Линклар

Шошилинч хабар
21 сентябр 2020, Тошкент вақти: 08:57

Ўзбекистон хабарлари

Фарғона водийсида қадимий шаҳар топилди

Озодлик архивидан (Хабарда тилга олинган воқеага алоқаси йўқ)

Туркияда чиқадиган Sabah газетасининг хабар қилишича, археологлар Фарғона водийсида Буюк ипак йўлидаги қадимий манзилгоҳни топган.

Хитой ва Ўзбекистон архелоглари Мингтепа қишлоғи ёнида икки йил давомида олиб борган археологик қазмалар натижасида майдони 2 квадрат километрлик қадимий шаҳар топилган. Газета топилма шаҳар ҳажмини Европа жанубидаги Монако давлати майдонига тенг эканлигини айтиб ўтган.

Тадқиқотлар мазкур шаҳар 2000 йил муқаддам Фарғона водийсини Буюк ипак йўлидаги зотдор отлари ва бекатлари билан машҳур бўлган Дайюань давлати билан боғлиқ муҳим аҳоли пункти бўлганини кўрсатган.

Айтилишича, Фарғона водийсида топилган қадимий шаҳар эрамиз бошланиши арафасида Хитой ва Европа маданиятларинг бир-бирига ўзаро таъсирини ўрганадиган муҳим нуқтадир.

Хитой ва Ўзбекистон археологлари гуруҳи Фарғона водийсида жойлашган қадимий Мингтепа шаҳридаги қазув ишлари чоғида муҳим кашфиёт қилишди. Бу ҳақда Синхуа агентлигига таяниб, Спутник нашри йил бошида хабар қилган эди.

Икки мамлакат археологлари 2012 йилдан буён мазкур қадимий шаҳарда беш марта қазув ишларини ўтказишди. Қазув натижаларидан маълум бўлишича, бундан 2000 йил аввал Мингтепа нафақат аскарлар қўрғони, балки Фарғона водийсидаги энг йирик қалъа-шаҳар бўлган. Қазув ишлари вақтида шунингдек, устахона харобалари, ички шаҳарнинг ғарбий дарвозаси қолдиқлари ва ташқи шаҳар шарқий девори ёнидан қабристон топилган.

Хитой археология институти вакили Чжу Яншининг айтишича, қазув ишларида "Лоян белкураги" деб номланувчи хитой археологик асбоби, илғор ўлчов ва компьютер технологияларидан фойдаланилди.

Унинг сўзларига кўра, ўзбек археологлари қадимий шаҳарнинг ерусти қисмини яхши ўрганишган, хитойлик археологлар эса унинг еростки қисмини ўрганишда катта тажрибага эга. Шу боис томонлар қазув ишларида юқори натижага эришдилар.

Андижон шаҳридан унча узоқ бўлмаган Марҳамат тумани ҳудудида жойлашган Мингтепа шаҳри қадимий Довон мамлакатининг пойтахти бўлган. Маълум қилинишича, Мингтепани ўрганиш узоқ муддатли лойиҳа бўлиб, археологлар энди қазув ишлари давомида олинган маълумотлар асосида Мингтепага оид воқелар солномасини тузишади.

Кун янгиликлари

Ўзбекистонда телевизорлар сони компьютерлардан уч баробарга кўпдир

Компьютерлар сони 100 та оилага 55 тани ташкил этади.

Давлат статистика қўмитасининг маълум қилишича, Ўзбекистонда 2019 йилда ҳар 100 оилага ўртача 47 та енгил автомобил тўғри келган. 2018 ва 2017 йилларда эса бу кўрсаткич 44тани ташкил қилган.

Бугунги кунда 100 та уй хўжалигига тўғри келадиган телевизорлар сони 160 тадир. Бу компьютерларга нисбатан уч баробарга кўпдир. Компьютерлар сони 100 та оилага 55 тани ташкил этади. 2018 йилда эса бу кўрсаткич 52 тани, 2017 йилда эса 50 тани ташкил этган.

Шунингдек, кузатувлар натижасига кўра, 100 та уй хўжалигидаги аҳолига 282 та телефон аппарати тўғри келган.

Расмий хабарда таъкидланишича, бу маълумотлар уй хўжаликларини танлов асосида ўрганиш воситасида аниқланди.

Президент БМТ сессиясида биринчи марта ўзбек тилида нутқ сўзлаши кутилмоқда

Президент Шавкат Мирзиёев йиғилишлардан бирида нутқ сўзламоқда.

Президент Шавкат Мирзиёев 23 сентябрь куни Бирлашган Миллатлар Ташкилоти Бош Ассамблеясининг 75- сессиясида юқори даражадаги умумсиёсий мунозараларда иштирок этади ва нутқ сўзлайди.

Президент матбуот хизматининг билдиришича, Бош Ассамблеянинг марказий тадбирлари жаҳонда вужудга келган эпидемиологик вазият муносабати билан БМТ тарихида илк бор видеоанжуман шаклида бўлиб ўтади.

Сессиянинг ялпи қисмида сўзга чиқиши режалаштирилган Шавкат Мирзиёев минтақавий ва глобал аҳамиятга эга долзарб масалалар юзасидан ўз нуқтаи назарини билдиради ҳамда Ўзбекистонни сиёсий, ижтимоий ва иқтисодий модернизация қилишнинг устувор йўналишларини белгилаб беради.

“Кун уз” нашрининг ўз манбьаларига таяниб хабар беришича, президент “бу галги чиқишида мустақил Ўзбекистон тарихида илк марта давлат тили – ўзбек тилида нутқ сўзлаши кутилмоқда”.

Мирзиёев 2017 йил сентябрь ойида Нью-Йорк шаҳрида бўлиб ўтган БМТ Бош Ассамблеясининг 72-сессиясида ҳам қатнашиб, рус тилида нутқ сўзлаган эди.

Тошкентда коронавирусдан вафот этганлар сони расман 300 нафардан ошди

Ўзбекистон бўйича коронавирусдан вафот этганлар сони камида 433 кишига етди.

Соғлиқни сақлаш вазирлигининг 21 сентябрь куни билдиришича, сўнгги бир сутка ичида Тошкент шаҳрида 5 нафар, Тошкент вилоятида 1 нафар, жами 6 нафар коронавирусга чалинган бемор вафот этди.

Бу билан Ўзбекистон бўйича коронавирусдан вафот этганлар сони камида 433 кишига етди. Коронавирусдан ўлимлар сони бўйича биринчи учликни Тошкент шаҳри, Тошкент вилояти ва Қашқадарё вилояти эгалламоқда.

Ўлганлар сони Тошкент шаҳрида 301 кишини, Тошкент вилоятида 66 кишини, Қашқадарё вилоятида 13 кишини ташкил қилди.

Айни пайтда мустақил манбалар коронавирусдан ўлимлар сони расмий статистикадан кўпроқ эканини маълум қилмоқда. Жумладан, “Дарё” нашрининг ёзишича, Ўзбекистонда коронавирусдан камида 450 киши ўлган.

20 сентябрь куни мамлакатда 648 ҳолатда касаллик қайд этилди, 661 нафар бемор тузалди. Ҳозирда касаллик қайд этилган жами 51 640 нафар бемордан 47 932 нафари соғайиб, даволаниш кўрсаткичи 93 фоизни ташкил этмоқда.

Айни пайтда тиббиёт муассасаларида даволанаётган 3 275 нафар бемордан 557 нафари оғир, 245 нафари эса ўта оғир аҳволда.

Олий ва ўрта махсус таълим вазирлиги QS халқаро рейтинг агентлиги билан шартнома имзолади

Тест синовлари, 13 сентябрь, 2020, Қўқон

Олий ва ўрта махсус таълим вазирлиги QS халқаро рейтинг агентлиги билан 2020-2021 йилларда ҳамкорлик бўйича шартнома имзолади.

Вазирлик матбуот хизматининг хабар қилишича, Quacquarelli Symonds (QS) компанияси билан эришилган шартномага кўра, томонлар дунёнинг энг яхши университетлари рейтингида Ўзбекистондаги маҳаллий олий таълим муассасалари (ОТМ) ҳам эътироф этилиши йўлида ҳамкорлик қилади.

"Шу нуқтаи назардан, ўз йўналишида дунёнинг етакчиларидан ҳисобланган QS компанияси билан ҳамкорлигимиз узоқ муддатли стратегик характерга эга бўлиб, мамлакатимиз олий таълим тизими, шунингдек, алоҳида ҳар бир олий таълим муассасаси фаолиятини халкаро мезонларга мосллаштиришга ёрдам беради", деди ушбу келишувни шарҳлаган Олий ва ўрта махсус таълим вазири Ином Мажидов.

Шартномага мувофиқ, Ўзбекистоннинг етакчи ОТМлар тўғрисида, уларнинг ҳозирги ҳолати ва библиометрик кўрсаткичлари, онлайн фаоллиги ҳақидаги маълумотлар қиёсий таҳлил қилинади, мамлакатда етакчи ОТМларни халқаро стандартларда тадқиқ қилиш стратегияси ишлаб чиқилади.

COVID-19 га чалиниш сони расман 51 мингдан ошди, янги ҳолатларнинг аксари ҳануз Тошкентда

Тошкент, август, 2020

Соғлиқни сақлаш вазирлиги Ўзбекистон COVID-19 га чалиниш ҳоллари расман 51 мингдан ошганини маълум қилди.

Сўнгги 12 соат ичида аниқланган янги касалланганларнинг 228 нафари Тошкент шаҳрида, 15 нафари Тошкент вилоятида.

20 сентябрь соат 10:00 ҳолатига кўра, коронавирусга чалингач нобуд бўлганлар расмий сони 429 нафарга етган, аммо мустақил манбалар ўлганлар сони бундан анча юқори эканини айтиб келмоқда.

3 минг 535 нафар бемор шифокорлар қаровида даволанмоқда, улардан 495 нафари оғир, 267 нафари эса ўта оғир аҳволда.

Авиақатнов бўйича Россиядан жавоб кутиляпти. Россия-Қозоғистон чегарасига чартер автобус қўйилади

Ўзбекистон ҳукумат комиссияси мунатазам авиақатновни тиклаш бўйича Россия Махсус комиссияси қарори кутилаётганини маълум қилди.

Бош вазир ўринбосари, Республика махсус комиссияси аъзоси Азиз АбдуҳакимовнингKun.uz нашрига айтишича, Ўзбекистон Транспорт вазирлиги Россия Транспорт вазирлиги ҳамда Авиация агентлиги музокара қилган.

"Бироқ Россия Федерациясининг коронавирус пандемиясига қарши кураш бўйича Махсус комиссияси ушбу таклифни рад этди. Россия Федерацияси Махсус комиссияси бу ҳолатни хориждан кириб келувчи йўловчилар ҳажми кўпайиши оқибатида мамлакатда эпидемиологик ҳолат издан чиқиши мумкинлиги билан изоҳлади. Шунга қарамасдан Россия авиация ҳукумати ҳамда Россия Транспорт вазирлиги Ўзбекистон Транспорт вазирлиги томонидан юборилган мурожаатнома асосида Россия Махсус комиссиясига тақдимнома киритди. Ҳозирда Россия Махсус комиссиясининг қарори кутилмоқда", дея иқтибос келтирди ҳукумат вакилидан Kun.uz нашри.

Айни пайтда, куз-қиш мавсумида ватанига қайтишни истовчи юз минглаб ўзбекистонликлар чартер рейсларни кутишга мажбур бўлмоқда.

Транспорт вазирлигига кўра, Россияга учаётган чартер авиақатновлари сони оширилган:

- Тошкент-Москва йўналиши кунига 2 марта;

- Тошкент-Санкт-Петербург йўналиши кунига 1 марта;

- Тошкент-Ростов йўналиши ҳафтасига 3 марта;

- Тошкент-Самара йўналиши ҳафтасига 2 марта;

- Тошкент-Новосибирск йўналиши ҳафтасига 1 мартадан;

- Тошкент-Владивосток йўналиши ҳафтасига 1 мартадан;

- Тошкент-Қозон йўналиши ҳафтасига 1 мартадан;

- Тошкент-Екатеринбург йўналишида 2 ҳафтада 1 мартадан.

Айни пайтда, бош вазир ўринбосари Россия ва Қозоғистон чегарасида йиғилаётган ўзбекистонликларни қайтариш учун поезд қатновлари амалга оширилаётганини таъкидлади.

А. Абдуҳакимовга кўра, бу чегара ҳудудига йиғилганларни қайтариш учун чартер автобус қатновини йўлга қўйишга келишилган.

Чегаранинг Самара вилояти, Кинель туманидан ўтувчи қисмида йиғилиб қолган 4 мингдан ортиқ ўзбекистонлик муҳожирнинг 900 нафарга яқини 19 сентябрь куни махсус поездда Ўзбекистонга олиб кетилган.

Расман билдирилишича, Ўзбекистон расмийлари 12 ва 14 сентябрь кунлари поездларда 1,5 минг чоғли муҳожирни олиб чиқиб кетган.

Биргина сентябрь ойида бу ердан 4 минг муҳожир Ўзбекистонга олиб кетилган. Самара вилоятидан эса жами 8,5 минг муҳожир Тошкент томонидан олиб чиқиб кетилган.

Тошкент вилояти бош имомининг коронавирусдан ўлгани маълум қилинди

Тошкент вилояти бош имом-хатиби Хайруллоҳ домла Турматов ўлимига коронавирус сабаб бўлган.

Бу ҳақда Ўзбекистондаги бир қанча нашрлар имомнинг қариндошларига таяниб хабар берди.

Ўзбекистон Соғлиқни сақлаш вазирлиги ҳам марҳумнинг номини коронавирус қурбонлари рўйхатига қўшган.

Турматов 16 сентябр куни вафот этгани ҳақда Ўзбекистон мусулмонлари идораси хабар берган, лекин имомнинг вафоти ҳақидаги хабарда унинг ўлимига нима сабаб бўлганини очиқланмаган эди.

47 ёшли Хайруллоҳ домла Турматов Имом Бухорий номидаги Тошкент ислом институтида таълим олган, Тошкент вилоятидаги «Четсув», «Қорабоғ», «Зангиота» жоме масжидлари имом-хатиби, Ангрен шаҳри бош имом-хатиби вазифаларида ишлаган.

Мирзиёев коронавирус юқтириб, уйида ўтирган вазирларни танқид қилди

Ўзбекистон президенти Шавкат Мирзиёев коронавирусга чалинган вазирлар, мансабдор шахслар, мактаб директорларини шифокор қабулига бормасдан, 4-5 кун давомида уйида ўтирганини танқид қилди.

18 сентябр куни ўтган видеоселектор йиғилишида Мирзиёев мамлакатдаги коронавирус билан боғлиқ вазиятга тўхталар экан:

«Катта-катта вазирлар ҳам, катта-катта мутасаддилар ҳам, мактаб директорлари ҳам, зиёлилар ҳам 4-5 кун уйида ўтиряпти. Бу ўзининг соғлиғига хиёнат-ку, ўзининг оиласига хиёнат-ку. Биз ҳаммага айтяпмиз, шамолладингми, дарров шифокорга мурожаат қил, тиббиёт масканига кел», — деди.

Ўтган ой Бухоро вилояти ҳокими Карим Камолов, июл ойида эса Қорақалпоғистон Республикаси Жўқорғи Кенгеси раиси, Олий Мажлис Сенати раисининг ўринбосари Муса Ерниязов коронавирусдан оламдан ўтган эди.

Ўзбекистон Соғлиқни сақлаш вазирлигига кўра, 18 сентябрь соат 23:30 га қадар мамлакатда коронавирус юқтириб олиш билан боғлиқ 617 та ҳолат қайд этилган.

Бу сўнгги 8 кун ичидаги энг юқори кўрсаткич. Янги ҳолатлардан сўнг Ўзбекистонда расмий статистикадаги коронавирусга чалинганлар сони 50378 нафарга етган.

Қашқадарёда 47 ёшли мактаб директори ҳожатхонада осилган холда топилди

Қашқадарё вилоятининг Китоб туманидаги мактаблардан бирининг директори мактаб ҳудудидаги ҳожатхонада осилган холда топилди.

У ўзини осиб, жонига қасд қилгани айтилмоқда. Ушбу холатни текшираётган Қашқадарё вилоят прокуратурасига кўра, мактаб директори ўлимидан олдин 3та хат ёзиб қолдирган.

Хатлардан бирида директор мактаб ўқитувчиларидан «ҳар қандай шароитда ҳам коррупцияга йўл қўймаслик»ни сўраган.

Прокуратура маълумотига кўра, Китоб туманининг «Боғбон» МФЙ, Янгиқишлоқ қишлоғида яшовчи фуқаро Л.Э. ва бошқалар 2020 йил 8 сентябрь куни Китоб туман прокуратурасига мурожаат қилиб, жияни Т.Н. ўз жонига қасд қилганлигини айтган ва айбдорларга нисбатан қонуний чора кўришни сўраган.

Мурожаат прокуратурада қайд этилиб, ҳодиса жойи кўздан кечирилган. Аниқланишича, директор ўзи раҳбарлик қилиб келган мактабнинг маъмурий биноси ҳожатхонаси болорига арқондан сиртмоқ ясаб, ўзини-ўзи осиб, вафот этган.

Туман ИИБ ходимлари Т.Н.нинг ўлими ҳолатини аниқлаш мақсадида марҳумнинг уйига борганида, марҳумнинг қариндошлари мурдани суд-тиббиёт экспертизаси кўригидан ўтказмаслик учун уни юрак хуружидан вафот этган, деган ва жасадни шу куннинг ўзида дафн қилган.

Терговга қадар текширув ҳаракатлари давомида туман ХТБ, туман ИИБ ҳамда Маҳалла ва оилани қўллаб-қувватлаш марказининг Китоб тумани бўлими ходимлари ҳаракатига нисбатан хизмат текширувлари тайинланган.

Миллионлаб тонна пахта етиштирадиган Ўзбекистон йил бошидан буён Хитойдан 6,5 млн долларлик тайёр кийим импорт қилди

Тошкентдаги бозорлардан бири.

Жорий йилнинг январь-август ойларида Ўзбекистон 64 та давлатдан қиймати 16,1 млн AҚШ долларига тенг бўлган тайёр кийим-кечак маҳсулотларини импорт қилган. Бу кўрсаткич ўтган йилнинг шу даврига нисбатан 10,2 млн AҚШ долларига кам, дея маълум қилди Давлат статистика қўмитасининг ахборот хизмати раҳбари Усмон Абдурасулов ўз Телеграм-каналида.

Қайд этилишича, ўтган саккиз ой мобайнида импорт қилинган тайёр кийим-кечак маҳсулотларининг энг катта улуши Хитой (6,5 млн доллар) ҳиссасига тўғри келган.

Тайёр кийим-кечак экспортёрлари орасида Туркия (4,9 млн доллар) иккинчи ўринни эгаллаган. Бундан ташқари, Ўзбекистон Россия (839,1 минг доллар), Ҳиндистон (714 минг доллар) ва Германиядан (647,9 минг доллар) ҳам кийим-кечак сотиб олган.

Давстатқўм хабарномасида 2019 йили Ўзбекистонда қиймати 7,2 трлн сўмга тенг бўлган тайёр кийим-кечак ишлаб чиқарилгани айтилади.

Расмий маълумотларга кўра, Ўзбекистон жорий йилдан пахта хом ашёсини хориж давлатларига экспорт қилишни тўхтатади. Республикада йилига ўртача 1,2 миллион тонна пахта толаси ишлаб чиқарилади.

ХТВ: Мактаб ўқитувчилари бепул дори-дармон билан таъминланади

Иллюстратив сурат.

Умумтаълим муассасаларида коронавирус пандемиясининг салбий оқибатлари, коронавирус инфекцияси билан касалланишини олдини олиш ва даволаш мақсадида барча ўқитувчи ва ходимлар гидроксихлорохин хамда цинк препарати билан бепул таъминланади. Бу ҳақда Халқ таълими вазирлиги матбуот котиби Лайло Рустамова Телеграмдаги канали орқали маълумот тарқатди.

Қайд этилишича, мазкур топшириқни бажариш мақсадида Халқ таълими вазирлиги ҳамда Соғлиқни сақлаш вазирлигининг қўшма қарори имзоланган.

“Бугунги кунда ушбу препаратлар Соғлиқни сақлаш вазирлиги томонидан умумтаълим муассасаларининг барча ўқитувчи ва ходимларига етказиб берилиши бошланган”, дейилади хабарномада.

Адлия вазирлиги вакили: Давлат хизматчисини тасвирга тушириш учун розилик талаб қилинмайди

Давлат хизматчиси хизмат вазифасини бажариш жараёнида тасвирга туширилганда ва бу тасвирлардан фойдаланилганда ундан розилик олиш талаб қилинмайди. Бу ҳақда Адлия вазирлиги ҳузуридаги Ҳуқуқий сиёсат тадқиқот институти директори Аъзам Мадаминовнинг вазирлик сайтида чоп этилган изоҳида айтилган.

Бу ерда гап янги таҳрирдаги Фуқаролик кодекси лойиҳасида акс этган қўшимчалар ҳақида бормоқда ва ундаги янгиликлардан бири фуқаронинг ўз тасвирига бўлган ҳуқуқи ҳимоясини таъминлашга қаратилган модда киритилаётганидир.

Вазирлик вакили бу янгиликни айрим ОАВ ва ижтимоий тармоқларда давлат хизматчилари тасвирини ҳимоя қилишга қаратилган қилиб кўрсатиш ҳолатлари учраб турганини айтиб, бунинг нотўғри талқин эканини урғулайди ва бундай тушунмовчиликларни бартараф этиш мақсадида мазкур моддага изоҳ беради.

Аъзам Мадаминовнинг ёзишича, Фуқаролик кодекси лойиҳасига киритилаётган “Фуқаронинг тасвирига бўлган ҳуқуқини ҳимоя қилиш” деб номланган моддага кўра, фуқарони тасвирга тушириш (унинг фото ва видео тасвирини ҳамда унинг тасвири акс этган тасвирий санъат асарини яратиш), шунингдек унинг тасвиридан фойдаланиш учун ушбу фуқаронинг розилиги, агар фуқаро вояга етмаган ёки муомалага лаёқатсиз деб топилган бўлса, унинг қонуний вакиллари розилиги, вафот этган бўлса, фарзандлари, эри (хотини) ёки ота-онасининг розилиги талаб этилади, яъни умумий қоида тариқасида ҳар қандай фуқаронинг фото ёки видео тасвиридан фойдаланиш учун унинг розилиги талаб қилинади.

“Шу билан бирга, - деб ёзади вазирлик вакили, - бу умумий қоидадан истисно, яъни фуқарони тасвирга тушириш ва ундан фойдаланишга розилик олишни талаб қилмайдиган ҳолатлар мавжуд”.

Мазкур ҳолатлар қаторида муаллиф қуйидагиларни санайди:

1) тасвирдан давлат ёки жамият манфаатлари учун фойдаланилганда розилик талаб этилмайди. Бундай фойдаланишга ҳуқуқбузарликка қарши курашиш, давлат хавфсизлигини таъминлаш, тасвирдаги шахснинг жиноят содир этганлиги ёки бедарак йўқолганлиги сабабли қидирув эълон қилиш, давлат ва жамоат арбоблари ҳамда илм-фан, маданият ва бошқа соҳалар таниқли вакилларининг тасвиридан жамият учун катта қизиқиш уйғотадиган ахборотни тарқатиш мақсадларида фойдаланиш, шунингдек давлат хизматчиларини хизмат вазифаларини бажариш жараёнида тасвирга тушириш ва бундай тасвирлардан фойдаланиш ҳоллари киради.

2) фуқаро оммавий тадбирларда (концерт, байрам сайиллари ва бошқ.) ва жамоат жойларида (умумий овқатланиш, савдо ва хизмат кўрсатиш объектлари, таълим муассасалари, ҳайвонот боғи, истироҳат боғлари, кўчалар ва бошқа жамоат жойларида) тасвирланган бўлиб, бундай тасвирдан фойдаланишдан мақсад фақат ушбу жойлардаги умумий жараёнларни намойиш этиш бўлган ҳолларда розилик талаб этилмайди.

3) Фуқарони тасвирга тушириш ва (ёки) унинг тасвиридан фойдаланишдан мақсад ушбу фуқаронинг ҳуқуқларини ҳимоя қилиш бўлганда, фуқаронинг ҳақ эвазига туширилган тасвиридан ушбу тасвирни туширишдан кўзланган мақсадларда фойдаланилганда, фуқаронинг ўзи ҳамма фойдаланиши мумкин бўлган манбаларда эълон қилган тасвирдан фойдаланилганда ҳам розилик талаб этилмайди.

Фуқарони тасвирга тушириш ва тасвиридан фойдаланишда унинг розилигини олиш талабига риоя қилинмаганда қандай жавобгарлик келиб чиқиши масаласини ҳам тўғри талқин қилиш муҳимлигини урғулаган А. Мадаминов бу ҳолатда ҳуқуқ бузилиши фуқаролик-ҳуқуқий муносабатдан келиб чиққани учун жавобгарлик ҳам фуқаролик-ҳуқуқий характерга эга бўлишини қўшимча қилган.

“Ўз тасвиридан розилигисиз фойдаланишга дуч келган фуқаро иккинчи тарафдан ўзининг тасвирини (фотоаппарат, камера, мобил телефон ва бошқа ускуналар хотирасидан) ўчириб ташлашни, тасвири акс этган нарсаларни йўқ қилиш ва муомаладан чиқаришни, шунингдек оммавий ахборот воситаларидан, интернет тармоғидан, ташқи реклама ва реклама хусусиятига эга бўлган тарқатма материаллардан олиб ташлашни талаб қилиш ҳуқуқига эга бўлади.

Агар бу талаблар бажарилмаса, фуқаро (вафот этган бўлса – унинг фарзандлари, эри (хотини) ёки ота-онаси, вояга етмаган ёки муомалага лаёқатсиз деб топилган бўлса – қонуний вакиллари) талабларни мажбурий бажартириш, шунингдек ўзига етказилган моддий зарар ва маънавий зиённи ундириш учун судга мурожаат қилиши мумкин бўлади. Бунда фуқаро ўзи талаб қилаётган ҳолатларни, ўзига моддий зарар ва маънавий зиён етказилганини исботлаши лозим бўлади”, деб ёзади Адлия вазирлиги вакили.

Изоҳ якунида муаллиф “Фуқаролик кодекси лойиҳасига тасвирга бўлган ҳуқуқни ҳимоясини таъминлашга қаратилган алоҳида модда киритишдан мақсад юқорида кўрсатилган ҳуқуқий бўшлиқни тўлдириш ҳамда барча фуқароларнинг тасвирга бўлган ҳуқуқлари ҳимоясини таъминлаш” эканини таъкидлаган.

Автомобилда мусиқани баланд овозда қўйганлар жаримага тортилиши мумкин

Ўзбекистон Ички ишлар вазирлиги “аҳоли пунктида транспорт воситаларининг магнитофон ва овоз чиқарувчи бошқа аппаратуралари овозини баланд қилиб фойдаланганлик” учун қўшимча жавобгарликка тортишни таклиф қилмоқда.

Вазирлик томонидан ишлаб чиқилган “Ўзбекистон Республикаси Маъмурий жавобгарлик тўғрисидаги кодексининг 127-моддасига ўзгартиш ва қўшимча киритиш тўғрисида”ги қонун лойиҳаси 18 сентябрь куни regulation.gov.uz порталида ёйинланган.

Лойиҳада 127-моддада кўзда тутилган жарима миқдорини базавий ҳисоблаш миқдорининг бир бараваридан (223 минг сўм) уч бараварига (669 минг сўм) ошириш таклиф қилинган.

Мазкур қонун лойиҳаси қабул қилиш зарурати ўлароқ ИИВ Ўзбекистон ҳудудида автотранспорт воситалари сонининг кескин ортиши билан бир қаторда айрим ҳайдовчилар томонидан аҳоли пунктларида транспорт воситаларининг магнитофон ва овоз чиқарувчи бошқа аппаратураларидан овозини баланд қилиб фойдаланиши ҳоллари ҳам учраётгани, бундай ҳаракатлар фуқароларнинг тинчлиги ва осойишталиги бузилишига сабаб бўлаётганини келтирган.

Лойиҳа муҳокамаси шу йил 3 октябригача давом этади.

Урганчда Малайзия университетининг филиали очилмоқда

Урганч.

Ўзбекистон ҳукуматининг жорий йил 17 сентябридаги қарори билан Хоразм вилоятининг маъмурий маркази бўлмиш Урганч шаҳрида халқаро “Binary” университети ташкил этилди. Мазкур олий таълим муассасаси Малайзиянинг “Binary” университети филиали ҳисобланади.

ЎзА хабарига кўра, филиал нодавлат олий таълим ташкилоти ҳисобланади ва у ерда ўқиш инглиз, рус ва ўзбек тилларида тўлов-шартнома асосида амалга оширилади.

Филиал битирувчиларига Ўзбекистон ва Малайзияда олий таълим тўғрисидаги ҳужжат сифатида тан олинадиган диплом берилиши айтилмоқда.

Самарадан яна 900 муҳожир 19 сентябрда Ўзбекистонга олиб кетилади

Самарадаги муҳожирлар (журналист Людмила Мельниченко фотоси).

Самара вилоятининг Кинель туманида йиғилиб қолган 4 мингдан ортиқ ўзбекистонлик муҳожирнинг 900 нафарга яқини 19 сентябрь куни махсус поездда Ўзбекистонга олиб кетилади. Бу ҳақда Самара вилоят ҳукуматига таянган ҳолда ТАСС хабар берди.

Расман билдирилишича, Ўзбекистон расмийлари 12 ва 14 сентябрь кунлари поездларда 1,5 минг чоғли муҳожирни олиб чиқиб кетган. Биргина сентябрь ойида бу ердан 4 минг муҳожир Ўзбекистонга олиб кетилган. Самара вилоятидан эса жами 8,5 минг муҳожир Тошкент томонидан олиб чиқиб кетилган.

"Кинель туманидаги вақтинчалик яшаш пунктида Ўзбекистон Республикасинининг 4282 фуқароси тўпланиб қолди. Чодир шаҳарчада маъмурий ва тиббий хизмат кўрсатиш палаткалари ҳам бор, бу ерга сув етказиб бериш, озиқ-овқат ва бошқа керакли маҳсулотларини сотиш ташкил этилди”,-дейилади хабарда.

Самара қилоят ҳукумати муҳожирлар яшаётган мазкур лагерда тартибсизликлар ва қонунбузарликлар кузатилмаётганини таъкидлади.

Тошкентда Minerva World of Knowledge халқаро университети қурилиши бошланди

Лойиҳанинг умумий қиймати 500 миллион доллар. Тошкент шаҳар ҳокимли матбуот хизмати фотоси.

Тошкентнинг Сергели туманида 17 сентябрь куни Minerva World of Knowledge халқаро университети қурилиши учун тамал тоши қўйилди. Университетда 10 000 дан зиёд талаба ўқиши мўлжалланмоқда. Бу ҳақда Тошкент шаҳар ҳокимлиги хабар берди.

Тамал тоши қўйиш маросимида Тошкент шаҳар ҳокими Жаҳонгир Ортиқхўжаев, "Minerva World of Knowledge" лойиҳа раҳбари Мурали Лал Жалан, Олий ва ўрта махсус таълим вазирининг биринчи ўринбосари Ўктам Саломов ва бошқа мутасаддилар иштирок этди.

Расман билдирилишича, асосий бино 2021 йилнинг сентябрида қуриб битказилади ва кейин 5 йил давомида бошқа кампуслари, спорт мажмуаси, кутубхонаси ва талабалар турар жойлари бунёд этилади.

29 август куни Ҳиндистоннинг Minerva World of Knowledge ширкати Тошкент шаҳри ҳокимлиги билан университет қуриш бўйича инвестиция келишувини имзолаган эди.

Умумий қиймати 500 миллион долларлик мазкур лойиҳа доирасида университетдан ташқари касалхона, меҳмонхона ва кўп қаватли уйлар қуриш ҳам режалаштирилган.

Камбағалликни қисқартириш илмий маркази ташкил этилади

Вазирлар Маҳкамасининг билдиришича, 583 мингта камбағал оила аниқланган.

Иқтисодий тараққиёт ва камбағалликни қисқартириш вазирлиги ҳузуридаги Прогнозлаштириш ва макроиқтисодий тадқиқотлар институти негизида Ўзбекистонда “Камбағалликни қисқартириш ва аҳоли фаровонлигини ўрганиш” илмий маркази ташкил этилади.

Мазкур марказни ташкил этилиши тўғрисида Вазирлар маҳкамасининг “Ўзбекистон Республикасида иқтисодий ўсишни тиклаш ва тизимли таркибий ўзгаришларни давом эттириш бўйича 2020-2021 йиллардаги амалий ҳаракатлар режаси”да қайд этилди.

Таъкидланишича, илмий марказ 2020 йилнинг октябригача ташкил этилиши лозим. Марказ фаолияти давлат бюджетидан молиялаштирилади.

Марказ камбағалликни қисқартириш масаласида илмий-услубий ва илмий-тадқиқот ишлари базасини такомиллаштириш, туманлар, шаҳарлар миқёсида таклиф ва тавсиялар ишлаб чиқиш билан шуғулланади.

Ҳаракатлар режасида билдирилишича, уйма-уй ўтказилган ўрганишлар натижасида 583 мингта моддий ёрдамга муҳтож камбағал оила аниқланган.

“Уларни қашшоқликдан чиқариш ва бандлигини таъминлаш бўйича мақсадли чора-тадбирларни ишлаб чиқиш ва амалга ошириш бошланди”,-дейилади ҳаракатлар режасида.

Хорижлик сайёҳлар Ўзбекистонга 1 октябрдан гуруҳ бўлиб келиши мумкин

Самарқанддаги туристлар.

Республика аэропортларида, темир йўл станцияларида ва чегара пунктларида шахслар ва транспорт воситаларини ҳаракатланишига рухсат берилаётганлиги муносабати билан халқаро туризмни ташкил этишга нисбатан қўлланилган чекловлар бекор қилинди.

Расмий маълумотда билдирилишича, туристик фирмалар сайёҳлар гуруҳини 5 кишидан кам ва 15 кишидан ортиқ бўлмаган ҳолда шакллантириши лозим. Сайёҳлар Covid-19ни ҳам қамраб оладиган тўлиқ суғуртаси бўлиши шарти билан Ўзбекистонга киритилади.

Туристик фирмалар туристларни ПЗР тест текширувидан ўтказилишини таъминлаши лозим. Бунда ПЗР тест текшируви натижаси манфий бўлган туристларга нисбатан 14 кунлик карантинда сақлаш бўйича чеклов қўлланилмайди, улар Ўзбекистонга киришда коронавирусга текширилмайди.

Турист Ўзбекистонга кириб келган вақтда унда коронавирус аломатлари бўлса, у ўтказиш пунктида ўз ҳисобидан коронавирусга ПЗР ёки экспресс-тест ёхуд антиген текширувидан ўтиши лозим.

Тест мусбат чиқса, сайёҳ ўз ҳисобидан карантинга олиниб, даволанишдан ўтади ёки ўз мамлакатига қайтади.

Хорижий туристлар Ўзбекистонда мавжуд карантин чекловлари ва санитария талабларига қатъий риоя этган ҳолда ҳаракатланишлари лозим.

Бу борадаги талаблар бажарилиши туристик фирмалар зиммасига юклатилди.

Ўзбекистонда коронавирусдан 11 ёшли бола вафот этди. У коронавируснинг энг ёш қурбони бўлди

17 сентябрь куни мамлакатда 599 кишида коронавирус аниқланди, 618 нафар бемор тузалди.

Соғлиқни сақлаш вазирлигининг билдиришича, 17 сентябрь куни Тошкент вилояти Бўстонлиқ туманида яшаган 11 ёшли М.У., исмли ўғил бола коронавирусдан вафот этди. У Ўзбекистонда коронавируснинг энг ёш қурбони бўлди. Бунга қадар Ўзбекистонда балоғатга етмаган болаларнинг коронавирусдан ўлгани қайд этилмаган эди.

Соғлиқни сақлаш вазирлиги 11 ёшли боланинг вафоти ҳақида батафсил маълумот бермаган.

Вазирликнинг 18 сентябрда билдиришича, сўнгги бир сутка ичида Тошкент шаҳрида 3 нафар, Тошкент вилоятида 3 нафар, жами 6 нафар коронавирусга чалинган бемор вафот этди.

Бу билан Ўзбекистонда коронавирусдан вафот этганлар сони 415 кишига етди. Вафот этганларнинг 291 нафари Тошкент шаҳридан, 59 нафари Тошкент вилоятидан.

17 сентябрь куни мамлакатда 599 кишида коронавирус аниқланди, 618 нафар бемор тузалди. Ҳозирда касаллик қайд этилган жами 49 761 нафар бемордан 46 092 нафари соғайиб, даволаниш кўрсаткичи 93 фоизни ташкил этмоқда.

Айни пайтда тиббиёт муассасаларида даволанаётган 3 254 нафар бемордан 478 нафари оғир, 269 нафари эса ўта оғир аҳволда.

Ўзбекистон 1 октябрдан чегараларини тўлиқ очмоқда

Ўзбекистондаги чегара пунктларидан бири.

Республика махсус комиссияси қарорига мувофиқ, жорий йил 1 октябридан Ўзбекистонга авиация, темир йўл ва автойўл ўтказиш пунктлари орқали кириб-чиқишга рухсат берилди. Шу тариқа, аввал жорий қилинган чекловлар бекор қилинади.

Қарор билан масъул идораларга чет давлатлар мутасадди идоралари билан музокаралар ўтказиб, барча турдаги халқаро қатновлар (авиа, темир йўл, автобус қатновлари) сонини кўпайтириш бўйича топшириқ берилган.

Қайд этилишича, янаги ойдан бошлаб, Қозоғистон, Туркманистон, Тожикистон ва Афғонистон билан чегарада жойлашган автойўл ўтказиш пунктлари орқали Ўзбекистонга кираётган шахслар коронавирусга ПЗР ёки экспресс-тест ёхуд антиген текширувидан ўтган ҳолда 14 кунга меҳмонхона ёки уй карантинига юборилади.

Сўнгги 14 кун давомида “яшил” давлатда (Хитой, Таиланд, Малайзия, Жанубий Корея, Грузия, Венгрия, Финландия, Латвия, Австрия ва Япония) бўлиб турган шахслар Ўзбекистон ҳудудига тўғридан тўғри киритилади.

“Сариқ” (Озарбайжон, Беларус, БАА ва Европа Иттифоқи давлатлари - Буюк Британия ва Испания бундан мустасно) ҳамда “қизил” давлатлардан (қолган барча давлатлар) кириб келаётган шахслар эса сўнгги 72 соат давомидаги коронавирусга ПЗР тести натижалари манфий чиққани тўғрисида маълумотнома тақдим этган ҳолда Ўзбекистон ҳудудига киритилади.

Сенат аъзоси карантин қоидаларини бузган артистларнинг жарима билан қутулиб кетаётганидан норози

Сенатор Бахтиёр Сайфуллаев (senat.uz сайтидан олинган фотосурат).

Ўзбекистон Олий Мажлиси Сенатининг Ёшлар, маданият ва спорт масалалари қўмитаси раиси Бахтиёр Сайфуллаев тўйларига 30 нафардан кўп меҳмон чақирган санъаткорларнинг жарима билан қутулиб кетаётганидан норозилик билдирди. Бу норозилик унинг Сенат сайтида ёйинланган мақоласида акс этган.

Албатта, ёшларимизни янги оила остонасига қадам қўйганликлари билан табриклайман. Аммо коронавирус балоси ҳали ўз таъсир кучини кўрсатиб, кундан-кунга касалланиш ортиб бораётган бир вақтда махсус комиссия талабларига зид равишда 30 кишидан ортиқ меҳмонларни йиғиб, карантин тартиб қоидаларга риоя этмаслик ва охир-оқибат яқинларимизнинг соғлиғини, ҳаётини хавф остига қўйиш тўғрими?”, дея савол ташлаган сенатор.

Мақолада муаллиф “Браво” жамоаси вакили Аҳмад Темиров ҳамда хонанда Воҳиджон Исоқовларнинг никоҳ тўйлари тасвирланган видео ва фотолавҳалар тарқалаётганига эътибор қаратган.

Аҳмад Темиров, Воҳиджон Исоқов ўрнатилган тартибда жаримага тортилганидан хабаримиз бор, бироқ бундай хатти-ҳаракатлар “тартиб қоидаларга зид равишда мана шундай тўй ўтказиб, белгиланган жаримани тўлаб кетиш билан осонгина қутулиш мумкин” деган нотўғри хулосалар шаклланшига сабаб бўлиши ёмон. Қолаверса, бундай тадбирлар касаллик тарқалишига олиб келмайди, деб ҳеч ким кафолат беролмайди”, дейилади мақолада.

Сенатор фикрича, “халқ кўз ўнгида юрган, санъат оламига дахлдор одам бошқалардан кўра маданиятлироқ бўлиши, ёшларга ўрнак кўрсатиши керак”.

Бу каби кўра-била туриб тартиб-қоидани менсимай бузганлар фақатгина маълум бир миқдорда жарима тўлаш билан қутулиши етарли эмасдек, назаримда. Жамият қоидаларига, инсонлар ҳаётига бунчалар беписандалик билан қараш кўринмас душман билан олишиб жонларини фидо қилган юзлаб шифокору-ҳарбийларимиз, юртдошларимиз хотираси ва меҳнатларига нисбатан ҳам ҳурматсизлик деб баҳолашга лойиқ”, деб ёзган Б. Сайфуллаев.

У мазкур ҳолатлар бўйича Маданият вазирлигига сенатор сўрови юборилгани ва бу масала Сенатнинг Ёшлар, маданият ва спорт масалалари қўмитаси томонидан назоратга олинганини қўшимча қилган.

Аввал маданият вазири лавозимида ишлаган Бахтиёр Сайфуллаев президент Ш. Мирзиёев томонидан тайинланган сенаторлардан биридир. У аввал ҳам тўйларни дабдаба билан ўтказилишига қарши танқидий чиқишлар қилган.

Коронавирусга қарши кураш штаби аъзоси: Ўзбекистон иккинчи тўлқинга тайёр

Ўзбекистон коронавирус инфекциясининг иккинчи тўлқинига тайёр. Бу ҳақда Коронавирусга қарши кураш штаби аъзоси Барно Абдусаматова 17 сентябрь куни АОКАда бўлиб ўтган брифингда маълум қилди.

Мулозимага кўра, айни вақтда Ўзбекистонда 3 500 нафар беморга врачлар томонидан белгиланган стандартлар бўйича даво чоралари кўрилмоқда.

“Ҳозирда COVID-19 инфекцияси билан касалланган беморларни даволаш учун 114 та муассасада 19346 та ўрин ташкил этилган. Яна 10 мингга яқин захира шифо ўринларини тайёрлаш ишлари олиб борилмоқда”, деган Барно Абдусаматова.

Коронавирусга қарши кураш штаби вакиласи шу кунда мамлакатда касалхоналар салоҳиятли кадрлар ва зарур моддий техника база билан таъминлангани, барча шифохоналар ва мутахассисларнинг ушбу йўналишда тажрибалари борлиги, улар касалликнинг авж олишига йўл қўймаслигини қўшимча қилган.

БП: Дарс пайтида тўсатдан вафот этган жиззахлик ўқувчи ўлими юзасидан суриштирув бошланди

Жиззах вилоятининг Шароф Рашидов туманида жойлашган 11-умумтаълим мактабида ўқув йилининг илк кунида (14 сентябрь) 9-синф ўқувчиси бўлган қиз дарс вақтида тўсатдан вафот этганлиги юзасидан туман прокуратураси томонидан терговга қадар текширув ҳаракатлари олиб борилмоқда. Бу ҳақда Ўзбекистон Бош прокуратураси Телеграмдаги ўз расмий канали орқали маълумот тарқатди.

Қайд этилишича, ўқувчи қизнинг ўлим сабабини аниқлаш мақсадида суд-тиббий экспертизаси тайинланган.

Дастлабки маълумотга кўра, марҳуманинг ўлимига ўткир нафас юрак-қон томир етишмовчилиги тез ва қисқа вақт ичида юзага келганлиги сабаб бўлган”, дейилади БП хабарномасида.

Айтилишича, 3-соатда ҳушидан кетиб қолган ўқувчи қизга шу куни 1-синф ўқувчиларини эмлаш учун мактабга келган “Хаваслик” қишлоқ врачлик пункти врачлари биринчи ёрдамни кўрсатишиб, ўпка-юрак реанимациясини амалга оширишган. Шунингдек, қизга ташқи юрак массажи қилинган ва сунъий нафас берилган. Бироқ бу ҳаракатларнинг ҳеч бири самара бермаган.

Давстатқўм: Ўтган саккиз ойда 193 мингдан зиёд енгил автомобиль ишлаб чиқарилди

Ўзбекистонда 2020 йилнинг январь-август ойларида 193 минг 180 дона енгил автомобиль ишлаб чиқарилган. Бу кўрсаткич 2019 йилнинг шу давридагига (172 748 дона) нисбатан 20 минг 432 донага кўпдир. Бу маълумотлар Давлат статистика қўмитасининг “саноат ишлаб чиқариши” бўйича галдаги ҳисоботида акс этган.

Қайд этилишича, жорий йилнинг ўтган саккиз ойи ичида Ўзбекистонда 46 минг 904 дона Nexia T-250, 52 минг 202 дона Cobalt, 35 минг 150 дона Lacetti-Gentra, 35 минг 322 дона Damas, 18 минг 275 дона Spark ҳамда 5 минг 327 дона Labo ишлаб чиқарилган.

Айни пайтда бу йил юк автомобиллари ва трактор ишлаб чиқариш камайгани айтилмоқда. Маълумотларга кўра, 2020 йилнинг январь-август ойларида Ўзбекистонда 2 минг 169 дона юк машинаси (2019 йилнинг шу даврида 3 450 дона) ва 630 дона трактор (2019 йилнинг шу даврида 983 дона) йиғилган.

Самарқандда Тошкент давлат аграр университети филиали очилди

Самарқанд.

Ўзбекистон ҳукуматининг шу йил 16 сентябридаги қарори билан Тошкент давлат аграр университетининг Самарқанд филиали ташкил этилди. Бу ҳақда Адлия вазирлигига қарашли “Ҳуқуқий ахборот” Телеграм-канали маълумот тарқатди.

Филиалнинг асосий вазифаларидан бири қишлоқ хўжалигида инновацион ресурс тежайдиган илғор технологияларни қўллаш, “Ақлли қишлоқ хўжалиги” (Smart agroculture) ва рақамлаштирилган агротехнологияларни жорий этиш бўйича замонавий билим ва кўникмаларга эга бўлган кадрларни тайёрлаш экани айтилмоқда.

Ҳужжатга мувофиқ, Самарқанддаги филиал ўз фаолиятини 2020/2021 ўқув йилидан бошлайди. Унда бакалавр ва магистрлар тайёрлашнинг таълим йўналишлари ва мутахассисликлари бўйича қабул квотаси тасдиқланган.

Қабул квотаси бакалавриат таълим йўналишларига жами 475 та (шундан 95 таси давлат гранти, 380 та тўлов-контракт) ҳамда магистратура мутахассисликлари бўйича жами 40 та (давлат гранти) этиб белгиланган.

Давомини ўқинг

XS
SM
MD
LG