Линклар

Шошилинч хабар
27 октябр 2020, Тошкент вақти: 06:41

Ўзбекистон хабарлари

Ўзбекистонликлар маҳалла оқсоқолларини сайлайди

Ўзбекистон Сенати қарори билан маҳалла оқсоқоллари сайловини уюштириш ва ўтказишга кўмаклашиш бўйича махсус комиссия тузилган.

Жорий йилнинг май-июнь ойларида Ўзбекистонда маҳалла қўмиталарига сайлов ўтказилади.

Бу ҳақда маълумот тарқатган Ўзбекистон Олий Мажлис Сенати матбуот хизматига кўра, бўлажак сайловларда 9 минг 764 нафар маҳалла қўмитаси раиси ва уларнинг 99 мингдан зиёд маслаҳатчиси сайланиши режаланган.

Маҳалла қўмитаси раислигига номзод, одатда, олий маълумотли бўлиши ва сайлов олдидан тегишли ҳудудда камида беш йил мунтазам равишда яшаб келган бўлиши лозим.

Ўзбекистон парламенти юқори палатаси қарори билан бўлажак сайловларни уюштириш ва ўтказишга кўмаклашиш бўйича махсус комиссия тузилган.

Ўз-ўзини бошқаришнинг энг кичик институтларидан бири бўлган, аҳоли манфаатларини ҳимоя қилиш ва унинг номидан қарор қабул қилиш ҳуқуқига эга бўлган маҳалла қўмиталари мустақил Ўзбекистонда давлат идораларига хабар етказувчи тизимга айлангани юзасидан шикоятлар бор.

Кун янгиликлари

Мирзиёев электр станцияларининг эскирганлик даражаси 50 фоиздан юқори эканини эътироф этди

Бугунги кунда Ўзбекистонда электр станцияларининг эскирганлик даражаси 50 фоиздан юқори. Бундан ташқари, эски қувватларда ёқилғи сарфи янги буғ-газ қурилмаларига нисбатан 2 баравар зиёд. Бу ҳақда 26 октябрь куни президент Шавкат Мирзиёев раислигида электр энергетикаси корхоналарини трансформация қилиш бўйича устувор вазифалар муҳокамаси юзасидан ўтказилган йиғилишда айтилган.

Президент матбуот хизмати маълумотига кўра, йиғилишда электр таъминоти бўйича модернизация ишларини давом эттириш, лекин буни олдингидек давлат кафолати ҳисобига эмас, балки хусусий капитални жалб қилиш орқали амалга ошириш зарурлиги қайд этилган.

“Ўзбекистон миллий электр тармоқлари”, “Ҳудудий электр тармоқлари”, “Иссиқлик электр станциялари” ҳамда “Ўзбекгидроэнерго” акциядорлик жамиятларида молиявий ҳисоботларни жаҳон стандартлари асосида тайёрлаш тизимига ўтиш кераклиги таъкидланган.

Қайд этилишича, бу халқаро кредит рейтинги олиш, келгусида еврооблигациялар чиқаришда муҳим омил бўлади. Мутасаддиларга шу мақсадлардан келиб чиқиб, мазкур 4 та компаниянинг уч йиллик молиявий модели ва бизнес режаларини ишлаб чиқиш вазифаси қўйилган.

Трансформация жараёнларига кўмаклашиш учун корхоналар бошқарувига ва кузатув кенгашларига чет эллик мутахассислар жалб қилиниши бўйича кўрсатмалар берилган.

“Ҳозирда электр энергияси улгуржи бозори қоидалари белгиланмагани сабабли инвесторлар билан энергияни қатъий нархларда харид қилиш бўйича узоқ муддатли шартномалар имзоланмоқда. Бундай ёндашув келгусида рақобатнинг чекланишига олиб келиши мумкин. Шу боис электр энергияси рақобатли бозорига ўтиш босқичлари ва қоидаларини белгиловчи ҳужжат ишлаб чиқиш зарурлиги таъкидланди”, дейилади президент матбуот хизмати хабарномасида.

Йиғилишда соҳага илғор технологияларни кенг жорий этиш, “рақамли трансформация”ни амалга ошириш бўйича ҳам топшириқлар берилган.

Ўзбекистонда қиш мавсуми яқинлашиши билан электр таъминотида муаммолар кўпайгани кузатилади. Бу каби муаммолар бўйича Озодлик таҳририятига ҳар йили қишлоқ жойлардан айниқса кўп шикоят тушади.

Бўстон туманининг сўконғич ҳокимасига огоҳлантириш берилди

Бўстон тумани ҳокимаси Садбархон Мамитова.

Андижон вилояти ҳокимлиги фермерларни ҳақорат қилган Бўстон тумани ҳокимаси Садбархон Мамитовага огоҳлантириш берган. Бу ҳақда вилоят ҳокимлиги матбуот хизмати маълумот тарқатди.

Қайд этилишича, ҳокимлик ижтимоий тармоқларда тарқалган ва Бўстон тумани раҳбарига оидлиги айтилган аудиоёзувни ўрганиб чиққан, унинг ҳақиқатан ҳам С. Мамитовага тегишли экани аниқланган.

Мазкур аудиоёзувда Бўстон тумани ҳокимаси фермерлардан соя топширишни талаб қилиб, уларни “мараз, ифлос” деб сўкканига гувоҳ бўлиш мумкин. Бу борада маҳаллий журналистларга изоҳ берган С. Мамитова бу ҳолатни коронавирусга чалиниб, икки ҳафта касалхонада даволангани, касалликдан кейин стрессга тушгани билан изоҳлашга уринган ва қилган ишидан афсусда эканини билдирган.

Бўстон туманида соя ўсимлигини етиштириш ва уни йиғиб-териб олишда сусткашлик қилаётган ҳамда ўз хизмат вазифасига совуққонлик билан қараётган фермерларнинг фаолияти туман ҳокимининг эътирозига сабаб бўлганини урғулаган Андижон вилояти ҳокимлиги айни пайтда тарқалган аудиоёзув учун С. Мамитовага вилоят ҳокимлиги томонидан “огоҳлантириш” берилганлигини маълум қилган.

Иқтисодий тараққиёт вазирлиги гўшт нархи ошиб кетиши сабабларини очиқлади

Иқтисодий тараққиёт ва камбағалликни қисқартириш вазирлиги томонидан ёйинланган “Инфляция даражаси ҳақида умумий маълумот”да (2020 йил сентябрь ойи) Ўзбекистонда гўшт нархининг ошиб кетишига сабаб бўлган омилларни санаб ўтилди.

Қайд этилишича, сентябрь ойида гўшт маҳсулотларининг нархи 3,8 фоизга ошган. Қўй гўшти 5,7 фоизга, мол гўшти 5–5,4 фоиз оралиғида, қийма 4,2 фоизга, колбаса 1,8 – 1,9 фоиз оралиғида, балиқ ва балиқ консервалари ўртача 0,5 фоизга, парранда гўшти ва гўшт маҳсулотлари 0,3 фоизга қимматлаган.

Вазирлик вакилларига кўра, гўшт маҳсулотлари нархлари ўсишига асосан уч омил сабаб бўлган:

- ем-хашак базаси учун хом ашё, ҳусусан, пахта хомашёси, пўстлоқ ва ем аралашмаси захираларининг мавсумий камайиши. Бу ўз навбатида, мазкур маҳсулотларнинг биржа нархларининг мос равишда 17%, 21% ва 27%га ошишига олиб келган;

- Қозоғистон томонидан экспорт чекловлари туфайли қорамол импортини қисқариши. Мисол учун, 2020 йилнинг 8 ой натижасига кўра, мамлакатда 25 минг бош йирик ва 12,5 мин бош майда қорамол импорт қилинган. 2019 йилнинг 8 ойлик натижаларига кўра, мазкур кўрсаткичлар мос равишда 146 минг ва 258 минг бош қорамолни ташкил қилган;

- 2020 йилнинг август ойи ўрталарида карантин чекловларининг олиб ташланганидан сўнг фаолиятини тиклаган оммавий овқатланиш корхоналарининг гўшт ва гўшт маҳсулотларига бўлган талабининг ошиши.

Ҳисоботда жорий йил январь-сентябрь ойларида Ўзбекистонда 1840 минг тонна (тирик вазнда) гўшт ишлаб чиқарилгани (ўтган йилнинг мос даврига нисбатан 2,2 фоизга кўпроқ), бу давр мобайнида 14 минг тонна мол гўшти ва 20 минг тонна товуқ гўшти импорт қилингани айтилган.

Мамлакатда гўшт маҳсулотлари нархининг ўсиши, ҳисобот муаллифларига кўра, нафақат ташқи омиллар, балки ички бозорлардаги тартибга солиниш механизмларининг самарасизлиги туфайли юзага келган, дейиш мумкин.

“Бу, ўз навбатида, ишлаб чиқариш даражасининг камтарона ўсишига қарамасдан, гўшт маҳсулотларини етказиб беришнинг етарли даражасини таъминлаш учун озуқа базасининг ривожланмаганлиги билан боғлиқ”, дейилади вазирлик ҳисоботида.

Ўн икки ҳафтадан бери ошиб келаётган долларнинг расмий курси эртадан қарийб 12 сўмга пасаяди

Ўзбекистон Марказий банки жорий йил 27 октябридан валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси ўтган ҳафтага нисбатан 11 сўм 88 тийинга арзонлаб, 10 минг 359 сўм 88 тийинни ташкил этади (ўтган ҳафта доллар курси 7 сўм 28 тийинга қимматлаб, 10 минг 371 сўм 76 тийин бўлган эди). Ўтган ҳафтагача Ўзбекистонда АҚШ валютаси расмий курси кетма-кетига 12 ҳафта ошиб борган.

Евронинг расмий курси эса олдинги курсга нисбатан 132 сўм 15 тийинга ошиб, 12 минг 285 сўм 78 тийинга тенг бўлади (ўтган ҳафта евро курси 101 сўм 33 тийинга пасайиб, 12 минг 153 сўм 63 тийин бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Хитойдан келаётган йиллик инвестиция ҳажмини $5 млрдга етказиш масаласи муҳокама қилинди

Келажак 5 йил ичида Хитойдан Ўзбекистонга олиб кирилаётган йиллик инвестициялар ҳажмини 5 миллиард долларга, Корея Республикасидан эса 1 миллиард долларга етказиш режалаштирилган. Бу ҳақда куни кеча инвестициялар ва ташқи савдо вазирининг ўринбосарлари А.Воитов ва Л.Кудратов раҳбарлигида Хитой ва Жанубий Корея билан савдо-иқтисодий, инвестициявий, молиявий-техник, транспорт ва логистика ҳамда маданий-гуманитар ҳамкорликни мустаҳкамлаш бўйича белгиланган вазифалар ижросига бағишланиб ўтказилган муҳокамада айтилган.

Тадбир чоғида 2025 йилга бориб Ўзбекистондан Хитойга амалга ошириладиган йиллик экспорт ҳажми камида 3 млрд долларни, Корея Республикасига эса камида 800 млн долларни ташкил этиши кераклиги урғуланган.

Видеоконференция шаклида ўтказилган муҳокамада вазирликлар, идоралар ва тармоқ бирлашмаларининг биринчи шахслари иштирок этган.

Унда хитойлик ва кореялик ҳамкорлар билан амалга оширилиши режалаштирилган қўшма лойиҳаларни қайта кўриб чиқиш ва уларни амалга ошириш таҳлил қилинган.

Инвестициялар ва ташқи савдо вазирлиги маълумотига кўра, муҳокама чоғида ҳозирги вақтда амалга ошириш жадвалидан ортда қолаётган бир қатор лойиҳалар кўриб чиқилган ҳамда муаммоларни бартараф этишнинг аниқ муддатлари ҳамда тегишли вазирлик ва идоралар раҳбарларига шахсий жавобгарлик белгиланган ҳолда мавжуд масалаларни ҳал қилиш алгоритмлари ишлаб чиқилган.

Видеоконференция якунида мутасадди раҳбарларга барча қўшма лойиҳаларни ўрганиш, уларни жадал, сифатли ва ўз вақтида амалга оширишга қаратилган янгиланган “Йўл хариталари”ни тайёрлаш, шунингдек, келгуси йил учун янги истиқболли дастурлар ишлаб чиқиш бўйича қўшимча манзилли топшириқлар берилган.

Халқ таълими вазири хароба синф хонаси тўғрисидаги видеога муносабат билдирди (ВИДЕО)

Халқ таълими вазири Шерзод Шерматов.

Халқ таълими вазири Шерзод Шерматов ижтимоий тармоқлар, жумладан, Озодлик радиоси Инстаграм каналида тарқалган ва кенг муҳокамаларга сабаб бўлаётган Чироқчидаги мактаб видеосига муносабат билдирди.

«Дарё» нашрининг билдиришича, 24 октябрь куни АОКАда ўтказилган матбуот анжуманидан сўнг журналистларга интервью берган Шерзод Шерматов Ўзбекистонда камида 300 та мактаб филиали мана шундай ачинарли аҳволда эканини айтган.

“Айни пайтда мамлакатимизда 1170 та мактаб филиаллари бор. Таҳлил қилиб кўрсак, мавжуд филиалларда тизимдаги ўқувчиларнинг бир фоизи таҳсил олмоқда. Тахминан, 300 та филиал қўлбола усулда қурилган, яъни аҳолининг ўзи қуриб олган, таъмирланмаган. Ўша қишлоқларда аҳоли сони ҳам оз, у ерларда сув, йўл, электр муаммолари ҳам бор. Лекин доим мактаб филиаллари муҳокама қилинади. Ота-оналар фарзандини узоқ масофадаги мактабга юборгиси келмайди, йўл ҳам жуда узоқ. Бу сингари муаммоларга марказлашган комплекс асосида ёндашиш керак”,-деб айтган вазир ўз сўзида давом этар экан “олис ва тоғли ҳудудлардаги мактаб филиалларини таъмирлаш ёки фаолиятини тугатиш маҳаллий ҳокимликлар ихтиёрида” эканини таъкидлаган.

Шерзод Шерматов мактабларга 2018 йилгача инвестиция киритлмаганини, мактабларга яқин икки йилдан бери эътибор қаратила бошланганини ҳам айтган.

“Шунча йил қилинмаган ишни икки йилда амалга ошириб бўлмайди”,-деб хулоса қилган вазир.

Бир неча кун аввал Озодликнинг инстаграм саҳифасига Чироқчи туманидаги 61-мактаб экани айтилган видео жойлаштирилган эди. Видеода ўқувчилар аҳволи ачинарли бўлган синф хонасида дарс ўтаётганлари акс этган.

Соғлиқни сақлаш вазирлиги карантин чоралари кучайтирилиши тўғрисидаги хабарларни инкор қилди

Шу кунгача коронавирусдан расман камида 550 одам вафот этди.

Соғиқни сақлаш вазирлиги 1 ноябрдан карантин чоралари кучайтирилиши ҳақидаги хабарлар ёлғон эканини билдирди.


“Ижтимоий тармоқларда шу йилнинг 1 ноябридан карантин чоралари кучайтирилиши ҳақида асоссиз ахборотлар тарқалмоқда. Эслатиб ўтамиз, бу каби ёлғон хабарлар орқали аҳоли орасида ваҳима қўзғашга уринишларга тегишли тартибда жавобгарлик кўзда тутилган”,-дейилади расмий билдирувда.


Ўзбекистонда коронавирус туфайли март ойида жорий этилган карантин чоралари 15 августдан бошлаб босқичма-босқич бекор қилина бошланган эди.


2020 йил 26 октябрь соат 10:00 ҳолатига кўра, Ўзбекистонда коронавирус инфекцияси қайд этилганлар сони 65 480 нафарни ташкил этмоқда. Беморлардан 62 615 нафари соғайган.


Шу кунгача коронавирусдан расман камида 550 одам вафот этди.

Ўзбекистоннинг айрим ҳудудларида 26 октябрь куни эрталаб ер силкинди

Фавқулодда ҳолатлар вазирлиги Сейсмопрогностик мониторинг республика марказининг билдиришича, 26 октябрь куни Тошкент вақти билан соат 08:10да Тожикистон-Қирғизистон чегарасида ер силкиниши содир бўлди.


Ер силкиниши эпицентри Тошкент шаҳридан жанубий-шарқий йўналиш бўйича 292 километр узоқликда бўлган.


Ер силкиниши Тошкент, Гулистон, Жиззаҳ ва Самарқандда 2 балл, Наманган ва Андижонда 3 балл, Фарғонада 4 балл кучланишда сезилди.

Ўқитувчиларнинг ойлик иш ҳақлари 2024 йилгача босқичма-босқич оширилади

Синф раҳбарлиги учун тўловлар 1,5 бараварга оширилиши назарда тутилган.

Юқори натижаларга эришган педагогларнинг ойлик маоши 2024 йилга қадар меҳнатга ҳақ тўлашнинг энг кам миқдорининг 15 бараваригача босқичма-босқич оширилади. Бу ҳақда АОКАда бўлиб ўтган брифингда халқ таълими вазири Шерзод Шерматов маълум қилди.


Вазир таълим-тарбия тизимини янада такомиллаштириш, илм-фан соҳасини ривожлантиш масаласида қабул қилиниши кутилаётган президент фармони лойиҳаси ҳақида гапирган.


Фармон лойиҳасида ўқитувчиларнинг ойлик маоши меҳнатга ҳақ тўлашнинг энг кам миқдорининг 15 бараваригача, синф раҳбарлиги учун тўловлар 1,5 бараварга оширилиши назарда тутилган.

Методистларларнинг иш ҳақи миқдори олий тоифали ўқитувчининг базавий тариф ставкаси миқдорига тенглаштирилади.


Битирувчиларининг ОТМларга ўқишга кириш кўрсаткичлари юқори бўлган умумтаълим муассасалари раҳбар ходимлари рағбатлантирилади. Халқаро фан олимпиадалари ғолибларнинг ўқитувчиларига тўғридан тўғри олий малака тоифаси берилади.


Шунингдек, халқ таълими ходимларини рағбатлантириш жамғармалари ташкил этилади.

Коронавирусга чалинганлар сони 65 мингдан ошди

Даволанаётган 2 224 нафар бемордан 279 нафари оғир, 76 нафари эса ўта оғир аҳволда.

Соғлиқни сақлаш вазирлигининг 26 октябрда билдиришича, сўнгги бир сутка ичида Ўзбекистонда 286 кишида коронавирус аниқланди. Бу билан 25 октябрь ҳолатига кўра, коронавирус юққанлар сони 65 388 нафарга етди.


25 октябрь куни коронавирусга чалинган 4 нафар бемор вафот этиб, жами кўрсаткич 549 нафарга етди.


Ҳозирда касаллик қайд этилган жами 65 388 нафар бемордан 62 615 нафари соғайиб, даволаниш кўрсаткичи 95 фоизни ташкил этмоқда.


Айни пайтда тиббиёт муассасаларида даволанаётган 2 224 нафар бемордан 279 нафари оғир, 76 нафари эса ўта оғир аҳволда.

Бир йил давомида камида 14та хусусий олийгоҳ ташкил қилинади

Ўзбекистонда 2021 йилнинг 1 сентябрига қадар ҳар бир ҳудудда камида биттадан нодавлат олий таълим ташкилоти ташкил қилинади.

Бу ҳақда АОКАда ўтказилаётган матбуот анжуманида Олий ва ўрта махсус таълим вазири ўринбосари Узоқбой Бегимқулов маълум қилди.

Расмий хабарда очиладиган хусусий олийгоҳлар сони аниқ келтирилмаган.

Тошкент шаҳри ва Қорақалпоғистон Республикаси ҳамда 12 та вилоятда камида биттадан ташкил қилинса, бир йил ичида мамлакатда камида 14та хусусий ОТМ очилиши мумкин.

Ўзбекистонда хусусий олийгоҳларга рухсат берилиши хабари бундан икки йил аввал пайдо бўлганди.

Ўзбекистон ҳам PayPal тизимига ўтишни режаламоқда

Марказий Осиёда PayPal пул ўтказиш тизимига уланмаган ягона давлат – Ўзбекистон ҳам ушбу тизимга ўтиш ҳаракатларини бошлади.

Бу ҳақда 24 октябрь куни маҳаллий журналистлар билан учрашган Ахборот технологиялари ва коммуникацияларини ривожлантириш вазири Шуҳрат Содиқов маълум қилди.

Вазир Содиқовга кўра, ҳозирда Ўзбекистон Марказий банки PayPal ширкати билан музокара олиб бормоқда.

Вазир Содиқов келажакда PayPal тизими билан рақобатга киришадиган миллий пул ўтказиш тизими жорий қилиниши ҳам режаланганини таъкидлади.

2018 йилда расмийлар PayPal тизимининг Ўзбекистонда ишламаслигини амалдаги қонунлар жисмоний шахсларга пулларни хорижий валютада сақлашга рухсат бермаслиги билан изоҳлаган.

Ўтган йилнинг октябрида қонунчиликка ўзгартириш киритилиб, хорижда ҳисоб рақам очишга рухсат берилди.

Президент қарори билан Мудофаа вазирлигига қарашли Ҳарбий тиббиёт академияси ташкил этилди

COVID-19 инфекциясини жиловлаш амалиëтларига Ўзбекистон қуролли қўшинлари сафарбар қилинган.

Ўзбекистон президенти 22 октябрь куни “Ҳарбий тиббиёт соҳасида кадрларни тайёрлашнинг сифат жиҳатидан янги тизимини ташкил этиш чора-тадбирлари тўғрисида” қарор имзолади.

24 октябрь куни расмий матбуотда чоп этилган қарорга мувофиқ, Тошкент тиббиёт академияси ҳузуридаги Ҳарбий-тиббиёт факультети негизида Мудофаа вазирлигининг юридик шахс мақомига эга бўлган Ўзбекистон Республикаси Қуролли кучлари Ҳарбий тиббиёт академияси ташкил этилди.

Қарорда ëзилишича¸ Академиянинг асосий вазифаси қуролли кучлар таркибига кирувчи вазирликлар ва идоралар учун ҳарбий тиббиёт соҳасида замонавий талабларга жавоб берадиган кадрларни тайëрлашдан иборат бўлади.

Айни пайтда Академия биологик таҳдидларга тезкор жавоб қайтара оладиган самарали тизимни шакллантириш ва ривожлантириш бўйича изланишлар олиб боришга масъул бўлади.

Давлат олий ҳарбий таълим муассасаси бўлган мазкур Академияда таҳсил олиш учун 2021/2022 ўқув йилидан номзодлар медицина олийгоҳларининг даволаш факультетларининг 5- босқичини ва тиббий-профилактика факультетларининг 4-босқичини энг юқори натижалар билан тамомлаган талабалар орасидан Мудофаа вазирлиги томонидан танлаб олинади.

Қарорга кўра¸ Академиянинг бакалавриат босқичини тамомлаган курсантларга дастлабки “тиббий хизмат лейтенанти” ҳарбий унвони ва “ҳарбий врач” мутахассислигини берадиган диплом ҳамда ҳарбий интернатурани тамомлагач, “тиббий хизмат катта лейтенанти” ҳарбий унвони ва тегишли мутахассислик берилганлиги тўғрисида гувоҳнома берилади.

Айни қарорга кўра, Академияда юридик шахс мақомига эга бўлмаган Ҳарбий тиббиёт илмий-тадқиқот институти ташкил этилади.

Қарорга мувофиқ Академия таъминоти Ўзбекистон Республикаси Давлат бюджети, Мудофаа вазирлигининг бюджетдан ташқари маблағлари ва қонун ҳужжатлари билан тақиқланмаган бошқа маблағлар ҳисобига амалга оширилади.

Uzbekistan GTL Бош директори ғалаëн қилган ишчилар талаби қондирилганини иддао қилди

Uzbekistan GTL Бош директори Фахриддин Абдурасулов 21 октябрь куни ғалаëн қилган ишчиларнинг "барча талаблари қондирилгани"ни иддао қилди.

24 октябрь куни мазкур воқеа юзасидан заводда ўтказилган матбуот анжуманида¸ маҳаллий нашрларнинг ëзишича¸ Абдурасулов қуйидаги баëнотни қилган:

"Ишчилар норозилиги ошхонага кириш ускуналарининг вақтинчалик ишламай қолгани, карантин чоралари сабаб 45кун обьектда қолиб кетишгани ва айрим ишчиларнинг ойликлари ишларни топшириш жараёнининг чўзилгани туфайли оз муддатга кечиккани сабаб рўй берган. Ҳозирда ойликлар тўлаб берилган. 45 кунлик иш муддати 22 кунликка туширилган ва ошхона ҳамда яшаш шароитлари яхшиланган. Ишчиларнинг барча талаблари қондирилди".

Озодлик радиоси 21 октябрь куни эрталаб соат 7:30да Қашқадарë вилояти Ғузор туманида Uzbekistan GTL заводини қураëтган Enter Engineering компаниясининг минглаб ишчиси стихияли норозилик акциясига чиққани ҳақида хабар берган эди.

22 октябрь куни Озодлик манбалари мазкур қурилишнинг бош пудратчиси Enter Engineering компанияси ишчиларининг тўпланиб қолган ойлигини тўлай бошлаганини билдирган эди.

Воқеа жойида туриб Озодликка хабарлар юбораëтган маҳаллий журналист эса, "ширкатнинг 12 мингдан зиëд ишчисининг кейинги уч ойда тўланмаган ойлигини тўлаш учун икки машинада пул олиб келишганини" кўрганини айтди.

Enter Engineering ишчилари Озодликка ғалаëндан кейин маҳаллий ҳокимият вакиллари¸ журналист ва блогерлар серқатнов бўлиб қолгани¸ уарга қўй сўйиб ош беришгани¸ концертлар уюштирилганини билдирди.

Ҳозирча бу воқеа юзасидан Бош прокуратура бошлаган "ўрганиш жараëни"га оид тафсилотлар жамоатчиликка маълум қилинмади.

Фарғона ҳокими уйга муҳтож 23 журналистга имтиëзли уй ваъда қилди

Хайрулло Бозоров Фарғона вилоятига ҳоким этиб тайинланиши билан вилоят аҳолиси билан учрашишга киришди.

"24 октябрь куни Фарғона вилоят ҳокими Хайрулло Бозоров Фарғона шаҳри ташқарисидаги Миндонобод мавзесидаги “Журналистлар уйи”нинг биринчи ғиштини тантанали суратда қўйди"¸ деб хабар қилди Кун.уз нашри.

Айтилишича¸ Фарғона вилоятидаги 60 га яқин оммавий ахборот воситасида 247 та журналист ишламоқда ва улар орасида уй-жойга муҳтожлар кўп.

Вилоятга яқинда ҳоким этиб тайинланган Хайрулло Бозоров журналистларни моддий қўллаб-қувватлаш¸ хусусан¸ уйсиз журналистларга уй беришни ўз асосий вазифаларидан бири деб эълон қилган.

Ҳоким қарори билан вилоятдаги 23 нафар журналистга Миндонобод мавзесида қуриладиган янги уйлардан 2-3 хонали квартира имтиëзли шартлар билан берилади.

Вилоят расмийларига кўра¸ нархи 160-185 миллион сўм бўлган бу квартиралар журналистларга 10 фоизли дастлабки тўловдан кейин 20 йилга 10 фоизли кредит асосида берилади.

Фарғона вилоятининг олдинги ҳокими Шуҳрат Ғаниевнинг журналистлар билан муносабати зиддиятли бўлиб келган. Республика миқëсидаги нашрлардаги хабарлар ортидан Ғаниев ижтимоий тармоқларда энг кўп танқид қилинадиган амалдорга айланган.

Намангандан Фарғонага ҳоким этиб тайинланиши билан Бозоров ҳокимлик имижини яхшилашга киришди. Хусусан¸ Ғаниев ҳеч бир изоҳсиз ëпиб қўйган Фарғона-Андижон йўлини очтирди¸ шаҳар марказида City қуриш режасини бекор қилди¸ аҳоли ва журналистлар билан учрашувларни йўлга қўйди.

Президент қарори билан Шуҳрат Ғаниев ўтган ой Бош вазирнинг қишлоқ хўжалик масалалари бўйича ўринбосари этиб тайинланди.

АОКА: 2024 йилгача ўқитувчиларнинг ойлиги энг кам иш ҳақининг 15 бараваригача оширилади

Халқ таълими вазири Шерзод Шерматов

24 октябрь куни АОКАда таълим-тарбия тизимини янада такомиллаштириш, илм-фан соҳасини ривожлантиш масаласида қабул қилиниши кутилаётган Ўзбекистон Республикаси Президенти Фармони лойиҳаси юзасидан матбуот анжумани ўтказилди.

Унда қатнашган Халқ таълими вазири Шерзод Шерматов¸ АОКА тарқатган хабарга кўра¸ синф раҳбарлиги учун тўловлар 1,5 бараварга оширилиши¸ методистларларнинг иш ҳақи миқдори олий тоифали ўқитувчининг базавий тариф ставкаси миқдорига тенглаштирилишини билдирган.

Битирувчиларининг ОТМларга ўқишга кириш кўрсаткичлари юқори бўлган умумтаълим муассасалари раҳбар ходимлари рағбатлантирилади. Шунингдек, халқаро фан олимпиадалари ғолибларнинг ўқитувчиларига тўғридан тўғри олий малака тоифаси берилади”¸ дейилади АҚОКА расмий хабарида.

Шерматовнинг 24 октябрь кунги анжуманда айтишича¸ 2024 йилга қадар юқори натижаларга эришган педагогларнинг ойлик маоши меҳнатга ҳақ тўлашнинг энг кам миқдорининг 15 бараваригача босқичма-босқич оширилади¸ халқ таълими ходимларини рағбатлантириш жамғармалари ташкил этилади.

Ўзбекистонда коронавирусни қайта юқтириб олиш ҳолати қайд этилди

Бугунги кунда Ўзбекистонда COVID-19 билан қайта зарарланиш ҳолатлари ҳам мавжуд. Бу ҳақда Коронавирусга қарши курашиш штаби аъзоси Наргиза Нуруллаева 23 октябрь куни АОКАда ўтказилган брифингда маълум қилди.

Мулозимага кўра, COVID-19 бу янги инфекция бўлиб, организмда бу вирусга қарши антитанача ишлаб чиқарилади. Аммо антитаначалар қанчалик чидамли, қайта зарарланиш мумкинми ва бу ҳолат қанча муддат давомида юз бериши аниқ эмас. Ҳозирги кунда бу муаммо ўрганилиб борилмоқда.

Бугунги кунда республикамизда COVID-19 билан қайта зарарланиш ҳолатлари ҳам мавжуд. Биз қайта зарарланиш ҳолатлари кузатилиши мумкинлигига илмий томонлама амин бўлишимиз лозим", деди Н. Нуруллаева.

Аввалроқ Коронавирусга қарши курашиш штаби аъзоси Нурмат Отабеков “одамда COVID-19 ҳатто иккинчи марта қайд этилса ҳам, у жуда енгил кечиши мумкин”лигини билдирганди.

Ҳозирги пайтда кўплаб мамлакатларда мутахассислар коронавирусга қайта чалиниш ҳолатлари кузатилаётганини айтмоқдалар. Бироқ Ўзбекистон Соғлиқни сақлаш вазирлиги шу кунгача бундай ҳолатларни расман қайд этган эмас.

ССВ қайдича, 23 октябрь соат 23:30 ҳолатига кўра, мамлакатда коронавирусга чалиниш билан боғлиқ 64 минг 811 та ҳолат қайд этилган, 62 минг 33 нафар бемор шифо топган, қурбонлар сони эса 542 нафарга етган.

Божхона қўмитаси экспортчи ширкатларнинг банк сирларига воқиф бўлиш учун қонунга ўзгартиш киритишни таклиф қилмоқда

Ўзбекистон Давлат божхона қўмитаси (ДБҚ) “Банк сири тўғрисида”ги қонунга ўзгартишлар киритишга оид қонун лойиҳасини ишлаб чиқиб, муҳокамага қўйди. Лойиҳадан келиб чиқилса, ДБҚ ширкатларнинг банк сири ҳисобланадиган маълумотларини ола билиш имкониятига эга бўлмоқчи.

Қўмита, аввало, ташқи иқтисодий фаолият иштирокчиларига оид банк маълумотларига эга бўлиш учун қонуннинг 8-моддасига (банк сирини ташкил этувчи маълумотларни тақдим этиш) ўзгартишлар киритишни таклиф қилган. Бу ерда гап “ташқи иқтисодий фаолият [импорт- экспорт] иштирокчиларининг банкда мавжуд бўлган ҳисоб рақамлари, омонатлари (депозитлари), улардаги пул маблағларининг қолдиғи ва операциялар тўғрисидаги ҳамда божхона тўловлари бўйича мажбуриятлар ижроси билан боғлиқ тегишли маълумотларни олиш ҳуқуқига эга бўлиш” ҳақида бормоқда.

Лойиҳа муҳокамаси жорий йилнинг 7 ноябригача давом этади.

Газета.уз қайдича, амалдаги қонунчиликка мувофиқ, банк сирларини ташкил этувчи маълумотларга эга бўлиш ҳуқуқи Ҳисоб палатаси, Адлия вазирлиги ва Бош прокуратура ҳузуридаги Иқтисодий жиноятларга қарши курашиш департаментига берилган. Департамент бу ҳуқуқни 2019 йил январь ойида қўлга киритган.

Ўзбекистон аҳолиси сўнгги 9 ойда қарийб ярим миллион кишига кўпайди

Иллюстратив сурат.

Ўзбекистоннинг доимий аҳолиси сони: 2020 йил 1 октябрь ҳолатига кўра, 34 миллион 382 минг 700 кишини ташкил этган.

Давлат статистика қўмитаси мамлакатдаги демографик ҳолатга оид сўнгги маълумотларига кўра, жорий йилнинг январь-сентябрь ойларида давомида 477 минг 500 кишига ёки 1,4 фоизга кўпайган.

Бундан шаҳар аҳолиси сони 17 миллион 401 минг 900 кишини (жами аҳоли сонидаги улуши 50,6 фоиз), қишлоқ аҳолиси сони эса 16 миллион 980 минг 800 кишини (49,4 фоиз) ташкил этган.

Давстатқўм охирги 9 ой ичида Ўзбекистонда 614,7 минг нафар бола туғилганлиги қайд этилгани, бу даврда туғилиш коэффициенти 24,0 промиллени ташкил этгани, бу кўрсаткичнинг ўтган йил шу даврига нисбатан 0,5 промиллега кўп эканини билдирган (2019 йилнинг январь-сентябрь ойларида 23,5 промилле бўлган).

Жорий йил 1 октябрь ҳолатига кўра, Ўзбекистонда доимий аҳоли сонининг 30,9 фоизи меҳнатга лаёқатли ёшдан кичиклар, 58,4 фоизи меҳнатга лаёқатли ёшдагилар ва 10,7 фоизи меҳнатга лаёқатли ёшдан катталар ҳиссасига тўғри келган.

“Адолат” социал-демократик партияси вакиллари ўзларига янги раис сайлашди

“Адолат” СДП Сиёсий кенгашининг янги раиси Баҳром Абдуҳалимов (adolat.uz фотоси).

Ўзбекистон “Адолат” социал-демократик партияси Сиёсий кенгашининг 23 октябрь куни бўлиб ўтган навбатдан ташқари бешинчи пленумида партияга янги раис сайланган. Бу ҳақда партия матбуот хизмати маълумот тарқатди.

Пленумда “Адолат” партияси Сиёсий кенгаши раиси Наримон Умаров Олий Мажлис Сенати аъзоси ҳамда қўмита раиси этиб тайинлангани муносабати билан уни ўз аризасига мувофиқ равишда лавозимидан озод этиш масаласи кўриб чиқилган.

Шундан сўнг "Адолат" СДП раиси лавозимига Ўзбекистон Фанлар Академияси вице-президенти Баҳром Абдуҳалимов сайланган.

Транспорт вазирлиги: Россиядаги ватандошларни олиб келиш учун яна 3 та автобус йўлга чиқди

"Uzautotrans service" автобуслари.

Россия Федерациясидан Ўзбекистонга қайтиш истагида бўлган ўзбекистонликларни олиб келиш мақсадида Транспорт вазирлиги ҳузуридаги “Uzautotrans service” корхонаси томонидан жорий йилнинг 22 октябрь куни 3 та автобус Екатеринбург шаҳрига жўнаб кетган. Бу ҳақда Транспорт вазирлиги матбуот хизмати маълумот тарқатди.

Режага мувофиқ, автобуслар 23 октябрь оқшомигача белгиланган манзилга етиб бориши керак.

“Ташкил этилган махсус автобус қатнови орқали Екатеринбург, Челябинск, Тюмень шаҳарларидан жами 150 нафар фуқаролар Ўзбекистонга олиб келинади”, дейилган хабарномада.

Вазирлик ушбу махсус автобус қатновлари барча санитария қоидалари ва Қозоғистон ҳамда Россия Федерацияси томонидан қўйилган талабларга қатъий амал қилган ҳолда бажарилаётганини маълум қилган.

Аввалроқ Россиянинг Самара вилоятида йиғилиб қолган ўзбекистонликлар “Uzautotrans service” корхонасига тегишли 15 та автобусда олиб келингани ҳақида хабар қилган эдик.

Янги йилдан офатлар оқибатида ҳужжатини йўқотганлар жазога тортилмайди. Ҳужжатлар давлат ҳисобидан тикланади

Сирдарё вилоятида Сардоба тўғони ёрилгани оқибатида минглаб уйларни сув босган ва минглаб кишилар ҳужжатларини йўқотган эди.

Адлия вазирлигининг 23 октябрда билдиришича, “Фавқулодда вазиятлардан жабр кўрган фуқароларни ижтимоий ҳимоя қилишнинг қўшимча чоралари тўғрисида”ги Президент қарори қабул қилинди.

Қарорга мувофиқ, 2021 йил 1 январдан Ўзбекистон ва хорижий давлатда табиий ва техноген хусусиятли фавқулодда вазиятлар, шу жумладан маиший тусдаги офатлар юз берганлиги оқибатида жисмоний шахсларнинг йўқотилган ёки яроқсиз ҳолга келган ҳужжатларини тиклашда улар давлат божи ва йиғимлардан озод қилинади.

Офатлар юз берганлигини тасдиқлаш зарурати туғилганда, ҳужжатни тиклаш ваколати бўлган давлат органининг сўровига асосан Фавқулодда вазиятлар вазирлиги томонидан маълумотнома берилади.


Хориждаги офат туфайли ҳужжатини йўқотганларга эса хорижий давлат ваколатли идоралари томонидан берилган ва легаллаштирилган ёки апостиль қўйилган ёхуд халқаро шартномаларга мувофиқ расмийлаштирилган маълумотнома асосида ҳужжатлари қайта тикланади.


Ўзбекистон ҳудудида офатлар юз берганлиги оқибатида ҳужжатларни тиклаганлик учун ундирилмаган тўловлар, мазкур ҳолатлар юзасидан айбдор шахслар (ташкилотлар) мавжуд бўлса, кейинчалик улардан регресс тартибида ундирилади.


Офатлар юз берганлиги оқибатида жисмоний шахсларнинг ҳужжатлари йўқотилса ёки яроқсиз ҳолга келса, уларга нисбатан жазо чоралари қўлланилмайди.

Самарқанддаги иккита кўчага коронавирусдан ўлган икки ҳукумат амалдорининг исми берилади

Бош вазирнинг аграр ва озиқ-овқат соҳаларини ривожлантириш масалалари бўйича ўринбосари Ўктам Барноев 20 сентябрь куни вафот этган.

Халқ депутатлари Самарқанд вилояти Кенгашининг 23 октябрь куни ўтган йиғилишида иккита кўчага Аъзамхон Баҳромов ва Ўктам Барноев исмлари берилиши қайд этилди.


Самарқанд вилоят ҳокимлиги матбуот хизматининг билдиришича, бу таклиф сессия давомида депутатлар томонидан таклиф қилинган.


Аъзамхон Баҳромов ва Ўктам Барноев турли йилларда Самарқанд вилоятига раҳбарлик қилган. Аъзамхон Баҳромов 2017 йилдан буён Каттақўрғон тумани ҳокими эди.


Сўнгги йилларда Бош вазирнинг аграр ва озиқ-овқат соҳаларини ривожлантириш масалалари бўйича ўринбосари лавозимида ишлаган Ўктам Барноев 20 сентябрь куни 56 ёшида вафот этган.


Қатор маҳаллий нашрларнинг ҳукуматдаги манбаларига таяниб хабар қилишича, Барноев коронавирусга чалингач, инсультга учраган. Сўнгра, даволаш учун Германияга юборилган ва ўша ерда вафот этган. Барноев Тошкент шаҳридаги Минор қабристонига дафн этилди.


Самарқанд вилояти Каттақўрғон тумани ҳокими Аъзамхон Баҳромов эса 19 октябрда Тошкент шаҳрида дафн этилди. У 60 ёшида оламдан ўтди.

Президентнинг бош тансоқчиси Хавфсизлик кенгаши раисига ўринбосар бўлди

Президент Давлат хавфсизлик хизмати раиси Баҳодир Тошматов. Фотосурат "Газета уз"дан олинди. Фотосурат муаллифи Шуҳрат Латипов.

Президент Шавкат Мирзиёевнинг бош тансоқчиси -президент Давлат хавфсизлик хизмати раиси Баҳодир Тошматов президент ҳузуридаги Хавфсизлик кенгаши котибининг Қуролли Кучларни ривожлантириш масалалари бўйича ўринбосари лавозимига тайинланди. Бу ҳақда «Газета.uz» ҳукуматдаги манбага таяниб хабар берди.

Баҳодир Тошматов жорий йил мартида президент Давлат хавфсизлик хизматини бошқариб келаётган эди. У 2017−2020 йилларда Миллий гвардия қўмондони бўлиб ишлаган.


1964 йилда туғилган Баҳодир Тошматов 2008−2011 йилларда мудофаа вазири ўринбосари ва биринчи ўринбосари, 2011−2013 йилларда — Ўзбекистон президенти ҳузуридаги Миллий хавфсизлик кенгаши котиби бўлиб ишлаган.

2013 йилнинг сентябрида президент Ислом Каримов Мудофаа вазири муовини лавозимида ишлаб келган Виктор Маҳмудовни Миллий хавфсизлик кенгашига котиб этиб тайинлаган.

Миллий хавфсизлик кенгашининг котиби Баҳодир Тошматов эса Мудофаа вазирининг биринчи ўринбосари лавозимига тайинланган. У 2017 йилгача мудофаа вазирининг биринчи ўринбосари сифатида фаолият кўрсатган.

Коронавирусга чалинганларнинг 350 нафардан ортиғи оғир аҳволда қолмоқда

22 октябрь куни мамлакатда 302 ҳолатда касаллик қайд этилди.

Соғлиқни сақлаш вазирлигининг 23 октябрда билдиришича, сўнгги бир сутка давомида коронавирусга чалинган 4 нафар бемор вафот этди. Бу билан ўлганлар сони расман камида 540 нафарга етди.


22 октябрь куни мамлакатда 302 ҳолатда касаллик қайд этилди ва 311 нафар бемор тузалди.


Ҳозирда касаллик қайд этилган жами 64518 нафар бемордан 61734нафари соғайиб, даволаниш кўрсаткичи 95 фоизни ташкил этмоқда.


Айни пайтда тиббиёт муассасаларида даволанаётган 2 244 нафар бемордан 287 нафари оғир, 78 нафари эса ўта оғир аҳволда.

Давомини ўқинг

Кўрмай қолган бўлсангиз

XS
SM
MD
LG