Линклар

Шошилинч хабар
06 июн 2023, Тошкент вақти: 10:53

Ўзбекистон хабарлари

Санкцияларга нишон бўлган Беларусь Ўзбекистондан кўпроқ товар сотиб олмоқчи

Беларусь бош вазири Роман Головченко (архив сурати)

Беларусь санкциялар рўйхатига тушган айрим товарларни Ўзбекистондан сотиб олиш ниятида. Бу ҳақда Беларусь бош вазири Роман Головченко, ТАСС хабарига кўра, ўзбекистонлик ҳамкасби Абдулла Арипов билан Тошкентда ўтказган учрашувида билдирган.

“Беларусь айниқса ҳозирги пайтда, коллектив Ғарб томонидан киритилган муайян чекловлар шароитида [Ўзбекистондан товар импорти ошишидан] манфаатдор. Биз Ўзбекистон товарлари [Беларусга] етказилиши оширилишига тайёрмиз”, деган жумладан Головченко.

Беларусь бош вазири бу ерда гап биринчи ўринда йигирилган ип, металл, озиқ-овқат маҳсулотлари, мева-сабзавотлар ҳақида кетаётгани айтган. Унга кўра, Беларусда мазкур товарларга талаб юқори ва барқарордир.

Головоченко 2017 йилдан буён Беларусь билан Ўзбекистон ўртасидаги товар айланмаси беш баробар кўпайганини урғулаган.

Қайд этилишича, 2021 йилда икки мамлакат ўртасида ўзаро товар айирбошлаш ҳажми 301,9 миллион долларга тенг бўлган, бу эса 2020 йилдагига солиштирганда 7,8 фоизга кўпдир.

Беларусда 2020 йил августидаги президент сайловидан сўнг Лукашенко режимидан норозиларга қарши репрессиялар бошланиб кетгани ортидан Ғарб мамлакатлари Минскка қарши санкциялар жорий этган. Бу санкциялар Беларусь Россиянинг Украинага бостириб киришида кўмаклашгани важидан янада кучайтирилган.

Кун янгиликлари

Бўкада қийноққа солингани айтилаётган шахс вафот этди. ИИБнинг икки ходими қўлга олинди

Иллюстратив сурат.

Тошкент вилояти Бўка туман Ички ишлар бошқармасида 3 июнь куни ноқонуний сўроқ қилинган 1987 йилда туғилган У.С., олган тан жароҳатлари оқибатида касалхонада вафот этди.

ИИВнинг дастлабки расмий ахборотида қўлга олинган шахс “АҚШда туғилган”и қайд этилади. Кейинроқ ИИВ расмий ахборотидан бу қайд олиб ташланган.


Ички ишлар вазирлигининг 5 июнда билдиришича, мазкур ҳолат юзасидан Тошкент вилояти прокуратураси томонидан ЖКнинг 235-моддаси 3-қисми билан жиноят иши қўзғатилиб, воқеага алоқадор бўлган 2 нафар тезкор ходимлар Ж.Д. ва Ғ.Ш.лар ҳибсга олинган.

Бундан ташқари Бўка тумани ИИБ бошлиғи А. Бабаханов, унинг биринчи ўринбосари В. Худайқулов, жиноят қидирув бўлими раҳбари Ж. Субанов, тергов бўлими бошлиғи Ж. Ачилов, шунингдек, навбатчилик қисми масъули Ш. Ибрагимовлар эгаллаб турган лавозимидан озод этилди.

ИИВнинг билдиришича, У.С., қатор ўғирликларни содир этишда гумонланиб 3 июнда қўлга олинган эди. Уни 3 июнь куни соат тахминан 22.00ларда Жиноят қидирув бўлимининг тезкор ходимлари процессуал тартиб бузилган тарзда махсус сўров хонасига эмас, балки хизмат хонасига олиб чиқиб сўроқ қилган. Сўроқ пайтида гумонланувчининг соғлиғи ёмонлашиб “Тез ёрдам” чақиртирилган. У.С., касалхонага олиб келинганидан сўнг вафот этган.

“Тайинланган бирламчи суд-тиббий экспертизасининг ташхисига кўра У.С.нинг танасида тан жароҳатлари борлиги аниқланган”, дейилади хабарда.

Ҳолат юзасидан Ички ишлар вазирининг ўринбосари Я.Абдулҳақов, ИИВ Шахсий хавфсизлик хизмати ҳамда вилоят прокуратураси ходимларидан иборат ишчи гуруҳ воқеа жойига чиқиб вазият ўрганилди, воқеа жойи кўздан кечирилиб, ишга алоқадор ходимларнинг кўрсатмалари олинди.

ИИВ билдирувида таъкидланишича, ҳозирда ишга алоқадор тезкор ходимлар гумонланувчини қийноққа солганларини рад этмоқда.

Олий суд Тажимуратовга белгиланган жазони ўзгартиришсиз қолдирди

Нукус воқеалари бўйича асосий айбланувчи сифатида кўрилган Даулетмурат Тажимуратов 16 йилга қамалган эди.

Олий судда 5 июнь куни Нукус воқеаларида айбланиб қамалган 16 кишининг шикоятлари ва прокуратуранинг шартли ҳукм чиқарилган 4 нафар судланувчига нисбатан протестини апелляция тартибида кўриб чиқиш якунланди.

Олий суд ажримига мувофиқ 8 судланувчининг қамоқ жазоси озодликни чеклаш билан алмаштирди, 6 судланувчининг жазо муддати қисқартирилди.

Нукус воқеалари бўйича асосий айбланувчи сифатида кўрилган Даулетмурат Тажимуратовга белгиланган 16 йиллик қамоқ жазоси ўзгаришсиз қолдирилди. Суд прокуратуранинг 4 кишига нисбатан протестини рад этди.

Апелляция суди муҳокамани 29 май куни якунлаган ва ҳукм чиқариш жараёнига киришган эди.

Апелляция судида прокурор 4 кишига берилган шартли жазони реал муддатларга алмаштиришни, 13 кишининг жазосини енгиллаштириш ва улардан 8 нафарини озод қилишни сўраган.

Январь ойи охирида Бухоро вилояти судида ўтган йилнинг 1-2 июль куни Қорақалпоғистонда содир бўлган воқеаларда айбланган 22 кишига нисбатан ҳукм эълон қилинган.

Ҳукмга мувофиқ, асосий айбланувчи сифатида кўрилаётган Даулетмурат Тажимуратов 16 йилга қамалган, яна 17 киши 3 йилдан 8,5 йилгача озодликдан маҳрум этилган, Лолагул Қаллиханова дохил тўрт киши эса суд залидан озод қилинган эди.

Олий суд ажрими

Б. Кадирбергеновга тайинланган 7 йил озодликдан маҳрум қилиш жазоси 5 йил озодликни чеклаш жазосига;

Б. Сейтниязовга тайинланган 8 йил озодликдан маҳрум қилиш жазоси 4 йил озодликни чеклаш жазосига;

С. Медетовга тайинланган 7 йил озодликдан маҳрум қилиш жазоси 5 йил озодликни чеклаш жазосига;

Қ. Сейтимовга тайинланган 5 йил озодликдан маҳрум қилиш жазоси 5 йил озодликни чеклаш жазосига;

П. Нурниязовга тайинланган 4 йил озодликдан маҳрум қилиш жазоси 4 йил озодликни чеклаш жазосига;

С. Калимовга тайинланган 6 йил озодликдан маҳрум қилиш жазоси 5 йил озодликни чеклаш жазосига;

Н. Султамуратовга тайинланган 3 йил озодликдан маҳрум қилиш жазоси 3 йил озодликни чеклаш жазосига;

А. Темирхановга тайинланган 6 йил озодликдан маҳрум қилиш жазоси 5 йил озодликни чеклаш жазосига ўзгартирилди.

Уларнинг эҳтиёт чораси тариқасида қамоқда сақланган ҳар бир куни Жиноят кодексининг 62-моддасига асосан озодликни чеклаш жазосининг бир кунига тенглаштирилиб, тайинланган жазодан чегирилиб, барчаси суд залида қамоқдан озод қилинди.

Д. Джиемуратовга тайинланган 8 йил озодликдан маҳрум қилиш жазоси 6 йил;

А. Токимбетовга тайинланган 8 йил 6 ой озодликдан маҳрум қилиш жазоси 5 йил 6 ой;

А. Адилбековга тайинланган 7 йил озодликдан маҳрум қилиш жазоси 5 йил;

Н. Найиповга тайинланган 7 йил озодликдан маҳрум қилиш жазоси 4 йил;

Р. Бекмуратовга тайинланган 8 йил озодликдан маҳрум қилиш жазоси 6 йил;

С. Каиповга тайинланган 8 йил озодликдан маҳрум қилиш жазоси 5 йил озодликдан маҳрум қилиш жазосига келтирилди.

Биринчи инстанция суди ҳукмининг Л. Каллиханова, А. Турданов, А. Сметуллаев ва А. Нуратдиновга оид қисмига нисбатан келтирилган прокурор протести рад қилиниб, уларга тайинланган жазолар ўзгаришсиз қолдирилди.

Д. Тажимуратов ва унинг ҳимоячиларининг шикоятлари қаноатлантирилмасдан, суд ҳукмининг унга оид қисми эса ўзгаришсиз қолдирилди.

Шунингдек, суд Ўзбекистон Республикаси Конституциясининг 47 ва 65-моддалари талабларини тўғридан-тўғри қўллаган ҳолда жиноят иши бўйича келтирилган зарарларни қоплаш мақсадида хатланган А. Турданов, А. Сметуллаев, Н. Найипов, Р. Бекмуратов, С. Каипов, Қ. Сейтимов, А. Адилбековга тегишли мол-мулклар Жиноят-процессуал кодексининг 290-моддаси тартибида хатловдан чиқарилиб, эгаларига қайтарилиши белгиланди.

Ҳукмнинг қолган қисми ўзгаришсиз қолдирилди.

Ўзбекистонда қатарликлар учун визасиз тартиб жорий қилинди

Ўзбекистон президенти Шавкат Мирзиёев Қатар амири шайх Тамим бин Ҳамад ас-Соний билан Самарқанд аэропортида, 2023 йил 5 июни (president.uz фотоси)

Қатарликлар бундан буён Ўзбекистонда 30 кун давомида визасиз юра олади. Бунга оид фармон президент Шавкат Мирзиёев томонидан 5 июнь куни имзоланди.

Қатар давлати мазкур ҳужжат имзоланиши ортидан фуқаролари бир ой давомида Ўзбекистонда визасиз юриши мумкин бўлган 45 та мамлакат қаторига қўшилди.

Душанба куни президент Мирзиёев Ўзбекистон-Қатар саммитида иштирок этиш учун Самарқандга келган Қатар амири шайх Тамим бин Ҳамад ас-Сонийни аэропортда тантанали равишда кутиб олди. Бу Қатар давлати раҳбарининг Ўзбекистонга илк давлат ташрифидир.

Саммитнинг асосий тадбирлари 6 июнь куни бўлиб ўтиши кутилмоқда. Президент матбуот хизмати маълумотига кўра, 5 июнь куни икки мамлакат етакчилари кўҳна Самарқанднинг тарихий обидаларини биргаликда зиёрат қилишади.

Аввалроқ президент матбуот хизмати Ўзбекистон-Қатар саммитида “энг аввало, фаол сиёсий мулоқотлар ва маданий-гуманитар алмашинувни давом эттириш, энергетика, газ-кимё саноати, қишлоқ хўжалиги, инфратузилма, логистика, туризм ва бошқа тармоқларда йирик инвестиция лойиҳаларини амалга ошириш эътибор марказида бўлиши” ҳақида маълумот тарқатган эди.

Қозоғистон 2024 йил куз-қишида Россия газини Ўзбекистонга транзит қилишга тайёр бўлади

Иллюстратив сурат.

Қозоғистон инфраструктураси 2024 йилнинг куз-қиш мавсумидагина Россия газини Ўзбекистонга транзит қилишга тайёр бўлади. Zakon.kz нашрининг ёзишича, бу ҳақда 2 июнь куни қозоқ парламентида ўтган газ соҳасига бағишланган йиғилишда энергетика вазири Алмасадам Саткалиев маълум қилди.

Вазир Ўзбекистон ва “Газпром” ўртасида газ экспорти ҳажми ва нархи юзасидан музокаралар давом этаётганини таъкидлади.

“Бу музокаралар якунланганидан сўнг биз ўз инфраструктурамизни тақдим этамиз. Кейинги йилнинг куз-қиш мавсумида инфраструктура тайёр бўлади. Биз бу транзитдан ва транзит учун ҳақ олишдан манфаатдормиз. Умуман олганда бу Марказий Осиё минтақасининг энергетик таъминотини яхшилайди”, -деди Алмасадам Саткалиев.

Вазир депутатларнинг “Россия, Қозоғистон ва Ўзбекистон ўртасида уч томонлама газ иттифоқи тузиладими?”, деган саволларини жавобсиз қолдирди.

2022 йилда Россия, Қозоғистон ва Ўзбекистон иштирокида “уч томонлама газ иттифоқи” тузиш истаги Россия президенти Владимир Путин томонидан қозоқ президенти Қасим-Жомарт Тоқаев билан Москвада бўлиб ўтган учрашув чоғида билдирилган эди.

Ўзбекистон энергетика вазири Жўрабек Мирзамаҳмудов 2022 йилнинг 7 декабрида журналистлар билан мулоқот чоғида Тошкент “ҳеч қачон газ эвазига сиёсий шартларга рози бўлмайди”, деб айтган. Вазирга кўра, Россия билан газ етказиб бериш бўйича шартнома тузилиши иттифоқ тузилишини англатмайди.

Аммо Россия ташқи ишлар вазири Сергей Лавров 2023 йилнинг апрелида Самарқандга қилган ташрифи чоғида Россия, Ўзбекистон ва Қозоғистон ўртасидаги газ иттифоқи муҳокамасида илгарилаш кузатилаётгани ҳақида билдирганди.

“Россия, Ўзбекистон ва Қозоғистон, жумладан, президентлар даражасида бу кўламли лойиҳани муҳокама қилишда фаол илгарилади”, - деб айтган Лавров.

Озодлик радиоси ўтган куз ва қиш мавсумида Ўзбекистонда юз берган энергетик инқироз ҳақида кўплаб хабарларни ҳамда ўзбек газини оффшордаги ширкатлар воситасида хорижга сув текинга пуллангани тўғрисидаги журналистик суриштирувини эълон қилган.

Олий судда 5 июнь куни Нукус воқеалари бўйича апелляция суди ҳукми эълон қилинади

Апелляция суди ишни кўриб чиқишни 29 май куни якунлаган ва ҳукм чиқариш жараёнига киришган эди.

Олий судининг Жиноят ишлари бўйича судлов ҳайъати 5 июнь куни соат 15:00 да Нукус воқеалари бўйича апелляция суди ҳукмини эълон қилади.

Олий суднинг билдиришича, ҳукм эълон қилиниши ортидан 16 нафар маҳкумнинг апелляция шикоятлари, шунингдек, прокуратуранинг шартли ҳукм чиқарилган 4 нафар судланувчига нисбатан протестини кўриб чиқиш якунланади.

Апелляция суди муҳокамани 29 май куни якунлаган ва ҳукм чиқариш жараёнига киришган эди.

Апелляция судида прокурор 4 кишига берилган шартли жазони реал муддатларга алмаштиришни, 13 кишининг жазосини енгиллаштириш ва улардан 8 нафарини озод қилишни сўраган.

Январь ойи охирида Бухоро вилояти судида ўтган йилнинг 1-2 июль куни Қорақалпоғистонда содир бўлган воқеаларда айбланган 22 кишига нисбатан ҳукм эълон қилинган.

Ҳукмга мувофиқ, асосий айбланувчи сифатида кўрилаётган Даулетмурат Тажимуратов 16 йилга қамалган, яна 17 киши 3 йилдан 8,5 йилгача озодликдан маҳрум этилган, Лолагул Қаллиханова дохил тўрт киши эса суд залидан озод қилинган эди.

Тажимуратов тергов жараёнида қийноққа солинганини айтган.

Нукус воқеалари бўйича жиноят иши юзасидан яна 39 нафар судланувчига нисбатан иккинчи суд ҳукми эса 17 март куни эълон қилинган. Ўшанда суд судланувчилардан 28 нафарига 5 йилдан 11 йилгача қамоқ жазоси бергани, 11 нафари эса шартли равишда суд залидан озод қилингани очиқланган.

Ўтган йил ёзида Ўзбекистон конституциясининг янги таҳририда Қорақалпоғистон республикаси суверен мақомининг бекор қилинишига қарши Нукусда бошланиб кетган норозиликлар чоғида расмийларга кўра, 21 киши ҳалок бўлган, ҳуқуқ-тартибот идоралари ходимлари дохил 243 киши яраланган.

Намойишлар куч билан бостирилган, бироқ ўзбек расмийлари ҳарбийларнинг намойишчиларга қарата ўқ узганини рад этган, Миллий Гвардия, ИИВ ҳамда Мудофаа вазирлиги намойишларни бостириш чоғида қўлланган махсус воситаларни намойиш қилган.

Аввалроқ АҚШ, Европа Иттифоқи, БМТ ва халқаро инсон ҳуқуқлари ташкилотлари ҳам ўзбек расмийларини Қорақалпоғистондаги воқеалар юзасидан очиқ, ҳар томонлама ва шаффоф тергов ўтказишга, тинч намойишчиларга қарши ҳаддан зиёд куч қўлланилганига оид иддаоларни текширишга чақирган. Аммо иккинчи суддаги айбланувчилар орасида ҳам намойиш иштирокчиларига қарши ноқонуний куч қўллаганликда гумонланган хавфсизлик кучлари ходимлари кўринган эмас.

Термизнинг собиқ ҳокими ва яна 17 кишига нисбатан суд жараёни бошланди

Исроил Худойбердиев 2017 йилдан 2022 йилгача Термиз шаҳри ҳокими лавозимида ишлаб келган.

Жиноят ишлари бўйича Термиз шаҳар судида Исроил Худойбердиев ва яна 17 кишига нисбатан суд жараёни бошланди. Олий суднинг маълум қилишича, жараён очиқ тарзда ўтказилади.

Судланувчилар Жиноят кодексининг 14 та моддаси - 25,167, 167, 168, 184, 28,205, 205, 206, 28,209, 209, 210 ва 229-4- га биноан растрата йўли билан талон-торож қилиш , товламачилик, солиқларни тўлашдан бўйин товлаганлик, хизмат лавозимидан ўз манфаати йўлида фойдаланиш, порахўрлик каби қатор жиноятларда айбланмоқда.

Исроил Худойбердиев ва унинг шериклари сифатида кўрилган 10 киши 2022 йилнинг кузида қўлга олинган эди. Улар 14,8 миллиард сўмни растрата қилганликда гумонланиб ушланганди. Худойбердиев билан биргаликда унинг ўринбосарлари Ғайрат Эломонов, Шуҳрат Раҳмонқулов , шаҳар архитектори ва бошқалар жавобгарликка тортилган.

Озодлик 2017 йилдан 2022 йил 21 сентябрига қадар Термиз шаҳар ҳокими лавозимида ишлаган Исроил Худайбердиев қамоққа олингани тўғрисида 2022 йилнинг 5 октябрида хабар берганди.

Қатар амири сўнгги 25 йилда илк бор Ўзбекистонга келмоқда

Ташрифининг асосий тадбирлари Самарқанд шаҳрида бўлиб ўтади.

Қатар амири шайх Тамим бин Ҳамад Ол Соний 5-6 июнь кунлари давлат ташрифи билан Ўзбекистонга келади. Президент матбуот хизматининг билдиришича, сафар президент Шавкат Мирзиёев таклифига асосан амалга оширилмоқда.

Олий мартабали меҳмон ташрифининг асосий тадбирлари Самарқанд шаҳрида бўлиб ўтади.

Музокараларда Ўзбекистон ва Қатар ўртасидаги кўп қиррали муносабатларни янада ривожлантириш масалалари кўриб чиқилади.

«Бунда, энг аввало, фаол сиёсий мулоқотлар ва маданий-гуманитар алмашинувни давом эттириш, энергетика, газ-кимё саноати, қишлоқ хўжалиги, инфратузилма, логистика, туризм ва бошқа тармоқларда йирик инвестиция лойиҳаларини амалга ошириш эътибор марказида бўлади», дейилади расмий хабарда.

Ўзбекистон ва Қатар ўртасида дипломатик алоқалар ўрнатилганига 25 йил бўлди. Мана шу давр ичида Қатар амири илк бор Ўзбекистонга келмоқда.

Мирзиёев Чўлпонотада Европа кенгаши президенти Шарль Мишель билан учрашди

Шавкат Мирзиёев Шарль Мишель билан (архив сурати)

Ўзбекистон президенти Шавкат Мирзиёев 2 июнь куни Қирғизистоннинг Чўлпонота шаҳрида Европа кенгаши президенти Шарль Мишель билан учрашув ўтказди. Мазкур учрашув, президент матбуот хизмати маълумотига кўра, Марказий Осиё ва Европа Иттифоқи етакчиларининг иккинчи саммити доирасида бўлиб ўтган.

Учрашувда икки лидер Ўзбекистон билан Европа Иттифоқи ўртасидаги кўп қиррали муносабатларни янада мустаҳкамлаш ва минтақавий форматда амалий ҳамкорликни ривожлантиришга оид масалаларни кўриб чиқишган.

Хусусан, улар икки томонлама савдони диверсификация қилиш ва ҳажмини ошириш, “GSP+” имтиёзли савдо тизимининг амал қилиш муддатини узайтириш, самарали транспорт йўналишлари, энг аввало, Транскаспий транзит йўлагини ривожлантириш, “яшил” энергетика, инновациялар ва юқори технологиялар, рақамлаштириш, экология, таълим, туризм ва бошқа соҳаларда қўшма дастурларни амалга ошириш масалаларига алоҳида тўхталишган.

Мирзиёев билан Мишель учрашув чоғида минтақавий кун тартибидаги долзарб масалалар юзасидан ҳам фикр алмашишган, Афғонистон бўйича маслаҳатлашувларни ва ушбу мамлакатга инсонпарварлик ёрдамини давом эттириш муҳимлигини таъкидлашган.

Ўзбекистон президенти Шавкат Мирзиёев 2 июнь куни “Марказий Осиё-Европа Иттифоқи” саммитида иштирок этиш учун амалий ташриф билан Қирғизистонга жўнаб кетган эди.

Аввалроқ Озодлик мазкур саммит арафасида ҳуқуқбонлик билан шуғулланувчи қатор ташкилотлар Европа кенгаши раиси Шарль Мишелни минтақа лидерлари билан учрашув чоғида инсон ҳуқуқлари масаласини кўтаришга чақиргани ҳақида хабар қилган. Мишель Мирзиёев билан жума кунги учрашув пайтида Ўзбекистондаги инсон ҳуқуқлари вазияти мавзусини кўтариб-кўтармагани ҳақида ҳозирча бирор маълумот йўқ.

Президент фармони билан Табиат ресурслари вазирлиги номи ўзгартирилди

Ўзбекистонда Табиат ресурслари вазирлиги Экология, атроф-муҳитни муҳофаза қилиш ва иқлим ўзгариши вазирлиги дея қайта номланди.

Вазирлик номининг алмашишига президент Мирзиёев томонидан имзоланган “Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида”ги фармон асос бўлган.

Фармонда вазирлик қошида алоҳида юридик шахс мақомига эга бўлмаган Давлат экологик назорат инспекцияси ташкил этилиши, Экология, атроф-муҳитни муҳофаза қилиши ва ўрмон хўжалиги соҳасидаги қонунчиликка риоя этилиши ва унинг ижроси устидан назоратга масъул бўлган Бош прокурор ўринбосари лавозими киритилиши назарда тутилган.

Ҳужжатда жорий йилнинг 1 июлидан “Жамоатчилик экология назоратчиси” тизими жорий қилиниши, 1 декабргача эса шаҳар ва туманларда атмосфера ҳавоси ифлосланиши мониторингини амалга ошириш учун автоматлашган кичик станциялар ўрнатилиши айтилган.

Президент фармонида Миллий табиий мерос объектлари рўйхати жорий этилиши ҳам қайд этилган.

Ўзбекистонда Ижтимоий ҳимоя миллий агентлиги ташкил этилди

Мансурбек Оллаёров янги агентлик ра=бари лавозимига тайинланди. Президент матбуот хизмати фотоси.

Ўзбекистонда президент ҳузурида Ижтимоий ҳимоя миллий агентлиги ташкил этилди. Президент фармони билан Мансурбек Полвонзода Оллоёров президентнинг ижтимоий ҳимоя масалалари бўйича маслаҳатчиси —Ижтимоий ҳимоя миллий агентлиги директори лавозимига тайинланди. Бу ҳақда 1 июнь куни президент матбуот котиби Шерзод Асадов маълум қилди.

Мансурбек Оллоёров мазкур лавозимга тайинлангунига қадар президент Администрацияси Ҳуқуқий экспертиза ва комплекс таҳлил қилиш департаменти раҳбари ўринбосари лавозимида ишлаётганди.

Бунга қадар у президент Администрациясида Ҳуқуқий экспертиза ва комплекс таҳлил қилиш департаменти раҳбарининг ўринбосари сифатида ишлаб келган.

Ижтимоий ҳимоя миллий агентлиги ташкил этилиши тўғрисида президент Шавкат Мирзиёев 30 май куни ўз сайловолди дастури юзасидан сўзлаган нутқида айтган эди.

Унга кўра, агентлик камбағаллик, соғлиқни сақлаш, мактаб таълими, молия, ички ишлар, олий таълим вазирликларидаги ижтимоий хизматларни бирлаштиради.

Агентлик ходимларидан камида 10 фоизи ногиронлиги бўлган шахслар орасидан танлов асосида ишга олинади.

Халқаро меҳнат ташкилоти, БМТ Болалар жамғарнаси - ЮНИСЕФ ва Жаҳон банки ижтимоий ҳимоя агентлиги ташкил этилганини олқишлади.

Ўзбекистонда жорий йилда 15 минг киши ҳажга боради. Ҳаж нархи эълон қилинди

Ўтган йили Ўзбекистондан 12 минг киши ҳажга борган эди.

Жорий йилда Ўзбекистондан ҳаж зиёратига 15 минг киши жўнатилади. Бу ҳақда Дин ишлари бўйича қўмита видеобаёнотида маълум қилинди. Ўтган йили ҳажга бориш квотаси 12 минг киши эди. 2023 йилда квота уч минг кишига кўпайтирилган.

Қўмита ҳар йили ҳаж зиёратига борувчилар сони оширилиши режалаштирилаётгани тўғрисида билдирди.

Жорий йилда бир нафар зиёратчига тўлов миқдори 68 миллион 760 минг сўм этиб белгиланди. Бу ўтган йилдаги нархга нисбатан 6 миллион 140 минг сўмга кўпдир.

Аввалроқ Дин ишлари бўйича қўмита Ўзбекистонда ҳаж мавсуми 4 июндан бошланишини ва 19 июнгача Саудия Арабистонига ҳар куни 4 та авиақатнов амалга оширилишини эълон қилган. Саудиянинг Мадина шаҳрига парвозлар Ўзбекистоннинг 10 шаҳри - Тошкент, Бухоро, Наманган, Фарғона, Самарқанд, Қарши, Термиз, Урганч, Нукус ва Навоийдан амалга оширилади.

Ўзбекистонлик зиёратчиларни Мадина шаҳридаги Zam-zam Pullman, Макка шаҳридаги Roshidiya, Abraj al-Dana, Laba Darna, Ruba al-Hijaz меҳмонхоналарига жойлаштириш режалаштирилмоқда.

1 май куни Дин ишлари бўйича қўмита ҳаж тадбирини ташкил этиш турагентликлар ваколатига кирмаслиги ва улар орқали Саудияга борганларга жазо чоралари қўлланилиши ҳақида огоҳлантирган эди.

Ҳукуматнинг 2017 йил 7 июндаги 364-сонли қарорига асосан Ҳаж ва Умра ибодатларини уюштириш бевосита Дин ишлари бўйича қўмита ва Ўзбекистон мусулмонлари идораси зиммасига юкланган.

Қўмитанинг билдиришича, ҳажга "ноқонуний йўллар билан борганлар" Саудия Арабистонидан депорт қилинади ва уларга Саудияга кириш 10 йилга тақиқланади. Бундан ташқари 100.000 саудия риёли (26.000 АҚШ доллари) миқдорида жарима солинади.

Қозоғистон Ўзбекистонга кўмир экспортини кўпайтиради

Иллюстратив сурат

Қозоғистон 2025 йилдан кейин Ўзбекистонга кўмир экспортини босқичма-босқич кўпайтирмоқчи. Бу ҳақда, Kursiv.kz нашри хабарига кўра, Қозоғистон саноат ва инфратузилмавий ривожланиш вазирининг ўринбосари Иран Шархан маълум қилди.

Мулозимга кўра, 2025 йилдан бошлаб Ўзбекистонга кўмир етказиб бериш босқичма-босқич оширилиб, 12,8 миллион тоннага етказилади. Шархан экспорт йўналишлари кенгайтирилишини ҳам қўшимча қилган.

Нашр қайдича, 2022 йили Қозоғистон ЕОИИга кирмаган мамлакатларга қиймати 701,5 миллион АҚШ долларига тенг бўлган 9,8 миллион тонна кўмир экспорт қилган. Бу кўмирнинг 487,9 минг тоннаси (13,6 миллион долларлик) Ўзбекистонга етказиб берилган.

Аввалроқ Статистика агентлиги Ўзбекистон жорий йилнинг илк чорагида хориждан 45, 2 миллион долларлик кўмир сотиб олгани, бу ўтган йилнинг шу даврига нисбатан 61,7 фоизга кўплиги ҳақида маълумот тарқатган эди.

Global Energy Monitor маълумотига кўра, Ўзбекистон кўмир қазиб олиш бўйича дунё давлатлари орасида 34-ўринда туради. Мамлакатда ҳар йили 4 миллион тоннадан зиёд кўмир қазиб олинади. Бу эса Ўзбекистонда кўмирга бўлган талабнинг саксон фоизини қондиради.

Ўзбекистон конларида 1853 миллион тонна қўнғир кўмир ва 47 миллион тонна қора кўмир мавжуд. Кўмирнинг умумий захиралари 5, 7 миллиард тоннадан кўпроқни ташкил қилади.

Ўзбекистон Шимолий Кореянинг космик ракета учирганига хавотир билдиргани айтилмоқда

Шимолий Корея учирган ракета кўп ўтмай денгизга қулаган.

Ўзбекистондаги интернет нашрлар Ташқи ишлар вазирлиги Шимолий Кореянинг космик ракета учирганига хавотир билдиргани тўғрисида хабар бермоқда. Бироқ Ташқи ишлар вазирлигининг расмий сайтида, ижтимоий тармоқлардаги расмий саҳифаларида, ЎзА миллий агентлиги сайтида бу борада маълумот берилмаган.

Маҳаллий нашрлар вазирлик матбуот котиби Ахрор Бурхоновга тегишли экани айтилаётган ва 180 дан ортиқ обуначиси бўлган Фейсбукдаги саҳифага таянган ҳолда бу ҳақда маълум қилди.

Ахрор Бурхонов Фейсбук саҳифасига жойлаштирилган баёнотда “Ўзбекистон Республикаси Ташқи ишлар вазирлиги 31 май куни Шимолий Корея томонидан ташувчи космик ракета учирилганидан хавотир билдиради. Ушбу ҳолат Корея ярим оролидаги кескинликнинг янада кучайишига олиб келади”, дейилади.

Баёнот давомида Ўзбекистон БМТ Хавфсизлик Кенгаши резолюцияларидан келиб чиқадиган мажбуриятларга мувофиқ оммавий қирғин қуролларининг барча турларини синовдан ўтказишдан бош тортилиши тарафдори экани қайд этилади.

“Ўзбекистон томони бундан кейин ҳам умумий фаровонлик ва тараққиёт йўлида Корея ярим оролида хавфсизликни таъминлаш бўйича фаол қадамларни қатъий қўллаб-қувватлайди", — дейилади Ахрор Бурхоновга тегишли экани айтилаётган Фейсбук саҳифасига жойлаштирилган баёнотда.

31 май куни Шимолий Корея ўзининг биринчи космик разведка ракетасини учиргани, аммо у кўп ўтмай денгизга қулагани хабар қилинган. Шимолий Корея ракета қулаганини тасдиқлаган. Жанубий Корея армияси эса денгиздан ракета қолдиқларини топган.

Шимолий Корея ракетанинг нега қулагани сабаблари аниқланганидан сўнг яна бир парвозни амалга оширишини билдирмоқда.

БМТ Бош котиби Антониу Гутерриш Шимолий Кореянинг бу ҳаракатини қоралаган ва Корея ярим оролидаги вазиятни кескинлаштирмаслик учун музокараларни жонлантиришни таклиф қилган.

Янги Тошкентни қуриш учун 19,7 минг гектар ер ажратилди

Янги Тошкентни қуриш ташаббусини 2021 йилнинг 31 августида президент Шавкат Мирзиёев кўтарган эди.

Тошкент вилоятининг Юқори Чирчиқ ва Ўрта Чирчиқ туманларидан Янги Тошкент учун 19 минг 729,4 гектар ер ажратилди. Вилоят Кадастр агентлигининг маълум қилишича, унинг 12,9 минг гектари қишлоқ хўжалиги ерларидир.

Расман билдирилишича, қурилиш учун ажратилган ерлардан шу кунгача 772 субъект фойдаланиб келаётган эди. Жумладан, қишлоқ хўжалик ерлари 242 та фермер хўжалигига, 49 та ёрдамчи хўжаликлар ва иссиқхоналарга, 100 та деҳқон хўжалигига тегишли бўлган.

Янги Тошкентни қуриш ташаббусини 2021 йилнинг 31 августида президент Шавкат Мирзиёев кўтарган эди. Мирзиёевнинг режасига кўра, Янги Тошкент Тошкент вилоятида Чирчиқ ва Қорасув дарёлари оралиғига қурилиши лозим. Янги Тошкентга пойтахтдаги давлат идоралари кўчирилади, Тошкент шаҳри эса “яшил ҳудуд”га айлантирилади.

Янги Тошкент лойиҳаси доирасида 20 минг гектар ерда 1 миллион аҳоли учун турар-жой бинолари, жумладан, биринчи босқичда 60 минг кишига мўлжалланган кўп қаватли уйлар, 30 та мактаб, 20 та болалар боғчаси, касалхона ва 5 та поликлиника қурилиши назарда тутилган.

АҚШга бормоқчи бўлган ўзбекистонликлар 17 июндан эътиборан виза учун кўпроқ ҳақ тўлайди

Иллюстратив сурат

АҚШнинг Тошкентдаги элчихонаси виза талаби билан мурожаат қиладиган ўзбекистонликлар учун маъмурий тўлов миқдори ўзгарганини эълон қилди.

Элчихона телеграм канали орқали тарқатилган хабарномага мувофиқ, АҚШ туристик виза тоифасига ҳамда петиция талаб этмайдиган ноиммиграцион виза турлари бўйича мурожаат этувчилар жорий йилнинг 17 июнидан бошлаб аввалгидек 160 доллар эмас, балки 185 доллардан ҳақ тўлайдилар.

Петиция асосида бўлган (H, L, O, P, Q ва R) виза тоифаларига мурожаат этувчилар учун маъмурий тўлов миқдори 190 АҚШ долларидан 205 АҚШ долларига кўтарилади”, дейилган АҚШ элчихонаси хабарномасида.

Давомини ўқинг

XS
SM
MD
LG