Гаубицалар фронт чизиғида
Украина Мудофаа вазирлиги фронт линиясида қўлланаётган артиллерия қуроли - гаубицаларни намойиш қилди.
Видеода, украина аскарларининг АҚШдан яқинда борган M-777 гаубицалардан отаётгани акс этган. Рейтерс агентлиги ҳозирча бу видеода берилган маълумотларни мустақил манбалар орқали тасдиқлай олмаганини билдирди.
Аммо, АҚШнинг Киевдаги элчихонаси, Вашингтон ваъда қилган 90 та гаубица Украинага етказилгани, аксари фронт линиясида эканини тасдиқлаган. Бу қурол АҚШнинг Украинага яқинда берган 800 миллион долларлик ҳарбий ёрдам пакети доирасида етказилди.
M-777 артиллерия қуроли - ёпиқ жойдан туриб снаряд отиши ва узоқ масофадаги нишонни аниқ ура олиши билан аҳамиятлидир.
"Си Цзинпин ёрдам беришини сўраймиз!"
15 май куни ўтказилган матбуот анжуманида “Азовсталь” мудофаачиларининг рафиқалари, жангчиларни озод қилиш учун Кремлнинг асосий ҳамкори бўлган Хитой раҳбаридан ёрдам сўрашди.
“Бугун биз Си Цзинпинга мурожаат қиламиз, чунки у Россия президенти Владимир Путиннинг иқтисодий ҳамкори ва Путин у билан мулоқотга киришиши мумкин. Шунинг учун биз ундан самарали мулоқот ўтказишини ва жангчиларимизни Туркия каби учинчи давлатга олиб ўтишда ёрдам беришини сўраймиз. Эрдўғон бунга қарши эмас”, деди Ханна Ивлеева, украин аскари рафиқаси.
Россия ҳарбийлари қамалда ушлаб турган “Азовстал” заводи ҳудудида 600 га яқин украиналик жангчи бор. Украин Миллий гвардиясининг 12-оператив бригадаси командири Денис Шлеганинг айтишича, дори-дармон ҳам жуда оз.
Украина президенти Владимир Зеленский бу жангчиларни озод қилиш учун музокаралар ҳануз давом этаётганини билдирди:
"Биз халқимизни Мариуполдан, Азовсталдан қутқариш учун жуда қийин ва нозик музокараларни давом эттирмоқдамиз. Биз буни ҳар куни қиляпмиз. Асосийси, келишувлар бажарилди. Россиянинг Лвов вилоятига ракета зарбалари, Донецк вилоятидаги Ҳулиапол, Северодонецк, Лисичанск, шаҳарлари ва жамоаларининг ўққа тутилиши - Украина ҳар куни бошдан кечираётган босқинчиларнинг шафқацизлигини намоён қилади ва бу ваҳшийликлар фақат рус аскарларига бориб тақалади. Урушда омон қолганлар бу ёвузликни ўзлари билан Россияга олиб кетишади”.
“Азов” полки аскари: “Таслим бўлиш - ўз жонингга қасд қилиш демакдир”
2 ойдан ортиқ Азовстал пўлат заводи ҳудудида қамалда ётган “Азов” полки жангчиси, “Настояшчее Время” телеканалига берган интервьюсида, “Таслим бўлиш – ўз жонингга қасд қилиш демакдир”, деди.
У, чамаси 50 ярадор аскар жуда оғир аҳволда экани, озиқ-овқат кунда бир маҳал еган тақдирда, 5 кунга етарлик қолгани, ичимлик суви аллақачон тугаб, аскарлар куни бир стакандан “техник” сув ичиб жон сақлаётганини айтди.
“Таслим бўлинг, деб буйруқ беришган тақдирда ҳам буни бажариб бўлмайди. Таслим бўлиш – ўзингни ўлдириш демак. Балки шунинг учун ҳам ҳеч ким бизга бунақа буйруқ бермаяпти. Биз қуршовдамиз, аммо бор захирамиз бу ердан чиқиб олишимизга етмайди. Масалан, ўқ-доримиз оз қолган. Жангга лаёқатли одамларимиз ҳам кўп эмас. Улар мудофаа учун кифоя қилади, аммо қуршовни ёриб ўтиш учун етарли эмас. Қолаверса, масалага дипломатик ечим топилишидан, сиёсатчиларимиз Мариуполдан чиқишимиз хусусида келишувга эриша олишидан ҳануз умид узмаганмиз”, деди Дмитрий Козацкий.
Одессада тинч аҳолига ҳужум бўлди
16 май куни, Россия қўшинлари Одесса вилоятига яна авиазарбалар йўллади: сайёҳлик инфратузилмаси объектлари шикастланди, бинолар вайрон бўлди, жойларда ёнғин чиқди, ярадорлар бор.
Бу ҳақда Украина Қуролли кучларининг “Жануб” оператив қўмондонлиги (ОҚ) маълумотига таяниб, “Суспільне” нашри хабар қилди.
Аввалроқ маҳаллий маъмурлар ва ОАВ Белгород-Днестр туманида тутун кўринаётганини маълум қилишган эди. Депутат Алексей Гончаренко ракета дам олиш базаларидан бирига тушганини билдирди.
Хабарларга кўра, бир бола оғир жароҳат олган, яна икки катта киши жабрланган. Уруш шароитида, томонларнинг расмий баёнотларини мустақил равишда текшириш мушкул бўлиб қолмоқда.
Луганск вилояти ҳарбий маъмурияти раҳбари Сергей Гайдай “Настояшчее время”га Киев урушга қадар вилоят ҳудудининг қарийб 70 фоизини назорат қилган бўлса, ҳозирда шундан атиги 10 фоизи қолганини айтди.
Вилоятда оғир жанглар кечмоқда, хусусан, Рубежное атрофида ҳамда Северодонецкнинг йўлдош қишлоқлари бўлмиш Воеводовка ҳамда Шчедришчевода.
“Энг хавфли уч йўналиш – Северодонецк йўналиши, Попасная тарафдан ҳамда Белогоровка томондан ёриб ўтиш ҳужумларидир: бу ҳужумлардан душман қўли баланд келган тақдирда ҳудуд Лисичанск – Бахмут трассаси бўйлаб тўлиқ кесиб олинади ва Луганск вилоятининг бутун ҳудуди қуршовда қолад. Фоиз ҳисобида айтиш қийин. Фақат шуни биламанки, бугунги кунда Украина назоратидаги ҳудудлар бу Рубежное атрофи, Северодонецк, Лисичанскнинг йўлдош қишлоқлари, Горск жамоаси ва Бахмут трассаси бўйлаб Донецк вилоятигача қадар ерлардан иборат холос. 2014 йилдан бери вилоят ҳудудининг 30 фоии босиб олинган эди. Кенг кўламли уруш аввалида украин қўшинлари фронт чизиғини чўзиб юбормаслик ва мағлуб бўлмаслик учун анча орқага чекинди. Очиғи, бу тактика тғри бўлганини ҳаммамиз тушунамиз, чунки икки ярим ой ўтган бўлса ҳамки, Россия армияси Луганск вилоятидан ўта олмаяпти”, деди Сергей Гайдай.