Линклар

Шошилинч хабар
24 июл 2024, Тошкент вақти: 10:38

Халқаро хабарлар

Полша комиссияси ўз самолёти ҳалокати масъулиятини Россияга юклади

Подполковник Роберт Бенедикт.
Подполковник Роберт Бенедикт.
Полша ҳукумат комиссияси ўтган йили апрел ойида мамлакат президенти Лех Качински ва яна 95 расмийни ҳаётдан олиб кетган самолёт ҳалокатига Россия диспетчерларининг носоз ускуналари ва диспетчерлик хизмати билан сифатсиз алоқа сабаб бўлгани айтилган хулосасини эълон қилди.

Комиссия раҳбари, подполковник Робер Бенедикт бугун берилган матбуот анжуманида Россия ғарбидаги Смоленск аэропортининг ёритиш тизими носоз бўлгани ва талабга жавоб бермагани, шунингдек, россиялик диспетчерлар поляк учувчиларига нотўғри маълумот бергани ҳалокатга сабаб бўлганини айтди.

Президент Лех Качински, унинг рафиқаси Мария ва бошқа ўнлаб ҳукумат амалдорлари 2010 йилнинг 10 апрелида содир бўлган ҳалокатда қурбон бўлган эди.

Шу йил январ ойида Россия томони эълон қилган ҳисоботда бу ҳалокат Полша расмийлари томонидан йўл қўйилган хато сабаблигина юз бергани айтилган ва бу Полшада норозиликларга сабаб бўлган эди.

Полша ҳисоботида кема бортидаги учувчилар етарли тажрибага эга бўлмагани қайд этилган, аммо марҳум президент ёки бошқа расмийларнинг қалин туманда қўнишга чўчиган самолёт учувчиларига босим ўтказганини тасдиқловчи далиллар йўқлиги айтилган.

Кун янгиликлари

Қирғизистон: Арслонбобда касалхона ва уйлар сув остида қолди

Иллюстратив сурат
Иллюстратив сурат

Қирғизистон жанубидаги Жалолобод вилояти Бозорқўрғон тумани Арслонбоб қишлоғида 23 июль куни кузатилган сел оқибатида қатор инфратузилма объектларига шикаст етган. Бу ҳақда Қирғизистон Фавқулодда вазиятлар вазирлиги маълумот тарқатди.

Вазирлик қайдича, табиий офат натижасида 9 уй, касалхона, савдо уйи, бешта кўприк, қишлоқ ичидаги йўлнинг бир километри сув остида қолган. Тошқин 23 та автомобилни оқизиб кетган. Айни пайтда ФВВ автомобиль эгаларини аниқламоқда.

Вазирлик сел оқибатларини бартараф этиш учун 210 киши ҳамда махсус техника жалб қилинганини маълум қилган.

Қишлоқ аҳолиси орасида жабрланган ёки бедарак кетганлар ҳақида маълумот йўқ.

Бозорқўрғон туманидан ташқари 23 июль куни Ўш вилоятининг Новқат туманида ҳам сел-тошқин ҳодисалари кузатилган. ФВВ сел Қорақўй ва Қалдай қишлоқларидаги Мурдачи яйлови томонидан келганини маълум қилган. Тошқин натижасида икки ўтов Тельман - Қорақўй йўлининг 25 километрини сув босган, бунинг натижасида автойўл ёпилиб қолган.

Сўнгги ойларда Қирғизистон жанубида бир неча бор шиддатли жала ва сел келиши ҳодисалари кузатилди, табиий офатлар натижасида ўнлаб одам нобуд бўлди ва кўплаб уйлар сув остида қолди.

Сел-тошқин ҳодисаларининг сўнггиларидан бири бундан ўн кун муқаддам Ўш шаҳрида кузатилиб, ўшанда марказий бозор ҳамда Оқбура дарёси қирғоғидаги объектларни сув босган. Бундан ташқари, 14 июлдаги тошқин беш кишининг ўлимига сабаб бўлган.

Сўров: Ҳаррис Трампдан икки фоизга олдинда бормоқда

АҚШ вице-президенти Камала Ҳаррис, 2024 йил 22 июли
АҚШ вице-президенти Камала Ҳаррис, 2024 йил 22 июли

АҚШ вице-президенти Камала Ҳаррис республикачилар партиясидан президентликка номзод Дональд Трампдан 2 фоизга олдинда боряпти.

Reuters/Ipsos сўровига мувофиқ, Ҳаррисни респондентларнинг 44 фоизи, Трампни эса сўралганларнинг 42 фоизи дастаклаган. Сўров 22-23 июль кунлари ўтказилган.

Сўров иштирокчиларининг 56 фоизи 59 ёшли Камала Ҳаррис “ўткир ақл соҳибаси” ва “қийинчиликларни бартараф этишга қодир” деган фикрга қўшилган. Бундай фикрни 78 ёшли Дональд Трамп ҳақида сўралганларнинг 49 фоизи айтган.

Сўралган демократ сайловчиларнинг 91 фоизи Ҳаррисга ижобий муносабатда. Сўров иштирокчиларининг учдан икки қисми демократлар Камала Ҳаррис номзодини дастаклаши лозим, деган фикрни маъқуллаган. Респондентларнинг чорак қисми эса президентликка кўрсатилиш учун бир неча номзод ўзаро кураш олиб бориши лозим, деб ҳисоблайди.

Польшада ўзбекистонлик эркак икки ўсмирга пичоқ билан ҳужум қилди

Иллюстратив сурат
Иллюстратив сурат

Польша пойтахти Варшавада Ўзбекистонда туғилган йигит Украинадан бўлган ўсмирларга пичоқ билан ҳужум қилган.

Wyborcza нашри хабарига кўра, ҳодиса Варшавадаги ўрмон-парк ҳудудида рўй берган. Қайд этилишича, 26 ёшли гумонланувчи ҳужум чоғида украиналик 15 яшар ўсмирларга шикаст етказган.

Исми ошкор қилинмаётган гумонланувчи томонидан қўллари ва қорнидан яраланган икки ўсмир касалхонага етказилган. Бу ҳақда нашрга маълум қилган маҳаллий полициячи айни пайтда уларнинг аҳволи қандайлиги хусусида маълумотга эга эмаслигини билдирган.

Ҳуқуқ-тартибот идоралари ходимлари ҳужумчини ҳибсга олишган. Айни пайтда ҳодиса тафсилотлари ўрганилмоқда.

Озарбайжонда расмийларни танқид қилиб келган собиқ дипломат қўлга олинди

Эмин Ибраҳимов
Эмин Ибраҳимов

Озарбайжонда 22 июль оқшомида собиқ дипломат Эмин Ибраҳимов қўлга олинган. Бу ҳақда Озодликнинг озарбайжон хизмати хабар қилди.

Ибраҳимов адвокат Ақил Лайижга душанба куни кечқурун метро станцияси олдида унга номаълум шахс ҳужум қилгани, шундан кейиноқ фуқаро кийимидаги одамлар пайдо бўлиб, уни тутиб кетишганини айтган. Собиқ дипломат Озарбайжон Жиноят кодексининг 126.1-моддасида (Киши соғлиғига қасддан оғир шикаст етказиш) кўзда тутилган жиноятни содир этганликда гумонланмоқда.

“У гўё кимгадир пичоқ билан шикаст етказганлик учун ушланганини маълум қилди. Эмин бунинг ёлғон эканини айтди”, дея билдиришган Ибраҳимовнинг яқинлари.

Озарбайжон Ички ишлар вазирлиги Turan агентлигига Ибраҳимов гўё 37 ёшли эркак билан жанжаллашиб кетганини маълум қилган.

“Натижада Эмин Ибраҳимов фуқарога пичоқ билан тан жароҳати етказган. Ибраҳимов қўлга олинган, жабрланувчи эса касалхонага етказилган”, дея билдиришган ИИВ вакиллари.

Эмин Ибраҳимов аввал Озарбайжон Ташқи ишлар вазирлиги тизимида ишлаган, кейин эса дипломатик хизматдан кетган. Сўнгги йилларда у расмийларни танқид қилиб келаётган эди.

Июнь ойида Озарбайжонда иқтисодчи Фарид Меҳрализода қўлга олинган эди. У ходимлари уюшган гуруҳ таркибида валюта контрабандасида айбланган Abzas Media мустақил нашрига қарши иш фигурантига айланган. У судда ўзига қўйилган айбловларни рад этиб, Abzas Media нашри билан ўзининг ўртасида ҳеч қанақа иш алоқаси бўлмаганини билдирган.

Путин ҳақидаги китоб муаллифи журналистлар уюшмасидан ҳайдалди

Владимир Путин ва Хуберт Зайпель
Владимир Путин ва Хуберт Зайпель

Германияда Netzwerk Recherche (NR) суриштирувчи журналистлар уюшмаси Россия президенти Владимир Путин таржимаи ҳолини ёзган ва бунинг учун Москвадан юз минглаб евро пул олган Хуберт Зайпелни ўз аъзолари сафидан чиқарди.

“Хуберт Зайпель ўз тутуми билан мустақил журналистиканинг асосий қоидаларини бузди ва касбимиз обрў-эътиборига улкан зарар етказди”, деган бирлашма раиси Даниэль Дреппер ZDF телеканалига.

ZDF каналининг Frontal дастури журналистлари Халқаро суриштирувчи журналистлар консорциуми, Spiegel ва Washington Post нашрлари билан биргаликда Зайпелнинг офшор фирма орқали Алексей Мордашовдан пул олганини фош қилишган. ОАВ маълумотларига кўра, Путин ҳақидаги китоб учун Зайпелга камида 600 минг евро тўланган. Бу ҳақда журналист нашриётни ҳам, ўзи ишлаган NDR телерадиоёйин ширкати ҳам хабардор қилган эмас.

Бу айбловлар эълон қилинган ноябрь ойидан кейиноқ Дреппер Зайпелдан бирлашмани тарк этишни талаб қилган, бироқ журналист бу талабни эътиборсиз қолдирган. Шунинг учун ҳам бирлашма Зайпелни фақат ҳозирга келиб – йиллик мажлисда аъзоликдан чиқарган. Зайпель мажлисга келмаган ва бунинг учун шахсий сабаблари борлигини айтган.

Хуберт Зайпель Германиядаги энг таниқли ва Россияни энг яхши билган тележурналистлардан бири бўлиб ҳисобланарди.

Июнь ойи бошида Зайпель Санкт-Петербургдаги иқтисодий форумда иштирок этган. Тахминларга кўра, у ҳалигача Кремль билан алоқаларни узган эмас.

Ўшда бозор савдогарлари митингидан тўрт киши тутиб кетилди

Ўшдаги марказий бозорга олиб ўтувчи кўприклардан бири (Қирғизистон Бош прокуратураси фотоси)
Ўшдаги марказий бозорга олиб ўтувчи кўприклардан бири (Қирғизистон Бош прокуратураси фотоси)

Қирғизистоннинг Ўш шаҳрида марказий бозор савдогарлари томонидан 22 июль куни уюштирилган норозилик акцияси чоғида милиция ходимлари тўрт кишини ушлаб кетган.

Озодликнинг қирғиз хизмати томонидан ёйинланган видеода акция иштирокчилари Қирғизистон Миллий хавфсизлик давлат қўмитаси раҳбари Қамчибек Ташиев билан учрашув талаб қилишаётгани, бир муддатдан кейин эса митингчиларнинг айримлари милиция микроавтобусига тиқиб, олиб кетилаётганини кўриш мумкин.

Мазкур митингга Оқбура дарёси устига қурилган кўприкларнинг бузилаётгани сабаб бўлган, савдогарларга кўра, бу бузилишлар сабаб улар ўз иш жойларига ўта олишмаяпти. Улар бозорни кўчириш муддатини узайтиришни ҳам талаб қилишмоқда.

Савдогарларнинг бошқа қисми эса бозорни эски жойида қолдиришни талаб қилиб чиқишган. Уларга кўра, янги бозор савдо-сотиқ учун ноқулай жойда, марказдан олисда жойлашган бўлиб, у ерга мижозлар бормаслиги мумкин.

Аввалроқ Ўш шаҳар прокуратураси Оқбура дарёси устида ўзбошимчалик билан йўловчилар ўтадиган 10 та кўприк қуриб олингани, бу иш юзасидан жиноят иши қўзғатилганини маълум қилган эди.

Кейинроқ МХДҚ раҳбари Қамчибек Ташиев Оқбура дарёси бўйлаб ноқонуний равишда қурилган бинолар, кўприклар ва дам олиш жойлари бузилишини билдирган. Мулозим ноқонуний қурилишларга рухсат берган мансабдор шахслар ҳам жавобгарликка тортилишидан огоҳлантирган.

Ўш шаҳар ҳокимияти марказий бозор одатий тартибда ишлаётгани, янги бозор битгунича савдогарларга марказий бозорда ишлашга рухсат берилганини маълум қилган. Мэрия қайдича, янги бозор икки ой ичида қуриб битказилиши керак.

Жорий йилнинг 14 июль куни Ўшда кузатилган шиддатли жала туфайли Оқбура дарёси қирғоғидан тошиб чиққан, бунинг оқибатида шаҳар марказий бозори ва дарё қирғоғидаги объектлар сув остида қолган эди. Сел тошқини натижасида беш киши қурбон бўлган, улардан тўрт нафари битта оила аъзолари бўлишган.

АҚШ: Қурултой делегатларининг кўпи Ҳаррисни дастаклашга тайёр

Камала Ҳарриснинг сайловолди қароргоҳидаги чиқишидан лавҳа, Вилмингтон, 2024 йил 22 июли
Камала Ҳарриснинг сайловолди қароргоҳидаги чиқишидан лавҳа, Вилмингтон, 2024 йил 22 июли

АҚШ президенти Жо Байден иккинчи президентлик муддати учун курашдан бош тортганининг эртасига, яъни 22 июль куни вице-президент Камала Ҳаррис Демократлар партияси қурултойи делегатларининг кўпчилигидан АҚШ президенти лавозимига номзод этиб кўрсатилиши учун зарур бўлган дастакни олди.

Associated Press агентлигининг сўнгги ҳисоб-китобига кўра, Ҳаррис учун қурултойнинг қарийб 2700 нафар делегати овоз беришга тайёр. Президентликка номзод этиб кўрсатилиш учун 1976 нафар делегатнинг овози керак бўлади. Овоз бериш 1 августдан 7 августгача бўлиб ўтади.

Байденнинг президентликка номзод этиб кўрсатилишидан бош тортиши демократларга президентликка номзодлик учун курашишга формал имконият яратди. Бироқ Жо Байденнинг президентлик пойгасидан чиққани ва Камала Ҳаррис номзодини дастаклашига оид баёнотидан кейинги илк соатлардаёқ кўплаб етакчи демократ сиёсатчилар унинг номзодини қўллашларини билдиришди. Ҳарриснинг сайлов фондига 888 нафар донордан 80 миллион доллардан кўпроқ иона келиб тушди.

Душанба оқшомига келиб Ҳаррисдан бош бирор демократ президентликка номзодлик учун курашиш нияти борлигини билдиргани йўқ. Камала Ҳарриснинг номзодлик учун курашда муҳтамал рақиблари ўлароқ зикр этилган бир неча штат – Кентукки, Иллинойс, Мэриленд ва Мичиган штатлари губернаторлари унинг номзодини қўллашларини билдиришди. Уларга Намояндалар палатасининг собиқ спикери бўлган нуфузли сиёсатчи Нэнси Пелоси ҳам қўшилди, ваҳоланки у даставвал Ҳаррис номзодини очиқ-ошкор қўллаб чиқмаган эди.

Ҳарриснинг сайлов штаби Барак Обама маъмуриятида адлия вазири бўлиб ишлаган Эрик Холдер вице-президентликка номзод танлаш процедурасига бош бўлишини эълон қилди. Камала Ҳаррис қайси номзодни танлаши ҳақида ҳозирча ҳеч қандай аниқ ишора йўқ.

Сайловолди қароргоҳига ташриф чоғида Камала Ҳаррис ўз сайловолди кампаниясини ўтмишда прокурор бўлиб ишлагани, шунинг учун ҳам “йиртқичлар” ва “товламачилар” билан яхши таниш эканини эслатишдан бошлади.

Мен Дональд Трамп каби одамлар тоифаси қандай бўлиши биламан”, дея билдирди Ҳаррис.

Дональд Трамп ижтимоий тармоқлардаги ўз саҳифасида Байденнинг сайловда иштирокдан бош тортишга оид қарори “қаҳрамонона қадам” деб аталаётганидан нолиди ва Ҳаррис номзодини “барбод” номзод деб атади.

Озодлик журналисти Алсу Курмашева 6,5 йилга қамалди

Алсу Курмашева
Алсу Курмашева

Татаристон Олий суди Озодликнинг татар-бошқирд хизмати журналисти Алсу Курмашевани олти ярим йилга озодликдан маҳрум қилиш ҳақида ҳукм чиқарган. Бу ҳақда Associated Press агентлиги суд матбуот хизматидан олинган маълумотга таянган ҳолда хабар қилди.

Курмашева суд томонидан Россия армияси тўғрисида “фейк” тарқатганликда айбдор деб топилган. Журналистлар Алсу Курмашевага нисбатан суд ҳукми 19 июль куни чиқарилганини урғулашмоқда.

Озод Европа/Озодлик радиоси президенти Стивен Капус ҳукмни “одил судлов устидан кулиш” деб атаб, “ягона адолатли чиқиш йўли – бу Алсуни зудлик билан қамоқхонадан озод қилиш” дея билдирган.

АҚШ фуқароси бўлган бу қадрли ҳамкасбимизнинг ўз севимли оиласи билан қовушиш вақти аллақачон етган”, деган Капус.

Алсу Курмашева 2023 йилнинг май ойи ўртасида оилавий шароити туфайли туғилган шаҳри Қозонга борган. 2 июнь куни у Прагага парвоз олдидан Қозон аэропортида қўлга олинган. Ундан АҚШ ва Россия паспорти олиб қўйилган (Алсу ҳам Россия, ҳам Қўшма Штатлар фуқароси бўлган).

Даставвал у иккинчи фуқаролик ҳақида Россия расмий идораларини хабардор қилмаганликда айбланиб, 10 минг рубллик жаримага тортилган. Кейинроқ Алсуга ўзини “хорижий агент” сифатида рўйхатга олишни сўраб, Россия расмийларига мурожаат қилмаганликда айбланган.

Орадан қарийб икки ой ўтгач, унга қарши Россия армияси тўғрисида “фейк” тарқатганлик бўйича жиноят иши қўзғатилган. Бунга Idel.Реалии таҳририяти томонидан чоп қилинган “Йўқолсин уруш. Украинага бостириб кирилишига қарши чиққан 40 нафар россияликнинг ҳикояси” (“Нет войне. 40 историй россиян, выступающих против вторжения в Украину”) китоби асос ўлароқ кўрсатилган.

Апрель ойи охирларида АҚШ президенти Жо Байден Владимир Путинни Алсу Курмашева ҳамда Россиядаги тергов ҳибсхонасида тутиб турилган The Wall Street Journal нашри журналисти Эван Гершковични озод қилишга чақирган. “Журналистиканинг жиноят эмаслиги мутлақо аниқ”, дея таъкидлаган Байден.

Шу йилнинг 25 апрелида Европарламент депутатлари Курмашева ва Гершкович дохил Россияда тутиб турилган сиёсий маҳбусларнинг барчасини “зудлик билан ва шартсиз озод қилиш”га чақирувчи резолюцияни маъқуллаган эди.

Алсунинг қўлга олиниши аввалроқ Канада, Чехия, Франция, Польша ва Швеция

ҳукуматлари, шунингдек, ЕИнинг ташқи ишлар ва хавфсизлик сиёсати олий вакили, Европа парламенти президенти, ЕХҲТнинг ОАВ эркинлиги бўйича вакили ва БМТнинг инсон ҳуқуқлари бўйича олий комиссари қоралаб чиқишган. Европа кенгашининг журналистика ҳимояси ва журналистлар хавфсизлигига кўмаклашиш платформаси Алсуни озод қилиш бўйича ўз чақириғини ёйинлаган.

Шу билан бирга, Amnesty International, Журналистларни ҳимоя қилиш қўмитаси, Freedom House, ПЕН-Америка, Чегара билмас мухбирлар, Халқаро журналистлар федерацияси, Халқаро матбуот институти каби халқаро ташкилотлар ҳам Алсунинг қўлга олинишини қоралаб, уни зудлик билан озод қилишга чақиришган.

Мигрантлар Россиядан 48 соат ичида бадарға қилиниши мумкин

Россия расмийлари полиция қарорига кўра мамлакатдан бадарға қилинажак хорижликлар ва фуқаролиги бўлмаган шахслар учун ушлаб туриш муддатини 48 соатгача қисқартиришмоқчи. Ҳозирда бу муддат кўпи билан 90 кунни ташкил этади.

ТАСС агентлиги хабарига кўра, хорижлик фуқароларни мамлакатдан чиқариб юбориш бўйича қонунчиликка тузатишлар киритилган тақдирда қўлга олинган мигрантлар мамлакатда икки кундан кўп қололмайди.

Қонун лойиҳасининг биринчи ўқишида ички ишлар идораларига хорижликларни Россиядан бадарға қилиш ҳуқуқи берилиши таклиф этилганди. Депутатлар бу тузатишларни қабул қилишган.

Эндиликда хорижликларни мамлакатдан чиқариб юбориш учун суднинг махсус қарори керак бўлмайди. Масалан, аввалроқ ИИВнинг Олтой ўлкаси бўйича бошқармаси ўз тенгдошига қарата туфлаган ўсмирнинг оиласи мамлакатдан бадарға қилиниши ҳақида маълумот тарқатган. Оилага Россияни тарк этиш учун 15 кун муҳлат берилган. Айни пайтда бу оила устидан ҳеч қанақа шикоят ёки ариза тушган эмас: полициячилар 14 ёшли ўсмирни кузатув камералари орқали топишиб, оиласи билан биргаликда полиция бўлимига олиб келишган.

“Крокус Сити Холл”даги теракт ортидан Россияда мигрантларга нисбатан ксенофобик кайфият кучайиб кетган. Россиялик расмийлар мазкур террор хуружининг амалга оширилишида бир неча тожикистонликни гумонлашмоқда.

Терактдан сўнг Россиянинг турли минтақаларида ҳуқуқ-тартиботчилар хорижликлар яшайдиган ва ишлайдиган жойларда рейдлар ўтказа бошлаганлар. Айрим ҳолатларда мигрантлар ҳарбий комиссариатларда қайддан ўтказилган. Бир пайтнинг ўзида Россияда миллатчиларнинг “рейдлари” ҳам бошланиб, бу “рейдлар” давомида улар мигрантларни ишдан бўшатиш ва қизларнинг рўмолларини ечиштиришни талаб қилишган.

Россияда мигрантларга қарши кайфият кучайиши манзарасида ўзбекистонликлар дохил Марказий Осиёдан бўлган меҳнат муҳожирлари мамлакат ҳудудига киришда узоқ муддатли текширувлардан ўтаётган ҳақида Озодлик аввалроқ хабар қилган эди.

Грузияликларнинг қарийб 70 фоизи Россияни “душман” деб билади

Иллюстратив сурат
Иллюстратив сурат

Грузияда фуқароларнинг 69 фоизи Россияни ўз мамлакатининг душмани, деб ҳисоблайди. “Кавказский барометр — 2024” тадқиқоти доирасида ўтказилган сўров натижалари шундан далолат бермоқда.

Мазкур кўрсаткич йилдан-йилга ўсиб бормоқда: 2021 йилдаги шу каби тадқиқотда грузияликларнинг 66 фоизини Россияни асосий душман деб билиши маълум бўлган. 2019 йили бу кўрсаткич 49 фоизни, 2017 йилда 40 фоизни, 2012 йилда эса 35 фоизни ташкил қилган эди.

Сўров чоғида сўралганларнинг бор-йўғи тўрт фоизи АҚШни Грузиянинг асосий душмани деб билишини айтган. Туркияни душман деб биладиганлар сони эса бундан ҳам икки баравар (бор-йўғи 2 фоиз) кам.

Бошқа томондан эса сўралганларнинг 24 фоизи АҚШни Грузиянинг энг яқин дўсти деб билишини айтган. Дўст мамлакатлар орасида иккинчи ўринни Озарбайжон (8 фоиз), учинчи ўринни Украина (7 фоиз) эгаллаган. Улардан кейин дўст мамлакатлар ўлароқ Туркия, Германия ва Арманистон кабилар саналган. Сўралганларнинг икки фоизигина Россияни Грузиянинг дўсти деб билишини айтган.

Айни пайтда сўралганларнинг чорак қисмидан кўпроғи (26 фоиз) Грузиянинг умуман дўсти йўқ, деган фикрда.

Сўров юзма-юз интервью шаклида жорий йилнинг 16 апрелидан 13 майида Грузиянинг бутун ҳудудлари бўйлаб ўтказилган, бироқ ўзини Грузиядан мустақил деб эълон қилган Абхазия ва Жанубий Осетия ҳудудлари бундан мустасно.

Сўровда жами 1509 киши иштирок этган, улар орасида арманлар зич яшайдиган Самцхе-Джавахети ҳамда озарбайжонлар зич яшайдиган Квемо Картли ўлкалари ҳам бўлган. Сўров грузин, армани ва озарбайжон тилларида олиб борилган.

Ўшда марказий бозор савдогарлари пикетга чиқишди

Ўш шаҳрида пикетга чиққан марказий бозор савдогарлари, 2024 йил 21 июли
Ўш шаҳрида пикетга чиққан марказий бозор савдогарлари, 2024 йил 21 июли

Қирғизистоннинг Ўш шаҳрида марказий бозорнинг 50 чоғли савдогари 21 июль куни аввалроқ сел ювиб кетган бозорни кўчириш муддатини узайтириш талаби билан пикетга чиқишган.

Озодликнинг қирғиз хизмати мухбири хабарига кўра, савдогарлар митингга “Халқ овозини эшитинг!”, “Бизга жой тайёрлаб беринг” ва бошқа плакатлар билан чиқишган. Улар бозор кўчирилишига қарши эмасликларини, бироқ расмийлардан аввалги жойда яна бир-икки ой ишлашга рухсат беришни сўрашаётганини билдиришган.

Марказий бозорда ўтказилган пикетдан сўнг савдогарлар Ўш шаҳар ҳокимлиги биносига йўл олишган. Улар бундай талаб билан 20 июль куни ҳам норозилик акциясини ўтказишган эди.

Эслатиб ўтамиз, 14 июль куни Ўшда кузатилган шиддатли жала туфайли Оқбура дарёси қирғоғидан тошиб чиққан, бунинг оқибатида шаҳар марказий бозори ва дарё қирғоғидаги объектлар сув остида қолган эди. Сел тошқини натижасида беш киши қурбон бўлган, улардан тўрт нафари битта оила аъзолари бўлишган.

20 июль куни Ўш шаҳар ҳокиимиятида ўтказилган йиғилишда марказий бозор Жапалақ ҳудудий бошқармаси ҳудудига кўчирилиши маълум бўлган. Ўша пайтда селдан зарар кўрган савдогарларга 100 минг сўмдан (тақрибан 1180 АҚШ доллари) ёрдам пули берилажаги айтилган.

Ўш шаҳри ҳокимининг ўринбосари Марс Исаев 22 июль куни ҳозирда ҳеч ким марказий бозор савдогарлари ишига тўсқинлик қилаётганини билдирди. Мулозимга кўра, сел оқибатларини бартараф қилиш чоғида бозор чиқинди ва лойдан тозаланган ҳамда бозорнинг сув босишига сабаб бўлган ноқонуний объектларни бузиш бўйича ишлар давом эттирилмоқда.

“Янги бозор икки ой давомида тўлиқ қуриб битказилади ва марказий бозор янги муниципал бозорга кўчирилади. Янги бозор қурилиши тугагунига қадар савдогарлар эски жойларида ишлашда давом этишлари мумкин”, дея қўшимча қилган вице-мэр Марс Исаев.

Глобал носозлик туфайли юзлаб ширкатнинг иши тўхтаб қолди

Иллюстратив сурат
Иллюстратив сурат

Windows операцион тизимида юзага келган глобал носозлик туфайли дунёнинг турли мамлакатларида аэропортлар, вокзаллар, банклар, супермаркетлар, телеканаллар ва ҳукумат муассасалари ишламаяпти. Носозлик АҚШ, Австралия, Янги Зеландия, Япония, Ҳиндистон, Туркия, Исроил, Буюк Британия ва Европанинг бошқа мамлакатларидаги ширкатлар фаолиятига дахл қилган.

Хабарларга кўра, энг йирик авиаширкатлар парвозларни тўхтатиб қўйган, аэропортларда хаос ҳолати кузатилмоқда, Лондон фонд биржаси янгиликлар ёйинлашни тўхтатган.

Британиядаги Sky News телеканали ва айри мамлакатларнинг телеканаллари носозлик туфайли ёйинини тўхтатиб қўйган.

Гаджетларда “Компьютерингиздаги носозликнинг олдини олиш учун Windows фаолияти тўхтатиб қўйилди” деган ёзув билан “кўк экран” пайдо бўлмоқда, дея хабар қилди Sky News.

Microsoft корпорацияси Windows 10 операцион тизимидаги носозлик CrowdStrike антивируси янгиланишидаги хато туфайли юзага келганини маълум қилди. Ширкат бунинг киберҳужум эмаслигини таъкидлаб, ҳозирда авария “оқибатларини юмшатиш бўйича чора-тадбирлар” кўрилаётганини маълум қилган.

ТАСС агентлигининг хабар қилишича, Ўзбекистон дохил қатор постсовет мамлакатларида, жумладан Озарбайжон, Арманистон, Грузия, Қирғизистон, Қозоғистон, Тожикистон ва Туркманистонда аэропортлар, алоқа тармоқлари, банкларга оид ва бошқа иловалар ишида ҳеч қанақа муаммо кузатилаётгани йўқ.

Қирғизистонга Суриядан 8 нафар аёл ва 14 нафар бола қайтарилди

Суриядан ватанига қайтарилган қирғизистонликлар (архив сурати)
Суриядан ватанига қайтарилган қирғизистонликлар (архив сурати)

Жорий йилнинг 19 июль куни Қирғизистон “Айкўл-6” гуманитар дастури доирасида Суриядан ўзининг 22 нафар фуқаросини қайтариб олиб келган. Бу ҳақда Қирғизистон Ташқи ишлар вазирлиги матбуот хизмати маълумот тарқатди.

ТИВ маълумотига кўра, саккиз нафар аёл ва 14 нафар бола Қирғизистонга Сурия шимолий-шарқидаги қочқинлар лагеридан олиб келинган. Вазирлик инсонпарварлик миссияси АҚШ ҳукуматининг бевосита кўмагида ташкил этилганини қайд этган.

Инсонпарварлик миссиясини амалга ошириш чоғида қирғиз делегацияси Қирғизистон фуқаролари билан учрашиш ва идентификация тадбирларини амалга ошириш учун “Ал-Ҳол” лагерига боришди”, дейилган Қирғизистон ТИВ хабарномасида.

Бу Қирғизистон фуқароларини Суриядан қайтариш бўйича олтинчи инсонпарварлик миссия бўлиб ҳисобланади. Февраль ойида ўтказилган “Айкўл-5” миссияси чоғида 28 нафар аёл ва 71 нафар бола ватанига қайтарилган эди. 2023 йил декабрида эса “Айкўл-4” дастури бўйича 31 нафар аёл ва 65 нафар бола Суриядан олиб келинган. “Айкўл” инсонпарварлик миссияси доирасидаги репатриациянинг биринчи босқичи эса ўтган йилнинг февраль ойида амалга оширилган. Ўшанда Қирғизистонга Суриядан 18 нафар аёл ва 41 нафар бола келтирилган.

Қирғизистон махсус хизматлари маълумотига кўра, 2018 йили Суриядаги жанговар ҳаракатлар ҳудудига 850 нафар қирғизистонлик чиқиб кетган, улардан 150 нафари ҳалок бўлган. Ўшанда террор ташкилотлари сафига қўшилган қирғизистонликларнинг 140 нафари аёллар экани айтилган.

2022 йил охирида Қирғизистон ташқи ишлар вазири Жээнбек Кулубаев Сурия ва Ироқ қамоқхоналарида бўлган 200 нафар қирғизистонлик аёл ва 400 нафар боланинг рўйхати тузилганини маълум қилган эди.

Яқин Шарқдаги жанговар ҳаракатлар ҳудудига 2013 йилдан буён Марказий Осиё мамлакатларидан бўлган минглаб киши чиқиб кетган. Ўзбекистон дохил минтақа давлатлари ўз фуқароларини Яқин Шарқ мамлакатларидан қайтариш бўйича бир неча бор инсонпарварлик миссияларини амалга оширишган. Хусусан, ўзбек расмийлари томонидан “Меҳр” номи билан 2019 йилдан бери амалга ошириб келинаётган амалиётлар чоғида Сурия, Ироқ ва Афғонистондан бир неча юз аёл ва бола ватанига қайтарилгани маълум.

Украинада асирга тушган ўшлик эркак Россияга қайтарилди

Алишер Турсунов (видеодан скриншот)
Алишер Турсунов (видеодан скриншот)

Украинада тутқунликда бўлган қирғизистонлик Алишер Турсунов россиялик расмийларга қайтариб берилди. Бу ҳақда “Украина — Марказий Осиё” телеграм-канали Украинанинг “Яшашни истайман” деб номланган ҳарбий асирлар мурожаати бўйича мувофиқлаштирувчи марказидан олинган маълумотга таянган ҳолда хабар қилди.

Телеграм-канал қайдича, Турсунов Россияга 17 июль куни қайтарилган — шу куни Украина ва Россия “95 га 95” шаклида ўзаро асир алмашишган эди. Асир алмашилгани ҳақида аввалроқ Россия Мудофаа вазирлиги ҳам маълум қилганди. Бундан ташқари, Турсуновнинг исми Россия армияси ҳарбийларини қидириб топиш ва уйига қайтариш бўйича “Бизнинг чиқиш” (“Наш Выход”) деб номланган жамоатчилик ҳаракати эълон қилган озод қилинмиш россиялик ҳарбийлар рўйхатида ҳам бор.

57 ёшли Алишер Турсунов ўзининг асирга тушгани ҳақида айтиб берган видео шу йилнинг май ойи охирида ижтимоий тармоқларда тарқалган эди. Мазкур роликда Турсунов ўзининг Қирғизистон фуқароси эканини, Ўшда туғилганини ҳақида иддао қилган.

У Рязанга ўғлининг ёнига келган пайтда полиция томонидан ушланганини маълум қилган. Турсунов армияда хизмат қилиш шартномасини мажбуран имзолагани, бунинг учун унга пул, паспорт ва ҳарбий билет ваъда қилинганини айтган. Унинг иддаосича, шартнома имзоланганидан кейин уни полигонга олиб боришган ва ўша ерда у уч кун давомида махсус тайёргарликдан ўтган. Видео охирида Турсунов урушга ўз ихтиёри билан кетмаганини айтиб, Қирғизистон расмийларидан ватанига қайтишда унга ёрдам беришни сўраган.

Алишер Турсунов Россия армияси сафида Украинада жанг қилган ягона қирғизистонлик эмас. Шундайлардан бири Асқар Қубаничбек ўғли бўлиб, у Қирғизистонда қамоқ жазосига ҳукм қилинган. Аммо пробацион назорат шарти билан озод қилинганидан кейин у яна чегарадан ноқонуний ўтиб, Россияга кетган ва Россия армияси билан янги шартнома имзолаган.

Қўлга олинганлардан яна бири норинлик Бекназар Бўругул ўғли бўлиб, у ҳам “Вагнер” хусусий ҳарбий ширкати таркибида Украинадаги урушда қатнашгани учун судланган. Кейинроқ у Норин вилоят суди томонидан муддатидан илгари озод қилингани маълум бўлган. Суд вакиллари Қирғизистон президенти томонидан 2023 йил 31 январида имзоланган “Судланганларни афв қилиш тўғрисида”ги фармонга мувофиқ, унинг жазо муддати тўрт йилга қисқартирилгани, шу асосда у озодликка чиққанини маълум қилишган.

Томскда мигрантларга такси ва кафеларда ишлаш тақиқланди

Иллюстратив сурат
Иллюстратив сурат

Россиянинг Томск вилоятида меҳнат муҳожирларига такси хизматини кўрсатиш, умумий овқатланиш ва таълим муассасаларида ишлаш тақиқлаб қўйилди. Бу ҳақда вилоят губернатори Владимир Мазур ўз телеграм-канали орқали маълум қилди.

Мулозимга кўра, мазкур қарор “аксилтеррор комиссияси томонидан миллий диаспора вакилларининг бевосита иштирокида” қабул қилинган.

Қарорга мувофиқ, жорий йилнинг 1 ноябридан Томск вилоятида меҳнат патентига эга бўлган хорижликлар озиқ-овқат маҳсулотлари ва тайёр овқатлар ишлаб чиқариш, чакана савдо, таксида йўловчи ташиш, шаҳар ва шаҳарлараро транспорт воситаларини бошқариш, меҳмонхона ва ресторан бизнеси, мутахассис танлаш, хавфсизликни таъминлаш, умумий, ўрта касбий ва олий таълим, жисмоний тарбия ва спорт соҳаларида ишлаш тақиқланади.

Аввалроқ “Агентство” нашри Россия ҳудудларининг учдан бирида мигрантлар фаолиятига чеклов киритилгани ҳақида ёзган эди. Бундан ташқари, Россия томонидан аннексия қилинган Қримда ҳам мигрантлар фаолиятига чеклов киритилган.

Айни пайтда Россиянинг 27 та минтақасида мигрантларга таксида ишлаш ман қилинган. Меҳнат муҳожирларининг савдо соҳасида ишлашга эса 18 та минтақада чеклов жорий этилган. Айрим вилоятларда мигрантларнинг меҳмонхона бизнеси, умумий овқатланиш шохобчалари, кутубхоналар ва ҳатто молиявий хизмат соҳасида ишлаши тақиқланган.

2023 йил охиридан бошлаб маҳаллий расмийлар Россия паспортини олган ва Украинадаги урушга боришни истамаган хорижликларни излаб топиш бўйича рейдлар сонини икки баравар оширишган.

Давомини ўқинг

XS
SM
MD
LG