Линклар

Шошилинч хабар
07 апрел 2020, Тошкент вақти: 18:12

Ўзбекистон хабарлари

Тошкент ҳокими инвестиция жалб қилиш учун журналистларни PRчиликка чақирди

Мамлакатнинг иқтисодиёти ривожланишига, шаҳарнинг гуллаб-яшнашига ҳисса қўшишни истаган журналистлар лойиҳаларни қай тариқа пиар қилиши жуда муҳим.

Бу баёнотни Тошкент шаҳар ҳокими Жаҳонгир Ортиқхўжаев 11 февраль куни «Business city» лойиҳалари тақдимотига бағишланган маросимда қилгани тўғрисида маҳаллий нашрлар хабар қилди.

Тошкент ҳокимининг фикрича, Ўзбекистонда қурилаётган янги бизнес шаҳарлар ва иншоотларга хорижий инвесторларни жалб этиш энг аввало тўғри ва ўринли «пиар»га боғлиқдир.

Маросимда маълум қилинишича, «Mirzo Ulugbek Business City» лойиҳаси Амир Темур майдонидан Мустақиллик ва Мирзо Улуғбек кўчалари бўйлаб 6,5 км масофада амалга оширилади. «Yunusobad Business City» лойиҳаси эса Янги Шаҳар ва Чинобод кўчалари кесишмасида жойлашган.

Айни пайтда Тошкентда cityлар қуриш шаҳар аҳолига қимматга тушаётганига уйи бузилаётганлардан келаётган кўплаб шикоятлар далилдир. Бу муаммога ҳатто чет эллик журналистлар ҳам эътибор қаратишга улгурган.

Хусусан, Британияда инглиз тилида чиқадиган The Guardian нашри ҳам инглиз¸ ҳам ўзбек тилида чоп этган мақола "Мен қутида яшашни истамайман: Одамлар Тошкент обод бўлиши учун ўз уйидан кўчирилмоқда" деб номланган эди.

Guardian Cities лойиҳаси доирасида ҳозирланган бу мақола Ўзбекистон Вазирлар Маҳкамасининг 2017 йил 28 июль куни қабул қилган «Тошкент шаҳрининг марказий қисмини ободонлаштириш ва архитектуравий қиёфасини янада яхшилаш ҳамда аҳоли ва пойтахт меҳмонлари учун зарур шарт-шароитлар яратиш чора-тадбирлари тўғрисида»ги қарорида кўзда тутилган Tashkent City - Тошкент Сити лойиҳасининг унга ажратилган ҳудудда яшаб келган оддий одамлар ҳаëтига таъсирига бағишланган.

Кун янгиликлари

Мудофаа вазирлиги шаҳарлар кўчаларида пайдо бўлган ҳарбий техника юзасидан тушунтириш берди

Ўзбекистон армияси танки.

Мудофаа вазирлиги ҳар куни Тошкент шаҳар, вилоят ва туман марказларида ҳарбий техникадан фойдаланилган ҳолда коронавирусга қарши тарғибот ишлари олиб бормоқда.

Бу ҳақда 7 апрель куни Президент Администрацияси ҳузуридаги Ахборот ва оммавий коммуникациялар агентлиги - АОКАда ўтган брифингда Мудофаа вазирлиги матбуот котиби Баҳром Зулфиқоров маълум қилди.

Унга кўра, аҳоли яшаш пунктларида фуқароларни карантин қоидаларига риоя қилишлари, бесабаб кўчаларга чиқмасликлари бўйича ҳарбий техникалар ёрдамида тарғибот ишлари олиб борилмоқда. Матбуот котибининг айтишича, айрим фуқаролар мазкур техникани БТРлар билан адаштириб, турли “салбий фикрларни билдирмоқда”.

“Маълумот учун, тарғибот ишларига жалб қилинган БРДМ-2 зирҳли техника базасидаги ЗС-82 овоз узаткичли мослама айнан тарғибот ва мунозаралар ўтказишга мўлжалланган. Унинг овоз узатиш қуввати 6 км масофагача етади. Шаҳар ва аҳоли яшаш пунктларида ҳар бир кўчага кириб чиқиш каби ишларни енгиллаштириш мақсадида ушбу техникалар жалб қилинмоқда”, деди матбуот котиби.

Баҳром Зулфиқоров алоҳида жойларда ва блокпостларда кичик бўлинмалар ўз таркибидаги ҳарбий техникалар ва ўзларига бириктирилган шахсий ҳимоя воситалари, анжомлари ва бириктирилган қуроллари билан хизмат ўтаётганини ҳам билдирди.

Коронавирус юқтирган 504 кишининг 212 нафари эркак, 292 нафари аёл

Ўзбекистонда коронавирусга чалинганлар сони кундан кунга кўпаймоқда.

Соғлиқни сақлаш вазирлигининг билдиришича,7 апрель ҳолатига кўра коронавирусга чалинган 504 беморнинг 212 нафари эркак, 292 нафари аёл.

Беморларнинг ёши:

0-9 ёшгача – 20 нафар (4%);

10-19 ёшгача – 29 нафар (5,8%);

20-29 ёшгача – 84 нафар (16,7%);

30-39 ёшгача – 132 нафар (26,2%);

40-49 ёшгача – 137 нафар (27%);

50-59 ёшгача – 72 нафар (14,3%);

60-69 ёшгача – 22 нафар (4,4%);

70-79 ёшгача – 7 нафар (1,4%);

80 ёшдан юқори бўлганлар 1 нафар (0,2%)ни ташкил этмоқда.

Айни пайтда коронавирус инфекциясига чалинган 194 нафар бемор Тошкент шаҳрида даволанмоқда. Шунингдек:

Қорақалпоғистон Республикасида 16,

Андижон вилоятида 61,

Бухоро вилоятида 84,

Наманган вилоятида 51,

Фарғона вилоятида 70,

Хоразм вилоятида 18,

Қашқадарё вилоятида 6,

Навоий вилоятида 2,

Самарқанд вилоятида 1,

Жиззах вилоятида 1 нафардан

бемор ҳудуддаги юқумли касалликларга ихтисослашган шифохоналарда даволанишмоқда.

Шу кунга қадар 30 нафар бемор ушбу касалликдан бутунлай соғайган.

Расман: Самарқандда кучли ёмғир оқибатида 52 хонадонни сув босди (ВИДЕО)

Фавқулодда вазиятлар вазирлиги ходимлари сув босган хонадон эгаларидан бирини олиб чиқмоқда.

Фавқулодда вазиятлар вазирлигининг 7 апрелда билдиришича, 6 апрель куни Самарқандда сув босган 52та хонадон сувдан тозаланди.

Хабарда айтилишича, 6 апрель куни кузатилган кучли ёғингарчилик оқибатида шаҳарда сув тошқинлари юз бергани, ўнлаб хонадонлар сув остида қолган.

“Самарқанд шаҳри «Кулолон» МФЙ ҳудудидан оқиб ўтувчи «Чашма» коллекторига оқова сувлари сиғмасдан шаҳарнинг Регистон ва Даҳбед кўчалари кесишмасида тўпланган. Шунингдек, Сиёбча каналида ҳам худди шундай вазият кузатилиб, оқибатда автотранспорт воситаларининг қатновида қийинчилик юзага келган”, дейилади хабарда.

Вазирликнинг билдиришича, сув босган уйларни сувдан тозалаш учун 84 нафар ходим ва 11 та махсус техника, маҳаллий ҳокимликлар, шунингдек, тегишли идора ва ташкилотлардан 83 нафар ходим ва 12 та техника жалб қилинган.

Бундан ташқари, ёмғир сувлари шаҳар ҳудудидаги қатор маҳаллалар ва кўчалардаги аҳоли хонадонларининг ҳовли ва ертўла қисмларига ҳам кирганлиги аниқланган.

Ҳозирча кучли ёмғир оқибатида сув босган хонадонларга келтирилган зиён миқдори ҳақида маълумот берилмади.

Жаҳон банки Ўзбекистонга $1,2 млрд маблағни оператив ажратиш масаласини кўриб чиқмоқда

Жаҳон банки "Стратегик тайёргарлик ва жавоб дастури" нинг бир қисмини (тезкор молиялаштириш глобал пакетининг ҳажми 14 миллиард АҚШ долларини ташкил этади) Ўзбекистоннинг инқирозга қарши дастурини қўллаб-қувватлаш учун сафарбар этади. Банк раҳбарияти ҳозирги вақтда соғлиқни сақлаш тизимини, ижтимоий ҳимоя институтлари ва муассасаларини ва бюджет кўмагини молиялаштириш учун 1,2 млрд. АҚШ доллари миқдорида маблағларни оператив ажратиш масаласи фаол кўриб чиқмоқда.

Бу ҳақда Европа ва Жаҳон банкининг Марказий Осиё минтақаси бўйича вице-президенти С.Мюллер Ўзбекистон Республикаси Бош вазир ўринбосари - Инвестициялар ва ташқи савдо вазири С.Умурзаковга 6 апрелда ўтказилган видеоконференция давомида билдиргани тўғрисида Инвестициялар ва ташқи савдо вазирлиги матбуот хизмати хабар қилди.

"Томонлар аҳолини коронавирусдан ҳимоя қилишга, корхоналарни, биринчи навбатда, кичик ва ўртача тадбиркорлик субъектларини, қишлоқ хўжалик махсулотлари ишлаб чиқарувчиларини ва хусусий тадбиркорларни қўллаб-қувватлашга қаратилган биргаликдаги истиқболли чораларни муҳокама этишди. Шу қаторда, Ўзбекистондаги ижтимоий-иқтисодий вазиятга коронавирус глобал пандемияси кўрсатган таъсирини юмшатишда Жаҳон банки кўмагининг имкониятлари ва механизмлари келишиб олинди", дейилган расмий хабарда.

Видеоконференция якунлари бўйича С.Мюллер Ўзбекистонга молиявий кўмак кўрсатиш масаласи устувор тартибда кўриб чиқилишига ишонтиргани, томонлар бундай видеоконференция алоқаларни доимий равишда ўтказишга келишиб олгани хабар қилинди.

1 июндан Ўзбекистонга импорт қилинадиган тамаки маҳсулотларига акциз солиғи солинади

Ўзбекистон. Жазирама иссиқдан юзини ниқоб билан тўсган аёл сигарета сотмоқда. (Озодлик архивидан)

1 июндан Ўзбекистонга импорт қилинадиган қиздириладиган тамаки маҳсулотлари, чекиладиган, чайналадиган, ҳидланадиган шимиладиган (снюс), чилим учун тамаки, никотинли тамакисиз снюс, таркибида никотин мавжуд суюқликларга акциз солиғи киритилади.

Адлия вазирлигининг хабар қилишича, бу чора Ўзбекистон президенти 6 апрелда имзолаган "Тамаки маҳсулотлари бозорини янада тартибга солиш чора-тадбирлари тўғрисида"ги қарорида белгилаб қўйилган.

Қарорга мувофиқ, Ўзбекистон ҳудудига олиб кириладиган, акциз солиғига тортиладиган товарларга акциз солиғи ставкалари қўшимча позициялар билан тўлдирилади.

Унга кўра, қатор тамаки маҳсулотларининг акциз солиғи ставкалари миқдорлари белгиланди.

Жумладан, 2020 йил 1 июндан чекиладиган тамакининг 1 килоси учун 25 АҚШ доллари миқдорида акциз солиғи солинади.

Коронавирусга чалинганлар сони 472 нафарга етди

Беморлар сони 15 нафарга кўпайди.

2020 йил 7 апрель соат 10:00 ҳолатига кўра, Ўзбекистонда коронавирус инфекцияси қайд этилганлар сони 472 нафарни ташкил қилмоқда. Бу ҳақда Соғлиқни сақлаш вазирлиги маълум қилди.

7 апрелга ўтар кечаси беморлар сони бир кун ичида 115 нафарга кўпайиб, 457 нафарга етгани хабар қилинган эди.

6 апрель куни эрталаб соат 10даги маълумотда беморлар сони 390 нафарга етгани билдирилганди.

6 апрель тунидан 7 апрель тонгигача беморлар сони яна 15 нафарга ошган.

Нью-Йоркда яна бир ўзбекистонлик коронавирусдан вафот этди.

АҚШда коронавирусга чалинган 300 мингдан ортиқ одамнинг деярли ярми Нью-Йоркда.

Нью-Йоркда 51 ёшли яна бир Ўзбекистон фуқароси коронавирусдан вафот этди.

“Ўзбекистоннинг Нью-Йорк шаҳридаги Бош консулхонаси маълумотига кўра, 2020 йил 6 апрель куни 1969 йилда туғилган Ўзбекистон фуқароси Р.Х. коронавирус инфекциясини юқтириб олиш натижасида маҳаллий клиникада вафот этди”, дейилади Ташқи ишлар вазирлиги 7 апрель куни тарқатган расмий маълумотда.

Вазирликнинг билдиришича, 22 март куни Р.Х.да касалликнинг биринчи аломатлари қайд этилган эди, унинг соғлиғи кескин ёмонлашиши муносабати билан 2 апрель куни у касалхонага ётқизилиб, ўпкани сунъий шамоллатиш аппаратига уланган ва сунъий комага туширилган. “Ушбу даврда Бош консулхона унинг қариндошлари билан доимий алоқада бўлиб турган” дейилади хабарда.

Вазирлик Бош консулхона диаспорал ташкилотлари раҳбарлари ва фаоллари билан биргаликда унинг дафн маросими билан боғлиқ ташкилий масалаларни ҳал қилиш билан шуғулланаётганини таъкидлаган.

Ижтимоий тармоқларда АҚШда яшаётган ўзбекистонликлар Нью-Йоркда 6 апрелда вафот этган шахс Ўзбекистонда хизмат кўрсатган артист бўлганини ёзмоқдалар.

АҚШда яшовчи, асли ўзбекистонлик бўлган ижтимоий тармоқ фойдаланувчиларининг ёзишларича, АҚШга 2008 йилда келган бу хонанда ресторанларда қўшиқ айтиб юрган.

Озодлик “Америка овози” радиосига таянган ҳолда 5 апрель куни 3 апрелда Нью-Йорк шаҳрининг Бруклин туманида икки ўзбекистонлик коронавирусдан вафот этгани ҳақида хабар берган эди.

Ўзбекистоннинг Нью-Йорк шаҳридаги Бош консулхонаси Ўзбекистон фуқаролари бўлган З.Ҳ. ва Ҳ.С. маҳаллий шифохоналарда коронавирусдан вафот этганини 6 апрел куни тасдиқлади.

Тошкент ИИББ коронавирусга қарши курашда Хитой Хавфсизлик вазирлиги тажрибасини ўрганмоқда

Хитой Жамоат хавфсизлиги вазирлигининг расмий вакили Лю Тунпин билан Тошкент ИИББ раҳбарлари 6 апрелда учрашди.

Тошкент шаҳар ИИББ коронавирус пандемиясига қарши кураш бўйича Хитой полициясининг тажрибасини ўрганди. Бу ҳақда 6 апрель куни Тошкент шаҳар ИИББ матбуот хизмати хабар берди.

Расмий билдирувда айтилишича, Тошкент шаҳар ИИББ раҳбарияти Хитой Жамоат хавфсизлиги вазирлигининг расмий вакили Лю Тунпин раҳбарлигидаги делегация билан учрашиб, касалликнинг тарқалишига қарши ташкил этилган тадбирларга жалб қилинган Жамоат хавфсизлиги вазирлиги, идоралар ва жамоат ташкилотларининг ҳаракатлар режасини ўрганган. Учрашув Тошкент ИИББ раҳбарияти ташаббуси билан ўтказилган.

Учрашув пайтида “Карантин шароитида фуқароларга бўлган талабларга алоҳида урғу берилди. Ўзни яккалаш тартиби жорий қилиниб, Ухан шаҳри аҳолисига ҳар бир хонадондан фақат бир киши уч кунда бир марта кўчага озиқ-овқат ва дорилар учун чиқишига рухсат берилган, бунинг учун махсус йўлланма ҳам жорий қилинган”и тўғрисида маълумот олинган.

Расмий маълумотда айтилишича, Хитой делегацияси Ўзбекистонда коронавирусга қарши ҳаракатларга ижобий баҳо берди. “Хусусан, жамоат транспорти фаолияти тўхтатилиши, эпидемиология ҳолатига алоқадор одамлар ва автотранспорт ҳаракатини тақиқлаш, шаҳардаги ҳолат, зарарланганлар сони ҳақида аҳолига мунтазам маълумот бериш, шунингдек аҳолининг ижтимоий заиф қатламини қўллаб-қувватлаш ва ОАВ билан ўзаро алоқа йўлга қўйилиши шулар жумласидандир”.

Хитой делегацияси коронавирус пандемиясини тўхтатишга қаратилган бир қатор тавсияларни ҳам берган.

Маҳаллаларда одамларни 24 соат назорат қилувчи гуруҳлар ташкил этилди

6 апрелдан бошлаб одамларнинг заруратсиз кўчага чиқиши тақиқланди.

Пойтахт Тошкентнинг 11 та туманидаги 514 та маҳаллада 6 апрелдан бошлаб “Маҳалламизни коронавирусдан асраймиз” шиори остида “Жамоатчилик назорати маскани” ташкил этилди.

Тошкент шаҳар ИИББнинг билдиришича, “Жамоатчилик назорати маскани” таркиби маҳалла раиси, ҳудудга қарашли профилактика инспектори ва унинг ёрдамчиси, Фидокор ёшлар гуруҳи аъзолари ҳамда маҳалла фаолларидан иборат.

“Ҳар бир гуруҳнинг бош вазифаси – карантин шароитида маҳаллаларда истиқомат қилувчи фуқароларимизнинг ўта зарурат юзага келгандагина (керакли бўлган озиқ-овқат маҳсулотлари ва дори-дармон сотиб олиш) кўчага чиқишларини ҳамда ниқоб тақмасдан ҳаракатланмасликларини тўлиқ назорат остига олишдир”, - дейилади расмий маълумотда.

“Жамоатчилик назорати маскани” аъзоларига “туну–кун маҳаллаларда юриб, фуқароларнинг заруратсиз ташқарига чиқмаслиги ва карантин тартиб-қоидаларига амал қилишини таъминлаш” ваколати ҳам берилган.

ССВ "1 бемор 52 кишига касал юқтиргани"га оид вазир гапига аниқлик киритди

Алишер Шодмонов бу ҳақда "Ўзбекистон 24" телеканалида гапирган эди.

Соғлиқни сақлаш вазири Алишер Шодмоновнинг бир шахс 52 нафар шахсга касалликни юқтиргани тўғрисидаги гапи “оғзаки англашилмовчилик”. Вазир аслида “касалликка чалинган шахс масъулиятсизлиги сабаб 52 нафар шахс билан яқин мулоқотга киришганлиги”ни айтмоқчи бўлган.

Соғлиқни сақлаш вазирлиги матбуот хизмати Алишер Шодмоновнинг 6 апрель куни “Ўзбекистон 24” телеканалида жонли эфир орқали қилган чиқишида “Тошкент вилоятида яшовчи коронавирусга чалинган шахс ўзида касаллик белгилари бўлишига қарамай (йўтал, тана ҳароратининг кўтарилиши ва ҳансираш), жамоат жойларига бориб, 52 кишига касалликни юқтиргани” тўғрисидаги гапига мана шундай тузатиш берди.

Вазир телеканал орқали юқоридаги гапни айтгани ортидан Тошкент вилоят ҳокимлиги раддия берди. Унда айтилишича, вилоятда бир киши 52 одамга касал юқтирмаган, 6 апрель соат 19:00 ҳолатига қадар вилоят ҳудудида коронавирусга чалинган 18 нафар бемор аниқланган. Аммо кейинроқ вилоят ҳокимлиги сайтидан бу раддия олиб ташланган.

Соғлиқни сақлаш вазирлиги матбуот хизмати ўз тузатишида “Тошкент вилоятида касалланганлар сони 2020 йилнинг 6 апрель соат 12:00 ҳолатига 29 нафарни ташкил этган”, деб билдирган.

7 апрелга ўтар кечаси Ўзбекистонда коронавирусга чалинган беморлар 457 нафарга етди. Улардан 30 нафари соғайган, 2 бемор вафот этган. Коронавирусга чалинганлар сони бир кунда 115 нафарга кўпайган. Бу Ўзбекистонда шу кунгача бир кунда аниқланган беморлар сони бўйича рекорд ҳисобланади.

Жисмоний шахсларга кредит таътили берган банклар сони 21тага етди

Марказий банк биноси.

Жисмоний шахсларга кредит таътили бераётган банклар 21тага етди. Бу ҳақда Президент Администрацияси ҳузуридаги Ахборот ва оммавий коммуникациялар агентлиги - АОКА матбуот хизмати хабар берди.

Агентлик кредит таътили бераётган банклар рўйхатини ҳам тақдим этган. Рўйхатдан қуйидаги банклар жой олган:

1. Ўзсаноатқурилишбанк;

2. Асакабанк;

3. Туронбанк;

4. Алоқабанк;

5. Ҳамкор банк;

6. Миллий банк;

7. Агробанк;

8. Микрокредит банк;

9. ZiraatBank;

10. Халқ банки;

11. InfinBank;

12. Ипотека банк;

13. Пойтахт банк;

14. AsiaAllianceBank;

15. Ипак йўли банки;

16. ЎзАгроЭспортбанк;

17. HiTechBank;

18. Капиталбанк;

19. Orient Finans Bank;

20. Қишлоқ қурилиш банк;

21. Савдогарбанк.

“Кредит каникули юзасидан ушбу банкларга карантин даврида мурожаат қилиш шарт эмас. Ушбу Банклар масалани бир томонлама кўриб чиқади”, дейилади хабарда.

2 апрель куни тарқатилган расмий хабарда жисмоний шахсларга кредит таътили берган банклар 9та эди.

“Ушбу банклар жисмоний шахслар учун кредит шартномасига бир томонлама ўзгартириш киритишмоқда ва кредитлар бўйича 2-3 ойлик имтиёзли давр беришмоқда. Фоиз тўловлари вақтида амалга оширилмаганлиги учун пеня ва жарима ҳисобланмайди”, дейилади хабарда.

Коронавирусга чалинганлар сони 457 нафарга етди

6 апрель куни эрталаб беморлар сони 390 нафар эди.

Соғлиқни сақлаш вазирлигининг 7 апрелга ўтар кечаси хабар беришича, Ўзбекистонда коронавирус инфекцияси аниқланган ҳолатлар сони 457 нафарни ташкил этмоқда.

Соғлиқни сақлаш вазирлигининг 6 апрель соат 10.00да берган маълумотда беморлар сони 390 нафарни ташкил этган эди.

Беморларнинг 31 нафарида пневмония кузатилмоқда.Шундан 9 нафарининг аҳволи нисбатан оғир. 2 нафарининг аҳволи эса ўта оғир баҳоланмоқда.

6 апрель ҳолатига кўра, Ўзбекистонда коронавирусга чалинган 390 беморнинг 188 нафари эркак, 202 нафари аёллардир.

Ёш жиҳатдан қаралса, беморларнинг 123 нафари 40-49 ёш, 111 нафари 30-39 ёш оралиғида.

Қишлоқ хўжалик вазирлиги 15 апрелдан картошка тақчиллигига барҳам берилишини билдирди (ВИДЕО)

Картошка можароси: Нарх икки баравар ошгани сабаб сотувчи ва харидорлар жанжаллашди
Илтимос кутинг

Айни дамда медиа-манба мавжуд эмас

0:00 0:02:25 0:00

Қишлоқ хўжалик вазирлиги “ижтимоий тармоқларда Тошкент шаҳрида картошкага бўлган талаб ортиб бораётгани, айрим жойлардаги деҳқон бозорларида маҳсулот етишмовчилиги бўлаётгани” тўғрисидаги маълумотларга муносабат билдирар экан, “бу масалада ҳеч қандай хавотирга ўрин йўқ”, деб баёнот тарқатди.

“Картошка тақчиллиги (45-50 минг тонна) асосан март-апрель ойларига тўғри келади. Бу даврда ички истеъмол асосан захира ва чет-элдан импорт килиш ҳисобига қондирилади”, деб билдирилади баёнотда.

Вазирликнинг маълум қилишича: “2019-2020 йиллар қиш баҳор мавсуми учун 181 минг тонна картошка заҳира қилинган бўлиб, хозирги кунда 133 минг тоннаси савдога чиқарилган. Бир кунда омборлардан ўртача 1800 тонна картошка бозорга чиқарилмоқда. Бу кунлик истеъмол талабига (4,5 минг т) нисбатан ўртача 40 фоизни ташкил этади”.

Вазирлик баёнотидан келиб чиқилса, бир кунда омборлардан бозорга чиқарилаётган 1800 тонна картошка истеъмол талабидан камида 60 фоизга оздир. Вазирлик яқин 10 кунда ўзбекистонлик деҳқонлар эртаки картошкани бозорга чиқариши билан, картошкага бўлган талаб ва таклиф тенглашишини билдирган:

“Айни пайтда Хусусан, март ойи охирги ўн кунлигидан бошлаб республикамизнинг жанубий вилоятларидан ички бозорларимизга эртаки картошка маҳсулотлари чиқарила бошлайди. 15 апрелдан бошлаб ички бозорларимизга катта микдорда картошка кириб кела бошлайди, жумладан апрель ойида 70 минг тоннага яқин, май ойида эса 85 минг тонна”, - дейилади баёнотда.

30 март куни Озодлик радиоси Ўзбекистонда картошканинг бир килоси нархи 3500 сўмдан 7000 сўмгача қимматлагани ҳақида хабар қилган эди.

Бош прокуратура ҳузуридаги Департамент ва солиқ ходимларидан иборат ишчи гуруҳ расмийларидан олинган маълумотга кўра, шанба ва якшанба кунлари мамлакат бозорларида нархларнинг кескин кўтарилиб, кетишига, асосан, тадбиркорлар сабабчи бўлган.

Расмийларга кўра, мамлакат бозорларида нархларни асоссиз оширган тадбиркорлар жазога тортилди.

Расмий: "Ўзини яккалаш" тартибига амал қилмаганлар камида 4 млн 460 минг сўм жаримага тортилади

”Ўзини яккалаш" ҳаёт тарзи мажбурийдир. Амал қилмаганлар жаримага тортилиши айтилди.

““Ўзини яккалаш” режими 6 апрелдан бошлаб Тошкент ва Нукус шаҳарлари ҳамда вилоятлар марказларида МАЖБУРИЙдир ва бу тартибга амал қилмаганлар катта миқдорда жаримага тортилади”.

АОКА штабида 6 апрель куни бўлиб ўтган брифингда Адлия вазирлиги бошқарма бошлиғи Ғайбулло Примов “”Ўзини яккалаш" ҳаёт тарзи фуқароларнинг хоҳишига кўрами ёки карантин ҳамма учун мажбурийми?” - деган саволга мана шундай жавоб берди.

“Бугунги кунгача ўзини яккалаш ҳаёт тарзи доирасида фақат 65 ёшдан юқори ёшда бўлган ва сурункали касаллиги бўлган фуқаролар ўз уйларидан заруратсиз ташқарига чиқмасликлари сўралаётган эди. Энди бугун, 6 апрелдан бошлаб, "ўзини яккалаш" ҳаёт тарзи Нукус ва Тошкент шаҳарлари ҳамда вилоятлар марказларида МАЖБУРИЙ РАВИШДА жорий этилади”, - деди расмий.

Ғайбулло Примовнинг айтишича, 6 апрелдан бошлаб сабабсиз уйдан кўчага чиққанларга қуйидагича жарималар солиниши назарда тутилган:

Карантинли ва инсон учун хавфли бўлган бошқа юқумли касалликлар пайдо бўлишининг ёки тарқалишининг олдини олиш мақсадида белгиланган мажбурий қоидаларни бузиш:

▪️фуқароларга — 4 млн 460 минг сўмадан 6 млн 690 минг сўмгача,

▪️мансабдор шахсларга — 6 млн 690 минг сўмдан 11 млн 150 минг сўмгача миқдорда жарима солишга сабаб бўлади.

Агар ушбу ҳаркатлар натижасида одамларнинг оммавий касалланиши ёки заҳарланиши реал хавфини келтириб чиқарса ёхуд одамларнинг оммавий касалланишига ёки заҳарланишига олиб келса, шахс ЖИНОИЙ ЖАВОБГАРЛИККА тортилади.

Маълумотда жиноий жавобгарлик даражасига аниқлик киритлмаган.

Соғлиқни сақлаш вазирлигининг 6 апрель соат 10.00даги маълумотига қараганда, Ўзбекистонда коронавирус инфекцияси аниқланган ҳолатлар сони 390 нафарни ташкил этди.

Нью-Йоркдаги ўзбек консулхонаси 2 ўзбекистонлик коронавирусдан ўлгани ҳақида уч кун кечикиб хабар топди

Беморларнинг 115 мингдан кўпроғи ва ўлганларнинг 3500дан кўпроғи Нью-Йоркда.

Ўзбекистоннинг Нью-Йорк шаҳридаги Бош консулхонаси Ўзбекистон фуқаролари бўлган З.Ҳ. ва Ҳ.С. маҳаллий шифохоналарда коронавирусдан вафот этганини тасдиқлади.

Озодлик “Америка овози” радиосига таянган ҳолда 5 апрель куни 3 апрелда Нью-Йорк шаҳрининг Бруклин туманида икки ўзбекистонлик коронавирусдан вафот этгани ҳақида хабар берган эди.

Вафот этган ўзбекистонликларнинг бири эркак, бири аёл. Ёшлари 50-60 орасида. Қўшма Штатларда доимий яшаб, ишлаб келган одамлар. Оилалари ҳам шу ерда.

Ўзбекистоннинг Нью-Йорк шаҳридаги Бош консулхонаси оммавий ахборот воситалари икки кун кечикиб берган бу хабарни уч кун ўтгач тасдиқлади ва “марҳумларнинг оила аъзолари ва яқинларига таъзия изҳор этган ва чет элдаги Ўзбекистон фуқароларига коронавирус тарқалишига қарши курашиш бўйича маҳаллий ҳокимият талабларига тўлиқ риоя этиш, оммавий тадбирларда қатнашмаслик, гавжум жойларга ташриф буюрмаслик ва барча эҳтиёт чораларини кўришни қатъий сўраган”.

Вазирлик томонидан қайд этилишича, АҚШда бўлиб турган Ўзбекистон фуқаролари зарур ҳолларда Ўзбекистоннинг Вашингтон шаҳридаги элчихонасига +1-202-887-5300 (ички.1) телефон рақами орқали ва Нью-Йорк шаҳридаги Бош консулхонасига +1-212-754-7403 телефон рақами орқали мурожаат қилиши мумкин.

“Америка овози”нинг ёзишича, бугунга келиб АҚШда коронавирусга чалинганлар сони 300 мингдан ошган. Ўлганлар сони 8500га яқинлашган. Беморларнинг 115 мингдан кўпроғи ва ўлганларнинг 3500дан кўпроғи Нью-Йоркда.

Коронавирусни даволашда безгакка қарши дорилар қўлланилмоқда

Коронавирусдан бутунлай соғайганлар сони 30 нафарни ташкил этмоқда.

Ўзбекистонда коронавирусга чалинган беморлардан 30 нафарининг соғайиб кетишида, жумладан, безгакка қарши дори воситаларининг ҳам ёрдами бор. Бу маълумотни 6 апрель куни ўтказилган брифингда Санитария-эпидемиология назорати давлат инспекцияси бошлиғи Нурмат Отабеков маълум қилди.

“Безгакка чалинганларни даволаш учун ишлатиладиган препаратлардан коронавирусни юқтирган беморларни даволашда фойдаланилаётгани ҳақидаги маълумотлар тўғри. Бу тажриба Ўзбекистонда ҳам қўлланилмоқда. Агар ҳозирги кунгача 30 нафар беморнинг тузалганини ҳисобга олсак, буни самарали даволаш усули, деб айтишимиз мумкин”, - деб иқтибос келтирган Нурбек Отабеков сўзларидан Kun.uz.

Аввалроқ Нурмат Отабеков Ўзбекистонда коронавирусдан даволашда беморлар организмини тозалашда хлорахинь препаратидан фойдаланиш яхши самара бераётгани ва бу касалликни табиблар даволай олмаслигини айтганди.

Соғлиқни сақлаш вазирлигининг 6 апрель соат 10.00даги маълумотига қараганда, Ўзбекистонда коронавирус инфекцияси аниқланган ҳолатлар сони 390 нафарни ташкил этди.

Коронавирусдан бутунлай соғайганлар сони 30 нафарни ташкил этмоқда.

Карантин қоидаларини бузиш ҳолатлари қарийб 30 мингтага етди

ИИВ ходимлари аҳоли орасида тушунтириш ишларини олиб бормоқда, 25 март, 2020.

Карантин тадбирлари эълон қилинган вақтдан бугунги кунга қадар республика бўйича карантин қоидаларига амал қилмаслик билан боғлиқ аниқланган ҳолатлар 29 953 тага етди.

Бу ҳақда хабар қилган Ўзбекистон ИИВ матбуот хизматига кўра, энг кўп қоидабузарлик Тошкент шаҳрида қайд этилган (4929 та ҳолат)

28438 та ҳолатда жамоат жойларида тиббий ниқоб тақмасдан юриш аниқланган бўлса, 360 та ҳолатда карантин жойи ташлаб кетилган. Шунингдек, ИИВ 954 та ҳолатнинг бошқа сабаблар билан боғлиқ эканини маълум қилди.

Шу билан биргаликда, республика миқёсида карантин ва эпидемияга қарши кураш қоидаларини бузиш билан боғлиқ жами 11 та жиноят иши қўзғатилган. Уларнинг 6 таси санитария ёки эпидемияга қарши кураш қоидаларининг бузилиши (Жиноят кодексининг 257−1- моддаси), 2 таси карантинли ва инсон учун хавфли бўлган бошқа юқумли касалликлар тарқалиши ҳақида ҳақиқатга тўғри келмайдиган маълумотларни тарқатиш (244−5-модда) ҳамда 3 таси ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш (228-модда) билан боғлиқ.

Аи-80 бензини нархини давлат томонидан тартибга солиш бекор қилинади

1 майдан бошлаб Аи-80 маркали автомобиль бензини ва дизель ёнилғиси (шу жумладан ЭКО маркали дизель ёнилғиси) чакана нархларини давлат томонидан тартибга солиш бекор қилинади ва нефтни қайта ишлаш заводлари томонидан уларни сотиш фақат биржа савдолари орқали амалга оширилади.

Бу ҳақда Ўзбекистон президенти 4 апрелда имзолаган “Нефть-газ тармоғининг молиявий барқарорлигини ошириш бўйича биринчи навбатдаги чора-тадбирлар тўғрисида”ги қарорда айтилгани тўғрисида Адлия вазирлиги хабар қилди.

Қарорга мувофиқ, Нефть-газ тармоғи корхоналарининг операцион самарадорлигини яхшилаш бўйича “йўл харитаси” ишлаб чиқилади.

Нефть-газ тармоғидаги барча корхоналарда коррупцияга қарши “комплеанс-назорат” тизими жорий этилади.

Юқори малакали хорижий эксперт ва мутахассислар, шу жумладан хориждаги ватандошларни нефть-газ тармоғи корхоналарига ишга ёллаш бўйича таклифлар ишлаб чиқилади.

Нефть-газ тармоғидаги фаолият турларини лицензиялаш такомиллаштирилади ва соддалаштирилади.

“Ўзбекнефтгаз” АЖ ва “Ўзкимёсаноат” АЖ устав жамғармаларида давлат улуши оширилади.

Коронавирус: 22 беморда пневмония, 7 беморнинг аҳволи оғир

6 апрелдан "ўзини яккалаш" тартиби мажбурий бўлди.

Коронавирусга чалиниб Тошкентдаги вирусология илмий-текшириш институти ва Эпидемиология-микробиология ва юқумли касалликлар илмий текшириш институтида даволанаётган 7 беморнинг аҳволи оғир. Бу ҳақда 6 апрель Санитария-эпидемиология назорати давлат инспекцияси бошлиғи, Республика бош давлат санитария инспектори Нурмат Отабеков маълум қилди.

“Вирусология илмий-текшириш институтидан олинган маълумотга кўра, бу ерда даволанаётган 80 нафар беморнинг 22 нафарида пневмония аломатлари кузатиляпти, 4 нафарининг аҳволи оғир, 1 нафарининг эса аҳволи нисбатан оғир. Эпидемиология-микробиология ва юқумли касалликлар илмий текшириш институти маълумотига кўра эса, бу ерда даволанаётган 67 бемордан 1 нафарининг аҳволи ўрта оғирликда, 1 нафарининг аҳволи ўта оғир, деб баҳоланяпти”, - деб иқтибос келтирди АОКА матбуот хизмати Нурмат Отабеков сўларидан.

Шунингдек, бош давлат санитария инспектори касаллик фақат мулоқот йўли билан, ҳаво томчи йўли билан юқиши мумкинли аниқ билинганини таъкидлар экан: “Шундай экан, ҳар биримиз мулоқотдан ўзимизни сақлашимиз, ортиқча кўчага чиқмаслигимиз, ясама заруриятни ўйлаб топмаслигимиз керак”, - деб айтган.

Соғлиқни сақлаш вазирлигининг 6 апрель соат 10.00даги маълумотига қараганда, Ўзбекистонда коронавирус инфекцияси аниқланган ҳолатлар сони 390 нафарни ташкил этди.

Коронавирусга чалинганлар сони бир кунда 48 нафарга кўпайди. Беморлар сони 390та

5 апрель холатига кўра, Ўзбекистонда коронавирус инфекцияси аниқланганлар сони 342 нафарга етган эди. 

Соғлиқни сақлаш вазирлигининг 6 апрель соат 10.00даги маълумотига қараганда, Ўзбекистонда коронавирус инфекцияси аниқланган ҳолатлар сони 390 нафарни ташкил этди.

Коронавирусдан бутунлай соғайганлар сони 30 нафарни ташкил этмоқда.

5 апрель холатига кўра, Ўзбекистонда коронавирус инфекцияси аниқланганлар сони 342 нафарга етган эди.

Вазирлик 5 апрелда коронавирус юқтиргани тасдиқланганларнинг барчаси стационар шароитида карантинга олинган фуқаролар эканини билдирган.

Коронавирусга чалинганларнинг деярли ярми Тошкентда аниқланган

АОКА матбуот хизмати 6 апрель куни эрталаб жамоатчиликка тақдим этган харита.

АОКА матбуот хизмати коронавирус инфекцияси Ўзбекистонда қайси ҳудудда ва қанча одамда аниқлангани юзасидан 6 апрель куни маълумот берди.

Маълумотда айтилишича, беморларнинг энг кўпи -179 нафари Тошкент шаҳридадир.

Вилоятлар кесимида эса кўрсаткичлар қуйидагича:

Навоий вилояти – 2 та;

Қорақалпоғистон Республикаси – 2 та;

Қашқадарё вилояти – 6 та;

Хоразм вилояти – 18 та;

Бухоро вилояти – 19 та;

Фарғона вилояти – 27 та;

Наманган вилояти – 40 та;

Андижон вилояти – 49 та.

5 апрель ҳолатига кўра, Ўзбекистонда 2 бемор вафот этди, 342 кишида вирус аниқланди.

Болали оилаларга нафақа, бола парваришлаш нафақаси ва моддий ёрдамлар муддати 1 йилгача узайтирилди

Нафақа олиш муддатини чўздириш учун қўшимча мурожаат ва ҳужжатлар талаб этилмайди.

Жорий йил март-июнь ойларида муддати тугайдиган болали оилаларга нафақа, бола парваришлаш нафақаси ва моддий ёрдамларни тўлаш муддати автоматик тарзда 6 ойдан 1 йилгача узайтирилади. Ушбу даврда бошқа муҳтож оилаларга ҳам шундай нафақалар тайинлаш давом эттирилади. Бунинг учун қўшимча мурожаат ва ҳужжатлар талаб этилмайди.

Бу ҳақда президентнинг 3 апрелдаги “Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида”ги фармонида белгилаб қўйилди.

Адлия вазирлигининг билдиришича, бу чоралар орқали яна 120 мингдан кўпроқ кам таъминланган оила қамраб олинади. Ҳозирда бу каби нафақа ва моддий ёрдамларни олаётган оилалар сони 600 мингта.

Карантин даврида ёлғиз кексалар ва ногиронлиги бўлган шахсларга 18 турдаги асосий озиқ-овқат ва гигиена товарлари бепул етказиб берилади.

Шунингдек, карантин даврида уй шароитида ривожлантириш мумкин бўлган фаолият турлари янада қўллаб-қувватланади.

Бунинг учун бу йил яна 50 миллион доллар маблағ йўналтирилади.

Бундан ташқари, президент фармонида шу йил якунига қадар ун, ўсимлик ёғи, гўшт ва сут маҳсулотлари, шакар, гигиена воситалари каби асосий истеъмол товарларини импорт қилишда божхона божи ва акциз солиғи ундирилмаслиги ҳам қайд этилди.

Коронавирус пандемияси даврида тадбиркорларга берилган имтиёзлар эълон қилинди (Инфографика)

Тадбиркорлар шу йил якунига қадар ер ва мол-мулк солиқларини тўлашдан озод этилади.

Адлия вазирлигининг билдиришича, президентнинг 3 апрелдаги “Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида”ги фармонига асосан тадбиркорларга қуйидагича имтиёзлар белгиланди:

- туристик ва меҳмонхона фаолияти билан шуғулланувчи тадбиркорлар шу йил якунига қадар ер ва мол-мулк солиқларини тўлашдан озод этилади. Уларга ижтимоий солиқ ставкаси ҳозирги 12 фоиздан 1 фоизга туширилади. Ушбу имтиёздан соҳада хизмат кўрсатаётган мингдан ортиқ субъектлар фойдаланиш имкониятига эга бўлади;

- карантин даврида ўз фаолиятини тўхтатишга мажбур бўлган якка тартибдаги тадбиркорларга даромад солиғи ва ижтимоий солиқни ҳисоблаш тўхтатилади. Ушбу имтиёз қарийб 150 минг якка тартибдаги тадбиркорга катта кўмак бўлади;

- тушуми ўтган ойдагига нисбатан 50 фоизга камайган кичик бизнес субъектларига айланмадан олинадиган солиқ, ер солиғи, мулк солиғи, ижтимоий солиқ ва сув солиғини тўлаш муддати шу йил 1 октябрга қадар кечиктирилади. Тадбиркорлар бу имтиёзлардан солиқ идорасини уйдан туриб хабардор қилиши мумкин;

- жорий йил 1 апрелдан бошлаб юридик шахсларнинг табиий газ ва электр энергияси учун олдиндан тўлов мажбурияти амалдаги 100 фоиздан 30 фоизга туширилади;

- Тадбиркорлик фаолиятини қўллаб-қувватлаш жамғармаси томонидан ёрдам бериш кўлами янада кенгайтирилади.

Ҳозирги кунда тадбиркор олган кредит ставкаси 24 фоизгача бўлганда унинг 8 фоизини жамғарма қоплаб берар эди. Энди кредит ставкаси 28 фоизгача бўлганда ҳам унинг 12 фоизини давлат қоплайди.

Бунинг учун тадбиркорларнинг 3 триллион сўмлик кредитлари фоизини қоплашга жамғармадан қўшимча 400 миллиард сўм йўналтирилади. Жамғарма бир тадбиркорнинг фақатгина битта лойиҳасига кафиллик бериши бўйича чеклов ҳам энди бекор қилинади.

Интизомли ва ишончли тадбиркорларга кредитнинг 75 фоизига жамғарма кафиллик беради (бугунги кунда 50 фоиз). Кафиллик суммасининг юқори чегараси ҳам 8 миллиард сўмдан 10 миллиард сўмга оширилади;

-қийин аҳволдаги корхоналар, якка тартибдаги тадбиркорлар ва аҳолининг 12 триллион сўмлик кредит мажбурияти муддати узайтирилади.

Бундан ташқари, президент фармонида шу йил якунига қадар ун, ўсимлик ёғи, гўшт ва сут маҳсулотлари, шакар, гигиена воситалари каби асосий истеъмол товарларини импорт қилишда божхона божи ва акциз солиғи ундирилмаслиги ҳам қайд этилди.

6 апрелдан амалга кирадиган янги тақиқлар ҳақида маълумот берилди

Тошкентнинг бўшаб қолган кўчалари.

Нукус ва Тошкент шаҳарлари ҳамда вилоятлар марказларида 6 апрелдан эътиборан ўзини яккалаш” ҳаёт тарзи мажбурий равишда жорий этилади. Бу ҳақда Коронавирус касаллигига қарши курашиш республика махсус комиссиясининг 4 апрелда қабул қилган қарорига таянган ҳолда Адлия вазирлиги маълум қилди.

“Шахснинг ўзининг яшаш ҳудудидаги савдо нуқталарида биринчи галдаги ҳаётий зарур бўлган эҳтиёжлари (озиқ-овқат, дори-дармон, тиббий буюм ва воситаларни харид қилиш ва б.) учун ва шифокор кўригига мурожаат этишдан бошқа мақсадларда чиқиши қатъиян чекланади, иш жойига бориши ва келиши билан боғлиқ ҳолатлар бундан мустасно”, дейилади хабарда.

Бундан ташқари, ҳаракатланишда ҳамда савдо дўконлари ва бошқа жойларда 2 метрлик ижтимоий масофани сақлаш талаб этилади.

Белгиланган тартибга асосан 65 ёшдан юқори ёшда бўлган ва сурункали касаллиги бўлган фуқаролар ўз уйларидан ўта заруратсиз ташқарига чиқиши қатъиян ман этилади.

“Ушбу талабларни бузган шахслар қонунчиликка мувофиқ тегишли жавобгарликка тортилиши мумкин”, деб таъкидланади хабарда.

6 апрелдан бошлаб йирик деҳқон бозорлари ва савдо мажмуаларининг (супермаркет, гипермаркет ва бошқалар) кириш-чиқиш жойлари тегишли мутахассислар билан таъминлаган ҳолда пирометрлар ва антисептик воситалар билан жиҳозланади.

Бу жойларга келган ҳар бир фуқаронинг тана ҳарорати ўлчанади ҳамда 37 С ва ундан юқори бўлганда, улар ичкарига киритилмайди. Айни пайтда тана ҳарорати юқори бўлган фуқароларга зудлик билан тез тиббий ёрдам хизматига мурожаат этиш тавсия этилади.

Марказлашган ҳолда пирометрларни Қорақалпоғистон Республикаси, вилоятлар ва Тошкент шаҳрига икки кун муддатда етказиб берилади.

Йирик деҳқон бозорлари ва савдо мажмуалари (супермаркет, гипермаркет ва бошқалар) ҳамда карантин тадбирлари учун ажратилган жойларда дезинфекция ишлари мунтазам равишда мажбурий тартибда амалга ошириб борилади.

Карантин талабларининг ижросини сўзсиз таъминлаш ҳамда махсус рухсатномаси мавжуд бўлмаган ҳолда ҳаракатланаётган автотранспорт воситаларини ҳуқуқбузарлик давом эттирилишига йўл қўймаслик мақсадида истисно тариқасида ички ишлар органлари йўл-патруль хизмати ходимлари томонидан карантин даврида автотранспорт воситасини махсус рухсатномасиз бошқарганлик учун транспорт воситасини жарима майдончасига жойлаштириш йўли билан ушлаб турилади.

Тошкент ва Нукус шаҳарлари ҳамда вилоят марказларида 2020 йил 6 апрель соат 06-00 дан эътиборан мототранспорт (скутер) ҳамда велосипедда ҳаракатланиш карантин даврида вақтинча чекланади.

Бунда фақатгина ҳаётий зарур эҳтиёжлар – озиқ-овқат, дори-дармон, тиббий буюм ва воситалар харид қилиш, шифокор кўригига мурожаат этиш, шунингдек, иш жойига бориш ва келиш учун рухсат этилади.

Ўпка сунъий вентиляцияси аппаратларини (ИВЛ) ишлаб чиқариш йўлга қўйилади

Коронавирус тушган ўпкада яллиғланиш бошланган кезда¸ беморни сунъий нафас олдириш аппаратига улаш унинг ҳаëт-мамотини ҳал қилади.

Словакиянинг Chirana компанияси билан ҳамкорликда Ўзбекистонда ўпканинг сунъий вентиляцияси аппаратлари (ИВЛ) ишлаб чиқариш йўлга қўйилади.

Инновацион ривожланиш вазирлиги расмийси Жамолиддин Бобохоновнинг айтишича, ИВЛ қурилмаларини ишлаб чиқариш жорий йилнинг май ойида бошланади.

Тошкентнинг Бектемир туманида эса ишлаб чиқариш участкаси қурилиши жорий йил сентябрига қадар якунланиши ва завод ишга туширилиши режаланмоқда.

Ишлаб чиқаришни маҳаллийлаштиришнинг биринчи босқичида 3 миллион АҚШ доллари миқдорида инвестиция киритиш ва 30 иш ўрни яратиш режалаштирилган.

Иккинчи босқичида эса 6 миллион АҚШ долларгача инвестициялар ва 100 тагача иш ўринлари очилиши кутилмоқда.

"Ўпканинг сунъий вентиляцияси аппаратлари ҳозирда жаҳоннинг 12 мамлакатида ишлаб чиқарилади. CHIRANA бренди дунёда энг машҳур олтита бренддан бири саналади. Аппаратларимиз бошқа компания моделларидан фарқли равишда бир босқичли эмас, уч босқичли вентиляцияни амалга оширади. Бундай аппаратлар ишлаб чиқарувчи заводнинг Ўзбекистонда барпо этилиши давлатнинг тиббий хавфсизлигини таъминлайди", дея иқтибос келтиради вазирлик “CHIRANA+” компанияси бош директори Василий Шимкодан.

Лойиҳа доирасида Ўзбекистонга 1000 дона нафас олиш контурлари, 500 дона намлик коллектор билан нафас олиш контурлари ва 1000 дона бир мартали бактериал-вирусли филтрларни беғараз фойдаланиш учун топширилади.

Айтилишича, ҳозир “CHIRANA ASIA” Словакия-Россия-Ўзбекистон қўшма корхонаси ташкил этилган ва компания “Ўзбекистонда ишлаб чиқарилган” (“Made in Uzbekistan”) ёрлиғи остида мамлакатда ягона юқори технологик тиббий асбоб-ускуналар ишлаб чиқаради.

Анестезиология соҳасида юқори малакали хорижий мутахассислар таклиф қилинган ҳолда ИВЛ ва НДА қурилмаларидан фойдаланиш бўйича семинарлар ўтказилиши режалаштирилган.

Ишлаб чиқариладиган маҳсулотларни, шунингдек, Тожикистон, Туркманистон, Қирғизистон ва Афғонистонда сотиш режаланган.

Ўзбекистонда коронавирусга чалинганлар кўпайиб бораëтгани ортидан ўпкасида яллиғланиш бошланган беморлар ҳаëтини ҳал қилувчи сунъий нафас олдириш аппаратлари - вентиляторларга эҳтиëж кескин ошиб кетди.

Вентиляторлар бутун дунëда тақчил тиббиëт ускунасига айланган бир пайтда¸ Ўзбекистон Соғлиқни сақлаш вазирлиги Россия Федерациясининг "Уральский приборостроительний завод"ига 500 та шундай аппарат учун буюртма берди.

Ҳозирча касалхоналар кўз тикиб кутаëтган бу аппаратлардан бирор гуруҳининг Ўзбекистонга етказилгани ҳақида расмий хабар йўқ.

Давомини ўқинг

Кўрмай қолган бўлсангиз

XS
SM
MD
LG