Reuters агентлигининг олти манбаси Владимир Путин март ойида бўлиб ўтадиган президентлик сайловларида қатнашишга қарор қилгани, Россияни сўнгги ўн йилликлардаги энг хавфли даврдан олиб ўтишим керак деб ҳисоблаётгани ҳақида маълум қилган.
Июнь ойида "Вагнер" ёлланма гуруҳи раҳбари бошчилигидаги қуролли қўзғолонни бостиргандан сўнг, Путин ўзининг хавфсизлик кучлари, ҳарбийлар ва минтақавий сайловчилар орасида таянчини мустаҳкамлашга ҳаракат қилмоқда. Вагнер эса тиз чўктирилди.
Россиянинг мудофаа, қурол-яроғ ва умумий бюджет харажатлари ортди.
Путиннинг сўнгги ойларда минтақалардаги оммавий чиқишлари кўпайган.
“Қарор қабул қилинди – у ўз номзодини қўяди”, деди манбалардан бири.
Бошқа манба қарор қабул қилингани ва Путиннинг маслаҳатчилари сайловга ҳозирлик кўраётганини тасдиқлади. Яна учта манба 2024 йил март ойида бўлиб ўтадиган президентлик сайловларида Путин номзоди қўйилишини айтди.
Манбалар анонимлик шарти билан Reuters билан суҳбатлашган.
Улардан бири ушбу қарор бирор ҳафталарда расман билдирилишини айтган.
Кўплаб дипломатлар, жосуслар ва расмийлар Путин ҳокимиятда умрбод қолиши кутилаётганини айтган бўлса ҳам, ҳозирча Путиннинг қайта сайланиш режалари расман тасдиқланмаган.
Кремль матбуот котиби Дмитрий Песковнинг айтишича, Путин ҳали бу масалага изоҳ бермаган ва “сайлов кампанияси ҳали расман эълон қилинмаган”.
РОССИЯ УРУШДА
1999 йилнинг сўнгги кунида Борис Ельциндан президентликни қабул қилиб олган ва ҳозирда 71 ёшли Путин аллақачон Иосиф Сталиндан кейинги даврда Россияни энг узоқ бошқарган одамга айланди.
Дипломатлар фикрича, амалдаги президент яна сайловда қатнашса, Путинга жиддий рақиб йўқ. Собиқ КГБ жосуси бўлмиш Путин ҳозир 80% рейтингга эга. Уни давлат ва нодавлат оммавий ахборот воситалари қўллаб-қувватлайди ва унинг бошқарувига сезиларли қаршилик кўрсатмайди.
Шундай бўлса ҳам, Путин Михаил Горбачёв ўттиз йилдан кўпроқ вақт олдин парчаланиб бораётган Совет Иттифоқини сақлаб қолишда дуч келгандек жиддий синовлар қаршисида турибди.
Украинадаги уруш 1962 йилдаги Куба ракета инқирозидан бери Ғарб билан энг катта қарама-қаршиликни келтириб чиқарди ва Ғарб санкциялари Россия иқтисодиётига ўн йилликлардаги энг катта ташқи зарба бўлди.
Уруш бошланганидан бери инфляция тезлашди, рубль тушди ва мудофаа харажатлари 2024 йилда Россия умумий бюджети харажатларининг деярли учдан бир қисмини ташкил қилади, дейилади ҳукумат лойиҳасида.
Аммо Путин ҳокимияти учун энг катта таҳдид июнь ойида, Евгений Пригожиннинг қисқа давом этган исёни бўлди.
Пригожин қўзғолондан икки ой ўтиб авиаҳалокатда ўлди. Шундан сўнг Путин Вагнер қўшинлари қолдиқлари устидан назоратини кенгайтириш учун Мудофаа вазирлиги ва Миллий гвардиядан фойдаланди.
Ғарб Путинни ҳарбий жиноятчи ва диктатор сифатида кўрсатди.
Аммо Путин Украина урушини Қўшма Штатлар билан янада кенгроқ курашнинг бир қисми сифатида кўрсатмоқда. Кремль элиталари фикрича, АҚШнинг мақсади Россияни парчалаш, унинг улкан табиий ресурсларини тортиб олиш ва кейин Хитой билан ҳисоб-китоб қилишдир.
"Россия Ғарбнинг бирлашган кучига дуч келмоқда", дейди манбалардан бири.
Баъзи руслар учун эса уруш постсовет Россиясининг камчиликларини кўрсатган.
Қамоқдаги россиялик мухолиф сиёсатчи Алексей Навальнийнинг айтишича, Путин Россияни стратегик вайронагарчиликка олиб келди.
"Россия орқага кетмоқда", деди россиялик ҳурматли инсон ҳуқуқлари фаолларидан бири Олег Орлов июль ойида Reuters агентлигига. "Биз коммунистик тоталитаризмни тарк этдик, аммо ҳозир тоталитаризмнинг бошқа турига ўтдик."
Форум