Линклар

Шошилинч хабар
12 май 2021, Тошкент вақти: 17:25

Ўзбекистон хабарлари

Раимбек Матраимовнинг укаси Ўзбекистон ҳудудида қўлга олинди

Қорасув тумани ҳокими Тилек Матраимов.

Қирғизистоннинг Ўш вилояти Қорасув тумани ҳокими Тилек Матраимов Ўзбекистон ҳудудида қўлга олинган. Бу маълумотни Қирғизистон Хавфсизлик кенгаши котибининг ўринбосари Ўмурбек Суваналиев тасдиқлади, дея хабар қилди Озодликнинг қирғиз хизмати.

Айни пайтда Қирғизистондаги куч ишлатар идоралар фаолиятини мувофиқлаштириб турган Ў. Суваналиевга кўра, ҳозирда Т. Матраимов Ўзбекистонда, бироқ яқин орада у Қирғизистонга топширилади.

Миллий хавфсизлик давлат қўмитаси маълумотига кўра, Тилек Матраимов билан бирга чегарадан ноқонуний ўтгани учун ўзбекистонлик чегарачилар томонидан унинг жияни, ўғли ва қўриқчиси ҳам қўлга олинган.

Т. Матраимов 8 йилдан бери Қорасув туман маъмуриятини бошқариб келаётган эди. Шу йил 4 октябрида бўлиб ўтган парламент сайлови олдидан у соғлиғи ёмонлашганини айтиб, таътилга чиққан.

Тилек Матраимов Қирғизистон Божхона хизмати раисининг ўринбосари Раимбек Матраимов ва парламент депутати Искендер Матраимовнинг укасидир.

Кун янгиликлари

Жорий йилнинг дастлабки 4 ойида Ўзбекистонга хориждан жўнатилган пул миқдори кўпайди

Коронавирус пандемияси туфайли хориждан Ўзбекистонга жўнатилаётган пул жўнатмалари кескин озайиб кетгани хабар қилинган.

Ўзбекистонга хориж давлатларидан жўнатилган пул миқдори 2021 йилнинг январь-апрель ойларида 1 миллиард 990 миллион долларни ташкил этди. Бу ўтган йилнинг шу даврига солиштирилганида 663 миллион долларга кўпроқдир.

Марказий банкнинг билдиришича, жорий йилнинг январь-апрель ойлари оралиғида чет элга Ўзбекистондан 478 миллион доллар пул чиқарилган.

Марказий банк аввалроқ 2021 йилнинг январидан мартигача хориждан Ўзбекистонга 1 миллиард 420 миллион доллар пул жўнатилганини маълум қилган эди. Шундан келиб чиқиладиган бўлса, апрель ойида хорижадан 570 миллион доллар пул келган.

Ўтган йили коронавирус пандемияси туфайли хориждан Ўзбекистонга жўнатилаётган пул жўнатмалари кескин озайиб кетгани хабар қилинган.

Олий Мажлис ижтимоий тармоқлар Ўзбекистон қонунига амал қилмаётганидан норози

Telegram, Facebook, TikTok, Google ва Yandex 16 апрелдан бошлаб Ўзбекистон фуқароларининг шахсий маълумотларини мамлакат ичида жойлашган серверларда қайта ишлашга мажбурлиги тўғрисидаги қонунга амал қилмаётганликлари Олий Мажлис норозилигига сабаб бўлди.

“Қонун нормаси кучга кирганига 1 ой бўлган бўлсада ваколатли давлат органи томонидан мазкур соҳа бўйича кўзга кўринадиган натижаларга эришилмаганлиги депутатларнинг жиддий эътирозига сабаб бўлди”, -дейилади Олий Мажлис Қонунчилик палатаси расмий сайтида.

Ўзбекистонда қабул қилинган “Шахсий маълумотлар тўғрисида"ги Қонуннинг 27−1-моддасига асосан 16 апрелдан бошлаб ижтимоий тармоқлар ва жаҳон интернет компаниялари Ўзбекистон фуқароларининг шахсий маълумотларини мамлакат ҳудудидаги серверларда қайта ишлаши шарт экани белгилаб қўйилган.

Давлат персоналлаштириш маркази раҳбари Улуғбек Тошхўжаев 12 май куни Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси йиғилишида бу ҳақда маълумот берар экан, Telegram, Facebook, TikTok, Google ва Yandex ширкатларига Ўзбекистон қонунчилиги талабларига риоя қилиш тўғрисида хатлар юборилгани тўғрисида маълумот берган. Расмийга кўра, бу хатларга шу кунгача жавоб олинмаган ва қонун талабига риоя этилиши ортга сурилмоқда.

Қонунга асосан мазкур ижтимоий тармоқларнинг шахсга доир маълумотлар базалари Ўзбекистон давлат реестрида рўйхатдан ўтказиши шарт. Бу талабга амал қилмаган ширкатларга нисбатан жиноят иши қўзғатилиши мумкин.

Йиғилишда депутатларнинг таъкидлашича, сўнгги йилларда мазкур ижтимоий тармоқлар ва интернет компанияларга турли киберҳужумлар уюштириб келинмоқда. Натижада Ўзбекистон фуқароларининг шахсий маълумотлари ҳам ўғирланган.

HRW Отабек Сатторийнинг қамалишини Ўзбекистондаги сўз эркинлигига зарба ўлароқ баҳолади

Сурхондарёлик блогер Отабек Сатторий

Ўзбекистонда маҳаллий расмийларнинг коррупцияга аралашган-аралашмаганини ўрганган мустақил блогер Отабек Сатторийнинг қамалиши ҳақида суд томонидан чиқарилган ҳукм Ўзбекистонда сўз эркинлигига қарши зарба ва маҳкама хатоси бўлиб ҳисобланади. Бу ҳақда Human Rights Watch халқаро ташкилоти томонидан 11 май куни ёйинланган баёнотда айтилган.

10 май куни жиноят ишлари бўйича Музработ туман суди Ўзбекистон Жиноят кодексининг бир неча моддаларида айбдор деб топилган блогер Отабек Сатторийни олти ярим йилга озодликдан маҳрум қилиш тўғрисида ҳукм чиқарганди.

HRW ўз баёнотида блогерга нисбатан очилган жиноят иши, унга нисбатан қўйилган айбловлар шубҳали эканини урғулаган. Ташкилот блогернинг адвокати Умид Давлатовнинг сўзларига таянган ҳолда Сатторий ўзига қўйилган айбловларни тан олмагани ва суд ҳукми юзасидан шикоят аризаси киритмоқчи эканини қайд этган.

HRW вакилларига кўра, Ўзбекистон раҳбарияти, жумладан президент Шавкат Мирзиёев мамлакатда ўтказилаётган ислоҳотлар марказига инсон ҳақларига ҳурмат тамойили қўйилаётганини баралла айтиб келмоқда, аммо бу ўринда амаллар сўзларга зид келмоқда.

Ҳуқуқ фаоллари қайдича, номақбул блогернинг қамоққа йўлланиши бугунги кунда Ўзбекистонда сўз эркинлиги учун қатағон муҳити мавжудлигига оид ҳақиқатни очиб ташлаган.

Отабек Сатторийнинг қамалиши аввалроқ Журналистларни ҳимоя қилиш қўмитаси (CPJ) ва Чегара билмас мухбирлар каби халқаро ташкилотларда ҳам норозилик уйғотган эди.

Йирик шаҳарларда одамларга 24 соат хизмат кўрсатадиган кўнгилочар кўчалар ташкил этилади

Шаҳарларда туну кун фаолият юритадиган кўчалар ташкил этилишига оид қарорни президент Ш. Мирзиёев 2021 йилнинг 11 майида имзолаган.

Ўзбекистонда жорий йилнинг 1 сентябрига қадар йирик шаҳарлар, вилоят ва туман марказларида савдо ва кўнгилочар кўчалар ташкил этилади. Бу кўрсатма президент Ш. Мирзиёев томонидан 11 май куни имзоланган “Хизматлар соҳасини жадал ривожлантириш чора-тадбирлари тўғрисида”ги қарорда акс этган.

Ҳужжатда савдо ва кўнгилочар кўчаларда барча тадбиркорлик субъектларига 24 соат мобайнида туну кун фаолият юритиш ҳуқуқи берилиши ҳамда бу ерда кўчма савдо объектлари учун жойлар тадбиркорлик субъектларига электрон онлайн-аукцион асосида сотилиши билдирилган.

Қайд этилишича, Тикланиш ва тараққиёт жамғармасидан хизматлар соҳасини ривожлантириш учун тижорат банкларига 300 миллион АҚШ доллари эквивалентида кредит линияси очилади. “Ўзмиллийбанк” 2021 йил якунига қадар халқаро молия институтларининг 200 миллион АҚШ доллари миқдоридаги маблағларини жалб қилади.

Айни пайтда, қарорда айтилишича, 2021-2023 йиллар давомида туман (шаҳар)ларда 15 та деҳқон бозори ва 115 та савдо комплекслари барпо этилади. Янги ташкил этиладиган деҳқон бозорлари ва савдо комплекслари устав капиталида маҳаллий давлат ҳокимияти органларининг мажбурий иштироки бекор қилинади.

Мирзиёев Қозон гимназиясидаги ҳодиса муносабати билан Путинга ҳамдардлик билдирди

Қозондаги 175-гимназия олдида отишма қурбонларини ёдлаш учун қўйилган қўлбола хотира лавҳи, 2021 йил 11 майи

Ўзбекистон президенти Шавкат Мирзиёев Қозондаги гимназияда содир бўлган қуролли хуруж муносабати билан россиялик ҳамкасби Владимир Путинга ҳамдардлик мактуби йўллади.

“Фожиали воқеа – Қозон шаҳридаги мактабда содир бўлган отишма оқибатида бегуноҳ болалар ва ёши катталар ҳалок бўлгани ҳақидаги хабар мени чуқур қайғу ва ларзага солди”, деб бошланган президент матбуот хизмати томонидан ёйинланган хат.

Ўзбекистон президенти мактубда ўз мамлакати “ҳеч қандай важ билан оқлаб бўлмайдиган ушбу мудҳиш зўравонлик ҳаракатини қатъий қоралаши”ни билдирган ҳамда Россия президентига, ҳодиса чоғида қурбон бўлганларнинг ота-оналари ва яқинларига ҳамдардлик изҳор этган.

“Ушбу мусибатли дамларда Ўзбекистоннинг кўпмиллатли халқи Россия халқи учраган жудоликка қайғудошдир”, дея якунланган Мирзиёевнинг Путинга мактуби.

Татаристон пойтахти Қозон шаҳридаги Жавдат Файзи кўчасида жойлашган 175-сонли гимназияда 11 май куни отишма юз бериб, унда камида 8 киши нобуд бўлгани ҳақида Озодлик аввалроқ хабар қилган.

Татаристон Соғлиқни сақлаш вазирлиги маълумотларига кўра, ҳодиса ортидан аксарияти мактаб ўқувчилари бўлган 20 дан ортиқ одам шифохонага ётқизилган. Улардан 6 нафари шифохонанинг жонлантириш бўлимида ётгани айтилмоқда.

Ўзбекистон ташқи ишлар вазири Хитойда қирғизистонлик ҳамкасби билан учрашди

Ўзбекистон ташқи ишлар вазири Абдулазиз Комилов 11 май куни Хитойнинг Сиан шаҳрида қирғизистонлик ҳамкасби Руслан Қазақбаев билан учрашув ўтказган.

ТИВ матбуот хизмати маълумотига кўра, учрашув Ўзбекистон делегациясининг “Марказий Осиё – Хитой” форматида иккинчи учрашувидаги иштироки доирасида ўтказилган.

Қайд этилишича, учрашувда Комилов ва Қазақбаев икки томонлама алоқалар ривожланиши билан боғлиқ долзарб масалалар ҳамда минтақавий ҳамкорлик истиқболлари юзасидан фикр алмашганлар. Бироқ вазирлар ўртасида апрель ойи сўнгида қирғиз-тожик чегарасида юз берган можаро муҳокама қилинганми-йўқми – бунга аниқлик киритилган эмас.

“Томонлар Саноат кооперацияси бўйича “Йўл харитаси”ни, мультимодал транспорт коридори ҳамда “Хитой – Қирғизистон – Ўзбекистон” темир йўли лойиҳасини имкон қадар тез муддатда амалга оширишнинг муҳимлигини қайд этдилар”, дейилган Ўзбекистон ТИВ хабарномасида.

Бу орада Қирғизистон ТИВ матбуот хизмати тарқатган маълумотга мувофиқ. икки вазир учрашуви чоғида қирғи-тожик чегарасида юзага келган вазиятга алоҳида эътибор қаратгани урғуланган. Томонлар кўплаб қурбонларга олиб келган можаровий вазият сиёсий-дипломатик музокаралар йўли билангина ҳал этилиши лозимлиги хусусида якдил фикр билдирганлар.

Айни пайтда вазирлик Сианга ташриф доирасида Абдулазиз Комилов 11 май куни хитойлик ҳамкасби Ван И билан ҳам учрашган.

Музокаралар чоғида икки вазир Ўзбекистон ва Хитой ўртасидаги ҳар томонлама стратегик шерикликнинг ҳозирги ҳолати ва уни ривожлантириш истиқболлари муҳокама қилган.

ТИВ қайдича, томонлар биргаликдаги саъй-ҳаракатлар натижасида иқтисодиёт соҳасидаги ҳамкорликнинг жадал ривожланишини таъминлашга эришилганлигини мамнуният билан эътироф этишиб, ўзаро савдо ҳажмлари ва номенклатурасини янада оширишнинг муҳимлигини таъкидлашган. “Хитой – Қирғизистон – Ўзбекистон” мультимодал транспорт маршрутини ривожлантириш ва “Хитой – Қирғизистон – Ўзбекистон” темир йўлини қуриш лойиҳасини биргаликда ҳаётга татбиқ қилиш бўйича тезроқ амалий чоралар кўришнинг долзарблиги қайд этилган.

Вазирлар халқаро ва минтақавий ташкилотлар доирасидаги ҳамкорлик, минтақавий хавфсизликни таъминлаш, Афғонистонда мустаҳкам тинчликка эришишга ва унинг иқтисодиётини тиклашга кўмаклашиш механизмларига ҳам алоҳида эътибор қаратганлар.

ТИВ вазир А. Комилов сешанба куни Сиан шаҳрида Хитой Халқ Республикаси Шенси провинцияси губернатори Чжао Иде билан ҳам музокаралар ўтказгани ҳақида маълум қилган.

Махсус комиссия қарори ортидан Uzbekistan Airways Японияга қатновни вақтинча тўхтатди

Uzbekistan Airways авиаширкати Республика махсус комиссияси қарорига мувофиқ равишда Японияга авиақатновларни вақтинча бекор қилган ва бу ҳолат мазкур давлатда санитария-эпидемиология ҳолати яхшилангунига қадар давом этади. Икки давлат ўртасидаги қатновлар пандемия туфайли 2020 йили тўхтатилган эди.

Uzbekistan Airways матбуот хизмати қайдича, авиаширкат учун Токио қатновлари устувор ҳисобланиб, Ўзбекистондан Японияга рейслар 20 йилдан ортиқ муддат давомида амалга оширилиб келинган.

“Авиакомпания вакиллари қилган ҳаракатларининг шарофати билан сўров ошиб борган ва мавсумда нафақат мунтазам рейсларни йўлга қўйиш, балки Япониянинг турли шаҳарларига ҳам барқарор йўловчилар юкламасини таъминлашни уддалашди”, дейилган Uzbekistan Airways хабарномасида.

Ўзбекистондан Японияга мунтазам авиақатновлар мамлакатлардаги эпидемиологик вазият барқарор бўлганидан кейин 2022 йилнинг баҳор-ёз навигация даврига режалаштирилгани билдирилган.

Халқаро ташкилотлар Отабек Сатторийни озод қилишга чақирди

Блогер Отабек Сатторий.

Матбуот эркинлигини кузатиб борувчи халқаро ташкилотлар Ўзбекистон ҳукуматини блогер Отабек Сатторийга суд томонидан чиқарилган ҳукмни бекор қилишга ва уни зудликда қамоқдан озод қилишга чақирди.

10 май куни жиноят ишлари бўйича Музработ туман суди блогер Отабек Сатторийни 6,5 йилга озодликдан маҳрум қилиш тўғрисида ҳукм чиқарган эди. Сатторий тухмат қилганлик ва товламачиликда айбдор деб топилган.

Халқаро ташкилотлар Сатторий блогерлик фаолияти ортидан “сохталаштирилган жиноят иши асосида қамалди”, деб ҳисоблайди.

“Ҳукумат Отабек Сатторийни зудликда қамоқдан озод этиши ҳамда барча журналистларга эрикн ва репрессияга учраш таҳдидидан ҳоли бўлган муҳитда ишлаш имкониятини яратиши шарт”,-деб билдирди Нью-Йоркдаги Журналистларни ҳимоя қилиш халқаро ташкилоти.

Мазкур ташкилотнинг Европа ва Марказий Осиё бўйича дастурлари мувофиқлаштирувчиси Гулноза Сайид: “Сатторийнинг қамоққа ташланиши октябрда ўтадиган президент сайловлари арафасида матбуотни долзарб муаммоларни ёритишдан чеклаш ҳаракатидир”,-деб баёнот берди.

“Чегара билмас мухбирлар” халқаро ташкилоти эса Сатторийнинг қамалишини “ҳукуматнинг маҳаллий коррупция ортидан келиб чиқаётган жанжалларни бостириш ва танқидчиларни қўрқитишга интилиши” ўлароқ баҳолади.

Танқидий чиқишлари билан танилган сурхондарёлик блогер Отабек Сатторий устидан маҳкама жараёни 11 март куни Музработ туман судида бошланган эди.

Каттақўрғонда Навоий ҳайкали олдида “ноўрин ҳаракатлар қилган” тиктокер қамалди

Навоий ҳайкали.

Самарқанд вилоятининг Каттақўрғон шаҳридаги боққа ўрнатилган Алишер Навоий ҳайкали олдида “ ҳатти-ҳаракатларни амалга ошириб, уни ижтимоий тармоқда тарқатган” тиктокер ва унинг шериги суд ҳукми билан 15 суткага қамалди.

Расмий маълумотда таъкидланишича, йигитнинг ёши 24да бўлган. У қўлга олинганидан сўнг “ноўрин ҳаракатлари” учун Ўзбекистон халқидан узр сўраган.

“Катта хато қилдим. Бутун Ўзбекистон юзини ерга қаратибман. Ҳаммангиздан чин юракдан кечирим сўрайман”, — деб иқтибос келтирди йигитнинг сўзларидан Каттақўрғон шаҳар ҳокимияти.

Мазкур йигит шаҳар ҳокимияти тақдим этган видеода халқдан кечирим сўрар экан “10 май куни Алишер Навоий сиймосини ҳақорат қилгани”ни тан олган.

Иккинчи жаҳон уруши қатнашчиларининг энг кам пенсияси 2,5 миллион сўм бўлди

Адлия вазирлигининг 11 май куни хабар беришича, 2021 йил 10 майдан бошлаб 1941–1945 йиллардаги уруш ногиронлари ва қатнашчиларининг энг кам пенсияси миқдори 2,5 миллион сўм этиб белгиланди.

Бу ҳақда "Иккинчи жаҳон уруши қатнашчиларининг моддий таъминотини янада кучайтириш чора-тадбирлари тўғрисида"ги президент фармони қабул қилинди.

Фармонга асосан фашистлар концлагерларининг вояга етмаган собиқ маҳбуслари ва Ленинград шаҳри қамал қилинган даврда ишлаган шахслар ҳам уруш қатнашчиларига тенглаштирилди.

Расман билдирилишича, шу кунгача Иккинчи жаҳон уруши қатнашчиларининг энг кам пенсия миқдори 800 минг сўмни, ўртача ҳисобда эса 1 миллион 700 минг сўмни ташкил этар эди.

Ижтимоий тармоқда чирчиқлик ишчилар норозилик намойишига чиққани тўғрисидаги видео тарқалди

Ўзбекистондаги сўнгги намойишлардан бири: Нурободда чўпонлар яйлов ерларининг кластерларга бериб юборилаётганига норозилик билдириб, 6 апрелда қўйлар сурувини ҳокимликка ҳайдаб борганди

Чирчиқлик ўнлаб ишчилар иш ҳақи ўз вақтида тўланмаганига норозилик билдириб шаҳар ҳокимияти биноси олдига йиғилгани тўғрисидаги видеолар 11 май куни ижтимоий тармоқларда кенг равишда тарқатилди.

Чирчиқ шаҳар ҳокимлиги ахборот хизмати бундай норозилик намойиши бўлиб ўтгани тўғрисидаги маълумотни тасдиқлади.

“Ушбу фуқаролар қурилиш ташкилотлари томонидан ишга жалб қилинган бўлиб, ҳақиқатан ҳам уларга ҳақ тўлаш борасида кечикиш юзага келган. Улар эса муаммони бартараф этиш мақсадида ҳокимлик мутасаддиларига мурожаат қилиш учун тўпланишган”, - дейилади расмий хабарда.

Ҳокимиятнинг таъкидлашича, 11 май куни барча ишчиларга “иш ҳақларининг маълум қисми тўлаб берилган. Қолган қисмини эса 18 майга қадар тўлиқ ҳисоб китоб қилишга ўзаро келишилган”.

Ёзёвондаги автоаварияда икки оиланинг олти аъзоси ҳалок бўлди

2021 йилнинг дастлабки икки ойида аварияларда 265 киши ўлган.ИИВ ЙҲХББ ахборот хизмати инфографикаси.

Фарғона вилояти Ёзёвон туманидан ўтган А-373 автотрассасида юз берган автоавария оқибатида икки оиланинг 6 аъзоси ҳалок бўлди. Бу ҳақда 11 май куни вилоят ҳокимлигида ўтказилган йиғилишда маълум қилинди.

Йиғилишда таъкидланишича, ҳалок бўланлардан ташқари яна тўрт киши туман шифохонасининг жонлантириш бўлимида даволанмоқда.

Расмий маълумотдан англанишича, автоаварияга халқаро аҳамиятга эга бўлган А-373 автотрассасида оддий хавфсизлик стандартларига риоя қилинмаган.

“... водий вилоятларини боғловчи А-373 йўналишидаги йўл белгилари, бетон тўсиқлар, йўл ёритгичларини қайта кўриб чиқиш бўйича ишчи гуруҳ тузилиб, водий вилоятлари тўлиқ ўрганиб чиқилиши таъкидлаб ўтилди”, -дейилади расмий баёнотда.

Ўзбекистон автоавариялар натижасида ўлим ҳолатлари кўп юз берадиган давлатлар қаторига киради.

Масалан, ИИВ ЙҲХББ ахборот хизмати март ойида 2021 йилнинг январь—февралида содир этилган йўл-транспорт ҳодисаларида 265 киши ҳалок бўлгани ва 724 киши тан жароҳатлари олганини билдирган.

Ўзбекистонда 2020 йилда авариялар оқибатида жами 1962 киши ҳалок бўлган.

Ўзбекистон мусулмонлари идораси президент қароридан сўнг ҳайит кунини тасдиқлади

Ўтган йили Ўзбекистон мусулмонлари диний идораси пандемия муносабати билан ҳайит намозларини ўқишни номозхонлар зиммасидан соқит қилган эди.

Ўзбекистон мусулмонлари идораси Рамазон ҳайитининг биринчи куни 13 майга тўғри келиши ҳақидаги қарорни қабул қилди. Бу ҳақда Диний идора расмий сайти 11 май куни эълон қилди.

10 май кун Ўзбекистон президенти Шавкат Мирзиёев жорий йилдаги Рамазон ҳайити 13 май-пайшанба куни нишонланиши тўғрисидаги қарорни қабул қилган эди.

Ўзбекистон мусулмонлари диний идораси 13 май куни ҳайит намози Тошкент вақти билан соат 05:30 да ўқилишини эълон қилди.

Президент қарорига мувофиқ, 2021 йилнинг 14-15 май кунлари қўшимча дам олиш кунлари ҳисобланади.

Ўтган йили Ўзбекистон мусулмонлари диний идораси пандемия муносабати билан ҳайит намозларини ўқишни номозхонлар зиммасидан соқит қилган эди.

Сурхондарёда сел тошқини туфайли Тошкент-Термиз автомагистрали вақтинча ёпиб қўйилди

Иллюстратив сурат

Жорий йилнинг 10 май куни тушдан кейин Сурхондарё вилояти Шеробод тумани ҳудудидан ўтган М-39 автомагистралининг 1385-километрида кучли ёмғир ёғиши сабабли сел тошқинлари юзага келган.

Бу ҳақда маълумот тарқатган Фавқулодда вазиятлар вазирлиги кечаги куннинг ўзида йўлнинг белгиланган қисмига бир нечта махсус техника сафарбар этилганини билдирган.

“Ушбу соатларда Фавқулодда вазиятлар бошқармаси раҳбарлиги остида йўлни тош ва лой массасидан тозалаш ишлари олиб борилмоқда”, дейилган вазирлик хабарномасида.

ФВВ қайдича, сел ҳодисаси натижасида ҳеч ким жабрланган эмас, йўлнинг сел туфайли тўсилган қисми эса яқин соатларда транспортлар ҳаракати учун очилиши маълум қилинган.

Коронавирус юқтириб олганларнинг умумий сони 95 минг нафардан ошди

Ўзбекистонда коронавирус инфекцияси қайд этилганлар сони, 2021 йил 10 май ҳолатига кўра, 95 минг 72 нафарни ташкил этган.

Соғлиқни сақлаш вазирлиги қайдича, ўтган кеча-кундузда мамлакатнинг Навоий вилоятидан бошқа барча ҳудудларида жами 313 киши коронавирус юқтириб олган.

Айни пайтда душанба куни Қорақалпоғистон Республикаси, Бухоро, Жиззах, Қашқадарё, Наманган, Самарқанд, Сурхондарё, Фарғона, Хоразм, Тошкент вилоятлари ва Тошкент шаҳрида 372 нафар бемор соғайиб, тузалганларнинг жами 90 минг 664 нафарга етган.

Касалхоналарда муолажаси давом этаётган беморлар сони эса 3 минг 744 нафарни ташкил этмоқда.

ССВ кеча коронавирусга чалинган беморлардан яна икки нафари вафот этгани, шу тариқа хасталикдан вафот этганларнинг умумий сони 664 нафарга етганини билдирган.

Бу орада вазирлик 10 май куни мамлакат ҳудудлари бўйлаб COVID-19 га қарши жами 50 минг 581 доза вакцина қўлланилгани, булардан 1-босқич эмланганлар сони 17020 нафарни, 2-босқичда эмланганлар сони эса 33561 нафарни ташкил қилганини маълум қилган.

Шу тариқа, ССВ маълумотига мувофиқ, бугунги кунгача Ўзбекистонда жами 1 миллион 173 минг 978 доза вакцинадан фойдаланилган бўлиб, 1-босқичда эмланганлар сони 1миллион 57 минг 94 нафарни, 2-босқичда эмланганлар сони эса 116 минг 884 нафарни ташкил қилмоқда.

Янги алифбо таҳририга оид қонун лойиҳаси муҳокамаси яна 6 ой давом этади

Лотин ёзувига асосланган ўзбек алифбосига босқичма-босқич тўлиқ ўтишни таъминлаш бўйича Республика ишчи гуруҳи “Лотин ёзувига асосланган ўзбек алифбосини жорий этиш тўғрисида”ги қонунга ўзгартиришлар киритишга оид қонун лойиҳаси бўйича умумхалқ муҳокамасини жорий йилнинг 1 ноябригача давом эттиришга қарор қилган. Бу ҳақда Давлат тилини ривожлантириш департаменти матбуот хизмати маълумот тарқатди.

Қайд этилишича, мазкур қарор лотин ёзувига асосланган ўзбек алифбосини ҳар томонлама пухта, кенг жамоатчилик фикр-мулоҳазалари ва таклифларини чуқур ўрганган ҳолда такомиллаштириш мақсадида қабул қилинган.

Департамент келажак 6 ой давомида масъуллар томонидан қонун лойиҳасининг зарурати ва аҳамиятига бағишланган илмий анжуманлар, маъруза ва семинарлар ўтказилиши, алифбога шаклий ўзгаришлар киритилиши муносабати билан талаб этиладиган харажатлар миқдори ўрганилишини, оммавий ахборот воситаларида такомиллашаётган алифбонинг турли (фонетик, график, техник, имло) хусусиятларига доир туркум кўрсатув ва мақолалар ташкил этилишини урғулаган.

“Илмий анжуманларда билдирилган таклиф ва мулоҳазалар турли соҳа олим ва зиёлиларидан иборат экспертлар гуруҳи иштирокида ўтказиладиган конференцияда кўриб чиқилиб, якуний хулосага келинади ҳамда лойиҳа билан биргаликда Ҳукуматга киритилади”, дейилган Давлат тилини ривожлантириш департаменти хабарномасида.

Ўзбекистонда лотин ёзувига асосланган ўзбек алифбосининг янги версияси лойиҳаси шу йил 16 март куни муҳокамага қўйилгани ҳақида Озодлик аввалроқ хабар қилган. Ўзбекистон Фанлар академияси томонидан ишлаб чиқилиб, regulation.gov.uz сайтида ёйинланган қонун лойиҳаси муҳокамаси 31 мартгача давом этиши кўзда тутилганди. Янги алифбодан 28 ҳарф, битта ҳарфлар бирикмаси ҳамда тутуқ белгиси ўрин олган.

Департамент 15 кунлик муҳокама давомида лойиҳани 26 мингдан зиёд киши кўриб, 1035 та фикр қолдиргани, таклифларнинг 56 фоизи (547 таси) лотин ёзувига асосланган ўзбек алифбосини ислоҳ қилинишига оид экани, таклиф ёзганларнинг 32 фоизи (302 нафари) эса амалдаги алифбода қолишни ёқлаганини очиқлаган.

Аксилмонополия қўмитаси 34 та кластерни чигит нархини келишиб оширганликда гумонлаяпти

Монополияга қарши курашиш қўмитаси биржа савдоларида техник чигитнинг бошланғич нархларини келишиб сунъий ошириш ва рақобат тўғрисидаги қонунчилик талаблари бузилиши аломатлари юзасидан 34 та пахта-тўқимачилик кластерларига нисбатан иш қўзғатган.

Бу ҳақда маълумот тарқатган қўмита матбуот хизматига кўра, бу қарорга МҚКҚ пахта ёғи нархлари кескин ошганлиги юзасидан ўтказилган ўрганиш натижасида келган.

“Таҳлил натижаларига кўра, жорий йил апрел ойи давомида биржа савдоларига 40 та пахта-тўқимачилик кластерлари томонидан техник чигит савдоларга қўйилганлиги ҳамда қўйилаётган техник чигитнинг бошланғич нархлари апрель ойида ўртача 38 фоизга кўтарилганлиги аниқланган”, дейилган аксилмонополия қўмитаси хабарномасида.

Ўзбекистонда ўсимлик ёғи нархининг ошишига асосан кунгабоқар уруғлари ишлаб чиқариш ва экспортнинг қисқариши билан боғлиқ ташқи муҳит таъсир кўрсатаётганини қайд этган МҚКҚ айни пайтда айрим пахта-тўқимачилик ишлаб чиқариш ташкилотчилари ҳам вазиятдан фойдаланган ҳолда пахта чигити нархини асоссиз оширишгани, бу эса пахта ёғи нархига ҳам ўз таъсирини кўрсатганига эътибор қаратган.

Аксилмонополия қўмитаси мулозимлари Газета.uz нашрига мазкур кластерлар вакиллари буйруқни бажариб, ўз хатоларини тўғрилашлари кераклигини урғулаган.

“Қўмита уларнинг келишув йўли билан тузилган шартномаларини бекор қилиш ҳуқуқига эга. Агарда талаб бажарилмаса, маъмурий жавобгарликка тортилишлари мумкин”, дея иқтибос келтирган МҚКҚ вакиллари сўзларидан онлайн нашр.

“Сардоба иши” бўйича 17 кишига ҳукм ўқилди. Улар 4 йилдан 10 йилгача қамалди (ВИДЕО)

Сардоба тошқинида вайрон бўлган аҳоли пункти, 2 май, 2020, Сардоба, Сирдарё.

Олий суднинг Жиноят ишлари бўйича судлов ҳайъати 10 май куни «Сардоба иши» бўйича 17 кишига ҳукм ўқиди.

Уларнинг барчаси Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а”, “в” бандлари, 209-моддаси (мансаб сохтакорлиги) 2-қисми “а”, “б” бандлари ва 258-моддаси (тоғ-кон, қурилиш ёки портлатиш ишлари хавфсизлиги қоидаларини бузиш) 2-қисми “а”, “б” бандларида назарда тутилган жиноятларни содир этганликда айбли деб топилди.

Суд ҳукмига кўра, “Ўзтемирйўлқурилишмонтаж” бош директорининг собиқ ўринбосари М. Холматов 10 йил муддатга озодликдан маҳрум қилинди.

Сардобадан бир йил ўтиб: Сув остида қолган сирлар. Озодлик суриштируви
Илтимос кутинг

Айни дамда медиа-манба мавжуд эмас

0:00 0:26:21 0:00

“UzGIP” МЧЖ Истиқболли лойиҳаларни режалаштириш бўлими бошлиғи лавозимида ишлаган С. Рудневга 5 йил муддатга озодликдан маҳрум қилиш ва базавий ҳисоблаш миқдорининг 600 баравари миқдорида 133 800 000 сўм жарима жазолари тайинланди. Озодликдан маҳрум қилиш жазосини манзил колонияларда ўташ белгиланди.

“Сирдарё сув қурилиш инвест” ДУК раҳбари лавозимида ишлаган С. Абдуназаров 5 йил муддатга озодликдан маҳрум қилини. Унга ҳам 133 800 000 сўм жарима тайинланди. Озодликдан маҳрум қилиш жазосини манзил колонияларда ўташ белгиланди.

Сардоба: “Бу ерлар олдин жаннат эди” – омон қолганлар ҳикояси
Илтимос кутинг

Айни дамда медиа-манба мавжуд эмас

0:00 0:16:00 0:00

Бундан ташқари TO’PALANG HDP IRRIGATION SYSTEMS” собиқ раҳбари Б. Асадов, мазкур ташкилотда турли лавозимларни эгаллаганлар - Л. Тожиддинов, К. Рўзиев, А. Шукуров, (“Омад дубл” МЧЖ собиқ раҳбари И. Каттабеков ва унинг қўл остида ишлаган Ў. Хамраев, Ш. Мамиров, “Sariosiyo qurilish” раҳбари ва мансабдорлари С. Муродулоев, А. Муродуллаев, “Trans servis kompleks” собиқ директори Ф. Махмудов,унинг ўринбосари З. Жабборов ҳам турли муддатларга озодликдан маҳрум этилиб, жаримага тортилди.

Сув хўжалиги вазирлиги Сув ресурслари васувдан фойдаланиш бошқармаси бошлиғи лавозимида ишлаган Ш. Кучкаров Жиноят кодексининг 203-моддаси (сув ёки сув ҳавзаларидан фойдаланиш шартларини бузиш) да назарда тутилган жиноятни содир этганликда айбли деб топилиб, унга базавий ҳисоблаш миқдорининг 100 баравари миқдорида 22 300 000 сўм жарима жазоси тайинланиб, дастлабки қамоқда сақланган 126 куни Жиноят кодексининг 62-моддаси тартибида тайинланган жазодан чегирилиб, ўташ 6 865 000 сўм жарима жазоси қолдирилди

“Сардоба” сув омбори объектларидан фойдаланиш ва ривожлантириш дирекцияси собиқ бошлиғи Ф. Данабоев 5 йилга, “Сардоба”нинг бош муҳандиси бўлган С. Каххоров 4 йилга қамалди.

Олий суднинг билдиришича, уларга нисбатан маҳкама жараёни ёпиқ эшиклар ортида ўтказилди.

Шунингдек, судланувчилардан ўзлаштириш ва растрата йўли билан талон-торож қилиш оқибатида ҳамда “Сардоба” сув омбори ўпирилиши натижасида етказилган зарарларни ундириш чоралари белгиланди.

2020 йилнинг 1 май тонгида содир бўлган Сардоба сув омбори тўғонининг қулаши Ўзбекистон тарихидаги энг қиммат ва энг драматик техноген фалокатга айланди. Уч йил олдин қуриб битирилган тўғоннинг ëрилиши ўн минглаб одам ҳаëтини остин-устун қилди¸ мамлакат иқтисодига миллиардлаб зиëн етказди.

Озодлик бу фалокат ва унинг оқибатлари тўғрисида қатор мақолаларни ҳамда видеолавҳаларни ўз вақтида эълон қилган.

Рамазон ҳайитида ўзбекистонликлар қаторасига 4 кун дам олади

Ўтган йили Ўзбекистон мусулмонлари диний идораси пандемия муносабати билан ҳайит намозларини ўқишни номозхонлар зиммасидан соқит қилган эди.

Президент Шавкат Мирзиёев 10 май куни “Рамазон ҳайитини нишонлаш тўғрисида”ги қарорни имзолади.

Қарорга асосан, Рамазон ҳайитининг биринчи куни 2021 йилда 13 май – пайшанба кунига тўғри келади.

Президент қарорига мувофиқ, 2021 йилнинг 14-15 май кунлари қўшимча дам олиш кунлари ҳисобланади.

“Рамазон ҳайити карантин талабларига мувофиқ, халқимизнинг миллий ва диний анъаналарига мос равишда ўтказилади”,-дейилади Адлия вазирлиги билдирувида.

Ўтган йили Ўзбекистон мусулмонлари диний идораси пандемия муносабати билан ҳайит намозларини ўқишни номозхонлар зиммасидан соқит қилган эди.

Жорий йилги ҳайит намозининг ўқилиши ёки яна мусулмонлар зиммасидан соқит қилиниши ҳозирча номаълум.

Ёшлар саноат ва тадбиркорлик зоналари ташкил қилинади

Бухородаги корхоналардан бири.

Вазирлар Маҳкамаси 10 май куни “Ёшлар саноат ва тадбиркорлик зонаси” ҳамда “Ёш тадбиркорларни қўллаб-қувватлаш жамғармаси тўғрисида”ги низомларни тасдиқлади.

Низомга асосан ёш тадбиркор сифатида 18 ёшга тўлган ва 30 ёшдан ошмаган, юридик шахс ёки таъсисчи мақомига эага, инвестиция лойиҳасини амалга ошириш истагини билдирган Ўзбекистон фуқаролари тан олинади.

Ёшлар саноат зоналари фақат муҳандислик-техник коммуникациялари мавжуд бўлган ёки ўтказиш осон бўлган, фаолият кўрсатмаётган ишлаб чиқариш майдонлари ва қишлоқ хўжалигига мўлжалланмаган ер майдонларида ташкил этилади.

Патент асосида ишлаб чиқаришни йўлга қўйишни таъминловчи стартаплар, инновацион маҳсулотлар ишлаб чиқаришга мўлжалланган инвестиция лойиҳалари, импорт ўрнини босадиган ва экспортга йўналтирилган рақобатбардош маҳаллий ишлаб чиқаришни ташкил қилиш устуворликка эга бўлади.

Саноат зоналарида яратиладиган янги иш ўринларининг камида 70 фоизи ёшлар учун мўлжалланган бўлиши назарда тутилмоқда.

Ўзбекистон коронавирус кучайган Ҳиндистон ва Туркияга авиақатновларни чеклади

Республика махсус комиссияси Истанбул шаҳридан Фарғона, Урганч ва Самарқанд шаҳарларига авиақатновларни 2021 йил 5 майдан 1 июнга қадар тўхтатиш тўғрисида қарор қабул қилди.

Бундан ташқари Ҳиндистон ва Туркияга сайёҳлар учун мўлжалланган барча чартер қатновлар жорий йил 10 майдан бошлаб эпидемиологик вазият барқарорлашгунга қадар тўхтатилади.

Айни пайтда Тошкент-Истанбул йўналишида авиақатновларни вазиятдан келиб чиқиб, жорий йил 10 майдан бошлаб талабдан келиб чиққан ҳолда бсоқичма-босқич камайтиришга қарор қилинди.

Республика махсус комиссиясининг билдиришича, қарор Ўзбекистонга коронавирус инфекциянинг янги штаммларини кириб келишини олдини олиш мақсадида қабул қилинган.

Айни пайтда Ҳиндистон коронавирус тарқалиши бўйича жаҳонда АҚШдан кейинги иккинчи ўринни, Туркия эса бешинчи ўринни эгалламоқда.

Истанбулда оғир аҳволда қолган ўзбекистонликлар Тошкентга олиб келинди

Истанбул манзараси.

Туркиянинг Истанбул шаҳрида оғир аҳволда қолган олти нафар ўзбекистонлик Тошкентга олиб келингани тўғрисида Ташқи меҳнат миграцияси агентлиги маълум қилди.

Хабарда таъкидланишича, улар Истанбулга ишлаш учун борганлар, лекин пандемия даврида молиявий қийин вазиятга тушиб қолганлар ҳамда коронавирусга ҳам чалиниб, даволаниб чиққанлар. Шундан сўнг улар Истанбулдаги Ўзбекистон Бош консулхонасига ёрдам сўраб мурожаат қилган.

“Ўзбекистон фуқаролари – Т.И, М.Ю ва уларнинг фарзандлари Ватанга қайтарилди”,-дейилади хабарда.

Агентлик аввалроқ Россияда қийин аҳволда қолган 9 нафар ўзбекистонлик Тошкентга бепул олиб келингани тўғрисида билдирган.

Зангиотадаги болалар боғчаси мудираси 1 миллиард сўмга яқин пулни ўғирлаган

Иллюстратив сурат.

Тошкент вилояти Зангиота туманидаги 16-сонли болалар боғчаси мудираси деярли 1 миллиард сўмни талон-торож қилганликда айбланмоқда.

Тошкент вилоят прокуратурасининг маълум қилишича, мазкур боғча мудираси 37 та ходимининг пластик карточкасини ноқонуний равишда тортиб олиб, табелларга сохта маълумотларни киритиб, жами 983,5 миллион сўм бюджет маблағини ўзлаштириб юборган.

Прокуратура, бундан ташқари, Оққўрғон туманидаги 2,6,10,12-сонли болалар боғчалари раҳбарлари ҳам тарбияланувчилар учун ажратилган озиқ-овқат маҳсулотларини талон-торож қилганини аниқлаган.

Билдирилишича, жами 11 та боғча раҳбарларига нисбатан жиноят ишлари қўзғатилган.

2021 йилнинг 24 март куни президент Шавкат Мирзиёев раислигида ўтган видеоселектор йиғилишида ҳақда бош прокурор ўринбосари Акмалхўжа Мавлонов Ўзбекистонда 2020 йилда манзилли дастурларни амалга ошириш учун ажратилган 10 триллион сўмнинг 845 миллиард сўми талон-торож қилингани ҳақида гапирган эди.

Фарғона расмийлари немис аскарлари акс этмиш плакатни тайёрлаганларни жазоламоқчи

Фарғона шаҳри дарвозаси

Фарғонадаги “Ватанпарварлар боғи”да 9 май арафасида “Хотира бор экан – миллат барҳаёт” сўзлари остида Вермахт аскарлари расми туширилган кўчма плакат ўрнатилган.

Вилоят ҳокимлиги масъули Файзулло Қосимов “Тасвирий ойина” ижодий уюшмаси Фарғона вилоят бўлимининг қўпол техник хатоси ва эътиборсизлиги натижасида мазкур плакатнинг боғ ҳудудига ўрнатилишини “ёқимсиз ҳолат” деб атаган.

Мулозимга кўра, ҳозирги пайтда бу масалани вилоят ҳокимлиги ўргана бошлаган.

“Дастлабки суриштирувга кўра, интернетдан иккинчи жаҳон уруши даври билан оид расмларга қидирув бериб, етарли билимсизлик туфайли тасодифий расмни олингани, плакат дизайнида фойдаланилгани маълум бўлди. Ким плакат макетини тайёрлаган, нега бу расмни танлаган, нега тасдиқлатилмаган ҳолда ўрнатилган, буларнинг бари батафсил ўрганиб чиқилади. Айбдорларга кескин чоралар кўрилади”, дея қайд этган Ф. Қосимов.

Фарғона вилояти ҳокимлиги масъули айни пайтда мазкур кўчма плакат “Ватанпарварлар боғи”дан олиб ташлангани, ўрнига II жаҳон урушида қаҳрамонлик кўрсатган ўзбек жангчилари тасвирланган баннер ўрнатилишини қўшимча қилган.

АҚШ долларининг расмий курси яна 10,5 минг сўмдан ошди

Ўзбекистон Марказий банки 2021 йил 10 майидан хорижий валюталарнинг сўмга нисбатан янги қийматини белгилади.

МБ маълумотига кўра, душанбадан АҚШ долларининг расмий курси аввалги курсга нисбатан 18 сўм 36 тийинга кўтарилиб, 10 минг 511 сўм 84 тийинни ташкил этади (ваҳоланки, 7 май ҳолатига кўра ҳам доллар курси 10 минг 493 сўм 48 тийинга тенг бўлган эди). Умуман олганда, ўтган ҳафта мобайнида Ўзбекистонда АҚШ доллари курсида кетма-кетига бир неча кун пасайиш кузатилганди.

Айни пайтда 10 майдан евронинг расмий курси ҳам олдинги курсга нисбатан 55 сўм 75 тийинга қимматлаб, 12 минг 697 сўм 25 тийинга тенг бўлади (7 май ҳолатига кўра, евро курси 12 минг 641 сўм 50 тийинга тенг бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Давомини ўқинг

XS
SM
MD
LG