Линклар

Шошилинч хабар
24 феврал 2024, Тошкент вақти: 18:11

Ўзбекистон хабарлари

МТС ва Vimeplcom АҚШ ҳибсга олишни талаб қилаётган маблағларга алоқалари йўқлигини айтишмоқда

АҚШ ва Европа мамлакатлари Гулнора Каримова телеком ширкатларидан 1 миллиард доллар олганини гумон қилмоқда.
АҚШ ва Европа мамлакатлари Гулнора Каримова телеком ширкатларидан 1 миллиард доллар олганини гумон қилмоқда.

МТС ва Vimpelcom АҚШ терговчиларининг ширкатларга алоқадор активларини ҳибсга олиш талаби юзасидан изоҳ берди.

РБК агенитлигининг хабар қилишича, МТС тарқатган баёнотда ҳисбга олиниши талаб этилаётган активлар ширкатга алоқаси йўқ, дея билдирилган.

“АҚШ давлат идоралари бир қатор Европа мамлакатларига ҳибсга олишни сўраб мурожаат қилган активлар МТСга тегишли эмас. Мазкур сўровномалар МТС фаолиятига таъсир қилмайди”, дея иқтибос келтирди агентлик ширкат баёнотидан.

Баёнотда шунингдек, МТС ширкати АҚШ тергов идоралари сўровига биноан барча ҳужжат ва маълумотларни тақдим этиш орқали “фаол ҳамкорлик қилаётгани” қайд этилган.

Ундан аввалроқ Vimpelcom ширкати ҳам АҚШ расмийлари талаби бўйича изоҳ берди. “АҚШнинг бир қисми Takilant ширкати билан боғлиқ маблағларни ундириш тўғрисидаги мурожаатларидан хабаримиз бор. Биз бу ҳақда АҚШ қимматбаҳо қоғозлар комиссиясига тақдим қилинган ҳужжатларда ошкор қилганмиз”, дея Vimpelcom ширкати вакили Артем Минаевнинг сўзларидан иқтибос келтирлади хабарларда.

Ўтган ҳафта АҚШ ҳукумати Ўзбекистон президентининг қизи Гулнора Каримова учта йирик телеком ширкатидан пора олгани иддаоларига оид коррупция тергови доирасида 1 миллиард АҚШ долларига тенг маблағини музлатишни сўраб, Европанинг беш мамлакатига мурожаат қилгани тўғрисида хабар қилинди. Қўшма Штатлар тергов идоралари Гулнорага қарашли экани тахмин этилаётган Женевадаги виллани ҳам муҳрлашга уринаётгани айтилмоқда. The Wall Street Journal газетасининг тергов идораларидаги ишончли манбалар ҳамда суд ҳужжатларига таяниб, хабар қилишича, АҚШ терговчилари Ўзбекистон Президенти Ислом Каримовнинг тўнғич қизига пора бергани гумон этилаётган TeliaSonera, Vimpelcom ва МТС ширкатларига алоқадор банк ҳисоб рақамларини ҳам ҳибсга олишни илтимос қилган.

АҚШ ва Европа мамлакатлари тергов идоралари Гулнора Каримова йиллар давомида телеком ширкатларидан камида 1 миллиард АҚШ доллари миқдорида пора олганини гумон қилмоқда.

Телеком ширкатларидан пора олишда воситачилик қилгани гумон этилаётган Takilant фирмаси Гулнора Каримованинг хос ёрдамчиси Гаянэ Авакян номига расмийлаштирилган. Авакян Ўзбекистон суди томонидан узоқ йиллик қамоққа ҳукм этилган.

Кун янгиликлари

Болалар омбудсмани Навоийда ўқувчиларнинг сочи олиниши билан боғлиқ ҳолатни танқид қилди

Иллюстратив сурат
Иллюстратив сурат

Навоий шаҳридаги 2-мактабда ўқийдиган ўғил болаларнинг ёппасига сочи олиниши билан ҳолат умумий ўрта таълим муассасаларининг одоб-аҳлоқ қоидаларига зид. Бу ҳақда Болалар омбудсмани матбуот хизмати маълум қилди.

Болалар омбудсмани қайдича, бу боланинг Ўзбекистон Конституциясида кафолатланган шахсий дахлсизлик ҳуқуқи ҳамда унинг шаъни ва қадр-қиммати ҳурмат қилиниши ҳуқуқига таҳдид солади.

“Мазкур ҳаракатга йўл қўйган масъулларга нисбатан тегишли чора кўрилиши зарур", дейилган омбудсман хабарномасида айни пайтда бу каби номақбул ҳолатлар бошқа таълим муассасаларида ҳам юзага келмаслиги бўйича чоралар кўрилаётгани қўшимча қилинган.

Навоийдаги 2-умумтаълим мактабига 23 февраль куни директор Нурқобил Юсупов ташаббуси билан сартарош чақирилгани ҳамда турли синфлардан ўғил бола ўқувчилар спорт залга йиғилиб, сочи олингани ҳақида аввалроқ Kun.uz нашри хабар қилган эди.

Навоий вилояти Мактабгача ва мактаб таълими бошқармаси бошлиғи Раъно Ҳайитова нашр билан суҳбатда 2-мактабдаги ҳолатни умуман оқлаб бўлмаслигини айтган.

“Ушбу мактаб фаолиятини тўлиқ ўрганамиз. Бу ҳолат умуман мумкин эмас. Бундай директор ишда қолиши ҳам мумкин эмас аслида. Мактабда ўқувчининг сочига тегишга умуман ҳаққи йўқ. Педагогнинг этика қоидасига тўғри келмайди бу”, деган мулозима.

Навоий вилояти Миллий гвардия бошқармаси матбуот котиби Рамазон Кубаев ҳам МГ ходимлари мактаб директорининг бу ташаббусига қарши бўлишганини қайд этган.

“Бириктирилган ходимларимиз давомат назорати учун мактабга борганида ушбу ҳолатнинг устидан чиқишган. Бу, албатта, мумкин эмас. Шу сабабли мактаб директорига жараённи тўхтатишни ҳамда ўқувчиларни дарсга қайтаришни айтишган”, деган Рамазон Кубаев.

Ўзбекистонда тўртта аэропорт бошқаруви хусусий секторга берилади

Бошқаруви хусусий секторига топширилиши кутилаётган Урганч халқаро аэропорти биноси (иллюстратив сурат)
Бошқаруви хусусий секторига топширилиши кутилаётган Урганч халқаро аэропорти биноси (иллюстратив сурат)

Ўзбекистонда Бухоро, Наманган, Урганч ва Андижон аэропортлари хусусий бошқарувга берилиб, модернизация қилинади. Бу ҳақда авиация соҳасидаги давлат корхоналари трансформацияси бўйича президент Мирзиёев ҳузурида 22 февраль куни ўтказилган тақдимот маросимида билдирилган.

Тақдимот чоғида сўнгги йилларда Ўзбекистонда авиаширкатлар сони 15 тага етгани, улардан 10 таси хусусий авиаширкатлар экани, 2023 йилнинг ўзида 28 та янги самолёт олиб келингани, булар натижасида охирги етти йилда рейслар 2 баробар кўпайгани қайд этилган.

Шунингдек, Самарқанд аэропорти хусусий шерикликка берилгани ҳисобига йўловчи оқими тўрт карра ошиб, 1 миллионга етгани урғуланган.

Тақдимотда Uzbekistan Airways авиаширкати га халқаро кредит рейтингини олиб, уни “IPO”га чиқариш жараёни бошланиши айтилган.

Шу билан бирга, жорий йилда рейслар сони 20 фоизга оширилиши, соҳада харажатларни 20 фоизга қисқартириш чоралари кўрилиши, ёқилғи сарфи юқори бўлган эски самолётлар сотилиб, замонавий ва тежамкор ҳаво кемалари олиб келиниши қўшимча қилинган.

Истанбулда яна бир ўзбекистонлик қўлга олинди, икки гумонланувчи Туркиядан Ўзбекистонга депортация қилинди

Иллюстратив сурат
Иллюстратив сурат

Туркиянинг Истанбул шаҳрида Ўзбекистон ИИВ томонидан халқаро қидирувга берилган Санъат Шарипов (1994 йилда туғилган) ушланган.

Ўзбекистоннинг Истанбулдаги бош консулхонаси қайдича, фирибгарлик жиноятини содир этганликда гумонланган бу шахс “Туркия ва Ўзбекистон Республикаси Ички ишлар вазирликлари ҳамкорлигида ўтказилган тезкор тадбир давомида” қўлга олинган.

Ўзбек дипломатлари исми зикр этилган шахснинг хатти-ҳаракатларидан жабр кўрган фуқаролардан Ўзбекистоннинг Истанбул шаҳридаги Бош консулхонасига ёки Ўзбекистон ИИВга мурожаат қилишни сўраган.

Аввалроқ бош консулхона фирибгарликда гумонланаётган Саидумархон Мусаев ҳамда одам савдосида гумонланаётган Мунисахон Алижонова Туркиядан Ўзбекистонга депортация қилингани ҳақида маълумот тарқатган.

Истанбулда Ўзбекистон Ички ишлар вазирлиги томонидан 2023 йилда қидирувга берилган ва жиноят оламида “Моня” лақаби билан танилган Мунисахон Алижонова 13 февраль куни қўлга олингани ҳақида Озодлик ўтган ҳафта хабар қилган эди.

Тошкентдаги мансабдорларга ойда бир кун ишга жамоат транспортида бориш буюрилди

Тошкент кўчаларидаги автобуслардан бири (архив сурати)
Тошкент кўчаларидаги автобуслардан бири (архив сурати)

Ўзбекистон президенти Шавкат Мирзиёев Тошкент шаҳрида ҳар ойнинг бир иш куни давомида автомобиллар ҳаракатланишини қисқартиришга қаратилган “Автомобилсиз кун” лойиҳасини амалга ошириш тўғрисидаги таклифни маъқуллаган.

Президент томонидан жорий йил 21 февралида имзоланган “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги фармонда қайд этилишича, кенг жамоатчилик вакиллари ва экофаолларнинг бу таклифи “экологияга автомобиллар чиқинди газларининг зарарли таъсирини камайтириш учун” ўртага ташлаган.

Фармонда биноси “Тошкент шаҳрида жойлашган барча республика ва ҳудудий ижро этувчи ҳокимият органларининг раҳбар ва бошқа ходимлари жамоат транспортида иш жойига келиши орқали намуна кўрсатиб” бориши буюрилган.

Бу банднинг “тўлиқ, сифатли ва сўзсиз бажарилиши учун” Экология, атроф-муҳитни муҳофаза қилиш ва иқлим ўзгариши вазирлиги, Транспорт вазирлиги ва Тошкент шаҳар ҳокимлиги масъул этиб тайинланган.

Президент фармони билан жорий йилнинг 1 мартидан эътиборан пойтахтда юк ташиш учун мўлжалланган, рухсат этилган тўла вазни 10 тоннадан юқори бўлган N2, N3 ва О4 тоифаларига кирувчи автотранспорт воситаларининг ҳаракати тиғиз вақт оралиқларида тақиқланиши ҳам кўзда тутилган. Мазкур чеклов махсус хизмат, шу жумладан, коммунал хўжалиги, ободонлаштириш ва Қуролли Кучларнинг юк транспорти воситаларига татбиқ этилмайди.

Ҳужжатда 2030 йилгача Тошкент ва Нукус шаҳарлари ҳамда вилоятлар марказларида “ЕВРО – 5” ва ундан юқори стандартларига мувофиқ бўлмаган автомашиналар эксплуатацияси босқичма-босқич чекланиши қайд этилган.

Мирзиёев “Ўзбекистон халқи Путиннинг сайловда ғалаба қилишига ишониши”ни айтди

Ўзбекистон президенти Шавкат Мирзиёев 21 февралда Қозонда бошланган “Келажак ўйинлари”нинг очилиш маросимидан сўнг Россия президенти Владимир Путин билан учрашди ва унинг 15−17 март кунлари бўлиб ўтадиган президентлик сайловида ғалаба қилишига ишончи комил эканини билдирди.

“Россия халқи аллақачон абсолют овоз бериб бўлган. Ўзбекистонда эса сизнинг мутлақ ғалабангизга ишонишади. Келишиб олганимиздек, илк ташрифингиз Ўзбекистонга бўлади”,- деб айтган президент.

Мирзиёевнинг бу гаплари қайд этилган видеони Кремль назорати остидаги ТАСС ўз телеграм каналида эълон қилди.

Ўзбекистон президенти матбуот хизматининг хабар беришича, учрашув чоғида “давлат раҳбарлари транспорт йўлакларини биргаликда ривожлантириш, темир йўл транспорти соҳасидаги ҳамкорликни мустаҳкамлаш масалаларини муҳокама қилдилар. Минтақавий кун тартиби юзасидан ҳам фикр алмашилди, бўлажак халқаро тадбирлар режаси кўриб чиқилди”.

Аввалроқ Шавкат Мирзиёев 2026 йилги “Келажак ўйинлари”ни Ўзбекистонда ўтказишни таклиф қилгани тўғрисида хабар берилганди.

Президент матбуот хизматининг маълум қилишича, “Келажак ўйинлари” биринчи халқаро мультиспорт мусобақасининг тантанали очилиш маросимида Россия президенти Владимир Путин, Беларусь президенти Александр Лукашенко, Қозоғистон президенти Қасим-Жомарт Тоқаев, Қирғизистон президенти Садир Жапаров, Тожикистон президенти Эмомали Раҳмон ва бошқа хорижий меҳмонлар ҳам қатнашди.

Россияда илк бор ташкил этилаётган “Келажак ўйинлари" 21 февраль – 3 март кунлари бўлиб ўтади. Тадбирда 107 та мамлакатдан 227 та жамоа, жумладан, Ўзбекистон спортчилари иштирок этади.

Таҳлилчилар фикрича, Украина босқинидан сўнг халқаро санкциялар ва босим остида қолган Россия бу ўйинни Париж олимпиадасига муқобил тарзда ўтказмоқда. Бу ўйинларда МДҲ ва БРИКСга аъзо давлатлар, Жануби-Шарқий Осиё, Лотин Америкаси ва Африка мамлакатларидан келган спортчилар иштирок этади.

Энергетика вазирлиги: Метан заправкаларга киритилган чекловлар бекор қилинади

Ўзбекистондаги метан заправкаларидан бири.
Ўзбекистондаги метан заправкаларидан бири.

Ўзбекистон Энергетика вазирлиги метан заправкалар фаолиятига киритилган чекловлар 22 февралдан бошлаб маҳаллий ҳокимликлар билан келишилган режа асосида босқичма-босқич бекор қилинишини билдирди.

Расмий маълумотда таъкидланишича, 17 февралда заправкалар фаолиятининг чекланишига сабаб бўлган Бухоро вилоятидаги «Л-Газли-1» ва «Л-Газли-2» юқори кучланишли электр узатиш тармоқларидаги носозлик 21 февраль 15:10 да тўлиқ бартараф этилган.

Бунинг оқибатида “газ қувурларида газ айланиши бироз мувозанатлашиб, энергоблокларга газ етказиб беришда тўсиқлар камайган”

Метан заправкалар фаолиятига навбатдаги чеклов 18 февраль куни киритилганди.

Ҳукумат расмийлари 2023-2024 йилдаги қиш мавсумида электр ва газ таъминотидан муаммо бўлмаслиги, аварияларга йўл қўймаслик учун қатор чоралар кўрилганини билдирган эди. Аммо шунга қарамай, газ ва электр етишмовчилиги бу йил ҳам сезиларли даражада кузатилмоқда.

Жумладан, Озодлик ўтган йилнинг 12-20 декабрь кунлари ҳавонинг совиб кетиши ортидан газ босимининг пасайиши ва электрнинг огоҳлантирмасдан ўчирилиши оқибатида кўплаб иссиқхоналарда етиштирилаётган помидор, бодринг, қалампир каби экинларни совуқ ургани ҳақида хабар берганди.

Бунинг оқибатида тадбиркорлар кўрган зарарнинг миқдори борасида ҳозирча расмий ҳисоб-китоблар йўқ.

Тошкент икки кундан бери ҳавоси энг ифлос шаҳарлар рўйхатида биринчи ўринда

Тошкент ҳавосида майда PM2.5 концентрацияси меъёридан 19,9 марта кўпдир.
Тошкент ҳавосида майда PM2.5 концентрацияси меъёридан 19,9 марта кўпдир.

Тошкент 22 февраль куни маҳаллий вақт билан 11:30 ҳолатига кўра яна жаҳондаги ҳавоси энг ифлос шаҳарлар рўйхатида биринчи ўринга чиқди. Эрталаб Ўзбекистон пойтахти бу рўйхатда учинчи ўринда эди.

IQAir порталидаги маълумотга қараганда Тошкент ҳавосида майда PM2.5 дисперс зарраларининг концентрацияси 99,5 мкг/м3 ни ташкил этган. Бу эса Жаҳон соғлиқни сақлаш ташкилоти тавсия қилган меъёрдан 19,9 марта кўпдир.

Тошкентдан кейинги иккинчи ва учинчи ўринларда Ҳиндистоннинг Деҳли ҳамда Покистоннинг Лаҳор шаҳарлари қайд этилган.

Марказий Осиё давлатлари орасида Қозоғистон пойтахти Остона 9-ўринни, Қирғизистон пойтахти Бишкек 19-ўринни эгаллади.

21 февраль куни ҳам пойтахт ҳавосининг ифлослиги бўйича дунёда биринчи ўринга чиққанди.

Мирзиёев Россия таъсис этган “Келажак ўйинлари”ни Ўзбекистонда ўтказишни таклиф қилди

"Келажак ўйинлари" очилиши маросимида. Президент матбуот хизмати фотоси.
"Келажак ўйинлари" очилиши маросимида. Президент матбуот хизмати фотоси.

Президент Шавкат Мирзиёев 2026 йилги “Келажак ўйинлари”ни Ўзбекистонда ўтказишни таклиф қилди. У бу таклифни 21 февралда Қозонда “Келажак ўйинлари”нинг очилиш маросимида билдирди.

Президент матбуот хизматининг маълум қилишича, “Келажак ўйинлари” биринчи халқаро мультиспорт мусобақасининг тантанали очилиш маросимида Россия президенти Владимир Путин, Беларусь президенти Александр Лукашенко, Қозоғистон президенти Қасим-Жомарт Тоқаев, Қирғизистон президенти Садир Жапаров, Тожикистон президенти Эмомали Раҳмон ва бошқа хорижий меҳмонлар ҳам қатнашди.

Россияда илк бор ташкил этилаётган “Келажак ўйинлари" 21 февраль – 3 март кунлари бўлиб ўтади. Тадбирда 107 та мамлакатдан 227 та жамоа, жумладан, Ўзбекистон спортчилари иштирок этади.

Таҳлилчилар фикрича, Украина босқинидан сўнг халқаро санкциялар ва босим остида қолган Россия бу ўйинни Париж олимпиадасига муқобил тарзда ўтказмоқда. Бу ўйинларда МДҲ ва БРИКСга аъзо давлатлар, Жануби-Шарқий Осиё, Лотин Америкаси ва Африка мамлакатларидан келган спортчилар иштирок этади.

Диний блогер Мубашшир Аҳмад Истанбулдаги депортация марказидан қўйиб юборилди

Диний блогер Мубашшир Аҳмад нима сабабдан 55 кун мобайнида Бирқилич депортация марказида тутиб турилгани ҳалигача номаълум бўлиб қолмоқда.
Диний блогер Мубашшир Аҳмад нима сабабдан 55 кун мобайнида Бирқилич депортация марказида тутиб турилгани ҳалигача номаълум бўлиб қолмоқда.

Ўтган йилнинг декабрь ойи охирида Истанбулда турк полициячилари томонидан тутиб кетилган ўзбекистонлик диний блогер Мубашшир Аҳмад (Алишер Турсунов) 21 февраль куни депортация марказидан қўйиб юборилган. Бу ҳақда Ўзбекистоннинг Туркиядаги элчихонаси матбуот хизмати маълумот тарқатди.

Қарийб икки ой давомида Истанбулнинг Чаталжа туманида жойлашган Бинқилич депортация марказида ушлаб турилган Мубашшир Аҳмад, элчихона хабарномасида қайд этилишича, чоршанба куни оиласи бағрига қайтган.

Эллик ёшни қоралаган Мубашшир Аҳмад 2023 йилнинг 28 декабрь куни Истанбулдаги ўзи яшаб турган уйда қўлга олингани ҳақида “Azon Global” ахборот таҳлилий портали 9 январь куни хабар қилган эди. Ўша пайтда портал диний блогер қўлга олинганидан 11 кун ўтиб хабар берилганини қуйидагича изоҳлаган: “Дастлаб қандайдир англашилмовчилик бўлгани, шу боис оммани беҳуда ташвишга солиш керак эмаслиги каби мулоҳазалар билан бу ҳақда кенг оммага хабар берилмади”.

Мубашшир Аҳмад асос солган “Azon Global” портали унинг қандай гумон билан қўлга олинганини очиқламаган.

Диний блогер турк полицияси томонидан Чаталжадаги депортация марказида 55 кун давомида нима сабабдан ушлаб турилганига Ўзбекистоннинг Туркиядаги элчихонаси ҳам аниқлик киритган эмас.

2023 йил августида “Азон медиа” гуруҳи раҳбари бўлган Мубашшир Аҳмад гуруҳга кирувчи барча лойиҳаларининг тўхтатилганини эълон қилган эди. “Азон медиа” 2017 йилда диний-маърифий йўналишда фаолият юритувчи онлайн медиа тармоғи сифатида ташкил қилинганди.

Ижтимоий тармоқларда 1,2 миллион обуначисига эга бўлган “Азон медиа” таъсисчиси Ўзбекистондаги фаолият якунланганига оид сабабларга изоҳ бермаган. Унинг таъкидлашича, кейинчалик бу сабаблар очиқланиши мумкин.

2021 йил июнь ойида “Азон медиа” гуруҳининг тўрт нафар раҳбари бир қанча диний контент ва материалларни Ўзбекистон Республикаси Вазирлар Маҳкамаси ҳузуридаги Дин ишлари қўмитаси назоратидан ўтказмай чоп қилгани учун суд томонидан йирик миқдорда жаримага тортилган эди. Бош муҳаррир Абдулазиз Муборак буни “сайт овозини ўчиришга уриниш” деб атаганди.

Ўтган йил ноябрида Мубашшир Аҳмад раҳбарлигида ўзбек, рус, инглиз ва турк тилларида фаолият юритувчи “Azon Global” ахборот таҳлилий портали ишга туширилганди.

Мубашшир Аҳмад 1974 йили Наманган шаҳрида туғилган. 1991-1996 йилларда Тошкент Ислом институти ва Мисрдаги “Ал-Азҳар” университетларида таълим олган. “Ўзбекистон мусулмонлари” (ҳозирги “Ҳидоят”), Fikrat журналларида ва “Ислом нури” газетасида ишлаган.

У 1996 йилдан бошлаб бир муддат Тошкент ислом институтида фиқҳдан дарс берган.

Зиддиятли блогер Аброр Мухтор Алий қамоқдан чиқди

Аброр Мухтор Алий (архив сурати).
Аброр Мухтор Алий (архив сурати).

Жиноят ишлари бўйича Тошкент шаҳар Шайхонтоҳур тумани суди қарори билан 6 февралда 15 суткага қамалган диний блогер Аброр Мухтор Алий (Аброр Абдуазимов) озодликка чиқарилгани тўғрисида Kun.uz ўз манбасига таянган ҳолда 21 февралда хабар берди.

Манбага кўра, унга тайинланган 15 сутка қамоқ жазоси тафтиш тартибида қайта кўрилиб, тайинланган жазо ўзгартирилган ва у озодликка чиқарилган.

Ўзбекистонда зиддиятли чиқишлари билан танилган диний блогер Аброр Мухтор Алий (Аброр Абдуазимов) ва унинг шериги Маъмурий жавобгарлик тўғрисидаги кодексининг 194-моддаси (Ички ишлар органлари ходимининг қонуний талабларини бажармаслик) ва 195-моддасида (Ички ишлар органлари ходимларининг ўз хизмат бурчларини бажаришларига қаршилик кўрсатиш) ифода қилинган ҳуқуқбузарликни содир этишда айбли деб топилган.

Маъмурий ҳуқуқбузарликка оид иш мазмунидан хабардор Озодлик манбасига кўра, Аброр Абдуазимов ва унинг шериклари шу йилнинг 5 февраль куни Тошкент шаҳар Шайхонтоҳур тумани ҳокимлиги яқинидаги майдончада тадбиркор Х. Н. тарафдорлари билан низони ўзаро ҳал қилиш чоғида ички ишлар органлари ходимларига бўйсунмаганликда айбланган.

Озодлик манбасининг маълум қилишича, Аброр Абдуазимов ва шерикларига нисбатан иш судья Абдулла Абдулхаев томонидан 6 февраль куни соат 20:30 да кўриб чиқилган. Суд қарори билан Абдуазимовдан ташқари унинг шериги Хусрав Насруллаев ҳам маьмурий жавобгарликка тортилган.

Аброр Мухтор Алий Facebook ижтимоий тармоғидаги ўз саҳифасида сўнгги марта 5 февраль куни соат 20:20 да “Имтиҳонларга сабр кишининг иймон савиясини оширади!” деган пост қолдирган, шундан сўнг ундан дарак бўлмаётган эди.

Ислом цивилизацияси маркази собиқ ходими, блогер Аброр Абдуазимов ўтган йил февралида блогер Никита Макаренкога туҳмат қилганликда айбланиб, суд қарори билан 500 долларга яқин жаримага тортилган эди.

Аввалроқ 7,5 йилга озодликдан маҳрум қилинган ва ўтган йил охирида озодликка чиққан блогер Фозилхўжа Орифхўжаев Аброр Мухтор Алий билан тортишувдан сўнг ҳибсга олингани хабар қилинган эди. Аброр Абдуазимовнинг 2022 йил январида 3 йилга озодлиги чекланган бошқа блогер – Миразиз Бозоровнинг ишига ҳам алоқаси бор.

Ўзбекистонда танқидий чиқишлари учун кўплаб блогер ва журналистлар қамалаётгани ва жаримага тортилаётганига қарамай, YouTube тармоғида 700 мингдан зиёд обуначига эга ва тез-тез провокацион постлар жойлайдиган Аброр Абдуазимов 2024 йил февралига қадар бирор марта судланган эмас.

Олмалиқда уч ҳиндистонлик ўлимига сабаб бўлган ҳодиса юзасидан жиноят иши очилди

Олмалиқ шаҳрида қурилаётган мисни бойитиш фабрикасида темир конструкциялар қулаши оқибатида уч киши ўлди ва 29 киши жароҳатланди.
Олмалиқ шаҳрида қурилаётган мисни бойитиш фабрикасида темир конструкциялар қулаши оқибатида уч киши ўлди ва 29 киши жароҳатланди.

Олмалиқ шаҳридаги мис заводи қурилишида содир бўлган ҳолат юзасидан Жиноят кодексининг 257-моддаси (Меҳнатни муҳофаза қилиш қоидаларини бузиш) асосида жиноят иши қўзғатилди. Бу ҳақда Бош прокуратура хабар берди.

Фавқулодда вазиятлар вазирлиги 20 февраль куни соат саккизларда Тошкент вилояти Олмалиқ шаҳрида қурилаётган мисни бойитиш фабрикасида темир конструкциялар қулаши оқибатида уч киши ўлгани ва 29 киши жароҳатлангани тўғрисида билдирганди. Уларнинг барчаси қурилишга жалб этилган Ҳиндистон фуқароларидир

Вазирлик бу ҳодисани “бахтсиз воқеа” сифатида талқин қилган. Расман билдирилишича, “темир конструкциялар сурункали қор ёғиши натижасида” қулаб тушган.

Фабрика қурилиши Enter Engineering ва Россиянинг “Уралмашзавод” ширкати томонидан амалга оширилаётганди. Лойиҳа қиймати эса 2 миллиард сўм деб белгиланган.

Enter Engineering бир неча марта Озодлик видеолари ва мақолаларининг “бош қаҳрамони” бўлган. Ширкат ишчилари ойликлари мунтазам кечиктирилиб берилаётганидан шикоят қилиб келишган.

Озодликнинг 2023 йил февралида эълон қилинган “Озодлик суриштируви: Ўзбекларни газсиз қолдирган махфий келишувлар” сарлавҳали журналистик суриштирувида 2012 йили Сингапурда рўйхатдан ўтган Enter Engineering акцияларининг 51 фоизига 2019 йилга қадар Кипрда рўйхатга олинган ширкат орқали Бахтиëр Фозилов¸ 49 фоизига эса¸ Газпромбанк эгалик қилгани очиқланган.

Мирзиёев Қозонда “Келажак ўйинлари”нинг очилишида қатнашади ва Путин билан учрашади

Иллюстратив сурат.
Иллюстратив сурат.

Ўзбекистон президенти Шавкат Мирзиёев 21 февраль куни “Келажак ўйинлари” мусобақасининг тантанали очилиш маросимида иштирок этиш учун амалий ташриф билан Қозон шаҳрида бўлади.

Ўзбек президенти матбуот хизматининг билдиришича, мусобақанинг очилиш маросимига Шавкат Мирзиёевни Владимир Путин таклиф қилган.

Ташриф дастурида икки давлат раҳбарларининг учрашуви кўзда тутилган. Унда 2023 йил 5-7 октябрь кунлари Россияга расмий ташриф якунида эришилган олий даражадаги келишувларни амалга ошириш ҳамда кенг қамровли стратегик шериклик муносабатларини янада чуқурлаштириш масалалари муҳокама қилинади.

Россияда илк бор ташкил этилаётган “Келажак ўйинлари" 21 февраль – 3 март кунлари бўлиб ўтади. Тадбирда 107 та мамлакатдан 227 та жамоа, жумладан, Ўзбекистон спортчилари иштирок этади.

Таҳлилчилар фикрича, Украина босқинидан сўнг халқаро санкциялар ва босим остида қолган Россия бу ўйинни Париж олимпиадасига муқобил тарзда ўтказмоқда. Бу ўйинларда МДҲ ва БРИКСга аъзо давлатлар, Жануби-Шарқий Осиё, Лотин Америкаси ва Африка мамлакатларидан келган спортчилар иштирок этади.

Путин мусобақанинг очилиш маросимига МДҲ давлатлари раҳбарларини таклиф қилган.

Расман: Олмалиқдаги қурилишда уч киши ўлди, 29 киши жароҳатланди

Расмийлар бу ҳодисани “бахтсиз воқеа” сифатида талқин қилмоқда.
Расмийлар бу ҳодисани “бахтсиз воқеа” сифатида талқин қилмоқда.

Тошкент вилояти Олмалиқ шаҳрида қурилаётган мисни бойитиш фабрикасида темир конструкциялар қулаши оқибатида уч киши ўлди ва 29 киши жароҳатланди.

Ўзбекистон Фавқулодда вазиятлар вазирлигининг билдиришича, уларнинг барчаси қурилишга жалб этилган Ҳиндистон фуқароларидир.

“20 февраль куни таҳминан соат 08:00 ларда Олмалиқ шаҳар Саноат зонаси ҳудудида жойлашган янги қурилаётган “3-сонли Мисни бойитиш фабрикаси”да бирламчи маълумотга кўра темир конструкциялар сурункали қор ёғиши натижасида қулаб тушган”, дейилади расмий билдирувда.

Вазирлик бу ҳодисани “бахтсиз воқеа” сифатида талқин қилган. Расман билдирилишича, конструкциялар қулашидан 32 киши жабрланган. Улардан уч нафари воқеа жойида ҳалок бўлган. Қолган 29 киши касалхонага етказилган. Улардан тўрт нафарига биринчи ёрдам кўрсатилгач, касалхонадан кетишга рухсат берилган.

Ҳозирда воқеа тафсилотлари ва сабаблари ўрганилмоқда.

“Газета уз”нинг ёзишича, мазкур фабрика Олмалиқ тоғ-кон комбинати таркибида қурилаётган эди. Фабрика қурилиши Enter Engineering ва Россиянинг “Уралмашзавод” ширкати томонидан амалга оширилаётганди. Лойиҳа қиймати эса 2 миллиард сўм деб белгиланган.

Enter Engineering бир неча марта Озодлик видеолари ва мақолаларининг “бош қаҳрамони” бўлган. Ширкат ишчилари ойликлари мунтазам кечиктирилиб берилаётганидан шикоят қилиб келишган.

Enter Engineering ишчилари иш ташлаш билан таҳдид қилмоқда
Илтимос кутинг

Айни дамда медиа-манба мавжуд эмас

0:00 0:05:31 0:00


Озодликнинг 2023 йил февралида эълон қилинган “Озодлик суриштируви: Ўзбекларни газсиз қолдирган махфий келишувлар” сарлавҳали журналистик суриштирувида 2012 йили Сингапурда рўйхатдан ўтган Enter Engineering акцияларининг 51 фоизига 2019 йилга қадар Кипрда рўйхатга олинган ширкат орқали Бахтиëр Фозилов¸ 49 фоизига эса¸ Газпромбанк эгалик қилгани очиқланган.

Ўзбекистонда бир кишининг икки марта Сенат ёки Қонунчилик палатаси раиси бўлиши тақиқланди

Адлия вазирлигининг билдиришича, “Референдум якунлари ҳамда давлат ҳокимияти ташкил этилишининг асосий принциплари тўғрисида”ги Конституциявий қонунига киритилган қўшимчага асосан айни бир шахс сурункасига икки муддатдан ортиқ Сенат раиси бўлиши тақиқланди. Бундан ташқари, Қонунчилик палатаси раисига нисбатан ҳам ҳудди мана шундай меъёр жорий этилди.

“Ўзбекистон Республикаси Олий Мажлисининг Сенати тўғрисида” қонунга киритилган ўзгартишларда қайд этилишича, сенаторлар Қорақалпоғистон Жўқорғи Кенгеси, вилоятлар, туманлар ва шаҳарлар давлат ҳокимияти вакиллик органлари депутатларининг тегишли қўшма мажлисларида мазкур депутатлар орасидан яширин овоз бериш йўли билан Қорақалпоғистон Республикаси, вилоятлар ва Тошкент шаҳридан тенг миқдорда — тўрт кишидан сайланади.

Сенатнинг тўққиз аъзоси “фан, санъат, адабиёт, ишлаб чиқариш соҳасида ҳамда давлат ва жамият фаолиятининг бошқа тармоқларида катта амалий тажрибага эга бўлган обрўли фуқаролар орасидан” президент томонидан тайинланади.

Қонунчилик палатасининг депутати бир вақтнинг ўзида Қорақалпоғистон Жўқорғи Кенгесининг, вилоятлар, туманлар, шаҳарлар давлат ҳокимияти вакиллик органларининг депутати бўлиши ҳам тақиқланди.

Қонунларга киритилган ўзгартишларга асосан, депутат ва сенаторларга 36 иш кунидан иборат ҳақ тўланадиган меҳнат таътили берилади.

Январнинг ўрталарида Сенат расмий сайтида Сенат аъзолари сонини 100 нафардан 65 нафарга қисқартириш белгиланганаётгани тўғрисидаги маълумот пайдо бўлган эди. Унда айтилишича, ҳар бир маъмурий-ҳудудий бирликдан 4 нафардан сенатор сайланиши, 9 нафари президент томонидан тайинланиши назарда тутилганди.

Шунингдек, Қонунчилик палатаси спикери ўринбосарлари сонини 7 тадан 2 тага қисқартириш режалаштирилаётган эди.

Япония Ўзбекистонда ислоҳотларни амалга ошириш учун 246 миллион доллар қарз беради

Япония халқаро ҳамкорлик ташкилоти (JICA) логотипи.
Япония халқаро ҳамкорлик ташкилоти (JICA) логотипи.

Ўзбекистон Япония ҳукумати билан иқтисодий ва ижтимоий ривожланиш дастури учун қарз ажратиш бўйича келишувга эришди. Бу ҳақда Япония халқаро ҳамкорлик ташкилоти (JICA) маълум қилди.

Расман билдирилишича, 19 февраль куни иқтисодиёт ва молия вазири ўринбосари Илҳом Норқулов ва Япония халқаро ҳамкорлик ташкилоти ваколатхонаси раҳбари Ёшибуми Бито имзолаган шартномага асосан Ўзбекистонга 37 миллиард иен (246,2 миллион доллар) миқдорида қарз берилади.

Кредит ўн йиллик имтиёзли давр билан ўттиз йил ичида қайтарилади. Кредит 1,8 фоиз билан берилган.

“Қарз Ўзбекистоннинг бозор иқтисодиётига ўтишини ривожлантирувчи ислоҳотларни дастаклашга ишлатилади. Маблағнинг бир қисми аҳолининг кам таъминланган қатламини қўллаб-қувватлаш ва ижтимоий инклюзивликка ажратилади”, дейилади JICA билдирувида.

Ташкилотнинг билдиришича, 1993 йилдан 2021 йилгача JICA Ўзбекистонга турли ташаббусларни амалга ошириш учун 1,5 миллиард доллар берган.

Давомини ўқинг

XS
SM
MD
LG