Линклар

Шошилинч хабар
01 июл 2022, Тошкент вақти: 09:40

Ўзбекистон хабарлари

Мирзиёев селектор йиғилишида 6 раҳбарни ишдан олди

Президент Шавкат Мирзиёев.

Президент Шавкат Мирзиёев11 апрель куни ўтган видеоселектор йиғилишида бир қатор раҳбарларни лавозимларидан бўшатди.

"Кун.uz" нашрининг билдиришича, селектор йиғилишида ҳаётий муҳим масалалар бўйича фуқароларнинг мурожаатларини кўриб чиқиш борасидаги ишларнинг аҳволи муҳокама қилинган.

Бу масалада президент Фарғона вилоятидаги Қўқон шаҳри раҳбарияти фаолиятини кескин танқид қилган.

Танқид ортидан Мирзиёев Қўқон шаҳар ҳокими Акрамжон Абдуллаевни, шаҳар прокурорини, солиқ назорати раҳбарини ва ички ишлар бошқармаси бошлиғини ишдан олди.

Бундан ташқари Хусусийлаштириш, монополиядан чиқариш ва рақобатни ривожлантириш давлат қўмитаси раиси Ҳидоятов, Вазирлар Маҳкамаси аппаратининг назорат бўлими бошқарувчиси Ғайбуллаев ҳам лавозимидан озод қилинган.

Табиатни муҳофаза қилиш давлат қўмитаси раиси Б.Х. Абдусаматовга, Давлат архитектура ва қурилиш қўмитаси раиси Б.И. Зокировга, унинг биринчи ўринбосари А.Р. Тўхтаевга, Олий ва ўрта махсус таълим вазири Р. С. Қосимовга ҳайфсан берилди.

Президент Мирзиёев 30 март куни ўтказилган видеоселектор йиғилишида Тошкент шаҳрининг Юнусобод тумани раҳбариятини шу шаклда ишдан олган эди.

Кун янгиликлари

Ўзбекистонда Қурбон Ҳайити қайси кунга тўғри келиши маълум бўлди

Ўзбекистон мусулмонлари идораси Фатво маркази “ҳижрий 1443 йил Зулҳижжа ойининг биринчи куни милодий йил ҳисоб бўйича 2022 йил 30 июн кунига тўғри келаётгани эълон қилинди”, деб хабар берди.

Фатво марказининг билдиришича: “Шу муносабат билан Саудия Арабистонида ҳаж ибодатини адо этаётган зиёратчилар 2022 йил 8 июл, арафа куни Арафот тоғида жам бўладилар”.

Ўзбекистон маҳаллий матбуотининг изоҳ беришича, Ўзбекистон мусулмонлари идораси Фатво марказининг бу баёноти “Қурбон ҳайити 9 июлда нишонланиши”ни англатади.

Маҳаллий матбуотдаги хабарлардан англанишича, Ўзбекистон мусулмонлари идораси Фатво маркази Қурбон ҳайитини 9 июлда нишонлаш тўғрисидаги президент қарори эълон қилинмагани ортидан, 9 июлни Қурбон ҳайити куни деб эълон қилишдан тийилмоқда.

“Ўзбекистонда Қурбон ҳайити 9 июлда нишонланиши президент қарори билан расман эълон қилинса, дам олиш кунлари кетма-кет 4 кунни ташкил этади”, -деб ёзди “Кун уз” нашри.

“Ўзбекистон Мусулмонлар идораси бугун — 30 июнь пайшанба куни Зулҳижжа ойининг 1-куни эканини маълум қилди. Шунга кўра, Қурбон Ҳайити 9 июль — шанба кунига тўғри келади”,-деб дадиллик кўрсатди “Газета уз” нашри.

“9 июль Қурбон ҳайити сифатида расман тасдиқланса, ўзбекистонликлар иш ҳафтасининг туридан қатъи назар кетма-кет 4 кун дам олади”,-деб эҳтиёткорлик қилди “Дарё уз” нашри.

Айни пайтда Қирғизистон ва Қозоғистон мусулмонлари диний идоралари “30 июнь Зулҳижжа ойининг биринчи куни бўлгани муносабати билан 8 июль арафа, 9 июль куни эса Қурбон ҳайит нишонланади”, деб эълон қилди.

Энергетика вазирлиги: Ўзбекистонда энг йирик нефть ва битум кони топилди

Иллюстратив сурат.

Навоий вилоятининг Зарафшон тубсизлигида Ўзбекистондаги энг йирик ўта ёпишқоқ нефть ва битум кони топилди. Мазкур конга “Янги Ўзбекистон” номи берилди. Бу ҳақда Энергетика вазирлиги 29 июнь куни маълум қилди.

Расман билдирилишича, кон “Sanoat Energetika Guruhi” ва “Kontiki-Exploration” компанияси томонидан топилган. Кон Марказий Осиёдаги энг юқори технологияли конлардан бирига айланиши режалаштирилмоқда. “Янги Ўзбекистон” конининг битумли нефть захиралари тахминан 100 миллион тоннага баҳоланмоқда.

“Битумли нефть қазиб олишнинг максимал йиллик даражаси 2025 йилга бориб 1 миллион тоннани ташкил этади. Битумли нефть қазиб олиш даражасини таъминлаш учун йилига 1500 та қудуқ қазиш режалаштирилган. Кейинги 12 йилда конни ўзлаштиришга 2,5 миллиард АҚШ доллари миқдорида сармоя киритилиши тахмин қилинмоқда”,-дейилади вазирлик баёнотида.

Вазирликнинг билдиришича, мазкур лойиҳани амалга ошириш Самарқанд ва Навоий вилоятлари чегарасида 15 майдан бошланган. Бурғилаш ишлари жараёнида “алб”, “сеноман” ва “турон” даврларига оид шағалтош ва қумтош қатламлари топилган. Уларнинг барчаси нефть, қўшимча ёпишқоқ мой ва битум билан тўйинган бўлиб чиқди.

Вазирлик мазкур лойиҳага Канаданинг McDANIEL ва GenOil, АҚШнинг BYIS Manufacturing ва O‘NEILL Industries, Россиянинг Energy and Engineering ва Veraton I.T.C., ширкатлари жалб қилинганини иддао қилмоқда.

“Ҳозирда маҳсулдор қалинликларни аниқлаш ва битум ва нефть конларини аниқлаш бўйича қидирув ишлари, шунингдек, қазиб олиш усулини аниқлаш бўйича тажриба-синов ишлари олиб борилмоқда”,-дейилади баёнотда.

Тошкент хорижликлар яшаши учун энг арзон шаҳарлардан бири деб топилди

Tashkent City паркининг юқоридан кўриниши (архив сурати)

Cost of Living City Ranking рейтингига мувофиқ, Тошкент чет эллик мутахассислар яшаши учун энг арзон шаҳарлардан биридир.

Ўзбекистон пойтахти рўйхатга киритилган дунёнинг 227 шаҳри орасида 221-ўринга қўйилган.

Рейтингда хорижлик яшаши учун энг қиммат шаҳар ўлароқ Ҳонконг, энг арзон шаҳар сифатида эса Туркия пойтахти бўлмиш Анқара кўрсатилган.

Рейтинг кўздан кечирилса, нафақат Анқарада, балки Туркиянинг Истанбул, Покистоннинг Карачи ва Исломобод, Тожикистоннинг Душанбе ҳамда Қирғизистоннинг Бишкек шаҳарларида ҳам турмуш кечириш Тошкентдагига нисбатан арзонроқ эканини кўриш мумкин.

Тошкентда COVID-19 поликлиникалари фаолияти қайта тикланмоқда

Сўнгги кунларда коронавирусга чалинганлар сони кўпая бошлагани муносабати билан Тошкент шаҳрининг 12 туманида COVID-19га ихтисослашган махсус поликлиникалар фаолияти қайта тикланди. Бу ҳақда Соғлиқни сақлаш вазирлиги 29 июнь куни маълум қилди.

“24 соат ишлайдиган ушбу муассасаларнинг асосий вазифаси хасталикни эрта босқичларда аниқлаш, беморларга ўз вақтида ташхис қўйиш ҳамда зарур даво муолажаларини олиб боришдан иборат”, дейилади билдирувда.

Вазирлик ушбу муассасаларда коронавирусни аниқлаш бўйича экспресс ва ПЗР тест олиш, биринчи ёрдам кўрсатиш, рентген текширувларини ўтказиш, касалликнинг оғир даражалари қайд этилган беморларни тез ёрдам машиналари орқали коронавирусга ихтисослашган шифохоналарга етказиш каби имкониятлар мавжудлигини таъкидлаган.

Сўнгги ҳафтада Ўзбекистонда кунига юзга яқин киши коронавирусга чалинаётгани аниқланмоқда. Соғлиқни сақлаш вазирлигининг билдиришича, 28 июнь ҳолатига кўра, Ўзбекистонда коронавирус инфекцияси қайд этилганлар сони 240667 нафарни ташкил этмоқда. Соғайганлар жами 237995 нафарга етди ва соғайиш кўрсаткичи 99 фоизни ташкил этмоқда.

Ўзбекистонда 1 июлдан электр ва газ нархи қимматламайдиган бўлди

Ўзбекистонда аввал режалаштирилганидек 1 июлдан электр ва газ тарифларига ўзгартиришлар киритилмайди, деб билдирди Энергетика вазирлиги 29 июнь куни.

Расман билдирилишича, Вазирлар Маҳкамасининг “Ёқилғи-энергетика ресурслари нархларини ўзгартириш тўғрисида”ги қарори лойиҳаси юзасидан фуқаролардан мингдан ортиқ мурожаат келиб тушган. Бу мурожаатлар айни пайтда Энергетика вазирлиги, Молия вазирлиги, Иқтисодий тараққиёт ва камбағалликни қисқартириш вазирлиги мутахассислари томонидан ўрганилиб, таҳлил қилинмоқда.

“Қабул қилинган таклифлар бўйича барча хулосалар ва мутахассисларнинг хулосалари тақдим этилгандан сўнг, ушбу масала бўйича якуний ва тегишли қарор қабул қилинади”,-дейилади билдирувда.

“Ёқилғи-энергетика ресурсларининг нархларини ўзгартириш тўғрисида” ҳукумат қарори лойиҳаси 31 майда Норматив-ҳуқуқий ҳужжатлар лойиҳалари муҳокамаси порталида эълон қилинганди. Мазкур қарорда 2022 йилнинг 1 июлидан бошлаб электр қуввати ва табиий газ табақалаштирилган нарх асосида “ижтимоий истеъмол нормаси”га амал қилинган ҳолда берилиши таъкидланган.

Қарорда маълум қилинишича, 1 июлдан 1 киловатт-соат электрга овқат тайёрлаш учун марказлашган ҳолда электр плиталари билан жиҳозланган кўп квартирали уй-жойлар ва ётоқхоналарда яшайдиган маиший истеъмолчилар 165 сўмдан ҳақ тўлайди.

Қолган маиший истеъмолчилар ойига 250 кВт соатгача 325 сўм, ойига 250 кВт соатдан юқори ҳар 1 кВт соат учун 650 сўмдан тўлайди. Айни пайтда Ўзбекистонда 1 кВт соат электр қуввати нархи 295 сўмни ташкил этади.

Ҳукумат қарорида 250 кВт соатгача 325 сўм тўланадими ёки 250 кВт соатгача бўлган миқдорнинг ҳар бир киловаттига 325 сўмдан тўланадими, деган савол жавобсиз қолган.

Аммо расмий изоҳдан аниқланишича, ойига 250 кВт соатгача электр ишлатадиган хонадонлар тўлайдиган ҳақ миқдори ойига 7,5 минг сўмга ошади.

300 кВт соатгача ишлатадиганлар учун қўшимча харажат ойига 25 минг сўмга, 400 кВт соатгача электр ишлатадиганлар учун қўшимча харажат ойига 61 минг сўмга кўпаяди.

Шунингдек, газ нархи истиш мавсумида ҳисобга олиш ускуналари мавжуд бўлган аҳолига ойига 700 куб метргача бўлган меъёрнинг 1 куб метри учун 410 сўмдан, ойига 700 куб метрдан юқори ҳар 1 куб метр учун 1200 сўмдан белгиланди.

Иситиш мавсумидан ташқари пайтларда ойига 200 куб метргача бўлган меъёрнинг 1 куб метри учун 410 сўмдан, ойига 200 куб метрдан юқори ҳар 1 куб метр учун 1200 сўмдан тўланади.

АҚШ Россияга микрочип сотган Ўзбекистон ширкатига санкция жорий қилди

АҚШ Давлат департаменти биноси.

АҚШ Ўзбекистондаги Promcomplektlogistic ширкатини санкциялар жорий этилган корхоналар рўйхатига киритди. Бу ҳақда АҚШ давлат департаменти расмий сайтида 28 июнь куни маълум қилинди.

Давлат департаменти баёнотида қайд этилишича, 3 март куни АҚШ мудофаа саноатига маҳсулот етказиб бергани учун Россиянинг “Радиавтоматика” ширкатини санкциялар рўйхатига киритган эди. Бироқ шунга қарамай, Ўзбекистонаги Promcomplektlogistic компанияси “Радиавтоматика” ширкатига санкцияларни четлаб ўтишга кўмаклашган ва мазкур ширкатга микрочиплар етказиб берган.

АҚШ Давлат департаменти Promcomplektlogistic компаниясига санкция жорий этилиши бутун дунёдаги ширкатлар учун “огоҳлантириш” эканини таъкидлади. “Агар сиз санкция остидаги юридик ёки жисмоний шахс билан бизнес қилаётган бўлсангиз, билингки, ўзингиз ҳам санкциялар остида қолишингиз мумкин”, дейилади баёнотда.

Санкцияларга мувофиқ Promcomplektlogistic ширкатининг АҚШдаги барча активлари музлатилади ва АҚШ ширкатларига Promcomplektlogistic билан бизнес қилиш тақиқланади.

Очиқ маълумотларда қайд этилишича, Promcomplektlogistic ширкатига 2018 йилда асос солинган ва компания ер устида транспорт хизмати кўрсатиш билан шуғулланади.

Тошкентда рўйхатдан ўтказилган ширкатнинг ягона эгаси Олег Граблин экани, у Россияда ҳам бир неча ширкатга эга экани кўрсатилган.

Хива 2024 йилда Ислом дунёсининг туризм пойтахти айланади

Хива манзараси

Ислом ҳамкорлик ташкилотининг XI сессияси доирасида илк бор Ўзбекистон шаҳарларидан бири бўлмиш Хивани 2024 йилда “Ислом дунёсининг туризм пойтахти” дея эълон қилишга доир қарор қабул қилинган. Бу ҳақда Туризм ва маданий мерос вазирлиги матбуот хизмати маълум қилди.

Вазирлик қайдича, йиғилишда Хива шаҳрининг тарихий қиёфаси тикланиши, реставрация ва консервацияга оид амалга оширилган ишлар, қолаверса, электр устунларнинг демонтаж қилингани, сайёҳларнинг катта оқимини қабул қилиш учун яратилган шароитлар, инфратузилманинг яхшилангани, 5 юлдузли меҳмонхона қурилиши ҳамда бутик-отел ва ҳостеллар қурилиши фаол давом этаётгани алоҳида қайд этилган. Бундан ташқари, туризм ва унга ёндош соҳалар тадбиркорлари учун яратилган қулай шароитлар юқори баҳоланган.

Ислом дунёсининг туризм пойтахти номинациясига БАА, Туркия, Нигерия, Тожикистон ва Ўзбекистондан Абу-Даби, Шанлиурфа, Лагос, Душанбе ва Хива шаҳарлари номзоди қўйилган бўлиб, сўнгги йилда бу шаҳарлар орасида номинацияда ғолиблик учун шиддатли кураш кузатилган. Пировардида бу мақомга Хива шаҳри лойиқ топилган.

Россиянинг Совкомбанки санкциялар оқибатида Ўзагроэкспортбанкни сотиб олиш битимини бекор қилди

Совкомбанк Ўзбекистон Давлат мулкини бошқариш агентлигидан Ўзагроэкспортбанкнинг юз фоиз акцияларини сотиб олиш тўғрисидаги битимни бекор қилди. Бу ҳақда Совкомбанк бошқаруви раисининг биринчи ўринбосари Сергей Хотимскийга таянган ҳолда Интерфакс агентлиги маълум қилди.

“Афсуски, Россиядаги барча нуфузли банклар қаторида бизга ҳам санкциялар жорий этилгани оқибатида мазкур лойиҳани амалга ошириш имконияти мавжуд бўлмай қолди. Ҳозир томонларнинг ўзаро келишуви асосида битимни бекор қилиш жараёни олиб борилмоқда. Битим деярли бекор қилинди, десак ҳам бўлаверади”,-деди Сергей Хотимский.

АҚШ Совкомбанка нисбатан санкцияларни Россия Украинага бостириб кирганидан бир неча кун ўтиб жорий этган эди. Шундан сўнг бошқа қатор давлатлар ҳам мазкур банкни санкциялар рўйхатига киритган.

Совкомбанк Ўзагроэкспортбанкни 4 миллион долларга сотиб олиш ниятида экани 2021 йилнинг ноябрида хабар қилинган эди. Совкомбанк Ўзагроэкспортбанкни хусусийлаштириш юзасидан очиқ танловда ғолиб чиққани ва Ўзбекистон Давлат мулкини бошқариш агентлиги билан шартнома имзолагани айтилган.

2017 йилнинг ёзида ташкил қилинган Ўзагроэкспортбанк фаолияти асосан агросаноат соҳасидаги ишлаб чиқарувчилар ва экспортчиларни қўллаб-қувватлашга қаратилган эди.

“Ўзтрансгаз” раҳбари: Ўзбекистон икки йил ичида газ экспортидан бутунлай воз кечиши мумкин

Иллюстратив сурат

Ўзбекистон 2025−2026 йилларга бориб хорижга газ сотишнинг бутунлай тўхтатиши мумкин. Бу ҳақда журналистларга “Ўзтрансгаз” раҳбари Беҳзод Норматов маълум қилган.

“Ички истеъмол ошгани туфайли яқин келажакда Ўзбекистонда қазиб олинаётган газнинг ҳаммаси ЯИМнинг барқарор ўсишини таъмишлашга йўналтирилади. Ҳа, бизда экспорт бўлган, бироқ ҳали иқтисодиётимиз динамикаси унча юқори эмас. Биз иш ўринлари яратишимиз лозим, газни қайта ишлаш ва қўшилган қийматнинг қўшимча занжирини яратиш имконияти турганда газнинг ўзини экспорт қилишдан иқтисодиёт қанча фойда кўради?” дея иқтибос келтирган Беҳзод Норматов сўзларидан “Газета.уз” нашри.

Ҳозирги пайтда Ўзбекистонда қазиб олинаётган табиий газнинг тақрибан 10 фоизи Хитойга экспорт қилинмоқда. “Ўзтрансгаз” раҳбари бу фоиз Ўзбекистоннинг ички эҳтиёжларидан келиб чиққан ҳолда ойдан ой ўзгариб турганини айтган. Одатда, қишда экспорт қилинаётган газ ҳажми қисқартирилиб, ёз мавсумида оширилади.

Ўзбекистонда 2025 йилга бориб газ экспортини тўхтатиш режаси борлиги ҳақида бундан икки йил муқаддам бош вазир Абдулла Арипов ҳам айтган эди. Ўшанда у қазиб олинаётган газнинг ҳаммаси мамлакат ичида қайта ишланишини билдирган.

Ўзбекистон ОАВларининг фойда солиғи тенг ярмига қисқартирилди

Жорий йилнинг 1 июлидан 2025 йилнинг 1 июлигача Ўзбекистондаги оммавий ахборот воситаларидан олинадиган фойда солиғи 50 фоизга қисқартирилади. Бу ҳақда президенти Шавкат Мирзиёев 27 июнь куни имзолаган “Оммавий ахборот воситаларини қўллаб-қувватлаш ва журналистика соҳасини ривожлантириш чора-тадбирлари тўғрисида”ги қарорда қайд этилди.

Қарорда таъкидланишича, “2022 йил 1 июлдан бошлаб 2025 йил 1 июлга қадар оммавий ахборот воситалари фойда солиғини белгиланган солиқ ставкаларига нисбатан 50 фоиз камайтирилган солиқ ставкалари бўйича тўлайди, реклама хусусиятига эга бўлган оммавий ахборот воситалари бундан мустасно. Ўзбекистон Республикасида ишлаб чиқарилмайдиган, белгиланган тартибда шакллантириладиган рўйхат бўйича олиб кириладиган матбаа ускуналари, замонавий фото ва радиотелевизион ускуналар ҳамда қоғоз божхона божидан озод этилади”.

Бундан ташқари фаол журналистларни мунтазам рағбатлантириш ва улар ўртасида ижодий соғлом рақобат муҳитини ривожлантириш мақсадида ҳар чоракда оммавий ахборот воситаларида эълон қилинган 100 тагача энг яхши материал учун муаллифлар базавий ҳисоблаш миқдорининг 50 бараваригача миқдорда пул мукофоти билан тақдирланади.

2023 йилдан бошлаб журналистлар ўртасида ҳар йили анъанавий ўтказиб келинаётган “Олтин қалам” миллий мукофотининг бош совриндори автомобиль берилади. Биринчи ўрин учун базавий ҳисоблаш миқдорининг 200 баравари, иккинчи ўрин учун базавий ҳисоблаш миқдорининг 175 баравари, учинчи ўрин учун базавий ҳисоблаш миқдорининг 150 баравари миқдорида мукофот пули тўланади.

27 июнь — Ўзбекистонда Матбуот ва оммавий ахборот воситалари ходимлари куни сифатида нишонланади. Аввалроқ шу кун муносабати билан президент Шавкат Мирзиёев мамлакатдаги қатор журналистларни фахрий унвон, орден ва медаллар билан тақдирлагани хабар қилинган эди.

Халқаро ташкилотлар Ўзбекистонни матбуот эркин бўлмаган давлатлар қаторида баҳолайди. Жумладан, Париждаги “Чегара билмас мухбирлар” ташкилоти бу йилги матбуот эркинлиги индексида Ўзбекистонни 133-ўринга қўйди. Бу ўтган йилги кўрсаткичдан 24 поғона юқоридир.

“Чегара билмас мухбирлар” Ўзбекистонда блогерларга таҳдид қилиш ва уларни қамоққа ташлаш давом этаётганини таъкидлаган.

Ўзбекистонда хизмат кўрсатган журналист Фарҳод Маҳмудов 49 ёшида вафот этди

Фарҳод Маҳмудов. Фотосурат журналист Азиза Қурбонованинг телеграм каналидан олинди.

Ўзбекистон Миллий телерадиокомпанияси раиси биринчи ўринбосари Фарҳод Маҳмудов 27 июнда вафот этгани тўғрисида журналист Азиза Қурбонова маълум қилди.

Маҳаллий нашрларнинг ёзишича, аввалроқ Фарҳод Маҳмудов оғир касалликка чалинган эди. Унинг ўлимига мана шу касаллиги сабаб бўлган. Маҳаллий нашрлар “оғир касаллик”нинг номини айтмаган.

1973 йил Тошкент вилояти Чиноз туманида туғилган Фарҳод Маҳмудов 1996 йил Тошкент давлат университетининг журналистика факультетини тамомлаган.

У 1995 йилдан бери Миллий телерадиокомпанияда турли лавозимларда ишлаб келган. Жумладан, «Ўзбекистон 24» телеканалига раҳбарлик қилган.

2018 йилнинг сентябрида Фарҳод Маҳмудов ОАВ, маънавият ва маърифат, маданият, санъат ва ижодий ташкилотларни ривожлантириш масалалари бўйича президент маслаҳатчисига ўринбосар бўлган. 2019 йил сентябрида эса президент администрацияси раҳбарига ўринбосар этиб тайинланади.

2020 йил ёзидан Маҳмудов Миллий телерадиокомпанияси раисининг биринчи ўринбосари сифатида фаолият юритаётганди. У 2008 йилда «Меҳнат шуҳрати» ордени, 2018 йилда «Ўзбекистонда хизмат кўрсатган журналист» фахрий унвони билан тақдирланган.

Мирзиёев Матбуот куни муносабати билан қатор журналистларга унвон, орден ва медалларни улашди

Иллюстратив сурат

Ўзбекистон президенти Шавкат Мирзиёев 27 июнь — Матбуот ва оммавий ахборот воситалари ходимлари куни муносабати билан мамлакатдаги қатор журналистларни фахрий унвон, орден ва медаллар билан тақдирлади.

Президент сайтида эълон қилинган фармон матнига кўра, журналистлар мазкур мукофотларга Ўзбекистонда “сўз ва матбуот эркинлигини ривожлантириш, халқимизнинг ахборот соҳасидаги конституциявий ҳуқуқларини таъминлаш, давлат ва жамият бошқарувида очиқлик ва ошкоралик тамойилларини мустаҳкамлаш, жамоатчилик назоратини кучайтиришга қаратилган демократик ислоҳотларни амалга оширишда фаоллик кўрсатиб келаётгани, глобал ахборот майдонида миллий манфаатларимизни ҳимоя қилиш, юртимиздаги яратувчилик ва янгиланиш жараёнларида эришилаётган ютуқларни кенг тарғиб этишдаги катта хизматлари, шунингдек, ижтимоий ҳаётдаги фаол иштироки учун” лойиқ топилган.

Фармонга мувофиқ, уч кишига “Ўзбекистон Республикасида хизмат кўрсатган журналист”, икки кишига “Ўзбекистон Республикасида хизмат кўрсатган ёшлар мураббийси”, яна уч кишига “Ўзбекистон Республикасида хизмат кўрсатган маданият ходими” унвонлари берилган. Шунингдек, 6 киши “Меҳнат шуҳрати” ордени, 12 киши “Дўстлик” ордени, 2 киши II даражали “Соғлом авлод учун” ордени, бир киши “Соғлом турмуш” медали, 7 киши “Содиқ хизматлари учун” медали, 2 киши “Келажак бунёдкори” медали, 14 киши эса “Шуҳрат” медали билан тақдирланишган.

Тошкент ҳокимияти Қўйлиқ бозори бузилиши тўғрисидаги хабарларни рад этди

Тошкент шаҳар ҳокимияти матбуотда ва ижтимоий тармоқларда Қўйлиқ бозори бузилиши тўғрисида пайдо бўлган хабарларни рад этди.

“Қўйлиқ деҳкон бозорининг тўлиқ ҳудуди давлат ва жамият эҳтиёжлари учун олиб қўйилиши кўзда тутилмаган. Асосий кириш жойи олдидаги автотураргоҳ ҳудудининг бир қисми ва бир нечта вақтинча савдо қурилмаларининг ўрни қурилиш жараёнига жалб этилади. Бунда, асосий бино ва савдо расталарининг аксарияти ўз жойида қолади. Лойиҳага кўра, жалб этиладиган ҳудуднинг умумий майдони 10 минг кв.метр атрофида бўлади.

Қўйлиқ буюм бозори ҳам тўлиқ олиб қўйилмайди. Бу ерда ҳам автотураргоҳ ҳудуди ва бир нечта вақтинча қурилмаларнинг ўрни ишларга жалб этилиб, улар учун компенсация маблағлари тўлаб берилади. Буюм бозорининг ҳам асосий павильони ўз жойида қолади. Автотураргоҳ ҳудуди билан бирга ишларга жалб этиладиган умумий майдон 6,3 минг кв.метрни ташкил этади”, дейилади расмий билдирувда.

Аввалроқ Озодлик радиоси Тошкент шаҳар ҳокими Жаҳонгир Ортиқхўжаев 22 июнь куни “Ер участкасини давлат ва жамоат эҳтиёжлари учун олиб қўйилишига рухсат бериш тўғрисида”ги қарорни имзолагани тўғрисида хабар берган эди.

Мазкур қарорнинг иккинчи бандида “Тошкент шаҳар, Бектемир тумани, Тошкент автомобиль ҳалқа йўли бўйлаб жойлашган TRIUMVIRAT-QURILISH” МЧЖ ва “QO`YLIQ DEHQON BOZORI” ОАЖ кўчмас мулк объектларига ўрнатилган тартибда компенсация берилганидан сўнг, давлат ва жамоат эҳтиёжлари учун олиб қўйилишига рухсат берилсин”, дейилади.

Қарорда Қўйлиқ бозорининг 52 983 квадрат метр майдони компенсация бериладиган ҳудуд сифатида қайд этилган.

Аммо Тошкент ҳокимияти матбуот хизматининг билдиришича “ОАВда келтирилаётган жадвал фақатгина объектлар ҳақидаги умумий маълумотни акс эттирган бўлиб, улар бузилишидан далолат бермайди”.

Марказий банк: Ўзбекистон ташқи қарзи 2013 йилдан бери илк маротаба камайди

Марказий банк.

Марказий банк 2022 йилнинг 1 – чораги нисбатида эълон қилган навбатдаги ҳисоботида 2022 йил бошидан бери Ўзбекистоннинг ташқи қарзи 1,8 фоизга қисқарганини билдирди. Пул миқдорида бу кўрсаткич 721,5 миллион долларни ташкил қилади.

Ҳисоботда таъкидланишича, 2021 йилда Ўзбекистон умумий ташқи қарзи 39 миллиард 600 миллион доллар бўлган. Жорий йил 1 апрелида эса ташқи қарз 38 миллиард 845 миллионни ташкил қилди.

Умумий ташқи қарзнинг 23 миллиард 400 минг доллари давлат ҳиссасига, 15,5 миллиард долларга яқини эса хусусий сектор ҳиссасига тўғри келади.

Марказий банк Ўзбекистон ташқи қарзи 2013 йилдан бери илк маротаба камайганини қайд этар экан, буни қуйидагича изоҳлади: “Биринчи чоракда жаҳондаги нобарқарор геосиёсий вазият давлат ва хусусий секторнинг қарзларни жалб қилишини, шунингдек, асосий қарз бўйича тўловларни секинлаштирди ва бу ҳолат ташқи қарз қолдиқларида акс этди”.

Масалан, давлат биринчи чоракда 281 миллион доллар қарз олган, бу эса ўтган йилнинг шу давридаги кўрсаткичдан 68 миллион долларга оздир. Банкларнинг қарз олиши эса 2021 йилнинг 1 чорагига нисбатан 518 миллион долларга камайган.

Хусусий сектор 1,2 миллиард доллар қарз олган. Бу қарзнинг 389 миллиони банк, 217 миллиони тоғ-кон саноати, 171 миллион доллари нефтгаз ва энергетика саноати, 455 миллиони эса бошқа соҳалар ҳиссасига тўғри келган.

Жорий йилнинг уч ойи ичида давлат асосий қарзи бўйича 252 миллион доллар, фоизлар бўйича 127 миллион доллар тўлади.

Хусусий сектор эса асосий қарз бўйича кредиторларга 1 миллиард доллар, фоизлар бўйича 110 миллион доллар тўлаб берган.

Тошкент шаҳар ҳокими Қўйлиқ бозорини бузиш тўғрисидаги қарорни имзолади (ВИДЕО)

Тошкентдаги бозорлардан бири.

Тошкент шаҳар ҳокими Жаҳонгир Ортиқхўжаев 22 июнь куни “Ер участкасини давлат ва жамоат эҳтиёжлари учун олиб қўйилишига рухсат бериш тўғрисида”ги қарорни имзолади. Қарорга асосан Қўйлиқ бозори жойлашган ҳудуд “Тошкент ҳалқа автомобил йўлидан кириш ва чиқиш имконини берувчи қўшимча йўл ўтказгичлар қурилиши” учун олинади.

Мазкур ҳудуддаги “олиб қўйилиши режалаштирилган кўчмас мулк объектларига белгиланган тартибда товон пули берилади”.

Қарорда қўшимча йўл ўтказгичлар қурилиши таклифини ҳукуматга шаҳар ҳокимлиги ҳамда Транспорт ва Қурилиш вазирликлари киритгани, Вазирлар Маҳкамаси 2021 йил 12 июлдаги 387-м-сонли махсус фармойиши билан бу таклифни маъқуллагани таъкидланган.

Қарорда бузилиш ва қурилиш ишлари қачондан бошланиши, бу ишларни қайси ширкат олиб бориши тўғрисидаги маълумотлар қайд этилган эмас.

Озодлик радиоси Қўйлиқ бозори Ўртачирчиққа қўчирилиши режалаштирилаётгани, аммо бу иш қачон амалга оширилиши номаълум бўлиб қолаётгани тўғрисида 2018 йилнинг 27 апрелида хабар берган эди.

2021 йилнинг 9 декабрида эса Қўйлиқ бозорининг бошқа жойга кўчирилишидан норози бўлган юздан ортиқ одам автомобил йўлини тўсиб қўйганди. Ўшанда Қўйлиқ бозоридаги савдо фаолияти 2021 йилнинг 31 декабригача бутунлай тугатилиши, 1 январдан Food city савдо мажмуасига тўла кўчиш режалангани билдирилганди. Йўл тўсган савдогарлардан 5 нафари маъмурий қамоққа олинганди.

Жаҳонгир Ортиқхўжаев “Қўйлиқ” бозорини кўчирмоқда. Бозорчилар норози
Илтимос кутинг

Айни дамда медиа-манба мавжуд эмас

0:00 0:20:30 0:00

Давомини ўқинг

XS
SM
MD
LG