Линклар

Шошилинч хабар
26 январ 2021, Тошкент вақти: 02:30

Халқаро хабарлар

Ироқнинг Мосул шаҳрида АҚШ ҳарбийлари бир уйни бузиб кирмоқчи бўлганлар, лекин қаршиликка учраганлар.

АҚШ ҳарбийсининг билдиришича, уйда қидирилаётган одамлар яширинган.
Икки тараф ўртасида отишма бошланган. Натижада бир ироқлик ўлдирилган. Бир неча одам жароҳатланган.
Ироқ шимолида ракета ҳужуми натижасида бир АҚШ аскари ҳалок бўлган, яна бири тан жароҳатлари олган.
Қизил хоч Халқаро қўмитаси маълум қилишича, Бағдодда қўмитанинг бир ходими номаълум кишилар томонидан отиб ўлдирилган. Ироқлик ҳайдовчи яраланган.

Кун янгиликлари

Мексика президенти коронавирусга чалинди

Мексик президенти Андрес Мануэль Лопес Обрадор

Мексика президенти Андрес Мануэль Лопес Обрадор коронавирус юқтириб олган. Бу ҳақда у Twitter'даги ўз саҳифаси орқали маълум қилди.

“Таассуф билан сизга маълум қиламанки, мен COVID-19 га чалиндим. Асоратлари енгил, аммо мен даволана бошладим. Ҳар доимгидек кўтаринки руҳдаман. Ҳаммамиз биргаликда олға қараб юришда давом этамиз”, деб ёзган Мексика президенти. Обрадорга кўра, ҳозирча уни ИИВ раҳбари Ольга Санчес Кордеро тамсил этиб туради.

Аввалроқ Франция президенти Эммануэль Макрон, Британия бош вазири Борис Жонсон, Бразилия президенти Жаир Болсонару, Украина президенти Владимир Зеленский ва бошқалар коронавирус билан хасталаниб, тузалиб чиқишганди.

Жонс Ҳопкинс университети маълумотига кўра, пандемия бошидан бери Мексикада 1,7 миллион дан зиёд киши коронавирусга чалинган, 149 минг 600 нафардан кўпроқ одам қурбон бўлган. Ўтган йилнинг 24 декабридан бошлаб мамлакатда тиббиёт ходимлари орасида эмлов кампанияси бошланган.

Исроил бир ҳафтага дунё билан ҳаво алоқасини узади

Исроил бош вазири Бенямин Нетаняҳу (ўнгдан биринчи)

Исроил 25 январь оқшомидан халқаро авиаалоқани бир ҳафтага тўхтатади. Бу ҳақда якшанба куни мамлакат ҳукумати баёнот тарқатган.

Бош вазир Нетаняҳуга кўра, мамлакат “тақатақ ёпилади”, Исроил фуқаролари мамлакатга кириш-чиқиш учун ўта жиддий сабаб кўрсатишлари лозим бўлади.

Исроилда пандемия бошидан бери бунингсиз ҳам мамлакатга кириш-чиқиш бўйича кескин чоралар жорий қилинганди. Галдаги чеклов қадамларини расмийлар аҳоли эмланаётган муҳим бир паллада мамлакатга коронавирус янги штамми кириб келишининг олдини олиш зарурати билан изоҳлаганлар.

Исроил эмлов суръати бўйича айни пайтда дунёда биринчи ўринда турибди, мамлакат аҳолисининг 25 фоиздан кўпроғи камида бир доза вакцина олган. Расмийлар март ойи охиригача катта ёшдаги аҳолининг барчасини эмловдан ўтказишни режалаганлар. 24 январь куни 16 ёшдан 18 ёшгача бўлган ўсмирлар ҳам эмловдан ўтиши эълон қилинган.

Мамлакатда ҳозир кескин карантин чоралари жорий қилинган бўлиб, улар камида январь ойи охиригача давом этиши керак. Исроил аҳоли жон бошига хасталик юқтириш бўйича дунёда ўринда турган давлатлардан биридир. Айни пайтда у COVID-19 қурбонлари сони энг оз (1 фоиздан камроқ) мамлакатлардан бири бўлиб ҳисобланади.

Россия президенти “Путин саройи”га оид суриштирув юзасидан илк бор изоҳ берди

Геленжик яқинидаги "Путин саройи"

Россия президенти Владимир Путин Алексей Навальнийнинг Коррупцияга қарши кураш фонди (КҚКФ) томонидан амалга оширилган Геленжик яқинидаги саройга оид суриштирув ҳақида илк бор изоҳлади. Талабалар билан ўтказилган онлайн учрашув чоғида Путин суриштирув тўғрисидаги саволга жавоб берди.

Бу каби маълумотни кўриб чиқишга шунчаки бўш вақтим бўлмагани учун мен бу фильмни кўрмадим. Аммо ёрдамчиларим олиб келган видеоподборкаларни варақлаб чиқдим. Сизнинг саволингизга ҳаялламай жавоб беришни истайман: у ерда менинг мулким деб кўрсатилганларнинг ҳеч бири менга ҳам, менинг яқин қариндошларимга ҳам қарашли эмас ва ҳеч қачон менга тегишли бўлмаган. Ҳеч қа-чон”, деган Путин. У Суриштирувнинг ўзини эса Путин “компиляция” (мустақил тадқиқотларсиз, бошқаларнинг суриштирувлари асосида йиғилган демоқчи – таҳр.) деб атаган.

Шу йил 19 январида Коррупцияга қарши кураш фонди Геленжик яқинидаги Владимир Путиннинг саройи деб аталган бинога оид суриштирувини ёйинлаганди. Суриштирув Химки суди КҚКФ асосчиси Алексей Навальнийни Германиядан Россияга қайтганидан кейин 30 суткага тергов ҳибсхонасига йўллаш ҳақида қарор чиқарганидан бир кун ўтиб эълон қилинган. Ёйинланганидан бери ўтган 6 кун ичида YouTube тармоғида 86 миллион мартадан кўпроқ кўрилган фильм Навальний қўлга олинишига қадар ҳозирланган. Қарийб 2 соат давом этадиган ҳужжатли фильмда Навальнийнинг ўзи ҳам иштирок этган.

“Путин саройи” деб аталаётган бино 2005–2010 йиллар мобайнида Қора денгиз бўйича қурилган. Унинг Россия президенти учун қурилгани ҳақида 2010 йилда тадбиркор Сергей Колесников билдирган.

КҚКФ сарой қурилишини 100 миллиард рублга (тақрибан 1,35 миллиард АҚШ доллари) баҳолаган ва бино интерьерини намойиш қилган. Суриштирувда иддао қилинишича, “саройни безашда иштирок этган муҳим пудратчилардан бири” фондга мазкур объектнинг меъморий тархини тақдим этган. Саройда жами ўнлаб хона бўлиб, улар орасида “хизматчилар, яъни шифокорлар, бошқарувчилар, ошпазлар, официантлар учун кийиниш хоналари, гўшт-балиқ цехи, сабзавот цехи, новвойхона, тухумларга ишлов бериш цехи” кабилар бор.

КҚКФ хулосасига кўра, гарчи бошқалар номига расмийлаштирилган бўлса-да, Путин мазкур кўчмас мулкнинг асл соҳиби бўлиб ҳисобланади, сарой ва унинг инфратузилмаси эса коррупцион схемалар ҳисобидан қурилган.

Мухолифатчи Алексей Навальний 17 январь куни Берлиндан Москвага учиб келиши билан қўлга олинган. Германияга у ўтган йил ёзида “Новичок” моддаси билан заҳарланиши ортидан олиб кетилган ва ўша ерда даволанганди. Навальний Россия пойтахтида қўлга олинганидан бир кун ўтгач, у 30 кунлик ҳибс муддатини ўташ учун “Матросская тишина” тергов ҳибсхонасига йўлланган.

23 январь куни Россия бўйлаб Навальний ҳимояси учун ўтказилган норозилик акцияларида 100 мингдан зиёд одам қатнашган. Навальний штаблари вакиллари намойишларда 250 минг киши иштирок этганини иддао қилмоқда. Акциялар чоғида 3,5 чоғли одам тутиб кетилган – бу эса Россиянинг энг янги тарихи учун рекорд кўрсаткич бўлиб ҳисобланади.

Қирғизистонда коронавирус қурбонлари сони 1400 нафардан ошди

Ўзбекистонга қўшни бўлган Қирғизистонда ўтган кеча-кундузда пневмония дохил коронавирусга чалинганлар сони 71 нафарни ташкил қилган, хасталик туфайли бир киши вафот этган. Бу ҳақда 25 январь куни Коронавирус инфекциясига қарши кураш республика штаби маълумот тарқатди.

Сўнгги маълумотларга кўра, Қирғизистонда COVID-19 инфекциясини юқтириб олганларнинг умумий сони 83 минг 971 нафарга, қурбонлар сони эса жами 1 минг 401 нафарга етган.

Тиббиёт ходимлари ўртасида 24 январь куни коронавирусга чалиниш ҳолати қайд этилмаган. Пандемия бошидан бери эса 4 минг 168 нафар тиббиёт ходими вирусга чалиниб, улардан 4 минг 75 нафари тузалиб кетган.

Айни пайтда мамлакатда эпидемия аввалидан бери ҳаммаси бўлиб 80 минг 25 нафар бемор соғайгани айтилмоқда.

Россия Тергов қўмитаси намойишларда санитария тартиби бузилгани юзасидан жиноят иши очди

Алексей Навальнийни дастаклаш акциясидан лавҳа, Москва, 2021 йил 23 январи

Россия Федерацияси Тергов қўмитаси 23 январь куни мамлакатнинг ўнлаб шаҳрида мухолифатчи Алексей Навальнийни дастаклаш намойишлари ўтказилгани муносабати билан санитария қоидалари бузилиши (РФ Жиноят кодекси 236-моддаси) тўғрисида иш қўзғатган. Бу ҳақида Коррупцияга қарши кураш фонди (КҚКФ) юридик бўлими бошлиғи Вячеслав Гимади маълум қилди.

КҚКФ директори Иван Ждановга кўра, бу иш юзасидан фонд ходимларини сўроқ қилиш (ҳозирча гувоҳ сифатида) аллақачон бошланган. Жумладан, терговчилар Навальнийнинг матбуот котиби Кира Ярмиш, Навальнийнинг Москвадаги штаби координатори Олег Степанов ҳамда фонднинг суриштирувлар бўлими бошлиғи ўринбосари Георгий Албуровларни излаб келганлар ва ушбу ходимлар айни пайтда махсус ҳибсхонада сақланмоқда.

Жиноят кодексининг санитария-эпидемиология нормалари бузилиши тўғрисидаги моддасида икки йилгача озодликдан маҳрум этиш жазоси назарда тутилган. Мазкур қоидабузарлик эҳтиётсизлик туфайли одам ўлдиришга олиб келган тақдирда, айбдор етти йилгача озодликдан маҳрум қилиниши мумкин.

Алексей Навальнийнинг тарафдорлари 23 январь куни мухолифатчини дастаклаб, умумроссия норозилик акциясини ўтказишган. Эслатиб ўтамиз, “Новичок” гази билан заҳарланган сиёсатчи Берлинда даволаниб қайтганидан кейин (2021 йил 17 январи) Москва аэропортидаёқ ҳибсга олинган бўлиб, ҳозирда тергов изоляторида сақланмоқда.

Оммавий ахборот воситалари ҳисоб-китобига кўра, Москвадаги намойишларда 40 минг нафаргача одам иштирок этган, “Белий счетчик” акция қатнашчилари сонини 20 минг нафаргача (ИИВ баёнотида — 4 минг) деб кўрсатган. "МБХ медиа" Россия бўйича норозилик чиқишларида 110 минг киши иштирок этгани, жами қўлга олинганлар сони эса 3,4 минг кишидан ортиқ эканини таъкидлаяпти.

Намойишлардан бир неча кун аввал Москва маъмурияти коронавирус эпидемияси муносабати билан оммавий тадбирлар тақиқланганини боис митинг ўтказиш тўғрисидаги аризаларга рад жавоби берилишини очиқлаган эди.

Намойишлар арафасида Тергов қўмитаси ахборот-коммуникация тармоқларидан фойдаланган ҳолда вояга етмаганларни уларнинг ҳаётига хавф туғдирувчи ноқонуний хатти-ҳаракатларга жалб этганликка оид (ЖК 125.2-моддаси 2-қисми "а" ва "в" бандлари) жиноят иши очганди.

Тергов қўмитасининг Москва бошқармаси ЖКнинг 318-моддаси (“Ҳокимият вакилига нисбатан зўравонлик ҳаракатларини содир этиш”), 167-моддаси (“Мулкни қасддан нобуд қилиш ёки унга шикаст етказиш”) ҳамда 213-моддаси (“Безорилик”) билан жиноят ишлари қўзғатган. Шунингдек, ЖКнинг 267-моддаси (“Транспорт воситалари ёки қатнов йўлларини яроқсиз ҳолга келтириш”) 2-қисми бўйича жиноят иши очган.

Владивостокда РФ Жиноят кодексининг 267.1-моддаси (“Транспорт воситаларидан хавфсиз фойдаланишга таҳдид солувчи хатти-ҳаракатлар содир этиш”) бўйича жиноят иши қўзғатилган. Яна икки жиноят иши ҳокимият вакилига нисбатан зўравонлик содир этиш (ЖК 318-моддаси 1-қисми) ҳолатлари юзасидан қўзғатилгани айтилмоқда.

Новосибирскда оммавий тартибсизликларга чақириш тўғрисида жиноят иши очилган. Тергов тахминига кўра, 2021 йил январида “номаълум шахслар” ижтимоий тармоқларда оммавий тартибсизликларга чорлаганлар. Бу хабарлар воситасида, Тергов қўмитаси иддаосича, гўё 23 январь куни Навальнийни дастаклаш намойишларига чиққанда зўравонлик, талон-торож қилиш, ўт қўйиш, мулкларни йўқ қилиш, қурол ва портловчи моддаларни қўллаш, шунингдек қуролли қаршилик кўрсатиш сингари жиноий хатти-ҳаракатларга даъват қилинган.

Қирғизистон пойтахти жаҳонда ҳавоси энг ифлосланган шаҳарга айланди

25 январь куни шаҳарда ҳавонинг ифлосланиши 279 даражада эканини қайд этди.

Жаҳоннинг йирик шаҳарларидаги ҳаво сифатини ўрганувчи World Air Quality ташкилоти Қирғизистон пойтахти Бишкекда ўрнатган мослама 25 январь куни шаҳарда ҳавонинг ифлосланиши 279 даражада эканини қайд этди.

Бу билан Қирғизистон пойтахти Бишкек жаҳонда ҳавоси энг ифлосланган шаҳарга айланди. Бишкекдан кейинги ўринларни биринчи ўнликда Ҳиндистоннинг Дели, Калькута, Мўмбай, Хитойнинг Шэнян, Пекин, Покистоннинг Лахор, Непалнинг Катманду, Бангладешнинг Дакка ва Вьетнамнинг Ханой шаҳарлари эгаллади.

Айни пайтда Бишкекнинг Ак-Ўргў мавзесида ҳавонинг ифлосланиш индекси 450 даражага, Қизил қурувчи мавзесида 428 даражага, Новопавловка қишлоғида 410 даражага етган. Бу ўта хафли даража ҳисобланади.

World Air Quality ҳисобича, ҳавонинг ифлосланиш индекси 50 даражадан паст бўлиши лозим. Айнан мана шу даража инсон саломатлиги учун хавфсиз ҳисобланади.

Бишкек ўтган йилнинг ноябридан бери жаҳонда ҳавоси энг ифлосланган шаҳарлар ўнлигидан тушмай келмоқда. Ўтган ҳафтада Бишкекда ҳавонинг яхшилангани кузатилган, аммо 24 январдан яна ифлосланиш даражаси кўпайди.

Россия Озодлик радиосига босим ўтказишда давом этса, АҚШ санкция жорий этиши мумкин

Озод Европа-Озодлик радиосининг Прагадаги бош қароргоҳи.

АҚШ конгрессменлари Кремль Озод Европа-Озодлик радиосининг Россиядаги фаолиятига тўсқинлик қилишда давом этадиган бўлса санкциялар жорий этишлари мумкин.

Конгрессменлар 22 январь куни президент Жо Байден маъмуриятига жўнатган мактубларида мана шу ҳақда билдирганлар.

Конгрессменлар мактубида Жо Байденни Озод Европа-Озодлик радиосининг Беларусдаги фаолиятини кўпроқ қўллаб-қувватлашга чақирди. Беларусда ўтган йилнинг августидан бери амалдаги президент Александр Лукашенко истеъфоси талаб қилинган намойишлар тўхтамаяпти.

Аввалроқ Роскомнадзор Озод Европа-Озодлик радиосини “хориж агентлари” тўғрисидаги қонунга амал қилмаётганликда айблаб, бир неча юз минг доллар миқдорида жарима солишини билдирган. Мазкур қонунга асосан Озодлик журналистлари жиноий таъқиб қилиниши ҳам мумкин.

Роскомнадзор Озодлик радиоси рус хизматидан ўз контентига “хориж агенти” белгисини қўйишни талаб қилмоқда. Радио бу талабни бажаришдан бош тортган.

Дейзи Синделар Озодлик радиоси президенти вазифасини вақтинча бажарувчи этиб тайинланди

Озод Европа-Озодлик радиоси президенти вазифасини вақтинча бажарувчи Дейзи Синделар.

АҚШ Глобал медиа агентлигининг янги раҳбари Келу Чао Озод Европа-Озодлик радиоси президенти вазифасини вақтинча бажарувчи этиб Дейзи Синделарни тайинлади.

Бундан ташқари 24 январь куни эълон қилинган буйруққа асосан Бэй Фанга Озод Осиё радиоси президенти, Келли Салливан Яқин Шарқ радиоэшиттиришлар тармоғи - Middle East Broadcasting Networks президенти вазифасини бажарувчи сифатида тайинланди.

Мазкур уч радио президентлари Чао томонидан 22 январда ишдан бўшатилган эди. Улар бу лавозимларга АҚШ Глобал медиа агентлигининг аввалги раҳбари Майкл Пак томонидан тайинланганига бир ой бўлган эди.

21 январь куни Келу Чао “Америка овози” раҳбари, унинг ўринбосари ва Кубага эшиттириш берувчи радио раҳбарини ишдан бўшатганди.

АҚШнинг янги президенти Жо Байден 20 январда ўз лавозимига киришганидан икки соат ўтгач АҚШ Глобал медиа агентлиги директори Майкл Пак ўз лавозимидан истеъфо беришга мажбур бўлган ва унинг лавозимини вақтинча Келу Чао бажармоқда.

2020 йилнинг 30 декабрида Озод Европа-Озодлик радиосининг 23 хизмати бош муҳаррирлари АҚШ глобал медиа агентлиги – USAGAM бош директори Майкл Пакка норозилик мактубини жўнатганди.

Мактубда агентлик раҳбари икки париявийлик принципидан “мисли кўрилмаган даражада воз кечганликда” ва “ўзи ҳимоя қилиши шарт бўлган оммавий ахборот воситаларининг мустақиллигига даҳл қилганликда” айбланди.

Ҳолландияда норозилик намойишлари тартибсизликларга айланиб кетди

Полиция норозиларга қарши сув пуркагичларни қўллади.

Ҳолландиянинг иккита шаҳрида 24 январь куни коронавирусга қарши чекловларга норозилик сифатида ўтказилган намойиш тартибсизликларга айланиб кетди.

Эйндховен шаҳрида юзлаб норози полициячиларни тошбўрон қилди ва айрим биноларга ўт қўйди. Полиция норозиларни тарқатиш учун кўздан ёш сиздирувчи газ ва сув пуркагичлардан фойдаланди. Ўнлаб норози қўлга олинди.

Пойтахт Амстердамда ҳам норозилик намойиши тартибсизликка айланиб кетгани ортидан юздан ортиқ одам қўлга олинди.

Намойишлар Голландия ҳукумати 9 февралдан бошлаб соат 21дан 4:30гача комендантлик соати жорий этгани оқибатида бошланиб кетди.

Европа Иттифоқида вируснинг Британияда аниқланган янги штамми тарқалишининг олдини олиш бўйича чоралар кўрилмоқда. Британияда мамлакатнинг катта қисмида вирус юқтирганлар ва нобуд бўлганлар сони ошиб бормоқда.

Озод Европа-Озодлик ва яна икки радио президенти лавозимга тайинланганидан бир ой ўтмай ишдан олинди

Америкалик журналист Тед Липиен Озод Европа- Озодлик медиакорпорацияси президенти лавозимига 2020 йил 19 декабрда тайинланган эди.

Озод Европа-Озодлик радиосининг яқинда тайинланган президенти, шунингдек, Озод Осиё ва Middle East Broadcasting Networks раҳбарлари АҚШ Глобал медиа агентлигининг янги директори томонидан 22 январда ишдан олинди.

АҚШ Глобал медиа агентлиги директори вазифасини бажарувчи Келу Чао Озод Европа-Озодлик радиосига бир ой олдин президент сифатида тайинланган Тед Липиенни Озод Осиё ва Middle East Broadcasting Networks раҳбарларини улар ўз лавозимига тайинланганидан бир ой ўтар-ўтамас лавозимидан бўшатган.

21 январь куни Келу Чао “Америка овози” раҳбари, унинг ўринбосари ва Кубага эшиттириш берувчи радио раҳбарини ишдан бўшатганди.

“Америка овози” ва Куба радиоэшиттириши АҚШ ҳукумати тасарруфидадир. Озод Европа-Озодлик, Озод Осиё ва Middle East Broadcasting Networks АҚШ Конгресси тарафидан молиялаштириладиган ташкилотлардир.

АҚШнинг янги президенти Жо Байден 20 январда ўз лавозимига киришганидан икки соат ўтгач АҚШ Глобал медиа агентлиги директори Майкл Пак ўз лавозимидан истеъфо беришга мажбур бўлган ва унинг лавозимини вақтинча Келу Чао бажармоқда.

2020 йилнинг 30 декабрида Озод Европа-Озодлик радиосининг 23 хизмати бош муҳаррирлари АҚШ глобал медиа агентлиги – USAGAM бош директори Майкл Пакка норозилик мактубини жўнатганди.

Мактубда агентлик раҳбари икки париявийлик принципидан “мисли кўрилмаган даражада воз кечганликда” ва “ўзи ҳимоя қилиши шарт бўлган оммавий ахборот воситаларининг мустақиллигига даҳл қилганликда” айбланди.

Майкл Пак президент Дональд Трамп томонидан 2020 йил июль ойида мазкур агентликка раҳбар сифатида тайинланган эди.

Президент Жо Байден Пакнинг ўрнига “Америка овози” радиосининг 30 йиллик тажрибага эга бўлган журналисти Чаони 20 январь куни тайинлади.

АҚШ Толибон билан эришилган тинчлик шартномасини қайта кўриб чиқади

Асирга олинган Толибон жанггарилари.

Америка Қўшма Штатлари Толибон ўз мажбуриятларини бажараётгани ёки йўқлигини аниқлаш мақсадида ўтган йили жангари гуруҳ булан тузилган келишувни қайта кўриб чиқади.

АҚШ президентининг Миллий хавфсизлик бўйича маслаҳатчиси Жейк Салливан афғонистонлик ҳамкасби Ҳамдулла Моҳиб билан ушбу масалада суҳбатлашган.

Ўтган йилнинг февраль ойида эришилган келишувга биноан, 2021 йилнинг май ойигача барча хорижий кучлар Афғонистонни тарк этишлари керак.

Байденнинг янги маъмурияти "тинчлик жараёнини тўлиқ ва минтақавий дипломатик саъй-ҳаракатлар билан қўллаб-қувватлайди, бу эса икки томон барқарор ва адолатли сиёсий келишувга ва доимий сулҳга эришишига ёрдам беради", дейилади Оқ уй баёнотида.

Ўтган йилнинг 29 февралида Қатар пойтахти Доҳада АҚШ расмийлари ва Толибон вакиллари ўртасидан тинчлик битими имзоланган эди.

Ҳужжатга мувофиқ, АҚШ ва унинг иттифоқчилари 14 ой ичида Афғонистондан ўз қўшинларини олиб чиқиб кетиши керак. Толибон, ўз навбатида, келишувга тўлиқ амал қилган ҳолда Афғонистонда экстремизм уруғи сочилишига йўл қўймасликни зиммасига олган.

Пентатлон бўйича жаҳон чемпионати Беларусда ўтказилмайдиган бўлди

Пентатлон бўйича мусобақа.

Хоккей бўйича жаҳон чемпионатига мезбонлик қилиш ҳуқуқидан маҳрум қилинган Беларусь яна бир халқаро спорт мусобақасига мезбонлик қилиш имкониятини қўлдан бой берди.

Жорий йилнинг июнь ойида Минскда замонавий пентатлон ва лазер-ран мусобақалари бўлиб ўтиши режалаштирилган эди.

18 январь куни Халқаро хоккей федерацияси 2021 йили Минскда ўтказилиши режалаштирилган Жаҳон чемпионати бошқа мамлакатга кўчирилиши ҳақида эълон қилган.

Беларусда 2020 йил 9 августдан бери президент сайлови натижаларидан норози бўлган фуқароларнинг оммавий намойишлари ўтказиб келинмоқда. Мазкур сайловда мамлакатни 1994 йилдан бери бошқариб келаётган Александр Лукашенко ғолиб деб эълон қилинганди.

Мухолифат сайлов натижалари сохталаштирилишини билдириб, уни тан олишдан бош тортиб келади. АҚШ ва Европа Иттифоқи Лукашенкони президент сифатида тан олмаслигини билдирган.

АҚШ Хитойни Тайванга "босим ўтказишни" тўхтатишга чақиради

Тайван байроғи.

Америка Қўшма Штатлари Хитойдан Тайванга босимни тўхтатишни талаб қилди.

Бунга Хитой бомбардимончи ва қирувчи учоқлари Тайваннинг ҳаво мудофааси зонасига кириб боргани сабаб бўлди.

АҚШ Давлат департаменти расмий вакили Нед Прайс 23 январь куни эълон қилган баёнотда қайд этилишича, Вашингтон Пекинни "Тайванга қарши ҳарбий, дипломатик ва иқтисодий босимни тўхтатишга ва бунинг ўрнига Тайваннинг демократик йўл билан сайланган вакиллари билан мазмунли мулоқот қилишга" чақирган.

"АҚШ ХХРнинг [Хитой Халқ Республикаси] қўшниларини қўрқитишга қаратилган доимий уринишларини хавотир билан қайд этмоқда",- дейилади Прайс билдирувида.

Расмий вакил АҚШ Тайванга ўзини мудофаа қилишга кўмаклашишда давом этишини қўшимча қилди.

АҚШ ва Британия иқлим ўзгаришига қарши ҳамкорликда курашишга келишиб олди

АҚШнинг 46-президенти Жо Байден 20 январдан ўз лавозимига киришди.

23 январь куни Буюк Британия бош вазири Борис Жонсон ва АҚШ Президент Жо Байден телефон орқали суҳбатлашиб, икки мамлакат ўртасидаги алоқаларни яхшилашга ва иқлим ўзгаришига қарши курашда ҳамкорлик қилишга келишиб олди.

Буюк Британия бош вазири маъмурияти эълон қилган баёнотда ёзилишича, икки раҳбар Буюк Британия ва Қўшма Штатлар ўртасида эркин савдо битимини имзолашни муҳокама қилганлар.

Европа Иттифоқини тарк этган Буюк Британия жорий ойда ўз миллий савдо сиёсати устидан назоратни тиклади.

22 январь куни Оқ уй матбуот котиби Жен Псаки янги келишув имзолаш учун муайян сана белгиланмаганини айтди

Суҳбат давомида Жонсон эндигина президентлик курсисига ўтирган Байденни табриклаган ҳамда уни собиқ президент Дональд Трамп фармонларини тезда бекор қилгани учун олқишлаган.

Коронавируснинг янги турлари хавотирга сабаб бўлмоқда

Коронавирусга қарши ишлаб чиқарилган вакциналардан бири.

Коронавируснинг янги вариантлари, хусусан, илк маротаба Буюк Британия, Жанубий Африка ва Бразилияда аниқланган штаммлари соғлиқни сақлаш мутахассисларини ташвишлантирмоқда.

Олимларнинг айтишича, вируснинг ушбу уч тури янада тез суратда тарқалмоқда. Бу эса бусиз ҳам оғир аҳволга тушиб қолган касалхоналар ва соғлиқни сақлаш тизимларига босимни кучайтириши мумкин.

Вируснинг Британияда аниқланган янги штамми ортидан мамлакатнинг катта қисмида вирус юқтирганлар ва нобуд бўлганлар сони ошиб бормоқда.

Бошида янги штамм аввалгисидан хавфли эмаслиги айтилган эди. Аммо 22 январь куни Буюк Британия ҳукуматининг бош илмий маслаҳатчиси Патрик Валланс дастлабки маълумотлар янги штамм хавфлироқ эканини кўрсатганини айтди.

Мавжуд вакциналар аҳолини вируснинг Британияда аниқланган туридан ҳимоя қила олади. Аммо Жанубий Африка ва Бразилияда аниқланган штаммлар хавотир келтириб чиқармоқда.

Сенатда Трамп импичменти бўйича тингловлар 8 февралдан бошланади

Оқ Уйни тарк этаётган Трамп.

АҚШ Сенатида собиқ президент Дональд Трампга қўйилган "исёнга чорлаш" айблови бўйича импичмент тинглови 8 февралдан бошланади. Бу ҳақда 22 январь куни сенатор Чак Шумер маълум қилди.

Намоёндалар палатаси спикери Нэнси Пелоси Трампга қарши импичмент айбловини 25 январь куни Сенатга юборишни режаламоқда.

20 январь куни президентлик муддати тугаган Трамп Флорида штатига учиб кетди ва президент Жо Байден инаугурациясида қатнашмади.

6 январь куни Трампнинг турли штатлардан Вашингтонга йиғилган тарафдорлари Капитолий биноси олдида намойиш уюштириб, бинога бостириб кирган эди. Тартибсизлик конгрессменлар президент сайлови натижаларини тасдиқлашлари лозим бўлган пайтда рўй берган. Тўполон чоғида беш киши қурбон бўлган.

13 январь куни АҚШ Конгресси Намояндалар палатаси Трампга импичмент эълон қилди. Трамп икки марта импичментга йўлиққан биринчи АҚШ президентидир.

Афсонавий бошловчи Ларри Кинг 88 ёшида оламдан ўтди

Ларри Кинг суҳбатдошлари орасида Ричард Никсон,  Маргарет Тетчер,  Мартин Лютер Кинг,  Нелсон Мандела,  Франк Синатра, Михаил Горбачёв ва АҚШ президентлари бор эди. 

Америкалик теле ва радиобошловчи Ларри Кинг Лос-Анжелес шаҳри қасалхонасида 88 ёшида вафот этди.

У декабр ойида коронавируснинг янги турини юқтириши ортидан касалхонага ётқизилганди.

Ларри Кинг ўз фаолиятини 1957 йилда Маямида бошланган. У 1985 йилдан 2010 йилгача у CNN телеканалида ишлаган.

Кейин Россиянинг РТ ва Ора ТВ каналларида ва Ҳулу оқим хизматида фаолият қилди.

Кинг радио ва кейинчалик телевизион интервюлар устаси сифатида танилган.

Унинг суҳбатдошлари орасида Ричард Никсон, Маргарет Тетчер, Мартин Лютер Кинг, Нелсон Мандела, Франк Синатра, Михаил Горбачёв ва АҚШ президентлари бор эди.

Ўтган йил ёзида Ларри Кинг икки фарзандидан айрилганди. 13 августда унинг ўғли Энди Кинг тўсатдан вафот этган эди, 20 август куни эса қизи Чайя Кинг оламдан ўтди.

Қозоғистонда озодликка чиқиши кутилаётган фаол шартли қамоқ жазосига ҳукм қилинди

Қозоғистон суди 4 февраль куни озодликка чиқиши кутилаётган фаол Макс Боқаевни уч йиллик шартли қамоқ жазосига ҳукм қилди.

Боқаевнинг адвокати Жанар Сундетқалиева Озодликка берган интервьюсида Ғарбий Атирау шаҳридаги суд ўз қарорини 22 январда чиқарганини айтди.

«Макс суд қарори устидан шикоят қилишини айтди. У айбдор эмаслигини яна бир бор таъкидлади ва қатор ҳуқуқ ташкилотлари уни сиёсий маҳбус деб топганини айтди», - деди Сундетқалиева.

48 ёшли фаол 2016 йилда Атирауда ер ислоҳотига қарши норозилик намойишлари уюштиргани учун ҳибсга олинган ва экстремизмда айбланиб, беш йилга озодликдан маҳрум қилинган эди.

Америка Қўшма Штатлари, Европа Иттифоқи ва БМТ Қозоғистон расмийларини Боқаевни озодликка чиқаришга чақириб келади.

Қозоғистондаги инсон ҳуқуқларини ҳимоя қилиш ташкилотлари Боқаевни сиёсий маҳбус деб топган. Қозоғистон ҳукумати эса мамлакатда сиёсий маҳбуслар йўқлигини иддао қилиб келади.

Беларусда Лукашенкога қарши шиорларни ёзган икки ўсмир қамоқ жазосига ҳукм қилинди

22 январь куни Минск суди президент Александр Лукашенкога қарши норозилик намойишлари пайтида полиция қалқонларида авторитар президентни қоралаб шиор ёзган икки ўсмирни қамоқ жазосига ҳукм қилди.

Октябрь туман суди Софию Малашевични икки йилга, Тихон Клюкачни эса 18 ойга озодликдан маҳрум қилди. Уларнинг иккиси ҳам Брест шаҳридаги коллежнинг 18 ёшли талабаларидир.

Суд Малашевични безориликда, мамлакат президентини оммавий равишда ҳақорат қилишда ҳамда жамоат тартибини бузадиган ишларга қўл уришда айбдор деб топди. Клюкач эса жамоат тартибини бузадиган ишларга қўл уришда айбдор деб топилди.

Ўсмирлар уларга қўйилган айбловларни тан олиб, суддан қамоқдан бошқа жазо турини танлашни илтимос қилган эдилар.

Беларусда Лукашенкога қарши намойишлар беш ойдан бери давом этмоқда.

Арманистонда суд тизими бошқарув кенгашининг янги аъзолари тайинланди

Арманистон парламенти ҳукумат ва суд тизими ўртасидаги зиддиятлар фонида судьяларини тайинлаш, жазолаш ва ишдан бўшатиш билан шуғулланувчи Олий суд кенгашининг икки янги аъзосини тайинлади.

22 январь куни Гагик Жангирян ва Давид Хачатурян Олий суд кенгашидаги бўш ўринларни эгалладилар.

Уларни бош вазир Никол Пашиняннинг «Менинг қадамим» партияси номзод ўлароқ кўрсатган эди.

Мухолифат кенгашнинг янги аъзоларини тайинлаш учун ўтказилган овоз беришда иштирок этишдан бош тортди.

Фаоллар Жангирянни 1997-2006 йилларда бош ҳарбий прокурор лавозимида ишлаган даврида Арманистон қуролли кучларида содир этилган жиноятларни яширишда ва бошқа қонунбузарликларга йўл очиб беришда айблаб келади.

Хачатурян эса келиб чиқиши венгриялик бўлган америкалик миллиардер Жорж Сороснинг «Очиқ жамият» жамғармасининг Еревандаги офисига етакчилик қилган. Унинг укаси Сасун Хачатрян айни дамда Арманистон Махсус тергов хизматини бошқаради.

Сўнгги ойларда Арманистон судьялари мухолифат раҳбарлари ва аъзолари ҳибсга олинишига тўсқинлик қилиб келади.

Арманистонда ўтга йилнинг кузида Тоғли Қорабоғ ва унинг атрофида Озарбайжонга билан содир бўлган тўқнашувлар ортидан норозилик намойишларида қатнашган ўнлаб фаол жиноий жавобгарликка тортилди.

Молдова Конституциявий суди рус тилининг махсус мақомини ноқонуний деб топди

Кишинёв мактабларида рус тилининг мажбурий ўқитилишига қарши норозилик - Кишинёв, 2002

Молдова Конституциявий суди рус тилининг миллатлараро мулоқот тили сифатида алоҳида мақоми тўғрисидаги қонунни конституцияга зид, деб эълон қилди. Уч нафар мухолиф депутат ушбу ҳужжат аксар фуқароларнинг ҳуқуқларини бузган ва давлат тили ролини камситган, деган даъво билан судга ариза киритган эди.

"Қарор якуний ҳисобланади, унга қарши чиқиш мумкин эмас. Қарор эълон қилинган вақтдан бошлаб кучга киради",- деди Конституциявий суд раиси Домника Маноле 21 январ куни.

Унинг сўзларига кўра, 2020 йил 16 декабрда парламент томонидан қабул қилинган Молдовада тилларнинг ишлаши тўғрисидаги қонун моддаси рус тилига Молдова конституциясида кўзда тутилмаган миллий озчиликнинг бошқа тилларига нисбатан имтиёзли мақом беради.

2014 йилги аҳолини рўйхатга олиш натижаларига кўра, Молдовада аҳолининг уч фоизидан камроғи рус тилида сўзлашади. "Натижада, рус тили миллатлараро мулоқот тили даражасига кўтарилиб, мамлакатда молдован тили билан тенг даражадаги квази-расмий мақомга эга бўлиб қолган",- деб айтди Маноле журналистларга.

Молдова парламенти 2020 йил 16 декабрда рус тилига миллатлараро мулоқот тили мақомини қайтарди. Мухолифат депутатлари мажлисни бойкот қилган. Қонун давлат органларига фуқароларни рус тилидаги маълумот билан таъминлаш мажбуриятини юклайди. Ушбу қонун рус тилидаги сўровларга жавоб беришдан бош тортган мансабдор шахсларни жазолашни ҳам назарда тутади.

Охирги сайловда малуб бўлган Молдованинг россияпараст собиқ президенти Игорь Додон лавозимни топширишдан бир неча кун олдин, 18 декабр куни ушбу қонунни имзолади. Шундан кейин мухолифат қонунга қарши чиқишини эълон қилди.

Қозоғистонда икки хитойлик қозоқ ҳужумга учради

Мурагер Алимули Қўянди қишлоғида пичоқланган ва қаттиқ калтакланганиден кейин шифохонада- Нур-Султон, 21 январь, 2021

Шинжондан Қозоғистонга келиб, вақтинча қочқин мақомини олган икки этник қозоқ зўравонлик ҳужумига учради.

«Нағиз атажурт» инсон ҳуқуқларини ҳимоя қилиш ташкилоти вакили Бекзат Мақсутханнинг Озодликка айтишича, 21 январь куни кечқурун номаълум шахс Олмаотада Қайша Ақанга ҳужум қилиб, бошига камида икки марта урган ва уни бўғиб ўлдиришга уринган.

«Қайшанинг айтишича, у ҳушидан кетган ва бирмунча вақт ўтгач, қорда ётган ҳолда ўзига келган. У полиция ва тез ёрдам чақиришга муваффақ бўлган», - деди Мақсутхан.

Ўша куни кечаси шинжонлик яна бир этник қозоқ Мурагер Алимули пойтахт Нур-Султон яқинидаги Қўянди қишлоғида пичоқланган ва қаттиқ калтакланган.

Олмаота ва Нур-Султон полицияси икки ҳужум бўйича тергов бошланганини маълум қилди.

Кейинги йилларда шинжонлик юзлаб этник қозоқ Қозоғистонга қочиб ўтиб, сиёсий бошпана сўраган.

Песков: Путин "Путин саройи"да бўлганини билмайман

Суриштирув муаллифларига кўра, Геленжик кўрфазидаги «Путин саройи»ни камида 100 миллиард рубль (1,35 миллиард доллар)га баҳолаш мумкин

Кремль матбуот котиби Дмитрий Песков журналистлар билан ўтказган онлайн конференцияси давомида Алексей Навальний ва Коррупцияга қарши кураш жамғармаси «Путин саройи» ҳақида ўтказган суриштирувга яна тўхталди.

Суриштирув муаллифларига кўра, Геленжик кўрфазидаги «Путин саройи»ни камида 100 миллиард рубль (1,35 миллиард доллар)га баҳолаш мумкин.

Навальний YouTubeга жойлаган видео аллақачон 55 миллион мартадан кўп марта кўрилди ва нафақат Россия, балки бошқа қатор мамлакатларда ҳам энг кўп кўрилган видеолар қаторидан ўрин олди.

Суриштирув тўғрисида Кремль расман муносабат билдириши ёки йўқлиги ҳақидаги саволига Песков «Бу ерда ҳеч қандай билдирув керак эмас», - деб жавоб берди.

Котиб Путиннинг сарой мажмуасига ҳеч қандай алоқасини йўқлигини айтиб, суриштирув хулосаларини «ёлғон» деб атади.

Путин ушбу иншоотдан фойдаланадими ёки йўқми, деган саволга Песков «йўқ» деб жавоб берди ва президент шу пайтгача у ерда бўлганми ёки йўқми деган саволга «Мен президент бирон марта у ерда бўлганини билмайман, менда бундай маълумот йўқ», - дея жавоб берди

Европа маҳкамаси: Россия Грузия билан урушда инсон ҳуқуқларини поймол этган

Россия аскарлари Грузиянинг Гори шаҳри ташқарисида - 9 август, 2008

Европа Инсон ҳуқуқлари маҳкамаси 2008 йилда Россия ва Грузия ўртасида бўлиб ўтган беш кунлик урушдан сўнг Россия инсон ҳуқуқларини поймол этган, деб топди. Жумладан, Россия қийноқлар содир этганлик ҳамда одамларни ўз уйига қайтишга тўсқинлик қилганликда айбдор, деб топилди. Грузия Европа маҳкамасининг қарорини олқишлади.

Суднинг 21 январда чиқарилган ҳукмида Россия аскарлари 160 нафар Грузия фуқаросининг “азобланишига сабаб бўлган ғайриинсоний ва қадр-қимматини камситувчи ҳаракатлар” содир этгани айтилади. Ҳукмда таъкидланишича, грузиялик маҳбуслар “ўзбошимчалик билан ҳибсга олинган”.

2008 йилнинг 7 августида грузин қўшинлари мамлакат ҳудудий яхлитлигини таъминлаш мақсадида Жанубий Осетия ҳудудига кириб борган эди. Россия бунга ҳарбий ҳаракатлар билан жавоб қайтарди. 5 кунлик урушдан сўнг Россия Жанубий Осетия ва Абхазияда ўзининг ҳарбий қисмларини қолдирган. Кейинчалик бу ҳудудлар ўзини мустақил деб эълон қилган ва уларнинг мустақиллигини Россия тан олган.

Грузия Россия тўқнашув чоғида ва ундан кейин Инсон ҳуқуқлари бўйича Европа конвенцияси шартларини бузгани тўғрисида Европа Инсон ҳуқуқлари маҳкамасига даъво киритганди.

Россия расмийлари ўз фуқаролари ва тинчликпарвар қўшинларини ҳимоя қилиш мақсадида Грузияни “тинчликка кўндиришга” мажбур бўлганлигини айтиб келади.

Суд қарорида айтилишича, “грузиялик уруш асирлари дучор бўлган қийноқлар маъмурий амалиёт бўлган”.

Суд шунингдек, Россияни грузин миллатига мансуб аҳолига урушдан кейин Жанубий Осетия ва Абхазиядаги уйларига қайтишига тўсқинлик қилганини айтган. Бу каби ҳолатлар юзасидан “муносиб ва самарали суриштирув”олиб боришга чақирган.

Европа Инсон ҳуқуқлари маҳкамасининг таъкидлашича, фаол жанговар ҳаракатлар чоғидаги ҳодисалар Россия юрисдикциясидан ташқарида бўлган. Икки тараф ҳам тўқнашувлар олиб борилган ҳудудни назорат қилмагани боис Грузия даъвосининг бу қисми инобатга олинмаган.

Европарламент “Шимолий оқим-2” лойиҳасини “зудлик билан тўхтатиш”ни талаб қилди

Европарламент Европа Иттифоқини “Шимолий оқим-2” газ қувурлари лойиҳасини “зудлик билан тўхтатиш”га чақирди. Болтиқ денгизи тубидан Россия газини Европага етказиш лойиҳасини тўхтатишга оид резолюция президент Путиннинг ашаддий танқидчиси Алексей Навальний ўтган ҳафта Москвада ҳибсга олингани муносабати билан 21 январь куни қабул қилинган.

Резолюцияни ёқлаб 581 нафар депутат овоз берган бўлса, депутатлардан 50 нафари унга қарши чиққан, 44 нафари эса овоз беришдан тийилган.

Алексей Навальний 17 январь куни Берлиндан Москвага учиб келиши билан қўлга олинган. Германияга у ўтган йил ёзида “Новичок” моддаси билан заҳарланиши ортидан олиб кетилган ва ўша ерда даволанганди. Навальний Россия пойтахтида қўлга олинганидан бир кун ўтгач, у 30 кунлик ҳибс муддатини ўташ учун “Матросская тишина” тергов ҳибсхонасига йўлланган.

Бу борада судга Жазони ўташ федерал хизмати илтимоснома киритган. ЖЎФХ вакилларига кўра, Навальний заҳарланганидан кейин Германияда даволанишда бўлган пайтда назоратдан қочиб юрган ва синов муддати шартларини бузган. Ваҳоланки, Навальнийга даволаниш учун Германияга кетишга Россия мулозимлари томонидан расмий рухсат берилганди. Мухолифатчининг адвокатлари унинг тергов ҳибсхонасига йўлланиши ноқонуний, дея билдирганлар.

Европарламент резолюциялари тавсия характерига эга бўлиб, уларни бажариш мажбурий эмас, бироқ улар Европа Иттифоқи таркибига кирган давлатлар учун сиёсий йўриқнома вазифасини ўтайди. Санкциялар ЕИга кирган 27 мамлакат қарори билан жорий этилади.

Россия расмийлари Навальнийнинг заҳарланишига ўзларининг алоқалари йўқлигини айтиб келадилар.

Давомини ўқинг

XS
SM
MD
LG