БМТ: Украинадаги уруш туфайли ҳар 10 украиналикдан 9 нафари қашшоққа айланиши мумкин
БМТнинг Ривожлантириш дастури уруш туфайли Украина тараққиёти бир неча ўн йил орқага кетиши мумкинлиги тўғрисидаги ҳисоботини эълон қилди.
Ҳисоботда таъкидланишича, уруш оқибатида Украинадаги саноат корхоналарининг ярми тўлиқ ёпилган, қолганлари эса катта қийинчиликларни бошдан кечирмоқда.
Дастлабки таҳминларга қараганда, урушнинг чўзилиб кетиши ортидан ҳар 10 украиналикдан 9 нафари қашшоққа айланиши мумкин. Йигирма йиллик тараққиёт эса таҳдид остида қолади. Урушнинг ижтимоий ва иқтисодий оқибатларини бартараф этиш учун асрлар керак бўлади.
Россия Украина шарқида янги ҳужумларга тайёргарлик кўрмоқда, НАТО Украина ғалаба қозонишини башорат қилмоқда
Украина ҳукумати мамлакатнинг иккинчи йирик шаҳри бўлган Харьков атрофида Россия армиясига қақшатқич зарбалар беришда давом этаётганини маълум қилди. Айни пайтда президент Владимир Зеленский 15 май куни кечқурун берган баёнотида Россия қўшини Донбассни тўлиқ назоратига олиш учун янги ҳужумларга тайёрланаётганини айтди:
“Биз Россиянинг Донбассга уюштирадиган янги ҳужумларини қайтаришга тайёргарлик кўрмоқдамиз. Оккупантлар ҳалигача боши берк кўчага кириб қолганларини, улар “махсус амалиёт” деб атаётган операция аллақачон банкрот бўлганини англай олмаяптилар”,-деди Зеленский.
Украина президенти маслаҳатчиси Алексей Арестович Харьковдан чекинган рус бўлинмалари Донбасс йўналишига ташланаётганини билдирди.
НАТО Бош котиби Йенс Столтенберг ташкилотга аъзо давлатлар расмийлари билан 15 май куни Берлинда ўтказган учрашувда “Уруш Москва режалаштирганидек бўлмаяпти”, деб айтди ва давлатларни Украинага ҳарбий кўмакни кучайтиришга чақирди.
16 май куни НАТО Эстонияда кенг кўламли ҳарбий ўқув машғулотларини бошлайди. Шу куни Брюсселда Европа Иттифқи ташқи ишлар вазирлари Украинадаги вазиятни муҳокама қилади. Мазкур учрашувда Россияга нисбатан янги санкциялар жорий этиш масаласи кўриб чиқилади.
Элчи Антонов Россия Украинадаги урушда таслим бўлмоқчи эмаслигини урғулади
Россиянинг АҚШдаги элчиси Анатолий Антонов Россия Украинада “таслим бўлмаслиги”га ишончи комиллигини айтди. Унга кўра, Россиянинг АҚШдаги дипломатлари “олий бош қўмондон қуролли кучлар олдига қўйган барча вазифалар тўла-тўкис адо этилади”, дея ишонадилар.
“Соловьёв Live” телеканали ёйинида сўзлаган Антоновга кўра, АҚШ Россияни сулҳ музокараларига “ундамоқда”, аммо фақат ўз шартларини тиқиштиряпти. Элчининг иддаосича, Россияга учта шарт қўйилган: Украинада ҳарбий ҳаракатларни тўхтатиш, қўшинларни 24 февралгача эгаллаб турилган позицияларга қайтариш, шунингдек, “барча қилмишига тавба қилиш”. Элчи Антонов: “Бунақа капитуляция бўлган эмас, ҳеч қачон бўлмайди. Биз асло таслим бўлмаймиз, чекинмаймиз”, деган.
“Азовсталь” заводидаги ярадорларнинг рафиқалари Туркия президентидан воситачи бўлишни сўрашмоқчи
Россия ҳарбийлари қамалда ушлаб турган “Азовсталь” заводи ҳудудида украиналик қарийб 600 чоғли ярадор жангчи бор. Бу ҳақда миллий телемарафон ёйинида Украин Миллий гвардиясининг 12-оператив бригадаси командири Денис Шлега маълум қилди.
Унинг айтишича, юзлаб ярадорлардан тақрибан 40 нафари жуда оғир аҳволда. Шлега дори-дармон ва тиббиёт ускуналари “жуда танқис”лигини урғулаб, вазиятни у “мураккаб” дея баҳолади, дея хабар қилди Озодликнинг украин хизмати.
Таъкидланишича, ушбу маълумотни 15 май куни ўтказилган матбуот анжуманида “Азовсталь” мудофаачиларининг рафиқалари ҳам тасдиқлаган. Улар эрлари кунига бир стакандан техник сув ичишаётгани, озиқ-овқат захираси жуда камлигини айтганлар.
Жангчиларнинг аёллари эндиликда президент Эрдўғон билан учрашиш ва ундан эрларига ёрдамлашишини илтимос қилиш учун Туркияга боришмоқчи.