Линклар

Шошилинч хабар
18 май 2021, Тошкент вақти: 17:25

Ўзбекистон хабарлари

Алишер Усмонов $100 миллион ажратган Тошкентдаги Ислом цивилизация марказида ëнғин чиқди (ВИДЕО)

Ўтган йил июнь ойида Шавкат Мирзиëев марказ қурилишини бориб кўрган эди.

Тошкент шаҳар Ëнғин хавфсизлиги хизмати бошқармаси 5 декабрь куни тушдан кейин янги қурилаëтган Ислом цивилизация марказида ëнғин чиққанини тасдиқлади.

Бошқарма баëнотига кўра¸ “соат 16:38 да, Олмазор тумани, Зарқайнар 1-тор кўчасида жойлашган янги қурилаётган Ислом цивилизация маркази ҳудудида 150 кв.м. майдонида теплоизоляция (пенопласт) маҳсулотлари ёнган”.

Расмий баëнотдан тушунилишича¸ ëнғин оқибатида янги қурилаётган бинога зарар етмаган.

Ёнғин ўчириш жанговар бўлинмалари чақирилган манзилга соат 16:44да етиб борган ва кўрилган тезкор чора ва ҳаракатлар натижасида ёнғин соат 16:54да қуршаб олиниб, соат 17:06да ўчирилган”¸ дейилади бошқарма хабарида.

Тошкент ислом цивилизация маркази бош ҳомийси асли наманганлик миллиардер Алишер Усмоновдир.

Ўтган йил Forbes журнали мухбири билан суҳбатда Усмонов бу марказ қурилишига “аллақачон 100 миллион доллар ëтқизганини” айтган эди.

Кун янгиликлари

Андижонда ер сотилишига ва прокурорга қарши чиққан депутат даҳлсизликдан маҳрум қилинди

Андижонлик депутатнинг сессия пайтида тинтув қилиниши иддао қилинган сурат. Олий Мажлис депутати Расул Кушербаевнинг телеграм каналидан олиди.

“Андижонда ер сотувчиларнинг кирдикорларини фош қилиб юрган депутат прокурор тақдимномасига кўра дахлсизлик ҳуқуқидан маҳрум қилинди”, деб ёзди ўз телеграм каналида Олий Мажлис депутати Расул Кушербаев.

Унга кўра, ҳуқуқ-тартибот органлари депутат дахлсизлиги тўғрисидаги қонун меъёрига амал қилмаган ҳолда Халқ депутатлари Андижон шаҳар кенгашининг навбатдаги сессиясида бир гуруҳ депутатлар тинтувдан ўтказган. Шундан сўнг сессия иштирокчилари ер сотилишини фош этган депутатни прокурор тақдимномаси асосида дахлсизлик ҳуқуқидан маҳрум қилишган.

“Катта эҳтимол билан депутатларни дахлсизлик ҳуқуқигаям тупуриб тинтув ўтказишга топшириқ берганлар ер сотиш ишларига дахлдор ва депутатни дахлсизлик ҳуқуқидан маҳрум қилиб қамашга иштиёқманд "ўша" шахслар бўлиши керак”,-деб ёзди Расул Кушербаев.

Human.uz нашри эса бу воқеа юзасидан ҳуқуқшунос Сайдали Мухторалиевнинг мақоласини эълон қилди. Мақолада даҳлсизликдан маҳрум қилинган депутатнинг исми Ш.Каримов экани айтилади.

Ўз мақоласида ҳуқуқшунос “Сессия кун тартибига ягона масала ҳокимнинг ноқонуний қарорларига қарши чиқаётган ва Андижон шаҳар прокурорини аттестациядан ўтказишни талаб қилган депутатни дахлсизлик ҳуқуқдан маҳрум қилиш эди”,-деган иддаони олға сурди.

Сайдали Мухторалиевнинг ёзишича, Халқ депутатлари Андижон шаҳар кенгашининг 17 май куни ўтган сессиясига депутат Ш.Каримовни даҳлсизлик мақомидан маҳрум қилиш тақдимномасини Aндижон шаҳар прокурори киритган.

Ҳуқуқшуносга кўра, депутат Ш. Каримов Андижон шаҳар прокурорини аттестациядан ўтказилишини талаб қилиб келган.

Фарғонада беш киши устига автомашина ҳайдаб, уч кишини ўлдирган шахсга суд ҳукми ўқилди

Иллюстратив сурат.

Фарғона вилоятининг Жиноят ишлари бўйича Тошлоқ туман судида жорий йил 17 май куни беш кишининг устига “қасддан автомашина” ҳайдаган шахсга ҳукм ўқилди.

ЎзАнинг билдиришича, судланувчи А.З., ҳайдовчи бу ишни қас 2020 йилнинг 7 ноябрида Маtiz машинасини Қува тумани “Иттифоқ” маҳалласида яшовчи беш киши устига ҳайдаган. Айблов хулосасида ҳайдовчи бу ишни “қасддан амалга оширгани” қайд этилган.

Натижада 5 кишидан уч нафари воқеа жойида вафот этган, 2 киши эса турли даражадаги тан жароҳатларини олган.

“Суднинг ҳукмига кўра, А.З., Ўзбекистон Республикаси Жиноят кодексининг 25,97-моддаси 2-қисмининг “а”, 97-моддаси 2-қисмининг “а” банди ва 109-моддасининг 2-қисмида назарда тутилган жиноятларни содир этганликда айбдор деб топилди. Унга ЖК 59-моддасининг 3-қисмига асосан ўташ учун узил-кесил 19 йил олти ой муддатга озодликдан маҳрум қилиш жазоси тайинланди”,-дейилади хабарда.

Ўзбекистонда коронавирусдан ўлганлар сони яна икки кишига кўпайди

Айни пайтда тиббиёт муассасаларида 3814 нафар бемор даволанмоқда.

Соғлиқни сақлаш вазирлигининг билдиришича, 17 май куни Ўзбекистонда яна икки киши коронавирусдан вафот этди. Бу билан касалликдан вафот этганлар сони 672 нафарни ташкил қилди.

Бундан ташқари 17 май куни 175 кишида коронавирус аниқланган ва вирусга чалинганлар сони 97068 нафарни ташкил этган.

Янги касалланиш ҳолатларининг 107 нафари Тошкент шаҳрида, 20 нафари Самарқанд вилоятида, 10 нафари Тошкент вилоятида аниқланган.

Касалликдан соғайганлар жами 92582 нафарга етди ва соғайиш кўрсаткичи 95 фоизни ташкил этмоқда. Айни пайтда тиббиёт муассасаларида 3814 нафар бемор даволанмоқда.

Тошкент ҳокими ўринбосари маҳалла раисини калтаклагани расман тасдиқланди

Маҳалла ва оилани қўллаб-қувватлаш вазирлиги Тошкент шаҳар ҳокими ўринбосари Бахтиёр Раҳмонов Тошкент вилояти Оққўрғон тумани “Уста Нормат” маҳалла фуқаролар йиғини раисини ҳақорат қилгани ва уни калтаклагани тўғрисида ижтимоий тармоларда тарқалган маълумотни тасдиқлади.

Вазирликнинг билдиришича, “Уста Нормат” маҳалла фуқаролар йиғини раиси Алишер Икромов 9 май куни Тошкент шаҳар ҳокими ўринбосарининг отаси яшайдиган Деҳқонобод кўчасидаги уйга чақиртирилган. Уни мазкур хонадонга Бахтиёр Раҳмонов шахсан ўзи чақиртирган.

“У бу ерда ўзининг хизмат вазифасига алоқадор бўлмаган, умуман бошқа бир масаланинг бажарилмаганлиги бўйича Б.Раҳмонов томонидан турли ножўя сўзлар билан ҳақоратланади, ҳатто унга нисбатан жисмоний куч ишлатилади”, -дейилади Маҳалла ва оилани қўллаб-қувватлаш вазирлиги расмий баёнотида.

Мазкур ҳолат Маҳалла ва оилани қўллаб-қувватлаш вазири назоратига олинган ҳамда Вазирлик Ишчи гуруҳи томонидан воқеа тафсилотлари батафсил ўрганилмоқда.

Хитойдан Тошкентга яна миллион доза вакцина олиб келинди

Хитойнинг Zhifei Longcom Biopharmaceutical Co. Ltd ширкати томонидан ўзбекистонлик мутахассислар билан ҳаммуаллифликда яратилган ZF-UZ-VAC2001 вакцинасидан 18 май куни Тошкентга яна 1 миллион доза олиб келинган. Бу ҳақда Соғлиқни сақлаш вазирлиги матбуот хизмати маълум қилди.

Шу йилнинг 27 март ва 27 апрель кунлари ҳам Хитойдан Ўзбекистонга 1 миллион дозадан вакцина келтирилганди. Айни пайтда мамлакатга март ойида Британияда ишлаб чиқарилган AstraZeneca вакцинасидан 660 минг доза, апрель ойида эса Россияда ишлаб чиқарилган "Спутник V" вакцинасидан 100 минг доза олиб келинган.

Шу тариқа Ўзбекистоннинг вакцина захираси 3 миллион 760 минг дозага етган. ССВ қайдича, айни пайтгача фойдаланилган 1 миллион 346 минг дозадан ортиқ вакцинанинг 62 фоизи, яъни 842 минг дозадан ортиғини ZF-UZ-VAC2001 вакцинаси ташкил қилмоқда.

“Шундан айни пайтгача 91 минг нафардан ортиқ юртдошимиз ўзбек-хитой вакцинасининг 2-босқичи билан ҳам эмланган”, дейилган вазирлик хабарномасида.

Ўзбекистонда аҳолини коронавирусга қарши эмлаш тадбирлари 1 апрелдан бошланган. Эмловда ZF-UZ-VAC2001 ҳамда AstraZeneca вакцинаси қўлланилган. 28 апрелдан эса ўзбекистонликлар “Спутник V” вакцинаси билан ҳам эмланмоқда.

Сурхондарё вилояти ҳокимлиги Расул Кушербаевни депутатлик одобига зид хатти-ҳаракатда айблади

Сурхондарё вилояти ҳокимлиги вакиллари фикрича, депутат Р. Кушербаев (суратда) вилоят ҳокими Т. Боболовга асоссиз айблов қўйган

Олий Мажлис Қонунчилик палатаси депутати Расул Кушербаев Human.uz ахборот порталининг “Сўз блогерларга” кўрсатувида Сурхондарё вилоят ҳокимига нисбатан “мавҳум айблов” қўйиб, депутатлик этикасини тескари иш тутган. Бу ҳақда Сурхондарё вилояти ҳокимлиги матбуот хизмати томонидан 17 май куни тарқатилган расмий муносабатда билдирилган.

Хабарномада қайд этилишича, Р.Кушербаев мазкур кўрсатувда Отабек Сатторий ва унинг суд жараёни ҳақида сўз юритаркан, “Сурхондарё вилояти ҳокимига шу масалада алангали салом, деб қўймоқчи эдим. Отабек Сатторийнинг қандай жигарлари, фарзандлари бўлса, у кишининг ҳам худди шундай яқинлари бор. Бу дунё қайтар дунё эканлигини унутмаслик керак. Буни нима учун айтаётганимни у киши жуда яхши билиб турибдилар, менимча. Қолганларга ҳам инсоф берсин”, дея таъкидлаган.

“Бу билан депутат Р. Кушербаев оммавий ахборот воситасидаги ўз чиқишида Сурхондарё вилояти ҳокимига нисбатан “У кишининг ҳам худди шундай яқинлари бор, қайтар дунё бу” дея мавҳум айблов қўйиб, томошабинларда гўёки, блогер О.Сатторийнинг суд ишига вилоят ҳокими алоқадордек фикр уйғотди”, дейилган Сурхондарё вилояти ҳокимлиги хабарномасида.

Ҳокимлик вакиллари депутат томонидан Сурхондарё вилояти ҳокимига нисбатан қўйилаётган бу асоссиз айблов депутатлик одоби қоидаларига мутлақо тўғри келмайди, деган фикрдалар.

Хабарномада вилоят ҳокимлиги томонидан блогер Отабек Сатторийга қарши ҳеч қандай ҳаракат амалга оширилмагани, вилоят ҳокимлигининг ушбу ишга алоқаси йўқлиги боис суд жараёнида ҳокимлик ҳатто гувоҳ сифатида ҳам чақирилмагани иддао қилинган.

“Қолаверса, одил судлов фақат суд органлари томонидан амалга оширилади. Маҳаллий давлат ҳокимияти органлари ўзларига қонун билан белгилаб берилган ваколатлардан фойдаланган ҳолда иш юритади, суд органларининг ишларига аралашиш ҳокимлик ваколатига кирмайди”, дейилган ҳокимлик хабарномасида.

Маҳаллий расмийларни ўзининг “Халқ фикри” видеоблогида танқид қилгани билан танилган сурхондарёлик блогер Отабек Сатторий жиноят ишлари бўйича Музработ туман суди ҳукми билан шу йил 10 майида олти ярим йилга озодликдан маҳрум қилинганди.

Ҳукм ортидан Журналистларни ҳимоя қилиш қўмитаси (CPJ), Чегара билмас мухбирлар ва Human Rights Watch каби қатор халқаро ташкилотлар Ўзбекистон ҳукуматини блогер Отабек Сатторийни зудлик билан озод қилишга чақирган. Ташкилотларнинг ишонишича, блогер коррупцияга қарши курашгани ортидан сохталаштирилган жиноят иши асосида жазоланган.

Мирзиёев барча корхоналарда халқаро стандартларни жорий этиш бўйича кўрсатма берди

Ўзбекистон президенти Шавкат Мирзиёев

Ўзбекистон президенти Шавкат Мирзиёев мамлакатдаги халқаро талаблар билан уйғунлашмаган қолган 11 мингта миллий стандарт ўрнига халқаро стандартларни қабул қилиш ҳамда 2023 йилдан барча корхоналарни ушбу стандартларга ўтказиш бўйича кўрсатма берди. Президент матбуот хизмати маълумотига кўра, бу ҳақда Ш. Мирзиёев 17 май куни техник жиҳатдан тартибга солиш, стандартлаштириш, сертификатлаш ва метрология миллий тизимини такомиллаштириш чора-тадбирлари тақдимоти билан танишиш чоғида билдирган.

Қайд этилишича, президент “Ўзстандарт” агентлиги тизимидаги 20 та синов лабораторияси фаолиятини халқаро даражада ташкил этиб, биринчи навбатда озиқ-овқат, қишлоқ хўжалиги, электр техникаси, енгил саноат, гигиена ва парфюмерия маҳсулотлари ҳамда қурилиш материалларининг халқаро стандартларга мувофиқлигини баҳолашни йўлга қўйиш муҳимлигини таъкидлаган.

У Европа Иттифоқининг “GSP+” тизими доирасидаги имтиёзлардан кенг фойдаланиш учун корхоналарга халқаро сертификатлар олишда кўмаклашиш кераклигини қайд этган.

Шунингдек, давлат раҳбари томонидан Жаҳон савдо ташкилотининг Савдодаги техник тўсиқлар ҳамда Санитария ва фитосанитария чоралари тўғрисидаги битимлари нормаларидан келиб чиқиб, ушбу соҳаларга масъул идораларнинг ваколатларини аниқ белгилаш вазифаси қўйилган.

Жаҳон банки икки лойиҳа учун Ўзбекистонга 289 миллион долларлик имтиёзли кредит ажратди

“Ўзбекистонда сув таъминоти хизматлари секторини ривожлантириш ва уни институционал қўллаб-қувватлаш” лойиҳасини амалга ошириш учун Жаҳон банки томонидан 239 миллион АҚШ доллари миқдорида имтиёзли кредит, шунингдек, Швейцария давлат котибиятининг иқтисодий масалалар бўйича 7,8 миллион АҚШ доллари миқдоридаги гранти ажратилади.

Иқтисодий тараққиёт ва камбағалликни қисқартириш вазирлиги ахборот хизматига кўра, бунга оид битимни имзолаш маросими куни кеча Жаҳон банки ва Ўзбекистон ҳукумати расмийлари ўртасида Тошкентда бўлиб ўтган музокаралар якунида ўтказилган.

Зикр этилган лойиҳа доирасида, вазирлик қайдича, Ўзбекистоннинг учта ҳудудида 500 мингдан ортиқ киши сув таъминоти ва канализация хизматларидан янада сифатли фойдалана олади.

Тадбир чоғида “Ўзбекистонда миллий инновацион тизимни модернизация қилиш” лойиҳаси бўйича молиявий битимлар ҳам имзоланган. Лойиҳани амалга ошириш учун Жаҳон банки томонидан Ўзбекистонга 50 миллион АҚШ доллари миқдорида имтиёзли кредит ажратилади.

Бу лойиҳа ҳукуматга бозор иқтисодиёти шароитида ишлашга қодир бўлган миллий инновацион тизимни ривожлантиришга ёрдам беради. Бу илмий ва инновацион маҳсулотлар ва хизматларни илмий-тадқиқот ҳамда тажриба-конструкторлик ишланмалари ва тижоратлаштириш соҳасида давлат, илмий-тадқиқот ташкилотлари ва хусусий сектор ўртасидаги ҳамкорликни қўллаб-қувватлайди.

Андижонда келинчакнинг зўрланишига оид ҳодиса Сенат томонидан назоратга олинди

Андижон вилояти Андижон тумани “Қорақалпоқ” МФЙ ҳудудидаги Зарипак кўчасида жойлашган дала шийпонида беш нафар эркак 18 ёшли келиннинг зўрлаганига оид ҳодиса Олий Мажлис Сенатининг Хотин-қизлар ва гендер тенглик масалалари қўмитаси томонидан назоратга олинди. Бу ҳақда юқори палата матбуот хизмати маълумот тарқатди.

Қайд этилишича, 17 май куни Андижон вилояти Ички ишлар бошқармаси томонидан ўрнатилган тартибда қўмитага бу борада дастлабки маълумотлар тақдим этилган.

“Ҳозирда мазкур ҳолат юзасидан жиноят иши қўзғатилиб, Андижон вилояти ИИБ томонидан дастлабки тергов ҳаракатлари олиб борилмоқда”, дейилган Сенат хабарномасида.

Андижонда бир гуруҳ шахс томонидан дала шийпонида беш ой аввал турмушга чиққан келинчакнинг номусига тегиши ҳодисаси бўйича маҳаллий ҳуқуқ-тартибот идоралари Ўзбекистон Жиноят кодексининг 118-моддаси (номусга тегиш) 1-қисми билан жиноят иши қўзғатгани ҳақида Озодлик аввалроқ хабар қилган. Вилоят прокуратураси маълумотига кўра, мазкур жиноятни содир этишда 28 ёшдан 40 ёшгача бўлган 6 нафар фуқаро гумонланмоқда.

Судда 9 ёшли қизни “ўлдирганини қийноқлар остида тан олгани”ни айтган аёл оқланди

Аёл ўтган йилнинг 30 июлида қўлга олинган эди.

Асакада 9 ёшли қизни ўлдирганликда айбланаётган Асрорахон Ҳамдамова суд ҳукми билан оқлангани тўғрисида ўз манбаларига таянган ҳолда “Кун уз” хабар берди.

"Айбланувчи ўз кўрсатмасида ИИБ ходимлари унга руҳий ва жисмоний тазйиқлар ўтказгани, қийноқларга чидай олмай 9 ёшли гўдакни ўлдиришдек мудҳиш жиноятни бўйнига олишга мажбур бўлганини айтган”,-дейилади хабарда.

Озодлик радиоси 2020 йилнинг 2 июлида 23 яшар асакалик аëл Андижон вилоят, Асака туман Кужган МФЙ Мўдай маҳалласида содир бўлган қотилликда гумонланиб 1 июль куни қамоққа олингани ҳақида мақола эълон қилган эди.

Ўшанда Озодлик билан суҳбатда гумонланувчининг яқинлари¸ 3 ойлик чақалоқнинг онаси бўлган ëш аëл¸ қаттиқ босим ва қўрқитиш орқали “иқрор” ҳақидаги хатга қўл қўйиб бергани ва қотилликни ëш она содир қилганига ишонмаслигини билдирганди.

Асакада 2020 йилнинг 21 июнь куни 9 яшар қиз жасади ўз уйида қонга беланган ҳолда топилгани, унга пичоқ билан 16та зарба берилгани хабар қилинган.

Суд жараёнида экспертларнинг қизча ўлдирилишидан олдин зўрланганини, қиз ўлдирилган хонада 4 нафар номаълум шахснинг бармоқ излари топилганини, аммо бу бармоқ изларидан бирортаси судланувчига тегишли эмаслиги тўғрисидаги далиллари эътиборга олинган.

“А.Ҳамдамова Ўзбекистон Республикаси ЖК 168-моддаси 1-қисми (фирибгарлик) билан айбли деб топилиб, 2 йил озодликни чеклаш жазоси тайинланиб, унга қўлланилган қамоқ эҳтиёт чораси бекор қилинган ва суд залида қамоқдан озод этилган”,-дейилади “Кун уз” хабарида

Айни пайтда суд аёлни қотилликда айблаб, унга нисбатан “асосиз равишда жиноят иши очган” ички ишлар ходимларига нисбатан қандай ажрим чиқаргани тўғрисида маълумот йўқ.

“Ўзбекистон темир йўллари” уч ойда деярли юз миллиард сўм зарар кўрганини билдирди

2020 йилнинг 1-чорагида ширкатнинг зарари бундан 10 миллиард сўмга кўпроқ бўлган.

“Ўзбекистон темир йўллари” 2021 йилнинг 1-чорагида 95,6 миллиард сўм зарар кўргани ҳақида ширкатнинг чорак якунлари бўйича Корпоратив ахборот ягона порталида эълон қилинган ҳисоботида қайд этилди.

Spot нашрининг маълум қилишича, бу маълумот ширкатнинг молиявий вазияти анча яхшиланганини англатади. Чунки 2020 йилнинг 1-чорагида ширкатнинг зарари бундан 10 миллиард сўмга кўпроқ бўлган.

Айни пайтда “Ўзбекистон темир йўллари”нинг 2021 йилнинг 1-чорагидаги ялпи 1,6 триллион сўм миқдорида тушум олган, соф тушум эса 2,3 триллион сўмни ташкил қилди.

Ширкатнинг ҳаражатлари ўтган йилги 227,5 миллиарддан 297,6 миллиардга етган. Асосий фаолиятдан даромад 671,9 миллиард сўмдан 512 миллиард сўмга тушиб қолган.

Шундан келиб чиққан ҳолда ширкат тўлаган солиқлар миқдори ҳам камайган. Масалан, 2020 йилнинг 1-чорагида “Ўзбекистон темир йўллари” 22,6 миллиард сўм солиқ тўлаган бўлса, 2021 йилнинг биринчи уч ойи учун тўланган солиқ миқдори 21,2 миллиард сўм бўлган.

Ўзбекистон Қуддусдаги вазиятга ўз расмий муносабатини билдирди

Исроил бомбардимонидан сўнг Ғазода қутқарувчилар ва аҳоли вайроналар остидан тирик қолганларни қидирмоқда. 2021 йил, 16 май.

Ўзбекистон Шарқий Қуддусдаги вазиятнинг кескин тус олишидан қаттиқ хавотирда. “Дарё” нашрининг хабар беришича, бу ҳақда 17 май куни Тошкентда ўтган брифингда президент матбуот котиби Шерзод Асадов маълум қилди.

Расмий Қуддусдаги вазиятга Ўзбекистоннинг позициясини билдирар экан, Тошкент томонларни зўравонликларга чек қўйиш, қон тўкилишини дарҳол тўхтатишга чақиришини айтди.

“Бундан ташқари, Қуддусдаги ал-Ақсо масжиди ва бошқа қадамжолар урушдан аввалги ҳолат қайтарилиши керак деб ҳисоблаймиз. Ва албатта, Фаластин—Исроил муаммоси халқаро меъёрий-ҳуқуқий ҳужжатлар, хусусан, БМТнинг тегишли резолюциялари ва биз кўп йиллардан бери қўллаб-қувватлаб келаётган ‘икки халқ учун икки давлат’ тамойили асосида ечилиши керак деб ҳисоблаймиз”, — деб иқтибос келтирди президент матбуот котиби сўзларидан нашр.

"Газета.uz"нинг ёзишича, брифингда Шерзод Асадов президент Шавкат Мирзиёев ўтган ҳафтада Туркия президенти Режаб Тоййип Эрдўғон билан телефон орқали суҳбатлашганини, мулоқот пайтида Фаластин ва Исроил ўртасидаги вазият муҳокама қилинганини ҳам билдирган.

Президент Шавкат Мирзиёев 14 май куни Тошкентнинг Учтепа тумани Тепақўрғон маҳалласи аҳолиси билан учрашувда Фаластин-Исроил низосига ҳам тўхталиб ўтган эди.

“Фаластин ва Исроилдаги воқеалар, Ал-ақсо масжиди атрофидаги ҳаракатлар ҳақида гапирар эканмиз, биз фақат тинчлик бўлиши тарафдоримиз. Албатта, ҳар қандай масала бир стол атрофида ўтириб, муроса қилинсагина ҳал бўлади”,- деб иқтибос келтирган президент сўзларидан "Газета.uz".

Термизда мактабга ўт кетди

Ўзбекистонда юз берган ёнғинлардан бири.

Сурхондарё вилояти Термиз шаҳридаги мактабда 17 май куни ёнғин чиқди. Бу ҳақда Фавқулодда вазиятлар вазирлиги билдирди.

Хабарда айтилишича, соат 10да Термизий кўчасида жойлашган 6-умумтаълим мактабида ёнғин содир бўлгани ҳақида маълумот келиб тушган. Термиз шаҳар Фавқулодда вазиятлар бўлимининг 6 та ёнғин-қутқарув гуруҳи мактабга соат 10:05да етиб борган.

“Соат 10:15да ёнғин қуршаб олинган ва соат 10:40да тўлиқ бартараф этилган.Ёнғин натижасида бино 2-қаватининг тахминан 120 кв.м майдонда ички ва том қисми ёниб зараланган. Ёнғин оқибатида тан жарохат олганлар йўқ”, - дейилади хабарда.

Ўт ўчирувчилар айни пайтда енғиннинг келиб чиқиш сабабларини ва зарар миқдорини аниқлашмоқда.

Ўзбекистон Афғонистон орқали Покистонга биринчи юкни етказиб берди

Иллюстратив сурат.

Ўзбекистоннинг Асад Транс ва Покистоннинг Best Trans Pvt. Ltd транспорт ширкатлари Ўзбекистонда ишлаб чиқарилган маҳсулотларни Афғонистон орқали Покистонга экспорт қилиш бўйича пилот лойиҳани амалга оширди. Pakistan observer нашрининг хабар беришича, бу борда Покистон савдо вазирлиги ва Ўзбекистоннинг Покистондаги элчихонаси қўшма баёнот тарқатди.

“11 май куни ўзбек давлат рақамига эга бўлган юк автомашинаси Афғонистон транзит маршрутини икки кунда босиб ўтиб Пешавордаги Тўрхам назорат ўтказиш пунктига етиб келди”,-дейилади баёнотда.

Мазкур юк автомашинаси Покистон тери фабрикаларига тери маҳсулотларини олиб борган. Бундан ташқари Ўзбекистондан Покистоннинг Лаҳор, Карачи, Таксила ва Файсалобод шаҳарларига кўмир, минерал ўғитлар ва текстиль маҳсулотлари экспорт қилинади. Йил охиригача юк ташувчи автомашиналар сони 50тага етказилади.

Best Trans Pvt. Ltd ширкати расмийси Рамиз Раббонийга кўра, Покистонга Ўзбекистондан биринчи юк ташувчи автомашинасининг кириб келиши тарихий воқеа бўлди. Чунки бундан аввал ҳам Ўзбекистондан Покистонга Афғонистон орқали юкларни тўғридан-тўғри етказиб бериш лойиҳалари ишлаб чиқилган, аммо амалга ошмай қолган эди.

Автомобилда йўловчи ташишни тартибга солиш бўйича эксперимент йўлга қўйилди

Ўзбекистон жорий йилнинг 15 майидан 2022 йил охиригача автомобилда йўловчи ташиш фаолиятини тартибга солишни соддалаштириш бўйича эксперимент ўтказилади. Бу ҳақда мамлакат президенти томонидан шу йил 7 майида қабул қилинган “Aвтомобиль транспортида йўловчилар ташиш фаолиятини тартибга солишни янада соддалаштириш чора-тадбирлари тўғрисида”ги қарорда айтилган.

Адлия вазирлигининг “Ҳуқуқий ахборот” Телеграм-канали қайдича, бунда:

  • йўловчиларни ҳайдовчидан ташқари тўрттадан ортиқ бўлмаган ўриндиқларга эга бўлган енгил автотранспортларда ташиш якка тартибдаги тадбиркорлар шуғулланиши мумкин бўлган фаолият турлари рўйхатига киритилади;
  • якка тартибдаги тадбиркорлар томонидан йўловчиларни енгил автотранспортларда ташиш лицензия варақасига асосан амалга оширилади;
  • лицензия варақаси 21 ёшга тўлган ва бошқарувида аризани бериш вақтида 10 йилдан ортиқ бўлмаган вақт давомида эксплуатация қилинаётган автомобиль мавжуд бўлган якка тартибдаги тадбиркорларга “Лицензия” ахборот тизими орқали берилади;
  • автомобилда йўловчиларни ташиш билан шуғулланадиган якка тартибдаги тадбиркорлар “Aккредитация маркази” ДУКда аккредитациядан ўтган техник хизмат кўрсатиш станцияларида 6 ойда камида 1 маротаба транспорт воситасини техник кўрикдан ўтказиши шарт;
  • якка тартибдаги ташувчилар лицензияга эга корхоналарда ҳамда йўловчи ташувчиларга мижозларни излаш бўйича интерактив хизматларни кўрсатувчи тадбиркорлар (агрегаторлар) томонидан ташкил қилинган махсус текширув пунктларида ойлик тиббий кўрикдан ўтиши шарт;
  • якка тартибдаги ташувчиларга йўловчиларни автомобиль транспортида ташиш фаолияти доирасида ходимларни ишга ёллашга рухсат этилмайди.

Қарорда 2021 йил 1 сентябргача якка тартибдаги ташувчиларни давлат рўйхатидан ўтказганлик учун давлат божи ундирилмаслиги айтилган. Айни пайтда якка тартибдаги ташувчилардан лицензия варақаси берилганлиги учун давлат божи йилига базавий ҳисоблаш миқдорининг бир баробари (245 минг сўм) миқдорида ундирилиши кўзда тутилган. Бунда давлат хизматларини кўрсатганлик учун йиғим ундирилмайди.

Ҳужжатда якка тартибдаги ташувчилар қатъий белгиланган миқдорда жисмоний шахслардан олинадиган даромад солиғини 3 тоннагача юк кўтариш имкониятига эга автомобиль транспортида юкларни ташиш фаолияти билан шуғулланувчи якка тартибдаги тадбиркорлар учун белгиланган ставкада тўлаши ҳам уқтирилган.

Коронавирус юқтириб олганларнинг умумий сони 97 минг нафарга яқинлашди

Ўзбекистонда коронавирус инфекцияси қайд этилганлар сони, 2021 йилнинг 16 май ҳолатига кўра, 96 минг 893 нафарни ташкил этмоқда.

Соғлиқни сақлаш вазирлиги қайдича, ўтган кеча-кундузда мамлакатнинг истисносиз барча ҳудудларида жами 223 киши коронавирус юқтириб олган.

Айни пайтда якшанба куни Наманган, Қашқадарё, Самарқанд, Сурхондарё, Фарғона, Тошкент вилоятлари ва Тошкент шаҳрида 192 нафар бемор соғайиб, тузалганларнинг жами 92 минг 303 нафарга етган.

Касалхоналарда муолажаси давом этаётган беморлар сони эса шу кунда 3 минг 920 нафарни ташкил этмоқда.

Вазирлик кеча 2 нафар коронавирусга чалинган бемор вафот этиб, касаллик қурбонлари сони 670 нафарга етганини ҳам қўшимча қилган.

Мирзиёев Тожикистонга ташрифи чоғида Хўжандга ҳам сафар қилади

Ўзбекистон президенти Шавкат Мирзиёев

Ўзбекистон президенти Шавкат Мирзиёев шу йил 10-12 июнь кунларига мўлжалланган Тожикистонга расмий сафари доирасида Хўжанд шаҳрига ҳам ташриф буюради. Бу ҳақда “Азия-Плюс” ахборот агентлиги Тожикистон ҳукуматидаги ўз манбасидан олинган маълумотга таянган ҳолда хабар қилди.

Қайд этилишича, Хўжандга сафар чоғида Мирзиёевга тожикистонлик ҳамкасби Эмомали Раҳмон ҳамроҳлик қилади.

Икки давлат лидери Сўғд вилояти марказига Душанбеда расмий музокаралар якунланганидан ҳамда 30 дан зиёд ҳукуматлараро шартнома имзоланганидан кейин бориши кутилмоқда.

Хўжандга сафар чоғида Шавкат Мирзиёев Сўғд вилоятининг савдо-иқтисодий салоҳияти билан танишиб, бир қанча саноат корхоналарга бориши ва тарихий-маданий объектларни зиёрат қилиши режаланган.

Ўтган ҳафта Тошкентга Тожикистон бош вазири Қоҳир Расулзода бошчилигидаги ҳукумат делегацияси ташриф буюриб, икки мамлакат ўртасидаги савдо-иқтисодий ҳамкорлик бўйича ҳукуматлараро комиссиянинг 8-йиғилишида иштирок этганди. Маълумотларга кўра, музокаралар чоғида Ўзбекистон билан Тожикистон савдо айланмасини яқин йиллар ичида 1 миллиард долларга етказиш имкониятлари муҳокама этилган.

Андижонда келинчакнинг номусига теккан 6 нафар оилали кишига нисбатан жиноят иши қўзғатилди

Андижон вилояти Андижон туманида 6 нафар эркак дала шийпонида беш ой аввал турмушга чиққан аёлнинг номусига тегиши ҳодисаси бўйича Ўзбекистон Жиноят кодексининг 118-моддаси (номусга тегиш) 1-қисми билан жиноят иши қўзғатилган. Бу ҳақда Kun.uz нашри Андижон вилоят ички ишлар бошқармасидан олинган маълумотга таянган ҳолда хабар қилди.

Андижон вилоят ИИБ қайдича, жорий йилнинг 3 май куни фуқаро О.О. 102 қисқа рақамига мурожаат қилиб, шу куни соат 14:00 ларда Андижон тумани Қорақалпоқ маҳалласида жойлашган дала шийпонида фуқаролар С.А. ва О.М. ўзига нисбатан зўрлик ишлатиб жинсий алоқада бўлганини маълум қилган. Бунинг ортидан тергов-тезкор гуруҳи воқеа жойига бориб, ҳодиса содир бўлган жой кўздан кечирган ва видеотасвирга олган.

Терговга қадар текшириш ҳаракатларининг тўлалигини таъминлаш мақсадида О.О.га тегишли бўлган қизил-қора рангли аёллар кўйлаги ва бошқа кийимлар далилий ашё тариқасида ҳолислар иштирокида олинган. Мазкур ҳолат юзасидан суд-тиббий экспертизаси, судга оид боилогик экспертиза ва судга оид физика-техникавий экспертиза тайинланган.

Вилоят прокуратураси маълумотига кўра, мазкур жиноятни содир этишда 28 ёшдан 40 ёшгача бўлган 6 нафар фуқаро гумонланмоқда. Тажовузда гумон қилинганларнинг барчаси оилали бўлиб, улардан 4 нафарининг 2 нафардан, бирининг 3 нафар, яна бирининг эса 4 нафар фарзанди бор.

ФВВ: Тошкентдаги Ботаника боғида ёнғин содир бўлди, жабрланганлар йўқ

Иллюстратив сурат

Тошкент шаҳар Юнусобод туманида жойлашган Тошкент Ботаника боғида 16 май куни соат 11.55 да ёнғин содир бўлган.

Бу ҳақда маълум қилган Фавқулодда вазиятлар вазирлиги ёнғинда боғнинг орқа томонидаги очиқ майдонда қуриган хас-хашак ва буталган шох-шаббалар ёнганини билдирган.

Қайд этилишича, ҳодиса юзасидан Тошкент шаҳар Фавқулодда вазиятлар бошқармаси ёнғин-қутқарув гуруҳи воқеа жойига етиб борган ва қутқарувчиларнинг саъй-ҳаракатлари билан ёнғин ўз вақтида ўраб олиниб, аланганинг боғ ҳудудига ўтишига йўл қўйилмаган.

Вазирлик ёнғин чоғида ҳеч ким жабрланмагани, боғнинг ўрмон фондига зарар етмаганини урғулаган.

Ёнғиннинг келиб чиқиш сабаблари ўрганилмоқда.

Яна бир ҳоким ўринбосари ва бир неча мансабдор пора билан қўлга тушди

ДХХнинг маҳаллий матбуотга сиздирган маълумотларида айтилишича, Янгиқўрғон тумани ҳокими ўринбосари Наманган вилояти қишлоқ хўжалиги бошқармаси мансабдори воситачилигида 10 минг доллар пора олаётган вақтда ушланган.

Билдирилишича, қишлоқ хўжалиги бошқармаси мансабдори тадбиркорлардан бирига Янгиқўрғон тумани ҳудудидан боғдорчилик учун 10 гектар ер ажратиб бериш ваъдаси билан 10 минг доллар олаётганида қўлга тушди.

У терговгача текширув жараёнида бу пулларни Янгиқўрғон тумани ҳокими ўринбосарига бериши кераклигини айтган. Тезкор тадбир давомида туман ҳокими ўринбосари 10 минг долларни мансабдордан олаётганида ушланган.

Бундан ташқари ДХХ Тошкент шаҳар Юнусобод тумани солиқ инспекцияси катта инспектори 3,5 минг доллар, Булоқбоши тумани солиқ инспекцияси бош инспектори 15 миллион сўм миқдорида пора олаётганида ушланганини ҳам билдирди.

Аввалроқ Жиззах шаҳар ҳокимининг биринчи ўринбосари вазифасини бажарувчи шахс 2 минг доллар пора олаётганида қўлга тушгани ҳабар қилинган.

Ўзбекистон халқ артисти Баҳодир Йўлдошев оламдан ўтди

Баҳодир Йўлдошевнинг театр тўғрисидаги мақолаларидан бири.

Ўзбекистон халқ артисти, Ўзбекистонда хизмат кўрсатган санъат арбоби Баҳодир Йўлдошев 76 ёшида вафот этди. Бу ҳақда Кинематография агентлиги 16 май куни хабар берди.

1945 йилда Самарқанд вилоятининг Каттақўрғон шаҳрида санъаткорлар оиласида туғилган Баҳодир Йўлдошев 1970 йилда Тошкент театр ва рассомлик институтини тугатган.

У 1971–1974 йилларда Ҳамза номидаги Ўзбек академик драма театрида режиссёр, 1974–1984 йилларда бош режиссёр бўлиб ишлаган.

Бундан ташқари Баҳодир Йўлдошев кинофильмларда актёр сифатида Олчинбек ("Оловли йўллар"), Мухторов ("Тоғдаги учрашув"), Шерзод ("Олмос камар"), Собиров («Ошпаз») каби образларни яратган.

У Ўзбекистонда хизмат кўрсатган санъат арбоби, Ўзбекистон халқ артисти, «Буюк хизматлари учун», «Меҳнат шуҳрати», «Эл-юрт ҳурмати», «Фидокорона хизматлари учун» орденлари соҳиби, Калифорния академиясининг ҳақиқий аъзоси ҳисобланади.

Ўзбекистонда коронавирусга чалинганлардан яна бири вафот этди

Айни пайтда тиббиёт муассасаларида 3891 нафар бемор даволанмоқда.

Ўзбекистонда 15 май куни коронавирусга чалинган беморлардан яна бири вафот этди. Бу билан пандемия бошланганидан то шу кунгача мазкур касалликдан ўлган беморлар сони камида 668 кишига етди.

Соғлиқнини салаш вазирлиги 15 май куни яна 302 кишида вирус аниқланганини билдирди. Улардан 131 нафари Тошкент шаҳрида, 73 нафари Самарқанд вилоятида ва 38 нафари Тошкент вилоятида.

Ўтган йилнинг8 мартидан то шу кунгача коронавирус инфекцияси қайд этилганларнинг умумийц сони 96670 нафарни ташкил этмоқда. Касалликдан жами 92111 соғайган.

Айни пайтда тиббиёт муассасаларида 3891 нафар бемор даволанмоқда.

"Ўзбекистон" меҳмонхонаси нега Исроил байроғига бурканганини изоҳлади

Ижтимоий тармоқларда Тошкентдаги “Ўзбекистон” меҳмонхонаси биносидаги экранда Исроил байроғи акс этгани тасвирланган сурат ва видеолар ижтимоий тармоқларда муҳокамаларга сабаб бўлди.

Бу ҳолат Яқин Шарқда зўравонликлар бўлаётган кезда рўй берди.

Qalampir.uz нашрининг ёзишича, "Ўзбекистон" меҳмонхонаси бино экрани бундан роппа-роса бир ой аввал, 14 апрель куни – Исроил мустақиллигининг 73 йиллиги муносабати билан шу давлат байроғи тусига киргани, бунинг Яқин Шарқдаги ҳозирги вазиятга алоқаси йўқлигини маълум қилди.

Нашр меҳмонхона ходимининг бунинг учун Исроилнинг Ўзбекистондаги элчихонаси билан шартнома тузилгани ҳақидаги сўзларидан иқтибос келтирган.

“Ўзбекистон дипломатик алоқа ўрнатган давлатлар байроқларини қўйиб борамиз. Бу қонун доирасида”, деб айтган меҳмонхона ходими.

Яқин Шарқда зўравонликлар беш кундирки давом этмоқда.

Душанба кунидан буён юздан ортиқ фаластинлик ҳалок бўлди. Исроилликлар орасида талафотлар сони саккиз кишини ташкил этмоқда.

Ғазо ва Исроилдаги сўнгги зўравонликлар 2014 йилдан буён кузатилган энг ёмони экани айтилади.

Россиялик овчи Ўзбекистонда Тяншан қўнғир айиғини ўлдириш учун қанча ҳақ тўлагани маълум қилинди

Ўзбекистон Адлия вазирлиги мамлакат ҳудудида ҳайвонларни ов қилиш маълум ҳақ эвазига амалга оширилишини маълум қилди.

Вазирликнинг бу баёноти Тошкент вилоятида россиялик овчи Ўзбекистон "Қизил китоби"га киритилган Тяншан қўнғир айиғини отиб ўлдиргани муҳокамаларга сабаб бўлаётган кезда янгради.

Адлия вазирлиги матбуот хизматига кўра, Экология ва атроф-муҳитни муҳофаза қилиш давлат қўмитаси 10 декабрга қадар (қўшимча квота учун 10 майга қадар) бўлган муддатда Фанлар академиясининг хулосаси асосида ёввойи ҳайвонларни тутишга доир квоталарни тасдиқлайди ва тегишли тартибда қўмитанинг маҳаллий бошқармаларига юборади. Қўмитанинг ҳудудий органлари эса ҳайвонот дунёсидан фойдаланишга доир рухсатномаларни беради.

"Ов қилиш ва овчилик хўжалиги тўғрисида"ги қонунда, шунингдек, Ўзбекистон "Қизил китоб"ига киритилган камёб ва йўқолиб бораётган сутемизувчилар турлари бўйича алоҳида тўлов миқдорлари белгиланган", - дейилади Адлия вазирлиги матбуот хизмати билдирувида.

Ўзбекистонда ёввойи ҳайвонларни овлаш учун нархлар рўйхатида Тяншан қўнғир айиғини илмий, тиббий ва назорат мақсадида тутиш учун ўзбекистонликларга 19,6 миллион сўм, спорт, ҳаваскорлик ва ўлжа олиш мақсадида тутиш учун эса 24,5 миллион сўм тўлов белгиланган.

Хорижлик фуқароларга эса ушбу ҳайвонни ов қилишнинг барча турлари бўйича тутишга 3 минг доллар миқдорида тўлов белгиланган.

Мирзиёев журналистлар билан мулоқотда гематология ва онкология соҳаси муаммолари ҳақида гапирди

Ўзбекистон президенти Шавкат Мирзиёев Тошкентнинг Учтепа туманига ташриф чоғида журналистлар билан суҳбатда гематология ва онкология шифохоналарини керакли ускуналар билан таъминлашга ваъда берди.

"Бизда тана аъзоларини кўчириш соҳасида мутахассис ҳам йўқ, марказ ҳам йўқ, ускуналар ҳам йўқ. Шунинг учун бу борада катта тажрибага эга Россия, Корея, Германиядан ускуналар олиб келиб ҳамма вилоятда марказлар очамиз. Фақат Тошкентда эмас, Тошкент вилоятида ҳам ташкил қиламиз. Тошкентда 10 гектарга яқин жой ажратиб энг замонавий марказ ташкил қиламиз", деди Шавкат Мирзиёев.

Ўзбекистон президенти муаммоларни бир қарор билан ҳал қилиб бўлмаслиги, қарорлар ижросини назорат қилишда журналистлар ва оммавий ахборот воситалари вакиллари кўмачки бўлиши кераклигини урғулади.

Сўнгги пайтларда Ўзбекистон президенти жойларга уюштирилган сафарлари чоғида журналистлар қаршисида чиқиш қилиши кузатилмоқда.

Бу каби жонли мулоқотларнинг биринчиси Мирзиёевнинг шу йил февраль ойида Наманган вилоятига қилган сафари пайтида амалга ошган.

Мазкур чиқишларда журналистлар, матбуот анжуманларида бўлганидек, президентга ўзлари истаган саволни бериш имконига эга бўлмаган бўлсалар-да, бундай жонли мулоқотлар халқаро кузатувчилар томонидан “муҳим ҳодиса” ўлароқ баҳоланмоқда.

Давомини ўқинг

XS
SM
MD
LG