Линклар

Шошилинч хабар
26 феврал 2021, Тошкент вақти: 06:40

Ўзбекистон хабарлари

“Вақф” жамғармаси 1 миллиард 800 миллион сўм закотни муҳтожларга бўлиб берди

"Вақф" жамғармаси аввалроқ хайрия ишлари учун нон цехи очганини билдирган эди. Муфтият сайтидан олинган фото.

“Вақф” жамғармаси 1 май ҳолатига кўра муҳтожларга тарқатилган закот миқдорини эълон қилди.

Расмий хабарда айтилишича, 2018 йилнинг июнидан 2019 йилнинг 1 майига қадар жамғармага 2 миллиард 154 миллион сўм закот маблағлари келиб тушган. Бу пулларнинг 1 миллиард 800 миллион сўми 1202 нафар муҳтож одамга тарқатилди.

“Тарқатилган маблағларни ҳисобга олганда ҳар бир кўмакка муҳтож инсонга ўртача 1,5 миллион сўмдан закот маблағи тарқатилди”, дейилади расмий хабарда.

Апрель ойида “Вақф” фонди қошида нон ишлаб чиқарувчи цех очилгани хабар қилинган эди. Жамғарма нондан тушган фойда ҳисобидан меҳрибонлик, қариялар ва ногиронлар уйларига хайрия берилишини билдирган.

Кун янгиликлари

АҚШ ташкилоти Ўзбекистонга мингга яқин инглиз тили ўқитувчисини юбориш ниятида

Иллюстратив сурат.

АҚШнинг American Councils халқаро таълим ташкилоти Ўзбекистонга мингга яқин инглиз тили ўқитувчисини юбориш ниятида эканини билдирди. Ўзбекистон ҳукумати матбуот органи бўлган “Халқ сўзи” нашрининг ёзишича, Халқаро таълим бўйича Америка Кенгашларининг катта вице-президенти Майкл Кертис бу ҳақда Ўзбекистоннинг Вашингтондаги элчиси Жавлон Ваҳобов билан ўтган учрашув чоғида гапирган.

Хабарда таъкидланишича, учрашувда Ўзбекистонда инглиз тилини ўқитиш сифатини оширишга American Councils’ни жалб этиш истиқболлари муҳокама қилган.

Элчи Жавлон Ваҳобов АҚШ Ўзбекистонга дарс бериш учун 27 нафар инглиз тили ўқитувчисидан иборат биринчи гуруҳни жўнатганига миннатдорчилик билдирган.

“Бундан ташқари, айни пайтда Ўзбекистонда АҚШ ҳукумати томонидан молиялаштириладиган ўндан ортиқ таълим дастурлари амалга ошириш босқичида турибди. Улар орасида Future Leaders Exchange, University Partnership in Central Asia, English Speaking Nation, ESN Teacher Coaches Program, U.S. Central Asia Education Fund, US-CAEF Alumni Conference 2021, American Windows Uzbekistan, Faculty Enrichment Program, Young Professional Internships, Uzbekistan Business Leaders, Afghanistan University Student Exchange Program, Open World Leadership Center Program, Uzbekistan Youth Leadership Conference 2021 кабилар бор”,-дейилади хабарда.

Маҳалланинг фаол фуқаролари- кўчабоши ва уйбошиларга коммунал тўловлар бўйича товон пули берилади

Ўзбекистондаги кўчалардан бири.

Вазирлар Маҳкамаси 23 февраль куни тасдиқлаган 99-сонли низомга асосан 2021 йилнинг 1 мартидан бошлаб маҳалланинг фаол фуқароларига коммунал хизматлар учун мажбурий тўловлар бўйича компенсация берилади.

Низомда кўчабоши ва уйбошилар фаол фуқаролар қаторида қайд этилган. Мазкур фаолларга коммунал хизматлар учун ҳар ойда БҲМнинг 50 фоизи (122 минг 500 сўм) миқдорида товон пули берилади.

Шунингдек, мазкур шахслар фаолиятини баҳолашда улар бириктирилган кўча ёки уйда камида 3 ой давомида фаолият кўрсатганлиги инобатга олинади ва мезонлардан келиб чиққан ҳолда, товон пули 70 баллдан юқори балл тўплаган тақдирда тўланади.

Компенсация пул тўловлари тўланиши кўчабоши ва уйбошилар фуқароларнинг ўзини ўзи бошқариш органлари фаолиятида фаол иштирок этмаса муддатидан олдин тўхтатилади.

Мазкур компенсация пул тўловлари маҳаллий бюджетларнинг қўшимча манбалари ҳисобидан Маҳалла ва оилани қўллаб-қувватлаш вазирлигининг туман (шаҳар) бўлимлари орқали амалга оширилади.

Давлат корхоналари “обнал фирма”лар билан сохта битим тузган

16 февраль куни Тошкентда 300 га яқин тадбиркор музлатиб қўйилган банк ҳисобларини очиш, ноҳалол контрагентлар тўламаган ҚҚСни улардан ундиришни тўхтатиш талаби билан Давлат солиқ қўмитасига борган.

Ўзбекистондаги 120та давлат корхонаси ва 86 та давлат улуши мавжуд корхона ҳалқ тилида “обнал” деб аталувчи нақдловчи фирмалари билан сохта битилмларни тузган ва давлатга катта миқдорда зарар етказган.

Давлат солиқ қўмитасининг билдиришича, нақдловчи фирмалар билан сохта битим тузган 120та давлат корхонаси бюджетга 47,3 миллиард сўм, 86 та давлат улуши мавжуд корхона 48,1 миллиард сўм қўшимча қиймат солиғини тўламаган.

Давлат солиқ қўмитаси нақдловчи фирмалар билан ҳамкорлик қилган ва солиқ тўламаган жами 396та корхонадан иборат рўйхатни тузди.

Расман билдирилишича, бундай сохта битимларни тузган тадбиркорлик субъектлари 10 мингга яқин. Улар қарийб 1 триллион сўм миқдоридаги қўшилган қиймат солиғини тўламаган.

Озодлик радиоси 16 февраль куни Тошкентда 300 га яқин тадбиркор музлатиб қўйилган банк ҳисобларини очиш, ноҳалол контрагентлар тўламаган ҚҚСни улардан ундиришни тўхтатиш талаби билан Давлат солиқ қўмитасига боргани ҳақида хабар берган эди.

16 февраль куни Ўзбекистон Республикаси Президенти ҳузуридаги Тадбиркорлик субъектларининг хуқуқлари ва қонуний манфаатларини ҳимоя қилиш бўйича вакил - Бизнес омбудсман ҚҚС юзасидан тадбиркорлик субъектларига юборилган хабарномаларнинг қонунийлигини ўрганишни бошлагани тўғрисида баёнот берди.

Савдо марказида хотини ва яна бир эркакни пичоқлаб ўлдирган шахс 22 йилга қамалди

Судланувчи 2020 йил 20 ноябрида қўлга олинган эди.

Самарқанддаги савдо марказида харидорлар кўз ўнгида хотинини ва хотинининг жазмани сифатида гумонлаб яна бир эркакни пичоқлаб ўлдирган шахс 22 йилга қамалди.

Олий суд расмий каналининг хабар беришича, мазкур шахс Самарқанд вилоят суди томонидан Жиноят кодексининг 97-моддаси 2 қисми “а” ва “ж” бандлари (икки ёки ундан ортиқ шахсни ўта шафқатсизлик билан қасддан ўлдириш) асосида айбдор деб топилган. У жазони умумий тартибли колонияларда ўташи белгиланди.

Озодлик 2020 йилнинг 20 ноябрь куни тахминан 18:00 да 42 ёшли эркак Мирзо Улуғбек кўчасида жойлашган савдо марказида хотини ва унинг жазмани экани тахмин қилинаётган шахсни пичоқлаб қўйгани ҳақида хабар берган эди. Жабрланганлар кўп қон йўқотиши натижасида воқеа жойида вафот этган.

Бу қотилликнинг гувоҳи бўлган вауни ведога олиб, ижтимоий тармоқларда тарқатган уч нафар шахс 2020 йилнинг 23 ноябрида ички ишлар ходимлари томонидан аниқланиб, қўлга олинган ва уларга нисбатан маъмурий қамоқ жазоси қўлланилган эди.

Чимбойда камдан-кам учрайдиган табиат ҳодисаси - мурмурация кузатилди (ВИДЕО)

Иллюстратив сурат.

Қорақалпоғистоннинг Чимбой тумани аҳолиси камдан-кам учрайдиган табиат ҳодисаси – мурмурацияга гувоҳ бўлишди. Бу ҳақда “Газета уз” нашри Николай Югай тасвирга олган ва ўз Фейсбук саҳифасида эълон қилган видеога асосланган ҳолда хабар тарқатди.

Хабарда айтилишича: “Минглаб қушлар улкан тўда бўлиб, осмонда ғайриоддий динамик шаклни ҳосил қилиши мурмурация деб аталади”.

Қушлар кутилмаган томонга учиши, қисмларга ажралиб, яна динамик ҳаракатни давом эттириши мумкин. Ушбу улкан тўдаларда учиш тезлиги соатига 40 километргача бўлади, бироқ қушлар бир-бирига урилиб кетмайди.

Пахтачида “қанотли бузоқ” туғилгани иддао қилинди (ВИДЕО)

Мутахасисларга кўра, бузоқчанинг саломатлиги яхши.

Самарқанд вилоят Пахтачи туманида “қанотли бузоқ” туғилгани тўғрисидаги видеони “Пахтачи” туман газетаси 23 февраль куни эълон қилди.


Видеода айтилишича, “қанотли бузоқ” “Кўрпа” маҳалласидаги Ғайбулла Хайруллаев хонадонида 20 февраль куни туғилган.

Ғайбулла Хайруллаевнинг гумонича, сигирининг ҳомиласи эгизак бўлган бўлиши мумкин, аммо иккинчи ҳомила ривожланмай, унинг оёғи бузоққа ўтган.

Туман газетаси эълон қилган видеода бузоқчанинг ўнг томонида “қанотга ўхшаш оёқча” мавжудлигини кўриш мумкин. Бу бузоқчани кўриш учун Хайруллаевнинг хонадонига ҳар куни маҳаллий аҳоли келмоқда.

Маҳаллий матбуотда 2018 йилнинг мартида Самарқанд вилоятининг Жомбой туманида 6 оёқли бузоқ, 2014 йили Жиззахда эса 5 оёқли қўзичоқ туғилгани хабар қилинган.

Тиббиётга алоқадор барча ташкилотлар ва дорихоналар мажбурий равишда ягона платформага уланади

Ўзбекистондаги барча тиббиёт ва фармацевтика ташкилотлари, шу жумладан дорихоналар 2024 йил 1 январидан бошлаб мажбурий тартибда босқичма-босқич ягона платформага уланади. Бу ҳақда мамлакат президенти томонидан шу йил 23 февралида имзоланган “Соғлиқни сақлаш соҳасида рақамлаштириш ишларини самарали ташкил этиш чора-тадбирлари тўғрисида”ги қарорда айтилган.

Мазкур қарор республикадаги “соғлиқни сақлаш соҳасини рақамлаштириш ва ахборот тизимлари ягона комплексини жорий этиш, бошқарув жараёнидаги ортиқча тартиб-тамойилларни қисқартириш, аҳолига хизматлар кўрсатиш сифатини ошириш, тиббиёт ходимларининг иш самарадорлигини таъминлаш, шунингдек, ушбу йўналишда қабул қилинган рақамли трансформация қилиш дастурларини самарали амалга ошириш мақсадида” қабул қилинган.

Мазкур мақсаддан келиб чиққан ҳолда Соғлиқни сақлаш вазирлигининг “Ахборот коммуникация технологияларини ривожлантириш маркази” давлат унитар корхонаси негизида Соғлиқни сақлаш вазирлиги муассислигида “IT-Med” масъулияти чекланган жамиятини ташкил этиш тўғрисидаги таклифи маъқулланган.

Қайд этилишича, “IT-Med” МЧЖ “Ахборот коммуникация технологияларини ривожлантириш маркази” ДУКнинг ҳуқуқлари, мажбуриятлари ва шартномалари, шу жумладан халқаро шартномалари бўйича ҳуқуқий вориси ҳисобланади.

Қарор билан “IT-Med” МЧЖ зиммасига қуйидаги қўшимча вазифалар юклатилган:

  • соғлиқни сақлаш тизими ва ташкилотларидаги жараёнларни оптималлаштириш, рационаллаштириш, стандартлаштириш ва автоматлаштириш;
  • соғлиқни сақлаш соҳасида ахборот тизимларини ривожлантириш учун амалга ошириладиган ҳамда халқаро молия ташкилотлари ҳисобига молиялаштириладиган лойиҳаларнинг техник-иқтисодий параметрлари, концепциялари ҳамда бошқа лойиҳа ва лойиҳаолди ҳужжатларини ишлаб чиқиш;
  • тиббиёт ва фармацевтика соҳасида ахборот технологияси ва коммуникациялари сиёсати ва стандартларини жорий этиш;
  • “Электрон соғлиқни сақлаш” ахборот тизимлари ягона комплексини жорий этиш ва кузатиб бориш, шунингдек, уларнинг бошқа давлат органлари ахборот тизимлари билан интеграциясини таъминлаш;
  • соғлиқни сақлаш тизимида бизнес жараён ва IТ-реинжинирингини ривожлантириш ва ушбу йўналишда халқаро тажрибани амалиётга татбиқ этиш;
  • қўйилган вазифаларни рўёбга чиқариш мақсадида инвесторлар, бизнес ҳамкорлар ва аутсорсинг хизматларини жалб қилиш;
  • тиббиёт соҳасини рақамлаштириш кўламини кенгайтириш мақсадида жорий этилаётган ахборот тизимлари ва дастурий маҳсулотларни ўзида қамраб олувчи соғлиқни сақлашнинг ахборот тизими ягона платформасини жорий этиш.

Ҳужжатга мувофиқ, янги ахборот тизимларини жорий қилиш, шунингдек, корхона, муассаса ва ташкилотларга хизмат кўрсатишдан тушадиган маблағлар, “IT-Med” МЧЖнинг устав жамғармасига белгиланган тартибда киритиладиган инвесторлар маблағлари, халқаро молия институтлари ва ташкилотлари грантлари, ташқи беғараз кўмак маблағлари (грантлар, техник кўмаклар ва бошқалар), юридик ва жисмоний шахслар, шу жумладан норезидентларнинг хайрия маблағлари ҳамда қонун ҳужжатлари билан тақиқланмаган бошқа манбалар “IT-Med” МЧЖнинг фаолиятини асосий молиялаштириш манбалари этиб белгиланган.

Тошкентдан шаҳарлараро автобус қатнови вақтинча бекор қилинди

"Тошкент" автовокзалидан қатнайдиган автобуслар

Жорий йил 25 февралида пойтахт Тошкентдан шаҳарлараро қатнайдиган барча автобус рейслари бекор қилинган.

“Тошкент” автовокзали матбуот хизмати маълумотига кўра, бундай қарор олинишига об-ҳаво шароитининг ноқулайлиги сабаб бўлган.

Мазкур автовокзалдан шаҳарлараро 17 та йўналиш бўйича автобус қатнайди.

Аввалроқ “Ўзгидромет” жорий ҳафта сўнгигача мамлакат бўйлаб ҳаво ҳарорати пасайиши ҳақида маълумот тарқатган.

Ўзбек ва қозоқ расмийлари чегара демаркацияси муҳокамасини давом эттиришди

Ўзбекистон билан Қозоғистон ўртасидаги чегара узунлиги 2440 километр келади

Жорий йилнинг 18-24 февраль кунлари Ўзбекистон ва Қозоғистон расмийлари Ўзбекистоннинг Сирдарё вилояти ва Қозоғистоннинг Туркистон вилояти чегаралари туташган участкада давлатлараро чегараси демаркациясининг якуний ҳужжатларини тайёрлаш ишларини амалга оширган.

“Дунё” ахборот агентлиги хабарига кўра, 24 февраль куни Тошкент шаҳрида икки мамлакат ҳукумат делегациялари иштирокида Ўзбекистон-Қозоғистон қўшма демаркация комиссиясининг навбатдаги йиғилиши ўз ишини якунлаган.

Комиссия йиғилишида Ўзбекистоннинг Тошкент ва Жиззах вилоятлари ҳамда Қозоғистоннинг Туркистон вилояти чегаралари туташган давлатлараро чегаранинг алоҳида участкаларида дала тадқиқот ишлари ўтказилган.

Демаркация ишлари бўйича галдаги йиғилиш шу йил март ойида Қозоғистонда ўтказилиши режаланган.

2440 километрга узанган ўзбек-қозоқ чегарасининг шу кунгача 96 фоизи аниқлаб бўлингани маълум.

Президент видеоселекторида бу йил сув таъминоти 25 фоизга кам бўлиши мумкинлиги билдирилди

Жорий йил Ўзбекистонда суғориш мавсумида сув таъминоти меъёрга нисбатан 25 фоиз кам бўлиши кутилмоқда. Бу ҳақда президент Ш. Мирзиёев раислигида 24 февраль куни қишлоқ ва сув хўжалиги соҳасида жорий йилда амалга ошириладиган устувор вазифалар муҳокамасига бағишланиб ўтказилган видеоселектор йиғилишида айтилган.

Президент матбуот хизмати маълумотига кўра, “сув исрофига умуман йўл қўймаслик ҳаётий зарурат” экани урғуланган йиғилишда “430 минг гектарда сув тежовчи технологияларни жорий қилиш орқали 3 миллиард кубметр сувни иқтисод қилиш мумкин”лиги қайд этилган.

Видеоселекторда таъкидланишича, дастлабки ҳисоб-китобларга кўра, томчилатиб суғориш тизимлари ва қувурлар ишлаб чиқариш учун жорий йил февраль-апрель ойларида 35-40 минг тонна полиэтилен зарур. Шу боис сув тежовчи технологиялар учун зарур бўлган полиэтилен ва полипропилен учун импорт божи 1 октябргача бекор қилинган.

Сув хўжалиги вазирлигига 3 мингдан зиёд насосларни таъмирлаш ва янгилаш, насос станцияларида электр энергияси ва сув сарфини “онлайн” мониторинг қилиш тизимини жорий этиш вазифаси қўйилган.

Йиғилишда Ўзбекистонда аграр тармоқни барқарор молиявий ресурслар билан таъминлаш учун бу йил Қишлоқ хўжалиги жамғармасига 24 триллион сўм маблағ йўналтирилаётгани қайд этилган.

Кучли қор ёғиши тўхтамаётгани ортидан “Тахтақорача” довони ёпилди

Иллюстратив сурат

Самарқанд ва Қашқадарё вилоятларини боғловчи “Тахтақорача” довони об-ҳаво шароити ёмонлиги туфайли ёпилган.

Ички ишлар вазирлиги Йўл ҳаракати хавфсизлиги бош бошқармаси маълумотига кўра, довон “қор ёғишда давом этаётганлиги сабабли турли кўнгилсиз ҳодисаларнинг олдини олиш мақсадида” ёпилган, у ерда “автотранспорт воситаларининг ҳаракати вақтинча тўхтатилган”.

Айни пайтда Фавқулодда вазиятлар вазирлиги Фарғона водийсини пойтахт Тошкент билан боғлайдиган "Қамчиқ" довонида юк машиналари ҳаракати чекланганини билдирган.

“Ўзгидромет”нинг маълум қилишича, 25 февраль туни Устюртда ҳаво ҳарорати – 25 даражагача пасайиши мумкин, Қорақалпоғистоннинг бошқа ҳудудларида эса ҳарорат – 22 даражагача тушиши мумкин.

Қайд этилишича, шу туни Хоразмда ҳаво ҳарорати – 17 даражагача, Бухоро, Навоий, Тошкент, Самарқанд, Жиззах ва Сирдарё вилоятларида – 12 даражагача, тоғли ҳудудларда эса – 20 даражагача пасаяди.

Фарғонада дордан йиқилган дорбоз оғир аҳволда. Унинг ўлгани рад этилди

Иллюстратив сурат.

Фарғонада арқон узилиб кетиши оқибатида боши билан ерга қулаган дарбоз оғир аҳволда. Бу ҳақда Соғлиқни сақлаш вазирлиги 24 февралда маълум қилди.

2021 йилнинг 23 февраль куни соат 19:25 га яқин Фарғонадаги цирк дорбози дордан йиқилиб, Республика шошилинч тез тиббий ёрдам илмий маркази Фарғона филиалига олиб келинган.

Шундан сўнг ижтимоий тармоқларда дорбоз ҳалок бўлгани ҳақидаги турли маълумотлар тарқалган эди.

Соғлиқни сақлаш вазирлиги бу маълумотларни рад этди ва дорбоз айни пайтда ҳаёт эканлигини, бироқ аҳволи оғирлигини тан олди.

“Марказ мутахассислари уни зудлик билан тиббий кўрикдан ўтказишган. Беморга “Ўнг пешона ва бурун бўшлиғи суякларининг парчаланиб синиши, бош мия лат ейишининг оғир даражаси, бош мия ўнг ярим шари пешона бўлаги эпидурал гематомаси, субарохнаидал қон қуйилиши, пневмоцефалия, бош юмшоқ тўқималари лат ейиши ва териости гематомаси ташхиси қўйилган ва беморда зудлик билан жарроҳлик амалиёти ўтказилган”,-дейилади хабарда.

Марказ мутасаддиларининг маълум қилишича, беморнинг аҳволи барқарор бўлиб, ҳозирда нейрореанимация бўлимида малакали мутахассислар назоратида белгиланган стандартлар бўйича даво муолажаларини олмоқда.

Заргарлик буюмларини 2023 йилгача электрон тижорат орқали сотишга рухсат берилади

2023 йил 1 мартгача заргарлар қимматбаҳо металларни тўғридан-тўғри шартнома асосида ёки кечиктириб тўлаш шарти билан сотиши мумкин. Бу тўғрида 22 февраль куни президентнинг 4998-сонли қарори қабул қилинди.

Қарорга асосан “Навоий кон-металлургия комбинати” ва “Олмалиқ кон-металлургия комбинати” томонидан заргарлик буюмларини ишлаб чиқарувчиларга қимматбаҳо металлар кейинчалик хом ашё кўринишида қайта сотиш ҳуқуқисиз тўғридан-тўғри шартнома асосида ёки товар-хом ашё биржаси орқали нархнинг 15 фоизлик аванс тўловини амалга оширган ҳолда 180 кунга кечиктириб тўлаш шарти билан сотилади.

Бундан ташқари марварид, олмос ва қимматбаҳо тошларга импорт божхона божлари солинмайди.

2021 йил 1 апрелдан бошлаб қимматбаҳо металлардан ва қимматбаҳо тошлардан ясалган заргарлик буюмларини ички ва ташқи бозорларда электрон тижорат орқали сотишга рухсат берилади

“Янги Ангрен” ИЭСида яна ёнғин чиққани расман рад этилди

“Янги Ангрен” ИЭС (архив сурат).

Энергетика вазирлиги 24 февраль куни ижтимоий тармоқларда Янги Ангрен иссиқлик электр станциясида ёнғин юз бергани тўғрисидаги видеохабарлар ёлғон эканини билдирди.

“Кун уз” нашрининг вазирликка таянган ҳолда хабар беришича, 24 февралда “Янги Ангрен” ИЭСида “ҳеч қандай ёнғин, авариявий ўчиш ёки бошқа фавқулодда ҳолатлар юз бермаган ва барча энергия ускуналар соз ҳолатда ишламоқда”.

“Видеолавҳа Янги-Ангрен ИЭС қозонхоналарида кўмир кулидан тозалаш ишлари амалга оширилаётганда ёки одатий технологик жараён амалга оширилаётган пайтда олинган бўлиши мумкин”,-деб иқтибос келтиради нашр Энергетика вазирлигига таяниб.

2021 йил январида айни станциянинг 5-блокида портлаш бўлган ва унда 3 киши ўлган. 2020 йил 30 январида чиққан ёнғинда эса станция 4-3-блоклар томи ёниб кетган, унда ҳеч кимга шикаст етмаган.

“Янги Ангрен” ИЭС станциясида 11 февраль кечаси ёнғин содир бўлгани айтилган. Станция ишчиларига кўра, бу гал 4-блокда ёнғин чиққан, ҳодиса жойида ишчилар бўлмаган ва ёнғин тезда ўчирилган.

Ўзбекистон коронавирусга қарши эмлашни ўтказишга тайёр экани расман эълон қилинди

Расман билдирилишича, жорий йилнинг иккинчи чорагида коронавирусга қарши вакцинани сақлаш учун миллий омборхона қуриб битказилади.

Коронавирусга қарши эмлаш жараёни учун вилоятларга жами 34 та музхона, 10 121 дона термоконтейнер ва термосумка, 749 та музлаткич, бирламчи даволаш-профилактика муассасаларига 2 мингдан ортиқ совуткич ўрнатилган. Бу ҳақда Санитария-эпидемиологик осойишталик ва жамоат саломатлиги хизмати бошлиғининг ўринбосари Нурмат Отабеков 24 февраль куни маълум қилди.

Унга кўра, вакциналарни хавфсиз ва тезкор ташиш учун Ўзбекистонга жами 17 та авторефрижиратор, 206 Miniven-Labo автомашиналари келтирилди.

— Ўтган йиллар давомида жами 21 та вакцина сақлаш омборлари, шу жумладан, 1 та миллий, 14 та минтақавий ва 6 та туман омборлари қурилиши қўллаб-қувватланган эди. Ҳозирги вақтда мамлакатимиз бўйича 16 та вакцина омбори қуриб битказилиб, 29 та махсус совуткичлар вакцина омборларига ўрнатилди. Қолган 5 та вакцина омборхонаси эса 2021 йилнинг биринчи чораги охиригача қуриб, фойдаланишга топширилиши кутилмоқда,-деб иқтибос келтирди Отабеков сўзларидан Соғлиқни сақлаш вазирлиги.

Расман билдирилишича, жорий йилнинг иккинчи чораги якунига қадар коронавирусга қарши вакцинани сақлаш учун миллий омборхона ҳам қуриб битказилади.

Нурмат Отабеков барча омборларга ёнғин хавфсизлиги ва сигнализация тизими ўрнатилган бўлиб, улардаги мавжуд совуқликни таъминлаб бериш тизимлари замонавий генераторлар ва стабилизаторларга уланганини айтди.

Айтилишича, барча омборлар вакциналарни юклаш-тушириш ускуналари, автокаралар ва махсус кийимлар билан таъминланди. Бундан ташқари, ҳудудларга жами 4000 ҳарорат индикатори ва 5000 музлатиш индикатори тарқатилди, эҳтиёт қисмлари заҳираси яратилиб, мавжуд омборлар ихтиёрига ўтказилди.

Аввалроқ Ўзбекистонда коронавирусга қарши эмалаш март ойининг ўрталаридан бошланиши эълон қилинган эди. Аммо 23 февралга келиб, Озодлик боғланган бирорта масъул ташкилот, эмлаш қачон бошланади ва 4 миллион доза вакцина қаердан олиб келинади, деган саволларга аниқ жавоб беролмади.

Сардоба тошқинидан жабрланганларга ажратилган озиқ-овқатни сотиб юборган фирибгар қамалди

Сардоба тошқинида вайрон бўлган аҳоли пункти, 2 май, 2020, Сардоба, Сирдарё.

Сардоба сув омбори ўпирилиши ортидан уйсиз қолган аҳолига берилиши шарт бўлган озиқ-овқат маҳсулотларини ноқонуний равишда сотиб юборган шахс суд ҳукми билан 3,5 йилга қамалди.

“Сирдарё хабарлари” нашрининг хабар беришича, муқаддам фирибгарликда айбланиб судланган М.П., сув тошқинидан сўнг Сардоба туманидаги мактабларга эвакуация қилинган аҳолига ёрдам берувчи кўнгиллилар қаторига қўшилган. У ўзини “Қизил ярим ой” жамиятининг Сардоба тумани бўлимининг биринчи ўринбосари сифатида таништирган.

Шундан сўнг у “Қизил ярим ой” номидан сохта талабнома тўлдириб, умумий қиймати 15 миллион 154 миллион сўм бўлган 15 турдаги озиқ-овқат маҳсулотларини олган ва сотиб юборган.

Ҳуқуқ-тартибот тузимлалари ўтказган махсус амалиёт пайтда М.П., қўлга олинди. Унга нисбатан Жиноят кодексининг 168-моддаси (фирибгарлик) 3-қисми «б» банди ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 1-қисми билан жиноят иши қўзгатилган.

Сирдарё вилоятидаги Сардоба сув омбори тўғони 2020 йил 1 май куни ўпирилиб, Сардоба, Оқолтин ва Мирзаобод туманларида юзлаб аҳоли усиз қолган, экин майдонлари вайрон бўлган эди. Ўшанда 22 та қишлоқдан 60 мингдан ортиқ аҳоли эвакуация қилинган.

Ташқи ишлар вазири Абдулазиз Комилов Афғонистон президенти қабулида бўлди

Ўзбекистон ташқи ишлар вазири А. Комилов 2018 йил августидаги Кобул сафари чоғида ҳам президент А. Ғани қабулида бўлганди

Ўзбекистон Ташқи ишлар вазири Абдулазиз Комилов Кобулга ташрифи доирасида 23 февраль куни Афғонистон президенти Ашраф Ғани томонидан қабул қилинган.

ТИВ матбуот хизмати маълумотига кўра, вазир Комилов Афғонистон президентига ўзбекистонлик ҳамкасби Шавкат Мирзиёевнинг мактубини топширган.

Қабул чоғида Ўзбекистон-Афғонистон кўп қиррали муносабатларининг ҳозирги ҳолати ва истиқболлари муҳокама қилинган.

Президент Ашраф Ғани афғон халқи номидан Афғонистон заминида тинчлик ва барқарорликни таъминлаш, мамлакат иқтисодиётини тиклашда ҳар томонлама қўллаб-қувватлаётгани учун Ўзбекистон президентига миннатдорлик изҳор этган.

Мулоқот пайтида афғонлараро сиёсий музокараларнинг узоқ муддатли тинчлик ўрнатиш ва мамлакатда хавфсизликни таъминлашдаги муҳим ўрни ҳам қайд этилган.

Ташқи ишлар вазири А. Комилов 17 ва 18 февраль кунлари Ўзбекистонга қўшни бўлган Туркманистон, Қозоғистон ва Тожикистонга сафар қилиб, мазкур мамлакатлар президентлари қабули бўлгани ҳақида Озодлик аввалроқ хабар қилган.

Вазир Комилов 23 февраль куни Кобулда афғонистонлик ҳамкасби Ҳаниф Атмар билан ҳам учрашган.

“Учрашувда Ўзбекистон-Афғонистон конструктив ҳамкорлигининг долзарб масалалари, жумладан, сиёсат, хавфсизлик, савдо, инвестиция ва бошқа соҳалардаги ўзаро муносабатлар муҳокама қилинди”, дейилган ТИВ хабарномасида.

Мулоқотда томонлар халқаро ва минтақавий кун тартибининг бошқа масалалари бўйича ҳам фикр алмашганлар.

Мирзиёевнинг Наманганга сафари ортидан шаҳар ҳокими ва прокурори алмашди

Наманган шаҳрининг янги ҳокими Ғофир Жамолов

Халқ депутатлари Наманган шаҳар кенгашининг 23 февраль куни бўлиб ўтган навбатдан ташқари сессиясида Наманган шаҳри ҳокими Олимжон Исаев ишдан олиниб, унинг ўрнига Ғофир Жамолов тайинланган.

Наманган вилояти ҳокимлиги матбуот хизмати маълумотига кўра, 46 ёшли янги ҳоким 1997 йили Наманган саноат-технология институтини, 2006 йилда эса Ўзбекистон президенти ҳузуридаги Давлат ва жамият қурилиши академиясини тамомлаган.

Ғ. Жамолов 1997-2009 йиллар давомида Наманган шаҳри ва Наманган вилояти ҳокимликларида турли масъул лавозимларда ишлаб, 2009 йилдан 2020 йилгача Иқтисодиёт вазирлиги бош мутахассиси, бўлим бошлиғи, Уй-жой, коммунал хизмат вазирининг ўринбосари ўлароқ фаолият юритган. 2020 йилдан шу кунга қадар эса у Тошкент шаҳар ҳокимининг ўринбосари — уй-жой коммунал хизмат кўрсатиш бош бошқармаси бошлиғи вазифасида ишлаётган эди.

Душанба куни бўлиб ўтган сессияда депутатларга Наманган шаҳрининг янги прокурори ҳам таништирилган. Қайд этилишича, лавозимидан озод қилинган Баҳромжон Йўлдошев ўрнини 39 ёшли Хуршид Одилов эгаллаган.

2004 йилда Тошкент давлат юридик институтини тамомлаган Х. Одилов 2004-2018 йилларда Пахтаобод ва Асака туманлари прокуратураси, Андижон вилоят прокуратурасида фаолият юритган, Улуғнор тумани прокурори бўлган. 2018 йилдан шу кунга қадар эса у Наманган вилоятининг Чуст тумани прокурори лавозимида ишлаб келаётганди.

Эслатиб ўтамиз, ўтган ҳафта президент Ш. Мирзиёев Наманганга сафари чоғида шаҳардаги “Бунёдкор” маҳалласига ташриф буюриб, ўша ердаги ҳолатни танқид қилганди. Танқид ортидан Наманган вилояти ҳокими Шавкат Абдураззоқов мазкур маҳаллага кўчиб боришини айтган.

Вилоят ҳокими Ш. Абдураззоқов иштирокида 23 февраль куни бўлиб ўтган Халқ депутатлари Уйчи туман кенгашининг навбатдан ташқари сессиясида шу пайтгача Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги бошлиғи лавозимида ишлаб келаётган Муҳаммадзокир Маматхонов туман ҳокими этиб тайинланган.

Аввалги ҳоким Муҳаммадаюбхўжа Апақов ҳам президент Мирзиёевнинг Наманган вилоятига сафари чоғида ишдан олинганди.

Бу орада 23 февраль куни Наманганда ўтказилган фаоллар йиғилишида шу кунга қадар вилоят касаба уюшмалари ташкилотлари бирлашмаси раиси бўлиб ишлаб келган Шуҳрат Мусаев вилоят ҳокимининг ўринбосари — Маҳалла ва оилани қўллаб-қувватлаш бошқармаси бошлиғи этиб тайинланган.

Тошкентда вакцина ташишга мўлжалланган махсус автомобиллар автоҳалокатга йўлиқди

UNICEF томонидан 23 февраль куни Ўзбекистон Соғлиқни сақлаш вазирлигига топширилган махсус автомобиллар (ССВ фотоси)

Жорий йилнинг 23 февраль куни соат 11:30 ларда Тошкентдаги Нукус ва Амир Темур кўчалари кесишган чорраҳа яқинида Соғлиқни сақлаш вазирлиги томонидан ҳудудий бошқармаларга фойдаланиш учун топширилиб, олиб кетилаётган “Changan” автомобиллари иштирокида йўл-транспорт ҳодисаси содир бўлган.

Ўзбекистон Ички ишлар вазирлиги Йўл ҳаракати хавфсизлиги бош бошқармаси ахборот хизматининг маълумотига кўра, ҳодисага автомобиль ҳайдовчиларидан бири кескин тормоз босиши сабаб бўлган. Натижада 2 та автомобиль техник шикастланган, айни пайтда ҳодиса чоғида ҳеч ким тан жароҳати олган эмас.

“Мазкур ҳодиса юзасидан Тошкент шаҳар ИИББ ЙҲХБ томонидан суриштирув ишлари олиб борилиб, ҳодиса содир бўлиш сабабларига ойдинлик киритилмоқда”, дейилган хабарномада.

Озодлик 23 февраль куни БМТнинг Болалар жамғармаси Тошкентдаги “Миллий” стадионида Санитария-эпидемиологик осойишталик ва жамоат саломатлиги хизмати учун 17 та музлаткичли юк машинаси ва 206 та Miniven-Labo автомобилларини топширгани, тақдим этилган транспорт воситаларининг умумий қиймати 2 миллион АҚШ долларини ташкил этиши ҳақида хабар қилганди. Тошкентда шу куннинг ўзида содир бўлган ЙТҲдан кейин бу автомобиллардан камида иккитаси бир муддат ишга ярамаслиги мумкин.

ШҲТнинг 2022 йилдаги саммитини Самарқандда ўтказиш бўйича фармойиш имзоланди

Самарқанд

Ўзбекистон президенти Ш. Мирзиёев 23 февраль куни “2022 йилда Самарқанд шаҳрида ўтказиладиган Шанхай ҳамкорлик ташкилоти саммитига тайёргарлик кўриш чора-тадбирлари тўғрисида”ги фармойишни имзолади.

Ҳужжатга мувофиқ, 2022 йилда Самарқанд шаҳрида ўтказиладиган ШҲТ саммитига тайёргарлик кўриш бўйича Республика ташкилий комиссияси таркиби ҳамда Саммит тадбирларини ўтказиш бўйича босқичли иш режаси тасдиқланган.

Қайд этилишича, Самарқанддаги саммит олдидан махсус веб-сайт фаолияти йўлга қўйилиб, ўтказилган тадбирлар бўйича Ўзбекистоннинг ШҲТдаги раислигига оид тегишли маълумотлар билан тўлдириб борилади.

Шанхай ҳамкорлик ташкилотига Қозоғистон, Хитой, Қирғизистон, Россия, Тожикистон, Ўзбекистон, Ҳиндистон ва Покистон аъзо бўлиб, Афғонистон, Беларус, Эрон ва Монголия ташкилотда кузатувчи давлат мақомига эгадир.

Ўзбекистоннинг собиқ ташқи ишлар вазири Владимир Норов 2018 йил июнида ШҲТ Бош котиби лавозимига тайинланган эди.

Ҳукуматнинг аҳоли ҳаётига таъсир қилмаётган 2000 га яқин қарори ўз кучини йўқотди

Ўзбекистонда куни кеча Вазирлар Маҳкамасининг 2000 га яқин ҳужжати ўз кучини йўқотишни назарда тутувчи ҳукумат қарори қабул қилинган.

Адлия вазирлиги матбуот хизмати маълумотига кўра, мамлакатда бир масала юзасидан бир нечта ҳужжатларнинг мавжудлиги фуқаролар ҳаёти ва тадбиркорлар фаолиятида қатор муаммоларни келтириб чиқаряпти.

Вазирлик мазкур ҳужжатнинг қабул қилинишини бир неча сабаб билан изоҳлаган:

биринчидан, фуқаролар ва тадбиркорлар муайян масала бўйича айнан қайси ҳужжатга амал қилиши кераклиги юзасидан саволларни туғдирмоқда, натижада масалани тушуниш ва унга ҳуқуқий ечим топиш учун юзлаб ҳужжатларни кўриб чиқишга тўғри келмоқда;

иккинчидан, ҳуқуқий ахборотдан фойдаланишда ва ҳуқуқшунос хизматлари билан боғлиқ сарф-харажатларнинг ортишига сабаб бўлмоқда;

учинчидан, ҳужжатлар ўртасида зиддиятлар, такрорланишларни келтириб чиқармоқда ва натижада ҳужжатларни амалиётда қўлланилишида қийинчиликлар келиб чиқмоқда.

Бу каби муаммоларнинг долзарблигини инобатга олган ҳолда Адлия вазирлиги томонидан барча соҳаларда қонунчиликни тизимлаштириш орқали қонунчилик базасини қисқартириш ёки бошқа сўз билан айтганда кесиб ташлаш (“тартибга солувчи гильотина” усули орқали) ишлари самарали йўлга қўйилган”, дейилган вазирлик хабарномасида.

Шулардан келиб чиққан ҳолда, Адлия вазирлигининг таклифлари асосида ўтган йили ҳам 500 га яқин ҳужжатни бекор қилишни назарда тутувчи президент фармони қабул қилинганди.

Қашқадарёда халқ таълими бўлими бошлиғи ҳибсга олинди

ХТБ мудирига нисбатан ЖКнинг 210-моддаси (Пора олиш) 2-қисми билан жиноят иши қўзғатилган.

23 февраль куни Ўзбекистон Республикаси ДХХ Қашқадарё вилояти бошқармаси томонидан ўтказилган тезкор тадбир жараёнида Косон тумани халқ таълими бўлими мудири Соип Давидов ҳибсга олинди.

Бу ҳақда Озодликка Ўзбекистон инсон ҳуқуқлари мустақил ташкилоти вакили Шукурулло Парпиев хабар қилди.

Маълум бўлишича, шу йилнинг 15 февралида фуқаро Шавкат Қўшматов Косон тумани ХТБ мудирига туман мактабларидан бирига директор бўлиш эвазига 200 АҚШ доллари миқдорида пора берган.

Халқ таълими бўлими мудири ўзига боғлиқ бўлмаган ҳолатда ишни бажара олмагач, 200 АҚШ доллар миқдоридаги порани 23 февраль куни сўм эквивалентида фуқарога қайтариш чоғида ушланган.

Косон тумани прокуратурасига кўра, ХТБ мудирига нисбатан Ўзбекистон Республикаси ЖКнинг 210-моддаси (Пора олиш) 2-қисми билан жиноят иши қўзғатилган.

Тергов ҳаракатлари бошланган, гумонланувчи эҳтиёт чораси сифатида гаров эвазига очиқда қолмоқда.

Озодлик радиоси 22 январда Қашқадарё вилояти халқ таълими бошқармаси ўқитувчилардан Ислом Каримов бюсти учун мажбуран пул йиғаётгани тўғрисида мақола эълон қилган эди.

Қонунга хилоф бўлган диний материалларни сақлаганлик учун қамоқ жазоси бекор қилиниши кутилмоқда

Журналистнинг қонуний фаолиятига тўсқинлик қилиш эса жиноий жавобгарликка киритилди.

Ўзбекистон Жиноят кодексининг янги таҳририда диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш жиноят қонунчилигидан чиқарилиши кутилмоқда.

Бундан ташқари янги таҳрирга асосан рақобатчини обрўсизлантириш, рақобат тўғрисидаги қонун ҳужжатларини ва табиий монополиялар тўғрисидаги қонун ҳужжатларини бузиш, савдо ёки хизмат кўрсатиш қоидаларини бузиш, сохта тадбиркорлик, жазони ижро этиш муассасаси маъмуриятининг қонуний талабларига бўйсунмасли,️ ҳарбий ёки муқобил хизматдан бўйин товлаш, диний таълимотдан сабоқ бериш тартибини бузиш ҳам жиноят ҳисобланмайди.

Айни пайтда Жиноят кодексининг янги таҳририда инсонда ноқонуний тажриба ўтказиш, ғайриқонуний равишда психиатрия муассасасига жойлаштириш, ўзбошимчалик билан жазолаш, митинглар, йиғилишлар ёки намойишлар ташкил этиш, ўтказишга ёки уларда иштирок этишга ғайриқонуний қаршилик қилиш,
шантаж, инсайдерлик маълумотлари бўйича ғайриқонуний ҳаракатларни амалга ошириш, нодавлат тижорат ташкилоти ёки бошқа нодавлат ташкилоти мансабдор шахсининг мансаб сохтакорлиги, ота ёки онанинг ўз чақалоғини сотиши, журналистнинг қонуний фаолиятига тўсқинлик қилиш учун жиноий жавобгарлик белгиланади.

Жиноят кодексининг янги таҳрирдаги лойиҳаси Бош прокуратура томонидан тегишли вазирлик ва идоралар билан биргаликда ишлаб чиқилди ҳамда жамоатчилик муҳокамаси учун эълон қилинди.

Davletovuz: Жиззахда 14 миллиард сўмлик лойиҳани амалга ошираётган Россия ширкати вилоят ҳокимининг қариндошига тегишли

Жиззах манзараси.

Жиззах вилоятида 14 миллиард сўмлик инвестиция лойиҳаларини амалга ошираётган Россиянинг AAA INVESTMENT COMPANY ширкати тўлиғича жисмоний шахс Салиев Элбек Эргашевичга тегишли.

Телеграмдаги Davletovuz каналининг очиқ манбаларга таяниб билдиришича, AAA INVESTMENT COMPANY Россияда 2018 йил 20 февралда 1 миллион рубллик устав фонди билан рўйхатдан ўтган. Ўша йилнинг март ойида мазкур ширкат таъсислигида Ўзбекистонда AAA COMPANY МЧЖ қўшма корхонаси ташкил этилган.

“AAA INVESTMENT COMPANY a.k.a Салиев Шавкат Алибекович, шунингдек, Салиев Элбек Эргашевич билан 2018 йил апрелида 90/10 улушда METAN KOREA МЧЖ қўшма корхонасини ҳам очишган. Афтидан амаки-жияннинг бизнес ҳамкорлиги узоқ даврларга бориб тақалади. Улар 2011 йилда Фориш туманида FISH CO МЧЖ қўшма корхонасини 99,5%/05% улушида очишган”,-деб ёзади блогер.

AAA COMPANY МЧЖ қўшма корхонаси Дуоба қишлоқ фуқаролар йиғини ҳудудида Туристик даволаш-соғломлаштириш мажмуаси ташкил этиши керак.
Davletovuz каналида таъкидланишича, мажмуа қиймати 14 миллиард сўм бўлиб, 7 миллиард компания ҳисобидан, 5 миллиард сўми Миллий банк кредитлари ҳисобидан, 200 минг долларлик чет эл инвестицияси ҳисобидан амалга оширилиши керак.

“Мазкур корхона томонидан Шароф Рашидов тумани, Учтепа қишлоқ фуқаролар йиғинида умумий қиймати 13 миллиард сўм бўлган лойиҳа амалга оширилган. ОАВда эълон қилинган реклама материалидан маълум бўлишича, Миллийбанк томонидан ажратилган кредит маблағи эвазига боулинг маркази ва 3D кинотеатр қурилиб, зарур жиҳозлар харид қилинган. 3D кинотеатр 2 та залдан иборат бўлиб, ҳар бири 50 та томошабинни ўз ичига олади”,-дейилади хабарда.

Маълум қилинишича, Салиев Элбек Эргашевич турар жой биноларини қуриш билан шуғулланадиган RISER SUN МЧЖнинг ҳам чорак улушига эгалик қилади.

Жиззах вилоятининг амалдаги ҳокими Салиев Эргаш Алибековичдир.

UNICEF коронавирусга қарши эмлаш тадбирлари учун ССВга 223 та махсус машинани топширди

UNICEF томонидан Ўзбекистон Соғлиқни сақлаш вазирлигига топширилган махсус автомобиллар (ССВ фотоси)

Ўзбекистон CОVID-19 га қарши эмлашни амалга оширишга тайёргарлик кўраётгани сабабли БМТнинг Болалар жамғармаси 23 февраль куни Тошкентдаги “Миллий” стадионида Санитария-эпидемиологик осойишталик ва жамоат саломатлиги хизмати учун 17 та музлаткичли юк машинаси ва 206 та Miniven-Labo автомобилларини топширган. Бу ҳақда Соғлиқни сақлаш вазирлиги жамоатчилик билан алоқалар бўлими маълумот тарқатди.

Қайд этилишича, тақдим этилган транспорт воситаларининг умумий қиймати 2 миллион АҚШ долларини ташкил этади. Ушбу маблағ Вакциналар ва иммунизация бўйича глобал альянси (GAVI) томонидан соғлиқни сақлаш тизимини мукамаллаштириш доирасида ажратилган.

Автомобилларни топшириш чоғида сўзга чиққан масъуллар таъкидича, вакциналарни маълум бир ҳароратни сақлаган ҳолда ташиш жуда муҳим. Бунинг учун махсус автомобилларнинг топширилиши эса совуқлик занжири ва логистика инфратузилмасини янада мустаҳкамлаш ҳамда вакциналарни мамлакат бўйлаб хавфсиз ва тезкор ташишга ҳисса қўшади.

Ўзбекистонда COVID-19 га қарши эмлаш жараёни шу йил март ойининг биринчи ярмида бошланиши режалаштирилгани ҳақида Озодлик аввалроқ хабар қилган.

Давомини ўқинг

XS
SM
MD
LG