Линклар

Шошилинч хабар
02 октябр 2020, Тошкент вақти: 00:15

Ўзбекистон хабарлари

Марказий банк хорижий валюталарнинг сўмга нисбатан янги қийматини белгилади

Ўзбекистон Республикаси Марказий банки 2017 йил 18 апрелдан бошлаб валюта операциялари бўйича бухгалтерия ҳисоби, статистик ва бошқа ҳисоботларни юритиш, шунингдек, божхона ва бошқа мажбурий тўловлари учун хорижий валюталарнинг сўмга нисбатан қуйидаги қийматини белгилади.

Унга кўра, 1 АҚШ доллари 3678 сўму 89 тийин этиб белгиланди. Бу 11 апрелдаги курсга нисбатан 28 сўм 15 тийинга кўп.

Марказий банк 21 февралдан бошлаб доллар курсини ҳафтасига тахминан 50 сўмдан қимматлатиб келаётган эди. Ўтган ҳафтада 27 сўм 4 тийинга қимматлатган эди, бу ҳафта 28 сўм 15 тийинга оширди.

Қиёслаш учун: 2016 йил давомида доллар расмий курси 421 сўмга қимматлатилган эди.

Кун янгиликлари

Жиззахликлар Туркия ва Испанияга қиймати 3 млн доллардан кўпроқ ковул экспорт қилди

Ковул (ДБҚ сайтидан олинган сурат).

Жорий йилнинг 8 ойи давомида “Жиззах” ТИФ божхона постида жами 3 миллион 244 минг АҚШ доллари қийматидаги 1909 тонна ковул экспортга расмийлаштирилган. Бу ҳақда Ўзбекистон Давлат божхона қўмитаси маълумот тарқатди.

Қўмита қайдича, Жиззах вилояти ҳудудида ҳозирги кунда 12 та экспортёр корхона ковул экспорти билан шуғулланиб келмоқда.

Ковул асосан Ғаллаорол, Зомин ва Шароф Рашидов туманларидаги ташқи иқтисодий фаолият иштирокчилари томонидан асосан Туркия ва Испанияга экспорт қилинган.

Ковулдан фармацевтика, озиқ-овқат саноати ва халқ табобатида кенг фойдаланилади.

“Украина халқаро ҳаво йўллари” Тошкентдаги ваколатхонасини ёпади

"Украина халқаро ҳаво йўллари" авиаширкати учоқлари.

“Украина халқаро ҳаво йўллари” авиаширкати Ўзбекистон, Туркманистон ва Беларусдаги ўз бўлинмалари фаолиятини тўхтатади. Бу ҳақда “Интерфакс-Украина” нашри хабар қилган.

Авиаширкат кузатувчилар кенгаши томонидан бундай қарор олинишига “Украина халқаро ҳаво йўллари” ходимлари штатининг қисқаргани ҳамда ваколатхоналарга ажратиладиган харажатларнинг камайгани сабаб ўлароқ кўрсатилмоқда.

Авиаширкатнинг Тошкент шаҳридаги ваколатхонаси 2015 йили очилган эди.

Давстатқўм: Сентябрь ойида нархлар ўртача 1,4 фоизга ошди

Ўзбекистондаги супермаркетлардан бири.

Жорий йил сентябрида ўртача истеъмол нархлари ва тарифлари даражаси 1,4 фоизга кўтарилди. Бу ҳақда Давлат статистика қўмитаси ўзининг галдаги ҳисоботида маълум қилди.

Қўмита маълумотига кўра, ўтган йил сентябрида нархлар ўртача 1,3 га ошган.

Ҳисоботда қайд этилишича, 2020 йилнинг январь-сентябрь ойлари давомида истеъмол бозоридаги нархлар ва тарифлар ўртача 6,3 фоизга кўтарилган (2019 йил шу даврида нархлар ўртача 9,7 фоизга қимматлаган эди).

Йиллик даврда эса (2019 йилнинг сентябрига нисбатан) товарлар ва хизматлар нархларининг ўртача ўсиш суръати 11,7 фоизни ташкил этган.

Ўзбекистон 1 октябрдан бошлаб барча халқаро авиа, темир йўл ва автойўл қатновларини қайта тиклади

Ўзбекистондаги чегара пунктларидан бири.

Ўзбекистон 1 октябрдан мавжуд карантин ва санитария-гигиена талабларига қатъий риоя этган ҳолда авиация, темир йўл ва автойўл ўтказиш пунктлари орқали кириб-чиқишга рухсат берди. Бу борадаги қарор Республика махсус комиссияси томонидан 17 сентябрда қабул қилинган эди.

Айни пайтда Ўзбекистон Ташқи ишлар вазирлиги тезкор штаби 29 сентябрь куни Россия-Қозоғистон давлатлараро чегараси жорий йилнинг 1 октябридан очилиши ҳамда Россиядаги Ўзбекистон фуқаролари Қозоғистон ҳудуди орқали ватанга қайтишлари мумкинлиги ҳақида сўнгги вақтларда ижтимоий тармоқлар ва мессенжерларда тарқалаётган хабарларни рад этган.

Республика махсус комиссияси томонидан 17 сентябрда қабул қилинган қарорида белгиланган Ўзбекистонга кириб келишнинг янги тартибига асосан 1 октябрдан бошлаб Қозоғистон, Туркманистон, Тожикистон ва Афғонистон билан чегарада жойлашган автойўл ўтказиш пунктлари орқали Ўзбекистонга кираётган шахслар коронавирусга ПЗР ёки экспресс-тест ёхуд антиген текширувидан ўтган ҳолда 14 кунга меҳмонхона ёки уй карантинига юборилади.

Сўнгги 14 кун давомида «яшил» давлатда (Хитой, Таиланд, Малайзия, Жанубий Корея, Грузия, Венгрия, Финляндия, Латвия, Австрия ва Япония) бўлиб турган шахслар Ўзбекистон ҳудудига тўғридан-тўғри киритилади.

«Сариқ» (Озарбайжон, Беларусь, БАА ва Европа Иттифоқи давлатлари, Буюк Британия ва Испания бундан мустасно) ҳамда «қизил» давлатлардан (қолган барча давлатлар) кириб келаётган шахслар сўнгги 72 соат давомидаги коронавирусга ПЗР тести манфий натижалари тўғрисида маълумотнома тақдим этган ҳолда Ўзбекистон ҳудудига киритилади.

Ўзбекистонга келаётган шахслардан 14 кун давомида меҳмонхонада ёки уй карантинида бўлиш мажбуриятини зиммасига олиш тўғрисида тилхат олинади.

Коронавирус тарқалишининг олдини олиш мақсадида Ўзбекистон 16 мартдан бошлаб хорижий давлатлар билан барча қатновларни тўхтатган эди.

Шакар, кунгабоқар ёғи ва тухум нархи кескин қимматлади

Тухум нархи 1000 сўмдан 1300 сўмга ошган.

Монополияга қарши курашиш қўмитаси сентябрь ойининг охирги ўн кунлигида ички бозордаги айрим озиқ-овқат маҳсулотлари нархлари кескин ошганини билдирди.

Қўмитанинг маълум қилишича, кунгабоқар ёғининг чакана нархи сентябрь ойининг бошига нисбатан 11 500 сўмдан 15 000 сўмга (ўсиш 30 фоиз), шакар нархи 6 000 сўмдан 7 000 сўмга (ўсиш 15 фоиз) ҳамда тухум нархи 1000 сўмдан 1300 сўмга (ўсиш 30 фоиз) ошган.

Қўмитанинг билдиришича, кунгабоқар ёғининг қимматлашганига Ўзбекистонда бу маҳсулотнинг кўп истеъмол қилина бошлагани билан боғлиқ. Жумладан, жорий йилнинг 9 ойи давомида 177 минг тонна кунгабоқар ёғи импорт қилинган бўлиб, ўтган йилнинг мос даврига нисбатан 13 фоизга кўп.

Айни пайтда Россияда 2019 йилда 15,3 млн тонна кунгабоқар етиштирилган бўлиб, 2020 йилда ушбу кўрсаткич 13,5 млн тонна атрофида прогноз қилинмоқда.

“Бу эса ўз навбатида маҳсулотнинг нархларига таъсир этди, хусусан Россия бозорида август ойида бир тонна кунгабоқар ёғи 750-800 долларни ташкил этган бўлса, ўтган ҳафтада нархлар 985-1050 долларни ташкил этиб, нархлар ўртача 30 фоиз ошган”,-дейилади хабарда.

Тухум нархи кўтарилишига эса четдан келтирадиган парранда озуқа ва озуқа қўшимчалари, ветеринария препаратлари учун жорий йилнинг 1 октябридан қўшилган қиймат солиғи тўланиши назарда тутилгани сабаб бўлган.

Бундан ташқари жорий йил июнь-июль ойлари мобайнида 14 дан ортиқ йирик паррандачилик корхоналарида боқилаётган 1,8 млн. бош қари товуқлар янги жўжаларга алмаштирилганлиги, маҳсулот ишлаб чиқариш ҳажмини кескин камайишига олиб келган.

Шакар нархининг ошишига импортдан келтирилаётган шакарнинг нархи кўтарилиши сабаб бўлган.

“Август ойининг бошида 1 кг шакарнинг нархи ўртача 29 рубльни ташкил этган бўлса, бугунги кунда 39 рубльни ташкил этмоқда (ўсиш 34 фоиз)”,-дейилади хабарда.

Фуқаролик олмоқчи бўлганларнинг ўзбек тилидан имтиҳон топшириш тартиби тасдиқланди

Жорий йилнинг 15 сентябридан бошлаб “Ўзбекистон Республикасининг фуқаролиги тўғрисида”ги қонун кучга кирди.

Вазирлар Маҳкамаси Ўзбекистон фуқаролигини қабул олмоқчи бўлганларнинг ўзбек тилидан имтиҳон топшириши юзасидан низомни тасдиқлади.

Низомга асосан фуқароликка қабул қилишда давлат тилини билиш даражасини аниқлаш Давлат тилида иш юритиш асосларини ўқитиш ва малака ошириш маркази ҳамда унинг ҳудудий бўлинмалари томонидан амалга оширилади.

Бунинг учун фуқароликка ариза топширган шахс марказга базавий ҳисоблаш миқдорининг 20 фоизи миқдорида ( ҳозирги кунда бу 44 600 сўмга тенг) тўлов тўлаши лозим.

Синов имтиҳони ҳужжатлар тақдим этилганидан сўнг 1 ой муддатда тест, ёзма ёки оғзаки шаклларда ўтказилади. Синов натижалари 3 кун муддатда эълон қилинади. Энг юқори баллнинг 50 фоизидан кам балл олган талабгорлар имтиҳондан ўтмаган ҳисобланади ва 1 ойдан кейин қайта имтиҳон топширади. Бу ҳолатда ҳам базавий ҳисоблаш миқдорининг 20 фоизи миқдорида ҳақ тўланади.

Синов имтиҳонларидан муваффақиятли ўтган талабгорларга давлат тилини билиш тўғрисидаги малака сертификати берилади ва у муддатсиз амал қилади.

Жорий йилнинг 15 сентябридан бошлаб “Ўзбекистон Республикасининг фуқаролиги тўғрисида”ги қонун кучга кирди.

Мазкур қонунга асосан Ўзбекистон фуқаролигини олиш учун ариза топширган шахс давлат тилини билиши шарт. 2016 йилдан 2019 йилгача президентнинг 51 та фармон билан 9443 шахс фуқароликка қабул қилинди.

Фан доктори Назира Салоҳова 77 ёшида вафот этди

Назира Салоҳова Жаҳон соғлиқни сақлаш ташкилотининг Ўзбекистондан эндокринология бўйича биринчи координатори бўлган.

Эндокринолог, профессор, Жаҳон соғлиқни сақлаш ташкилотининг Ўзбекистондан эндокринология бўйича биринчи координатори, Халқаро диабетологлар федерациясининг (ИДФ) доимий аъзоси, Марказий Осиё диабетологлар ассоциациясининг биринчи президенти Назира Салоҳова узоқ давом этган касалликдан сўнг вафот этди. Бу ҳақда Инновацион ривожланиш вазирлиги 30 сентябрь куни хабар берди.

Назира Салоҳова 1943 йилда Самарқанд шаҳрида давлат хизматчилари оиласида туғилган. И.М.Сеченов номидаги Москва давлат тиббиёт университетини имтиёзли диплом билан тугатган.

Касбий фаолиятини Тошкентдаги Фанлар Академиясининг Биоорганик кимё институтида катта илмий ходим сифатида бошлаган. Кейинчалик Тошкент тиббиёт институтининг эндокринология кафедраси мудири лавозимида ишлаган.

Тиббиёт фанлари доктори, профессор Назира Салоҳова тиббиёт фанлари номзоди ва доктори бўлган кўплаб илмий кадрлар тайёрлаган.

Бош прокуратура Жиззах коронавирус марказидаги аҳволни ўрганмоқда (ВИДЕО)

Бош прокуратура Жиззах вилояти коронавирусга чалинган беморларни даволаш марказида беморларга овқат берилмаётгани ва улар дориларни ўз ҳисобидан олаётгани тўғрисидаги маълумотни кўриб чиқди.

“Мазкур ҳолат юзасидан Жиззах вилоят прокуратураси ўрганиш ишларини бошлади. Натижаси ҳақида қўшимча равишда хабар берилади”,-дейилади прокуратура баёнотида.

29 сентябрда ижтимоий тармоқларда ўзини Қобилжон Сатторов деб таништирган шахс соғлиқни сақлаш вазири Алишер Шодмоновга видеомурожаат билан чиққан эди.

Сатторов Жиззах вилоятидаги коронавирусга чалинган беморларни даволаш марказида даволанаётганлиги, коронавирусга чалинганлар учун давлат томонидан 32 млн. сўм ажратилаётган бўлса-да, беморлар дориларни шахсий маблағлари ҳисобидан сотиб олаётганликлари, беморларга тушлик овқати берилмаётгани, муассасадаги бўш ўринларга беморлар сунъий равишда қабул қилинмаётганлиги ҳақида гапирган.

Соғлиқни сақлаш вазирлиги ҳозирча бу видеомурожаатга муносабат билдирмади.

Коронавирусдан вафот этганлар сони камида 470 кишига етди

30 сентябрь куни мамлакатда 471 ҳолатда касаллик қайд этилди.

Соғлиқни сақлаш вазирлигининг билдиришича, сўнгги бир сутка ичида коронавирусга чалинган 4 нафар бемор вафот этди. Бу билан Ўзбекистонда коронавирусдан ўлганлар сони расман 470 кишига етди.

30 сентябрь куни мамлакатда 471 ҳолатда касаллик қайд этилди, 487 нафар бемор тузалди.

Ҳозирда касаллик қайд этилган жами 56 825 нафар бемордан 53 457 нафари соғайиб, даволаниш кўрсаткичи 94 фоизни ташкил этмоқда.

Айни пайтда тиббиёт муассасаларида даволанаётган 2898 нафар бемордан 563 нафари оғир, 267 нафари эса ўта оғир аҳволда.

Ўзбекистонда USAIDнинг мустақил миссияси иш бошлайди

Ўзбекистонда АҚШ Халқаро тараққиёт агентлигининг (USAID) икки томонлама ваколатхонаси ишга туширилди. Бу ҳақда, АҚШнинг Тошкентдаги элчихонаси маълумотига кўра, USAID администратори Жон Барса 30 сентябрь куни “Мерос” жамғармаси томонидан ташкил этилган тадбирда эълон қилган.

Жаноб Барсага кўра, айни пайтда Тожикистонда ҳам USAIDнинг икки томонлама ваколатхонаси очилган. Бунгача агентликнинг Ўзбекистондаги идораси қароргоҳи Олмаота шаҳрида жойлашган Марказий Осиёдаги USAID миссиясининг бир қисми бўлиб ҳисобланарди.

USAID администраторининг айтишича, миссиялар АҚШ Халқаро тараққиёт агентлиги фаолият юритадиган асосий марказлар бўлиб, у Қўшма Штатларнинг ҳукумат ҳамда мамлакат халқи билан тўғридан-тўғри ва сермазмун муносабатларни ўрнатишга содиқлигини намойиш этади.

Жон Барса Ўзбекистон ва Тожикистондаги миссиялар агентликнинг минтақадаги фаолиятини мувофиқлаштиришга ёрдам бериб, Марказий Осиёдаги бирон-бир давлат эътибордан четда қолмаслигини таъминлашини қўшимча қилган.

Янги миссиялар 2021 йилда тўлиқ ишга тушиши кутилмоқда.

ТИВ: Абхазияда қолиб кетган ўзбекистонликларнинг илк гуруҳи октябрь бошларида юртига қайтарилади

Абхазияда қолиб кетган ўзбекистонлик муҳожирлар.

Ўзбекистон Ташқи ишлар вазирлиги Абхазия ҳудудида юрган ўзбекистонликларнинг биринчи гуруҳини (аёллар, ҳомиладорлар, қариялар ва болалар) шу йил октябрь ойи бошларида ватанига қайтариш режалаштирилгани ҳақида маълумот тарқатди.

Шу йил 30 сентябрида ёйинланган хабарномада қайд этилишича, Ўзбекистоннинг Россиядаги элчихонаси ва Ростов-Дон шаҳридаги Бош консулхонасига Абхазия ҳудудида бўлиб турган 400 га яқин ўзбекистонликдан ватанга қайтишда кўмаклашишга оид мурожаатнома келиб тушган.

Муаммони ҳал этиш мақсадида ТИВ Россия томонига ўзбекистонликларни ватанга қайтариш учун уларнинг Россия чегарасини кесиб ўтишларига рухсат олиш юзасидан яна бир бор тегишли мурожаат юборган.

Абхазиядагиларнинг илк гуруҳи кейинги ой бошларида юртига қайтишини билдирган вазирлик қолган фуқаролар Россия томонидан Давлат чегарасини транзит мақсадида кесиб ўтишга рухсат берилгандан кейин Ўзбекистонга қайтарилишини қўшимча қилган.

Абхазияда карантин чекловлари туфайли мингдан зиёд ўзбек муҳожири қолиб кетгани ҳақида аввалроқ Озодлик хабар қилган эди. Бу муҳожирлар номидан таҳририятимизга мурожаат қилган ўзбекистонликлар расмийлардан ўз юртларига етиб олиш учун транзит йўли очиб беришни сўрагандилар. Улар минтақада сайёҳлар йўқлиги туфайли иш тўхтагани ва оғир аҳволда қолганларидан шикоят қилгандилар.

Ўзбекистон билан Тожикистон ишбилармонлари 50 миллион долларлик шартномалар имзолади

Иллюстратив сурат.

Ўзбекистон ва Тожикистон давлат ва хусусий сектор субъектлари форуми доирасида ўзаро ҳамкорликка оид 15 та шартнома имзоланган. Умумий қиймати 50 миллион долларга тенг бўлган бу шартномалар иқтисодий ҳамкорликнинг қарийб барча соҳаларини қамраб олади. Бу ҳақда Asia-Plus агентлиги Тожикистон Инвестициялар ва давлат мулкини бошқариш қўмитасидан олинган маълумотларга таянган ҳолда хабар тарқатди.

Душанбеда 29 сентябрь куни Тожикистон-Ўзбекистон инвестиция форуми ўтказилган. Анжуман савдо-иқтисодий ҳамкорлиги бўйича Тожикистон ва Ўзбекистон ҳукуматлараро комиссиясининг 7-йиғилиши доирасида бўлиб ўтган.

Форумда икки давлатдан 300 дан зиёд иштирокчи, шу жумладан давлат органлари, давлат корхоналари ва ташкилотлари раҳбарлари ҳамда хусусий сектор вакиллари қатнашган.

Иштирокчилар туризм, саноат, энергетика, хизмат кўрсатиш ва бошқа соҳалардаги инвестицион иқлим ва имкониятлар билан танишганлар ҳамда ҳамкорлик учун қўшма лойиҳаларни кўриб чиққанлар.

Анжуманнинг расмий қисми якунланганидан кейин “Тадбиркор тадбиркор билан” (B2B) форматида ишбилармонларнинг икки томонлама учрашувлари ўтказилган. Мазкур учрашувлар якунига кўра ҳамкорликка оид янги ҳужжатлар имзоланган.

Мирзиёев ўтган асрда яшаган жадид маърифатпарварларини орден билан тақдирлади

Ўзбекистон президенти Ш. Мирзиёев "Ўқитувчи ва мураббийлар куни"га бағишлаб ўтказилган тантанали маросимда, Тошкент, 2020 йилнинг 30 сентябри.

Ўзбекистон президенти Шавкат Мирзиёевнинг Ўқитувчи ва мураббийлар байрами муносабати билан имзолаган фармонига мувофиқ, халқ озодлиги ва фаровон ҳаётини таъминлаш йўлида фидокорлик кўрсатиб, миллий таълим ва тарбия тизимини яратишга беқиёс ҳисса қўшган Абдулла Авлоний, Маҳмудхўжа Беҳбудий ва Мунавварқори Абдурашидхонов “Буюк хизматлари учун” ордени билан тақдирланган. Бу ҳақда президент матбуот хизмати маълум қилди.

Жадидчилик ҳаракати намояндаларига орден берилгани ҳақида 30 сентябрь куни Тошкентдаги Халқаро конгресс марказида президент Ш. Мирзиёев иштирокида Ўқитувчи ва мураббийлар кунига бағишлаб ўтказилган тантанали маросимда билдирилган.

Тадбирда сўзга чиққан Мирзиёев ўқитувчиларга миннатдорчилик билдириб, инсон тарбиясида, камолотида устозлар хизмати улуғлигини эътироф этган.

“Буюк аждодларимизнинг бетакрор ва ноёб илмий-маънавий мероси биз учун доимий ҳаракатдаги ҳаётий дастурга айланиши керак. Бу ўлмас мерос ҳамиша ёнимизда бўлиб, бизга доимо куч-қувват ва илҳом бағишлаши лозим. Авваламбор, миллий таълим тизимини ана шундай руҳ билан суғоришимиз керак”, деган Ўзбекистон президенти ўз сўзида.

Ўзбекистонда Ўқитувчи ва мураббийлар куни 1 октябрда нишонланади.

ЕТТБ Ўзбекистондаги кичик ва ўрта бизнес учун 40 млн доллар ажратади

Европа тикланиш ва тараққиёт банки Ўзбекистондаги коронавирус пандемиясидан зарар кўрган кичик ва ўрта бизнес корхоналарини дастаклаш учун 40 миллион доллар ажратади. Бу ҳақда ЕТТБнинг 30 сентябрь куни ёйинланган хабарномасида айтилган.

Қайд этилишича, молиявий дастур Ўзбекистонда аёллар тадбиркорлигининг ривожланишига кўмаклашади. Молия пакети кичик ва ўрта бизнес корхоналари учун 30 миллион АҚШ доллари миқдоридаги кредит ҳамда тадбиркор аёллар учун 10 миллион АҚШ доллари миқдоридаги кредитдан иборат бўлади.

Дастур тадбиркор аёлларга касбий тайёргарликдан ўтишда ҳамда келажакда ўз бизнесини қай йўл билан ривожлантириш бўйича малака ва ишонч ҳосил қилишда кўмаклашиши айтилмоқда.

Маълумотларга кўра, ЕТТБ шу кунгача 81 та лойиҳада иштирок этиш орқали Ўзбекистон иқтисодиётига 1,8 миллиард евро миқдорида сармоя киритган.

Фольклоршунос олим Тўра Мирзаев вафот этди

Академик Тўра Мирзаев (Ўзбекистон Миллий кутубхонаси сайтидан олинган сурат).

Ўзбекистон Фанлар академияси академиги, филология фанлари доктори, профессор, Ўзбекистон Ёзувчилар уюшмаси аъзоси Тўра Мирзаев 2020 йилнинг 29 сентябрь куни оламдан ўтди. Бу ҳақда Ўзбекистон Ёзувчилар уюшмаси ўз Телеграм-канали орқали маълумот тарқатди.

1936 йили Бухоро вилоятининг Шофиркон туманида туғилган Тўра Мирзаев, қайд этилишича, халқ оғзаки бадиий ижодиётини кенг кўламда тадқиқ этишдан иборат фундаментал илмий мактабга асос солган улкан фан ташкилотчиси, йирик фольклоршунос олим эди.

Унинг 600 дан ортиқ илмий, услубий, илмий-оммабоп иши эълон қилинган. Олимнинг китоб ва мақолалари Россия, Германия, Туркия, Тожикистон, Қозоғистон, Туркманистон каби кўплаб мамлакатларда нашр этилган.

Волгоградда тўпланиб қолган ўзбекистонлик муҳожирлар ватанига қайтарилди

Волжский шаҳар маъмурияти ташаббуси билан вокзалда бошпанасиз қолган ўзбекистонлик муҳожирлар қурилиши ҳали битмаган масжидга жойлаштирилган эди.

Россиянинг Волгоград вилояти Волжск туманида тўпланиб қолган ўзбекистонлик меҳнат муҳожирларининг 800 нафари 29 сентябрь куни Приволжск темир йўли поезди билан Тошкентга жўнатилди. Бу ҳақда ТАСС Приволжск темир йўли расмий вакилига таянган ҳолда хабар берди.

Хабарда айтлишича, 25 сентябрь куни ҳам бу ердан 900 нафар ўзбекистонлик ватанига жўнатилган. Волжск-Тошкент йўналиши бўйича навбатдаги темир йўл қатнови 1 октябрга режалаштирилган.

Хабарда айтилишича, Ўзбекистонга қайтолмай тўпланиб қолган муҳожирлар Волжскдаги мусулмон маданий оқартув марказида бошпана топган эдилар. Озодлик бу ҳақда 29 сентябрда хабар берган эди.

“Ҳозир марказда Ўзбекистоннинг икки нафар фуқароси қолди. Шаҳар ҳокимияти, меҳр-мурувват ташкилотлари, барча диндаги бефарқ бўлмаган одамлар уларни овқат билан таъминлашга кўмак кўрсатди. Марказга каравотлар ва матраслар олиб келинди. Айни пайтда биз ватанига қайтмоқчи бўлган одамларнинг янги гуруҳини кутиб олишга тайёрмиз. Уларнинг сони қанча бўлади, улар қачон келишади-бу фақат эртага билинади”,-деб айтган Волгоград вилояти муфтийси Абдулла Хожи.

Аввалроқ “Ўзбекистон темир йўллари” махсус поезди 27 сентябрь куни Россиянинг Самара вилояти Кинель аҳоли пунктида тўпланиб қолган ўзбекистонликларнинг охирги қисмини ватанига олиб кетгани хабар қилинганди.

Коронавирус пандемияси бошланганидан кейин Россиядаги муҳожирларнинг кўпи ишсиз ва пулсиз қолган, шу важдан улар ватанларига қайтишга қарор қилишган. Аммо чегаралар ёпиқлиги сабаб, улар чегараолди ҳудудларида тўпланиб қолишган.

Биргина сентябрь ойида Самара вилоятидан самолёт ва поездларда 6 мингдан ортиқ ўзбекистонлик юртига жўнатилган.

Май ойидан бери Самара вилоятидан Ўзбекистонга 10 мингга яқин ўзбекистонлик қайтарилган.

Ўзбекистонга қайтмоқчи бўлган муҳожирлар учун Москвадан вилоятларга рейслар ташкил қилинди

Новосибирскнинг Толмачево аэропортидан Ўзбекистонга қайтаётган муҳожирлар. 2020 йил 23 май.

Uzbekistan Airways Москвадан Ўзбекистон вилоятларига репатриация қатновларини амалга оширади. Бу ҳақда Ўзбекистон Транспорт вазирлиги маълум қилди.

Расмий маълумотда билдирилишича, 5 октябрдан 10 октябргача Москва шаҳри Внуково аэропортидан Андижон, Урганч, Бухоро, Термиз, Самарқанд, Фарғона, Наманган шаҳарларига авиарейслар ташкил қилинди.

Қуйидаги йўналишларда репатриация қатновларини амалга оширишни режалаштирмоқда (парвоз соатлари маҳаллий вақт билан кўрсатилган):

5 октябрь

HY3622 Москва – Андижон 09:40/15:55

HY3616 Москва – Урганч 21:40/03:15

6 октябрь

HY3608 Москва – Бухоро 08:10/14:05

HY3610 Москва – Термиз 21:00/03:15

7 октябрь

HY3606 Москва – Самарқанд 09:20/15:20

HY3616 Москва – Урганч 20:35/02:10

8 октябрь

HY3628 Москва – Фарғона 07:05/13:20

HY3628 Москва – Самарқанд 21:00/03:00

9 октябрь

HY3622 Москва – Андижон 08:50/15:05

HY3608 Москва – Бухоро 20:50/02:45

10 октябрь

HY3620 Москва – Наманган 07:50/14:10

Вазирликнинг билдиришича, ушбу қатновлардан фақат COVID-19 ПЗР – тестининг (манфий натижаси ҳақидаги маълумотномага эга бўлган Ўзбекистон фуқаролари фойдаланиши мумкин. ПЗР тести қатновдан 72 соат олдин амалга оширилиши керак. ПЗР маълумотномаси бўлмаган йўловчилар авиакомпания қатновларига қўйилмайди.

Коронавирусга чалинганлардан 261 нафари оғир аҳволда - ССВ

29 сентябрь куни мамлакатда 476 ҳолатда касаллик қайд этилди.

Касалхоналарда коронавирусдан даволанаётган 2 918 нафар бемордан 587 нафари оғир, 261 нафари эса ўта оғир аҳволда. Бу ҳақда 30 сентябрь куни Соғлиқни сақлаш вазирлиги маълум қилди.

Вазирлик сўнгги бир сутка ичида коронавирусга чалинган 5 нафар бемор вафот этиб, жами кўрсаткич расман 466 нафарга етганини ҳам билдирди.

29 сентябрь куни мамлакатда 476 ҳолатда касаллик қайд этилди, 504 нафар бемор тузалди.

Ҳозирда касаллик қайд этилган жами 56 354 нафар бемордан 52 970 нафари соғайиб, даволаниш кўрсаткичи 94 фоизни ташкил этмоқда.

ОТМларда 1-курс талабалари учун дарслар 12 октябрдан бошланади

Бу йил ОТМга кирмоқчи бўлган абитуриентлар кириш тестларини очиқ ҳавода топширганлар.

Жорий ўқув йилида олий таълим муассасаларининг 1-курсига қабул қилинган талабалар учун дарслар 12 октябрдан бошланади. Бу ҳақда Олий ва ўрта махсус таълим вазирлиги бош бошқармаси бошлиғи Aбдували Холиқов 29 сентябрь куни АОКАда ўтказилган матбуот анжуманида маълум қилган.

“2020/21 ўқув йилини масофавий тарзда бошладик. Биринчи курс ўқувчилари билан ҳам ўқув йили масофавий тарзда бошланади. Фарқли томони – режамизга кўра, биринчи курсга тавсия этилган талабаларнинг ҳужжатлари тўлиқ расмийлаштирилиб бўлинганидан кейин, 12 октябрдан бошлаб, олий таълим муассасаларида 3 кундан 2 ҳафтагача танишув дарслари ташкил қилинади”, дея иқтибос келтиради А. Холиқов сўзларидан Кун.уз нашри.

Қайд этилишича, талабалар ётоқхоналарга жойлаштирилмайди. Узоқ ҳудудлардан Тошкентдаги ОТМларга ўқишга кирган талабалар учун ўша ҳудуддаги ОТМнинг моддий техник-базасидан фойдаланган ҳолда ҳудуддаги ёшларни йиғиб, танишув дарслари ташкил этилади.

Вазирлик мулозимининг билдиришича, Тошкент шаҳридаги ОТМларнинг профессор-ўқитувчилари узоқ ҳудудларга бориб, танишув дарсларини ташкил қилади. Танишув дарслари кунига 2 парадан ортиқ бўлмаган ва карантин талабларига риоя қилинган ҳолда ўтказилади. Паралар орасида 10 дақиқалик танаффус бўлиб, талабалар аудиторияни ўзгартирмайди.

Душанбега борган Бош вазир Арипов Президент Раҳмон билан учрашди

Душанбе шаҳри кўчаларидаги Ўзбекистон ва Тожикистон байроқлари.

Тожикистон президенти Эмомали Раҳмон 29 сентябрь куни Душанбега хизмат сафари билан борган Ўзбекистон бош вазири Абдулла Ариповни қабул қилди. Бу ҳақда давлатга қарашли “Ховар” ахборот агентлиги хабар берди.

Учрашувда томонлар Тожикистон билан Ўзбекистон муносабатларининг ҳозирги ҳолати ва истиқболи, келажакда уларни янада кенгайтириш масалаларини муҳокама қилганлар.

Тожикистон президенти икки қўшни давлат ўртасидаги стратегик ҳамкорликни янада кучайтириш учун олий ва юқори даражаларда доимий сиёсий мулоқотни сақлаб туриш муҳимлигини таъкидлаган.

Коронавирус пандемияси шароитида ҳамкорликни ривожлантириш бўйича долзарб муаммоларни муҳокама қилиш чоғида Э. Раҳмон фурсатдан фойдаланиб, ўзбекистонлик дўстларга барча учун оғир бўлган пайтларда Тожикистонга кўрсатган инсонпарварлик ёрдами учун яна бир бор ташаккур изҳор этган.

Тожикистон президенти билан учрашишдан аввалроқ А.Арипов сешанба куни мезбон ҳамкасби Қ. Расулзода билан биргаликда савдо-иқтисодий ҳамкорлик бўйича Душанбеда ўтказилган ҳукуматлараро комиссиясининг еттинчи йиғилишида иштирок этган эди.

Мазкур йиғилишда, Тожикистон нашрлари хабарларига кўра, икки қўшни мамлакат учун муҳим бўлган саноат, қишлоқ хўжалиги, туризм, таълим ва фан, соғлиқни сақлаш, савдо-сотиқ, инвестициялар, энергетика, божхона, экспорт-импорт, маданият ҳамда транспорт соҳалари бўйича масалалар муҳокама қилинган, муайян келишувларга эришилган.

Эмомали Раҳмон Ўзбекистон бош вазири билан учрашув чоғида мазкур ҳукуматлараро комиссияси иши натижалари ҳам томонлар ўртасидаги ҳамкорликнинг янада мустаҳкамланишига кўмакчи бўлишига ишонч билдирган.

Бу Ўзбекистон расмий делегациясининг коронавирус пандемияси бошланганидан бери Тожикистонга илк сафаридир.

Хонобод шаҳрининг пневмонияга чалинган ҳокими оламдан ўтди

Иллюстратив сурат.

Андижон вилояти Хонобод шаҳар ҳокими Мусахон Мамадалиев пневмониядан вафот этди. Бу ҳақда “Юксалиш” умуммиллий ҳаракати ўз Телеграм-канали орқали маълумот тарқатди.

Ўн кун муқаддам маҳаллий нашрлар Андижон вилоятида қатор туман ҳокимлари, жумладан Шаҳрихон тумани ҳокими Ҳикматилло Дадахонов, Пахтаобод тумани ҳокими Махсуджон Бозоров ва Олтинкўл тумани ҳокими Назиржон Ўринбоев пневмониядан даволанаётгани, улар орасида Хонобод шаҳар ҳокими Мусахон Мамадалиев ҳам борлиги ҳақида хабар қилган эдилар.

ЖССТ тавсияларига қарамай, Ўзбекистонда коронавирус инфекциясини юқтириб олиш ҳамда COVID-19 юқиши натижасида юзага келган пневмонияга чалиниш ҳолатларини яхлит статистик маълумотлар кўринишида бирлаштириш шу пайтгача амалга ошган эмас. Шу важдан пневмонияга чалинганлар ва бу касалликдан вафот этганларга оид рақамлар расмий статистикада акс этаётгани йўқ.

“Юксалиш” ҳаракати 29 сентябрь кунги ўз баёнотида коронавирус инфекцияси бўйича расмийлар томонидан эълон қилинаётган статистикага ишонч йўқолаётганини инобатга олиб, Республика махсус комиссияси ва Соғлиқни сақлаш вазирлигини Ўзбекистонда COVID-19 тарқалиши билан боғлиқ вазият тўғрисида фуқароларни тўлиқ ва холис ахборот билан таъминлаб бориш, хусусан, коронавирус инфекцияси тарқалишининг аниқ кўрсаткичлари ва ўчоқлари, уйда даволанаётган одамлар, вафот этганлар сони кўрсатилган кунлик батафсил ҳисоботларни эълон қилиб бориш, COVID-19 юқиши натижасида келиб чиққан пневмония ҳолатларини ва коронавирус инфекциясини яхлит статистик маълумотлар кўринишида бирлаштириш, шу жумладан пневмонияни юқтирган ва унинг оқибатида вафот этганлар сонини тақдим этиш, Коронавирусга қарши кураш бўйича штаб аъзоларининг тўлиқ рўйхатини жамоатчиликка тақдим этиш, фуқароларни эпидемиологик вазият ҳақида хабардор қилишга қаратилган брифинг ва матбуот анжуманларида вазирлик ва идоралар раҳбарияти даражасидаги ваколатли шахслар, Республика махсус комиссияси аъзоларининг иштирок этишини таъминлашга чақирган.

Тошкентликларнинг сувдан қарзи 124 млрд сўмга етгани иддао қилинди

Тошкент шаҳри аҳолисининг биргина ичимлик сувидан қарздорлиги шу кунда 124 миллиардга етган. Бу ҳақда “Тошкент шаҳар сув таъминоти” корхонаси Фейсбукдаги ўз саҳифаси орқали маълумот тарқатди.

Корхона вакилларига кўра, қарздорликнинг бу тарзда ўсишига карантин чекловлари туфайли аҳолининг тўлов қобилияти чеклангани, кўп йиллардан буён аҳолидан ичимлик суви тўловларининг ўз вақтида ундирилмагани ва бошқа омиллар сабаб бўлмоқда.

Шундан келиб чиққан ҳолда, “Тошкент шаҳар сув таъминоти” аҳолининг ичимлик сувидан қарздорлигини йил сўнгига қадар қисқартириш бўйича аниқ чора-тадбирлар режасини ишлаб чиққан. Унга кўра, тизимдаги барча мутасаддилар ушбу саъй-ҳаракатга сафарбар этилган.

Корхона пойтахт аҳолисини сув таъминоти хизмати учун ҳақни ўз вақтида тўлашга чақирган.

ТИВ Россия-Қозоғистон чегараси 1 октябрдан очилишига оид маълумотларни рад этди

Россия-Қозоғистон чегараси томон ҳаракатлаётган муҳожирларнинг машиналари.

Россия-Қозоғистон давлатлараро чегараси жорий йилнинг 1 октябридан очилиши ҳамда Россиядаги Ўзбекистон фуқаролари Қозоғистон ҳудуди орқали ватанга қайтишлари мумкинлиги ҳақида сўнгги вақтларда ижтимоий тармоқлар ва мессенжерларда тарқалаётган хабарлар ёлғон. Бу ҳақда Ўзбекистон Ташқи ишлар вазирлиги тезкор штабининг 29 сентябрь куни ёйинланган ахборотида айтилган.

Вазирлик йўловчи ташиш билан шуғулланадиган айрим шахслар шахсий автомобилларида Ўзбекистонга қайтиш тўғрисида турли эълонлар тарқатаётганига ҳам эътибор қаратган.

Ўзбекистонликлардан бу каби ёлғон хабарларга ишонмасликни сўраган ТИВ Россия ва Қозоғистон ўртасидаги автомобиль чегаралари томонлар ушбу масала бўйича махсус қарор қабул қилгунга қадар чет эл фуқаролари учун ёпиқ қолиши ҳақида маълум қилган.

Хабарномада ҳозирда Ўзбекистонга қайтиш истагидаги фуқаролар учун авиа, темир йўл ва автобус чартер қатновлари ташкил этилаётгани, ушбу рейсларга чипталар онлайн тарзда сотилаётгани урғуланади.

Коронавирус инфекцияси юқиш эҳтимолидан огоҳлантирган вазирлик Россия ҳудудида бўлган ўзбекистонликлардан жойларда тўпланмаслик, барча карантин талабларига қатъий риоя қилиш ҳамда ўзлари ва яқинлари саломатлигини хавф остига қўймасликни сўраган.

ТИВ ахборотида қайд этилишича, Ўзбекистоннинг Қозон ва Ростов-Дон шаҳарларидаги бош консулхоналари маълумотларига асосан, 2020 йил 29 сентябрь ҳолатига кўра, Самара вилоятининг “Кинель”, Ростов вилоятининг “Первомайская” ва “Лихая” темир йўл станциялари яқинида ўзбекистонликларнинг тўпланиши кузатилмаяпти. Тўпланган барча фуқаролар автобус рейслари ва “Ўзбекистон темир йўллари” АЖнинг махсус поездлари орқали ватанга қайтарилган. Шу муносабат билан ушбу станциялар яқинидаги махсус вақтинчалик лагерлар айни пайтда ёпилган.

Президент имзолаган қонун билан маҳаллий ҳокимликларнинг ваколати чекланди

Ўзбекистонда президент томонидан 28 сентябрь куни имзоланган қонун билан маҳаллий ижроия ҳокимият органларининг айрим ваколатлари бекор қилинди. Бу ҳақда Адлия вазирлигига қарашли “Ҳуқуқий ахборот” Телеграм-канали маълумот тарқатди.

“Бюрократик тўсиқлар янада қисқартирилиши ҳамда давлат органлари ва ташкилотлари фаолиятига замонавий бошқарув тамойиллари жорий қилиниши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги мазкур қонунга мувофиқ, маҳаллий ҳокимият идораларининг фаолияти сувларнинг ва сув объектларининг ҳолатига таъсир этувчи корхоналарнинг технология, ўрмон-мелиорация ва агротехника, гидротехника, санитария-техника тадбирларини ўтказишлари учун келишиш лозимлигига оид, корхоналар ва ташкилотларга қуйидаги масалаларда ёзма кўрсатмалар бериш, сув тошқинларининг, сув босиши ва зах босишининг, соҳиллар, ҳимоя дамбалари ва бошқа иншоотлар бузилиб кетишининг, ерларнинг ботқоқланиши ва шўрланишининг, тупроқ эрозиясининг, жарлар, ўпирилишлар юзага келишининг, сел оқимларининг ва сувлар етказадиган бошқа зарарли таъсирнинг олдини олиш ҳамда уни бартараф этиш бўйича тадбирларни амалга оширишга оид ҳамда аҳолининг ичимлик, маиший ва бошқа эҳтиёжлари учун мўлжалланган сув олиш иншоотларидан фойдаланиш тўғрисида қарор қабул қилишга оид ваколатлари бекор қилинди.

Шу билан бирга, қонун билан маҳаллий ижроия ҳокимият органларининг қуйидаги ваколатлари чиқарилган:

  • Маъмурий жавобгарлик тўғрисидаги кодексга киритилган ўзгартириш билан ҳокимларнинг маъмурий жавобгарликка тортиш назарда тутилган қарорлар қабул қилиш ва маъмурий жавобгарликка сабаб бўладиган айрим қоидаларни белгилаш ваколати;
  • “Атмосфера ҳавосини муҳофаза қилиш тўғрисида”ги Қонунга киритилган ўзгартиришга кўра, ҳокимларнинг атмосфера ҳавосига ифлослантирувчи моддалар чиқарилишининг йўл қўйиладиган нормативларини бузиш билан боғлиқ бўлган фаолиятни чеклаш, тўхтатиб туриш ва тугатиш масаласида қарор қабул қилиш ваколати;
  • “Ўсимлик дунёсини муҳофаза қилиш ва ундан фойдаланиш тўғрисида”ги Қонунга киритилган ўзгартиришларга кўра, ёввойи ҳолда ўсувчи ўсимликларни чорвачилик эҳтиёжлари учун тайёрлаш учун рухсатнома бериш ваколати;
  • “Ўрмон тўғрисида”ги Қонунга киритилган ўзгартиришларга кўра, ўрмонларнинг ҳолатига зарар етказилган ҳолларда ташкилотлар фаолиятини чеклаш, тўхтатиб туриш ва тугатиш бўйича қарор қабул қилиш ваколати.

Ўзбекистон коронавирусга қарши Хитой вакцинасини ҳамкорликда синашга келишиб олди

“Ўзбекистон ҳукумати Хитойнинг иккита компанияси билан коронавирусга қарши вакциналар синовининг сўнгги босқичларини ўтказиш бўйича битимлар имзолади”,- деб хабар берди 29 сентябрь куни “Газета уз”.

Хабарда айтилишича, Инновацион ривожлантириш вазирлиги Sinopharm ва Zhifei Longcom билан бу борадаги шартномаларни имзолади.

25 сентябрь куни Халқаро пресс-клуб йиғилишида Санитария-эпидемиологик осойишталик агентлиги директори, соғлиқни сақлаш вазирининг биринчи ўринбосари Баҳодир Юсупалиев Ўзбекистон коронавирусга қарши вакцинанинг охирги-учинчи синови якунланганидан сўнг коронавирусга қарши вакцинани ишлаб чиқариш ва экспорт қилишни режалаштираётганини билдирган.

«Хитойнинг иккита компанияси вакциналарини Ўзбекистонга жалб қилиш ва [ушбу дори воситаларининг] клиник синовларининг учинчи босқичида иштирок этиш [режалаштирилмоқда]. Сўнгра ўзимизда ушбу вакциналарни ишлаб чиқариш масаласи кўтарилади, бу эса импортнинг қисқаришига олиб келади, бундан ташқари биз уларни қўшни мамлакатларга экспорт қилишимиз мумкин бўлади», — деб иқтибос келтирган Баҳодир Юсупалиев сўзларидан нашр.

Унга кўра, Ўзбекистон Россия ширкатларига ҳам Россия вакцинасини ҳамкорликда синовдан ўтказишни таклиф қилган. Бугунги кунда бу масалада Россия томонининг жавоби кутилмоқда.

25 сентябрь куни Россия тўғридан тўғри инвестициялар жамғармаси Ўзбекистонга коронавирусга қарши 35 миллион доза «Спутник V» вакцинасини жўнатиш тўғрисида Laxisam фармацевтика ширкати билан шартнома имзолангани тўғрисида билдирган эди.

Хабарда айтилишича, Ўзбекистон мувофиқлаштириш ва назорат органлари рухсати олинганидан сўнг 2020 йилда республикага 10 миллион доза, 2021 йилда эса 25 миллион доза вакцина жўнатилади.

Давомини ўқинг

Кўрмай қолган бўлсангиз

XS
SM
MD
LG