Линклар

Шошилинч хабар
11 апрел 2021, Тошкент вақти: 03:15

Ўзбекистон хабарлари

Икки ой ичида автоаварияларда 265 киши ҳалок бўлди

ИИВ ЙҲХББ ахборот хизмати инфографикаси.

Ўзбекистонда 2021 йилнинг январь—февралида содир этилган йўл-транспорт ҳодисаларида 265 киши ҳалок бўлди.

ИИВ ЙҲХББ ахборот хизматининг билдиришча, ўтган икки ойи давомида 802 та йўл-транспорт ҳодисаси бўлган, Бу ҳодисаларнинг 255 таси ўлим билан якунланган.

Билдирилишича, 265 кишининг 188 нафари авария жойида, 77 нафари шифохоналарда вафот этган. Бундан ташқари йўл-транспорт ҳодисаларида жами 724 киши тан жароҳатлари олган.

Аварияларнинг 393 тасига пиёдалар, 103 тасига болалар ва 14 тасига маст ҳайдовчилар сабаб бўлган. 28,4 фоиз ҳолатда авариялар пиёдаларнинг кўчани нотўғри жойидан кесиб ўтиши оқибатида юз берган.

Энг кўп авариялар Тошкентда (116), Тошкент вилоятида (109), Наманган вилоятида (79) содир этилган.

Ўзбекистонда 2020 йилда авариялар оқибатида жами 1962 киши ҳалок бўлган.

Кун янгиликлари

МХХнинг собиқ марказий биноси бошланғич 1 сўм нархда сотувга қўйилди

Собиқ Миллий хавфсизлик хизмати (Давлат хавфсизлик хизмати)нинг Тошкент шаҳар, Юнусобод тумани, Сайилгоҳ кўчасида жойлашган бош қароргоҳи аукцион савдоларига қўйилди.

Бу ҳақда Давлат активларини бошқариш агентлиги 10 апрель куни маълум қилди.

Эълонда таъкидланишича, ушбу давлат активидан келгусида офис, савдо, савдо-кўнгилочар, маданий-хордиқ, спорт, туристик ва бошқа хизматлар кўрсатиш фаолияти йўналишларидан бири ёки бир нечтасини амалга оширилиши талаб этилади.

Мазкур бино дохил 15 та объект Давлат активларини бошқариш агентлиги расмий сайтига жойланган “Хусусий секторга сотиладиган давлат кўчмас мулк объектлари рўйхати”га киритилган.

Бу рўйхат Ўзбекистон президентининг ўтган йил 27 октябрида имзоланган “Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида”ги фармонига илова қилинган.

Фармонда давлат объектларини “ноль” харид қийматида сотиш амалиёти бекор қилиниши ҳамда давлат комиссияси қарорларига асосан инвестиция ҳамда ижтимоий мажбуриятлар асосида “1 сўм” бошланғич қийматда оммавий савдоларга чиқарилиши белгиланган.

ИИВ милиция идораларида рўй бергани айтилган икки ўлим юзасидан изоҳ берди

Бир ҳафта ичида икки нафар эркак ИИБ идорасида бўлиб ўтган суҳбатдан сўнг кўп ўтмай вафот этгани ижтимоий тармоқларни ларзага солди.

Ўзбекистон Ички ишлар вазирлиги эса ҳар икки ҳолатда ички ишлар ходимларининг айби йўқ, дея баёнот берди.

Биринчи ўлим Фарғона вилоятининг Қува туманида, иккинчиси эса Тошкентнинг Юнусобод туманида шу ой бошида рўй берди.

Ижтимоий тармоқларда эса уларни милиция ходимлари қийнаб ўлдиргани ҳақида айтилди.

Фарғона вилоятининг Қува туманида 20 ёшли А.А. 31 март куни тиббий ниқоб тақмасдан кўчада юргани учун ўзи яшайдиган маҳалла таянч пунктида профилактика инспекторлари томонидан сўроқ қилингани ортидан ҳаётдан кўз юмганди.

Вазирликнинг маълум қилишича, ходимлар тушунтириш ишлари билан чекланишган, ҳолат юзасидан баённома тузилмаган, томонлар келишиб ўз уйига тарқалган.

ИИВ матбуот хизмати раҳбари Шоҳрух Ғиёсов марҳумга ИИБ биносида жароҳат етказилгани ҳақидаги хабарларни рад этди.

Ғиёсовга кўра, А. А.нинг ўлимига ўткир юрак-ўпка етишмовчилиги, юрак ишемик касаллиги, икки томонлама буйраклар поликистози сабаб бўлган.

Аммо, марҳумнинг яқинларига кўра, шахсини аниқлаштириш мақсадида участкавой хонасига олиб келиш жараёнида А.А.га куч ишлатилган, бунинг оқибатида марҳумнинг курткаси йиртилган.

ИИВ Тошкент шаҳрининг Юнусобод туманидаги ўлимда ҳам милиция ходимларининг айби йўқ демоқда.

Интернетда тарқалган хабарларда 41 ёшдаги эркак Юнусобод туманидаги ички ишлар идорасига кириб чиққанидан сўнг вафот этган.

Бироқ расмий баёнотда эркак 45 дақиқа давом этган сўровдан сўнг қўйиб юборилгани таъкидланади.

Вазирликка кўра, 1 апрел куни ИИБ биносида сўроқ қилинган шахслардан бирининг мурдаси 2 апрел куни эрталаб топилган.

Суд-тиббиёт экспертизасидан сўнг марҳумнинг бир неча касалликлари, хусусан, юрак ишемик касаллиги, гематоген сил, полиорган етишмовчилиги, икки томонлама ўпка плеврити, бош мия ва ўпка шиши, гиёҳвандлик, алкоголдан заҳарланиш, сурункали гепатит бўлгани аниқланган.

Бироқ экспертиза хулосасига кўра фуқаронинг ўлими ушбу касалликлар натижасида юзага келгани ёки эркак бошқа нарсадан ўлганига аниқлик киритилмаган.

ФВВ чигирткаларга қарши кимёвий кураш бошлаганини маълум қилди

Ўзбекистон Фавқулодда вазиятлар вазирлиги мамлакат бўйлаб чигирткаларга қарши курашиш тадбирлари бошланганини маълум қилди.

“ФВВ ҳамда қишлоқ хўжалиги вазирлиги мутахассислари ўзаро ҳамкорликда жорий йилда ҳашаротлар таҳдид қилиши мумкин бўлган тахминий экин майдонлари ҳисоблаб чиқилган. Бу деярли 600 минг гектар қир-адир ерлардир", - деди ФВВ матбуот котиби Мурод Содиқов.

Унинг айтишича, Хоразм, Қашқадарё ва Сурхондарё вилоятларида чигирткаларга қарши кимёвий тадбирлар бошланган. Тез кунларда бу каби тадбирлар Бухоро, Самарқанд ва Сирдарё вилоятларида ҳам олиб борилади.

Фарғона водийси ҳудудларида эса профилактик тадбирлар май ойининг бошида ўтказилиши режалаштирилган.

Жараёнга ўнлаб дельтапланлар ва юзлаб қишлоқ хўжалиги техникалари жалб этилмоқда.

Ўтган йил баҳорида мамлакатнинг бир қанча ҳудудларида чигирткалар кўпайиб, экинларни пайхон қилгани ҳақида Озодлик хабар берганди.

Ўзбекистоннинг Қашқадарё вилояти расмийлари Туркманистоннинг Лебаб вилоятида чигиртка кўпайгани ҳақида Туркманистон расмийларидан огоҳлантириш хати олганини тасдиқлагандилар.

Бухоро ва Хоразм вилоятининг Туркманистонга қўшни далаларида меҳнат қиладиган деҳқонлар чигиртка кўпайганини айтишган.

Мирзиёев икки вилоят ҳокими ўринбосарларини ишдан олди, ҳокимларга уч ой муҳлат берди

Мирзиёев вилоят ҳокимларини қўл остидаги амалдорларни "ишлата олмаётганлиги" учун танқид қилган.

8 апрель кунги видеоселектор мажлисида президент Шавкат Мирзиёев вилоят ҳокимларини қўл остидаги амалдорларни "ишлата олмаётганлиги" учун танқид қилди.

Тадбиркорлик масалаларига бағишланган видеоселектор чоғида Қашқадарё ва Навоий вилоятларида кичик бизнес ишлаб чиқарган саноат маҳсулотлари ҳажми республика кўрсаткичидан икки баробар камлиги айтилди.

Президентга кўра, кейинги 3 ой давомида вазият ўзгармаса, вилоят ҳокимлари ишдан олинади.

«Вилоят ҳокимлари қаттиқ туришмаяпти, ишламаганни ишдан олмаяпти. Агар сизлар ишдан олмасангиз, мен сизларни ишдан оламан. Кичик ва ўрта бизнесни қўллаб-қувватламаган раҳбар раҳбар эмас.

Қанча пул бермайлик, шароит яратмайлик, қуйи поғонадаги раҳбарлар вазиятни тушунмас экан, оғир пайтларда, пандемия шароитида қилган шунча ҳаракатларимиз зое кетаверади. Бугун жуда кўп одамни ишдан оламиз, сизлар сиёсатни тушунмаяпсизлар», деди президент.

Мажлисда таъкидланишича, инфратузилмадаги муаммолар туфайли 320 та тадбиркор сўнгги 2 йилда импорт қилган 220 миллион долларлик асбоб-ускуналарини ишга тушира олмаяпти. Электр қуввати паст бўлгани сабабли биргина Янгиҳаёт туманидаги 24 та корхонада 2,5 мингта иш ўрни ва экспортдан йилига 25 миллион доллар зарар кўрилмоқда.

Ана шу муаммоларни ҳал қилиш юзасидан саноат зоналарини инфратузилма билан таъминлашга 2021 йилда 2 триллион сўмдан зиёд маблағ ажратилаётгани таъкидланди. Шу йил охирига қадар 168 та саноат зонаси 405 километр сув, 362 километр газ, 468 километр электр энергияси ва 104 километр йўл билан таъминланиши кўзда тутилган.

“Жуда оғир йилларда яшаяпмиз. Ҳар куни изланиш, интилиш ва пировард мақсадга ишлаш керак. Тадбиркорни қўллаб-қувватламасак, уларга шароит яратмасак, тадбиркорларни кўпайтирмасак, шаҳар ва туманларда маҳаллий бюджет кўпаймайди-ку.

Биз қанчалик кўп маблағ бермайлик, фармон-қарорлар қабул қилиб, шароит яратмайлик, қуйи поғонадаги раҳбарлар дунёқарашини ўзгартириб, тадбиркор билан дўст бўлиб ишламаса, натижа бўлмайди”, деди президент.

Йиғилишда бир неча вилоят раҳбарларининг ўринбосарлари ва сектор раҳбарлари ишдан бўшатилди, Қашқадарё ва Навоий вилоятлари ҳокимларига ҳайфсан эълон қилинди.

Мирзиёев вилоят ҳокимларига вазиятни ўнглаш учун 3 ой муҳлат берди.

ССВ: Коронавируснинг жорий йилдаги кунлик ўсиши илк бор 200 дан ошди

1 апрелдан Ўзбекистонда аҳолини оммавий эмлаш бошланган

Ўзбекистон Республикаси Соғлиқни сақлаш вазирлиги 8 апрель куни мамлакатда коронавирус қайд этилиши 2021 йилда илк бор 200 нафардан ошганини маълум қилди.

«2021 йил 8 апрель ҳолатига кўра, Ўзбекистонда коронавирус инфекцияси қайд этилганлар сони 84529 (+207) нафарни ташкил этмоқда», дейилади вазирлик маълумотида.

Расмий маълумотга кўра, Самарқанд ва Тошкент вилоятларида ҳам кунлик ўсиш юқорилиги қайд қилинмоқда. Бу борадаги энг юқори кўрсаткичлар олдинги тзлқинларда бўлгани каби, пойтахт аҳолиси ҳиссасига тўғри келади.

Кунлик кўрсаткичга киритилган касалларнинг 139 нафари Тошкент шаҳрида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

Пандемия бошидан буён Ўзбекистонда коронавирус инфекцияси қайд этилганларнинг умумий сони 84509 нафарни ташкил этмоқда.

Вазирликка кўра, ҳозирги пайтда шифохоналарда 1480 нафар бемор даволанмоқда, шундан 229 нафари оғир, 104 нафари эса ўта оғир аҳволда.

Коронавирусдан вафот этганларнинг расмий сони 634 кишига етди. Соғлиқни сақлаш вазирлигининг билдиришича, 7 апрель куни яна бир бемор вафот этган.

Президент Шавкат Мирзиёев ўтган йилгидан фарқли "ҳеч қаер ёпилмаслиги, аммо тартиб-интизом кучайтирилиши"ни айтган.

"Хавф ёнимизда юрибди. Шунинг учун огоҳ бўлишимиз керак. Олдин қандай ишлаган бўлсак, шу тартибни тиклаймиз. Худо кўрсатмасин, шунча қилган ҳаракатимиз бекорга кетиши мумкин. Иқтисодиёт нуқтаи назаридан жуда катта марралар қўйганмиз. Агар ёпилиб қолсак, бу натижаларга эришолмаймиз. Ҳеч қаерни ёпмаймиз, лекин тартиб-интизомни кучайтирамиз", деб айтган президент 1 апрель кунги ҳукумат йиғилишида.

1 апрелдан Ўзбекистонда аҳолини оммавий эмлаш бошланган.

Дин ишлари қўмитаси раиси ўзгарди. Ўзбекистонда Рамазон ойи 13 апрелдан бошланади

Президент қарорида Рамазон ойини карантин қоидаларига риоя қилган ҳолда ўтказиш таъкидланган.

Ўзбекистон Республикаси Президентининг Рамазон ойи муносабати билан қабул қилинган 8 апрелдаги қарорига мувофиқ, мамлакатда муқаддас ой шу йилнинг 13 апрель, сешанба куни бошланиши эълон қилинди.

Қарорда ойга тайёргарлик кўриш ва уни ўтказиш билан боғлиқ кўрсатмалар берилган.

Президент кўрсатмасига мувофиқ, Рамазон ойини карантин қоидаларига риоя қилган ҳолда маҳаллий давлат ҳокимияти ва жамоат ташкилотлари назоратида миллий қадриятларга хос равишда ўтказилиши кўзда тутилган.

Президент қарорида Ўзбекистон Мусулмонлари идораси уламолари томонидан Ислом дини манбалари ва астрономик маълумотларга таянган ҳолда 2021 йилда Рамазон ойининг биринчи куни шу йил 13 апрель – сешанба кунига тўғри келиши инобатга олинган.

Ҳолбуки, жуда кўп ҳолларда Рамазон ҳилолининг кўриниши муносабати билан Рамазон ойини бошлаш турли мамлакатларда турлича кечади.

Айни пайтда президент қарори билан Вазирлар Маҳкамаси ҳузуридаги Дин ишлари қўмитасига янги раис тайинланди.

Хабарларга кўра, Содиқ Тошбоев 2018 йилдан буён Андижон вилояти ҳокимининг жамоат ва диний ташкилотлар билан алоқалар бўйича ўринбосари лавозимида ишлаб келган.

2019 йилнинг сентябр ойи бошларида лавозимга тайинланган Абдуғофур Аҳмедов бошқа ишга ўтказилган.

Фарғонадан Россияга помидор ва қалампирдан ташқари мева-чеваларни олиб киришга рухсат берилди

Фарғонадан экспорт қилинган туршакда капр қўнғизининг топилгани ортидан бу вилоятдан Россияга қурқ мевалар олиб кириш тақиқланган эди. Россельхознадзор сайтидан олинган сурат.

Россиянинг Ветеринария ва фитосанитария назорати бўйича федерал хизмати (Россельхознадзор) Фарғона вилоятидан помидор ва қалампирдан бошқа барча ўсимлик маҳсулотларини олиб киришга рухсат берди.

Россельхознадзор расмий сайтида билдирилишича, Ўзбекистон ҳукуматининг кафолати остида 7 апрелдан бошлаб Фарғонада етиштирилган мева-чеваларнинг Россияга киритилишига рухсат берган. Айни пайтда Фарғонада етиштирилган помидор ва қалампирни Россияга олиб кириш тақиқланади.

Россельхознадзор 2020 йилнинг 7 декабрида Фарғона вилоятидан ҳар қандай ўсимлик маҳсулотларини олиб киришни тақиқлаган эди. Бунга Фарғонадан экспорт қилинган туршакда капр қўнғизининг топилгани сабаб бўлган.

Россельхознадзор 2020 йилнинг 26 ноябридан бошлаб Фарғона вилоятидан, 4 декабрдан бошлаб Навоий вилоятидан,11 декабрдан бошлаб Қашқадарё вилоятидан Россия Федерацияси ҳудудига помидор ва қалампир олиб киришни тақиқлаган эди. Бунга Tomato brown rugose fruit (ToBRFV) вируси аниқлангани сабаб бўлган.

Коронавирусдан яна бир бемор вафот этди. Беморлар сони бўйича Тошкент олдинда

Ўзбекистонда коронавирусга чалинганларнинг 50 мингги Тошкент шаҳрида аниқланган.

Ўзбекистонда коронавирусдан вафот этганлар сони, 7 апрель ҳолатига кўра, расман камида 634 кишига етди. Соғлиқни сақлаш вазирлигининг 8 апрель куни билдиришича, кеча яна бир бемор вафот этган.

7 апрель куни яна 195 киши коронавирусга чалинди. Уларнинг 132 нафари Тошкент шаҳрида. Бу билан Ўзбекистонда коронавирус инфекцияси қайд этилганлар сони 84322 нафарни ташкил этмоқда. Улардан 50 мингга яқини Тошкентда аниқланган.

Касалликдан соғайганлар жами 82234 нафарга етди ва соғайиш кўрсаткичи 98 фоизни ташкил қилмоқда.

Айни пайтда тиббиёт муассасаларида даволанаётган 1454 нафар бемордан 229 нафари оғир, 104 нафари эса ўта оғир аҳволда.

Тошкентда 17 ёшли бола ўз тенгдошини пичоқлаб қўйди

Тошкент шаҳар Олмазор туманида 17 ёшли Абдулазиз Ж., 04 апрель куни 17 ёшли Султонхўжа А.,ни пичоқлаб қўйди. Айни пайтда пичоқланган ўсмир касалхонада даволанмоқда.

Ички ишлар вазирлиги ҳузуридаги Тергов департаменитининг 7 апрелда билдиришича, икки ўсмир Олмазор тумани Беруний кўчасидаги “Mir Cinema” дўкони олдида жанжаллашиб қолган. Жанжал пайтида Абдулазиз Ж., пичоқ билан Султонхўжа А., танасининг турли жойларига пичоқ урган.

Тиббий маълумотда айтилишича, Султонхўжа А.,да “қорин олд, иккала курак, чап бел соҳаси, иккала сон ташқи юзаси ва ўнг думба қисмида кесилган” жароҳатлар мавжуд.

Абдулазиз Ж.,га нисбатан Жиноят кодексининг 277-моддаси 2-қисми “в” банди (безорилик, яъни совуқ қуролни намойиш қилиб, уни қўллаш) асосида жиноят иши қўзғатилиб, процессуал тартибда ушланган.

Ўзбекистонда пичоқ қўллаб турли жиноятларни содир этиш тез-тез содир этилади. Бунинг ортидан Маъмурий Кодексга совуқ қуролни ноқонуний олиб юрганларга жавобгарлик белгиланиши тўғрисидаги ўзгартиш киритилган.

Ўзбекистонда коронавирусга қарши эмланганлардан 71 нафарида ножўя таъсир сезилди

6 апрелга қадар 49 200 киши вакцинация қилинган.

Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков 7 апрель куни АОКАда ўтказилган брифингда коронавирусга қарши эмланган 71 кишида ножўя таъсир сезилгани ҳақида маълум қилди.

Унга кўра, 6 апрелга қадар 49 200 киши вакцинация қилинган. Шундан 29 минг 860 киши AstraZeneca, 19 минг 742 киши хитой-ўзбек ZF-UZ-VAK2001 билан эмланган.

Ножўя таъсир сезилган 71 кишининг 45,7 фоизида тана ҳароратининг 37,5 даражадан бироз ошиши, 21,2 фоизида тана оғриқлари, 14,1 фоизида эмланган жойнинг қичишиши, 11,2 фоизида эмланган жойнинг оғриши, 2,2 фоизида асабийлашиш, ҳолсизланиш ва қўрқиш кузатилган.

Отабеков ножўя таъсир айнан қайси вакцинага алоқадор экани ҳақида маълумот бермади.

Дин ишлари қўмитаси 17 майдан Ҳаж ва Умрага рухсат берилиши эҳтимол эканини билдирди

Дин ишлари бўйича қўмита раисининг биринчи ўринбосари Музаффар Комилов Саудия Арабистони 17 майдан Ҳаж ва Умрага рухсат бериши эҳтимоли мавжуд эканини маълум қилди.

“Газета уз”нинг ёзишича, Музаффар Комилов Саудияда коронавирус билан боғлиқ эпидемиологик вазият Саудияда оғирлашгани муносабати билан Умра зиёрати тўхтатилганини айтган.

“Саудия Арабистони Ички ишлар вазирлиги баёнотидан келиб чиқсак, эҳтимол, агар вазият бироз барқарорлашса, 17 майдан улар очиши мумкин. Лекин ҳали улар Соғлиқни сақлаш вазирлигини хулосасига таянган ҳолда иш кўради”,-деган расмий.

Комиловга кўра, Ўзбекистон Дин ишлари қўмитаси айни пайтда бу масалада Саудия томони билан мунтазам ёзишмаларни олиб бормоқда.

5 апрель куни Саудия Aрабистони Ҳаж вазирлиги Рамазон ойида COVID-19`га қарши эмланган зиёратчилар учун муқаддас жойларни зиёрат қилишга рухсат берилиши мумкин эканини билдирган эди.

Тошкент бош инфекционисти Гулжаҳон Йўлдошева билан яна 4 киши судланди

Иллюстратив сурат.

Тошкент вилояти юқумли касалликлар шифохонаси собиқ бош шифокори Гулжаҳон Йўлдошева ва у билан бирга судланган яна тўрт кишига ҳукм ўқилди. Суд тўрт ой давом этди.

Маҳаллий нашрларнинг хабар беришича, суд ҳукми билан Гулжаҳон Йўлдошева 4 йил, шифохона реаниматологи Жаҳонгир Зиёдуллаев 3,5 йил, инфекционист шифокор Шейхназар Рўзметов 3 йил озодликдан чекланди.Шифохона ходимларидан яна икик нафари 2 йилллик аҳлоқ тузатиш ишларига ҳукм қилинди.

Гулжаҳон Йўлдошева Жиноят кодексининг 167-моддаси 2-қисми “а, б, в, г” бандлари (растрата йўли билан талон-торож қилиш), 207-моддаси 3-қисми “а” банди (мансабга совуққонлик билан қараш), 209-моддаси 2-қисми “а” банди (мансаб сохтакорлиги)да назарда тутилган жиноятларни содир этган деб топилди.

Тошкент вилояти юқумли касалликлар шифохонаси бош шифокори Гулжаҳон Йўлдошева 2020 йилнинг 9 сентябрь куни қамоққа олинган эди. Ўшанда бош шифокор бюджетдан ажратилган 250,8 миллион сўмни талон-торож қилинганликда ва коронавирусга чалинган оғир аҳволдаги беморни соғайгани ҳақида сохта маълумот бериб, унинг ўлимига сабаб бўлганликда айбланганди.

Гулжаҳон Йўлдошева 2020 йилнинг август ойида маҳаллий матбуотга шифохона учун ускуналар ҳамда тиббий ходимлар учун мукофот пуллари берилмаётгани ҳақида билдирган эди. Мазкур баёнотидан кўп ўтмай у қамоққа олинган.

Бош прокуратура: “Effect.uz”нинг икки мухбири қидирувга берилди

Иллюстратив сурат.

“Effect.uz” ахборот агентлигининг 2 нафар мухбири ва яна 1 нафар аёл қидирувга берилди. Бу ҳақда Бош прокуратура 6 апрель куни расмий баёнот тарқатди.

Маълум қилинишича, жорий йилнинг январь ойида “Effect.uz” сайтида ушбу сайтнинг ходимлари жиноят ишлари бўйича Термиз тумани суди раиси хизмат хонасига бостириб кириб, суд мажлисида иштирок этиш ва жараённи тасвирга олишни талаб қилишганлиги ҳақида видеоёзув чиқарилган.

Судьялар олий кенгаши мазкур видеоёзувга ҳуқуқий баҳо бериш илтимоси билан Бош прокурор номига тақдимнома киритган.

“Мазкур ҳолат юзасидан Сурхондарё вилояти Термиз тумани прокуратураси томонидан ўтказилган терговга қадар текширув натижаларига кўра, Жиноят кодексининг 236 ва 219-моддалари билан жиноят иши қўзғатилиб, тергов ҳаракатлари Сурхондарё вилоят прокуратураси томонидан олиб борилган”,-дейилади баёнотда.

Бош прокуратуранинг билдиришича, очилган жиноят иши юзасидан терговга чақирилган “Effect.uz”нинг 2 нафар мухбири ва яна бир аёл терговчи томонидан кўплаб марта чақиртирилган бўлса-да, сўроққа келмаган.

“Шунга кўра, тергов давомида 2 нафар шахсга нисбатан ЖКнинг 219 ва 236-моддалари билан сиртдан айб эълон қилиниб, суднинг ажрими билан “қамоққа олиш” эҳтиёт чораси ҳамда 1 нафари (аёл) га ЖКнинг 139 ва 140-моддалари билан сиртдан айб эълон қилиниб, “муносиб хулқ-атворда бўлиш тўғрисида тилхат” тарзидаги эҳтиёт чораси қўлланилган ва уларга нисбатан қидирув эълон қилинган”,-дейилади баёнотда.

Ўзбекистонда коронавирусга чалинганлар сони 84 мингдан ошди. Камида 633 киши ўлди

Тиббиёт муассасаларида 1439 нафар бемор даволанмоқда.

Ўзбекистонда, 6 апрель ҳолатига кўра, коронавирус инфекцияси қайд этилганлар сони 84127 нафарни ташкил этди. Ўтган бир сутка давомида яна 200га яқин кишида коронавирус аниқланган.

Соғлиқни сақлаш вазирлигининг билдиришича, коронавирусга чалиниш ҳолатлари бўйича кунлик рекорд кўрсаткич бўйича Тошкент ҳамон олдинда бормоқда. 6 апрель куни пойтахтда 140 бемор аниқланди.

Соғайганлар жами 82055 нафарга етди ва соғайиш кўрсаткичи 98 фоизни ташкил қилмоқда. Шунингдек, коронавирусга чалинган 1 нафар бемор вафот этиб, касалликдан ўлганлар сони 633 нафарга eтди.

Айни пайтда тиббиёт муассасаларида даволанаётган 1439 нафар бемордан 229 нафари оғир, 104 нафари эса ўта оғир аҳволда.

Тошкентда ИИБга чақиртирилган шахс ўлди. Терговга қадар текширув ўтказилмоқда

Ўзбек ички ишлар ходимлари. Иллюстратив сурат. Суратнинг хабардаги воқеага алоқаси йўқ.

Тошкент шаҳар Ички ишлар бош бошқармаси Юнусобод тумани Ички ишлар бўлимига чақиртирилганининг эртаси куни ўлик ҳолда топилган 41 ёшли Александр Бочаров иши юзасидан терговга қадар текширув бошланганини 5 апрель куни маълум қилди.

Аввалроқ ижтимоий тармоқларда Александр Бочаров Юнусобод туманидаги 3-сонли ИИБга 1 апрель куни чақиртирилгани, у ерда калтаклангани ва олган тан жароҳатлари туфайли вафот этганлиги ҳақида турли хабарлар тарқалган эди.

Тошкент шаҳар Ички ишлар бош бошқармасининг билдиришича, “муқаддам тўрт марта судланган” Александр Бочаров, “муқаддам судланган” Л. Дмитрий ва Л. Анатолийлар ҳақиқатан ҳам 1 апрель куни соат 21.00да 3-сонли ИИБга “сўров олиб боришлик учун келтирилган”.

“Ўртача ҳисобда 45 дақиқа давом этган сўровдан сўнг уччала шахс қўйиб юборилган, шу жумладан Бочаров Александр ҳам. 2 апрель куни эрталаб соат 4.00-4.30 дарда 30-уйнинг олдида Бочаров Александрнинг мурдаси топилган. Ўлим сабабини аниқлаш мақсадида суд-тиббиёт экспертизаси тайинланган”,-дейилади расмий билдирувда.

Ички ишлар бошқармасининг таъкидлашича, “Республика илмий-амалий суд-тиббиёт маркази ҳудудий филиали томонидан берилган бирламчи маълумотга кўра, марҳумнинг бир нечта касалликлари бўлган, хусусан, юрак ишемик касаллиги, гематоген сил, полиорган етишмовчилиги, икки томонолама ўпка плеврити, бош мия ва ўпка ишиши, сурункали гепатит, гиёҳвандлик, алкоголдан заҳарланиш”.

Билдирувда мазкур ҳолат юзасидан Юнусобод тумани прокуратураси томонидан терговга қадар текширув ўтказилаётгани айтилади ва блогерлардан “масъул ташкилотларнинг расмий изоҳини олмасдан туриб, олдиндан хулоса чиқармаслик” сўралади.

Сохта қарорлар чиқариб пул ўғирлаган судьялар ва ички ишлар ходимларига ҳукм ўқилди

Маъмурий ишлар бўйича Тошкент шаҳар судининг собиқ уч судьяси "қора курси"га ўтирди.

Зангиота туман суди Маъмурий ишлар бўйича Тошкент шаҳар судининг собиқ судьялари ва йўл ҳаракати хавфсизлиги бошқармаси собиқ ходимларини 3 миллиард 300 миллион сўмни ноқонуний ўзлаштирганликда айбдор деб топди ва уларга нисбатан ҳукм ўқиди.

Ўзбекистон судлар Олий кенгашининг маълум қилишича, судьялар ва йўл ҳаракати хавфсизлиги бошқармаси собиқ ходимларига нисбатан чиқарилган ҳукм ҳозирча қонуний кучга кирмаган. Шунинг учун уларнинг исмлари ва белгиланган жазо чоралари тўғрисида маълумот берилмайди.

Расман билдирилишича, мазкур мансабдорлар давлатга келтирган зиённинг 3 миллиард сўми ундириб олинди.

Судлар Олий кенгаши расмий билдирувида айтилишича, бу иш бўйича 3 нафар собиқ судья, 3 нафар судья ёрдамчиси ва 7 нафар йўл ҳаракати хавфсизлиги бошқармаси собиқ ходими судланган.

Озодлик радиоси 2020 йилнинг 2 декабрь куни Маъмурий ишлар бўйича Тошкент шаҳар судининг бир неча судьяси йўл ҳаракати хавфсизлиги бошқармаси ходимлари билан келишган ҳолда йўл қоидалари бузилиши юзасидан 5 мингта сохта қарор чиқаргани аниқлангани тўғрисида хабар берган эди.

Ўшанда Коррупцияга қарши кураш бўйича агентлик директорининг ўринбосари Умида Тўхташева мазкур қарорлар асосида 8 миллиард сўм ўғирлангани тўғрисида билдирган.

Ўзбекистон Эрон портларидан фойдаланиш масаласини кўтарди

Эрон ташқи ишлар вазири Жавод Зариф.

Ўзбекистон Эрон билан транспорт-коммуникация соҳасидаги ҳамкорликни кенгайтириш ва Эроннинг денгиз портларидан самарали фойдаланишдан манфаатдор. Бу масалани президент Шавкат Мирзиёев Эрон ташқи ишлар вазири Жавод Зариф билан 5 апрель куни Тошкентда бўлиб ўтган учрашув чоғида муҳокама қилди.

Президент матбуот хизматининг билдиришича, учрашувда Ўзбекистон-Туркманистон-Эрон-Ўмон транспорт йўлагини ривожлантириш масаласига ҳам эътибор қаратилган.

Учрашувда Ўзбекистон билан Эрон ўртасидаги сиёсий, савдо-иқтисодий, инвестициявий, транспорт-логистика ва бошқа соҳалардаги ҳамкорликнинг бугунги аҳволи ва уларни ривожлантириш истиқболлари муҳокама қилинди.

Эрон Ислом Республикаси ташқи ишлар вазири Муҳаммад Жавад Зариф 5 апрель куни Тошкентга амалий ташриф билан келган эди.

Ўзбекистонда коронавирусдан яна бир бемор вафот этди

Касалликдан соғайганлар жами 81881 нафарга етди.

Ўзбекистонда 5 апрель куни коронавирусдан яна бир бемор вафот этди. Соғлиқни сақлаш вазирлигининг билдиришича, бу билан пандемия бошланган ўтган йилнинг мартидан бери то шу кунгача Ўзбекистонда COVID-19дан вафот этганлар сони камида 632 кишига етди.

5 апрель ҳолатига кўра, Ўзбекистонда коронавирус инфекцияси қайд этилганлар сони 83935 нафарни ташкил этмоқда. Сўнгги бир сутка ичида яна 133 кишида коронавирус аниқланди. Улардан 93 нафари Тошкент шаҳрида, 16 нафари Самарқанд вилоятида.

Касалликдан соғайганлар жами 81881 нафарга етди ва соғайиш кўрсаткичи 98 фоизни ташкил қилмоқда.

Айни пайтда тиббиёт муассасаларида даволанаётган 1422 нафар бемордан 209 нафари оғир, 94 нафари эса ўта оғир аҳволда.

Бешариқ суди икки кишини пичоқлаган шахсни “оила бузилмаслиги” учун суд залидан озод қилди

Фарғона вилояти Бешариқ туман суди қайнотаси ва қайнакасини пичоқлаган куёвни “оилани сақлаб қолиш” мақсадида суд залидан озод қилди.

“Замон” ахборот дастурининг хабар беришича, ўтган йилнинг 20 августида куёв Ў.Н., ўз уйида хотини Ў.Ҳ., билан жанжаллашиб қолган. Жанжал сабабларини билиш учун уларнинг уйига қайнотаси ва қайнакаси келган. Шу аснода куёв қайнотаси ва қайнакаси билан ҳам жанжаллашиб қолган.

Шундан сўнг куёв Ў.Н., қайнакаси ва қайнотасини пичоқлаган. Суд-тиббий экспертизасининг билдиришича, пичоқ қайнаканинг "қовуқ соҳа ва чап томонида қорин бўшлиғига тешиб ўтган, ички аъзоларини шикастламаган, чап сон юқори қисми ва шу соҳа мушакларини шикастлаган. Қайнатасининг фақат чап тизза соҳасига тан жароҳати етказган”.

Ў.Н.,га нисбатан Жиноят кодексининг 104-моддаси 3-қисми “а” банди (икки ёки ундан ортиқ шахс баданига қасддан оғир шикаст етказиш) ва 105-моддаси 2-қисми “а” банди (икки ёки ундан ортиқ шахс баданига қасддан ўртача оғир шикаст етказиш) асосида жиноят иши очилган.

Судда судланувчи ўз қилмишидан афсусланишини айтган. Қайнота ва қайнака эса унинг 2 фарзанди борлигини ва оиласи бузилишига йўл қўймасликларини инобатга олиб, кечирганларини айтганлар.

Суд Ў.Н.,га 3 йил 2 ой муддатга озодликдан чеклаш жазоси тайинлади. Унинг қамоқда ўтирган 7 ой 14 куни жазо муддатидан чегирилиб ташланди ва 2 йил 7 ой 16 кунга озодликдан чеклаш жазоси қолдирилди. Суд куёвни суд залидан озод қилди.

Мухолифатдаги "Эрк" партияси президент сайловларида иштирок этиш режасини эълон қилди

Мухолифатдаги "Эрк" демократик партияси логоси

Мухолифатдаги "Эрк" демократик партияси Ўзбекистонда шу йил октябрь ойида ўтиши кутилаётган президент сайловларида ўз номзодини илгари суришини эълон қилди.

"Қарийб 30 йилдир тазйиқ ва таъқиблар остида фаолиятини давом эттириб келаётган ва 1991 йил Ўзбекистон Адлия Вазирлигидан қонуний рўйхатдан ўтган мамлакат тарихидаги илк мустақил партия – Ўзбекистон “Эрк” Демократик Партияси ҳам яқинлашиб келаётган президентлик сайловларида ўз номзодини илгари суришга қарор қилди",дейилади 5 апрел куни партиянинг uzerk.org веб-сайтида эълон қилинган Билдиришда.

Баёнотда айтилишича, "бугунга қадар Партия Марказий Кенгашига президентлик сайлови учун номзоди тасдиқланишини сўраб икки нафар партия аъзоси мурожаат этди. Улардан бири партиянинг узоқ йиллик фаолиятида меҳнати синган ва ўз ўрнига эга ветеран аъзоси Саловат Умрзоқовдир.


Иккинчи номзод эса халқимизга яхши таниш бўлган ва сиёсий майдонга шиддат билан кириб келган партиямизнинг янги аъзоси собиқ хонанда Жаҳонгир Отажондир.

Ўзбекистон “Эрк” Демократик Партияси Марказий Кенгаши ушбу аъзоларнинг номзодлик масаласини ўрганиб чиқмоқда ва яқин кунларда тасдиқланган номзодни эълон қилади".

Баёнотда шунингдек, "амалдаги ҳукуматнинг янги қурилаётган партиялар рўйхатга олинишига тўсқинлик қилаётгани ва уларга қарши зўравонлик ишлатилиб, Конституцион ҳуқуқларини топтаётгани" қораланган.

Ўзбекистон Адлия вазирлиги ўтган йил январида "Эрк" демократик партияси фаолларининг партия фаолиятига изн беришни сўраб қилган мурожаатини рад этган эди.

2020 йил 10 январида "Эрк" партияси фаолларидан бир гуруҳини қабул қилган Адлия вазири Русланбек Давлетов, уларнинг Озодликка айтишича, "бу партия тарихда қолди" дея уқтиришга уринган.

"Эрк"чилар фикрича, партия низоми 1991 йилнинг сентябрида расман қайд этилган ва у бекор қилинган эмас.

Мавжуд сайлов қонунчилиги сайловларда номзодларнинг мустақил ташаббус гуруҳлари томонидан илгари сурилишига изн бермайди.

2019 йил декабридаги парламент сайловларини кузатган ЕХҲТ миссияси Ўзбекистондаги нисбатан эркинлашган матбуот сиёсий мухолифатнинг ўрнини боса олмганини айтган эди.

Ўзбекистон Марказий сайлов комиссияси расмийлари келаётган президент сайловларида халқаро ташкилотларнинг "мақбул" тавсиялари тадбиқ этилишини айтишган, аммо бу тавсияларга мухолифат партияларини рўйхатдан ўтказиш кирадими, йўқми, маълум эмас.

Ўзбекистон парламентидаги мавжуд бешта партиянинг ҳаммаси ҳукуматпараст партиялардир. Мамлакатда қарор топган сиёсий анъанага кўра, айнан шу партияларнинг раҳбарлари президент сайловларида амалдаги президентга "рақиб" бўлади.

ДХХ: 2020 йилда 4 та террорчилик актининг олди олинди

Давлат хавфсизлик хизмати 5 апрель - ДХХ куни муносабати билан эълон қилинган расмий баёнотида 2020 йилда амалга оширилган қатор тадбирлар тўғрисида маълумот берди.

Расман билдирилишича, 2020 йилда ДХХ томонидан 4 та террор актининг олди олинган. “Улардан 2 таси Ўзбекистондва 2 таси МДҲ мамлакатларида содир этилиши режалаштирилган эди”,-дейилади баёнотда.

Маълум қилинишича, экстремистик ва террористик ташкилотларнинг 67 та яширин гуруҳлари фаолиятига чек қўйилди.

“Экстремизм ва терроризмга алоқадорликда айбланиб, хорижда яшириниб юрган 98 нафар Ўзбекистон фуқароси мамлакатимизга олиб келинди ҳамда жавобгарликка тортилди”,-дейилади билдирувда.

ДХХ матбуот хизмати 2020 йил давомида 747 килодан ортиқ гиёҳванд модда, 251 минг дона психотроп таблетка, 594 дона қурол, 4 781 дона ўқ-дори ва 24,4 кило портловчи модда ноқонуний муомаладан олинганини, коррупция билан боғлиқ 540 дан ортиқ ҳолатга “чек қўйилгани”ни ҳам билдирди.

Шунингдек, ҳисоботда бюджет ва кредит маблағларининг талон-тарож қилганлардан 557 ммиллиард сўм давлат фойдасига ундирилгани, ноқонуний миграция ва одам савдосига алоқадор 102 та жиноий гуруҳ фош этилгани, Ўзбюекистонга ноқонуний олиб кирилгани, 58,3 миллиард сўмлик товар-моддий бойликлар қўлга олингани таъкидланган.

Ўзбекистон Қирғизистонга чигит, уруғлик буғдой ва ундан иборат инсонпарварлик ёрдами кўрсатади

Ўзбекистон 2020 йилда коронавирусга қарши кураш доирасида Қирғизистонга камида беш марта гуманитар ёрдам кўрсатди.

Ўзбекистолн Қирғизистонга минг тонна буғдой уруғи беради. Бу уруғликнинг 500 тоннаси инсонпарварлик ёрдами сифатида берилади. Қолган 500 тоннаси буғдой шаклида Ўзбекистонга қайтарилади. Бу ҳақда Қирғизистон Бош вазири Улуғбек Марипов маълум қилди.

Унга кўра, бундан ташқари Ўзбекистон 500 тонна чигит ҳам беради. Чигитнинг 250 тоннаси инсонпарварлик ёрдами, 250 таннаси эса қайтарилади.

“Шунингдек, Ўзбекистон Қирғизистонга 10 минг тонна унни инсонпарварлик ёрдами сифатида етказиб беради”,-деди Бош вазир.

Аввалроқ Ўшдаги 103 йиллик тарихга эга Бобур номидаги Ўзбек Академик театри Ўзбекистон ҳисобиданг таъмирдан чиқарилиши хабар қилинган эди. Тошкентда 1913 йилда асос солинган ҳозирги Миллий Академик театрдан кейин Марказий Осиёдаги энг кекса театр ҳисобланади.

Билдирилишича, театр таъмири учун ўзбекистон 37,5 миллион қирғиз сўми, яъни 440 минг доллар ажратади.

Прокуратурага ишга жойлаш учун 30 минг доллар пора сўраган шахс ушланди

Тошкентнинг Чилонзор туманида 4 апрель куни мансабдор танишлари орқали прокуратурага ишга жойлаштириш эвазига И.Э., исмли шахсдан 30 минг доллар пора сўраган шахс қўлга олинди.

Бош прокуратуранинг маълум қилишича, қўлга олиш амалиёти ички хавфсизликни таъминлаш бошқармаси ҳамда Бош прокуратура ҳузуридаги Департаментнинг Қашқадарё вилояти бошқармаси ходимлари билан ҳамкорликда ўтказилди.

Билдирилишича, И.Э., Департаментнинг Қашқадарё вилояти бошқармасига мурожаат қилиб, аризасида “Носир” исмли шахс мансабдор яқинлари орқали уни ишга жойлаб қўйиш эвазига 30 минг доллар пора сўрагани ҳақида ариза ёзган.

4 апрель куни ўтказилган тадбирда 2 нафар фуқаро Чилонзор туманида жойлашган “Денов” чойхонасида ариза муаллифи И.Э.дан 5000 АҚШ долларини олган вақтда ашёвий далиллар билан ушланган.

Мазкур ҳолат юзасидан Департаментнинг Қашқадарё вилояти бошқармаси томонидан Жиноят кодексининг тегишли моддалари билан жиноят иши қўзғатилди.

Ўзбекистонлик талабаларнинг Россияга киришига рухсат берилди

Россиялик талабалар.

Ўзбекистонлик талабалар, аспирантлар ва ординаторларнинг ўқишни давом эттириш учун Россияга киришига рухсат берилди. Россия Фан ва олий таълим вазирлиги расмий сайтида билдирилишича, ҳукумат бу борада 31 март куни қарор қабул қилди.

Ўзбекистонлик талабалар Россияга келишларидан камида 10 кун олдин ўзлари ўқийдиган университет раҳбариятини электрон почта орқали хабардор қилишлари лозим. Шундан сўнг университет талабага Россияга кириш юзасидан маълумот жўнатади.

Талабалар Россия чегарасидан ўтишларидан уч кун аввал COVID-19 тестини топшириши ва натижа салбий экани тўғрисида рус ёки инглиз тилида маълумотномага эга бўлиши лозим.

Сўнгги йилларда Россия олийгоҳларида ўқийдиган талабалар сони бўйича Ўзбекистон МДҲ давлатлари орасида пешқадамга айланиб, бу кўрсаткич йил сайин ошиб боряпти.

Россия Фан ва олий таълим вазири ўринбосари Марина Боровская 2019 йили мамлакатда 26,5 минг ўзбекистонлик кундузги бўлимларда таҳсил олганини билдирган эди.

Бу рақамларда Россияда тижорий олий ўқув юртлари кундузги бўлимларида таҳсил олаётган талабалар сони акс эттирилмаган.
Россиядаги олийгоҳларда таълим олувчи ўзбекистонлик ва бошқа хорижлик талабалар 2020 йилнинг 13 ноябридан бери масофавий тарзда ўқиётган эди.

8 февралдан анъанавий ўқиш бошланди. 16 февраль куни қатор хориж давлатлари талабаларининг Россияга қайтишига рухсат берилган, аммо Ўзбекистон мазкур рўйхатга киритилмаганди.

Ўшдаги Марказий Осиёнинг энг кекса Ўзбек Академик театрини Ўзбекистон таъмирлаб беради

Ўшдаги Ўзбек Академик театри биноси.

Ўшдаги Бобур номидаги Ўзбек Академик мусиқали драма ва комедия театри Ўзбекистон ҳисобидан капитал таъмирдан чиқарилади.

Театр директори Аъзам Абдураззоқовнинг Озодлик радиосига билдиришича, бу ҳақда бир неча кун олдин театрга ташриф қилган Қирғизистон Маданият, ахборот, спорт ва ёшлар сиёсати вазири Кайрат Иманалиев театр жамоаси билан учрашуви чоғида маълум қилган.

Аъзам Абдураззоқовнинг айтишича, вазир Ўзбекистон ҳукумати театрни капитал таъмирлаш учун 37, 5 миллион қирғиз сўми – таҳминан 440 минг доллар ажратгани ҳақида гапирган.

“Вазир бу масала Ўзбекистон ва Қирғизистон президентларининг 11-12 март кунлари Тошкентда бўлиб ўтган учрашуви чоғида муҳокама қилинганини ҳам билдирди. Бобур театрининг янги биноси 1979 йилда қурилиб, фойдаланишга топширилган. Ўшандан бери бино капитал таъмир қилинган эмас”,-деди Аъзам Абдураззоқов.

Унга кўра, жорий йилда Ўшда ўтказиладиган анъанавий "Арт Ордо" халқаро театр фестивали Бобур театрининг 103 йиллик юбилейига бағишланади.

Бобур номидаги Ўзбек Академик мусиқали драма ва комедия театри 1914 йилда Ўшдаги Рус-тузем мактаби қошида жадидчилар Раҳмонберди Мадазимов ва Болтихожи Султонов раҳбарлигидаги тўгарак сифатида иш бошлаган. 1918 йилда мазкур тўгарак Туркистон Реввоенсовети қошидаги театр труппасига айлантирилган.

Ўшдаги Бобур номидаги Ўзбек Академик мусиқали драма ва комедия театри Тошкентда 1913 йилда асос солинган ҳозирги Миллий Академик театрдан кейин Марказий Осиёдаги энг кекса театр ҳисобланади.

Мазкур театр артистлари Абдулла Тароқ ва Розияхон Мўминова Қирғизистон ССРнинг энг биринчи халқ артисти ва хизмат кўрсатган артист унвонларига сазовор бўлган.

Давомини ўқинг

XS
SM
MD
LG