“Время” дастури ёйинида урушга қарши плакат кўрсатган муҳаррир аёлга 30 минг рубль жарима солинди
“Биринчи канал” ходими Марина Овсянниковага суд 30 минг рубль жарима тайинлади, дея хабар қилди “Медиазона” нашри.
Муҳаррир аёл аввалроқ “Время” ахборот дастури жонли ёйинида кадрга кириб, урушга қарши плакатни намойиш этган. Плакатда “Урушни тўхтатинг! Пропагандага ишонманг. Бу ерда сизни алдашмоқда” деб ёзилган эди.
Овсянникова плакатли акция учун эмас, урушга қарши норозилик намойишларига чиқиш чақириғи учун судлангани, ҳозирда Россия Тергов қўмитаси жиноят иши очиш тўғрисидаги масалани ҳал қилаётгани айтилмоқда.
Киев яқинида Fox News телеканалининг етакчи журналистларидан бири ҳалок бўлди
Россиялик ҳарбийлар томонидан Киев яқинидаги Горенка қишлоғи ўққа тутилиши оқибатида АҚШнинг Fox News телеканали тасвирчиси Пьер Закржевский қурбон бўлди.
Fox News бош директори Сюзанна Скотт 55 ёшли Закржевский Ироқ ва Афғонистондан Сурия ва Украинагача бўлган қарийб барча халқаро қуролли тўқнашувларни ёритиб келганини билдирди. Журналистнинг ҳамкасблари Закржевскийни “ўз ишини устаси” деб аташиб, унинг вафоти “қалбларда битмас яра” қолдирганини айтишган.
Закржевский билан бирга телеканалнинг яна бир журналисти Бенджамин Холл ҳам тан жароҳати олган. Кейинроқ врачлар оғир ярадор бўлган Холл болдирининг бир қисмини кесиб ташлашга мажбур бўлишган. Бундан ташқари, Украина нашрлари хабарларига кўра, маҳаллий журналист Александра Кувшинова ҳам россиялик ҳарбийлар ўқига учган.
Россия: Федерал телеканалларда ишловчи бир неча ходим ишдан бўшаш ҳақида ариза ёзди
Россиядаги федерал телеканалларида ишлаган бир неча журналист ишдан кетиш ҳақида ариза ёзишган.
“Медиазона” нашри хабарига кўра, ишдан кетган журналистлар орасида ўзбекистонлик томошабинларга ҳам яхши таниш бўлган ва “Биринчи канал”да Европадаги воқеаларни ёритиб келган мухбир Жанна Агалакова, НТВнинг Брюсселдаги мухбири Вадим Глускер бор.
Ўз телеканалларида 20 йилдан ортиқ ишлаган бу икки журналист Россия қўшинлари Украинага бостириб кириши ортидан ишдан бўшашган. Глускер 2 мартдан бери ишламаётганини айтган, Агалакова нима сабабдан ишдан кетгани “ойдай равшан” эканини урғулаган.
Аввалроқ НТВда 2006 йилдан бери бошловчилик қилиб келган Лилия Гильдеева ишдан бўшаганини билдирган эди.
Россиялик таниқли журналист Роман Супер 15 март куни Фейсбук тармоғидаги ўз саҳифасида, ундаги маълумотларга кўра, ВГТРКнинг (Бутунроссия давлат телерадиокомпанияси) “Вести” ахборот дастури ходимлари Россиянинг Украинага ҳарбий тажовузи ҳамда давлат ахборот сиёсатидан норози бўлиб, оммавий равишда ишдан бўшаётганлари ҳақида ёзган. Бу маълумот ҳозирча расман тасдиқланган эмас.
Зеленский Украина учун оғир кунда қамалдаги Киевга келган славян давлатлари бош вазирларига миннатдорлик билдирди
Украина президенти Владимир Зеленский ўз мамлакатида уруш авжига чиққан пайтда Киевга келган Польша бош вазири Матеуш Моравецкий, бош вазир ўринбосари Ярослав Качиньский, Чехия бош вазири Петер Фиала ва Словения бош вазири Янез Яншага миннатдорлик билдирди.
“Украина учун оғир бўлган бу дамда Киевга ташрифингиз сиз тарафингиздан бўлаётган кучли дастакдан далолатдир. Биз буни жуда қадрлаймиз”, дея иқтибос келтирган Зеленский сўзларидан Украина президенти матбуот хизмати.
