Линклар

Шошилинч хабар
25 сентябр 2020, Тошкент вақти: 19:17

Ўзбекистон хабарлари

Ҳукумат коронавирусга қарши вакцина сотиб олиш имкониятларини ўрганади

Хитой, Ҳиндистон, Буюк Британия, Россия яқин вақт ичида вакцина ишлаб чиқаришни бошлаши хабар қилинмоқда.

Президент Шавкат Мирзиёев 4 агустда ўтган видеоселектор йиғилишида Бош вазир ўринбосари Беҳзод Мусаевга хориж давлатларидан коронавирусга қарши вакцинани сотиб олиш имкониятларини ўрганиб чиқишни топширди.

Президент матбуот хизматининг билдиришича, йиғилишда Хитой, Ҳиндистон, Буюк Британия, Россия фармацевтика компаниялари яқин вақт ичида вакцина ишлаб чиқаришни бошлаши ҳақида хабар қилинаётгани таъкидланган.

“Бош вазир ўринбосари Беҳзод Мусаевга бир ҳафта муддатда етакчи олимлар ва тажрибали шифокорлар билан маслаҳатлашган ҳолда, вакцинани харид қилиш ва мамлакатимиз аҳолиси вакцинациясини амалга ошириш йўлларини пухта ўрганиб чиқиш топшириғи берилди”,- дейилади хабарда.

Йиғилишда маълум қилинишича, Ўзбекистонда коронавирусга қарши кураш юзасидан қўшимча чоралар кўрилди. Жумладан, охирги 20 кунда коронавирусни даволаш ўринлари 3,5 баробарга кўпайтирилди ва қарийб 65 мингтага етказилди.

Жойларга қўшимча равишда қарийб 800 та тез тиббий ёрдам машиналари етказиб берилди. Қўшимча 4 мингта нафас бериш ускуналари (ЎСВ, портатив сунъий нафас бериш аппарати, кислород концентратори) олиб келиниб, уларнинг сони 6,5 мингтага етди.

Кун янгиликлари

Фарғона вилоятига Хайрулло Бозоров ҳоким вазифасини бажарувчи этиб тайинланди

Хайрулло Бозоров.

Фарғона вилояти фаолларининг 25 сентябрь куни бўлиб ўтган йиғилишида бошқа ишга ўтганлиги сабабли вилоят ҳокими Шуҳрат Ғаниев вазифасидан озод этилгани эълон қилинган.

Фарғона вилояти ҳокимлиги Ахборот хизмати маълумотига кўра, йиғилишда Ўзбекистон президентининг тавсиясига кўра илгари Наманган вилояти ҳокими бўлиб ишлаган Хайрулло Бозоров Фарғона вилояти ҳокими вазифасини бажарувчи этиб тасдиқланган.

Тадбирда Ўзбекистон бош вазири Абдулла Арипов ҳамда президенти администрацияси раҳбари Зайнилобиддин Низомиддиновлар иштирок этишиб сўзга чиқишган.

Маҳаллий нашрлар хабарларига кўра, Фарғона вилояти ҳокими вазифасидан озод этилган Шуҳрат Ғаниев Ўзбекистон Бош вазирининг аграр ва озиқ-овқат соҳаларини ривожлантириш масалалари бўйича ўринбосари лавозимига тайинланиши кутилмоқда.

Аввалроқ Хайрулло Бозоров ўрнига Наманган вилояти ҳокими вазифасини бажарувчи этиб Шавкатжон Абдураззоқов тайинлангани ҳақида хабар қилган эдик.

Самарқандда оиладаги зўравонликка дучор бўлган аёлларга “ҳимоя ордерлари” берилди

Иллюстратив сурат.

Самарқанд вилоятида ўтказилаётган “Тазйиқ ва зўравонликка қарши курашиш ойлиги” доирасида Ички ишлар бошқармаси ходимлари ҳамда жамоатчилик вакиллари вилоятдаги 3300 дан зиёд оиладаги вазиятни ўрганган. Бу ҳақда Самарқанд вилояти ИИБ матбуот хизмати маълумот тарқатди.

Қайд этилишича, улар 5 кун ичида 365 та низоли оила билан профилактик ишлар олиб борганлар. Мазкур оилаларда 47 муаммо аниқланиб, шундан 25 таси жойида ижобий ҳал этилган. 29 та ҳолатда нотинчликка барҳам берилиб, 11 та ҳолатда ажрим ёқасига келиб қолган оилалар ўзаро яраштирилган.

Хабарномада айтилишича, тадбир давомида оила турмуш муносабатлари доирасида хотин-қизларга нисбатан тазйиқ ва зўравонлик содир этган 16 та шахс аниқланган. Инспекторлар томонидан жабрланган аёлларга “ҳимоя ордерлари” расмийлаштирилиб, ордерда белгиланган чеклов талаблари бўйича зўравон шахслар билан батафсил ҳуқуқий тушунтириш ишлари олиб борилган.

Россия Ўзбекистонга ўзида ишлаб чиқарилган 35 миллион доза вакцинани етказиб беради

Россия бевосита инвестициялар жамғармаси (РБИЖ) ва LAXISAM фармацевтика ширкати Ўзбекистонга коронавирусга қарши Россияда ишлаб чиқарилган “Спутник V” вакцинасидан 35 миллион дозагача етказиб бериш ҳақида келишувга эришган. Бу ҳақда РБИЖ матбуот хизмати маълумот тарқатди.

Хабарномада қайд этилишича, Ўзбекистондаги тегишли идоралари томонидан маъқулланганидан кейин 2020 йили республикага 10 миллион дозагача, 2021 йили эса яна 25 миллион дозагача вакцина етказиб берилиши мумкин.

Гамалея номидаги Эпидемиология ва микробиология миллий тадқиқот маркази томонидан ишлаб чиқилган “Спутник V” вакцинаси шу йил 11 августида Россия Соғлиқни сақлаш вазирлиги томонидан рўйхатга олинган эди.

Аввалроқ Россия бевосита инвестициялар жамғармаси ўз ҳамкори “Химрар”илмий-фармацевтика маркази билан биргаликда коронавирусга қарши ишлаб чиқилган “Авифавир” препаратини 20 дан зиёд мамлакатга етказиб бериши ҳақида маълумот тарқатган. Жамғарма қайдича, мазкур препарат Ўзбекистон, Беларусь, Боливия, Қозоғистон, Қирғизистон ва Туркманистонга етказиб бўлинган, айни пайтда уни яна 17 та мамлакатга етказиб бериш кутилмоқда.

Наманган вилоятига янги ҳоким тайинланди

Жорий йил мартидан Экология ва атроф-муҳитни муҳофаза қилиш давлат қўмитаси раиси сифатида ишлаб келган Шавкатжон Абдураззоқов 25 сентябрь куни фаоллар иштирокида ўтказилган мажлисда Наманган вилояти ҳокими вазифасини вақтинча бажарувчи этиб тайинланди. Бу ҳақда Ўзбекистондаги қатор маҳаллий нашрлар хабар қилди.

Дарё.уз нашри хабарига кўра, жума куни Наманганда бўлиб ўтган мазкур мажлисда Президент Администрацияси раҳбари Зайнилобиддин Низомиддинов ва Ўзбекистон бош вазири Абдулла Арипов қатнашган.

Йиғилишда Наманган вилоятига ҳокимлик қилиб келган Хайрулло Бозоров бошқа ишга ўтганлиги муносабати билан вилоят ҳокими лавозимидан озод этилгани тўғрисидаги президент фармони ўқиб эшиттирилган. Сўнгра президентнинг бошқа бир фармони билан Ўзбекистон Экология ва атроф-муҳитни қўмитаси раиси бўлиб ишлаб келган Шавкатжон Абдураззақов Наманган вилояти ҳокими вазифасини бажарувчи этиб тайинланган.

Маҳаллий нашрларнинг ёзишларича, Наманган вилоятининг аввалги ҳокими Х. Бозоров Фарғона вилоятига ҳоким бўлиши, Фарғона вилояти ҳокими Шуҳрат Ғаниев эса Ўзбекистон Бош вазирининг аграр ва озиқ-овқат соҳаларини ривожлантириш масалалари бўйича ўринбосари лавозимига тайинланиши кутилмоқда.

ОАВ: Шуҳрат Ғаниевнинг Бош вазир ўринбосари бўлиши кутилмоқда

Фарғона вилояти ҳокими Шуҳрат Ғаниев.

Шуҳрат Ғаниев Фарғона вилояти ҳокими лавозимидан озод этилади. Унинг Ўзбекистон Бош вазирининг аграр ва озиқ-овқат соҳаларини ривожлантириш масалалари бўйича ўринбосари лавозимига тайинланиши кутилмоқда, деб хабар берди 25 сентябрь куни «Дарё» нашри ўз манбасига таянган ҳолда.

Хабарда айтилишича: “25 сентябрь куни халқ депутатлари Фарғона вилояти кенгашининг навбатдан ташқари сессияси ўтказилиши кўзда тутилган. Унда шу вақтгача Наманган вилояти ҳокими лавозимида ишлаб келган Хайрулло Бозоров Фарғона вилоятининг янги ҳокими сифатида жамоатчиликка таништирилиши кутилмоқда”.

Нашрнинг ўз манбаларига таяниб билдиришича, Наманган вилояти ҳокими лавозимига ким тайинланиши ҳақида ҳозирча аниқ маълумот йўқ, бироқ 25 сентябрь куни бу ерда ҳам ҳудудий кенгашнинг навбатдан ташқари сессияси ўтказилиши, унда ташкилий масала кўрилиши айтилмоқда.

Орадан бир оз ўтгач "Кун уз" нашри ҳам ўз манбасига таянган ҳолда 2011 йилдан бери Фарғона вилоятини бошқариб келаётган Шуҳрат Ғаниев Бош вазир ўринбосари лавозимига тайинланиши кутилаётганини билдирди.

"Ўз навбатида, 2017-2020 йилларда Наманган шаҳрига ҳокимлик қилган, айни вақтда Экология ва атроф муҳитни муҳофаза қилиш давлат қўмитаси раиси лавозимида ишлаётган Шавкат Абдураззоқов Наманган вилояти ҳокими лавозимини эгаллаши кутилмоқда", - деб қўшимча қилди нашр.

24 сентябрь куни кечга яқин ижтимоий тармоқларда Шуҳрат Ғаниев Фарғона вилояти ҳокими лавозимидан озод этилгани тўғрисидаги хабарлар тарқалган эди.

Бироқ Фарғона вилоят ҳокими матбуот котиби Муҳаммаджон Обидов бу ахборотни рад этган ва “Шуҳрат Ғаниев лавозимидан озод этилмаганини, айни пайтда ҳукумат йиғилишида иштирок этаётганини” ёзганди.

Бош вазирнинг аграр ва озиқ-овқат соҳаларини ривожлантириш масалалари бўйича аввалги ўринбосари Ўктам Барноев 20 сентябрь куни 56 ёшида вафот этди. Унинг коронавирусдан даволанаётгани маълум қилинганди.

Ростовда уйига қайтиш учун поездга чиқаётган ўзбекистонлик вафот этди

Ўзбекистонга жўнатилишини кутиб, Россиядаги чодир шаҳарчада яшаётган муҳожирлар.

Ростов вилоятида 19 сентябрь куни куни ўзбекистонликларни олиб келиш учун юборилган поездга чиқаётган 33 ёшли Р.Ж., вафот этди.

Ташқи ишлар вазирлиги Консуллик-ҳуқуқий департаментининг билдиришича, 1987 йил 13 сентябрда туғилган Ўзбекистон фуқароси Р.Ж., “Лихая” станцияси олд томонидаги майдонда ўзини ёмон ҳис қила бошлаган ва тез тиббий ёрдам етиб келгунича вафот этган.

Аввалроқ Россия нашрлари вафот этган ўзбекистонлик Ростов вилояти Каменск-Шахтинск шаҳрида муҳожирлар учун ташкил қилинган чодир шаҳарчада яшагани ҳақида билдирган эди.

Хабарда мазкур шахс шаҳар марказий шифохонасига мурожаат қилгани, унинг бир томонлама пневмония ва қон-томир касаллигига чалингани аниқлангани ҳам айтилганди.

Бироқ Ўзбекистоннинг Ростов-Дон шаҳридаги Бош консулхонаси берган маълумотга кўра, Р.Ж., чодир шаҳарчада яшамаган. У Санкт-Петербург шаҳридан Каменск-Шахтинскка 14 сентябрда етиб келган ва соғлиги ёмонлашгани сабабли шаҳар касалхонасига ётқизилган.

19 сентябрь куни у касалхонадан поездга чиқарилиш учун “Лихая” станциясига олиб борилган.

Расмий маълумотда таъкидланишича: "фуқаронинг коронавирус билан касаллангани тасдиқланмаган. Марҳумнинг жасади чартер рейс орқали Ўзбекистонга жўнатилган”.

Коронавирусдан вафот этганлар сони расман 447 кишига етди

24 сентябрь куни мамлакатда 519 ҳолатда касаллик қайд этилди, 609 нафар бемор тузалди.

Соғлиқни сақлаш вазирлигининг 25 сентябрь куни билдиришича, ўтган бир сутка давомида мамлакатда 3 нафар коронавирусга чалинган бемор вафот этиб, жами кўрсаткич 447 нафарга етди.

Вазирлик бир неча кундан бери вафот этганлар тўғрисидаги тўлиқ маълумотларни ошкор қилмаяпти. Бундан ташқари вазирликнинг коронавирус бўйича кўрсаткичлар жадвалидан вилоятлар кесимдаги ўлим ҳолатлари тўғрисидаги маълумотлар ҳам олиб ташланди.

Вазирликнинг маълум қилишича, 24 сентябрь куни мамлакатда 519 ҳолатда касаллик қайд этилди, 609 нафар бемор тузалди.

Ҳозирда касаллик қайд этилган жами 53 966 нафар бемордан 50 441 нафари соғайиб, даволаниш кўрсаткичи 93 фоизни ташкил этмоқда.

Айни пайтда тиббиёт муассасаларида даволанаётган 3 078 нафар бемордан 548 нафари оғир, 469 нафари эса ўта оғир аҳволда.

Мирзиёев “Таълим тўғрисида”ги янги қонунни имзолади

Ўзбекистон президенти Шавкат Мирзиёев.

Ўзбекистон президенти Шавкат Мирзиёев жорий йилнинг 23 сентябрь куни “Таълим тўғрисида”ги янги қонунни имзоланган. Бу ҳақда Адлия вазирлигига қарашли “Ҳуқуқий ахборот” Телеграм-канали маълум қилди.

Янги қонун имзоланиши ортидан 1997 йил 29 августида қўл қўйилган “Таълим тўғрисида”ги ҳамда “Кадрлар тайёрлаш миллий дастури тўғрисида”ги қонунлар ўз кучини йўқотган.

Кеча имзоланган қонунга мувофиқ, таълим турлари қуйидагилардан иборат:

  • мактабгача таълим ва тарбия;
  • умумий ўрта ва ўрта махсус таълим;
  • профессионал таълим;
  • олий таълим;
  • олий таълимдан кейинги таълим;
  • кадрларни қайта тайёрлаш ва уларнинг малакасини ошириш;
  • мактабдан ташқари таълим.

Ҳужжатда қайд этилганидек, Ўзбекистонда умумий ўрта таълим I–XI синфларни ўз ичига олади.

Ўрта махсус таълим академик лицейларда 9 йиллик таянч ўрта таълим асосида 2 йил мобайнида амалга оширилади.

Профессионал таълим бошланғич, ўрта ва ўрта махсус профессионал таълим даражаларига ажратилади.

Бундан бошланғич профессионал таълим касб-ҳунар мактабларида IX синф битирувчилари негизида кундузги таълим шаклида 2 йиллик интеграциялашган дастур асосида бепул, ўрта профессионал таълим коллежларда давлат буюртмаси ёки тўлов-шартнома асосида давомийлиги 2 йилгача бўлган кундузги, кечки ва сиртқи таълим шакллари бўйича, ўрта махсус профессионал таълим эса техникумларда давлат буюртмаси ёки тўлов-шартнома асосида давомийлиги камида 2 йил бўлган кундузги, кечки ва сиртқи таълим шакллари бўйича амалга оширилади.

Қонунга мувофиқ, давлат олий таълим, ўрта махсус, профессионал таълим муассасалари ва уларнинг филиаллари, шунингдек давлат иштирокидаги олий, ўрта махсус, профессионал таълим ташкилотлари ва уларнинг филиаллари президент ёки ҳукумат қарорлари билан ташкил этилади. Нодавлат таълим муассасаларини ташкил этиш эса уларнинг таъсисчилари томонидан амалга оширилади.

Нодавлат таълим ташкилотларига лицензия Таълим сифатини назорат қилиш давлат инспекцияси томонидан берилади.

Коронавирусга қарши Россияда ишлаб чиқилган препарат Ўзбекистонга етказилди

Иллюстратив сурат.

Россия бевосита инвестициялар жамғармаси (РБИЖ) ва унинг ҳамкори бўлган “Химрар”илмий-фармацевтика маркази коронавирусга қарши ишлаб чиқилган “Авифавир” препаратини яна 17 та давлатга етказиб беради. Бу ҳақда жамғарма томонидан 24 сентябрь куни ёйинланган хабарномада маълум қилинган.

“Авифавир” Беларусь, Боливия, Қозоғистон, Қирғизистон, Туркманистон ва Ўзбекистонга етказиб бўлинган, айни пайтда уни яна 17 та мамлакатга етказиб бериш кутилмоқда”, дейилади РБИЖ хабарномасида.

Маълумотларга кўра, препарат Аргентина, Болгария, Бразилия, Чили, Колумбия, Эквадор, Сальвадор, Гондурас, Қувайт, Панама, Парагвай, Саудия Арабистони, Сербия, Словакия, ЖАР, БАА ва Уругвайга етказилади.

“Авифавир” коронавирусга қарши дори воситаси сифатида Россия Соғлиқни сақлаш вазирлиги томонидан шу йил май ойида рўйхатга олинган ва Япониянинг Favipiravir (вирусдан даволашда ишлатиладиган) препарати асосида ишлаб чиқилган.

Жамғарманинг қайд этишича, Япония ва Россияда ўтказилган синовлар бу препаратларнинг самарадорлигини тасдиқлаган.

Россия вирусга қарши дори-дармон ишлаб чиқариш пойгасида дунё миқёсида лидерлик ролига даъвогарлик қилиб келмоқда.

Аввалроқ Роспотребнадзор Ўзбекистон Россиянинг “Вирусология ва биотехнология “Вектор” давлат маркази” томонидан ишлаб чиқарилган COVID-19га қарши вакцинани ҳамкорликда синовдан ўтказишга қизиқиш билдиргани ҳақида маълумот тарқатган.

Россияда ишлаб чиқарилган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олгани хабар қилинган эди.

Президент Путин вакцина муваффақиятли синовдан ўтказилгани ва тез орада ишлаб чиқарила бошланишини қайд этган. Аммо ғарб давлатлари Россия вакцинасига шубҳа билдирган.

Ўзбекистонликларнинг АҚШга қуруқ мева ва дуккаклилар экспорт қилишига рухсат берилди

Ўзбекистон яқин орада АҚШга қуруқ мева ва дуккаклиларни экспорт қила бошлаши мумкин. Бу ҳақда АҚШнинг Ўзбекистондаги элчихонаси Фейсбукдаги ўз саҳифаси орқали маълумот тарқатди.

Элчихона вакилларига кўра, АҚШ Қишлоқ хўжалиги вазирлиги қошидаги Ўсимлик ва ҳайвонлар саломатлигини муҳофаза қилиш бўйича инспекцион хизмати (APHIS) Ўзбекистонда етиштириладиган қишлоқ хўжалиги маҳсулотларини баҳолаш ишини поёнига етказган.

APHISнинг савдо-сотиқ масалалари бўйича директори Пракеш Хеббарга кўра, АҚШ Қишлоқ хўжалиги вазирлиги (USDA) Ўзбекистонга ловия, мош, бодом, ёнғоқ, майиз, туршак, олхўри ва анжир қоқисини экспорт қилишга рухсат беради.

ДСҚ ўзини ўзи банд қилиб, рўйхатдан ўтганлар сони 400 минг нафардан ошганини билдирди

Ўзбекистонда ўзини ўзи банд қилган касб эгалари сирасига нонвойлар ҳам киритилган.

Жорий йил 23 сентябрь ҳолатига кўра, Ўзбекистон солиқ органларида ўзини ўзи банд қилган шахс сифатида расман рўйхатдан ўтганлар сони 403 минг 208 нафарга етган. Бу ҳақда Давлат солиқ қўмитаси матбуот хизмати маълум қилди.

Қўмита қайдича, амалдаги қонунчиликка кўра рухсат этилган 67 та фаолият тури кесимида қаралганда маиший хизматлар йўналишини танлаётганлар сони (113 минг 49 нафар) нисбатан кўпроқ. Улар орасида сартарошлик, маникюр, косметология, педикюр, уйда кир ювиш ва дазмоллаш, калитлар тайёрлаш, пойабзал тикиш, таъмирлаш, бўяш кабилар саналган.

Қишлоқ хўжалиги йўналиши бўйича хизматлар (чорва молларини ўтлатиш, уларни парвариш қилиш, қишлоқ хўжалик ўсимликларини экиш ва парвариш қилишда томорқа эгаларига ёрдам бериш) соҳасида эса, ДСҚ маълумотига кўра. ўзини ўзи банд қилган 87 минг 231 нафар ўзбекистонлик қонуний фаолият олиб боряпти.

Хабарномада ўзини ўзи банд қилганлар орасида 74 минг 86 нафари ижтимоий йўналишлар бўйича хизматлар (уйда репетиторлик қилиш, болаларга қараб туриш ва уларни парвариш қилиш, уй хўжалигини юритиш, хоналарни тозалаш, халқ табобати) соҳасида, 66 минг 886 нафари саноат йўналишида (ёғоч меъморчилиги, сантехника хизмати, электр монтаж ишлари, макулатура, пластик идиш, темир терсак тўплаш ва қўшимча хомашё тўплаш), 54 минг 428 нафари халқ истеъмоли моллари ишлаб чиқариш ва хизматлар кўрсатиш (нон, уйда поп-корн, музқаймоқ, салатлар, салқин ичимликлар, айрон, гўжа ҳамда деҳқон бозорларида қишлоқ хўжалиги маҳсулотларини сотиш) соҳасида, 7 минг 476 нафари эса АКТ соҳасида (ижтимоий тармоқлардаги фаолият, дастурий таъминот, мобил иловалар ва веб сайтларнии ишлаб чиқиш, матнни яратиш ва ишлов бериш) рўйхатдан ўтиб фаолият юритаётгани айтилган.

Мактаб дарсликларининг ижара ҳақлари эълон қилинди

Бир дона дарслик ёки машқ дафтари учун ягона ижара тўлови 2200 сўм қилиб белгиланган.

Халқ таълими вазирлиги дарсликлар тўплами учун ижара тўловларини эълон қилди. Расмий маълумотда билдирилишича, 2020-2021 ўқув йилидан бошлаб, бир дона дарслик ёки машқ дафтари учун ягона ижара тўлови жорий қилинди.

Вазирлик бир дона дарслик ёки машқ дафтари учун ягона ижара тўлови 2200 сўм қилиб белгиланганини таъкидлаган.

Бир тўплам таркибидаги дарсликлар ва машқ дафтарлари сонидан келиб чиқиб, синфлар ва таълим тиллари кесимида ижара тўлови миқдорлари 26400 сўмдан 44 минг сўмгача қилиб белгиланган.

“Пандемия шароитидан келиб чиқиб, 2020-2021 ўқув йили учун истисно тариқасида умумтаълим муассасасида дарсликлар тўплами учун ижара тўловини амалга ошириш муддати жорий йилнинг 10 октябригача узайтирилди”,- дейилади билдирувда.

Ота-оналарда мазкур тўловни амалга ошириш билан боғлиқ муаммо мавжуд бўлса, ижара тўлови муддатини узайтириш тўғрисида умумтаълим муассасасига мурожаат қилишлари мумкин.

Ижара тўлови муддати узайтирилган ҳолларда, мазкур тўловнинг 50 фоизи 10 октябргача, қолган қисми эса 30 ноябргача тўланиши лозим.

Ижтимоий ҳимояга мухтож бўлган оилалардаги ўқувчиларни умумтаълим мактаб кутубхона жамғармаси томонидан дарсликлар тўплами билан бепул таъминлаш тартиби ўрнатилган.

Ўзбекистон уран қазиб олиш бўйича маълумотларни илк маротаба очиқлади

Уран маъдани.

Ўзбекистон уран қазиб олиш бўйича жаҳонда 5-ўринни эгаллайди, уран заҳираси бўйича эса 10-ўринда туради. Бу маълумотни “Экономическое обозрение” журналига Навоий тоғ-металлургия комбинати бош директори ўринбосари Нурмат Жулибеков берди.

Ўзбекистон биринчи марта уран қазиб олиш ҳажми юзасидан маълумотларни ошкор қилмоқда.

Нурмат Жулибековнинг билдиришича, Ўзбекистон йил сайин 3,5 минг тонна уран қазиб чиқаради. Мамлакатнинг ўзида уран қайта ишланмагани сабабли, хом ашё тўлиғича хорижга экспорт қилинади.

Ўзбекистоннинг уран заҳираси 139, 2 минг тоннани ташкил қилади. Бу эса жаҳондаги уран заҳирасининг 2,3 фоизи демакдир.

Нурмат Жулибеков Навоий тоғ-металлургия комбинати экспортининг 99,5 фоизи уран ҳиссасига тўғри келишини ҳам билдирди. Уран AREVA NC (Франция), Converdyn (АҚШ), Cameco (Канада), CNEIC (Хитой) ва бошқа ширкатларга сотилади.

Соғлиқни сақлаш вазирлиги коронавирус бўйича ҳисобот жадвалидан вафот этганлар тўғрисидаги маълумотни олиб ташлади

23 сентябрь куни 2 нафар коронавирусга чалинган бемор вафот этиб, жами кўрсаткич 444 нафарга етди.

Соғлиқни сақлаш вазирлиги бир кунлик танаффусдан сўнг коронавирус бўйича якуний кундалик ҳисобот тақдим этишни қайта бошлади.

Вазирликнинг билдиришича, 23 сентябрь куни 2 нафар коронавирусга чалинган бемор вафот этиб, жами кўрсаткич 444 нафарга етди.

Айни пайтда вазирлик вафот этганларнинг шахси, жинси, қаерда яшагани, қаерда даволангани ва ёши тўғрисидаги маълумотларни тақдим этмади. Аввалги ҳисоботларда бу каби маълумотлар кўрсатилар эди.(Эски жадвал)

Шунингдек, вазирлик ҳисобот жадвалидан ўлим ҳолатлари статистикасини олиб ташлади. (Янги жадвал)

Вазирликнинг билдиришича, 23 сентябрь куни мамлакатда 590 ҳолатда касаллик қайд этилди, 608 нафар бемор тузалди.

Ҳозирда касаллик қайд этилган жами 53 447 нафар бемордан 49 832 нафари соғайиб, даволаниш кўрсаткичи 93 фоизни ташкил этмоқда.

Айни пайтда тиббиёт муассасаларида даволанаётган 3 171 нафар бемордан 632 нафари оғир, 294 нафари эса ўта оғир аҳволда.

Чегарада тўпланган ўзбекистонликларни олиб келиш учун Самарага автобуслар жўнатилди

Автобуслар 25 сентябрь куни белгиланган манзилга етиб боришади.

Россиянинг Самара вилоятида тўпланиб қолган ўзбекистонлик муҳожирларни ватанга олиб келиш учун махсус автобус қатнови ташкил этилмоқда.

Транспорт вазирлигининг билдиришича, 24 сентябрь куни 15 та автобусдан иборат илк карвон Россиянинг Самара вилоятига йўлга чиқди.

Режага мувофиқ автобуслар 25 сентябрь куни белгиланган манзилга етиб боришади. Шу куннинг ўзида автобуслар 700 дан ортиқ йўловчиларни олиб Ўзбекистон томон йўлга чиқади.

Коронавирус пандемияси бошланганидан кейин Россиядаги муҳожирларнинг кўпи ишсиз ва пулсиз қолган, шу важдан улар ватанларига қайтишга қарор қилишган. Аммо чегаралар ёпиқлиги сабаб, улар чегараолди ҳудуларида тўпланиб қолишган. Жумладан, Самарада 4 мингдан зиёд муҳожир тўпланиб қолгани билдирилган.

Аввалроқ Ўзбекистон ҳукумати 19, 23, 26 сентябр ва 5 октябр кунлари ташкил этилган махсус поезд қатновлари ёрдамида Самара вилоятида йиғилиб қолган муҳожирларни олиб чиқишни режалаштиргани билдирган эди.

Самарқандда Қозоғистоннинг бош консулхонаси очилади

Самарқанддаги "Шердор" мадрасаси.

Қозоғистон президенти Қасим-Жомарт Тоқаев 23 сентябрь куни “Самарқанд шаҳрида (Ўзбекистон Республикаси) Қозоғистон Республикаси Бош консулхонасини очиш тўғрисида”ги фармонни имзолади. Бу ҳақда Қозоғистон президентининг матбуот хизмати маълумот тарқатди.

Ҳужжатда Қозоғистон ҳукуматига мазкур фармондан келиб чиққан ҳолда зарур чораларни кўриш вазифаси топширилган. Айни пайтда Қозоғистоннинг Самарқанддаги Бош консулхонаси қачондан ўз фаолиятини бошлаши ҳали маълум эмас.

Аввалроқ Озодлик Самарқанд шаҳрида жорий йил якунига қадар Туркия Республикасининг Бош консулхонаси очилиши ҳақида хабар қилган эди.

Uzbekistan Airways октябрь ойидан Бишкек ва Дубайга парвозлар сонини оширади

Uzbekistan Airways авиаширкати шу йил 1 октябридан Қирғизистон пойтахти Бишкекка парвозлар сонини икки баробар оширмоқда. Бу ҳақда авиаширкат матбуот хизмати маълумот тарқатди. Аввал Тошкент-Бишкек-Тошкент йўналиши бўйлаб ҳафтасига фақат бир мартагина қатнов амалга оширилаётган эди.

Авиаширкат вакилларига кўра, шу йил 5 октябридан Бирлашган Араб Амирликларининг Дубай шаҳрига қатновлар сони ҳам икки баробар оширилади. Бу йўналиш бўйлаб ҳам аввал ҳафтасига бир марта парвоз амалга оширилаётган эди.

Uzbekistan Airways ҳар иккала йўналиш бўйича авиачипталарни авиаширкат веб-сайтидан, АЖ мобил иловаси орқали, шунингдек, Uzbekistan Airways АЖнинг энг яқин сотув офисларидан ёки Ўзбекистондаги авиакомпания ташувларини сотиш агентликларидан сотиб олиш мумкинлигини эслатган.

Мирзиёев БМТдаги нутқида пандемия, демократик ўзгаришлар, минтақа муаммолари ва экология масалаларига тўхталди

Ўзбекистон президенти Шавкат Мирзиёев.

Ўзбекистон Бирлашган Миллатлар Ташкилоти шафелигида Пандемиялар даврида давлатларнинг ихтиёрий мажбуриятлари тўғрисидаги халқаро кодексни ишлаб чиқишни таклиф этади. Ушбу ҳужжатда ҳар бир давлатнинг ўз фуқаролари ва халқаро ҳамкорлари олдидаги мажбуриятлари акс этиши лозим. Бу ҳақда президент Шавкат Мирзиёев 23 сентябрь куни БМТ Бош ассамлеяси 75-сессиясида ўзбек тилида қилган видеочиқишида билдирди. Нутқ матни президент матбуот хизмати томонидан ёйинланди.

Ўз чиқишида аввалида коронавирус пандемияси туфайли юзага келган муаммоларга тўхталган Ш. Мирзиёев сўзини Ўзбекистонда ўтказилаётган ислоҳотлар мавзусига бурди. Унга кўра, бугунги кунда Ўзбекистонда демократик ўзгаришлар ортга қайтмайдиган тус олган, аҳоли ва партияларнинг сиёсий фаоллиги, фуқаролик жамияти институтларининг роли, оммавий ахборот воситаларининг таъсири ошган, инсон ҳуқуқлари соҳасидаги ҳолат бутунлай ўзгарган, мажбурий ва болалар меҳнати тўлиқ тугатилган.

“Мамлакатимизда диний эркинлик борасида ҳам вазият кескин яхшиланди. Миллатлараро тотувлик ва динлараро бағрикенгликни янада мустаҳкамлаш биз учун доимий муҳим вазифадир”, деган Ш. Мирзиёев ўз сўзи давомида аёллар ва ёшлар масалалари ҳам тўхталиб ўтди.

Марказий Осиё минтақасида туб ўзгаришлар юз бераётганини урғулаган Ўзбекистон президенти ўз мамлакати жорий йил сентябрь ойида Доҳа шаҳрида афғон сиёсий кучлари ўртасида бошланган тинчлик музокараларини тўла қўллаб-қувватлашини урғулади.

Шундан сўнг у сессия иштирокчилари эътиборини яна бир бор Орол денгизи қуришининг ҳалокатли оқибатларига қаратди. Ўзбекистон мавжуд аҳволни яхшилаш учун бу ерда икки миллион гектар янги ўсимлик майдонлари ва дарахтзорлар яратиш, тупроқ қатламини шакллантириш бўйича улкан ишларни амалга ошираётганини қайд этган Ш. Мирзиёев Оролбўйи минтақаси учун Бирлашган Миллатлар Ташкилотининг инсон хавфсизлиги бўйича кўп томонлама шериклик траст фонди тузилганини таъкидлади.

“Биз Оролбўйи минтақасини экологик инновация ва технологиялар ҳудуди, деб эълон қилиш ҳақида Бирлашган Миллатлар Ташкилоти Бош Ассамблеясининг махсус резолюциясини қабул қилишни таклиф этамиз. Ушбу муҳим ҳужжат тасдиқланган санани эса Халқаро экологик тизимларни ҳимоя қилиш ва тиклаш куни сифатида нишонлаш мақсадга мувофиқ бўларди”, деди Ш. Мирзиёев.

Ўз сўзи якунида Ўзбекистон президенти дунё бўйлаб қашшоқлик ва камбағаллик муаммолари кучайиб бораётганидан баҳс этди. Унга кўра, бу муаммолар айниқса пандемия шароитида кескин тус олмоқда.

“Шу муносабат билан қашшоқликни тугатиш ва камбағалликка қарши курашишни Бирлашган Миллатлар Ташкилоти Бош Ассамблеяси навбатдаги сессиясининг асосий мавзуларидан бири сифатида белгилаш ҳамда ушбу масалаларга бағишланган глобал саммитни ўтказишни таклиф этамиз”, деди Шавкат Мирзиёев.

Маҳалла ва оилани қўллаб-қувватлаш вазири ҳамда унинг икки муовини коронавирусга чалинди

Маҳалла ва оилани қўллаб-қувватлаш вазирининг ўринбосари Ботир Парпиев (суратда) 2018 йилгача қарийб 14 йил давомида Ўзбекистон Давлат солиқ қўмитасини бошқарган.

Маҳалла ва оилани қўллаб-қувватлаш вазири Раҳмат Маматов ҳамда унинг ўринбосарлари Ботир Парпиев ва Азизбек Икромовда коронавирус инфекцияси аниқланди. Бу ҳақда Газета.uz нашри вазирлик матбуот хизматидан олинган маълумотга таянган ҳолда хабар қилди.

Ҳозирда вазир ва унинг ўринбосарлари Ўзбекистон президенти админстрацияси ҳузуридаги Бош тиббиёт бошқармасига қарашли 2-марказий клиник касалхонада даволанмоқда.

Вазирликдан маълум қилишларича, аввалроқ коронавирусга чалинган вазирнинг биринчи ўринбосари Гулнора Маруфова шу кунда соғайиб, ишга қайтган.

Йилига 3 миллион 600 минг қадам юрганларга имтиёз ваъда қилинмоқда

Ўзбекистонда бир кунда камида ўн минг, бир ой давомида уч юз минг, бир йил давомида 3 миллион 600 минг қадам юрган шахсга барча давлат хизматлари кўрсатиш соҳасида 50 фоиз имтиёз берилиши ҳамда спорт иншоотларидан фойдаланиш учун абонемент тақдим этилиши мумкин. Бунга доир кўрсатма мамлакат президентининг “Оммавий спортни ривожлантириш ва соғлом турмуш тарзини ҳар бир фуқаронинг ҳаётига киритишга қаратилган чора-тадбирлар тўғрисида”ги қарори лойиҳасида акс этган. Жисмоний тарбия ва спорт вазирлиги томонидан ишлаб чиқилган мазкур лойиҳа матни 23 сентябрь куни regulation.gov.uz порталида ёйинланди.

Лойиҳага мувофиқ, Жисмоний тарбия ва спорт вазирлиги Адлия вазирлиги, Соғлиқни сақлаш вазирлиги, Молия вазирлиги билан биргаликда 2021 йил 1 февралига қадар аҳолини кунлик юриш ва югуришга тарғиб қилиш мақсадида “Янги нафас” платформасини яратиши лозим. Кўп юрганлар айнан шу платформа иши доирасида рағбатлантирилиши кўзда тутилган.

Қарор билан Адлия вазирлигига “Янги нафас” платформасини давлат хизматлари кўрсатиш тизими билан интеграция қилинишини таъминлаш вазифаси юклатилган.

Қарор лойиҳасида “2021 йилдан бошлаб сентябрь ойининг учинчи якшанба куни республика бўйича “Автомобилсиз кун” деб эълон қилинсин ҳамда шу куни автомобилда ҳаракатланиш таъқиқлансин”, дейилган.

Лойиҳа муҳокамаси шу йил 8 октябрига қадар давом этади.

ОАВ: Марказий Осиё халқаро институти ташкил этилди

Марказий Осиё минтақасида жойлашган Ўзбекистон, Қирғизистон, Қозоғистон ва Тожикистон мамлакатлари байроқлари.

Ўзбекистонда Марказий Осиё халқаро институти ташкил этилди. Дарё.уз нашрининг ҳукуматдаги ўз манбаси сўзларига таянган ҳолда хабар қилишича, бунга оид қарор президент Ш.Мирзиёев томонидан август ойида имзоланган.

Янги институт минтақа давлатлари раҳбарлари Маслаҳат учрашувининг Тошкентда бўлиб ўтган иккинчи саммитида эришилган барча келишувларни тўлиқ амалга ошириш, эксперт-таҳлил доира вакиллари, амалиётчи мутахассислар ўртасидаги алоқаларни кенгайтириш, минтақавий стратегияни ишлаб чиқишда улар иштирокини таъминлаш мақсадида ташкил этилгани айтилмоқда.

Марказий Осиё давлатлари ўртасидаги ўзаро ҳамкорликни ҳар томонлама кенгайтиришга қаратилган стратегия ва дастурларнинг янги йўналишларини ишлаб чиқишга кўмаклашиш, уларни илмий асосланган ҳолда чуқур таҳлил қилиш ва тадқиқ этиш янги ташкил этилган институтнинг асосий вазифалари сифатида кўрсатиб ўтилган.

Бундан ташқари, қайд этилишича, институт минтақа давлатлари ўртасидаги алоқаларни мустаҳкамлашга қаратилган изланишлар, Марказий Осиё хавфсизлиги билан боғлиқ бошқа таҳдид ва муаммоларни ҳал этишга қаратилган тадқиқот ишларини олиб боради, қўшни давлатларнинг ташқи сиёсат концепция ва мақсадларини пухта ўрганади, минтақавий аҳамиятга эга лойиҳаларни батафсил таҳлил қилади ҳамда халқаро анжуман ва тадбирларда бу мавзуларни муҳокама қилади.

Учтепада минг ўринли коронавирус маркази ташкил этилди (ВИДЕО)

Ўзбекистонда коронавирусга чалинганлар сони 53 мингга яқинлашди.

Тошкентнинг Учтепа туманида коронавирусга чалинган ва гумон қилинган беморларни қабул қилиш ва тақсимлаш маркази ишга тушди.

Тошкент шаҳар ҳокимлиги 23 сентябрга ўтар кечаси бу борада тарқатган видеода Учтепа тумани ҳокими ўринбосари Бобур Мирзаев мазкур марказ “саховатпеша тадбиркор томонидан ва ҳомийлик маблағлари ҳисобидан” ташкил қилинганини билдирди.

Минг нафар беморга мўлжалланган марказнинг биринчи иш кунида 50 нафардан кўпроқ бемор қабул қилинган. Бу ерда 750 нафар тиббиёт ходими ишлаши режалаштирилган.

“Ҳозирги пайтда марказда 72 нафар ходим ишламоқда, уларнинг 60 нафари шифокор ва ҳамширалар бўлса, 10 нафардан ортиғи ёрдамчи кўнгиллилар ҳисобланади”, -дейилади хабарда.

Тошкент шаҳрида аввалроқ “Ўзэкспомарказ”да 1000 ўринли, “Ёшлик” спорт мажмуасида 520 ўринли, Гимнастика саройида 750 ўринли тақсимлаш марказлари ишга туширилган эди.

Марказий банк ташқи қарз 27,6 миллиард доллар эканини билдирди. Молия вазирлиги эса бошқа рақамларни келтирмоқда

Ташқи қарз масаласида Марказий банк ва Молия вазирлиги келтираётган рақамлар бир-биридан кескин фарқ қилмоқда.

Ўзбекистон ташқи қарзининг умумий ҳажми 2020 йил 1 июль ҳолатига 27,6 миллиард долларни долларни ташкил қилди. Бу ташқи қарз умумий ҳажми 2020 йил бошидан 12,7 фоизга ёки 3,1 миллиард долларга ошганини англатади. Бу ҳақда Марказий банк 23 сентябрь куни эълон қилган янги ҳисоботида маълум қилди.

Ҳисоботда таъкидланишича, 2020 йилнинг I ярим йиллигида давлат сектори қарздорлигининг ўсиши 1,7 миллиард долларни ташкил қилди.

Глобал пандемия ва иқтисодий фаолликнинг пасайиши сабабли Ўзбекистоннинг суверен облигациялари қиймати фонд бозорларида биржа котировкаларининг пасайиши натижасида 2020 йилнинг бошига нисбатан камайди.

Банклар ва иқтисодиётнинг бошқа сектор корхоналари томонидан қарз олиш ҳажмининг ошиши натижасида хусусий сектор қарздорлиги 1,4 миллиард долларга ошди.

“Қайд этиш лозимки, 2020 йилнинг I ярим йиллигида хусусий сектор томонидан умумий миқдорда 2,1 млрд. доллар қарздорлик жалб қилинди. Қарзларни жалб қилиш асосан банклар – 1,8 млрд. доллар, текстиль ва тўқимачилик сектори корхоналари – 71 млн. доллар ва иқтисодиётнинг бошқа секторлари – 154 млн. доллар томонидан амалга оширилди”, -дейилади ҳисоботда.

Айни пайтда Марказий банк ҳисоботида келтирилган ташқи қарз миқдори Молия вазирлиги эълон қилган ҳисоботда кўрсатилган рақамдан кескин фарқ қилмоқда.

Молия вазирлигининг август ойида эълон қилинган ҳисоботида қайд этилишича, 2020 йил 1 июль ҳолатига Ўзбекистон Республикаси номидан ва унинг кафолати остида жалб қилинган умумий қарз қолдиғи дастлабки ҳисоб-китобларга кўра 19 миллиард 400 миллион доллар эквивалентини ёки ялпи ички маҳсулотга (ЯИМ) нисбатан 34,0 фоизни ташкил этган.

Жорий йилнинг август ойида молия вазири Тимур Ишметов Олий Мажлиси Қонунчилик палатаси ялпи мажлисида Ўзбекистоннинг ташқи қарзи, 2020 йилнинг 1 июль ҳолатига кўра, 19,6 миллиард долларни ташкил этаётгани тўғрисида билдирган эди.

Биометрик паспорт ўрнига ID-карта жорий этилмоқда. Унинг нархи ҳозирча 198,5 минг сўм

Биометрик паспорт 2030 йилдан ҳақиқий эмас деб ҳисобланади.

Ўзбекистон фуқароларига 2021 йилнинг 1 январидан бошлаб биометрик паспортлар ўрнига шахсни ва фуқароликни тасдиқлайдиган электрон ташувчи қурилмага эга ҳужжат сифатида ID-карта берила бошланади. Президентнинг бу борадаги “Ўзбекистон Республикасида идентификация ID-карталарини жорий этиш чора-тадбирлари тўғрисида”ги фармони матбуотда эълон қилинди.

Мазкур фармонга асосан 2021 йил 1 январдан бошлаб шахсни рақамли идентификация қилишнинг ягона тизими жорий қилинади. Мазкур тизимни жорий этиш доирасида биометрик паспортлар ID-карталарга икки босқичда алмаштирилади.

Биринчи босқич 2021 йил 1 январдан 2022 йил 31 декабргача ихтиёрийлик асосида амалга оширилади.

Иккинчи босқич 2023 йил 1 январдан 2029 йил 31 декабргача давом этади ва бу босқичда биометрик паспортлар мажбурий тартибда ID-карталарга алмаштирилади.

2011 йилги намунадаги биометрик паспорт 2030 йил 1 январдан бошлаб ҳақиқий эмас деб ҳисобланади. ID-карталарни расмийлаштириш 1 иш кунида амалга оширилади.

ID-карта бир ёшгача бўлган болага 2 йил, бир ёшдан 16 ёшгача 5 йил, 16 ёшдан бошлаб – 10 йил муддатга берилади.

ID-картани расмийлаштириш учун базавий ҳисоблаш миқдорининг 89 фоизи, яъни 198 минг 470 сўм (22.09.2020 ҳолатига) миқдорида тўлов ундирилади.

Самарқанд шаҳар бош имом-хатиби Нуриддинхон Исломов вафот этди

Нуриддинхон Исломов 1970 йилда Ўзбекистон мусулмонлари идораси ходими сифатида иш фаолиятини бошлаган. Самарқанд шаҳар ҳокимлиги матбуот хизмати фотоси.

Самарқанд шаҳар бош имом-хатиби Нуриддинхон Исломов 73 ёшда вафот этгани тўғрисида Самарқанд шаҳар ҳокимлиги хабар берди.

22 сентябрда эълон қилинган таъзияда қайд этилишича, Нуриддинхон Исломов 1970 йилда Ўзбекистон мусулмонлари идораси ходими сифатида иш фаолиятини бошлаган.

1980 йилдан 2008 йилга қадар Жиззах вилояти Ғаллаорол тумани бош имом-хатиби бўлган. 2017 йилгача Самарқанд вилояти бош имом-хатиби вазифасида ишлаган. Шундан сўнг айни пайтгача Самарқанд шаҳар бош имом-хатиби ҳамда “Шоҳи Зинда” жоме масжиди имом-хатиби бўлиб турган эди.

Самарқанд шаҳар ҳокимлиги матбуот хизмати имомнинг вафоти сабабларини маълум қилмаган.

Бундан бир кун аввал Ўзбекистон мусулмонлари идораси матбуот хизмати Қашқадарё вилоятининг Яккабоғ тумани бош имом-хатиби Тоҳир Исматиллаев вафот этгани ҳақида билдирганди.

16 сентябрь куни Тошкент вилояти бош имом-хатиби Хайруллоҳ Турматов вафот этгани хабар қилинган.

Бу борадаги расмий билдирувларда имомларнинг ўлим сабаби очиқланмаган.

Давомини ўқинг

Кўрмай қолган бўлсангиз

XS
SM
MD
LG