Линклар

Шошилинч хабар
21 апрел 2021, Тошкент вақти: 22:59

Ўзбекистон хабарлари

Автомобилларга махсус рухсатнома бериш тўхтатилди

Қишлоқлар ва туманларда махсус рухсатномасиз автомобилда ҳаракатланиш мумкин.

9 апрелдан бошлаб давлат хизматлари марказлари автотранспорт воситалари ҳаракатланишига махсус рухсатнома беришни тўхтатди.

Адлия вазирлигининг билдиришича, коронавирус инфекциясини кенг тарқалишини олдини олиш ва эълон қилинган карантин талабларига қатъий риоя этилишини таъминлаш мақсадида, республика махсус комиссияси 8 апрель куни мана шундай қарор қабул қилган.

“Бунда автотранспорт воситаларига мазкур санага қадар тақдим этилган рухсатномалар асосида ҳаракатланиш ҳуқуқи сақлаб қолинди. Автотранспорт воситалари ҳаракатланишига махсус рухсатномалар талаб этилмайдиган ҳолатларнинг рўйхати қисқартирилиб, алоҳида эълон қилинади”,-дейилади вазирлик маълумотида.

Айни пайтда кўриб чиқиш жараёнида бўлган аризалар қаноатлантирилмасдан қолдирилади.

8 апрель куни ўтган матбуот анжуманида Адлия вазирлиги бошқарма бошлиғи Ғайбулло Примов: "Республика махсус комиссияси қарорига кўра, махсус рухсатнома вилоятлараро, Тошкент ва Нукус шаҳарлари ҳамда вилоятлар марказларида ҳаракатланиш учун талаб этилади. Қарор қишлоқларга, туман марказларига ТААЛЛУҚЛИ ЭМАС”, деб билдирган эди.

Коронавирус тарқалишига қарши курашга масъул республика махсус комиссияси қарори билан 30 мартдан 20 апрелга қадар вилоятлараро, Тошкент ва Нукус шаҳарлари ҳамда вилоятлар марказларида автотранспорт воситалари фақат махсус рухсатнома (стикер)лар асосида ҳаракатланиши мумкин.

Кун янгиликлари

Хоразмда 20 ёшли қизни “самосуд” қилган аёллар устидан ҳукм ўқилди

Қўшкўпирдаги "самосуд" видеосидан скриншот

Хоразм вилоятининг Қўшкўпир туман суди бир аёлни калтаклаб, “самосуд” қилган бир гуруҳ аёллар устидан ҳукм ўқиди. Бу ҳақда Ички ишлар вазирлиги ҳузуридаги Тергов департаменти матбуот хизмати маълумот тарқатди.

Қўшкўпирлик тўрт нафар аёл 2020 йилнинг 9 июнь куни 20 ёшли Ҳ.О. исмли аёлни Д.К. ўғлининг оиласини бузганликда айблаб калтаклагани, бунинг ортидан уларга нисбатан Жиноят кодексининг 277-моддаси 2-қисми “б,г” бандлари (“Безорилик”) билан жиноят иши қўзғатилгани ҳақида Озодлик аввал хабар қилган.

Тергов департаменти қайдича, мазкур ҳолат юзасидан қўзғатилган жиноят иши юзасидан тергов ҳаракатлари ўтказилиб, тегишли тартибда айблов хулосаси билан судга юборилган.

Ишни кўриб чиққан туман суди Д.К., Д.О. ҳамда Р.Н. га нисбатан 1,5 йилдан, Д.Р.га эса 1 йил муддатга озодликни чеклаш жазосини тайинлаган. Бу ўринда жабрланувчи Ҳ.О.нинг уларга нисбатан ҳеч қандай даъвоси йўқлиги инобатга олинган.

Меҳнат вазирлиги Шуҳрат Ғаниевнинг ҳордиқ куни мажлис ўтказганига муносабат билдирди

Ўзбекистон бош вазири муовини Шуҳрат Ғаниев

Ўзбекистон Меҳнат вазирлиги бош вазир ўринбосари Шуҳрат Ғаниев раҳбарлигида ўтган якшанба куни қишлоқ ҳўжалиги масалаларига бағишланган видеоселектор йиғилиши ўтказилганига муносабат билдирди.

Вазирлик қайдича, Меҳнат кодексининг 157-моддасига мувофиқ, ишдан ташқари иш вақтида ҳамда дам олиш кунларида ходимлар ишга жалб қилинганда уларга мазкур ташкилотнинг жамоа шартномасида белгиланган, лекин камида икки ҳисса миқдорида меҳнат ҳақи тўланиши лозим. Ишдан ташқари иш вақтида ёки дам олиш кунида ишга жалб қилинган ходимларга иш соатларига мутаносиб равишда отгул (қўшимча дам олиш куни) берилган бўлса, бундай ишлар учун камида бир ҳисса миқдорида меҳнат ҳақи тўланади.

Меҳнат вазирлиги 18 апрель куни ўтказилган видеоселекторда иштирок этган барча ташкилот ходимлари ўз меҳнат вазифаларига кирадиган масалалар юзасидан дам олиш кунида ишга жалб қилинганини урғулаган.

“Вазирликнинг Давлат меҳнат инспекцияси томонидан ходимларнинг кафолатланган меҳнат ҳуқуқларини таъминлаш мақсадида тегишли ҳокимият, вазирлик ва идораларга дам олиш кунида ходимларни ишга жалб қилиш тўғрисида буйруқ расмийлаштириш ҳамда тегишли тўловларни амалга ошириш юзасидан огохлантириш хатлари берилган”, дейилган хабарномада.

Ўзбекистон президенти жорий йил январида ўтказилган видеоселектор йиғилишида мажлисбозликка чек қўйиш масаласини яна бир бор кўтариб, кераксиз мажлисларни “отбозор”га ўхшатган эди.

Мажлисбозлик касалига чалинган бўлсанглар, уйда мажлисларни ўтказинг. Кераксиз мажлисларни ўтказишни тугатиш керак. Отбозорга айланиб кетяпти. Баъзи раҳбарлар мажлисбозлик билан касал. Кераксиз мажлислар ўтказадиган… 40 дақиқадан кўпроқ мажлис ўтказадиганлар ишдан кетади”, деган эди ўша йиғилишда президент Ш. Мирзиёев.

Turkish Airlines Урганч ва Фарғонага мунтазам рейсларни амалга ошириш учун рухсатнома олди

“Турк ҳаво йўллари” авиаширкати учоқларидан бири

Транспорт вазирлиги ҳузуридаги "Ўзавиация" агентлиги Туркиянинг “Турк ҳаво йўллари” авиаширкатига Истанбул – Урганч – Истанбул ҳамда Истанбул – Фарғона – Истанбул йўналишлари бўйлаб Ўзбекистонга мунтазам авиақатновларни амалга ошириш учун рухсатнома берган. Бу ҳақда маълумот тарқатган Транспорт вазирлиги ахборот хизматига кўра, мазкур икки шаҳарга қатнаш учун рухсатнома Turkish Airlines’га шу йил 15 апрелида берилган.

Олдинлари “Турк ҳаво йўллари” авиаширкати Истанбул – Тошкент – Истанбул ва Истанбул – Самарқанд – Истанбул йўналишлари бўйлаб мунтазам авиақатновларни амалга ошириб келган.

Жорий йилнинг март ойи охиридан Uzbekistan Airways авиаширкати Урганч – Истанбул – Урганч йўналиши бўйлаб, апрель ойи бошидан эса Фарғона – Истанбул – Фарғона йўналиши бўйлаб мунтазам қатновни йўлга қўйгани ҳақида Озодлик аввалроқ хабар қилган.

К.Алламжонов сўз эркинлиги учун масъул бўлганларга кинояли ташаккур изҳор этди

Комил Алламжонов

Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов “Чегара билмас мухбирлар” халқаро ташкилотининг матбуот эркинлиги бўйича бу йилги рейтингида Ўзбекистон бир поғона пастлагани муносабати билан ўз Телеграм-саҳифасида кинояли пост қолдирди.

“Ҳар йили шу пайтда Ўзбекистоннинг сўз эркинлиги рейтинги ошаётганини айтиб”, мақтанганини эслатган К.Алламжонов “бу йил ушбу соҳага масъул бўлган барча мутасаддиларга машаққатли, сермазмун, ижодий ва тинимсиз меҳнатлари учун катта "раҳмат" айтмоқчи” эканини билдирган.

“Барака топинглар, ҳурматлилар. Рейтинг-пейтинга бало борми, тоже мне. Тушди нима, кўтарилди нима, тўғрими? Ота-бобонг қилган ишни қилсанглар бўлмайдими, дейдиган одам йўқ. Чойхоналаримиздан, гап, улфатчиликларимиздан қўймасин. Зато бизда Бунёдкор стадиони бор. Файзимизни берсин”, дея кесатган Комил Алламжонов.

Луқма сўнгидаги иловада Миллий масс-медиа фонди Васийлик кенгаши раиси: “лицейда ўқиб юрган пайтларимиз, дарсда тўполон қилсак, адабиёт ўқитувчимиз Феруза опа бизга "Қанча қилма тарбия, хўтикла кучукчани, ит бўлур, эшак бўлур, асло бўлмас одамий", дердилар. Негадир шу эсимга тушиб кетди ҳозир. Нимага экан?” дея савол ташлаган. Афтидан, К.Алламжонов бу ерда ҳазрат Навоийнинг “Наводируш-шабоб” девонидан ўрин олган 43-қитъасига дохил “Ким, кучук бирла хўдукка неча қилсанг тарбият,//Ит бўлур, доғи эшак, бўлмаслар асло одами” мисраларини назарда тутган бўлса керак.

Матбуот эркинлиги бўйича “Чегара билмас мухбирлар” халқаро ташкилоти томонидан тузилган бу йилги рейтингда Ўзбекистон 180 давлат ичида 157-ўринни эгаллагани ҳақида Озодлик аввалроқ хабар қилганди.

Иккинчи жаҳон уруши фахрийларига 12 миллион сўмдан пул мукофоти бериладиган бўлди

Ўзбекистонда Иккинчи жаҳон уруши қатнашчилари ва ногиронларига 12 миллион сўм (ёки тақрибан 1150 АҚШ доллари – таҳр.) миқдорида бир марталик пул мукофоти берилади. Бу ҳақда мамлакат президенти томонидан 2021 йил 20 апрелида имзоланган “Иккинчи жаҳон уруши қатнашчиларини рағбатлантириш тўғрисида”ги фармонда билдирилган.

Мазкур қарор “фахрийларни эъзозлаш ҳамда фашизм устидан қозонилган ғалабанинг 76 йиллиги нишонланиши муносабати билан уруш қатнашчилари ва ногиронларини моддий рағбатлантириш мақсадида” қабул қилингани айтилмоқда.

Фармонни бажариш билан боғлиқ бўлган сарф-харажатларни республика бюджети маблағлари ҳисобидан амалга ошириш кўзда тутилган.

Ҳужжатга мувофиқ, 9 май – Хотира ва Қадрлаш куни муносабати билан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига Мудофаа вазирлиги, Ички ишлар вазирлиги, Маданият вазирлиги, Маҳалла ва оилани қўллаб-қувватлаш вазирлиги, Республика Маънавият ва маърифат маркази, Ўзбекистон Ёзувчилар уюшмаси билан биргаликда карантин қоидаларига риоя қилган ҳолда Ватан озодлиги ва шон-шарафи ҳимоячиларига бағишланган махсус учрашувлар ва маданий-маърифий кечалар ўтказиш вазифаси юклатилган.

Матбуот эркинлиги рейтинги: Ўзбекистон Руандадан пастроқ, Беларусдан юқорироқда

“Чегара билмас мухбирлар”нинг матбуот эркинлиги рейтингига илова қилинган дунё харитаси

Матбуот эркинлиги бўйича “Чегара билмас мухбирлар” халқаро ташкилоти томонидан тузилган бу йилги рейтингда Ўзбекистон 180 давлат ичида 157-ўринни эгаллади. 2020 йилдаги рейтингда Ўзбекистон 156-ўринни эгаллагани эътиборга олинса, бу йил мамлакатда матбуот эркинлиги билан боғлиқ ҳолат бироз ёмонлашгани англашилади.

Бу йил ҳам дунёда матбуот эркинлиги бўйича биринчи ўрин аввалги йилларда бўлгани каби Норвегияга берилган. Иккинчи ўринда Финляндия, учинчида эса Швеция турибди.

Рейтингда Ўзбекистон Африка қитъасида жойлашган Руанда (156-ўрин) ҳамда пандемия йилида фуқаролик жамияти ва журналистлар қатағони билан тилга тушган собиқ совет ўлкаси бўлмиш Беларусь (158-ўрин) ўртасидан жой олган.

Марказий Осиё давлатлари орасида эса Ўзбекистон Қирғизистон (79-ўрин) ва Қозоғистондан (155-ўрин) орқада, Тожикистон (162-ўрин) ва Туркманистондан (178-ўрин) олдинда эканини кўриш мумкин.

Миллий гвардия институти Жамоат хавфсизлиги университетига айланди

Миллий Гвардия аскарлари (архив сурати)

Ўзбекистонда Миллий гвардия Ҳарбий-техник институти Жамоат хавфсизлиги университети этиб қайта ташкил этилди. Бунга оид қарор Ўзбекистон президенти томонидан 15 апрель куни имзоланган.

“Жамоат хавфсизлигини таъминлаш соҳасида профессионал кадрларни тайёрлаш тизимини янада такомиллаштириш чора-тадбирлари тўғрисида”ги қарорга мувофиқ, 2021/2022 ўқув йилидан университетда бакалавриат ва магистратура тизими жорий этилади.

Мазкур ОТМда ИИВ ва Миллий гвардия, Қуролли Кучлар ва ҳуқуқни-тартибот идоралари ҳамда қўриқлаш тузилмаларига эга органлар учун малакали кадрлар тайёрланиши айтилмоқда.

Университетнинг бакалавриат бўлимига ҳар йили 300 нафаргача курсант, сиртқи таълим учун эса 100 нафаргача тингловчи қабул қилиш кўзда тутилган.

Коронавирус юқтириб олганларнинг умумий сони 87 минг нафардан ошди

Ўзбекистонда коронавирус инфекцияси қайд этилганлар сони, 2021 йил 19 апрель ҳолатига кўра, 87 минг 225 нафарни ташкил этган.

Соғлиқни сақлаш вазирлиги қайдича, ўтган кеча-кундузда Қорақалпоғистон Республикаси, Андижон, Бухоро, Навоий, Наманган, Самарқанд, Сирдарё, Сурхондарё, Хоразм, Тошкент вилоятлари ҳамда Тошкент шаҳрида жами 243 киши коронавирус юқтириб олган.

Айни пайтда душанба куни Қорақалпоғистон Республикаси, Навоий, Наманган, Самарқанд, Сирдарё, Сурхондарё, Фарғона, Тошкент вилоятлари ва Тошкент шаҳрида 226 нафар бемор соғайиб, тузалганларнинг жами 84 минг 533 нафарга етган.

Касалхоналарда муолажаси давом этаётган беморлар сони эса 2053 нафарни ташкил этиб, улардан 238 нафарининг аҳволи оғир, 109 нафарининг эса аҳволи ўта оғир экани айтилмоқда.

ССВ кеча коронавирусга чалинган беморлардан яна бири вафот этгани, шу тариқа хасталикдан вафот этганларнинг умумий сони 639 нафарга етганини билдирган.

Жаҳон иқтисодиёти ва дипломатия университети ҳам 14 кунлик карантинга ёпилди

Тошкентдаги Жаҳон иқтисодиёти ва дипломатия университети икки ҳафталик карантинга олинди.

Университетнинг расмий Телеграм-канали орқали ёйинланган маълумотга мувофиқ, ўтган ҳафта мобайнида баъзи кам сонли талабалар орасидан коронавирус инфекцияси қайд этилган. Касалликнинг талаба ва ўқитувчилар орасида тарқалишини олдини олиш мақсадида университетда ўқув жараёни 14 кунга масофавий (онлайн) шаклга ўтказилган.

Хабарномада машғулотлар университетнинг Moodle масофавий таълим тизими орқали давом этиши урғуланган.

Аввалроқ Озодлик Алишер Навоий номидаги Тошкент давлат ўзбек тили ва адабиёти университети 19 апрелдан масофавий таълим шаклига ўтгани, бироқ мазкур университет талабалари оффлайн таълимга қачон қайтиши ҳозирча маълум эмаслиги ҳақида хабар қилган.

Ўтган ҳафта эса ўқитувчи ва талабалари орасида коронавирусга чалиниш ҳолати аниқланган Журналистика ва оммавий коммуникациялар университети ҳамда Тошкент ахборот технологиялари университетининг Самарқанд филиали шу йил 12 апрелидан карантинга ёпилгани, карантин муддати 14 кун қилиб белгилангани билдирилган эди.

Метрода тўй саҳналарини тасвирга олган тиктокерларнинг ҳар бири қарийб 1 млн сўмдан жаримага тортилди

Тошкент метрополитенидаги станциялардан бири

Тошкент метрополитенида тўй, “келинсалом”, чойхонадаги ош ва бошқа саҳналарни суратга олган тиктокерлар гуруҳи жазоланган. Бу ҳақда Ички ишлар вазирлиги матбуот хизмати маълум қилди.

ИИВ хабарномасида метрополитенда расм ва видеога олиш тақиқланмагани, бироқ бунинг жамоат тартибини бузмаган ҳолда амалга ошириш лозимлиги урғуланган. Вазирлик қайдича, метрога овқат ҳам олиб кириш мумкин, лекин уни истеъмол қилишга рухсат берилган эмас.

“Жамоат жойида туриб аҳоли тинчлигини бузиш ва карантин тартиби кучайган вақтда тиббий ниқобларсиз оралиқ масофани сақламай юриш ҳам қилиниши мумкин бўлмаган ишлар қаторида”, дейилган хабарномада.

Мазкур ҳодисалар бўйича қоидабузарлик содир этган шахсларнинг ҳар бирига Жиноий ишлар бўйича Яшнобод ва Мирзо Улуғбек туманлари судлари томонидан Маъмурий жавобгарлик бўйича кодекснинг 183-(майда безорилик), 54-(эпидемияларга қарши кураш қоидаларини бузиш) ва 115-моддаларига (метрополитендан фойдаланиш қоидаларини бузиш) асосан жами базавий ҳисоблаш миқдорининг 4 баробари миқдорида жарима жазоси тайинланган.

Ўзбекистонда БҲМ жорий йил 1 февралидан 245 000 сўм қилиб белгилангани эътиборга олинса, метрода тармоқ учун суратга тушган тиктокерларнинг ҳар бири эндиликда 980 минг сўмдан жарима тўлаши лозимлиги маълум бўлади.

Болалар омбудсмани танқиди ортидан Китобдаги Меҳрибонлик уйи раҳбари ишдан олинди

Қашқадарёнинг Китоб туманидаги 5-Меҳрибонлик уйи биноси

Қашқадарёнинг Китоб туманида жойлашган 5-Меҳрибонлик уйини тугатиш керак. Бу мулоҳазани ўтган ҳафта Қашқадарё ва Сурхондарё вилоятларида хизмат сафарида бўлиб қайтган болалар ҳуқуқлари бўйича вакил Алия Юнусова билдирган.

Омбудсман матбуот хизмати маълумотига кўра, А. Юнусова Китобдаги мазкур Меҳрибонлик уйини кўздан кечириш чоғида бу ерда болалар жуда ёмон шароитда яшаётгани ҳақида хулоса қилган.

Болалар омбудсмани қайдича, ўрганиш куни муассасада 65 нафар (қизлар 28 нафар) тарбияланувчи бўлган.

Мулозима Меҳрибонлик уйидаги тиббиёт хонаси, стомотолог хонаси, беморларнинг алоҳидалаш хоналарининг таги бетон қопламали бўлиб, заҳкашлиги, болаларнинг бўш вақтини ўтказиш учун етарли шароитлар мавжуд эмаслиги, мебеллар эскилиги, тарбияланувчилар “ўта ёғли ва ўзига хос ҳиди бор” карам шўрвани умуман емагани, озиқ-овқат омборидаги маҳсулотлар сифати бузилгани, ошхонанинг санитария ҳолати яхши эмаслиги ҳамда бошқа камчиликларга эътибор қаратган.

“Ҳолатни чуқур ўрганиш учун туман прокуратурасидан вакил чақирилди ва мавжуд камчиликларни бартараф қилиш юзасидан мутасаддиларга мажбурий кўрсатмалар берилди”, дейилган омбудсман хабарномасида.

Бунинг ортидан Қашқадарё вилояти халқ таълими бошқармаси болалар омбудсманининг Китобдаги 5-Меҳрибонлик уйи танқидига муносабат билдирди.

Бошқарма қайдича, ҳолат юзасидан ўз вазифасига совуққонлик билан қараган Меҳрибонлик уйи директори ва омбор мудири Ўзбекистон Республикаси Меҳнат кодексининг тегишли бандларига асосан ўз лавозимларидан озод этилган.

Ўзбекистонда аҳоли сони 35 миллионга яқинлашди

Ўзбекистоннинг доимий аҳолиси сони, 2021 йилнинг 1 апрель ҳолатига кўра, 34 миллион 700 минг кишини ташкил этмоқда.

Бу ҳақда маълум қилган Давлат статистика қўмитаси маълумотига кўра, жорий йил бошидан бери мамлакатда аҳоли сони 136,7 минг кишига ошган.

Қайд этилишича, республикада аҳоли сони йил бошидан бери ҳар ой ўртача 45,9 минг кишига кўпайган, доимий аҳолининг ўсиш суръати эса 101,9 фоизга тенг бўлган.

Аҳолининг ўсиш суръати биринчи чоракдагидай давом этган тақдирда, Ўзбекистонда аҳоли сони йил охирига бормай 35 миллион нафардан ошиб кетишини тахмин қилиш қийин эмас.

Ўзбекистонда синалган Хитой вакцинаси “британча” ва “бразилча” штаммга қарши ҳам самарали экани иддао қилинди

Хитойнинг Ўзбекистон билан ҳаммуаллифликда ишлаб чиқарган ZF-UZ-VAС2001 вакцинаси, 2021 йил феврал ойида ўтказилган синовлар доирасида лаборатория намуналари натижаларига кўра, коронавируснинг "жанубий африка" штаммига қарши актив нейтрал ҳолатини сақлаб қолган. Бу ҳақда Vaksina.uz Телеграм канали маълумот тарқатди.

Иддаога кўра, мазкур вакцина коронавируснинг янги "Британия" ва "Бразилия" штаммларига қарши самарали экани ҳам тасдиқланган.

Вакцина синовининг учинчи босқичи Ўзбекистонда ўтган йилнинг 10 декабридан бошланган эди. Учинчи босқич натижалари, қайд этилишича, вакцинанинг юқори самарадорлиги ва юқори даражадаги антитаналар ишлаб чиқилишини кўрсатган.

Аввалроқ Озодлик Хитой касалликларни назорат қилиш ва олдини олиш марказининг директори Гао Фу мамлакатда коронавирусга қарши ишлаб чиқарилган вакциналар самарадорлиги пастлигини тан олгани, ҳукумат уларни такомиллаштириш учун турли вакциналар имкониятларини уйғунлаштириш масаласини кўриб чиқаётганини билдиргани ҳақида хабар қилганди.

Гао маҳаллий вакциналар самарадорлиги ҳақида Чэнду шаҳрида бўлиб ўтган анжуманда, иммунизация стратегиялари хусусидаги чиқишида гапирган.

“Ҳозирги вакциналар беморларни тўлақонли ҳимоя қилмаётганидан хабардормиз. Ушбу масалани ҳал этиш учун эмлаш жараёнида турли хил техник линиялардаги вакциналардан фойдаланиш имконияти кўриб чиқилмоқда”, деган Хитой касалликларни назорат қилиш идораси раҳбари.

27 март куни Ўзбекистонга Хитойдан 1 миллион доза Хитой—Ўзбекистон ZF-UZ-VAC2001 вакцинаси олиб келинган.

Мазкур вакцина Хитой Фанлар академияси Микробиология институти олимлари томонидан яратилиб, Anhui Zhifei Longcom Biopharmaceutical Co.Ltd фармацевтика компанияси томонидан ишлаб чиқилган.

У ўзбекистонлик олимлар билан ҳамкорликда клиник тадқиқотлари олиб борилган коронавирусга қарши янги рекомбинант вакцинадир. Хитой Ўзбекистонни мазкур вакцина ҳаммуаллифи деб эълон қилган ва вакцинага ZF-UZ-VAC2001 деб ном берилган.

Ўзбек тили ва адабиёти университети масофавий таълим шаклига ўтди

Алишер Навоий номидаги Тошкент давлат ўзбек тили ва адабиёти университети жорий йил 19 апрелидан масофавий таълим шаклига ўтди. Университет матбуот хизмати маълумотига кўра, бундай қарор қабул қилинишига “профессор-ўқитувчилар ҳамда талабалар орасида COVID-19 билан касалланиш ҳолатлари аниқлангани” сабаб бўлган.

Қарор Олий ва ўрта махсус таълим вазирлиги билан келишилган ҳолда қабул қилингани қайд этилган, бироқ онлайн таълим қачонгача давом этишига аниқлик киритилмаган. Хабарномада: “эпидемиологик вазият барқарорлашгач, анъанавий ўқув жараёнига қайтиш борасида қўшимча хабар берилади”, дейилган, холос.

Аввалроқ Озодлик ўқитувчи ва талабалари орасида коронавирусга чалиниш ҳолати аниқланган Журналистика ва оммавий коммуникациялар университети ҳамда Тошкент ахборот технологиялари университетининг Самарқанд филиали шу йил 12 апрелидан карантинга ёпилгани, карантин муддати 14 кун қилиб белгилангани ҳақида хабар қилган эди.

Бош вазир апрель охиригача Ўзбекистонга 300 минг доза “Спутник V” келтирилишини билдирди

Апрель ойи охиригача Ўзбекистонга Россияда ишлаб чиқарилган “Спутник V” вакцинасидан 300 минг доза келтириш режаланган. Бу ҳақда Республика махсус комиссиясининг ўтган ҳафта якунида Тошкентда бўлиб ўтган йиғилишида бош вазир Абдулла Арипов билдирган.

Ҳукумат раҳбарига кўра, жорий ой охиригача Хитой вакцинасидан яна бир миллион доза олиб келиниши ҳам кутилмоқда. Бош вазир ўзбекистонликларга ана шу уч вакцинадан бирини танлаш имконияти берилишини билдирган.

Аввалроқ Ўзбекистонда коронавирусга қарши эмланганлар сони 400 минг нафардан ошгани ҳақида хабар қилган эдик.

Тошкент туманларидан бирида жойлашган синтепон цехида ёнғин чиқди

Тошкент шаҳрининг Яккасарой тумани Қушбеги массивида жойлашган синтепон ишлаб чиқариш цехида 18 апрель оқшомида ёнғин чиққан. Бу ҳақда маълумот тарқатган Фавқулодда вазиятлар вазирлиги ёнғинга оид хабар вазирликка якшанба куни соат 20:46 да келиб тушганини билдирган.

Бунинг ортидан воқеа жойига Тошкент шаҳар Фавқулодда вазиятлар бошқармасининг 10 га яқин ёнғин-қутқарув экипажлари етиб борган.

ФВВ вакиллари қайдича, соат 21:21 да ёнғин қуршаб олинган, соат 21:41 да эса тўлиқ бартараф қилинган.

Ёнғин натижасида жабрланганлар бўлмагани айтилмоқда.

Коронавирусга чалинганлар сони 86,5 мингдан, эмланганлар сони эса 400 мингдан ошди

Ўзбекистонда коронавирусга қарши эмланганлар сони жорий йилнинг 17 апрелига келиб 403 минг 136 нафарга етган.

Соғлиқни сақлаш вазирлиги маълумотига кўра, эмланиш кўрсаткичи бўйича Фарғона водийси вилоятлари пешқадамлик қиляпти (Фарғона вилояти – 58 минг 529 нафар, Андижон вилояти – 44 минг 309 нафар, Наманган вилояти – 40 минг664 нафар), улардан кейин Самарқанд вилояти (36 минг 178 нафар) бормоқда.

Бу орада мамлакатда коронавирус инфекцияси қайд этилганлар сони, 2021 йил 17 апрель ҳолатига кўра, 86 минг 680 нафарни ташкил этган.

ССВ ўтган кеча-кундузда Қорақалпоғистон Республикаси, Андижон, Бухоро, Жиззах, Навоий Наманган, Самарқанд, Сирдарё, Сурхондарё, Фарғона, Хоразм, Тошкент вилоятлари ҳамда Тошкент шаҳрида жами 342 киши коронавирус юқтириб олгани ҳақида маълумот тарқатди.

Вазирлик қайдича, шанба куни Қорақалпоғистон Республикаси, Бухоро, Наманган, Самарқанд, Фарғона, Тошкент вилоятлари ва Тошкент шаҳрида 205 нафар бемор соғайиб, тузалганларнинг жами 84 минг 43 нафарга етган.

Касалхоналарда муолажаси давом этаётган беморлар 1999 нафарни ташкил этяпти, улардан 238 нафарининг аҳволи оғир, 109 нафарининг эса аҳволи ўта оғир экани айтилмоқда.

Вазирлик кеча коронавирусга чалинган беморлардан икки нафари вафот этгани, шу тариқа хасталикдан вафот этганларнинг умумий сони 638 нафарга етганини расман билдирган.

ИИВ Интернет тармоғида ўз ходимлари номидан иш юритаётган фирибгарлардан огоҳлантирди

Ўзбекистон Ички ишлар вазирлиги фуқароларни ИИВ кибержиноятларга қарши курашиш бўлими номидан “турли хил тақиқланган материалларни тарқатувчи элементлар, шу жумладан зўравонлик, шафқатсизлик тарғиб этувчи, порнографияни ўз ичига олган” ва ҳ.к.лар билан курашиш учун банк картасига 240 минг сўм миқдорида пул ўтказиш зарурлиги ҳақида хабар тарқатаётган фирибгарлар фаолиятидан огоҳлантирди.

Вазирлик ўзбекистонликлардан бу каби хабарларга танқидий муносабатда бўлишни сўраган.

“Ички ишлар органлари фуқаролардан ҳеч қандай ҳисоб рақамига пул ўтказмаларини амалга оширишни сўрашмайди! Биз буни расмий равишда эълон қиламиз”, дейилган хабарномада.

ИИВ фуқароларга шундай мазмундаги хабар келган тақдирда, улардан яқин атрофдаги ички ишлар бўлимига хабар беришни илтимос қилган.

Инновацион ривожланиш вазирлиги ўзбек олимлари икки вакцина устида иш олиб бораётганини билдирди

Ўзбекистонлик олимлар томонидан яратилаётган икки вакцина Жаҳон соғлиқни сақлаш ташкилотининг номзод вакциналар рўйхатига киритилган. Бу ҳақда Инновацион ривожланиш вазирлиги матбуот хизмати маълумот тарқатди.

Қайд этилишича, мазкур вазирлик ҳузуридаги Илғор технологиялар марказининг коронавирус S оқсили асосидаги рекомбинант вакцинаси ҳамда Фанлар академиясининг Геномика ва биоинформатика марказининг SARS-Cov-2 оқсил бўлагининг уч соҳаси: pcDNA3. 1 (+) плазмидасига қўйилган NTD, RBD ва HR1-HR2 вакцинаси ҳозирда клиниколди синовларидан ўтяпти.

Вазирлик ЖССТнинг маълумотлар базаси COVID-19 вакцинасига қарши вакцина-номзодлари тўғрисида тўлиқ маълумотларни йиғиб бориши, мазкур база мунтазам равишда – ҳафтасига икки марта янгиланишини эслатган.

“Унда COVID-19га қарши номзод-вакциналарнинг клиник ва клиниколди жадвали келтирилган бўлиб, номзод-вакциналарни таҳлил қилиш имкониятини беради. Ҳар бир вакцинанинг 1-фаза, 2-фаза ва 3-фаза синовлари кузатилади”, дейилган вазирлик хабарномасида.

Аввалроқ ZF -UZ-VAC 2001 вакцинаси тадқиқот ишларида 6 ой иштирок этгани учун Хитой томони Ўзбекистонни “ҳаммуаллиф” деб тан олгани ҳақида хабар қилгандик.

Эпидемия пайтида кексалар ва мактаб ўқувчиларига таровиҳ намозларига бормаслик тавсия қилинди

Коронавирусга қарши кураш комиссиясининг 17 апрель куни Тошкентда ўтган йиғилишида масжидлардаги таровиҳ намозларида 65 ёшдан катталар ва мактаб ўқувчиларининг иштирок этмаслиги тавсия қилинди.

Ўзбекистон Санитария-эпидемиологик осойишталик ва жамоат саломатлиги хизмати раҳбари Баҳодир Юсупалиев бу чекловларни мамлакатда ‘британча’ штамм қайд этилгани ва бу инфекция болалар учун ҳам хавфли экани билан изоҳлади.

Мажлисга раислик қилган Ўзбекистон Бош вазири Абдулла Арипов масжид ва одамлар кўп тўпланадиган жойларда чекловлар инсонлар соғлиғини ўйлаб амалга оширилаётганини айтди.

"Эътиқодни ҳеч ким тақиқлаб қўя олмайди, бу мумкин эмас. Аммо чеклаш деган нарсани ҳаттоки, кечирасизлар-у, Рим католик черковининг бош идораси ҳам одамларнинг диний маросимларда қатнашишини бекор қилди.

Шунинг учун бошқа диний конфессияларга ҳам бу каби маросимларни ўтказишни чеклаш бўйича топшириқ бериш керак. Бу ҳукумат комиссиясининг қарори", — деди Арипов.

Ўзбекистонда коронавирусга чалинганлар сони ортиши ортидан 18 апрелдан карантин талаблари кучайтирилиши, қоидабузарлар қатъий жавобгарликка тортилиши билдирилди.

Ўзбек имомлари чет эл телесериалларини тақиқлашни талаб қилиб чиқишди

Ўзбекистонлик бир гуруҳ имомлар "менталитетга тўғри келмайдиган сериал ва филмлар"ни эфирга узатмасликни таклиф қилди.

Масжид имомлари оилаларда ажрашишларнинг олдини олиш масаласи юзасидан ўтказилган учрашувда шундай талаб билан чиқишган.

Учрашувда ажрашишларга қарши чора сифатида оила қуриш арафасидаги ёшларни имомлар томонидан 3 ойлик курсларда ўқитиш ва оила тушунчасини мактабдан бошлаб алоҳида дарс сифатида ўқитиш каби таклифлар ҳам айтилган.

16 апрель куни жума намозларида ҳам имомлар тарафидан бундай талаблар янграган.

Ўзбекистонда хориж сериалларини тақиқлаш биринчи марта таклиф этилаётгани йўқ.

Икки йил аввал тошкентлик имом Раҳматуллоҳ Сайфутдинов турк сериалларининг "миллат генофондига ёмон таъсири" ҳақида гапирганди.

“Турк сериалларидаги чиройли йигитларни тасаввур қиляпти аёллар, қизлар. “Туш кўрибман, тушимда фалончи актёрни кўрибман”, деган гаплар ижтимоий тармоққа киринг¸ тўлиб ётибди. Эри бор хотин шуларнинг расмини олиб юради, турк сериалларидаги актёрларни расмларини кўтариб юрибди. Тасаввур қилса нима бўлади, ана шундай ҳолатда "ҳаворанг" болалар туғилади, сабаби аёлнинг тасаввурида бошқа эркак бўляпти. У жимо вақти, тўшак вақтида икки киши эмас, уч киши жимо қилаётгандай бўлади. Худди шундай эркаклар ҳам аёллар билан жимо қилаётганда бу нарса лесбиянка деган балоларни келтириб чиқаради”, - деган эди Тошкентнинг Юнусобод туманидаги "Мирза Юсуф" жомеъ масжиди имом-хатиби Раҳматуллоҳ Сайфутдинов 2018 йилнинг 2 март куни қилган жума ваъзида.

Ўтмишда турк сериалларига тақиқ Ислом Каримов бошқарувининг Туркия билан мураккаб муносабатлари билан тушунтирилган. Туркия билан яқин сиёсий, иқтисодий ва маданий муносабатлар ўрнатишга ҳаракат қилаётган Мирзиёев маъмуриятининг хорижий, хусусан турк сериаллари борасидаги қарори ортида сиёсий сабаб бор ёки йўқлиги маълум эмас.

Ўзбекистонда 18 апрелдан карантин талаблари кучайтирилади

Ўзбекистонда коронавирусга чалинган беморлар сони ошиб бораётгани сабабли 18 апрелдан бошлаб мамлакат бўйлаб карантин қоидалари кучайтирилади.

Бу ҳақда Ўзбекистон бош вазири Абдулла Арипов Тошкентда ўтказилган Республика махсус комиссияси йиғилишида маълум қилди.

Янги талабларга кўра, жамоат жойларида одамларнинг ниқоб тақиши ва ижтимоий масофани сақлаши бўйича назорат кучайтирилади ва қоидабузарлар жазоланади.

Коронавирус аниқланган ҳар бир мактабгача таълим, умумтаълим муассасалари, коллеж, лицей ва олий ўқув юртлари ўз фаолиятини икки ҳафтага тўхтатиши ва ўқишни онлайн режимида амалга ошириши керак бўлади.

Тўй ва бошқа маросимларда 100 кишидан ортиқ бўлмаслик, ифторлик маросимларини фақат оила даврасида ўтказиш, масжидларда жамоат намозлари, хусусан Рамазон ойи муносабати билан таровиҳ намозларини масжидларнинг очиқ ҳаводаги майдонларида тиббий ниқобда бўлиш ҳамда оралиқ масофани сақлаган ҳолда ташкил этиш талаб этилади.

Кафе ва бошқа умумий овқатланиш объектларида уларнинг сиғимини 50 фоиздан ортиқ бўлмаган ҳолатда фаолият юритиши лозим, лекин максимал сони 100 кишидан ортиши керак эмас.

1 майдан бошлаб концерт томоша дастурларини ёпиқ маданият саройларида ўтказиш тўхтатилади.

Горовой: МДҲ давлатлари Россияда ноқонуний юрган фуқароларини 15 июнгача олиб кетиши керак!

МДҲ давлатлари Россияда ноқонуний юрган фуқароларини 15 июнгача олиб кетишлари керак, акс ҳолда Москва чегараларни ёпиб қўйишгача бўлган чоралар кўради.

Бу ҳақда Россия ички ишлар вазирининг биринчи ўринбосари Александр Горовой баёнот берди.

Горовойнинг таъкидича, Россияда МДҲ давлатларидан бўлган ноқонуний мигрантлар сони 1 миллиондан ортиқни ташкил қилади.

"Агар улар 15 июнгача кетишмаса, уларни депорт қиилиш ва чегараларни ёпишгача бўлган чора кўрилади", - деди Горовой.

Россияда МДҲ давлатларидан келган муҳохир ишчилар орасида ўзбекистонликлар кўпчиликни ташкил этади.

Ўзбекистон Марказий банки маълумотига кўра, чет давлатларидан муҳожирлар 2021 йил бошидан буён ўз ватанларига $1,42 млрд юборишган.

2021 йилнинг январь-март ойларида республикага келиб тушган халқаро трансчегаравий пул ўтказмалари ҳажми қарийб 1,42 млрд. долларни ташкил этиб, 2020 йилнинг мос даврига нисбатан 336 млн. долларга ёки 31% фоизга ошган.

Президент Мирзиёев Сардоба фожиасидан "юзи ёруғ бўлгани"ни айтди

Президент Мирзиёев сардобаликлар учун қурилган хонадонда

16 апрель куни Самарқанд вилояти фаоллари иштирокидаги йиғилишда президент Шавкат Мирзиёев Сардоба фожиасини эслаб, ўша пайтда қийналгани, кейинчалик эса "юзи ёруғ бўлгани"ни таъкидлади.

“Ёдингизда бўлса, Сардобадаги сув тошқинида айтгандим: “Ҳали шундай пайтлар бўлади, одамлар орасида “Нега бизнинг кўчамизга шу сув келмади?” дейдиганлар бўлади, дегандим.


Мана, ҳамма шароитларини яратиб, кўчириб чиқардик аҳолини. Лекин мен ўша пайтдаги ҳолатни кўриб жуда қийналгандим. Бу синов қайдан келди, деб ўйлангандим. Худога шукр, халқимизнинг олдида юзимиз ёруғ бўлди”, деди президент.


Айнан Сардоба воқеаларини эслай туриб, Мирзиёев фаоллар йиғинида Самарқанд вилояти Паст Дарғом тумани ҳокими Худойбердиевдан ҳисобот талаб қилди. Туман ҳокими эса шу йилнинг сентябрига қадар Ёшлар, Аёллар ва Темир дафтарда фақат ногиронларнигина қолдиришга ваъда берди.


1 май куни Сардоба сув омбори тўғонининг бузилиши оқибатида Сардоба, Оқолтин ва Мирзаобод туманларида, расмий маълумотларга кўра, 2 570 та уй-ҳовли, 76 та кўп қаватли уй яроқсиз ҳолга келган, 1781 ҳовли, 52 та кўп қаватли турар жой қисман зарарланган.

Уйлари бузилганлар орасида ҳануз бошпанасиз яшаётганлари бор ва улар давлат идораларига мунтазам шикоят қилиб келмоқда.

Ўтган йил охирида Сардоба тошқинида уйлари вайрон бўлган бир гуруҳ фуқаролар ҳукумат ваъда қилган 40 миллион сўмлик ёрдам пули ва уй-жой ўзларига берилмаганидан арз қилиб, Вазирлар Маҳкамасига боришганди.

Жабрланганларни бошпана билан таъминлашда коррупция ҳолатларидан шикоят қилган бир неча сардобалик ички ишлар ходимлари томонидан сўроқ қилингани ва маъмурий жазога тортилгани хабар қилинган.

Давлат тили тўғрисидаги қонунчиликни бузганлик учун жавобгарлик кучайтирилмоқда

Ўзбекистон Республикаси Олий Мажлисининг Қонунчилик палатаси Ўзбекистон Республикасининг “Давлат тили тўғрисида”ги қонунини қайта кўриб чиқмоқда ва эндиликда мазкур қонун ҳужжатларини бузганлик учун жавобгарлик кучайтирилади.

Бу ҳақда парламент депутати Расул Кушербаев ўзининг Телеграм-каналида маълум қилди.

Қонундаги жавобгарликни кучайтириш масаласи парламент фракцияларида кўриб чиқилмоқда. Муҳокама жараёнларида мақсад давлат тилининг мавқеи, фуқароларнинг ижтимоий-сиёсий ҳаётидаги ролини кучайтиришга қаратилгани айтилади.

Таклиф қилинаётган ўзгартиришларга кўра, давлат тили, шу билан бирга, Ўзбекистон Республикасида яшовчи бошқа миллатлар ва элатларнинг тилларини менсимаслик, базавий ҳисоблаш миқдорининг уч бараваридан беш бараваригача миқдорда жарима солишга сабаб бўлиши мумкин.

Депутатга кўра, шундай ҳуқуқбузарликлар маъмурий жазо чораси қўлланилганидан сўнг бир йил давомида такрорланса, БҲМнинг беш бараваридан етти бараваригача миқдорда жарима солишга сабаб бўлади. Ҳолбуки, шу пайтга қадар бундай ҳуқуқбузарлик учун БҲМнинг бир бараваридан икки бараваригача миқдорда жарима белгиланган.

Тошкент шаҳар маъмурий судининг истеъфодаги судьяси Озодлик билан суҳбатда мазкур қонун ҳужжатларининг бузилишига нисбатан чора кўриш амалиётда деярли учрамаслиги, бу тартибдаги маъмурий ишларнинг судгача келмаганини эътироф этди.

1989 йили ўзбек тилига давлат тили мақоми берилганига қарамай¸ тилнинг¸ айниқса¸ давлат бошқаруви тизимида тўлиғича муомалага киритилмай қолаëтгани¸ ўзбек тилининг ривожланишидаги қатор муаммоларнинг эътиборсиз қолаëтгани мутахассис ва кенг жамоатчилик танқидига учраб келмоқда.

2019 йил 22 октябрь куни президент Шавкат Мирзиëев “Ўзбек тилининг давлат тили сифатидаги нуфузи ва мавқеини тубдан ошириш чора-тадбирлари тўғрисида” фармон чиқариб¸ унда хусусан¸ Вазирлар Маҳкамаси ҳузурида 9 мутахассисдан иборат Давлат тилини ривожлантириш департаменти ташкил этишни топширган эди.

Давомини ўқинг

XS
SM
MD
LG