Линклар

Шошилинч хабар
02 август 2021, Тошкент вақти: 10:48

Ўзбекистон хабарлари

"Абу Сахий" савдо маркази ходимларида коронавирус топилгани ортидан вақтинча ёпилди

Савдо марказида профилактика тадбирлари ўтказилади.

Тошкент шаҳрининг Чилонзор туманида жойлашган "Tashkent Trade Center" - халқ тилида эски номи билан “Абу Саҳий” деб аталадиган савдо маркази маъмурияти ходимларидан бир нечасида коронавирус инфекцияси борлиги аниқланди.

Чилонзор тумани ҳокимлиги матбуот хизматининг хабар беришича, туман санитария-эпидемиология осойишталик маркази мутахассислари хулосасига кўра, “Tashkent Trade Center” савдо маркази профилактика тадбирларини ўтказиш учун вақтинча ёпилди.

Хабарда савдо маркази ходимлари ва бу ерда фаолият юритувчи тадбиркорлардан коронавирусга тест 6 июлда олингани қайд этилган.

Соғлиқни сақлаш вазирлиги 29 июнь куни ҳам "Tashkent Trade Center" “савдо маркази ходимида коронавирус аниқлангани ҳақида хабар берганди, аммо савдо маркази фаолияти давом эттирилаётганди.

Кун янгиликлари

Коронавирус юқтириб олганлар сони 131 мингдан, пневмонияга чалинганлар сони 11 мингдан ошди

Ўзбекистонда коронавирус инфекцияси қайд этилганлар сони, 2021 йил 1 август ҳолатига кўра, 131 минг 79 нафарга етган.

Соғлиқни сақлаш вазирлиги маълумотига кўра, кеча мамлакат бўйлаб 863 киши коронавирусга чалинган.

Якшанба куни Қорақалпоғистон Республикаси, Жиззах, Қашқадарё, Навоий, Наманган, Самарқанд, Сурхондарё, Фарғона, Тошкент вилоятлари ва Тошкент шаҳрида 733 киши тузалиб, соғайганларнинг умумий сони 124 минг 728 нафарга етган.

ССВ ўтган кеча-кундузда коронавирусга чалинган беморлардан яна 6 нафари вафот этиб, коронавирус қурбонлари сони 886 нафарга етганини қўшимча қилган.

Вазирлик маълумотига кўра, август ойининг биринчи куни яна 498 нафар кишида пневмония аниқланган, 5 июлдан бери эса 11 минг 367 киши пневмонияга чалинган. Булардан 4 минг 253 нафари соғайиб чиққан, 76 нафари эса вафот этган.

Қашқадарёда ногирон онасини урган аёл қилмиши ИИБ ходимлари томонидан ўрганилмоқда

Қарши шаҳрида ногирон онасини уриб-таҳқирлаган О.Ҳ.нинг хатти-ҳаракатлари Қашқадарё вилояти ИИБ ХҚМБ масъул ходимлари томонидан ўрганилмоқда. Бу ҳақда вилоят ички ишлар бошқармаси ахборот хизмати маълумот тарқатди.

Ижтимоий тармоқларда тарқалган видео юзасидан расмий муносабатини билдирган ИИБ онасига қўл кўтарган аёл Қарши шаҳар, Шайхали маҳалласи Бўзтепа кўчасидаги 18-ётоқхонанинг 56-хонасида яшашини маълум қилган.

Қайд этилишича, О.Ҳ. шу йилнинг 13 июль куни Касаба уюшмалари федерацияси Қашқадарё вилояти бошқармаси биноси олдига 1- гуруҳ ногирони бўлган онаси М. А.ни ҳокимият вакилларидан пул ундириш мақсадида олиб келган.

Онасини мазкур манзилда қолдириб кетган аёл бир муддатдан сўнг қайтиб келгач, “нега ҳокимият вакилларидан пул сўрамадинг?!” деб, онасини уриб, таҳқирлаган.

Хабарномада жорий йил бошидан бери О.Ҳ. ва унинг оиласига озиқ-овқат ва нақд пул шаклида 56 миллион сўм моддий ёрдам берилгани, турар-жой билан таъминлангани ҳамда Қарши шаҳар ҳокимлиги томонидан уй-жой қуриш учун 2 сотих ер ажратилгани иддао қилинган.

Вилоят ИИБ онасини урган аёл хатти-ҳаракатлари айни пайтда ўз ходимлари томонидан ўрганилаётганини урғуларкан, О.Ҳ.га нисбатан ҳалигача бирор чора кўрилган-кўрилмаганини очиқлаган эмас.

ФВВ Зоминдаги ёнғин чоғида ҳеч ким жабрланмагани ва қурбон бўлмаганини билдирди

Зоминдаги ўрмон ёнғинини бартараф этишда иштирок этган ходимлар (ФВВ фотоси)

Жиззах вилояти Зомин тумани “Дуоба” маҳалла фуқаролар йиғини “Ўриклисой” аҳоли пункти ҳудудига яқин жойда 1 август куни юзага келган ёнғин оқибатида жабрланган ва ҳалок бўлганлар йўқ. Бу ҳақда Ўзбекистон Фавқулодда вазиятлар вазирлиги маълумот тарқатди.

Вазирлик қайдича, "Зомин" санаторийси яқинида 80 гектар майдонда якшанба куни эрталаб соат 10:40 дан бошланган ёнғин ФВВ, Мудофаа вазирлиги, Ички ишлар вазирлиги, Миллий гвардия, Чегара қўшинлари, Давлат ўрмон хўжалиги қўмитасининг юзлаб ходими иштирокида соат 18:20 га бориб тамоман ўчирилган.

Ёнғинни ўчириш учун 14 та ёнғин ўчириш экипажи, битта ёнғин қутқарув отряди ҳамда тўртта вертолёт жалб этилган ва тақрибан 7 соат вақт сарф қилинган.

“Тегишли идораларнинг куч воситаларининг ўз вақтидаги харакатлари натижасида ёнғин яқин атрофдаги аҳоли пунктларига ўтмади”, дейилган ФВВ хабарномасида.

Айни пайтда Мудофаа вазирлиги Зоминдаги ёнғинни бартараф этишга 400 нафар ҳарбий хизматчидан иборат батальон жалб этилгани, Ҳарбий-ҳаво кучлари вертолёт авиацияси звеноси томонидан Зомин сув омборидан йигирма маротабадан ортиқ махсус восита ёрдамида сув олиниб, ҳаводан олов ўчоқларига 30 тоннадан зиёд сув ташланганини билдирган.

Зомин туманидаги ўрмон ҳудудида 1 август куни ёнғин содир бўлгани ҳақида Озодлик аввалроқ хабар қилган.

Магистратурага кириш имтиҳонлари келаси йилдан Давлат тест марказига ўтказилади

31 июл куни Халқаро пресс-клубнинг олий ўқув юртларига қабул масалаларига бағишланган йиғилишида Олий ва ўрта махсус таълими вазири Абдуқодир Тошқулов магистратурага кириш имтиҳонлари келаси йилдан бошлаб тест марказига ўтказилишини маълум қилди.

Вазир магистратурага қабул кўп йиллар давомида адолатсиз тарзда амалга ошириб келинганини тасдиқлади.

Жорий 2021 йилда мутахассислик бўйича магистратурага кириш имтиҳонлари вақт зиқлиги боис Давлат тест марказида ўтказилмагани айтилди.

Вазирнинг таъкидлашича, эндиликда магистратурага имтиҳонлар уч асосий йўналиш бўйича амалга оширилади: чет тили ва мутахассислиги синов имтиҳонлари ҳамда бакалавр дипломи бўйича олинган ўртача баллар ҳисобига.

Чет тиллар бўйича имтиҳонларнинг Давлат тест марказига ўтказилиши орқали имтиҳон ошкоралигига эришилади, деди вазир Тошқулов.

- Бу йил вақт етишмагани учун магистратурага кириш имтиҳонларини ДТМга топширишга улгурмадик. Келаси йилдан ихтисослик фанлари бўйича имтиҳонлар ҳам ДТМга ўтказилади. Бакалавриатни тугатаётганларнинг ҳаммаси бу ҳақида билиши керак, деди Абдуқодир Тошқулов.

Бундан ташқари, янги тартибларга кўра, кейинги ўқув йилидан чет тили бўийча сертификатга эга бўлмаган абитуриентлар магистратурага имтиҳон топшира олмайдилар.

Ташқи ишлар вазири Абдулазиз Комилов Жанубий Корея расмийлари билан учрашди

2021-йилнинг 31-июл куни Сеулда Ўзбекистон ташқи ишлар вазири Абдулазиз Комилов Яшил ўсиш глобал институти (GGGI) Ассамблеяси раиси, Бирлашган Миллатлар Ташкилотининг собиқ бош котиби Пан Ги Мун билан учрашди.

Бу ҳақда хабар берган Ташқи ишлар вазирлиги матбуот хизматига кўра, Ўзбекистон МДҲ ҳудудида Яшил ўсиш глобал институтига аъзо бўлиб кирган биринчи давлат бўлди.

Таъкидланишича, Тошкентда GGGI нинг Марказий Осиёдаги биринчи ваколатхонаси очилди, ўндан ортиқ қўшма тадбирлар амалга оширилди. Шу муносабат билан Ўзбекистон ва GGGI ўртасидаги қатор соҳаларда ҳамкорликни ривожлантириш, жумладан, глобал иқлим ўзгариши оқибатларини юмшатиш, яшил иқтисодиёт технологияларини жорий этиш, қайта тикланадиган ва водород энергетикасини ривожлантириш масалалари муҳокама қилинди.

Сеулга расмий ташриф билан келган Ўзбекистон Республикаси ташқи ишлар вазири Абдулазиз Комилов Корея халқаро ҳамкорлик агентлиги (КОИCА) президенти Сон Ҳёк Санг билан ҳам учрашди.

Айтилишича, агентликнинг Ўзбекистондаги ваколатхонаси очилганидан буён 130 миллион долларлик 32 дан ортиқ лойиҳа амалга оширилди, Корея Республикасида ўзбекистонлик мутахассисларнинг 2 мингдан ортиқ амалиёти ташкил этилди, 570 дан ортиқ КОИCА кўнгилли экспертлари жалб қилинди.

Учрашувда KOICA ва GGGI ўртасидаги қиймати 5,6 миллион АҚШ долларига тенг лойиҳа доирасида Орол денгизи минтақасининг экологик, ижтимоий-иқтисодий ва демографик ҳолатини яхшилаш бўйича музокаралар олиб борилди.

Абдулазиз Камилов, шунингдек, Корея Республикаси Миллий Ассамблеяси Спикери Пак Бён Сок ва Корея Республикаси Ташқи ишлар вазири Чон Ий Йон билан учрашувлар ўтказди.

Томонлар яқинлашиб келаётган тарихий саналар – дипломатик муносабатлар ўрнатилганининг 30 йиллиги ва 2022-йилда корейс диаспорасининг Ўзбекистонда истиқомат қилишининг 85 йиллигини кенг нишонлаш юзасидан фикр алмашилди.

Каттақўрғонда автобус ағдарилиши оқибатида 2 киши ҳалок бўлди, беш киши жароҳатланди

Самарқанд вилояти Каттақўрғон туманида Бухородан Тошкентга кетаётган Yutong йўловчи автобуси ағдарилиб кетди.

ИИВ Йўл ҳаракати хавфсизлиги бош бошқармаси матбуот хизмати хабар қилишича, йўл -транспорт ҳодисаси 31 июл куни соат 01: 45 ларда “Самарқанд - Бухоро – Туркманбоши” М -37 автомагистралининг 71 -километрида содир бўлган.

Йўл ҳаракати хавфсизлиги маълумотларига кўра, 1983 йилда туғилган ҳайдовчи йўлни кесиб ўтган велосипедчини уриб юбормаслик учун рулни кескин ўнгга буриб юборган ва автобус ағдарилиб кетган.

Автоҳалокат натижасида шахси аниқланаётган 40-45 ёшли шахс тиббий муассасага олиб кетилаётганида йўлда, 24 ёшли йўловчи Ж. Н. эса касалхонада вафот этди. Яна беш киши турли тан жароҳатлари билан маҳаллий шифохонага ётқизилган.

Каттақўрғон туман ИИБ ҳузуридаги Тергов бўлими томонидан Ўзбекистон Жиноят Кодексининг 266-моддаси 3-қисми (“ҳаракат хавфсизлиги қоидаларини бузиш ёки транспорт воситасини ишлатиш қоидаларини бузиш, одамларнинг қурбон бўлиши”) асосида жиноят иши қўзғатилди. Тергов-суриштирув ҳаракатлари давом этмоқда.

Токио-2020: Боксчи Баҳодир Жалолов Токио Олимпиадасининг ярим финал босқичига чиқди

Баҳодир Жалолов

Ўзбекистонлик боксчи Баҳодир Жалолов Токиодаги Олимпиаданинг ярим финал босқичига чиқишга эришди. Бу дегани нуфузли халқаро мусобақасида 39 ўринда кетаётган Ўзбекистон камида яна битта медал соҳибига айланди.

Ўзбекистон делегациясининг байроқдори, ўғир вазн тоифасидаги (+91 кг) бокс устаси чорак финал босқичида ҳиндистонлик Сандуш Кумарни 5:0 ҳисобига енгиб, яримфиналга чиқди.

Янги қоидаларга қўра, яримфиналга чиққан, аммо рақибига бой берган боксчи ҳам бронза медали билан тақдирланади.

Шу тариқа, Ўзбекистон делегациясида битта олтин ва камида иккита бронза медали борлиги тўғрисида айтиш мумкин. Мутахассислар яхши жисмоний формада қолаётган ва ҳозирча енгилмаган 27 яшар Баҳодир Жалоловнинг имкониятларини юқори баҳоламоқда.

Оғир вазндаги ўзбек боксчилари орасида энг юқори поғонада турган Баҳодир бугунда дунёнинг энг қучли боксчилар 40талигидан ўрин олган.

Кейинги учрашувни у франциялик рақиби Фрайзер Кларк билан 4 август куни ўтказади.

25 июль куни таэквондо мусобақаларида Улуғбек Рашитов олтин медални, дзюдочи Давлат Бобонов эса Токио-2020 Олимпиядасининг бронза медалини қўлга киритган эди.

Сенат иш берувчининг ўз ходимларидан эмланишни талаб қилувчи қонунни маъқуллади

Соғлиқни сақлаш вазирлигига кўра¸ 30 июлга қадар  мамлакатда жами "238 980 доза COVID-19га қарши вакцина қўлланилган".

Ўзбекистон Олий Мажлиси Сенатининг навбатдаги ялпи мажлисида “Ўзбекистон Республикасининг айрим қонун ҳужжатларига аҳолининг санитария-эпидемиологик осойишталигини таъминлашга қаратилган ўзгартишлар ва қўшимча киритиш тўғрисида”ги Қонун маъқулланди.

Бу ҳақда 31 июль куни Адлия вазирлигининг Ҳуқуқий ахборот канали хабар қилди.

Расмий хабарда ëзилишича¸ “Фуқаролар соғлиғини сақлаш тўғрисида”ги Қонуннинг 28-моддасида карантинли ва инсон учун хавфли бўлган бошқа юқумли касалликлар тарқалиши хавфи мавжуд бўлган тақдирда Бош давлат санитария врачининг қарори асосида аҳолини профилактик эмлашдан ўтказиш жорий этилиши мумкинлиги тўғрисида аниқ норма киритилмоқда.

Шунингдек¸ Меҳнат кодексининг 113-моддасида ходим юқумли касалликлар тарқалиши хавфи мавжуд бўлган тақдирда жорий этиладиган профилактик эмлашдан ўтишни рад этган тақдирда (соғлиғининг ҳолатига кўра қарши кўрсатма мавжуд бўлмаганда) иш берувчи уни ишга қўймасликка ҳақли эканлиги назарда тутилмоқда.

Иш берувчининг ўз ходимларидан эмланишни талаб қилишига йўл очувчи бу ўзгартиш ва қўшимчалар президент томонидан имзоланиб¸ расмий матбуотда эълон қилинганидан сўнг кучга киради.

Ўзбекистон Соғлиқни сақлаш вазирлигига кўра¸ 30 июлга қадар мамлакатда жами "238 980 доза COVID-19га қарши вакцина қўлланилган".

Улардан 1-босқич эмланганлар 168 506 нафарни, 2-босқич эмланганлар 48 959 нафарни, 3-босқич эмланганлар 21 515 нафарни ташкил қилган.

Андижонда ҳоким қабулига киролмаган аëллар норозилик тариқасида йўл тўсди

Ижтимоий тармоқда тарқаган қисқа видеода ўндан ошиқ аëлнинг йўл тўсиб тургани кўрилади

31 июль куни маҳаллий блогерлар тарқатган хабарга кўра¸ Андижонда бир гуруҳ аëллар шаҳар марказидаги йўлни тўсган.

Айтилишича¸ аëллар бир ойда бир марта оддий халқни қабул қилиши айтилган вилоят ҳокимининг қабулга келмаганига нисбатан ўз норозилигини шундай ифодалаган.

Ижтимоий тармоқларда тарқаган қисқа видеода¸ Андижон вилояти ҳокимлиги деб айтилаëтган бино қаршисида ўнга яқин аëлнинг йўлни тўсиб тургани ва машиналарнинг сигнал чалаëтгани кўрилади.

Озодлик ҳозирда норози аëлларнинг ўзи билан боғланиб¸ воқеа тафсилотларини ўрганишга ҳаракат қилмоқда.

Ўзбекистонда ҳал этилмай келаëтган муаммоларга ҳокимият эътиборини қаратиш мақсадида аëлларнинг йўл тўсиш ҳодисаси тез-тез қайд этилади.

Хусусан¸ йиллардан бери газ ва светсиз яшаëтган вилоятларда¸айниқса¸ қиш мавсумида бундай ҳолатлар кўп кузатилади. Айни пайтда¸ расмийлар норозиликнинг бундай шаклига қарши жазони кучайтирмоқда.

Хусусан¸ жорий Қашқадарё вилоятининг Чироқчи тумани Айритом қишлоғида ўтган ой электр энергияси билан боғлиқ муаммолар туфайли Тошкентдан келаётган “Афросиёб” тез юрар поезди йўлини тўсиб қўйган 9 нафар фуқаро 15 кунга ҳибсга олинди, яна 4 киши жаримага тортилди.

Ўзбекистондаги саноқли аëл ҳокимлардан бири вафот этди

Садбархон Мамитова

Маҳаллий нашрларнинг хабар қилишича¸ Андижон вилояти Бўстон (аввалги Бўз) тумани ҳокими Садбархон Мамитова вафот этган.

Андижон вилояти ҳокимлиги ахборот хизмати «Газета.uz»га айтишича¸ 56 яшар ҳоким ўлимига 12 бармоқли ичак касаллигининг асоратлари сабаб бўлган.

Ўзбекистондаги саноқли аëл ҳокимлардан бўлган Мамитова 2020 йил 4 март куни Бўстон тумани ҳокими этиб тайинланган эди.

Қишлоқ хўжалиги бўйича мутахассис бўлган Мамитова¸ 2007−2008 йилларда туман Хотин-қизлар қўмитаси раиси, 2011−2017 йилларда Жалақудуқ тумани Бандликка кўмаклашиш маркази директори, 2019 йилдан то ҳокимликка тайинлангуча¸ «Юксалиш» умуммиллий ҳаракати Андижон вилояти ҳудудий бўлими бошлиғи бўлиб ишлаган.

Айтилишича¸ Мамитова 31 июль куни ўзи туғилган Жалақудуқ тумани "Дўнг" қишлоғида дафн этилади.

COVID-19: Ўзбекистонда кунлик касалланиш ҳолатлари 900 тага етди

Ўзбекистонда коронавирус инфекцияси қайд этилганлар сони, 2021 йил 29 июль ҳолатига кўра, 128 минг 403 нафарни ташкил этган.

Соғлиқни сақлаш вазирлиги қайдича, пайшанба куни мамлакат бўйлаб 897 киши коронавирусга чалинган, шу тариқа пандемия бошидан бери кунлик касалланиш бўйича аксилрекорд яна янгиланган.

Кеча кун бўйи Қорақалпоғистон Республикаси, Бухоро, Қашқадарё, Наманган, Самарқанд, Сирдарё, Сурхондарё, Фарғона, Хоразм, Тошкент вилоятлари ва Тошкент шаҳрида 650 киши тузалиб, соғайганларнинг умумий сони 122 минг 368 нафарга етган.

ССВ ўтган кеча-кундузда коронавирусга чалинган беморлардан яна 7 нафари вафот этиб, коронавирус қурбонлари сони 866 нафарга етганини қўшимча қилган.

Вазирлик маълумотига кўра, 29 июль куни яна 546 нафар кишида пневмония аниқланган, 5 июлдан бери эса 9 минг 798 киши пневмонияга чалинган. Булардан 3 минг 275 нафари соғайиб чиққан, 66 нафари эса вафот этган.

Президент сайлови учун номзод кўрсатадиган партиялар вакиллари МСКда рўйхатга олинди

МСК Ўзбекистонда президент сайловига старт берилгани ҳақида 23 июль куни эълон қилган

Ўзбекистон Марказий сайлов комиссиясининг 29 июль куни видеоконференц алоқа шаклида ўтказилган галдаги мажлисида президент сайлови учун номзод кўрсатадиган сиёсий партияларнинг ваколатли вакилларини рўйхатга олиш масаласи кўриб чиқилган. Бу ҳақда МСК матбуот хизмати маълумот тарқатди.

Марказий сайлов комиссияси жорий йилнинг 23 июль куни президент сайлови бўйича кампания бошланганини эълон қилгани ҳақида Озодлик аввалроқ хабар берган.

Мазкур санадан сўнг Ўзбекистон ичида фаолият юритаётган бешта сиёсий партия раҳбарлари ўз ваколатли вакилларини тайинлаб, уларни рўйхатдан ўтказиш учун МСКга мурожаат этган ва бунинг учун тегишли ҳужжатларни тақдим қилган.

Марказий сайлов комиссияси Тадбиркорлар ва ишбилармонлар ҳаракати – Ўзбекистон либерал-демократик партияси, Ўзбекистон “Адолат” социал-демократик партияси, Ўзбекистон “Миллий тикланиш” демократик партияси, Ўзбекистон Халқ демократик партияси ҳамда Ўзбекистон Экологик партияси раҳбарлари тавсия этган ваколатли вакилларга тегишли ҳужжатларни кўриб чиқиб, ваколатли вакилларни рўйхатга олиш ҳамда уларга белгиланган шаклдаги гувоҳнома (мандат) бериш ҳақида қарор қабул қилган. Бу гувоҳномалар 29 июль куни ваколатли вакилларга топширилган.

Юқорида саналган партияларнинг ҳаммаси у ёки бу шаклда амалдаги президент Шавкат Мирзиёевнинг сиёсий тутумини қўллашларини билдирганлар.

Ўзбек расмийлари бу гал ҳам на эски (мас., “Бирлик” ва “Эрк” партияси), на-да янги (мас., “Ҳақиқат, Тараққиёт ва Бирдамлик” партияси) мухолифатчи гуруҳлар вакилларини президент сайловига яқинлаштирмоқчи эмасга ўхшайди. Мухолифатчиларга қарши Ўзбекистон ичида кузатилаётган таъқиб ва босимлар ана шулардан дарак бераётгандек.

Марказий банк асосий фоиз ставкасини яна ўзгаришсиз қолдирди

Тошкентдаги Марказий банк биноси

Ўзбекистон Марказий банки бошқаруви жорий йилнинг 29 июль куни асосий ставкани йиллик 14 фоиз даражасида ўзгаришсиз қолдириш тўғрисида қарор қабул қилди.

МБ матбуот хизмати маълумотига кўра, мазкур қарор мамлакат иқтисодиётида “нархларни оширувчи хатарларнинг ортиши ва пандемия билан боғлиқ вазиятнинг кескинлашиб бориши шароитида жорий йил учун инфляциянинг прогноз кўрсаткичларига эришиш ҳамда иқтисодий фаолликни қўллаб[1]қувватлаш ўртасидаги мувозанатни таъминлаш мақсадида” қабул қилинган.

МБ қайдича, июнь ойи якунлари бўйича йил бошидан бери инфляция даражаси 4,4 фоизни ташкил этган ва йиллик инфляция даражаси 10,9 фоизга тенг бўлган.

Регулятор жорий йилнинг II чорагида базавий инфляция кўрсаткичи пасаювчи динамикага эга бўлиб, июнь ойи якуни бўйича йиллик 10,2 фоизни ташкил этгани ва унинг умумий инфляцияга ҳиссаси 7,8 фоизгача камайганини билдирган.

МБ иддаосича, 2021 йилнинг I ярим йиллигида Ўзбекистонда ялпи ички маҳсулотнинг реал ўсиши ўтган йилнинг мос даврига нисбатан 6,2 фоизни ташкил этган. Шундан саноат 8,5 фоизга, хизмат кўрсатиш 18,3 фоизга, қишлоқ хўжалиги 1,8 фоизга ва қурилиш ишлари 0,1 фоизга ўсган.

Ўзбекистон Марказий банки бошқаруви 2020 йил сентябрь ойида асосий ставкани 1 фоизга пасайтириб, йиллик 14 фоиз даражасида белгилаган, ўтган йилнинг октябрь ва декабрь ойларида, шунингдек, 2021 йил 21 январи, 11 марти, 22 апрели ва 10 июнида бу кўрсаткични ўзгаришсиз қолдирганди.

МБ бошқарувининг асосий ставкани кўриб чиқиш бўйича галдаги йиғилиши 2021 йил 9 сентябрига белгиланган.

Қўшма Штатлардан Ўзбекистонга 3 миллион дозадан зиёдроқ Moderna вакцинаси олиб келинди

Жорий йилнинг 30 июлига ўтар кечаси АҚШдан Ўзбекистонга коронавирусга қарши 3 миллион 60 доза Moderna вакцинаси келтирилган. Бу ҳақда Соғлиқни сақлаш вазирлиги матбуот хизмати маълумот тарқатди.

Мазкур вакцина Қўшма Штатлар томонидан ЖССТнинг COVAX дастури доирасида беғараз ёрдам ўлароқ ажратилган.

Гуманитар юкни Тошкент аэропортида икки мамлакат расмийлари ва халқаро ташкилотлар вакиллари қабул қилиб олганлар.

Moderna АҚШда кенг қўлланилаётган учта вакцинадан, ЖССТ томонидан тан олинган бешта вакцинадан бири бўлиб ҳисобланади. Қўшма Штатлар расмийлари коронавирус инфекциясини бартараф этишда 94 фоиздан кўпроқ самарадорликка эга эканини билдиришган.

18 ёшдан катта бўлган аҳоли вакилларини эмлаш учун тавсия этилган Moderna вакцинаси Ўзбекистонга олиб келинаётгани ҳақида аввалроқ президент Ш. Мирзиёев эълон қилган эди.

Мазкур вакцина келтирилиши ортидан Ўзбекистонда жами вакцина захираси 12 миллион 580 минг 60 дозани ташкил қилган. Улардан 710 минг дозаси AstraZeneca, 370 минг дозаси "Спутник V", 8,5 миллион дозаси ZF-UZ-VAC2001 вакцинасидир.

Жорий йилнинг 28 июль ҳолатига кўра, Ўзбекистонда коронавирус инфекциясига қарши жами 6 миллион 982 минг 431 доза вакцинадан фойдаланилган, 1 миллион 149 минг 687 нафар фуқаро тўлиқ эмланган.

Бош прокуратура Деновда профилактика инспектори фуқарони уриб ўлдирганини тасдиқлади

Бош прокуратура 29 июнь куни кечга яқин Сурхондарё вилояти Денов туманида профилактика инспектори ва унинг икки ёрдамчиси фуқарони уриб ўлдирганини тасдиқлади.

Аввалроқ ижтимоий тармоқларда Денов тумани Оқтом маҳалласида яшаган Ҳасан Хушматовни ички ишлар ходимлари қийнаб ўлдиргани тўғрисида хабарлар пайдо бўлганди.

Бош прокуратуранинг билдиришича, 10 июль куни Ҳасан Хушматов маст ҳолда ўз уйида жанжал кўтаргани тўғрисида маълумот олган профилактика инспектори икки ёрдамчиси билан воқеа жойига келади. Улар Хушматовни автомашинага ўтказиб, туман ИИБга олиб кетишган.

“Йўлда профилактика инспекторининг ёрдамчилари Ҳ.Хушматовни бир неча бор уриб тан жароҳати етказган. Оқибатда Ҳ.Хушматов 11 июль куни шифохонада вафот этган. Мазкур ҳолат юзасидан Денов туман прокуратураси томонидан Жиноят кодексининг 104 - ва 206-моддалари билан жиноят иши қўзғатилган. Жиноят иши доирасида 2 нафар шахсга нисбатан “қамоққа олиш” эҳтиёт чораси қўлланилган,”-дейилади хабарда.

Бош прокуратура хабарида қўлга олинган 2 шахс ким экани тўғрисида аниқ маълумот берилмади.

“Абитуриент рухсатномаси”ни бериш 1 августдан бошланади

Тест синовлари очиқ стадион ва хиёбонларда ўтказилади.

Ўзбекистондаги олийгоҳларнинг бакалавриатига кириш учун тест синовларида иштирок этадиган абитуриентларга рухсатнома бериш 1 августдан бошланади.

Давлат тест марказининг 29 июлда билдиришича, бунинг учун онлайн рўйхатдан ўтган бўлиши лозим. Янги ўқув йили учун онлайн тарзда ҳужжат қабул қилиш 20 июндан бошланган эди.

Олий таълим муассасаларига кириш тест синовлари 5 августдан бошланиши ҳақида Олий ва ўрта махсус таълим вазирлиги 27 июль куни маълум қилди. Тест синовлари очиқ стадион ва хиёбонларда ўтказилади.

Тест синовлари икки сменада уюштирилиб, биринчи смена соат 7дан, иккинчи смена соат 19дан бошланади. Тест саволлари қисқартирилиб, мажбурий фанлардан улар 10 тадан бўлади.

Абитуриентларга 5 та фан бўйича жами 70 та тест топшириғи берилади. Максимал балл — 189 баллни ташкил этади.

Олмалиқда қиймати деярли 5 миллиард долларлик мис кони ва фабрикасининг тамал тоши қўйилди

Президент Мирзиёев Олмалиқда 3-мис фабрикасининг тамал тошини қўймоқда.

Президент Шавкат Мирзиёев 29 июль куни Олмалиқ кон-металлургия комбинатида 3-мис бойитиш фабрикаси қурилишининг тамал тошини қўйди. Бу ҳақда президент матбуот хизмати маълум қилди.

Расман билдирилишича, 2024 йилда ишга тушириладиган мазкур мажмуада жами 6 мингта иш ўрни ташкил этилиши режалаштирилган. Лойиҳанинг умумий қиймати 4 миллиард 894 миллион долларни ташкил қилади. 3-Мис бойитиш фабрикаси 60 миллион тонна мис-молибден рудасини қайта ишлаш қувватига эга бўлади.

Мис бойитиш фабрикасини “Ёшлик-1” кони хом ашё билан таъминлайди. Ҳудуди 11 минг гектар бўлган мазкур кондан йилига 65 миллион тонна маъдан қазиб олинади.

Олмалиқ кон-металлургия комбинати очиқ ва ерости конлари, металлургия ва цемент заводлари, кенг қамровли инфратузилма объектларини бирлаштирган улкан саноат мажмуасидир.

Ўзбекистонда ишлаб чиқарилаётган саноат маҳсулотининг 7 фоизи, экспорт ҳажмининг 15 фоизи мазкур комбинат ҳиссасига тўғри келади.

Қашқадарё вилоятида кучли шамол оқибатида аҳоли электрсиз қолди

Шамол Қарши шаҳар “Гунгон” маҳалласидаги кўп қаватли уйнинг томни учириб кетди. Қашқадарё вилоят Уй-жой коммунал хизмат кўрсатиш бошқармаси олган фотосурат.

Қашқадарё вилоятида 26—27 июль кунлари юз берган кучли шамол оқибатида юзлаб турар-жой бинолари электр таъминотидан узилиб қолди. Бу ҳақда Қашқадарё вилоят Уй-жой коммунал хизмат кўрсатиш бошқармаси 29 июль куни маълум қилди.

Билдирилишича, Косон Чироқчи туманларида ва Қарши шаҳрида электр тармоқларининг 5—10 фоизига жиддий шикаст етган. Электр таъминотидаги узилишни бартараф этиш мақсадида 60 дан ортиқ гуруҳ таъмирлаш ишларини олиб бормоқда.

Уй-жой коммунал хизмат кўрсатиш бошқармаси шамол Қарши шаҳар “Гунгон” маҳалласидаги кўп қаватли 3-уйнинг 80 квадрат метрли тунука томини учириб кетганини ҳам маълум қилди. Айни пайтда томни қайта тиклаш ишлари олиб борилмоқда.

Ўзбекистондаги қатор аэропортлар, музей ва метро бекати архитектори вафот этди

Серго Сутягин Ўзбекистонда хизмат кўрсатган меъмор унвонига сазовор бўлган.

Ўзбекистонда хизмат кўрсатган меъмор Серго Сутягин 29 июль куни Тошкентдаги Боткин қабристонига дафн этилди.

Facebook`даги “Шаҳарсозлик Тўлқини” саҳифасида билдирилишича,таниқли архитектор коронавирус оқибатида 28 июль куни вафот этди. У 84 ёшда эди.

Серго Сутягин Совет даврида “Панорама”, мустақиллик йилларида Алишер Навоий номи билан атала бошланган Тошкентдаги киносарой, “Космонавтлар” метро бекати, “Аркада” савдо маркази, Чирчиқ шаҳрига киришдаги Кранлар ёдгорлиги архитектори эди.

Бундан ташқари у Термиз, Урганч, Қарши ва Бухородаги аэропортлар, Нукусдаги Игорь Савицкий музейи биноларини лойиҳалаштирган.

Шунингдек, унинг лойиҳаси асосида Москвадаги “Хотира дарвозаси” барпо этилган.

Коронавирус юқтириб олганлар сони 127 мингдан, пневмонияга чалинганлар сони эса 9 мингдан ошди

Ўзбекистонда коронавирус инфекцияси қайд этилганлар сони, 28 июль ҳолатига кўра, 127 минг 506 нафарга етган.

Соғлиқни сақлаш вазирлиги қайдича, кеча мамлакат бўйлаб 879 киши коронавирусга чалинган, шу тариқа пандемия бошидан бери кунлик касалланиш бўйича аксилрекорд янгиланган.

Сешанба куни Қорақалпоғистон Республикаси, Жиззах, Навоий, Наманган, Самарқанд, Сирдарё, Фарғона, Хоразм, Тошкент вилоятлари ва Тошкент шаҳрида 573 киши тузалиб, соғайганларнинг умумий сони 121 минг 718 нафарга етган.

ССВ ўтган кеча-кундузда коронавирусга чалинган беморлардан яна 6 нафари вафот этиб, коронавирус қурбонлари сони 859 нафарга етганини қўшимча қилган.

Вазирлик маълумотига кўра, 28 июль куни яна 529 нафар кишида пневмония аниқланган, 5 июлдан бери эса 9 минг 252 киши пневмонияга чалинган. Булардан 3 минг 26 нафари соғайиб чиққан, 63 нафари эса вафот этган.

"Ўзгидромет" 31 июлгача водий вилоятларида сел келиши мумкинлигидан огоҳлантирди

Фарғона водийси вилоятларида икки ҳафта муқаддам кузатилган сел туфайли пачоқланган автомобиль

Фарғона водийсининг тоғли ва Қирғизистон билан чегарадош ҳудудларида кутилаётган ёғин-сочин ҳисобига 29-31 июль кунлари Андижон, Наманган, Фарғона вилоятларида сел келиши хавфи мавжуд. Бу ҳақда Ўзбекистон Гидрометеорология хизмати маркази маълумот тарқатди.

Мазкур эълонга эътибор қаратган Фавқулодда вазиятлар вазирлиги тоғолди ҳудудларида яшовчи аҳолини эҳтиёт чораларини кўриш лозимлиги ҳақида огоҳлантириб, нохуш вазият вужудга келган тақдирда, “1050” қисқа рақами орқали вазирликка мурожаат қилишга чақирган.

Жорий йил 13 июль куни Наманган вилоятининг Косонсой туманида кучли сел келиши оқибатида 9 киши ҳалок бўлган, 6 киши жароҳатланган эди. Ўшандаги табиий офатга Қирғизистоннинг Жалолобод вилоятида ёққан кучли ёмғир сабаб бўлгани айтилганди.

Қозоғистонда рўй берган автоаварияда 8 нафар ўзбекистонлик жабрланди

Қозоғистоннинг Ақтўбе вилоятида 28 июль куни юз берган йўл-транспорт ҳодисаси чоғида 8 нафар ўзбекистонлик жабрланган.

Nur.kz нашрининг Ақтўбе вилоят полиция департаментидан олинган маълумотга таянган ҳолда хабар қилишича, ҳодиса чоршанба куни эрталабки соат 07.10 да Самара-Чимкент йўлининг 996 километрида (Қарабутақ қишлоғи яқинида) содир бўлган.

Полиция маълумотига кўра, Атирау вилоятидан бўлган 36 ёшли ҳайдовчи Toyota Previa бошқаролмай қолган, натижада автомашина йўл четидаги қияликка қулаган.

ЙТҲ натижасида ҳайдовчи ва машинада бўлган 8 нафар ўзбекистонлик йўловчига турли даражада тан жароҳати етган, улар маҳаллий касалхонага етказилганлар.

Автоаварияга йўлиққан ўзбекистонлик муҳожирларнинг Атирауга ишлаш учун кетаётгани очиқланган.

Қозоғистонлик тартиб посбонлари маълумотига мувофиқ, ҳодиса юзасидан мамлакат Жиноят кодексининг 345-моддаси 2-қисми бўйича (Йўл ҳаракати хавфсизлиги қоидаларини бузиш орқали эҳтиётсизлик оқибатида инсон саломатлигига оғир шикаст етказиш) судгача суриштирув ишлари олиб борилмоқда.

Аввалроқ Озодлик 2018 йилнинг 18 январь куни Самара-Чимкент автойўлининг Ақтўбе вилоятидан ўтадиган қисмида автобусда кетаётган 52 нафар ўзбекистонлик тириклайин ёниб кетгани ҳақида хабар қилганди. Ёнаётган автобусдан фақат 5 киши – автобуснинг уч ҳайдовчиси ва ўзбекистонлик икки нафар йўловчи қочиб чиқишга улгуролган, холос.

Ўзбекистонда БМТнинг Ногиронлар ҳуқуқлари тўғрисидаги конвенцияси кучга кирди

Жорий йилнинг 28 июлидан Ўзбекистонда БМТнинг Ногиронлар ҳуқуқлари тўғрисидаги конвенцияси кучга кирди. Бу ҳақда Ташқи ишлар вазирлиги матбуот хизмати маълум қилган.

2008 йилдан бери амалда бўлган мазкур конвенция Ўзбекистон томонидан 2009 йилнинг 27 февралида имзоланган ҳамда 2021 йил 7 июнида ратификация қилинган эди.

184 та давлат аъзо бўлган ушбу халқаро шартнома 50 та моддадан иборат бўлиб, унда ногиронлиги бўлган шахсларнинг ҳуқуқлари ва асосий эркинликлари, жумладан уларнинг яшаш, фуқаролик, ҳуқуқий ҳимояланиш, таълим олиш, саломатликларини сақлаш, бошқалар билан тенг равишда меҳнат қилиш, бўш вақтни ўтказиш, дам олиш ва спорт билан шуғулланиш, етарлича турмуш шароитига эга бўлиш ва ижтимоий ёрдам ҳуқуқлари эътироф этилган ва уларни амалга оширишнинг ҳуқуқий кафолатлари белгиланган.

ТИВ хабарномасида конвенцияда иштирок этиш Ўзбекистон қонунчилигини ва ногиронлиги бўлган шахсларни ижтимоий ҳимоя қилиш тизимини янада такомиллаштиришга ҳамда уларни халқаро норма ва стандартларга мувофиқлаштиришга хизмат қилиши айтилган.

Аввалроқ маҳаллий матбуот Ўзбекистонда 30 йил ичида ногиронлар ҳуқуқларини ҳимоя қилишга бағишлаб қабул қилинган қонунларнинг 90 фоизи амалда ишламагани ҳақида ёзиб чиққанди.

Мирзиёев яна бир бор ўзбекистонликларни эмланишга даъват этди

Ўзбекистон президенти Шавкат Мирзиёев 28 июль куни ўтказилган видеоселектор йиғилишида мамлакатда эмлов жараёнини жадаллаштириш зарурлигига эътибор қаратган.

Ўзбекистонликлар ўз соғлиғи учун ўзлари жавобгар эканини таъкидлаган президент “вакцинация, вакцинация ва яна бир марта вакцинация” дея такрорлаган.

Мирзиёев вакцина олганлар шифохонадан тўрт кунда чиқаётгани, эмланмаганларга эса жуда оғир бўлаётгани, вакцина олгандан кейин касалланиш мумкинлиги, лекин эмловдан ўтганларда касаллик енгил кечаётганини қайд этган.

Таҳлиллар коронавирус пандемияси яна 10 йил давом этиши мумкинлигини кўрсатаётганини айтган президент эндиликда жамият бу вирус билан яшашни ўрганини зарурлигини қўшимча қилган.

Мирзиёевга кўра, мамлакатдаги эпидемиологик вазият мураккаблашиб бормоқда, бундай вазиятда эса асосий чора вакцинацияни кучайтиришдир.

АҚШдан “3 миллион доза вакцина 4 август куни эмас, эртага (29 июль куни – таҳр.)” келаётганини билдирган президент ҳар бир вилоят ҳокимига вакцинация жараёнини “қаттиққўллик билан” тизимли назоратга олиш ҳақида топшириқ берганини урғулаган.

Президентнинг айтишича, тез орада Ўзбекистонда Россия (Спутник V) ва Хитой (ZF-UZ-VAC2001) вакциналарини ишлаб чиқариш йўлга қўйилади, кейин эса бу вакциналардан ҳар бир вилоятга “қанча керак бўлса, шунча” етказиб берилади.

Мирзиёев йиғилиш давомида мамлакатда олимлар, зиёлилар ҳам одамларни вакцина олишдан қайтаришаётганидан ёзғирган.

Аввалроқ Тошкентда ўтказилган матбуот анжуманида профессор Зариф Ибодуллаев ZF-UZ-VAC2001 вакцинасининг яратилишида Ўзбекистондан вирусологлар эмас, ғўзашунос олимлар иштирок этганини айтиб, ўзбек-хитой вакцинаси самарадорлигига шубҳа билдирган эди. Бунга жавобан Инновацион ривожланиш вазирлиги вакиллари вакциналарни ишлаб чиқаришда молекуляр генетика билан шуғулланган мутахассислардан фойдаланиш жуда муҳимлигини таъкидлаган эдилар.

Япония "аёллар бизнесини ривожлантириш" учун Ўзбекистонга деярли 3 миллион доллар беради

Жиззахдаги корхоналардан бири.

Япония Ўзбекистоннинг чекка қишлоқларида “Аёллар дафтари”га киритилган хотин-қизларни қўллаб-қувватлаш лойиҳасини амалга ошириш учун 2 миллион 728 минг доллар миқдорида маблағ ажратди.

Маҳалла ва оилани қўллаб-қувватлаш вазирлигининг билдиришича, “Ўзбекистондаги қишлоқ аёлларининг иқтисодий имкониятларини кенгайтириш” лойиҳаси доирасида Япония ажратган маблағ ҳисобидан 3500 аёл тадбиркорликка ўқитилади, 350 та бизнес лойиҳа молиялаштирилади.

Мазкур лойиҳа 2021-2024 йилларда Фарғона вилоятининг Фурқат, Сўх, Ёзёвон, Қўштепа ва Жиззах вилоятининг Янгиобод, Бахмал, Фориш, Зомин туманларида амалга оширилади.

“Лойиҳанинг аҳамияти шундаки, ижтимоий ҳимояга муҳтож хотин-қизлар билан ишлашда давлат органлари, жамоат ташкилотлари, тадбиркорлик субъектлари ва фуқаролар йиғинлари ўртасидаги ижтимоий ҳамкорлик янада мустаҳкамланади”,-дейилади расмий хабарда.

Давомини ўқинг

XS
SM
MD
LG