийлар эмас, айбсиз тинч одамларни гаровга олган террорчилар амалга оширади”,-деди ўз баёнотида вазир ўринбосари Мэри Акопян.
Унга кўра, Мариупол ҳамон қамалда қолмоқда ва мудофаани давом эттирмоқда. Россия армияси 3 мартда шаҳарни тўлиқ қамалга олишга эришган. Айни пайтда Мариуполда электр энергияси, алоқа, газ, иситиш ва сув мавжуд эмас.