Линклар

Шошилинч хабар
28 сентябр 2022, Тошкент вақти: 11:13

Ўзбекистон хабарлари

Волгоградда олти кун олдин овқатдан заҳарланган 11 ўзбекистонлик касалхонада қолмоқда

Россиянинг Волгоград вилоятида 28 июль куни овқатдан заҳарланган 11 нафар ўзбекистонлик меҳнат муҳожири касалхонада даволанишда давом этмоқда. Бу ҳақда Ўзбекистон Ташқи меҳнат миграцияси агентлиги маълум қилди.

Расман билдирилишича, овқатдан заҳарланган 18 дан 60 ёшгача бўлган ўзбекистонликлар Волгоград вилояти Биковский туманидаги "Победа" фермер хўжалигида қонуний ишлаб келган. 28 июль куни улар овқатдан захарланиб, касалхонага ётқизилган.

“Ташқи меҳнат миграцияси агентлигининг Волгоград вилоятидаги вакилига шифокорларнинг маълум қилишича, ҳозирги вақтда фуқаролар ўзларини яхши ҳис қилишмоқда ва соғлиғи тиклангач, шифохонадан жавоб берилади”,-дейилади расмий билдирувда.

ТАСС агентлигининг билдиришича, муҳожирлардан икки нафари вилоят юқумли касалликлар шифохонасида, тўққиз нафари эса ўткир гастроэнтероколит дастлабки ташхиси билан марказий туман касалхонасида даволанмоқда.

Кун янгиликлари

Ўзбекистонда раҳбарлик этикаси ва қонунни бузган бешта туман ҳокими ишдан олинди

Андижон туман ҳокими Абдужаббор Эгамбердиев қабулига келганларга пойгакдан жой бергани билан "машҳур" бўлган. Ижтимоий тармоқлардан олинган фотосурат.

Президент қарорлари асосида 27 сентябрь куни Андижон вилоятининг Асака, Андижон ва Пахтаобод, Фарғона вилоятининг Фарғона, Самарқанд вилоятининг Нуробод туманлари ҳокимлари ишдан олинди.

Президент матбуот хизматининг билдиришича, Асака тумани ҳокими Мансурбек Алихонов ва Фарғона тумани ҳокими Шуҳратжон Мўминов ер муносабатларини тартибга солишга оид қонунчилик ҳужжатларига риоя этмагани, фаолиятида йўл қўйган бошқа жиддий қонунбузилиш ҳолатлари учун эгаллаб турган лавозимидан озод этилди.

Пахтаобод тумани ҳокими Элёрбек Усмонов ва Нуробод тумани ҳокими Шерали Йўлдошев раҳбарлик этикаси қоидаларига риоя этмагани учун, Андижон тумани ҳокими Абдужаббор Эгамбердиев давлат хизматчиси этикасини бузган ҳолда фуқароларга нисбатан ҳурматсизлик қилгани учун ишдан олинди.

2020 йил сентябридан Асака тумани ҳокими лавозимида ишлаб келаётган Мансурбек Алихонов 2021 йил декабрида фуқаролар билан менсимаслик оҳангида гаплашгани тасвирга олинган видео ижтимоий тармоқларда тарқалган эди. Бунинг учун ҳокимининг матбуот котиби ишдан олинганди.

2021 йил февралидан бери Андижон тумани ҳокими сифатида ишлаб келган Абдужаббор Эгамбердиев эса 2022 йил августида қабулига келганларга пойгакдан жой бераётгани акс этган маълумотлар тарқатилгани ортидан ўзбекистонликлар орасида «машҳур» бўлиб кетган эди.

Қолган уч ҳокимнинг бу каби ҳаракатларни содир этгани тўғрисида ижтимоий тармоқларда маълумотлар мавжуд эмас.

Мажлис қатнашчиларини ҳақорат қилган Сурхондарё вилояти ҳокими жаримага тортилди

Сурхондарё вилояти ҳокими Тўра Боболов.

Президентнинг 27 сентябрдаги қарори билан “ўз фаолиятини давлат сиёсати ва амалга оширилаётган ислоҳотларга мос равишда ташкил этмагани, ҳокимларга қўйиладиган талабларга риоя этмасдан мажлис қатнашчиларини ҳақорат қилганлиги ва бу билан кенг жамоатчиликнинг норозилигига сабаб бўлгани” учун Сурхондарё вилояти ҳокими Тўра Боболовга жарима интизомий жазо чораси қўлланилди. Бу ҳақда президент матбуот хизмати хабар берди.

“Кун уз” нашрининг хабар беришича, Боболовга интизомий жазо чораси қўлланилгани тўғрисида 27 сентябрь куни ўтган видеоселектор йиғилишида президент администрацияси раҳбари Сардор Умрзоқов маълум қилган.

«Тўра Боболов, сиз ўрнак бўлмаяпсиз. Интернетда чиққан гапларни монтаж дедингиз. Лекин экспертиза сизнинг овозингизни тасдиқлади. Президентимиз топшириғи билан сизга интизомий жазо чораси сифатида ойлик иш ҳақининг 40 фоизи миқдорида жарима қўлланди”, деган Умрзоқов.

Август ойининг иккинчи ярмида интернетда Тўра Боболов йиғилишга келган Ангор тумани прокурорини ҳақорат қилгани айтилган аудиоёзув тарқалган эди. Кейинроқ эса Боболов Қизириқ тумани ҳокими ва кластер раҳбарини қўпол равишда танқид қилгани акс этган янги аудиоёзув пайдо бўлган эди.

Бу аудиоёзувлар ижтимоий тармоқларда тарқалиб, кенг муҳокамаларга сабаб бўлган ва Тўра Боболовга нисбатан норозиликларни келтириб чиқарганди.

Ўзбекистон-Қирғизистон чегараси бўйича янги шартнома устида иш бошланди

Ўзбекистон бош вазири Абдулла Арипов (чапда) ва Қирғизистон Миллий хавфсизлик қўмитаси раиси Қамчибек Ташиев протоколни имзоламоқда.

Ўзбекистон-Қирғизистон чегарасини делимитациялаш ва демаркациялаш бўйича янги шартнома устида ишлаш юзасидан протокол 26 сентябрда Бишкекда имзоланди.

Протоколни Ўзбекистон бош вазири Абдулла Арипов ва Қирғизистон министрлар кабинети раисининг ўринбосари, Миллий хавфсизлик қўмитаси раиси Қамчибек Ташиев имзолади.

Икки давлат раҳбарлари чегара масалаларини муҳокама қилишни жорий йил охиригача якунлаш ниятини билдирган эди.

Шу кунгача 1378 километрли чегаранинг 98 фоизи аниқлаб бўлинган. Чегаранинг 2 фоиз қисми баҳсли бўлиб қолаётган эди.

Қирғизистонга иш сафари билан келган Абдулла Ариповни президент Садир Жапаров қабул қилди. Учрашувда икки томонлама ҳамкорликни ривожлантириш масалалари муҳокама этилди. Томонлар Ўзбекистон президенти Шавкат Мирзиёевнинг Бишкекка бўлажак давлат ташрифини ҳам муҳокама қилдилар.

Ҳозирча Ўзбекистон президентининг Қирғизистонга давлат ташрифи қачон амалга оширилиши тўғрисида маълумот йўқ.
Қирғизистон президенти С. Жапаров ўтган йилнинг март ойида Тошкентга сафар қилган эди. Ўшанда Ўзбекистон билан Қирғизистон ҳамкорлигига оид 22 та ҳужжат имзоланган.

Ўзбекистoн халқ шоири Жамол Камол вафот этди

Ўзбекистон халқ шоири Жамол Камол.

Ўзбекистoн халқ шоири Жамол Камол 27 сентябрь куни 84 ёшида вафот этгани тўғрисида Ёзувчилар уюшмаси маълум қилди.

Марҳум бугун Тошкент шаҳар Юнусобод тумани 17-даҳа 21-уй 27-хонадондан сўнгги манзилга кузатилади. Жаноза аср намозидан сўнг Юнусобод туманидаги Оқтепа масжидида ўқилади.

1938 йил Бухоро вилояти Шофиркон туманида туғилган Жамол Камол Бухоро педагогика институтининг филология факультетини тугатган (1959). У Ёзувчилар уюшмаси Бухоро вилояти бўлимида масъул котиб (1970−72), Ўзбекистoн Фанлар академияси Тил ва адабиёт институтида аспирант ва илмий ходим (1972−86) бўлиб ишлаган.

Лирик шеър тузилиши бўйича илмий тадқиқот олиб борган. Faфур Ғулом номидаги Адабиёт ва санъат нашриётида бош муҳаррир (1986−88), Ўзбекистoн Ёзувчилар уюшмаси раиси (1991−96) лавозимларида хизмат қилган.

Унинг “Олам кирар юрагимга” номли биринчи шеърий тўплами 1968 йилда чоп этилди. Шундан сўнг унинг ўндан ортиқ китоблари нашр этилди. Жамол Камол Шекспир, Жалолиддин Румий, Фаридиддин Аттор, Абдураҳмон Жомий каби кўплаб ижодкорларнинг ўттизга яқин асарларини ўзбек тилига ўгирган.

Жамол Камол 1992 йилда Ўзбекистон халқ шоири унвонига сазовор бўлган эди. Шекспирдан таржималари учун 2009 йилда Британия Қироличаси Елизавета II дан миннатдорчилик мактуби олган. 2016 йилда Тошкент аэропортига Ислом Каримов номи берилишига қарши чиққан эди.

ЎМИ мусулмонларнинг Россия-Украина урушида қатнашиши “шаръан жоиз эмас”лигини урғулади

Ўзбекистон мусулмонлари идораси Фатво маркази ижтимоий тармоқларда “Россия ва Украина каби уруш кечаётган ерларда истиқомат қилаётган ўзбекистонликларни турли ваъдалар билан урушга тарғиб қилиш ҳолатлари” кузатилаётганига эътибор қаратди.

ЎМИ баёнотига мувофиқ, мусулмон кишининг “ўз ватанини ҳимоя қилишдан бошқа ҳар қандай ҳарбий ҳаракатларда иштирок этиши шаръан жоиз бўлмайди”.

“Бу каби фитналарга аралашиш шаръан ҳаром ҳисобланади. Қолаверса, амалдаги қонунчилигимизда ҳам хорижий мамлакатларнинг ҳарбий тузилмалари, ноконуний диний ташкилотлар ва террорчи гуруҳлар таркибига аъзо бўлиш таъқиқланган”, дейилган ЎМИ Фатво маркази баёнотида ўзбекистонлик мусулмонлар “турли алдамчи тарғиботларга учмасликка, фитналардан йироқ бўлишга даъват” этилган.

Норов Нью-Йоркда бўлиб ўтган “C5+1” йиғилишида қатнашди

Марказий Осиё мамлакатлари ва АҚШ ташқи ишлар вазирларининг "C5+1"форматидаги йиғилишидан лавҳа, Нью-Йорк, 2022 йил 22 сентябри (mfa.uz фотоси)

БМТ Бош Ассамблеясининг 77-сессияси доирасида 2022 йилнинг 22 сентябрь куни Нью-Йоркда Марказий Осиё мамлакатлари ва АҚШ ташқи ишлар вазирларининг “C5+1”форматидаги йиғилиши бўлиб ўтди.

ТИВ матбуот хизмати маълумотига кўра, тадбир давомида Қозоғистон, Қирғизистон, Тожикистон, Туркманистон, Ўзбекистон ва Америка Қўшма Штатлари ташқи сиёсат идоралари раҳбарлари ва вакиллари томонларни қизиқтирган йўналишлардаги ҳамкорликнинг долзарб масалаларини муҳокама қилганлар, минтақанинг барқарор иқтисодий тараққиётини таъминлаш мақсадида “C5+1” форматида савдо ва сармоявий алоқаларни кенгайтириш йўллари тўғрисида фикр алмашганлар.

“Ўзбекистон делегацияси раҳбари, ташқи ишлар вазири Владимир Норов ўз нутқида “C5+1” муҳим мулоқот механизми бўлиб, унинг доирасидаги ҳамкорлик самарадорлигини ошириш борасида маълум ютуқларга эришилганини қайд этди”, дейилган вазирлик хабарномасида.

Қайд этилишича, томонлар “C5+1” доирасида юқори ва эксперт даражаларида яқин мулоқотни давом эттириш, шунингдек амалий натижаларга эришишга қаратилган аниқ чораларни кўриш бўйича келишиб олганлар.

“C5+1” гуруҳи учрашувлари 2015 йилдан бери ўтказиб келинади. Гуруҳнинг илк учрашуви Ўзбекистоннинг Самарқанд шаҳрида ўтказилган эди.

UZCARD Ўзбекистонда Россиянинг “Мир” карталарига хизмат кўрсатилмаётганини билдирди

Жорий йилнинг 23 сентябридан Ўзбекистонда халқаро банклар томонидан чиқарилган “Мир” карталарига хизмат кўрсатиш вақтинча тўхтатилган. Бу ҳақда билдирган UZCARD умумреспублика процессинг маркази буни “техник ва профилактик ишлар олиб борилаётгани” билан изоҳлаган. “Мир” карталарига хизмат кўрсатиш қачондан тикланиши ҳозирча маълум эмас.

Айни пайтда UZCARD вакиллари РБК нашрига Ўзбекистонда ишлаб чиқарилган “Мир” карталарига хизмат кўрсатиш ҳали ҳам давом этаётганини таъкидлашган.

Аввалроқ АҚШ Молия вазирлиги огоҳлантируви манзарасида Туркия, Қозоғистон ва Вьетнамдаги бир неча банк “Мир” картасига хизмат кўрсатиш бўйича чеклов жорий қилишган.

Мирзиёев газ экспорт қилинмаётганини айтди. Рақамлар бунинг аксини кўрсатмоқда

Статистиканинг билдиришича, 8 ой ичида Ўзбекистон 645,9 миллиард долларлик газ сотган.

22 сентябрь куни Тошкент вилояти фаоллари билан учрашган президент Шавкат Мирзиёев Ўзбекистон газ ва пахта экспортини тўхтатгани тўғрисида гапириб ўтди.

“Ҳозир эса пахтани ҳам, газни ҳам экспорт қилмаяпмиз. Ҳатто газни четдан сотиб ҳам оляпмиз. Сабаби, саноатимиз ривожланяпти. Ана шундай икки асосий маҳсулот четга сотилмаса ҳам экспортимиз ҳажми 2016 йилга нисбатан 5-6 баробар ошди”, – деб иқтибос келтирди президент сўзларидан Kun.uz.

Ўзбекистон Статистика қўмитасининг 2022 йилнинг январидан-августигача ўтган 8 ой учун берган ҳисоботида эса 645,9 миллион долларлик газ сотилгани, бу ўтган йилнинг мос даврига солиштирганда 60,9 фоизга кўплиги қайд этилган. Шу билан бир қаторда газ импорти 35,9 фоизга камайиб, 76,2 миллион долларни ташкил қилган.

Аввалроқ Озодлик радиоси Хитой Божхона бош бошқармасининг 20 июлдаги ҳисоботига таянган ҳолда Ўзбекистон 2022 йилнинг олти ойида Хитойга 404 миллион долларлик табиий газ сотгани тўғрисида хабар берган эди.

Хитой томонининг расман билдиришича, бу ўтган йилнинг шу даврига нисбатан 2,2 баробарга кўпдир.

Хитой Божхона бош бошқармаси ҳисоботида Ўзбекистон Хитойга энг кўп газ сотувчи беш давлатдан бири бўлиб қолаётгани қайд этилган. Биринчи ўринда олти ойда Хитойга 4,5 миллиард доллар газ сотган Туркманистон бормоқда. Ундан кейинги ўринларни эса Россия, Мьянма, Қозоғистон ва Ўзбекистон эгаллади.

Очиқ манбалардаги маълумотларга қараганда, Ўзбекистон ўзи қазиб олаётган газнинг камида 10 фоизини Хитойга сотмоқда.

Ўзбекистон ички истеъмол талаби кучайгани ортидан 2022 йил бошида Хитойга газ экспортини тўхтатганди. Аммо май ойидан бошлаб яна Хитойга газ экспорти қайта тикланган.

“Ўзтрансгаз” раҳбари Беҳзод Норматов 28 июнь куни Ўзбекистон 2025−2026 йилларга бориб хорижга газ сотишнинг бутунлай тўхтатиши мумкинлиги тўғрисида билдирган эди. Буни у газга бўлган ички талабнинг ошиб бораётгани билан изоҳлаган.

Ўзбекистон аҳолиси ҳар йилги куз-қиш мавсумида газ ва электр таъминоти тақчиллигига дучор бўлаётгани халқаро матбуотда, жумладан, Озодлик радиосида ёритиб келинади.

Мирзиёев 2016 йил декабрида президентликка келишидан аввал аҳолининг газ ва электр муаммосини ҳал қилишга ваъда берган эди. Аммо ўтган вақт ичида вазият ижобий томонга ўзгармаган.

Президент Мирзиёев Тошкент вилояти ҳоким лавозимига Зойир Мирзаевни таклиф қилди

Зойир Мирзаев бир йилдан бери Тошкент вилоят ҳокими вазифасини бажарувчи эди.

22 сентябрь куни эрталаб Нурафшон шаҳрига ташриф қилган президент Шавкат Мирзиёев Зойир Мирзаевни Тошкент вилоят ҳокими лавозимига таклиф қилди.

“Мен Тошкент вилояти ҳокимлигига Зойир Мирзаев номзодини таклиф қилар эканман, ҳозир ҳам шу вазифани бажара оладиган номзод бўлса кўриб чиқишга тайёрман”,-деб иқтибос келтирди "Кун уз" президентнинг Тошкент вилояти кенгаши навбатдан ташқари сессиясида сўзлаган нутқидан.

Мирзаев 2021 йилнинг 18 ноябрида Тошкент вилоятига ҳокими вазифасини бажарувчи қилиб тайинланганди.

2018 йилда бош вазир ўринбосари - агросаноат, озиқ-овқат ва халқ истеъмол моллари мажмуаси раҳбари бўлиб ишлаган пайтида Мирзаев Тошкент вилоятининг Оққўрғон туманида ҳокимият мулозим ва фермерларни ариқдаги совуқ сувга тушириб, бир неча фермерни тош кўтаришга мажбурлаб, хўрлагач, лавозимидан олинган эди.

Тармоқларда шов-шув бўлган ўша ҳодисадан кейин 2018 йил 7 ноябрдан Жиззах вилояти, Шароф Рашидов тумани ҳокими лавозимига тайинланган, 2019 йил октябридан 2021 йил 18 ноябргача Қашқадарё вилоятига ҳокимлик қилган.

Ўзбекистон Бош прокуратураси: хориж армиясига ёлланганлар 10 йилгача қамалади (ВИДЕО)

Бош прокуратура биноси.

Россия президенти Владимир Путин 21 сентябрь куни Украинадаги уруш фонида мамлакатда қисман сафарбарлик эълон қилиши ортидан Ўзбекистон Бош прокуратураси ўзбекистонлик мигрантларни хориж армиясига ёлланганлар 10 йилгача қамалишидан огоҳлантирди.

Бош прокуратуранинг билдиришича, Жиноят кодексининг 154-моддаси биринчи қисмига кўра ҳарбий ҳаракатларда қатнашиш учун ёлланиш беш йилдан ўн йилгача озодликдан маҳрум қилиш билан жазоланади.

Жиноят кодексининг 154-1-моддасига кўра, Ўзбекистон фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши 3 йилгача ахлоқ тузатиш ишлари билан, ёлланиши эса 5 йилгача озодликдан маҳрум қилиш билан жазоланишига сабаб бўлади.

“Шунга кўра, чет мамлакатларда бўлиб турган ҳамюртларимиздан ҳарбийлашган тузилмаларга ёлланмасликка, ҳарбий ҳаракатларда иштирок этмасликка чақирамиз ва бундай ҳаракатлар жиноий жавобгарликка сабаб бўлиши ҳақида яна бир бор огоҳлантирамиз”,-дейлади Бош прокуратура билдирувида.

Аввалроқ Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирган эди. Ўзбекистон Ташқи меҳнат миграцияси агентлиги эса Россиядаги Ўзбекистон фуқароларидан рухсат берилмаган оммавий намойишларда иштирок этмасликни сўради.

21 сентябрь куни Россия президенти Владимир Путин мамлакатда қисман сафарбарлик эълон қилган эди. Россия мудофаа вазири Сергей Шойгу сафарбарлик доирасида захирадаги 300 минг киши армияга чақирилишини билдирди.

Шундан сўнг Россиянинг кўплаб шаҳарларида сафарбарликка қарши норозилик намойишлари ўтказилди. ОВД-инфонинг билдиришича, 21 сентябрь куни 38 та шаҳарда ўтган норозилик намойишларида иштирок этган 1300 дан ортиқ киши қўлга олинди.

Шарҳсиз лавҳа: Россияда урушга қарши намойишларда юзлаб одам ҳибсга олинди
Илтимос кутинг

Айни дамда медиа-манба мавжуд эмас

0:00 0:05:12 0:00

Ташқи миграция агентлигиги Россиядаги ўзбекистонликларни митингларга чиқмасликка чақирди

Россиядаги норозилик намойишларидан бири (архив сурати)

Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги Россияда юрган ўзбекистонликлардан Россия ҳудудида “давлат расман рухсат бермаган оммавий намойишлар”да иштирок этмасликни, одамлар кўп тўпланаётган жойларга бормасликни сўради.

“Бу каби расман рухсат берилмаган тадбирларда қатнашиш чет эл фуқаролари учун Россия Федерацияси қонунларига мувофиқ жавобгарликка тортилиш ёки давлатдан мажбурий чиқариб юборишга олиб келиши мумкин”, дейилган агентлик хабарномасида.

Аввалроқ ““Весна” ҳаракати президент Владимир Путин томонидан эълон қилинган қисман сафарбарликка қарши “Нет могилизации” (“Йўқолсин қабрга тиқилиш”) деб номланган бутунроссия норозилик намойиши бошлашини эълон қилган эди. Фаоллар одамларни 21 сентябрь куни соат 19:00 да Россия шаҳарларидаги марказий кўчаларга чиқишга чақиришган.

Жиззахлик йигитни “гей”ликда гумонлаб “самосуд” қилганларга 10 кун ўтиб жиноят иши очилди (ВИДЕО)

"Самосуд" видеосидан кадр.

Жиззахлик йигитни “гей”ликда гумонлаб “самосуд” қилганларга нисбатан орадан ўн кун ўтиб жиноят иши очилди.

Жиззах вилоят ИИБ матбуот хизматининг расман билдиришича, “самосуд” қилганларга нисбатан 20 сентябрь куни Шароф Рашидов тумани ички ишлар бўлими ҳузуридаги тергов бўлими томонидан Ўзбекистон Республикаси Жиноят кодексининг 277-моддаси (безорилик) 2-қисми “б, г” бандлари билан жиноят иши қўзғатилиб, дастлабки тергов ҳаракатлари олиб борилмоқда.

Аввалроқ ижтимоий тармоқларда “Жиззахда самосуд” сарлавҳали видео тарқалган эди. Видеода уч-тўрт киши бир йигитни ўртага олиб сўроқ қилаётгани, уни “гей”ликда айблаётгани ва кейин калтаклаганларини кўриш мумкин.

“Самосуд” чилар йигитни ўлдириш, далага кўмиб юбориш, Жиззах шаҳрига олиб бориб сазойи қилиш билан таҳдид этишган.

“Бор гап” расмий каналининг ёзишича, бу воқеа Жиззах вилояти Ш.Рашидов тумани “Қулама” МФЙда бўлгани айтилмоқда.

Жиззах вилоят ИИБ матбуот хизмати эса воқеа сентябрь ойининг биринчи ўн кунлигида содир этилгани, 10 сентябрь куни фуқаро Т.З., Шароф Рашидов тумани ички ишлар бўлимига ариза билан мурожаат қилганини билдирди.

Расман билдирилишича, Т.З., ўз аризасида танишлари Э.О., И.Д., ва Н.Ш.,лар унинг муқаддам “ижтимоий тармоқ орқали юборган расмини ўзаро муҳокама қилиш учун чақириб, турли сўзлар билан ҳақорат қилиб, уриб-тепиб, тан жароҳати етказганлиги ва ушбу жараённи видеотасвирга олиб, ижтимоий тармоқларга тарқатганлиги сабабли қонуний чора кўришни сўраган”.

Жиззах вилоят ИИБ матбуот хизмати жиноят иши нега орадан ўн кун ўтиб, видео ижтимоий тармоқларда тарқаб кетганидан сўнг очилгани юзасидан бирор тушунтириш бермади.

Ўзбекистонда “самосуд”лар тез-тез содир бўлиб турадиган воқеадир. Бундан аввал Жиззахда ўқувчи қизлар ҳижобли қизни самосуд қилгани тўғрисида ҳам видео тарқалган эди. Озодлик ўз вақтида бу каби “самосуд”лар тўғрисида қатор мақола ва хабарларни эълон қилган.

Халқаро ташкилотлар Ўзбекистондаги оилавий зўравонлик ва “самосуд”лар ҳолатлари кўплигидан ташвиш билдириб келадилар.

Калтак еган келин, муштумзўр она ва "самосуд"лар – ЮНИСЕФ Ўзбекистондаги вазиятдан ташвишда
Илтимос кутинг

Айни дамда медиа-манба мавжуд эмас

0:00 0:05:37 0:00

Ўзбекистон ипотека ва бюджетини қўллаб-қувватлаш учун 650 миллион доллар қарз олмоқчи

Ўзбекистон йил охиригача Осиё тараққиёт банки (ОТБ) билан иккита лойиҳани амалга ошириш учун 650 миллион долларлик шартномани имзолайди. Инвестициялар ва ташқи савдо вазирлигининг билдиришича, бу борада бош вазир ўринбосари Жамшид Хўжаев ва ОТБ вице-президенти Брюс Госпер ўртасида бўлиб ўтган видеомулоқот чоғида келишувга эришилди.

Расман билдирилишича, банкдан олинадиган 650 миллион доллар ипотека бозори ва бюджетни қўллаб-қувватлашга йўналтирилади.

Ўзбекистон ҳукуматига қарашли “Очиқ бюджет” лойиҳасидаги маълумотларга ишонилса, 2022 йилнинг шу кунигача бюджет камомади 15 миллиард сўмга яқинлаб қолган. Мазкур лойиҳадаги рақамларда қайд этилишича, 2020 йилда бюджет камомади 2,5 миллиард сўмдан кўпроқни ташкил этган эди.

Айни пайтда Ўзбекистон ОТБ билан ҳамкорликда инфраструктуравий қурилиш, энергетика, уй-жой коммунал хўжалиги, соғлиқни сақлаш ва қишлоқ ҳўжалигига оид умумий қиймати 3,7 миллиард доллар бўлган 24 та лойиҳани амалга оширмоқда.

2022-2024 йиллар оралиғида эса ОТБ Ўзбекистонда умумий қиймати 2,8 миллиард доллар бўлган 27 лойиҳани амалга ошириши кутилмоқда.

2021 йил якунларига қараганда ОТБ Ўзбекистоннинг асосий кредиторига айланган. 2022 йилнинг 1 январь ҳолатига кўра Ўзбекистон давлат қарзининг 5,2 миллиард доллари ёки 19,7 фоизи ОТБ ҳиссасига тўғри келади.

Олий Мажлис Сенатининг 4 август куни бўлиб ўтган йиғилишида сўзга чиққан молия вазирининг ўринбосари Одилжон Исақов бугунги кунда давлат қарзи 25,9 миллиард долларга (бундан 23,2 миллиард доллари ташқи қарз) етганини айтганди.

Ўзбекистон Марказий банки шу йил июнь ойи охирида ёйинлаган ҳисоботида 2022 йил 1 апрель ҳолатига мамлакатнинг умумий ташқи қарзи 38 миллиард 845 миллионни ташкил этгани, бунинг 23 миллиард 400 минг доллари давлат ҳиссасига, 15,5 миллиард долларга яқини эа хусусий сектор ҳиссасига тўғри келишини очиқлаган эди.

Politico: АҚШ Афғонистондан олиб чиқилган ҳарбий учоқларни Ўзбекистон ва Тожикистонга бермоқчи

АҚШ Афғонистондаги террорчиликка қарши курашда ёрдам эвазига Ўзбекистон билан Тожикистонга қарийб 50 та ҳарбий учоқ ва вертолётни ўтказиб бериш имкониятини кўриб чиқмоқда. Бу ҳақда Politico нашри бу борадаги музокаралардан хабардор манбалардан олинган маълумотга таянган ҳолда хабар қилди.

Нашр қайдича, бу ерда гап «Толибон» вакиллари Кобулни эгаллаб олганидан кейин афғонистонлик пилотлар Ўзбекистон ва Тожикистонга учиб келган C-208 учоқлари, A-29 Super Tucano енгил ҳужумчи учоқлари, Ми-17, Ми-25 ва UH-60 Black Hawk вертолётлари ҳақида бормоқда.

Эндиликда АҚШ террорчиликка қарши кураш ва хавфсизлик соҳаларидаги алоқаларни теранлаштиришга оид норасмий келишув эвазига учоқларнинг бир қисмини Ўзбекистон ва Тожикистон ҳукуматига топшириш имкониятини ўрганмоқда.

Узоқ муддатли истиқболда мазкур келишув Тошкент ва Душанбе билан разведка маълумотларини алмашиш бўйича ҳамкорликни кенгайтириш ёки Афғонистондаги террор фаолиятини назорат қилиш учун бу икки мамлакатда минтақавий база ўлароқ қўшин ва учоқларни жойлаштириш кабиларни ўз ичига олиши мумкин. Бироқ нашр манбалари муҳтамал вариантлардан энг мақбули сифатида бу шартнома Афғонистондаги террор тармоқлари тўғрисида Ўзбекистон ва Тожикистонда бўлган маълумотлардан фойдаланишга оид бўлиши мумкинлигини айтишган.

Хитой-Қирғизистон-Ўзбекистон-Афғонистон транспорт йўлаги бўйлаб биринчи тажриба поезди йўлга чиқди

Поезд сўнгги темир йўл станциясига икки кун ичида етиб бориши режалаштирилган.

Хитой-Қирғизистон-Ўзбекистон-Афғонистон транспорт йўлаги орқали Қашқар-Ўш-Андижон-Ғалаба-Ҳайратон темир йўл йўналиши бўйлаб биринчи тажриба поезди йўлга чиқди. Бу ҳақда “Ўзбекистон темир йўллари” ширкати 19 сентябрь куни маълум қилди.

Расман билдирилишича, 12 та 40 футлик контейнер юкланган поезд Ўш темир йўл станциясида шакллантирилган. Хитойнинг Қашқар шаҳридан Ўшгача юклар автомашиналарда олиб келинган.

Озиқ-овқат, маиший техника ва халқ хўжалиги молларидан иборат бўлган юк Ўш станциясида Ўзбекистонга тегишли фиттинг платформаларига ортилган. Юк “Ўзбекистон темир йўллари” орқали Афғонистоннинг Мозори Шариф станциясига етказиб берилади. Поезд сўнгги темир йўл станциясига икки кун ичида етиб бориши режалаштирилган.

Ўзбекистон мазкур йўлак орқали ўз ҳудудидан юк ташиш учун 70 фоизли, бошқа давлатлар эса 50 фоизли чегиримларни берган. Бу йўналиш орқали Афғонистонга йилига 4 мингдан кўпроқ контейнерда юк етказиб бериш режалаштирилмоқда.

Озодлик Самарқандда ШҲТ саммити доирасида 14 сентябрь куни “Ўзбекистон – Қирғизистон – Хитой” темир йўли қурилиши (Қирғизистон ҳудудида) лойиҳаси бўйича ҳамкорлик тўғрисида битим имзолангани тўғрисида хабар берганди.

Аввалроқ Ўзбекистон ва Қирғизистон президентлари “Хитой-Қирғизистон-Ўзбекистон” темир йўли қурилиши тез орада бошланишини тасдиқлашган. Мазкур темир йўлни қуриш ташаббуси 2000-йиллар бошларида кўтарилган, аммо ҳанузгача амалга ошмай қолмоқда.

Давомини ўқинг

XS
SM
MD
LG