Линклар

Шошилинч хабар
30 май 2023, Тошкент вақти: 23:29

Ўзбекистон хабарлари

Толибон Амударёдан сув оладиган Қўштепа каналини “Ўзбекистон билан ҳамжиҳат қуриши”ни билдирди

Толибон ҳукумати бош вазирининг ўринбосари вазифасини бажарувчи Мулла Абдул Ғани Бародар

Толибон ҳукумати бош вазирининг ўринбосари вазифасини бажарувчи Мулла Абдул Ғани Бародар Кобулга келган Ўзбекистон делегацияси билан музокаралар натижалари тўғрисида маълумот берар экан, сув-энергетика ресурсларидан фойдаланиш масаласига алоҳида эътибор қаратди.

Бародарнинг твиттер саҳифасида ёзишича, музокаралар чоғида Ўзбекистон томони “Қўштепа каналини қуриш бўйича техник ҳамкорликка тайёр эканини билдирган”.

Бародар эса бунга жавобан “Афғонистон Амударёдан сув оладиган Қўштепа каналини Ўзбекистон билан ҳамжиҳат бўлиб барпо этишга ҳозирлиги”ни айтган.

Ўзбекистон делегацияси Афғонистон Қўштепа каналини қурар экан, Амударёдан сув олишда халқаро ҳуқуқ меъёрларига амал қилиши зарурлигини эслатган ва бу қурилишни поёнига еткашида ҳамкорлик қилишга тайёрлигини маълум қилган.

Бародар Ўзбекистон делегациясини “Кўштепа каналининг қурилиши икки томонлама муносабатларни мустахкамлашга хизмат қилишига ишонтирган”.


Аввалроқ Ўзбекистон Ташқи ишлар вазирлиги президентининг ташқи сиёсат масалалари бўйича махсус вакили Aбдулазиз Комилов бошчилигидаги делегация 22 март куни Кобулда Толибон ҳукумати расмийлари билан учрашгани тўғрисида хабар қилинганди.

Хабарда “учрашувлар доирасида сув-энергетика соҳасидаги ҳамкорлик масалаларига алоҳида эътибор қаратилгани” айтилган, аммо унинг тафсилотлари ошкор қилинмаганди.

Ўзбекистон 2021 йилнинг 15 августида Кобулни эгаллаб, ҳокимиятни босиб олган Толибон ҳукумати билан ҳамкорлик қилиб келаётган жаҳондаги бармоқ билан санарли давлатлардан биридир.

Толибон ҳаракати томонидан шакллантирилган ҳукумат шу кунгача халқаро ҳамжамият томонидан тан олинган эмас.

Кун янгиликлари

Мирзиёев ЎзЛиДеПдан президентликка номзод ўлароқ кўрсатилди

Ўзбекистоннинг амалдаги президенти Шавкат Мирзиёев 2016 ва 2021 йилларда ўтказилган президент сайловларида ҳам ЎзЛиДеПдан номзод ўлароқ кўрсатилган эди

Ўзбекистон Либерал-демократик партияси амалдаги президент Шавкат Мирзиёевни муддатидан илгари президент сайловига номзод ўлароқ кўрсатди. Партия матбуот хизмати маълумотига кўра, президент сайловига номзод кўрсатиш ЎзЛиДеПнинг 30 май куни Тошкент шаҳрида бўлиб ўтган XI съездида амалга оширилган.

Съездда президентликка номзод Шавкат Мирзиёев сайлов дастурининг асосий йўналишлари билан таништирган.

Мирзиёев ўз дастурининг ҳар бир инсонга ўз салоҳиятини рўёбга чиқариш учун муносиб шароит яратиш, одамларни ҳаётдан рози қилиш учун барқарор иқтисодий ўсишни таъминлаш, сув ресурсларини тежаш ва атроф-муҳитни муҳофаза қилиш, қонун устуворлигини таъминлаш, халқ хизматидаги давлат бошқарувини ташкил этиш ҳамда Янги Ўзбекистон хавфсиз ва тинчликсевар давлат каби бешта мақсаддан иборат эканини очиқлаган.

Хабарномада съезд қарори билан партия қонунда белгиланган тартибда Ўзбекистон президентлигига ўз номзодини рўйхатга олишни сўраб Марказий сайлов комиссиясига мурожаат этиши қайд этилган.

Ўзбекистонда муддатидан илгари президент сайлови жорий йилнинг 9 июлига белгиланган. Таҳлилчилар 40 кундан сўнг ўтказилажак натижаси олдиндан маълум сайловда катта фарқ билан Мирзиёев ғалаба қозонишига шубҳа қилишаётгани йўқ.

Аввалроқ “Миллий тикланиш” партияси президент сайлови бўйича Шавкат Мирзиёев номзодини қўллаб-қувватлашини билдирган. Айни пайтда “Адолат” партияси Робахон Маҳмудовани, Халқ демократик партияси Улуғбек Иноятовни, Экологик партия эса Абдушукур Ҳамзаевни президентликка номзод қилиб кўрсатган.

ЎМИ ижтимоий тармоқлар орқали жума табриги йўллаш тақиқлаганига оид хабарларни рад этди

Ўзбекистонда ижтимоий тармоқлар орқали жума табрикларини тарқатишга рухсат этилган. Бу ҳақда маълумот тарқатган Ўзбекистон мусулмонлари идораси матбуот хизмати ўз хабарномасида ЎМИнинг расмий веб-сайтлари, масжид-мадрасалар, иқтидорли имом-хатибларнинг сайт ва ижтимоий тармоқ саҳифаларини мутолаа қилиш ҳамда улардаги маълумотларни яқинларига улашиш мумкинлигини урғулаган.

Диний идора қайдича, ижтимоий тармоқлардаги жума табриги, Қуръон оятлари, пайғамбар ҳадислари, мамлакат уламолари ва имом-домлаларининг мавъизаларини тарқатиш мумкин эмаслигига оид иддао асоссиз.

2021 йил 5 июлдаги “Ўзбекистон Республикасининг Виждон эркинлиги ва диний ташкилотлар тўғрисида”ги қонунига асосан эътиқод эркинлиги кафолатланган. Шунга кўра, фуқаролар динга эътиқод қилиш, диний расм-русумлар ва маросимларни ўтказиш ҳамда ўз динининг таълимотларини ўрганиш ҳақ-ҳуқуқига эгадир”, дейилган хабарномада ўзбекистонлик мусулмонлар “расмий, ишончли ижтимоий тармоқлардаги диний-маърифий мазмундаги барча маълумотларни мутолаа қилишлари ҳамда яқинларига улашишлари мумкин”лиги урғуланади.

ЎМИ мусулмонлар фойдаланиши мумкин бўлган ресурслар қаторида “расмий ва етакчи электрон манбалар рўйхати”ни келтирган. Бунинг баробарида Диний идора “экстремистик ғояларни ҳар қандай шаклда – хоҳ жума табриги бўлсин, хоҳ бошқача атрибут ёки сурат шаклида бўлсин – тарқатиш, сақлаш ва фойдаланиш қонунан таъқиқланган”идан огоҳлантирган ҳамда аввалроқ Олий суднинг Ўзбекистонда тақиқланган экстремистик сайт ва ижтимоий тармоқлардаги профиль, канал ва гуруҳлар рўйхати борлигини эслатган.

Айни пайтда хабарномада ЎМИ томонидан тавсия этилган расмий манбалар рўйхатида бўлмаган, Олий суднинг тақиқланган сайт, гуруҳ ва профиллар рўйхатига ҳам кирмаган сайт ёки профиллардаги диний контентдан фойдаланиш мумкин ёки эмаслигига аниқлик киритилмаган. Шундан келиб чиққан ҳолда, хабарномадан ўзбекистонлик мусулмонларга диний блогерлар ёки алоҳида имомлар тарқатаётган контентдан фойдаланиш мумкин ёки эмаслиги англашилмай қолган.

Аввалроқ Ўзбекистонда танишларига нашида йўллагани учун бир неча нафар ёш йигитнинг судланиб, қамалгани қайд этилган, бу ҳолат ортидан ижтимоий тармоқларда қандай диний контент тарқатиш мумкин ёки эмаслиги, бу каби чекловлар диний эркинликни кафолатловчи қонунларга нақадар мувофиқлиги юзасидан баҳс-мунозаралар келиб чиққан эди.

Қашқадарёда икки блогер ва бир журналист 5 суткага қамалди

Иллюстратив сурат.

Қашқадарё вилоят жиноят ишлари бўйича Шаҳрисабз шаҳар суди блогерлар А. Абдуллаев, М. Музаффаров ва Nasaf News сайти раҳбари У. Каримовни майда безориликда айбдор деб топди. Суд қарори билан уларнинг ҳар бири 5 суткага қамалди.

Расман билдирилишича, 29 май куни соат 10:20 ларда Шаҳрисабз шаҳар ИИБ ЙҲХБ биноси олдига автомашинада келган А. Абдуллаев, М. Музаффаров ва У. Каримов "ЙҲХБ бошлиғи Ф. Янгибоевда шубҳа уйғотган". У блогерлар олдига чиқиб, ҳужжатларни сўраган. А. Абдуллаев машина ўзига тегишли эканини айтиб, бошлиққа паспортини кўрсатган, аммо машинаси ҳужжатларини кўрсатишдан “бош тортган”.

Шундан кейин Янгибоев автомашинани жарима майдонига жойлаштирмоқчи бўлганида, “А. Абдуллаев, М. Музаффаров ва У. Каримов ИИБ ходимларига нисбатан қўполлик қилиб, уларга ҳурматсизлик ва беписандлик қилиб, уларга сенсираб мурожаат қилиб, жанжал қила бошлаган”.

Суднинг иддао қилишича, улар воқеа жойига етиб келган Шаҳрисабз шаҳар ИИБ бошлиғининг ўринбосари Ж. Рауповни ҳам “фуқаролар олдида обрўсизлантирганлар”.

Бу уч киши ўша куниёқ ушланиб, уларнинг иши судга оширилган ва жиноят ишлари бўйича Шаҳрисабз шаҳар суди блогерларга 5 суткадан қамоқ жазоси белгилаган.

Ушбу воқеа юзасидан ҳозирча мустақил манбалар ҳеч қандай муқобил ахборот тарқатган эмас. Қамалган блогерларнинг ўзлари ва яқинлари ҳам суднинг бу қарорига муносабат билдирмади.

27 май куни Қашқадарё вилояти Яккабоғ туманида блогер Элмурод Одилов ҳам Маъмурий жавобгарлик кодексининг 183-моддаси (майда безорилик) ва 198-моддаси (ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилиш) 1-қисми билан 15 суткага қамалганди.

Маҳаллий нашрларнинг ёзишича, блогер Яккабоғ тумани ҳокими ўринбосари Фозил Хидиров пилла омборхонасида ўтказаётган йиғилишни ёритишга урингани ортидан қўлга олинган.

Мазкур йиғилишда Хидиров ёшлар етакчиларига бир ойлик ҳарбий хизматга шартнома пулини тўлаган ҳолда бир кишини жалб қилишга буйруқ берган. Бу ишни амалга оширмаганлар ишдан бўшатилишини айтган.

Хоразм суди: 3-синф ўқувчиларига шилқимлик қилган ўқитувчига “энг қаттиқ жазо берилди”

Хоразм вилоят суди Nemolchi.uz лойиҳасининг Хонқа туманидаги мактаблардан бирида 3-синф ўқувчиларига шаҳвоний шилқимлик қилган ўқитувчига ўта енгил жазо белгилангани тўғрисидаги норозилигига жавоб қайтарди.

Хоразм вилоят судлари матбуот хизматининг билдиришича, Жиноят ишлари бўйича Хонқа туман судининг 2023 йил 25 май кунги қарорига асосан, 3-синф ўқувчилари С.К., ва М.Э.,ларга дарс пайтида шахвоний шилқимлик қилган 1962 йилда туғилган рус тили ўқитувчиси Б.Р.,га МЖтКнинг 41¹-моддаси 1-қисми билан 5 сутка маъмурий қамоқ жазоси тайинланган.

Расмий муносабатда таъкидланишича, мазкур модда асосида айбланувчига базавий ҳисоблаш миқдорининг 2 бараваридан 5 бараваригача миқдорда жарима ёки 5 суткагача муддатга маъмурий қамоқ жазоси назарда тутилган.

“Жиноят ишлари бўйича Хонқа туман суди томонидан ҳуқуқбузар Б.Р.га мазкур модда санкциясида назарда тутилган максимал жазо, яъни 5 сутка маъмурий қамоқ жазоси тайинланган”, дейилади вилоят суди баёнотида.

Nemolchi.uz 27 май куни Хонқа туман судининг бу қарорига телеграм канали орқали норозилик билдирган эди. Nemolchi.uz лойиҳаси судда мазкур иш нотўғри квалификация қилинган, деган нуқтаи назарни олға сурмоқда.

“Бундай жиноятлар ЖК 129-моддаси 2-қисми "б", "в" ва "ж" бандлари билан квалификация қилиниши лозим. Бунинг учун жазо эса 3 йилдан 5 йилгача озодликни чеклаш ёки ўқитувчилик фаолияти билан шуғулланишни тақиқлаган ҳолда 3 йилдан 5 йилгача озодликдан маҳрум қилишни назарда тутиши керак”, дейилади Nemolchi.uz баёнотида.

Ёқилғи-энергетика ресурсларидан фойдаланишни назорат қилиш учун прокурорлар сони кўпайтирилди

Президент Шавкат Мирзиёевнинг 26 майдан кучга кирган ёқилғи-энергетика ресурсларидан фойдаланишни назорат қилиш тўғрисидаги фармонига асосан прокуратура ходимлари сони 755 нафарга кўпайтирилди. Фармон Қонунчилик маълумотлари миллий базасида эълон қилинди.

Фармонга асосан, прокуратура ходимлари сони ёқилғи-энергетика ресурсларидан фойдаланиш устидан назоратни амалга оширишини таъминлаш мақсадида кўпайтирилмоқда. Жумладан, прокуратура бошқарув ходимлари сони 691 нафарга кўпайтирилади. Бу билан прокуратура бошқарув ходимлари ҳозирги 4195 дан 4886 нафарга етади.

Бош прокуратурада прокурор-терговчилар сони 64 нафарга оширилади ва жами 316 нафарни ташкил қилади. Бундан ташқари яна битта бош прокурор ўринбосари лавозими жорий этилади.

Мазкур фармон билан 1 сентябрдан ёқилғи-энергия соҳасида кузатилаётган ҳуқуқбузарликларни фотосуратга ва видеога олиб Энергетика вазирлигининг интернетдаги махсус ахборот тизимига юборганларга пул мукофоти берилади. Фармонда пул мукофотининг миқдори белгилаб берилмаган.

Чилонзордаги ички ишлар бўлимида 21 ёшли йигит ҳалок бўлди

Иллюстратив сурат.

Тошкент шаҳар Чилонзор туман ИИО ФМБга 22 май куни олиб келинган 21 ёшли сурхондарёлик йигитнинг ўлими юзасидан прокуратура текширув ўтказмоқда, деб билдирди 29 май куни Бош прокуратура матбуот котиби Ҳаёт Шамсутдинов.

Ички ишлар вазирлигининг 29 майда маълум қилишича, Ҳ.Т., исмли фуқаро шубҳали кўрингани учун 22 май куни эрталаб Чилонзор тумани ИИО ФМБга олиб келинган ва унинг ёнидан 53,52 грамм наша топилган. Мазкур ҳолат юзасидан Ҳ.Т.,га нисбатан жиноят иши қўзғатилган.

Вазирлик билдирувида 22 май куни тахминан соат 18.50 ларда Ҳ.Т., ҳожатхонага киришга рухсат сўрагани ва 4-қаватдаги ҳожатхона деразасидан “пастга сакраши натижасида бош ва тана қисмидан турли жароҳатлар олган”и қайд этилади.

Касалхонага ётқизилган йигитга “бош мия ёпиқ жароҳати, бош мия лат ейиши, бош суягини синиши, тана аъзоларининг гематомаси ташхиси қўйилган. 29 май куни Ҳ.Т., касалхонада вафот этган”.

Kun.uz йигитнинг яқинига таянган ҳолда, унинг исми Ҳафизуллоҳ Турғунбоев эканини аниқлади. Марҳумнинг яқини нашрга берган суҳбатида Ҳафизуллоҳ Турғунбоев ўзини “4-қаватдаги ҳожатхона деразасидан ташлаганига ишонмаслиги”ни айтган:

“Ҳафизуллоҳ танасининг бирорта ҳам қисми – на оёғи ва на қовурғаси синган бўлган, балки фақатгина юзи ва бош қисмида жароҳат излари бўлган. Наҳотки 4-қаватдан тушиб кетган инсонни ҳаттоки қўли ҳам синмаса. Бундан ташқари, ИИБ ходимлари унинг оёғи синганини айтганди.

Ҳафизуллоҳнинг гавдаси ҳам каттагина эди, у қандай қилиб ҳожатхона ойнасидан сиғиб кетиши мумкинлигига ҳам ҳайронман. Боз устига ҳожатхона ички ишлар биносида бўлса. Шифокорлардан қандайдир шубҳангиз борми, десам, фикримни фақат судда айтаман, дейишди”,
деган марҳумнинг яқини Kun.uz сайтига.

Ўзбекистон Қирғизистон билан чегарадаги деворни бузди

Ижтимоий тармоқларда тарқалган видеодан скриншот.

Ўзбекистон Қирғизистон билан чегарадаги деворни бузгани тўғрисида Қирғизистон Чегара хизматига таянган ҳолда Бишкекдаги Kaktus.media нашри хабар қилди.

Аввалроқ ижтимоий тармоқларда Ўзбекистон икки давлат чегарасига 2010 йилда бир томонлама қурилган деворни бузаётгани тўғрисидаги видео пайдо бўлган эди. Қирғизистон Чегара хизматининг билдиришича, мазкур видео Жалолобод ва Андижон вилоятлари ўртасидаги “Бекобод-Хонобод” чегара пунктида тасвирга олинган.

Хабарда айтилишича, мазкур девор “Бекобод-Хонобод” чегара пункти фаолиятини қайта тиклаш мақсадида бузилган. “Тез кунларда бу чегара пункти очилади. Қирғизистон томони мазкур пунктдан аҳолини ўтказишни амалга оширишга тайёр”, деб билдирган Чегара хизмати.

Бундан ташқари Ўш ва Андижон вилоятлари ўртасидаги “Қорасув” ва “Қорабағиш” чегара назорат ўтказиш пунктлари фаолияти ҳам тикланиши режалаштирилмоқда.

Хабарда таъкидланишича, бу чегара назорат ўтказиш пунктларини очиш масаласи икки давлат ҳукуматлари томонидан бир неча йиллардан бери муҳокама қилиб келинаётган эди.

Ўзбекистон томони ҳозирча “Бекобод-Хонобод” чегара пунктидаги девор бузилгани, “Қорасув” ва “Қорабағиш” пунктлари ҳам очилиши юзасидан расман маълум қилмади.

29 май куни Озодлик Самарқандда Ўзбекистон ва Қирғизистон ҳукумат делегациялари давлат чегараси демаркацияси бўйича норматив-ҳуқуқий ва техник ҳужжатларни тасдиқлашгани тўғрисида хабар берган эди.

Ўзбекистон билан Қирғизистон ўртасидаги 1314 километрли чегара чизиғи тўлиқ аниқлаб бўлинган. 2022 йил ноябрида Тошкент ва Бишкек чегара бўйича 30 йилдан буён давом этиб келаётган баҳсларга нуқта қўйилганини билдиришган.

Ўзбекистон ва Қирғизистон делегациялари чегара демаркациясига оид ҳужжатларни тасдиқлашди

Ўзбек-қирғиз чегарасидаги ўзбекистонлик чегарачилар (архив сурати)

Самарқандда Ўзбекистон ва Қирғизистон ҳукумат делегацияларининг ўзбек-қирғиз чегараси демаркацияси бўйича музокаралари бўлиб ўтди, дея маълумот тарқатди Қирғизистон Вазирлар Маҳкамаси матбуот хизмати.

Қайд этилишича, қўшма демаркацион комиссиянинг илк йиғилишида чегаранинг айрим участкаларидаги биргаликдаги дала тадқиқотлари натижалари муҳокама этилган.

Қирғизистон ҳукумати маълумотига кўра, учрашув якунида томонлар давлат чегараси демаркацияси бўйича норматив-ҳуқуқий ва техник ҳужжатларни тасдиқлашган.

Ўзбекистон билан Қирғизистон ўртасидаги чегара 1314 километрга узанган. 2022 йил ноябрида Тошкент ва Бишкек чегара бўйича 30 йилдан буён давом этиб келаётган баҳсларга нуқта қўйилганини билдиришган. Томонлар чегаранинг аниқланмаган 312 километри (15%) бўйича ўзаро муросавий битимга келишган.

Ўшанда ҳар икки мамлакат парламентлари Ўзбекистон билан Қирғизистон ўртасидаги чегаранинг айрим участкалари делимитациясига оид шартнома ҳамда Андижон (Кампиробод) сув омбори тўғрисидаги битимни ратификация қилиш тўғрисидаги қонун лойиҳаларини маъқуллашган, шундан сўнг икки мамлакат президентлари мазкур қонунларни имзолашган.

Ўзбекистон президенти Шавкат Мирзиёев жорий йил январь ойида давлат ташрифи билан Бишкекка келганида у билан қирғизистонлик ҳамкасби Садир Жапаров ўртасида Давлат чегарасининг алоҳида участкалари тўғрисидаги шартноманинг ратификация ёрлиқларини алмашилган.

Икки давлат ўртасида чегара бўйича тузилган битимнинг Андижон сув омбори остидаги ерларни бошқа участкаларга алмаштириш йўли билан Ўзбекистонга берилиши Қирғизистондаги қатор жамоатчилик фаоллари норозилигига сабаб бўлган. Бу норозилик ортидан қўзғатилган жиноят иши доирасида мамлакатда 30 чоғли сиёсатчи ва фаол ҳибсга олинган.

Украинада ҳалок бўлган яна бир ўзбекистонликнинг жасади ватанига келтирилди

Февраль ойида Озодлик Москва вилоятида "Вагнер" ХҲШ сафида жанг қилганлар дафн этилган қабристонни топган эди. Бу ерда Украина урушида ўлган марказий осиёликлар ҳам дафн этилган.

Украинадаги урушда Россия томонида жанг қилган 23 ёшли ўзбекистонлик Ш. Тожибоевнинг жасади ватанига келтирилди. Бу ҳақда Ўзбекистон Давлат хавфсизлик хизмати маълум қилди. Айрим маҳаллий нашрларнинг ёзишича, Тожибоев Наманган вилоятининг турғуни бўлган.

ДХХ тарқатган видеода Тожибоевнинг онаси ногирон бўлган ўғли оиласини боқиш учун Россияга иш излаб кетишга мажбур бўлгани тўғрисида гапириб берди. Онанинг айтишича, Тожибоев наркотик савдосида айбланиб қамоқда жазо муддатини ўтаётганида мажбурий равишда Украинадаги урушга олиб кетилган. Сўнгги марта она ўғли билан ўтган йилнинг 10 сентябрида телефон орқали гаплашган.

Онанинг видеода айтишича, у ўғлининг жасадини ўзи бориб олиб келган. Жасаднинг фақат белдан юқори қисми сақланиб қолган.

Ш. Тожибоев Украинадаги урушда ҳалок бўлган ягона ўзбекистонлик эмас. Февралда Озодлик Самарқанд вилояти Булунғур туманига Украинада ўлган икки нафар ўзбек йигитининг жасади олиб келингани тўғрисида хабар берган.

Март ойида ДХХ Қорақалпоғистоннинг Элликқаъла туманида туғилган Ўзбекистон фуқароси Россиядаги қамоқхонада жазо муддатини ўтаётганида Украина урушига жалб қилингани ва унинг ҳалок бўлгани ҳақида маълум қилган.

Майнинг бошларида Британия Мудофаа вазирлиги Россия ҳукумати марказий осиёлик меҳнат мигрантларини Украина урушига ёллаётгани тўғрисидаги маълумотларни эълон қилган эди. Олдинроқ эса «Вагнер» хусусий ҳарбий ширкати қамоқхоналарда ётган маҳкумларни ҳам урушга ёллаётгани тўғрисида хабарлар берилган.

Самарқандда ватандошларини Мексика орқали АҚШга жўнатмоқчи бўлган шахс ушланди

Мексика-АҚШ чегарасидаги мигрантлар. 10 май, 2023

Самарқандда ватандошларини 30 минг доллар эвазига Мексика орқали АҚШга жўнатишга ваъда берган шахс қўлга олингани ҳақида вилоят Ички ишлар бошқармаси 28 май куни маълум қилди.

Расман билдирилишича, Самарқанд ИИБга 22 ёшли шахс мурожаат қилган. У Самарқанд шаҳринг Али Қушчи кўчасида яшовчи шахс ватандошларини АҚШга Мексика орқали ноқонуний равишда жўнатиш билан шуғулланиб келаётганини билдирган.

Маълум қилинишича, мазкур шахс аввал ўз мижозларини Европа орқали Мексикага жўнатиб, кейин АҚШга ўтказиб қўйиш учун ҳар бир кишидан 30 минг доллардан талаб қилган. У бу пулнинг 10 минг долларини олдиндан бериш лозимлигини шарт қилиб қўйган.

Вилоят ИИБ Жиноят-қидирув бошқармаси Уюшган жиноятчиликка қарши курашиш бўлими ўтказган тезкор тадбирда бу шахс қўлга олинган. Ҳолат юзасидан Жиноят кодексининг 168-моддаси (фирибгарлик) асосида жиноят иши очилган.

19 май куни Озодлик радиоси “ "Америка орзуси"да. Марказий осиёлик мигрантлар Мексика чегарасига оқиб келмоқда” сарлавҳали мақолани эълон қилган эди. Унда Марказий Осиёнинг барча давлатларидан АҚШга ноқонуний ўтиш учун Мексикага юзлаб мигрантлар келаётгани ҳақида гап боради.

АҚШда май ойида кучга кирган янги қоидаларга кўра, муҳожирлар мамлакатга киришга уринишдан олдин бошпана сўраб онлайн ариза топширмаган бўлсалар ёки АҚШга етиб боришдан олдин бошқа мамлакатлардан бошпана сўрамаган бўлсалар, чегарадан қайтарилишлари мумкин.

АҚШга ноқонуний ўтганлар депортация қилинади ва мамлакатдан беш йилга бадарға этилади.

Теҳрон – Пекин йўналиши бўйича парвоз қилаётган самолёт Тошкент аэропортига фавқулодда қўнди

Mahan Air ширкатининг Теҳрон — Пекин йўналиши бўйича учаётган IRM079 рейси. Uzbekistan Airports матбуот хизмати фотоси.

Mahan Air ширкатининг Теҳрон — Пекин йўналиши бўйича учаётган IRM079 рейси 28 май куни маҳаллий вақт билан соат 23:20 да Тошкент аэропортига фавқулодда қўнишга мажбур бўлди. Бу ҳақда 29 май куни Uzbekistan Airports матбуот хизмати маълум қилди.

Самолётнинг фавқулодда қўнишига йўловчилардан бирининг юрак хуружига учрагани сабаб бўлган. Йўловчининг аҳволи оғирлашгани ортидан экипаж муқобил аэродромга қўнишга қарор қилган.

Самолёт Тошкент аэропортга қўнганидан сўнг юрак ҳуружига учраган йўловчи “Тез ёрдам”да касалхонага олиб кетилди. Тахминан соат 00:40 да самолёт Тошкентдан Пекинга учиб кетди.

Диний қўмита Ўзбекистонда Ҳаж мавсуми 4 июндан бошланишини билдирди

Мадинага парвозлар Ўзбекистоннинг 10 та аэропортидан амалга оширилади.

Ўзбекистонда Ҳаж мавсуми 4 июндан бошланади. 4 июндан 19 июнгача Саудия Арабистонига ҳар куни 4 та авиақатнов амалга оширилади. Бу ҳақда Дин ишлари бўйича қўмита маълум қилди.

Билдирувда таъкидланишича, Саудиянинг Мадина шаҳрига парвозлар Ўзбекистоннинг 10 шаҳри - Тошкент, Бухоро, Наманган, Фарғона, Самарқанд, Қарши, Термиз, Урганч, Нукус ва Навоийдан амалга оширилади.

“Ҳаж-2023 мавсумига тайёргарлик ишларини амалга ошириш мақсадида дастлабки ишчи гуруҳ Саудия Арабистонига жўнаб кетган ва айни пайтда улар томонидан барча ташкилий ва амалий саъй-ҳаракатлар олиб бормоқда”,-дейилади расмий билдирувда.

Ўзбекистонлик зиёратчиларни Мадина шаҳридаги Zam-zam Pullman, Макка шаҳридаги Roshidiya, Abraj al-Dana, Laba Darna, Ruba al-Hijaz меҳмонхоналарига жойлаштириш режалаштирилмоқда.

Сафар олдидан зиёратчилар билан уламолар ва элликбошилар ўқув машғулотлари ўтказади. машғулотларда Ҳаж амалининг фазилати, рукнлари, сафарга тайёргарлик кўришда нималарга эътибор бериш кераклиги ҳақидаги масалалар баён этилади. Шунингдек, ҳаж ибодатининг одоблари ва тартиб-қоидалари ҳам тушунтирилади.

1 май куни Дин ишлари бўйича қўмита Ҳаж тадбирини ташкил этиш турагентликлар ваколатига кирмасли ва улар орқали Саудияга борганларга жазо чоралари қўлланилиши ҳақида огоҳлантирган эди.

Ҳукуматнинг 2017 йил 7 июндаги 364-сонли қарорига асосан Ҳаж ва Умра ибодатларини уюштириш бевосита Дин ишлари бўйича қўмита ва Ўзбекистон мусулмонлари идораси зиммасига юкланган.

Қўмитанинг билдиришича, Ҳажга "ноқонуний йўллар билан борганлар" Саудия Арабистонидан депорт қилинади ва уларга Саудияга кириш 10 йилга тақиқланади. Бундан ташқари 100.000 саудия риёли (26.000 АҚШ доллари) миқдорида жарима солинади.

Яккабоғда блогер Элмурод Одилов 15 суткага қамалди

Блогер Элмурод Одилов "фермерларни ҳақорат қилганликда" айбланди. Фото блогернинг шахсий архивидан олиниб "Дарё" нашрида эълон қилинган.

Қашқадарё вилояти Яккабоғ туманида блогер Элмурод Одилов 27 май куни Маъмурий жавобгарлик кодексининг 183-моддаси (майда безорилик) ва 198-моддаси (ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилиш) 1-қисми билан 15 суткага қамалди. Бу ҳақда Олий суд маълум қилди.

Вилоят Ички ишлар бошқармасининг иддао қилишича, Элмурод Одилов 26 май куни тахминан соат 22:30 атрофида Яккабоғ тумани “Ибн Сино” маҳалласидаги пилла омборхонасига келиб, “фермерлар ишига аралашган ва уларни ҳақорат қилган”. Фермерлар блогер устидан Яккабоғ туман ички ишлар бўлимига арз қилган.

“Daryo” нашри эса 27 майда Одилов пилла пунктида Ички ишлар ходимлари томонидан “аёвсиз калтаклангани” тўғрисида ёзган эди.

Нашр манбаларининг билдиришича, блогер Яккабоғ тумани ҳокими ўринбосари Фозил Хидиров пилла омборхонасида ўтказаётган йиғилишни ёритишга уринган.

Мазкур йиғилишда Хидиров ёшлар етакчиларига бир ойлик ҳарбий хизматга шартнома пулини тўлаган ҳолда бир кишини жалб қилишга буйруқ берган. Бу ишни амалга оширмаганлар ишдан бўшатилишини айтган.

Ички ишлар вазирлиги матбуот котиби Шоҳрух Ғиёсов эса Элмурод Одиловнинг қамалишини шарҳлар экан: “Бировнинг пулини олиб, жамоатчилик назоратини суиистеъмол қилган ва жанжал эвазига мавҳум манфаатларга эришмоқчи бўлган блогер суд қарори билан шу тарзда жазоланган”, деб муносабат билдирди.

Uzbekistan Airways уч йиллик танаффус ортидан Урумчига рейслар тикланаётганини очиқлади

Иллюстратив сурат

Uzbekistan Airways авиаширкати жорий йилнинг 30 июнидан Тошкент билан Урумчи шаҳри ўртасидаги мунтазам ҳаво қатновини тиклайди. Бу ҳақда авиаширкат матбуот хизмати маълумот тарқатди.

Қайд этилишича, Тошкент — Урумчи — Тошкент қатнови ҳафтанинг жума ва шанба кунлари амалга оширилади.

Хабарномада чипта нархи Тошкент — Урумчи йўналиши бўйича 2 миллион 738 минг сўмдан, Тошкент — Урумчи — Тошкент йўналиши бўйича эса 4 миллион 867 минг сўмдан бошланиши билдирилган.

Шинжондаги Урумчи шаҳрига Ўзбекистондан парвозлар коронавирус пандемияси туфайли 2020 йил март ойидан тўхтатилган эди.

Фарғонада номаълум шахслар қонунга хилоф равишда 12 туп дарахтни қўпориб ташлашди

“Андархон” чегара маскани яқинида қўпорилган дарахтлар (Табиат ресурслари вазирлиги Фарғона вилоят бошқармаси фотоси)

Фарғона вилоятининг Бешариқ тумани “Андархон” чегара маскани яқинида номаълум шахслар томонидан 12 туп дарахтни илдизи билан қўпориб ташланган.

Табиат ресурслари вазирлиги Фарғона вилоят бошқармаси матбуот хизмати маълумотига кўра, ҳолат юзасидан ўтказилган ўрганиш чоғида 3 туп тол ва 9 туп арча дарахти қўпорилгани, натижада ўсимлик дунёсига қарийб 100 миллион сўм миқдорида зарар етказилганлиги аниқланган.

Ҳозирда ҳуқуқбузарлар шахсига ойдинлик киритиш ва ҳуқуқий баҳо бериш учун тўпланган ҳужжатлар вилоят прокуратурасига тақдим этилди”, дейилган бошқарма хабарномасида чегара маскани яқинидаги дарахтларга махсус техника ёрдамида қирон келтирган бу ҳуқуқбузарларнинг шахси аниқланган-аниқланмагани айтилган эмас.

Ўзбекистон президенти томонидан 2021 йил 31 декабрь куни имзоланган фармонга мувофиқ, мамлакатда давлат ўрмон фондига кирмайдиган дарахтлар ва буталар қимматбаҳо навларининг кесилишига мораторийнинг амал қилиши муддатсиз даврга узайтирилган. Дарахтларни ҳар қандай ҳолатда кесиш ёки йўқ қилиш тўғрисида ҳукумат фармойишлари ва ҳокимлар қарорларини қабул қилиш ҳам тақиқланган.

Давомини ўқинг

XS
SM
MD
LG