Тошкент шаҳар Миробод туман судида 11 октябрь куни Сергели туманида жойлашган омборхонадаги портлаш айбдорлари устидан ҳукм ўқилди.

Маҳаллий нашрлар хабарига кўра, судланувчилар С.Ф., А.Ф., Б.С. ва Н.К. Ўзбекистон Жиноят кодексининг 259-моддаси (Ёнғин хавфсизлиги қоидаларини бузиш) 2-қисми “а” ва “б” бандлари билан айбдор деб топилганлар, уларнинг ҳар бирига нисбатан 5 йилданга озодликдан маҳрум қилиш жазоси тайинланган.

Шунингдек, суд ҳукмида фуқаровий даъвогарлар ва жиноят ишида жабрланувчилар деб эътироф этилган учта МЧЖнинг даъво аризалари қаноатлантирилгани, улар томонидан кўрилган зарар 4 нафар судланувчи ҳамда жавобгар МЧЖлардан солидар тартибда ундирилиши билдирилган.

Сергелидаги “Interlogistics” МЧЖга қарашли омборхонада ёнғин ва портлаш ўтган йилнинг 28 сентябрь куни рўй берган, ҳодиса оқибатида 1 киши вафот этган, 163 киши турли даражада тан жароҳати олган эди. Портлаш оқибатида 39 та кўп қаватли уйлардаги 1370 та хонадон, 246 та ҳовли, мактаб ва боғча биноларига шикаст етгани айтилиб, омборхонага қўшни бўлган 20 дан зиёд ҳовли энг кўп зарар кўргани айтилганди. Портлашдан жабрланганларнинг қанчасига кўрилган зарарнинг не қадари қоплаб берилгани ҳақида аниқ маълумот йўқ.

Бир йил аввалги расмий маълумотларга кўра, Сергелидаги фавқулодда вазият сабабларини ўрганиш жараёнида ёнғин ва портлаш ўчоғи металл ва “сэндвич” панеллардан қурилган омбор бўлгани аниқланган. Ўша пайтда ҳолат юзасидан жиноят иши қўзғатилиб, гумонланувчи тўрт кишига нисбатан қамоққа олиш, бир кишига нисбатан гаров эҳтиёт чораси қўлланилгани билдирилган эди.

Ўзбекистонда қатор йиллар давомида инновацион ривожланиш вазири ўринбосари, сув хўжалиги вазири биринчи ўринбосари ва қишлоқ хўжалиги вазири биринчи ўринбосари лавозимларида ишлаган Азимжон Назаров суд томонидан бир қанча жиноятларни содир этган деб топилган. Бу ҳақда Газета.uz нашри ўз тасарруфидаги суд ҳукмига таянган ҳолда хабар қилди.

Мазкур ҳужжатга мувофиқ, Азимжон Назаров 2008 йили маркетинг тадқиқотлари, тижорий фаолият, молия ва бошқарув масалалари бўйича маслаҳат хизматларини кўрсатишга ихтисослашган Nazar Business and Technology ширкатини тузган. Унинг жиноятлари асосан шу ширкат билан боғлиқ. Назаров 2017 йил декабрида инновацион ривожланиш вазири ўринбосари лавозимига тайинлангач, Nazar Business and Technology раҳбарлигини бошқа одамга топширган, бироқ ўзида ягона таъсисчиликни сақлаб қолган.

“Жанубий Қорақалпоғистонда сув ресурсларини бошқаришни яхшилаш” лойиҳасини амалга ошириш юзасидан Сув хўжалиги вазирлиги ва Жаҳон банки ўртасида умумий қиймати 376,71 млн АҚШ доллари бўлган қарз битими имзоланган. Сув хўжалиги вазирлиги лойиҳани амалга ошириш, кредит, қарз маблағларидан мақсадли ва самарали фойдаланишга масъул этиб белгиланган.

2016 йил 5 август куни Сув хўжалиги вазирлигининг Жаҳон банки лойиҳаларини амалга ошириш гуруҳи ва Азимжон Назаров таъсисчилигидаги Nazar Business and Technology ўртасида “Мониторинг ва баҳолаш” ҳамда “Ижтимоий ҳимоя чоралари ва атроф-муҳитни муҳофаза қилиш тадбирларини амалга ошириш тўғрисидаги ҳужжатни яратиш” бўйича 2016−2021 йилларда консалтинг хизматларни кўрсатиш юзасидан умумий қиймати 950 320 АҚШ долларига тенг бўлган шартнома имзоланган.

Назаров МЧЖдаги ўринбосари ва бош ҳисобчи билан давлат ташқи қарзи ҳисобидан мазкур лойиҳага жалб қилинган маблағларни қонунга хилоф равишда ўзлаштириш юзасидан жиноий режа тузган. Унга асосан, лойиҳага жалб қилинган мутахассислар томонидан ҳақиқатда бажарилмаган иш турларини гўёки бажарилгани ҳақида ёлғон маълумотлар киритилган табел ва ҳисоб-фактуралар тайёрлаш орқали маблағларни ўзлаштиришни йўлга қўйган.

Давлат молиявий назорати инспекцияси ходими томонидан тузилган 2024 йил 7 мартидаги умумий далолатномага кўра, Назаров ва шериклари лойиҳа доирасида шартнома шартларига зид равишда ҳақиқатда бажарилмаган консалтинг хизматларини гўёки бажарилган деб кўрсатиш орқали Nazar Business and Technology’га 17 та ҳолатда жами 562 428 АҚШ доллари (валюта курсининг 2023 йил 31 июль ҳолатига 6 млрд 564 млн 388 минг 245 сўм) пул маблағи ортиқча тўланишига эришган.

Шунингдек, Назаров «Жанубий Қорақалпоғистонда Сув ресурсларини бошқариш» лойиҳаси доирасида амалга оширилмаган ёки лозим даражада бажарилмаган хизматлар учун ёлғон ҳужжатлар тайёрлаб, давлат маблағларини талон-торож қилган. У мазкур маблағларнинг бир қисмини Nazar Business and Technology`га ўтказиб, Тошкентда уй ва офис биноларини сотиб олган ҳамда қурдирган. Назаров ушбу мол-мулкларни жиноий фаолиятидан олинган даромадларни легаллаштириш мақсадида ишлатган ва 2017−2021 йилларда катта миқдорда пулларни ўзлаштирган.

Бундан ташқари, суд ҳукмида айтилишича, Азимжон Назаров сув хўжалиги вазирининг биринчи ўринбосари лавозимида ишлаган даврда насос станцияларини модернизациялашга алоқадор йирик лойиҳанинг қиймати 95,4 млн АҚШ долларига кўпайтирилган, шунингдек, бюджетдан 3,7 млрд сўм пул маблағлар асоссиз сарфланган. Назаров судда айбига иқрор бўлмаган. У умуман жиноят содир этмаганини айтиб, суддан ўзига нисбатан одилона қарор қабул қилишни сўраган.

“Судда судланувчининг айби гувоҳларнинг кўрсатмалари билан ўз исботини тўлиқ топгани қайд этилган”, дейилган Газета.uz хабарида.

Суд ҳукми билан Азимжон Назаров Жиноят кодексининг 167-моддаси 3-қисмининг «а» банди (Жуда кўп миқдорда ўзлаштириш ёки растрата йўли билан талон-торож қилиш), 209-моддаси 2-қисмининг «а» банди (Такроран ёки хавфли рецидивист томонидан мансаб сохтакорлиги), 243-моддаси (Жиноий фаолиятдан олинган даромадларни легаллаштириш) ҳамда 207-моддаси 1-қисмида (Мансабга совуққонлик билан қараш) назарда тутилган жиноятларни содир этишда айбдор деб топилган.

Cобиқ мулозимга 2 йил муддатга корхона, ташкилот ва муассасаларда моддий жавобгарлик юклатилган вазифалар ҳамда мансабдорлик лавозимларида ишлаш ҳуқуқидан маҳрум қилган ҳолда 4,5 йил муддатга озодликни чеклаш жазоси тайинланган.

Шунингдек, суд Назаров зиммасига давлатга етказилган 562 428 АҚШ доллари миқдоридаги зарарни қоплаб бериш мажбуриятини юклаган.

Қашқадарё вилояти Нишон тумани ИИБ ҳузуридаги тергов гуруҳи Sardor gangster тахаллуси билан TikTok ва YouTube платформаларида танилган блогер Сардор Сафарбоевга нисбатан жиноят иши очди.

“Sevimli” телеканалининг “Zamon” ахборот дастури хабарига кўра, жиноят ишига блогернинг хотини қиз фарзанд туғса, чиқиндига ташлашини айтгани сабаб бўлган.

“Мен қиз фарзанд кўрмайман. Агар қиз фарзанд кўрсам, олдириб ташлайман. Қиз керакмас. Хотин туққанидан шундай бораман, қизми, чиқинди идишга отиб юбор, дейман. Керакмас! Мен дўзахга кирсам ҳам ўғил фарзанд туғдираман”, деган Sardor gangster ижтимоий тармоқларда тарқалган видеосида.

Ушбу чиқиш жамоатчиликнинг кескин эътирозига сабаб бўлди. Бунинг ортидан Сафарбоев баҳсли фикр учун жамоатчилик, хусусан, хотин-қизлардан тиз чўккан ҳолда узр сўраган.

Қашқадарё вилояти ИИБ матбуот котиби Ирода Расулова Сардор Сафарбоев хотин-қизлар қадр-қимматини таҳқирлаганини қайд этган.

“Тармоқлардан фойдаланишнинг тартиб-қоидалари бор. Қоидаларни бузган фуқаролар қонуний тартибда жазоланади. Шуни унутманг, хотин-қизлар ҳуқуқлари давлат ҳимоясида”, деган ИИБ вакили.

Тиктокер айбланаётган Жиноят кодексининг 140-моддасида (ҳақорат қилиш) БҲМнинг 200 бараваридан 400 бараваригача миқдорда жарима, 240 соатдан 300 соатгача мажбурий жамоат ишлари ёки 1 йилдан 2 йилгача ахлоқ тузатиш ишлари каби жазолар кўзда тутилган.

Озодлик блогер Сардор Сафарбоев жорий йил 21 февраль куни “миллий, ирқий, этник ёки диний адоват”да айбланиб 10 суткага қамалгани ҳақида хабар берганди.

Лойиҳа қиймати 4,28 миллиард долларни ташкил этаётган Тошкент–Андижон пулли автомобиль йўли қурилиши муддати 6 йил 3 ойни ташкил этади. Бу ҳақда “Gazeta.uz” нашри Ўзбекистон транспорт вазирининг ўринбосари Жасурбек Чориев сўзларига таянган ҳолда хабар қилди.

Жаҳон банки билан ҳамкорликда ишлаб чиқилган лойиҳага асосан йўлнинг 64 фоизи янгидан қурилиши, 36 фоизи эса реконструкция қилиниши кутилмоқда. Узунлиги 314 километр бўлган I-a категориясидаги, цемент-бетон қопламали йўл 6 қатордан иборат бўлади.

Жараён уч босқични ўз ичига олади. Биринчи босқичда Тошкент–Ангрен (78 км), иккинчи босқичда Ангрен–Поп (93 км), учинчи босқичда эса Поп–Андижон (143 км) қисмлари қурилади.

Режага мувофиқ, пойтахтни водий билан боғловчи ушбу йўлда жами 10 та туннель барпо этилади, уларнинг умумий узунлиги 33 кмга етади. Энг узун туннель 6787 метрни ташкил этади.

Пулли йўл қурилиши Тошкентдан Андижонга сафар қилиш вақтини ҳозиргидан 2 соат 14 дақиқага камайтириши айтилмоқда.

Йўл қурилиши бўйича давлат-хусусий шерикчилик келишуви 49 йил мобайнида амал қилади.

Маълумот ўрнида, Ўзбекистон президенти томонидан жорий йилнинг 30 августида имзоланган қарорда Тошкент–Андижон пулли автойўлни қуриш 2026 йилда бошланиши белгиланган. Йўл 2032 йилда фойдаланишга топширилиши керак.

Тошкент давлат иқтисодиёт университети талабаси Б.А. инсон аъзолари олди-сотдисида айбланиб, жиноий жазога тортилди, дея хабар қилди “Kun.uz” нашри.

Суд ҳужжатларида қайд этилишича, 21 ёшли талаба “мўмай даромад орттириш мақсадида” ижтимоий тармоқларга инсон аъзоларини сотиб олиши ҳақида эълон жойлаштирган. У буйракни 38 минг, жигарни 43 минг ҳамда суяк илигини 23 минг доллар деб баҳолаган.

Ушбу эълондан сўнг аъзоларини сотмоқчи бўлганлар у билан боғланган. Талаба мурожаатчилардан бирига унинг битта буйрагини 38 минг долларга сотиб олишини, кўчириб ўтказиш Германияда амалга оширилишини, бунинг учун олдиндан 350 доллар тўлаши кераклигини айтган. Талаба ушбу пулни олган вақтида тезкор тадбирда ушланган.

Айбланувчи судда бу ишни муҳтожлик важидан қилгани, Германияда ҳеч қандай таниши йўқлигини айтган.

Суд ҳукми билан Б.А. Жиноят кодекси 25- (жиноятга тайёргарлик кўриш ва жиноят содир этишга суиқасд қилиш), 133-1-моддаси 1-қисмида (инсон аъзоларининг ёки тўқималарининг олди-сотдиси) назарда тутилган жиноятни содир қилишда айбдор деб топилган ва унга 3 йил озодликни чеклаш жазоси тайинланган.

Постсовет ўлкаларида сўнгги йилларда одам органлари савдоси кенгаяётгани кузатилмоқда.

Жумладан, Ўзбекистонда одам тана аъзоларини хориждаги донорларга контрабанда қилувчи жиноий гуруҳларнинг борлиги Бухорони титратган “одамхўр Қораевлар иши”дан сўнг маълум бўлган.

Қўшма Штатларнинг Флорида штатига “Милтон” тўфони ёпирилаётгани муносабати билан Ўзбекистоннинг АҚШдаги элчихонаси мазкур ҳудудда бўлиб турган ватандошларни эҳтиёт чораларини кўришга ундаган.

“Агар сизларга шошилинч ёрдам керак бўлса, Ўзбекистоннинг АҚШдаги элчихонасининг қуйидаги телефон рақамларига мурожаат қилишингиз мумкин: +1-202-251-8298; +1-202-300-9526”, дейилган дипломатик ваколатхона хабарномасида.

Тўфон натижасида жабрланганлар аниқланган тақдирда қуйидаги ишонч рақамларига мурожаат қилиш тавсия этилган:

911 – шошилинч тиббий ёрдам;

(800) 621-3362/ (800) 462-7585/ (800) 985-5990 – АҚШ Фавқулодда вазиятларни бошқариш федерал агентлиги;

202-646-2500 – умумий масалалар бўйича;

+1-800-342-3557 – Флорида штати кўмак линияси;

+1-800-729-3413 – Флорида штати Эвакуацияга кўмаклашиш хизмати.

“Милтон” тўфони яқинлашиши арафасида табиий офат ҳудудидан икки миллионга яқин одам кўчирилган. Бу штат тарихида энг катта эвакуация саналади.

10 октябрь тонгида “Милтон” туфайли 1 миллиондан зиёд одам электрсиз қолган.

АҚШ президенти Жо Байден флоридаликларни хавфсизлик талабларига риоя қилишга чақирар экан, “Бу том маънода ҳаёт-мамот масаласи” эканини урғулаган.

“Милтон” тўфони 10 октябрга ўтар кечаси Флорида штати ғарбий соҳилига етиб келган, шундан сўнг шамол кучи бироз сусайган. Бироқ “Милтон” ҳали ҳам ҳалокатли тўфон бўлиб қолмоқда.

АҚШдаги Тўфонларни кузатиш миллий маркази прогнозига кўра, у Атлантика океанига чиқиб кетгунича шундай бўлиб қолади.

Тошкентда PM2,5 майда заррали чанглар таъсири оқибатида йилига ўртача 3042 киши бевақт вафот этмоқда. Ўлим ҳолатларининг аксари инсульт (33 фоиз), юрак ишемик касаллиги (28 фоиз) ва пастки нафас йўллари инфекциялари (23 фоиз) билан боғлиқ.

Бу ҳақда Жаҳон банки томонидан ҳозирланган “Тошкент шаҳрида ҳаво сифатини баҳолаш ва Ўзбекистонда ҳаво сифати бошқарувини такомиллаштириш бўйича “йўл харитаси” номли ҳисоботда қайд этилган.

Тадқиқотда асосий эътибор Жаҳон соғлиқни сақлаш ташкилоти (ЖССТ) томонидан инсон саломатлиги учун энг катта хавф деб баҳоланган PM2,5 заррачаларига қаратилган.

Қайд этилишича, Тошкентда PM2,5 заррачаларининг концентрацияси ЖССТ тавсия этган даражадан 6 баравар юқори бўлиб, бу ҳам аҳоли саломатлигига, ҳам пойтахт иқтисодиётига жиддий зарар етказмоқда.

Ўзбекистон пойтахтида атмосфера ҳавосининг PM2,5 ифлосланиши билан боғлиқ ўртача йиллик иқтисодий харажатлар 488,4 миллион доллар деб баҳоланган. Бу мамлакат ялпи ички маҳсулотининг 0,7 фоизи демакдир.

Экспертлар PM2,5 заррачалари билан антропоген ифлосланишнинг асосий манбалари сифатида шамол олиб келган чанг (36 фоиз), иситиш сектори (29 фоиз), транспорт (16 фоиз), енгил саноат (7 фоиз), оғир саноат (6 фоиз), шаҳар чанги (6 фоиз) ва чиқиндиларни ёқиш (1 фоиз) кабиларни кўрсатишган.

Ҳисоботга кўра, Тошкент аҳолисининг 83 фоизи ҳавоси юқори даражада ифлосланган ҳудудларда истиқомат қилади.

Ҳужжатда ҳаво сифатини бошқариш механизмини миллий даражада такомиллаштириш бўйича тавсиялар берилган.

Маълумот ўрнида, Тошкент жорий йилнинг 21 февраль куни ҳавонинг ифлосланиш даражаси бўйича дунёнинг йирик шаҳарлари орасида 1-ўринга чиққан.

IQAir порталига кўра, ўша куни пойтахт ҳавосида PM2,5 дисперс зарраларининг концентрацияси 171 мкг/м3 ни ташкил этган. Бу ЖССТ тавсия этган ўртача ҳаво сифати кўрсаткичидан 34,2 баробарга кўп.

Тошкент шаҳри камида 7,5 миллион одам яшаши ва ишлаши учун қулай шароитга эга йирик мегаполисга айлантирилиши керак. Бу ҳақда президент Шавкат Мирзиёев 9 октябрь куни Тошкент шаҳрининг бош режаси лойиҳаси билан танишувда айтган.

Президент матбуот хизмати маълумотига кўра, Мирзиёев Тошкент вилоятининг Қибрай, Зангиота, Юқори Чирчиқ, Ўрта Чирчиқ ва Тошкент туманларини пойтахт билан яхлит агломерация асосида ривожлантириш бўйича топшириқлар берган.

Ҳозирда Тошкент шаҳри ҳудуди 43 минг 822 гектарни ташкил қилади. Аҳоли сони эса 3 миллиондан зиёд.

2045 йилгача бўлган даврга мўлжалланган бош режа лойиҳасида кўрсатилишича, пойтахт ҳудуди учта зонага ажратилади. Консервация зонасида маданий мерос бинолари, тарихий жойлар, уйлар ва яшил ҳудудлар ўзгаришсиз қолади. Реконструкция зонасида мастер-режалар асосида қўшимча қурилишлар қилиш мумкин бўлади. Реновация зонасида эса эскирган уй-жой, бинолар ўрнида янги қурилиш ва таъмирлаш амалга оширилади.

Бош режада Тошкент ва унинг атрофидаги яшил ҳудудларни 3 карра кўпайтириш, жамоат транспорти тармоғини кенгайтириш, жумладан, метробус йўналишлари ташкил этиш, электр энергияси, сув ва оқова инфратузилмасини яхшилаш ҳам кўзда тутилган.

Қайд этилишича, бош режаси лойиҳаси Сингапур, Буюк Британия, Туркия, Германия, Хитой ва Нидерландия компаниялари билан ҳамкорликда ишлаб чиқилган.

Бош режа тасдиқлангач, унинг хариталари Шаҳарсозлик кадастри геоахборот тизими ва шаҳар ҳокимлиги веб-сайтида очиқ маълумот сифатида жойлаштирилади.

Ўзбекистон ташқи ишлар вазири Бахтиёр Саидов 9 октябрь куни Афғонистоннинг Тошкентдаги дипломатик миссияси янги раҳбари Абдул Ғаффор Теравийни қабул қилган.

“Томонлар Ўзбекистон ва Афғонистон алоқаларини ҳар томонлама ривожлантириш, ишлатилмаган салоҳиятни рўёбга чиқариш, икки мамлакат халқлари манфаатларига хизмат қиладиган янги лойиҳалар ишлаб чиқиш зарурлигини таъкидлади”, дея маълум қилди Ўзбекистон ТИВ матбуот хизмати.

Теравий Ўзбекистон кўрсатаётган доимий ёрдам учун Афғонистон номидан миннатдорлик билдирган.

“Мамлакатларимиз ўртасадаги муштарак тарих ва фаровонлик манфаатлари барча соҳалардаги ҳамкорлик алоқаларимизни ривожлантиришга туртки бўлиб хизмат қилмоқда”, деб ёзган Бахтиёр Саидов Телеграмдаги расмий саҳифасида.

Абдул Ғаффор Теравий Ўзбекистонда “Толибон” тузган ҳукуматни тамсил этиши жорий йил сентябрь ойида маълум бўлганди.

2021 йил август ойида Афғонистоннинг асосий қисми, жумладан, пойтахт Кобулни эгаллаган “Толибон” ҳаракати “Афғонистон ислом амирлиги” ташкил этилганини эълон қилган.

Толиблар ҳокимиятга келганидан буён ўтган уч йил ичида дунёдаги мамлакатлардан биронтаси у шакллантирган ҳукуматни расман тан олган эмас.

“Толибон” ҳаракати кўплаб мамлакатларда террор ташкилотлари рўйхатига киритилган.

Ҳозирда “Толибон” ҳукумати хорижий давлатлардаги 39 та элчихона ва консулликни назорат қилади.

Ўзбекистон Афғонистоннинг Тошкентдаги элчихонасини жорий йил февраль ойида янги маъмурият ихтиёрига топширган.

Осиё тараққиёт банки (ОТБ) Тожикистонга мамлакат электр тармоқларини Ўзбекистон билан ўзаро алоқа тармоғи орқали Марказий Осиё ягона энергетика тизимига қайта улаш лойиҳасини кенгайтириш учун қўшимча 15 миллион доллар грант ажратади.

“Gazeta.uz” нашрининг ёзишича, қўшимча маблағ Тожикистон шимолидаги “Сўғд” подстанцияси ва Ўзбекистондаги “Янги Сирдарё” подстанцияси ўртасида 22 километрлик 500 кВ янги электр узатиш линиясини қуришга йўналтирилади.

“Бу (маблағ) Қозоғистон, Қирғизистон, Тожикистон ва Ўзбекистонни ўз ичига олган Марказий Осиё ягона энергетика тизимидаги давлатлар ўртасида электр энергияси экспорти ва импорти салоҳиятини ошириш ҳамда тармоқ узилишларининг олдини олиш учун инфратузилмани мустаҳкамлашга ёрдам беради”, деб ҳисоблайди ОТБ.

Узоқ муддатли истиқболда лойиҳа Тожикистондаги Роғун ГЭСдан электр энергиясини узатиш схемасининг асосий таркибий қисмига айланиши кутилмоқда.

Озодлик аввалроқ ОТБ Ўзбекистон ҳукуматининг мамлакат молия бозорларини мустаҳкамлаш ва барқарор бозорга йўналтирилган энергетика секторини ривожлантириш бўйича ташаббусларини қўллаб-қувватлаш учун умумий қиймати 400 миллион АҚШ доллари бўлган иккита қарзни маъқуллагани ҳақида хабар қилганди.

Ўзбекистон ОТБга 1995 йилда аъзо бўлган. Ўтган қарийб 30 йил давомида банк мамлакатга 12,5 миллиард доллар миқдорида қарз, грант ва техник кўмак тақдим этган.

Тошкент шаҳри Юнусобод тумани прокуратураси катта терговчиси Ш.Ш. 40 минг доллар миқдорида пора олгач, қочиб кетган.

Бош прокуратура матбуот хизматининг маълум қилишича, тадбиркор И.Х. ариза билан мурожаат қилиб, терговчи унинг корхонасига қарши очилган жиноят ишини ҳал қилиб бериш эвазига пора талаб қилганини айтган.

“Ушбу ариза асосида жорий йилнинг 7 октябрь куни ўтказилган тезкор тадбир давомида Ш.Ш. ариза муаллифидан келишилган 40 минг АҚШ долларини олиб, жиноий таъқибдан қутулиш мақсадида номаълум томонга яширинган. 40 минг АҚШ доллари ашёвий далил сифатида расмийлаштириб олинган”, дейилган БП баёнотида.

Прокуратура ўз хабарномасида тезкор тадбирнинг асосий нишони бўлган терговчи қандай қилиб таъқибдан қочиб қутулгани ва 40 минг доллар маблағ қай тарзда ундан олиб қўйилганига ойдинлик киритмаган.

Ҳолат юзасидан Ш.Ш.га нисбатан Ўзбекистон Жиноят кодексининг 210-моддаси 3-қисми “а” банди (жуда кўп миқдорда пора олиш) билан жиноят иши қўзғатилган. Айбланувчига нисбатан сиртдан қамоққа олиш тарзидаги эҳтиёт чораси қўлланган ва қидирув эълон қилинган.

Жорий йилнинг 13 февраль куни Бухоро вилояти Когон тумани прокурори 100 минг доллар билан қўлга тушгани ҳам жамоатчилик орасида қизғин муҳокамаларга сабаб бўлган эди.

Тошкент шаҳри Янгиҳаёт туманидаги темирйўл ҳудудида фуқаро поезд босиб кетиши оқибатида вафот этди.

“Milliy” телеканалининг “Millar” дастури хабарига кўра, фожиа жорий йил 5 октябрь куни рўй берган.

Темирйўлда кондуктор лавозимида ишлаб келган 36 ёшли эркак тепловозга юк вагонини улаётган вақтда эҳтиётсизлик туфайли темирйўл изига йиқилиб тушган. Шу вақтда уни юк вагонлари босиб кетган.

Ҳодиса жойига етиб борган “тез ёрдам” хизмати ходимга тиббий кўмак кўрсатганига қарамай, у ўша ерда вафот этган.

Мамлакатда ҳар йили поезд уриб кетиши оқибатида ўнлаб одам ҳалок бўлиши айтилади. Масалан, 2017 йилда 19 киши айни шундай транспорт ҳодисаси сабабли ҳаётдан кўз юмган.

2024 йил 23 август куни Тошкент шаҳри Салар–Нурҳаёт темирйўл бекати оралиғида уч фарзанднинг онаси бўлган аёл, 20 июнь куни Тошкент вилояти Зангиота туманидаги темирйўл ҳудудида 10 ёшли бола, 5 март куни Тошкент вилояти Ўрта Чирчиқ туманидаги темирйўл кесишмасида 31 ёшли эркак поезд остида қолиб вафот этган эди.

Ўзбекистонда президент ҳузуридаги Давлат хизматини ривожлантириш агентлиги муассислигида Раҳбар кадрларни баҳолаш маркази ташкил этилди.

Вазирлар Маҳкамасининг жорий йил 4 октябридаги 629-сонли қарорига мувофиқ, марказнинг асосий вазифалари ўлароқ қуйидагилар белгиланган:

• ижтимоий-психологик тадқиқотлар асосида давлат фуқаролик хизматчилари учун базавий, алоҳида лавозим ёки лавозимлар гуруҳи учун компетенциялар модели ҳамда индикаторларини ишлаб чиқиш;
• давлат фуқаролик хизматчиларини шахсий-профессионал диагностика қилиш, компетенциялар модели асосида комплекс баҳолаш;
• компетенцияларни баҳолаш жараёнида фойдаланиш учун доимий равишда янги услубларни ишлаб чиқиш, ўзлаштириш ва жорий қилиш;
• компетенцияларни баҳолаш натижалари асосида раҳбар кадрлар учун шахсий-профессионал ривожланиш траекториясини ишлаб чиқиш ва замонавий технологиялардан фойдаланган ҳолда амалга ошириш;
• раҳбарлик лавозимига номзодларнинг умумий касбий билими, қадриятлари ва ақлий салоҳиятини аниқлаш бўйича тест синовларини ҳамда психологик сўровномалар ўтказиш;
• раҳбар кадрлар фаолияти самарадорлигини баҳолаш ва мониторинг қилиш, кадрларга бўлган эҳтиёжни прогноз қилиш, уларни саралаб олиш ва жой-жойига қўйиш жараёнларига рақамли технологияларни ва замонавий усулларни кенг жорий этиш;
• фаолиятининг асосий йўналишлари бўйича эксперт-таҳлилий фаолият, илмий тадқиқот ва изланишларни олиб бориш.

Бош вазир Абдулла Арипов томонидан имзоланган қарорда айтилишича, Раҳбар кадрларни баҳолаш маркази Давлат хизматини ривожлантиришни қўллаб-қувватлаш жамғармаси маблағлари,шартнома асосида хизматлар кўрсатишдан тушадиган тушумлар,халқаро молия институтлари ва хорижий ҳукумат молия ташкилотларининг грантлари ва техник кўмаклари, жисмоний ва юридик шахсларнинг ҳомийлик хайриялари, вақтинча бўш турган маблағларни белгиланган тартибда тижорат банклари депозитларига жойлаштиришдан тушадиган даромадлар ҳамда қонунчилик ҳужжатлари билан тақиқланмаган бошқа манбалар ҳисобидан молиялаштирилади.

Марказга ўз фаолиятини самарали амалга ошириши учун тегишли соҳа бўйича малакали мутахассислар ва экспертларни, шу жумладан, хорижий экспертларни белгиланган тартибда тўғридан-тўғри шартнома асосида жалб қилиш, Давлат хизматини ривожлантириш агентлиги ва бошқа буюртмачилар билан тўғридан-тўғри тузиладиган хизмат кўрсатиш шартномаси асосида фаолиятининг асосий йўналишлари доирасида даромад келтирадиган фаолият билан шуғулланиш, давлат фуқаролик хизматида замонавий рақамли технологияларни жорий этиш бўйича ахборот дастурларини ишлаб чиқиш каби ҳуқуқлар берилган.

Ҳукумат қарорида янги марказнинг манзили ўлароқ Тошкент шаҳри Чилонзор тумани Ислом Каримов кўчасидаги 55-уй (Тошкент шаҳар ҳокимлиги ҳузуридаги “Муниципал активларни бошқариш маркази” ДУКга тегишли бино) кўрсатилган.

Ўзбекистонда 12 та мактабгача таълим ташкилотида Kokoro lingua платформаси ёрдамида бепул француз тилини ўқитиш йўлга қўйилади.

Мактабгача ва мактаб таълими вазирлиги маълумотига кўра, вазир Ҳилола Умарова Францияда бўлиб ўтган Халқаро Франкофония ташкилотининг 19-саммити доирасида Kokoro lingua компанияси асосчиси Натали Ласслет билан бу борада келишув имзолаган.

Kokoro lingua 4-8 ёшдаги болаларга чет тилларни ўргатишга мўлжалланган халқаро онлайн таълим платформасидир. Дарслар асосан видео орқали, ўйин форматида ташкил этилади.

Мактабгача ва мактаб таълими вазирлиги Ниццадаги Франкофония университети билан педагогларнинг малакасини ошириш бўйича ҳам битим имзолаган. Унга кўра, 2025 йил давомида 200 нафар ўзбекистонлик француз тили ўқитувчилари грант асосида Францияга малака оширишга юборилади.

Daryo.uz нашри қайдича, Ўзбекистонда француз тили 600 га яқин мактабда хорижий тил сифатида, 100 га яқин мактабда эса иккинчи хорижий тил сифатида ўқитилади.

Мамлакат таълим вазирлиги кейинги йилларда АҚШ билан ҳам инглиз тилини ўқитиш бўйича йирик лойиҳаларни амалга оширмоқда. Қўшма Штатлар кўмагида 10 мингдан зиёд мактаб учун юқори сифатли инглиз тили дарсликлари харид қилинган, 15 минг нафар инглиз тили ўқитувчиси малака ошириш дастурларида қатнашган.

Озодлик аввалроқ Ўзбекистон хорижда таҳсил олаётган талабалар сони бўйича дунёда бешинчи эгаллагани ҳақида хабар қилганди.

Экспертлар хорижда ўзбекистонлик талабалар сони ортиб бораётгани чет тилларни ўқитиш кўлами кенгайиши билан ҳам боғлиқ эканини айтади.

Бухоро шаҳрида яшовчи 28 ёшли Ш.Р. 3 яшар ўғлини калтаклаб, унга тан жароҳати етказган, бунинг оқибатида бола вафот этган.

Бош прокуратура матбуот котиби Ҳаёт Шамсутдиновнинг маҳаллий матбуотга билдиришича, жорий йилнинг 4 октябрь куни мазкур ҳолат юзасидан аёлга нисбатан Ўзбекистон Жиноят кодексининг 97-моддаси 2-қисми билан жиноят иши қўзғатилган ва у қамоққа олинган.

Ҳодисани ўрганган Xabar.uz нашрига кўра, аёл фарзандини тунги соат 01:00 ларда калтаклаган. Норасида бола талоқ ёрилиши оқибатида икки соатча қийналган ва соат 03:00 ларда жон берган.

Аёл Бухоро шаҳри Гулшан маҳалласида ижарада яшаб келган, турмуш ўртоғи эса Россия Федерацияда ишлайди.

Маълум бўлишича, қотилликда гумонланиб қамоққа олинган аёл олдин ҳам 5 яшар фарзандини калтаклаб ўлдирган. Ушбу жиноят ишини кўриб чиққан суд аёлнинг қилмишидан пушаймонлиги ва қарамоғида 1 ёшли фарзанди бўлгани важидан унга енгилроқ жазо тайинлаган. Аёл аввалги жинояти учун берилган жазо муддати тугамасдан туриб иккинчисига қўл ургани айтилмоқда.

Жорий йилнинг 9 июль куни Тошкент шаҳри Яшнобод туманида 30 ёшли эркак қонуний никоҳсиз яшаб келган хотини билан жанжаллашув ортидан аёлнинг биринчи турмушидан бўлган 3 яшар ўғлини чавақлаб ўлдирганди.

2022 йил 24 декабрь куни эса Самарқанд вилояти Оқдарё туманида яшовчи эркак хотини ва 5 ойлик боласини ўлдириб, сўнг ўзини осган эди.