Линклар

Шошилинч хабар
21 январ 2021, Тошкент вақти: 23:32

Ўзбекистон хабарлари

Коронавирусга чалинганлар сони 77 минг нафардан ошди

Ўзбекистонда коронавирус инфекцияси қайд этилганлар сони, 2020 йил 30 декабрь ҳолатига кўра, 77 минг 60 нафарни ташкил этган.

Соғлиқни сақлаш вазирлиги маълумотига кўра, ўтган кеча-кундузда Андижон, Жиззах, Наманган, Сирдарё, Хоразм ва Тошкент вилоятлари ҳамда Тошкент шаҳрида 75 киши коронавирусга чалинган.

Кеча кун давомида Андижон, Жиззах, Наманган, Сирдарё, Хоразм, Тошкент вилоятлари ва Тошкент шаҳрида 154 нафар бемор тузалиб, соғайганларнинг умумий сони 74 минг 943 нафарга етган.

Касалхоналарда муолажаси давом этаётган беморлар сони эса, расмий маълумотга мувофиқ, 1503 нафарни ташкил этган, улардан 161 нафарининг аҳволи оғир, 32 нафарининг эса аҳволи ўта оғир экани айтилмоқда.

Кун янгиликлари

Қашқадарёда фарзандларини ўлдириш билан таҳдид қилган ота ҳибсга олинди

Қашқадарёда вояга етмаган икки фарзандини ўлдириш билан қўрқитиб, ҳақоратлаб, тазйиқ ўтказиб келган фуқаро А.Р. қўлга олинди. Бу ҳақда вилоят прокуратураси матбуот хизмати маълумот тарқатди.

Аввалроқ ижтимоий тармоқларда Қарши шаҳрида ота балоғатга етмаган икки ўғлини уятли сўзлар билан ҳақоратлаб, уларга ўлим билан таҳдид қилаётгани акс этган видео тарқалганди.

Қайд этилишича, 21 январь куни Қашқадарё вилоят прокурори Э.Тожиев бу икки болакайни бувиси ҳамроҳлигида вилоят прокуратурасига таклиф қилиб, мутасадди ташкилот вакиллари иштирокида улар билан суҳбат ўтказган. Суҳбат асносида болалар отаси томонидан муттасил қийнаб, уриб, ҳақоратлаб келингани аниқланган.

Мазкур ҳолат юзасидан шу куннинг ўзида ЖКнинг 110-моддаси 2-қисми “а” банди билан жиноят иши қўзғатилиб, А.Р. қамоққа олинди”, дейилган хабарномада.

Вилоят прокуратураси масъуллари вояга етмаган шахслар ижтимоий ҳимояга олиниб, тергов ҳаракатлари юзасидан назорат ўрнатилганини қўшимча қилганлар.

МБ: Расмий захира активлари қарийб 35 миллиард долларга етди

Ўзбекистоннинг расмий халқаро захиралари ҳажми ўтган йил декабридан бери 2 миллиард долларга ошган.

Марказий банк қайдича, 2021 йил 1 январидаги ҳолатга кўра, мамлакатнинг расмий захира активлари 34 миллиард 904 миллион АҚШ долларига тенг бўлган. 2020 йил 1 декабрь ҳолатига кўра, мазкур кўрсаткич 32 миллиард 892 миллион 800 минг долларни ташкил этганди.

Захираларнинг 20 миллиард 216 миллион 700 минг доллари олтин шаклида, 14 миллиард 303 миллион 900 минг доллари эса хорижий валюта ва депозитлар шаклида сақланмоқда.

Аввалроқ Озодлик Ўзбекистон жорий йилнинг январь-август ойлари оралиғида рекорд даражада – 5 миллиард 800 миллион долларлик олтин сотгани ҳақида хабар қилган эди. Газета.уз маълумотига кўра, Ўзбекистон куздан бери захирадаги олтинларни сотишни тўхтатган.

Олтин-валюта захираси ҳар бир мамлакатнинг “қора кун”га асралган мулки бўлиб ҳисобланади.

Мирзиёев Вашингтондаги инаугурация маросимидан бир кун ўтганидан сўнг Байденга табрик йўллади

АҚШнинг 46-президенти Жо Байден Оқ уйда, 2021 йил 20 январи

Ўзбекистон президенти Шавкат Мирзиёев АҚШ президенти Жозеф Байденга унинг давлат раҳбари лавозимига киришгани муносабати билан табрик йўллади. Бу ҳақда президент матбуот хизмати 21 январь куни маълумот тарқатди.

Жо Байден шу йил 20 январида Вашингтондаги Капитолий биносида қасамёдга келтирилгани ҳақида Озодлик аввал хабар қилган.

Ўтган йилнинг 3 ноябрь куни ўтказилган АҚШ президенти сайловида демократлар номзоди Байден 51 та штат Сайловчилар коллегиялари ихтиёридаги 538 овоздан 306 тасини олган. Сайловдан бир неча кун ўтиб, аниқроғи, 8 ноябрга келиб Жо Байденни Ғарб мамлакатларининг кўплаб лидерлари, улар орасида Ўзбекистонга қўшни бўлган Қозоғистоннинг президенти Қасим-Жомарт Тоқаев ҳам қутлаган.

Байденнинг ғалабаси 14 декабрь куни сайловчилар коллегияси томонидан тасдиқланганидан ортидан унга ҳатто Россия президент Владимир Путин ҳам табрик телеграммаси йўллаган.

Бироқ Ш. Мирзиёев на ноябрь ойида, на декабрь ойида, на-да Байденнинг ғалабаси АҚШ Конгресси томонидан тасдиқланган 6 январдан кейин ҳам уни билан табрикламаган эди.

Ўзбекистон президентининг Байденни лавозимга киришгунича нима учун табрикламагани сабаби маълум эмас. АҚШ президенти сайлови ўтганига бир ой тўлган кунда Озодликнинг “Ўзбекистон шу кунгача ҳам Байденни табрикламагани нима билан изоҳланади?” деган саволига Ўзбекистон Ташқи ишлар вазирлиги матбуот хизмати вакили Мирзоҳид Эшонқулов: “Изоҳ йўқ”, деб жавоб берган.

ИИВ вакиллари Сардобадаги масжидларга аталган пуллар Сурияга йўлланганини иддао қилди

Ўзбекистонда Сардобадаги тошқинда талофат кўрган масжидларни қайта қуриш учун Telegram’да хайрия гуруҳи очиб, йиғилган маблағни Сурияга жўнатиш билан шуғулланган гуруҳ қўлга олинган. Бу ҳақда Сирдарё вилояти ИИБ ахборот хизмати маълум қилди.

Тартиб посбонлари иддаосича, 21 январь куни Сирдарё вилояти бўйича ДХХ бошқармаси ҳамда вилоят ИИБ ходимлари ҳамкорлигида ўтказилган тезкор тадбир чоғида Сирдарё вилоятида “жиходчилар” экстремистик оқимининг яширин гуруҳи фаолиятига чек қўйилган.

Хабарномада мазкур гуруҳнинг икки етакчиси Россия ишлаш давомида радикал гуруҳлар таъсирига тушиб қолгани, Ўзбекистонга қайтиб келганларидан кейин эса экстемистик ғояларни тарғиб қилиб юрганлари айтилган. Шунингдек, улар Суриядаги тўқнашувларда иштирок этувчи террорчи гуруҳларни молиялаштириш билан шуғулланганликда гумонланмоқда.

“Қўлга олинганлардан баъзилари карантин чекловлари бекор қилингач, Сурияга чиқиб кетишни режалаштириш мақсадида ушбу мамлакат ҳудудидаги маслакдошлари билан алоқада бўлиб келганлар”, дейилган хабарномада.

Ҳозирда гуруҳнинг барча аъзолари қўлга олинган, улар устидан қўзғатилган жиноят иши доирасида тергов-суриштирув ишлари олиб борилмоқда.

Тошкент касалхоналарида даволаниш ордер тизими асосида амалга оширилади

Ҳар бир беморга ордер асосида даволаниш учун бюджетдан маблағ ажратилади.

Тошкентда аҳолининг имтиёзга эга бўлмаган қатлами -18 ёшдан 60 ёшгача бўлган эркаклар ва 18 ёшдан 55 ёшгача бўлган аёллар бундан буён давлат бюджети ҳисобидан даволаниш учун бериладиган йўлланма (ордер)лар асосида касалхоналарга қабул қилинади.

Соғлиқни сақлаш вазирлигининг билдиришича, бу борада Тошкент шаҳар соғлиқни сақлаш бош бошқармаси қарор қабул қилган. Қарорга асосан, пойтахтдаги 11 та шаҳар кўп тармоқли марказий поликлиникалари ва 64 та оилавий поликлиника шифокорлари режали равишда стационар даволанишга муҳтож шахсларга ордер беради.

Соғлиқни сақлаш вазири ўринбосари, Тошкент шаҳар соғлиқни сақлаш бош бошқармаси бошлиғи Анвар Алимовнинг маълум қилишича, ордер асосида шу кунгача имтиёзга эга бўлмаган 60 минг нафардан ортиқ фуқаро йил давомида бюджет маблағлари ҳисобидан кафолатланган режали стационар даволанишга жўнатилади.

Расман билдирилишича, касалхонага ордер асосида ётқизилган ҳар бир бемор учун 2,5-3 миллион сўмдан маблағ ажратилади.

Соғлиқни сақлаш вазирлигининг таъкидлашича, бунга қадар республика тасарруфидаги тиббиёт муассасалари (клиник шифохоналар ва илмий-амалий тиббиёт марказлари) ҳамда шаҳар клиник шифохоналари томонидан фақатгина имтиёзга эга бўлган аҳоли қатламига, яъни ёши 60дан ошган эркакларга ва 55дан ошган аёлларга бепул тиббий хизмат кўрсатиб келинган эди.

Қибрайда 460 гектар ер учун тадбиркордан 3,7 миллион доллар сўраган шахс қўлга олинди

Хабарда айтилишича, “давлат томонидан ажратиб берилган ерни ноқонуний сотишга ҳаракат қилган" тадбирокр ушланган.

Тошкент вилоятининг Қибрай туманида боғдорчилик ва яйлов учун 460 гектар ерни ажратиб бериш эвазига 3,7 миллион доллар сўраган шахс Давлат хавфсизлик хизмати ва Бош прокуратуранинг иқтисодий жиноятларга қарши кураш департаменти ўтказган қўшма амалиёт пайтида қўлга олинди.

Маҳаллий матбуотнинг ДХХ ва Бош прокуратурага таяниб хабар беришича, тадбиркор бунга қадар ер ажратиб берилишини илтимос қилиб қатор давлат органларига мурожаат қилган. Аммо унинг илтимоси қаноатлантирилмаган.

Бундан хабар топган Asiyan Milk Best ширкати раҳбари Қ.Т., тадбиркордан Қуйи Чирчиқ туманидаги 360 гектар суғориладиган ерни ва ҳозирда норасмий фойдаланиб келаётган туман захирасидаги 100 гектар ерни унинг номига ўтказиб беришини айтиб, эвазига 3,7 миллион АҚШ доллари сўраган.

Хабарда айтилишича, бу ҳолат “давлат томонидан ажратиб берилган ерни ноқонуний сотиш” сифатида кўрилади.

Қ.Т., ерни расмийлаштириб бериш учун 3,7 миллион доллардан ташқари яна Қуйи Чирчиқ тумани ҳокимлигидаги мансабдор шахсга пора сифатида 20 минг доллар берилиши шартлигини айтган.

Расман билдирилишича, Қ.Т., тадбиркордан жами 3 миллион 720 минг доллар олаётган пайтда қўлга тушган. Унга нисбатан Жиноят кодексининг 168 -ва 211-моддалари (фирибгарлик, пора бериш) асосида жиноят иши қўзғатилган.

Президент Бухоро вилоятига жўнаб кетди

Президент Шавкат Мирзиёев.

Президент Шавкат Мирзиёев 21 январь куни Бухоро вилоятига жўнаб кетди.

Президент матбуот хизматининг билдиришича, сафар ҳудудлар ривожи, аҳоли ҳаёти билан яқиндан танишиш мақсадида амалга оширилмоқда.

"Сафар давомида агросаноат, тўқимачилик, ахборот технологиялари, тиббиёт соҳаларидаги корхоналар, шаҳар ва туманлардаги бунёдкорлик ишларини кўздан кечириш режалаштирилган",-дейилади хабарда.

Янги қонун кучга кирди. Ишсизлик нафақаси бир йилда фақат 26 ҳафта берилади

Ишсиз қолганларга меҳнатга ҳақ тўлашнинг энг кам миқдоридан оз бўлмаган миқдорда ишсизлик нафақаси тўланади.

Адлия вазирлигининг маълум қилишича, 21 январдан бошлаб “Аҳоли бандлиги тўғрисида”ги қонун кучга кирди.

Мазкур қонунга асосан ишсизлик нафақаси 12 ойлик давр ичида кўпи билан 26 ҳафта давомида тўланади.

Қонунда белгиланишича, ишдан ва иш ҳақидан сўнгги 12 ойлик давр ичида маҳрум бўлган шахсларга аввалги иш жойидаги ўртача ойлик иш ҳақининг 50 фоизи миқдорида, лекин меҳнатга ҳақ тўлашнинг энг кам миқдори – 679 330 сўмдан оз бўлмаган миқдорда ишсизлик нафақаси тўланади.

1 йилдан ортиқ ишсиз юрган, аммо меҳнат фаолиятини қайта бошлашга ҳаракат қилаётган шахсларга меҳнатга ҳақ тўлашнинг 1 баравари миқдорида, илгари ишламаган, биринчи марта иш қидираётган шахсларга эса меҳнатга ҳақ тўлашнинг камида 75 фоизи миқдорида нафақа ажратилади.

Ўсмир қизни зўрлаганлардан бири ўлик ҳолда топилди. Зўрланган қиз йўқолди

Иллюстратив сурат.

Самарқанд вилояти Каттақўрғон туманида 16 ёшли қизни зўрлаганлардан бири 13 январь куни ўз уйида ўлик ҳолда топилди. Зўрлангани айтилаётган қиз эса бедарак йўқолди. Бу ҳақда Самарқанд вилоят прокуратураси 20 январда маълум қилди.

Билдирилишича, 2 январь куни 2004 йилда туғилган П.Э., Каттақўрғон туман ИИБга И.С., уни “Чинобод” маҳалласига олиб бориб зўрлагани, шундан сўнг С.Р., исмли фуқаро ҳам “Сув омбори” ҳудудига олиб бориб, зўрлик билан жинсий алоқа қилгани ҳақида ариза ёзган.

“Ишда тўпланган далилларга асосан Ўзбекистон Республикаси ЖКнинг 118-моддаси 1-қисми билан жиноят иши қўзғатилиб, ҳозирда жиноят иши юзасидан ҳудудий тегишлилиги бўйича Каттақўрғон шаҳар ИИБ ҳузуридаги ТБ (тергов бошқармаси) томонидан дастлабки тергов ҳаракатлари олиб борилмоқда”,-дейилади расмий билдирувда.

Прокуратуранинг билдиришича, вояга етмаган қизни зўрлаганлардан бири С.Р.,13 январь куни ўзининг Каттақўрғон туман “Саройқўрғон” маҳалласида жойлашган уйида ўлган ҳолда топилган. Унинг ўлим сабаблари текширилмоқда.

14 январь куни эса Каттақўрғон шаҳар прокуратурасига зўрланган қизнинг ота-онаси мурожаат қилган. Уларнинг билдиришича, П.Э., 10 январь куни уйидан чиқиб кетган ва бедарак йўқолган.

“Мазкур ҳолат юзасидан Каттақўрғон шаҳар прокуратураси томонидан терговга қадар текшириш ҳаракатлари олиб борилмоқда”,-дейилади хабарда.

МБ: Банк орқали нақд пул айланмаси 360 триллион сўмдан ошди

Ўзбекистонда 2020 йили банклар орқали нақд пул айланмаси ҳажми 360 триллион 100 миллиард сўмни ташкил этган, бу кўрсаткич 2019 йилга нисбатан 25,4 фоизга кўпдир. Бу ҳақда Марказий банк томонидан 20 январь куни эълон қилинган “Нақд пул муомаласи бўйича қисқача шарҳ”да айтилган.

МБ қайдича, ўтган йили банклар кассаларига нақд пул тушумлари 179 триллион 900 миллиард сўмни, чиқим қилинган нақд пуллар эса 180 триллион 200 миллиард сўмни ташкил этган.

Шарҳда коронавирус пандемияси шароитида банклар кассаларига нақд пул тушумларида йилнинг II чорагида сезиларли пасайиш кузатилгани, бу вақтда тушумларнинг I чоракка нисбатан 26 фоизга камайгани, карантин талабларининг юмшатилиши ортидан иқтисодий фаолликнинг ортиши натижасида IV чоракда II чоракка нисбатан 76 фоизга кўпайгани билдирилган.

Марказий банк ҳисоботида муомаладаги нақд пуллар таркибида асосан йирик номиналдаги банкнотлар салмоғининг ошиши ҳисобига банкнотлар умумий сони сезиларли даражада камайганига эътибор қаратган.

Жумладан, 2020 йил давомида муомалага чиқарилган нақд пуллар таркибида уларнинг сўмдаги миқдори бўйича 100 000 сўмлик банкнотлар улуши 12,5 фоиздан 27,3 фоизга етган бўлса, 50 000 сўмликнинг улуши 40,1 фоиздан 38,8 фоизга, 10 000 сўмликнинг улуши 20,3 фоиздан 15,7 фоизга, 5000 сўмлик улуши 22,6 фоиздан 16,1 фоизга, 1000 сўмгача бўлган банкнотлар улуши эса 4,5 фоиздан 2,1 фоизга тушган.

“Янги Ангрен” ИЭСдаги чақнаш чоғида уч киши нобуд бўлди

"Янги Ангрен" ИЭС

“Янги Ангрен” иссиқлик электр станциясининг профилактика чораларини кўриш учун тўхтатилган 5-энергия блокида 20 январь куни соат 11:42 да чанг-кўмирли ҳаво аралашмасининг чақнаши содир бўлган.

Бу ҳақда маълумот тарқатган Фавқулодда вазиятлар вазирлигига кўра, ҳодиса чоғида уч киши олинган жароҳат сабабли вафот этган, яна уч киши турли даражада куйиш тан жароҳатини олган.

Вафот этган ва жароҳат олганлар 5-энергия блокида профилактика ишларини олиб бораётган хизмат кўрсатиш ходимлари бўлган”, дейилган хабарномада.

ФВВ ўз ходимлари воқеа жойида портлаш оқибатларини бартараф этиш ишларини олиб бораётгани, чақнашнинг келиб чиқиш сабаблари бўйича суриштирув ишлари бошланганини билдирган.

Вазирлик қайдича, ҳодиса натижасида “Янги Ангрен” ИЭС инфратузилмаси ва технологик ускуналарига шикаст етмаган.

Бу орада Бош прокуратура матбуот хизмати ИЭСдаги ҳодиса юзасидан Ангрен шаҳар прокуратураси томонидан терговга қадар текширув ҳаракатлари олиб борилаётганини маълум қилди.

Икки ҳафта муқаддам Таллимаржон иссиқлик электр станциясидаги ҳар бирининг қуввати 450 МВт бўлган иккита энергоблок тўхтагани, бунинг оқибатида Қашқадарё вилоятининг қатор туманларида сув ва электр энергияси таъминоти тўхтаб қолгани ҳақида Озодлик аввалроқ хабар қилганди.

ЕТТБ пандемия даврида Ўзбекистонга ярим миллиард доллардан кўпроқ қарз берган

Европа тикланиш ва тараққиёт банки (ЕТТБ) 2020 йилда Ўзбекистонга 521 миллион доллар миқдорида қарз берган.

Банк маълумотига кўра, маблағлар Ўзбекистонда банк сектори, кичик ва ўрта корхоналар, инфратузилмани модернизация қилиш ҳамда қайта тикланадиган энергия манбалари ривожига кўмаклашишга қаратилган 18 та лойиҳага йўналтирилган.

Хусусан, 220 миллион доллар миқдоридаги савдо-сотиқни молиялаштириш пакети Ўзбекистон Миллий банки, “Асака” банк, “Ипотека” банк ва Ўзсаноатқурилиш банкка тақдим этилган. Бу ўзбекистонлик экспортчи ва импортчиларга савдо-сотиқ ва мол етказиб беришда оғир бозор шартлари туфайли юзага келган узилишларни юмшатишда ёрдам берган. Хусусий кредитор бўлган “Ипак йўли” банки ҳам ЕТТБдан 5 миллион АҚШ доллари олган.

Ўзбекистонда ЯИМнинг 50 фоизини ташкил қилган ва ишчиларнинг 80 фоизини банд қилган кичик ва ўрта корхоналарга кредитлар ажратиш учун ЕТТБ “Асака” банк, Ипотека банк, “Ипак йўли” банк ва “Давр” банк қарийб 100 миллион доллар, Ўзсаноатқурилиш банкка эса 40 миллион доллар ажратган.

“Аёллар Марказий Осиё бизнесида” лойиҳаси доирасида халқаро Европа тикланиш ва тараққиёт банки “Ипотека” банк ва “Давр” банкка 12 миллион доллар миқдорида кредит берган.

Ўзбекистоннинг яшил энергетикага ўтишини дастаклаш мақсадида ЕТТБ Навоий вилоятида 100 МВт қувватга эга бўлган қуёш электр станцияси қурилишига кредит ажратган.

Бундан ташқари, банк Сурхондарё вилоятида сув таъминоти ва электр таъминоти инфратузилмасини янгилаш учун 150 миллион доллар миқдорида қарз ажратган.

ЕТТБ хусусий тармоқ лойиҳалари учун ҳам 55 миллион доллардан кўпроқ маблағ берган. Хусусан, Korzinka тармоғи учун ажратилган 40 миллион доллар, ўғит ишлаб чиқарувчи Indorama Kokand учун ажратилган 12,5 миллион доллар, тиббий анжомлари ишлаб чиқаридан “Healthline” учун ажратилган 2,8 миллион доллар шулар жумласидандир.

Ўзгидромет ҳафта охирига бориб ҳаво ҳарорати -15 даражага совиши мумкинлигидан огоҳлантирди

Жорий йилнинг 22-23 январь кунлари Ўзбекистон шимолида ҳаво ҳарорати кечалари -12 -15 даражагача, кундуз кунлари эса -5 -8 даражагача совийди.

Ўзгидромет матбуот хизмати маълумотига кўра, бу кунлари ўртача кеча-кундузлик ҳаво ҳарорати меъёрдан 8-10 даражага паст бўлади.

Ташкилот ҳарорат пасайишига Ўзбекистон ҳудудига ғарбий Қозоғистон орқали Россияда шаклланган совуқ ва нам ҳаво массалари кириб келиши сабаб бўлишини билдирган.

Қайд этилишича, ҳафтанинг иккинчи ярмида республика бўйлаб ёғингарчилик кутилади,баъзи жойларда кучли қор ёғади, йўллар музлаши мумкин.

Бу йил Ўзбекистонда совуқ кунлар одатдагидан эртароқ ва шиддатлироқ бошлангани кузатилди. Хусусан, ўтган йилнинг ноябрь ойи ўрталаридан ҳарорат -15 даражагача пасайиб, мамлакат ҳудудида совуқ оқим узоқ вақт ҳукм сурди. Бу ҳолат қишга тайёргарлиги яхши бўлмаган республика бўйлаб энергетик коллапс юзага келишига сабаб бўлди.

ФИФА ҳаками Шерзод Қосимов келишилган ўйиндаги иштироки учун футболдан четлатилди

Ўзбек футбол жамоаси.

Ўзбекистон футбол ассоциацияси -ЎФА ҳакам Шерзод Қосимовни келишилган ўйинлардаги иштироки учун уч йил муддатга футболдан четлатди.

Шерзод Қосимов Жаҳон футбол федерацияси - ФИФА ва Осиё футбол конфедерацияси - ОФК ҳаками ҳисобланади.

ЎФА баёнотида қайд этилишича, “футбол ўйинларида учрашувга ёки унинг натижасига таъсир ўтказиш мақсадида келишувларда қатнашган футбол ҳакамларини аниқлаш бўйича” амалий ишлар давом этмоқда.

Мана шу ҳаракат доирасида 19 январда ЎФА Этика қўмитасининг навбатдаги йиғилишида Шерзод Қосимов бўйича аниқланган ҳолатлар кўриб чиқилди.

“Қўмита томонидан Ш.Қосимов ЎФА интизом кодексининг 5.44. бандига асосан бир қатор футбол учрашувларида учрашувга ёки унинг натижасига таъсир ўтказиш мақсадида келишувларда қатнашгани учун 3 (уч) йил муддатга футбол билан боғлиқ ҳар қандай фаолиятдан четлаштириш хусусидаги қарор қабул қилинди”,-дейилади расмий баёнотда.

Мазкур қарор ЎФА томонидан расмий тарзда эълон қилинган кундан бошлаб кучга кирди.

Pfizer-BioNTech вакцинаси билан биринчи галда шифокорлар ва кексалар эмланади

Pfizer-BioNTech вакцинаси.

Ўзбекистонга олиб келинадиган Pfizer-BioNTech вакцинаси билан биринчи галда шифокорлар ва кексалар эмланади. Бу ҳақда Санитария-эпидемиологик осойишталик ва жамоат саломатлиги хизмати бошлиқ ўринбосари Ботиржон Қурбонов “Дарё” нашрига берган интервьюсида маълум қилди.

18 январь куни Ўзбекистон АҚШнинг Pfizer ва Германиянинг BioNTech ширкатлари ишлаб чиқарган Comirnaty вакцинасининг юз минг дозасига буюртма берилгани хабар қилинганди.

Ботиржон Қурбонов бу доза 50 мингта одамни икки мартадан эмлашга етишини маълум қилди.

“Вакцина билан биринчи галда коронавирус бўйича ташкил этилган махсус шифохоналар, коронавирусга гумон қилинган шахсларни кузатиш учун ташкил этилган изолятор пунктлари ёки саралаш марказларида фаолият кўрсатаётган ходимлар, шифокорларимиз эмланади. Кейинги навбатда кексаларимиз — ушбу касалликка чалиниши эҳтимоли юқори бўлган, касалликни ёшларга нисбатан оғир ўтказадиган қарияларимиз қамраб олинади. Кексаларимизни эмлаш жараёни мажбурий бўлмайди, биринчи навбатда ‘"мана шу вакцинани олмоқчиман’" деган кўнгиллилар эмланади”,-деб айтган Қурбонов.

Унга кўра, Тошкентдаги Вирусология илмий-текшириш институти клиникасида Pfizer-BioNTech вакцинасини -70 даража совуқда сақлаш имконини берадиган музлатгичлар ҳозирлаб қўйилган. Вакцинация қачон бошланиши ҳозирча аниқ эмас.

Тошкент шаҳар депутатларига 2 миллиард сўмдан пул берилади

Депутатларга бюджетдан жами 120 миллиард сўм ажратилади.

Тошкент шаҳар ҳокими Жаҳонгир Ортиқхўжаев Халқ депутатлари Тошкент шаҳар Кенгашининг сессиясида аҳоли муаммоларини ҳал этиш учун депутатларга бюджетдан пул берилишини билдирди.

Ҳокимнинг айтишича, шаҳар кенгаши депутатларига 2 миллиард сўмдан, туман кенгашлари депутатларига 100 миллион сўмдан, секторлар раҳбарларига 5 миллиард сўмдан маблағ ажратилади.

Тошкент шаҳар кенгашининг 60 депутати бўлиб, уларга ажратиладиган 120 миллиард сўм маҳаллий бюджетдан берилади.

Бундан ташқари Миллий гвардиянинг пойтахт бошқармаси бошлиғи ҳам ёшлар ва аҳоли ўртасида турли тадбирларни “юқори даражада ўтказиш учун” 2 миллиард сўм олади.

Айни пайтда мазкур маблағларнинг сарфланишини назорат қилиш механизми юзасидан маълумот берилмади.

Тошкентда поезд устида селфи қилмоқчи бўлган йигитни ток урди

Йигитни 27 минг волтли ток урган. Иллюстратив сурат.

Тошкентда поезд вагони устига чиқиб селфи қилмоқчи бўлган 18 ёшли йигит ток уриши оқибатида касалхонага ётқизилди. Бу ҳақда Ички ишлар вазирлиги ахборот хизмати 19 январь куни хабар берди.

Маълум қилинишича, воқеа 15 январь куни содир бўлган. Йигит “Сергели” бекатидаги 3-йўлнинг 8-километри 1-тўсиғида турган вагон устига чиққанида уни 27 минг волтли ток урган. Йигит меҳрибонлик уйи тарбияланувчиси бўлган.

Қаттиқ жароҳатланган йигит Республика шошилинч тиббий ёрдам марказига олиб борилган. Жонлантириш бўлимига ётқизиган йигитга тананинг 93 фоизи 2–3 А,Б даражали термик куйиш, 3-даражали бош мия ёпиқ жароҳати ташхиси қўйилган.

Мирзиёев ҳар бир маҳаллага профессор ва таниқли зиёлилар бириктирилишини билдирди

Ўзбекистон президенти Шавкат Мирзиёев

Ўзбекистонда ҳар бир маҳаллага “Бир зиёли – бир маҳаллага маънавий ҳомий” тамойили асосида профессор-ўқитувчи ва таниқли зиёлилар бириктирилади. Бу ҳақда президент Шавкат Мирзиёев 19 январь куни маънавий-маърифий ишлар тизимини тубдан такомиллаштириш, бу борада давлат ва жамоат ташкилотларининг ҳамкорлигини кучайтириш масалалари бўйича ўтказилган видеоселектор йиғилишида билдирган.

Президент матбуот хизмати маълумотига кўра, йиғилишда ҳудудлар марказида намунавий лойиҳа асосида маънавият ва маърифат масканларини барпо этиш, маҳаллий бюджетлар ҳисобидан соҳага қўшимча штатлар ажратиш бўйича кўрсатма берилган.

Мирзиёев терроризм, экстремизм, трансмиллий ва кибер-жиноятчилик, одам савдоси, наркотрафик каби таҳдидлар хавфи ошиб бораётгани, баъзи ҳудудларда атайин беқарорлик юзага келтирилиб, норозилик кайфияти авж олдирилаётганидан огоҳлантириб, бундай таҳликали вазиятда ҳушёр ва огоҳ бўлиб, халқ тинчлиги, мамлакат манфаатларини ўйлаб яшаш зарурлигини урғулаган.

Президент лоқайдлик ва бепарволик энг катта хавф эканини, бугун учраётган ижтимоий муаммоларни камайтириш учун нуронийлар тарбияси, жамоатчилик назорати етишмаётганини таъкидлаган. У Республика Маънавият ва маърифат маркази ишини танқидий ўрганиб чиқиб, фаолиятини тубдан такомиллаштириш зарурлиги айтган.

Мирзиёев мазкур марказнинг “Маънавият тарғиботчиси” ўқув муассасаси негизида Ижтимоий-маънавий тадқиқотлар институтини ташкил этиш таклифини билдирган.

Йиғилишда мутасаддиларга Ўзбекистонда тарих фанини 2030 йилгача ривожлантириш концепциясини ишлаб чиқиш вазифаси қўйилган. Ўзбек тилининг давлат тили мақомини кучайтириш, Ўзбекистонда ва хорижда уни ўрганиш бўйича замонавий технологияларни жорий этиш юзасидан кўрсатма берилган.

Президент миллий ғоя тарғиботи, маънавий-маърифий ишлар самарадорлигини ошириш, жамиятда адабиёт ва китобхонликни янада ривожлантириш мақсадида “Ижод” жамоат фонди негизида Маънавият ва ижодни қўллаб-қувватлаш фонди ташкил этилиши таъкидлаган.

Қайд этилишича, мазкур жамғармага 120 миллиард сўм ажратилиб, маънавий-маърифий тарбия ва тарғибот-ташвиқот ишларини самарали амалга ошириш, миллий адабиётни ривожлантириш учун сарфланади. Бу маблағнинг 90 миллиард сўми ҳудудларда маънавий-маърифий соҳаларни ривожлантиришга, 20 миллиард сўми Ёзувчилар уюшмаси фаолиятини қўллаб-қувватлашга, 10 миллиард сўми мамлакат миқёсида маънавий-маърифий ишларни самарали ташкил қилишга йўналтирилади.

Видеоселектор йиғилишида муҳокама қилинган масалалар бўйича соҳа мутасаддилари, ўқитувчи ва профессорлар, вазирлар, вилоят ҳокимлари фикр билдирганлар.

БП: Хўжаободлик ота вояга етмаган қизини зўрлаганига оид иддао ИИБ томонидан ўрганилмоқда

Андижон вилоятининг Хўжаобод туманида яшовчи вояга етмаган қиз отаси томонидан зўрлаб келинганига оид иддао бўйича туман ИИБ томонидан терговга қадар текшириш ҳаракатлари ўтказилмоқда. Бу ҳақда Ўзбекистон Бош прокуратураси жамоатчилик билан алоқалар ва ҳуқуқий ахборот бўлими бошлиғи Ҳаёт Шамсутдинов Телеграмдаги ўз канали орқали маълум қилди.

Аввалроқ ижтимоий тармоқларда хўжаободлик қиз 9-синфда ўқиётган пайтда 43 ёшли отаси томонидан зўрланганини иддао қилган видео тарқалган. Қиз бу ҳақда қариндошлари, қўшнилари, ўгай онаси, ички ишлар идоралари ходимларига арз қилгани, бироқ унга ҳеч ким ишонмаганини қайд этган.

Ҳ. Шамсутдиновга кўра, қиз ваколатли идораларга мурожаат қилишига қарамасдан ҳеч қанака чора кўрилмаётганига оид важларига аниқлик киритиш мақсадида айни пайтда Хўжаобод тумани прокуратураси томонидан тегишли идоралар ходимларига нисбатан хизмат текширувлари тайинланган.

БП мулозими текшириш жараёни Андижон вилояти прокуратураси томонидан назоратга олинганини қўшимча қилган.

Қарши шаҳар ҳокимияти саноат зонаси қурилаётган ҳудудда 3000 чоғли дарахтга қирон келтирди

Ўзбекистонда ноқонуний дарахт кесиш авж олгани ортидан 2019 йил 1 ноябридан дарахтлар кесилишига мораторий жорий қилинганди

Қарши шаҳар ҳокимининг қарорига асосан Кичик саноат зонаси ташкил этилаётган 10 гектар майдонда ҳар хил турдаги 2 874 туп дарахт экскаватор ёрдамида илдизи билан қўпорилган, мазкур ҳолат юзасидан далолатнома тузилган. Бу ҳақда Давлат экология қўмитаси матбуот хизмати маълумот тарқатди.

Қайд этилишича, Қарши шаҳар Қурилиш бўлимининг 2020 йил 23 ноябридаги Қарши шаҳар “Буюк Турон” МФЙ, Буюк Турон кўчасида ташкил этилаётган “Кичик саноат зонаси” ҳудудидаги экинзор ва дарахтларни таг қисмидан олиб ташлаш тўғрисидаги мурожаатга жавобан Қарши шаҳар Экология ва атроф-муҳитни муҳофаза қилиш инспекцияси томонидан дарахт ва буталарни кесиш тартиби кўрсатиб ўтилган ҳолда, дарахт ва буталарни кесишга рухсат берилмаган.

Шу билан бирга, ажратилган 10 гектар ер майдонида ташкил этилаётган Кичик саноат зонаси бўйича Давлат экология қўмитасининг экологик хулосаси олинмагани ҳам аниқланган.

“Айни дамда юқоридаги ҳолат юзасидан тўпланган ҳужжатлар ҳуқуқий баҳо берилиши учун ҳуқуқни муҳофаза қилиш органларига тақдим этилди”, дейилган экология қўмитаси хабарномасида.

Президентнинг 2021 йилги давлат дастурига оид фармони лойиҳасида Ўзбекистон ҳудудида ноқонуний кесилган дарахт ва буталар учун уч йил давомида парваришлаш шарти билан 100 туп кўчат экиш мажбуриятини киритиш кўзда тутилган. Агар мазкур лойиҳа тасдиқланиб, Қаршидаги ҳолатга нисбатан татбиқ этиладиган бўлса, шаҳар ҳокимияти зиммасига 287 минг 400 туп кўчат экиш ва уларни 3 йил парваришлаш мажбурияти юкланиши эҳтимолдан ҳоли эмас.

Жиззах вилоятида бир кунда учта туман ҳокими, вилоят ҳокимига икки ўринбосар тайинланди

Жорий йилнинг 19 январь куни Жиззах вилоятининг Мирзачўл туманига Шерзод Аҳмедов, Зафаробод туманига Нодирбек Ражапов, Фориш туманига Икром Матиев ҳоким этиб тайинланган. Бу ҳақда Жиззах вилояти ҳокимлиги матбуот хизмати маълумот тарқатди.

Қайд этилишича, шу куни Жиззах шаҳрида ҳам ҳоким алмашган. Шаҳар ҳокими Акбар Шукуров бошқа ишга ўтганлиги муносабати билан мазкур лавозимга Комил Холмуродов тайинланган.

Шунингдек, сешанба куни Жиззах вилояти ҳокимлигида бўлиб ўтган йиғилишда вилоят ҳокими Эргаш Салиевга икки нафар ўринбосар ҳам тайинланган. Хусусан, Жиззах вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари лавозимини аввал Фориш тумани ҳокими бўлиб ишлаб келган Абдивали Мустанов, Жиззах вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимини эса Қурилиш вазирлиги Пудрат ва махсус монтаж ишлари бозорини мувофиқлаштириш бошқармаси бошлиғи бўлиб ишлаб келган Баҳром Назаров эгаллаган.

Жиззах вилояти ҳокимининг қурилиш бўйича собиқ ўринбосари Акрам Раҳмонқуловни аввалроқ президент Шавкат Мирзиёев “хиёнат”да айблаган, бунинг ортидан мулозим устидан жиноят иши очилганди.

Жиззахдаги “ротация” Мирзиёевнинг мазкур вилоятга ўтган ҳафтадаги сафаридан кейин амалга ошмоқда.

Алламжонов йирик IT-ширкатларни сўз эркинлиги устидан монополия ўрнатишга уринаётганликда айблади

Комил Алламжонов

Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов Telegram мессенжерининг App Store тизимидан ўчириб ташланиши эҳтимоли юзасидан мулоҳазалари билан ўртоқлашди.

Telegram’даги ўз каналида қолдирган постида К.Алламжонов Coalition for a Safer Web Aмерика нотижорат ташкилоти суд орқали Appleдан шубҳали контент тарқалгани туфайли App Store тизимида Telegramни ўчиришни талаб қилаётганини эслатган.

Алламжоновга кўра, 500 миллион фойдаланувчиси бўлган Telegram’ни “App Store ва Google Play каби улкан маркетларда блокланиши кўпчиликни ташкил қилувчи ва ушбу платформага ишонч билдирган намунали фойдаланувчиларга нисбатан ноҳақлик бўлади”.

Негатив контент исталган мессенжер ва ижтимоий тармоқ, жумладан, Facebook ва Twitter орқали ҳам тарқалиши мумкин. Келинг, унда уларни ҳам ёпамиз!” деб ёзган К. Алламжонов.

Миллий масс-медиани қўллаб-қувватлаш ва ривожлантириш фонди васийлик кенгаши раиси бу ўринда масалани блоклаш ва ўчириш билан ҳал қилиб бўлмаслигини қайд этаркан, Facebook тармоғининг Ўзбекистонда блокланган пайтни ёдга олган.

Бу нафақат ўйланган натижага олиб келмади, балки вазиятни янада чуқурлаштириб юборди. Чунки одамлар VPNдан фойдалана бошлашди ва айнан шу орқали экстремистик контентга ҳам бемалол йўл очилди”, деб ёзган К. Алламжонов.

Унинг фикрича, агар мессенжерларни бирма-бир танлаш йўли билан блокланса, қайсидир корпорациялар шунчаки рақобатчидан халос бўлишга интилаётгани аён бўлади.

Aгар ушбу суд иши давлат томонидан қўзғатилганида дод-вой кўтарилар ва демократия бўғиляпти деган шиорлар илгари сурилар эди. Aммо буни қандайдир хусусий корхоналар амалга ошираётгани демократия принципларининг синиши ва унинг қулай форматга мослашаётганини кўрсатади”, деб ёзган Миллий масс-медиани қўллаб-қувватлаш ва ривожлантириш фонди васийлик кенгаши раиси.

К.Алламжонов мулоҳазасича, бундан ИТ-технологиялар соҳасидаги гигант-компаниялар сўз эркинлиги устидан монополияни қўлга киритгани ва ўз қоидаларини киритиш орқали миллионлаб фойдаланувчиларни очиқчасига ўзига ва ўз хоҳишига бўйсундиришга ҳаракат қилаётгани келиб чиқади.

Миллий масс-медиани қўллаб-қувватлаш ва ривожлантириш фонди васийлик кенгаши раиси мазкур постини #эркимизгагигантлархўжайинбўлибқолди хэштеги остида қолдирган.

Аввалроқ К. Алламжонов Телеграмдаги ўз канали орқали мухолифатчи Алексей Навальнийнинг Россияга қайтишига ҳам муносабат билдирган эди.

Пандемия йилида ўлганлар сони аввалги йилдан 13,5 фоизга кўп бўлди

Статистика қўмитаси коронавирусдан қанча одам ўлгани юзасидан биронта маълумотни келтирмаган.

Ўзбекистонда 2020 йилда ўлганлар сони 2019 йилга нисбатан 13,5 фоизга кўп бўлди. Бу ҳақда Давлат статистика қўмитаси ҳисоботида қайд этилди.

2020 йилда Ўзбекситонда жами 175 минг 600 киши вафот этди. Ўлим сони ҳар 1000 кишига 5.1 промиллени ташкил қилди. 2019 йилда бу кўрсаткич ҳар 1000 кишига 4,6 промиллени ташкил қилган.

Ўлимларнинг 60 фоизи юрак-қон томир, 8 фоизи ўсимталар, 7,2 фоизи нафас йўли, 4,4 фоизи ошқозон-ичак, 4,4 фоизи заҳарланишлар, жароҳатлар, инфекцион ва паразитар, 11,6 фоизи бошқа касалликлар оқибатида юз берган. Ўлимларнинг 4,4 фоизи бахтсиз ҳодисларга тўғри келган.

Статистика қўмитаси коронавирусдан қанча одам ўлгани юзасидан биронта маълумотни келтирмаган ва ҳисоботда коронавирус деган сўз қайд этилмаган. Соғлиқни сақлаш вазирлиги 2021 йилнинг 18 январида коронавирусдан 620 киши ўлганини билдирган.

Республика бўйича энг кўп ўлим ҳолати Тошкентда рўйхатга олинган. Ўлимлар сони 2020 йилда Тошкентда 2019 йилга нисбатан 5717тага кўпайган ва 21,2 мингтани ташкил қилган.

Тарбияланувчини калтаклаган Булунғурдаги болалар боғчаси мудираси ишдан олинди

Иллюстратив сурат.

Самарқанд вилояти Булунғур туманидаги 13-сонли болалар боғчаси мудираси Роҳатой Аҳророва лавозимидан озод этилди. Мудира билан тузилган меҳнат шартномаси бекор қилингани тўғрисида Булунғур туман ҳокимлиги матбуот хизмати хабар берди.

17 январда боғча мудираси тарбияланувчини ураётгани акс этган видео ижтимоий тармоқларда тарқаган эди.

Самарқанднинг Булунғур туманидаги 13-боғчада болани урган мудирага нисбатан туман прокуратураси текширув бошлаган.

Содир бўлган ҳодисани “Севимли” телеканалининг “Замон” дастурига изоҳлаган мудира тарбияланувчининг оғзидан ҳақоратли сўзларни эшитганидан кейин ўзини тутолмай, болага қўл кўтарганини, аслида болаларни уришга ҳаққи йўқлигини эътироф этган.

Шу билан бирга, Р. Аҳророва тарбияланувчиларнинг ҳақоратли сўзлар айтишига йўл қўйиб берилса, “бу болаларнинг келажаги нима бўлади?” дея савол ташлаган.

Булунғур туман ҳокимлиги матбуот хизматининг билдиришича, ўрганишлар жараёнида боғча директорининг юраги хуруж қилган ва тез тиббий ёрдам бригадаси томонидан у шифохонага олиб кетилган.

Халқаро жиноятчилик индексида Ўзбекистон 96-ўринда

Иллюстратив сурат.

Халқаро жиноятчилик индексининг 2021 йилги рейтингида, 2021 йилнинг 19 январь ҳолатига кўра Ўзбекистон 135 давлат орасида 96-ўринда қайд этилди.

Crime Index ва Safety Index асосида тузилган рейтингда пастроқ балл олган мамлакат шунчалик хавфсиз ҳисобланади.

Ўзбекистон бу индексда Қозоғистон ва Қирғизистондан хавфсизроқ мамлакат сифатида кўрсатилган. Рейтингда Тожикистон ва Туркманистон иштирок этмайди.

Рейтингда жаҳонда энг кўп жиноят содир этиладиган мамлакат сифатида Венесуэла кўрсатилган. У рейтингдаги 1-ўринни эгаллаган.

Венесуэладан кейинги тўрт ўринни Папуа-Янги Гвинея, ЖАР, Афғонистон ва Гондурас эгаллади.

Рейтингга кўра, энг хавфсиз мамлакатлар Қатар, Тайвань ва Бирлашган араб Амирликларидир.

Давомини ўқинг

XS
SM
MD
LG