Линклар

Шошилинч хабар
22 октябр 2020, Тошкент вақти: 15:24

Ўзбекистон хабарлари

ИИВ Андижондаги қотиллик ортидан тизимни шаффофлаштиришга ваъда бермоқда

30 май куни Андижонда қийноққа тутилган 32 ёшли Алижон Абдукаримов ​11 июнь куни жон таслим қилганди.

Шу йил 30 май куни Андижонда содир бўлган ҳодиса Ички ишлар вазирлигининг камчиликлари тўғрисида эслатиб туради. Бу ҳақда ИИВ ахборот хизмати раҳбари Шоҳруҳ Ғиёсов мазкур воқеага бағишланиб 1 июль куни Халқаро пресс-клубда бўлиб ўтган брифингда билдирган.

Брифингда ИИВдан ташқари Олий суд, Бош прокуратура ва Инсон ҳуқуқлари Миллий маркази вакиллари иштирок этган.

Эслатиб ўтамиз, 30 май куни Андижон шаҳар ИИБсининг 4-бўлимидан қийноқ белгилари билан кома ҳолатида касалхонага ётқизилган 32 ёшли Алижон Абдукаримов ​11 июнь куни ҳаётдан кўз юмганди. Ҳодиса ортидан ИИБнинг уч нафар ходими мансаб ваколати доирасидан четга чиқиш, қонунга хилоф равишда ҳибсга олиш, гумонланувчини қийноққа солиш ҳамда шафқатсиз муомала қилишда айбланиб, қамоққа олинган.

Шоҳруҳ Ғиёсов бугунги брифингда мазкур воқеада айбдор топилганлар жазосиз қолмаслигини урғулаган.

Андижонда бўлган ҳолат юзасидан ҳар бир айбдор жавобгарликка тортилади ва тизимимизни шаффофлаштирамиз. Ҳолат юзасидан барчадан узр сўраймиз”, деган ИИВ масъули.

Брифингда Ўзбекистон Бош прокуратураси матбуот хизмати раҳбари Ҳаёт Шамсутдинов Андижондаги ҳодиса юзасидан ИИБнинг яна икки ходими ҳам ҳибсга олинганини билдирган. Шу тариқа “қийноқ иши” бўйича қўлга олинган ИИБ вакиллари сони 5 нафарга етган.

Ўзбекистон президенти Шавкат Мирзиёев 30 июнда ўтган одил судловни таъминлаш ва коррупцияга қарши курашиш борасидаги вазифалар муҳокамасига бағишланган видеоселектор йиғилишида Андижон ва Чироқчида фуқаролар ички ишлар идораларидаги қийноқлар ортидан вафот этганини кескин танқид қилгани ҳақида Озодлик аввалроқ хабар қилган.

Кун янгиликлари

ОТБ Ўзбекистондан Афғонистонга электр узатиш линияси қурилиши учун 110 млн доллар ажратди

Осиё тараққиёт банки ва Афғонистон расмийлари шу йилнинг 20 октябрь куни Кобулда Ўзбекистон делегацияси иштирокида 110 млн доллар ажратишни назарда тутувчи "Сурхон-Пули-Хумри" электр узатиш линиясини қуриш лойиҳасини молиялаштириш тўғрисида битим имзоладилар. Бу ҳақда Ўзбекистон Инвестициялар ва ташқи савдо вазирлиги матбуот хизмати маълумот тарқатди.

Қайд этилишича, ОТБ ажратган маблағнинг асосий қисми ташкилотнинг ўзбек пудратчилари томонидан амалга оширилиши режалаштирилган қурилиш ишларига йўналтирилади.

Яқин келажакда "Ўзбекистон миллий электр тармоқлари" АЖ ва "ДА Афғонистон Брешна Ширкат" ўртасида ушбу электр узатиш линиясини қуриш бўйича тегишли шартнома имзоланади”, дейилади вазирлик хабарномасида.

Маълумотларга кўра, сешанба куни Ўзбекистон ҳукумати делегациясининг Кобул шаҳрига ташрифи доирасида Ўзбекистон Республикаси ва Афғонистон Ислом Республикаси вазирлик ва идоралари раҳбарларининг кенгайтирилган таркибдаги учрашуви бўлиб ўтган.

Учрашувда Ўзбекистон томонини Инвестициялар ва ташқи савдо вазирлиги, Ташқи ишлар вазирлиги, Энергетика вазирлиги, “Ўзбекистон темир йўллари” АЖ ва бошқа ташкилотлар раҳбарияти тамсил этган.

Ҳокими пневмониядан вафот этган Олтинкўл туманига янги раҳбар тайинланди

Иллюстратив сурат.

Халқ депутатлари Олтинкўл туман кенгашининг навбатдан ташқари сессиясида Андижон вилояти Олтинкўл тумани ҳокими лавозимига Матрузиев Иқболбек Ҳасанбоевич тайинланган. Бу ҳақда Андижон вилояти ҳокимлиги матбуот хизмати 22 октябрь куни маълумот тарқатди.

Қайд этилишича, 1984 йилда Андижон вилоятининг Жалақудуқ туманида туғилган И. Матрузиев 2008 йили Андижон давлат университетини тамомлаган.

Меҳнат фаолиятини 2003 йили Жалақудуқдаги болалар боғчасида бошлаган Матрузиев, Андижон вилояти ҳокимлиги вакилларига кўра, Олтинкўл туманига ҳоким бўлиб тайинлангунига қадар вилоят Бандлик бош бошқармаси бошлиғи лавозимида ишлаб келган.

Олтинкўл туманининг олдинги ҳокими Назиржон Ўринбоев пневмониядан вафот этгани ҳақида Озодлик аввалроқ хабар қилган.

Хитой вакцинасини Ўзбекистонда клиник синовдан ўтказиш режалаштирилди

Клиник синовлар 18 ва ундан катта ёшдаги кўнгиллиларда ўтказилиши кутилмоқда.

Инновацион ривожланиш вазирлиги коронавирусга қарши рекомбинант вакцинанинг клиник синовларини Ўзбекистонда ташкил этиш масаласи бўйича Хитой Фанлар Академияси Микробиология институти ва “Anhui Zhifei Longcom Biopharmaceutical” компанияси вакиллари билан музокаралар ўтказди.

Инновацион ривожланиш вазирлигининг 22 октябрда маълум қилишича, музокаралар давомида ўтказиладиган клиник синовларнинг барча босқичлари муваффақиятли якунланган тақдирда, Ўзбекистон ушбу вакцинани биринчилардан бўлиб ҳамда арзон нархларда харид қилишда устуворликка эга бўлиши таъкидланди.


Инновацион ривожланиш вазирлиги мутахассислари хитойлик ҳамкорлар билан эмлаш жараёнини ташкил этиш, жараёнга тайёргарлик кўриш масалаларини муҳокама қилди.


Клиник синовлар 18 ва ундан катта ёшдаги кўнгиллиларда ўтказилиши кутилмоқда. Синов бошланишидан олдин Хитой Халқ Республикаси вакиллари томонидан эмлаш шартларини тушунтиришга қаратилган бир қатор тренинглар ўтказилади.


29 сентябрь куни Ўзбекистон ҳукумати Хитойнинг иккита компанияси билан коронавирусга қарши вакциналар синовининг сўнгги босқичларини ўтказиш бўйича битимлар имзолагани хабар қилинган эди.


25 сентябрь куни Халқаро пресс-клуб йиғилишида Санитария-эпидемиологик осойишталик агентлиги директори, соғлиқни сақлаш вазирининг биринчи ўринбосари Баҳодир Юсупалиев Ўзбекистон Россия ширкатларига ҳам Россия вакцинасини ҳамкорликда синовдан ўтказишни таклиф қилгани ва бу масалада Россия томонининг жавоби кутилаётганини билдирган.


25 сентябрь куни Россия тўғридан тўғри инвестициялар жамғармаси Ўзбекистонга коронавирусга қарши 35 миллион доза «Спутник V» вакцинасини жўнатиш тўғрисида Laxisam фармацевтика ширкати билан шартнома имзолангани тўғрисида билдирган эди.


Хабарда айтилишича, Ўзбекистон мувофиқлаштириш ва назорат органлари рухсати олинганидан сўнг 2020 йилда республикага 10 миллион доза, 2021 йилда эса 25 миллион доза вакцина жўнатилади.

Шифокор қабулига электрон ёзилиш тизими ишга туширилди

“Электрон поликлиника” ахборот тизимига Тошкент шаҳри ва вилоятлардаги оилавий поликлиникалар уланган.

Шифокор қабулига ёзилиш имкониятини берувчи “Электрон поликлиника” тизими ишлаб чиқилди ва жорий этилди. Бундан буён reg.ssv.uz сайти орқали шифокор қабулига онлайн ёзилиш имконияти мавжуд. Мазкур тизимнинг қўлланилиши ортидан шифокор қабулига кириш учун навбатга туриш эндиликда керак бўлмайди. Бу ҳақда Соғлиқни сақлаш вазирлиги маълум қилди.


Бугунги кунда “Электрон поликлиника” ахборот тизимига Тошкент шаҳри ва вилоятлардаги оилавий поликлиникалар уланган. Айни пайтда бутун республика бўйлаб поликлиникаларни тизимга улаш ишлари давом эттириб келинмоқда.


“Ушбу тизим ёрдамида фуқаролар ўзлари учун қулай вақтда, уйдан чиқмаган ҳолда шифокор қабулига ёзилишлари, шифокор ва муассаса ҳақида маълумотлар олишлари, шунингдек, олинган тиббий хизматлар сифатини баҳолашлари мумкин бўлади. Поликлиникалар учун ушбу тизимнинг афзалликлари – маълумотларни автоматлаштирилган рўйхатдан ўтказиш, оилавий поликлиникаларда ягона электрон амбулатория тиббий картасини юритиш имкониятидир”,-дейилади хабарда.

Тошкент вилоят ҳокимининг биринчи ўринбосари вафот этди

Баҳодир Муллахонов февраль ойидан Тошкент вилояти ҳокимининг биринчи ўринбосари бўлиб ишлаб келаётган эди.

Тошкент вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Баҳодир Муллахонов 21 октябрь куни вафот этди.


Вилоят ҳокимлиги билдирган таъзияномада Баҳодир Муллахоновнинг ўлими сабаблари маълум қилинмаган.


«Газета.uz» нашрининг ўз манбасига таянган ҳолда ёзишича, Муллахонов “коронавирус келтириб чиқарган асоратлар натижасида вафот этган”.


Маълум қилинишича, Муллахонов дастлаб Тошкентдаги Республика шошилинч тиббий ёрдам илмий марказида, сўнг хусусий клиникада даволанган.


1974 йилда туғилган Баҳодир Муллахонов 1996 йилда Тошкент давлат иқтисодиёт университетини тугатган. 1998 йилда эса Оклахома давлат университетининг магистр даражасини олган.


У турли йилларда Марказий банк тузилмаларида ишлаган, шунингдек, «Асака» банки бошқарув раисининг ўринбосари, 2012−2020 йилларда «Қишлоқ қурилиш банк» бошқарув раиси лавозимида ишлаган.


Жорий йилнинг февраль ойидан у Тошкент вилояти ҳокимининг биринчи ўринбосари бўлиб ишлаб келаётган эди.

Зироат Мирзиёеванинг фонди ҳаво ифлосланишини аниқлаш лойиҳасини амалга оширмоқда

Зироат Мирзиёева. "Замин" фонди фотоси.

“Замин” фонди васийлик кенгаши раиси Зироат Мирзиёева иштирокида БМТнинг Атроф-муҳит дастури (ЮНEП), БМТнинг Европа иқтисодий комиссияси, БМТнинг Тараққиёт дастури, Экология ва атроф-муҳитни муҳофаза қилиш давлат қўмитаси билан ўтказилган видеоанжуманда, «Замин» фонди атмосфера ҳавоси ифлосланиши мониторингини автоматлаштириш лойиҳасининг биринчи босқичи якунига етгани маълум қилинди.


“Замин” фондининг маълум қилишича, лойиҳанинг биринчи босқичида 63 та кузатув пункти ягона таҳлилий марказга бирлаштирилди. Мониторинг натижалари эса monitoring.meteo.uz очиқ онлайн платформаси ва АирУз мобил иловасида эълон қилиб борилмоқда.


Лойиҳа уч босқичда амалга оширилиши режалаштирилган. Иккинчи босқичда бутун республика бўйлаб автоматик ҳаво мониторинги станцияларини ўрнатиш ва ҳаво мониторинги учун халқаро стандартларни жорий этиш кўзда тутилган.


Учинчи босқичда мониторинг натижалари республикадаги Ягона геоинформацион маълумотлар базасига киритилиб, халқаро ахборот тизимларига интеграцияланади.


“Ушбу станциялар тўлиқ ишга тушиши натижасида, ҳаво сифати мониторинги халқаро стандартларга мувофиқ ҳар соатда аниқлаб турилади. Фуқаролар ўзи истиқомат қиладиган жойининг ҳавосини ифлосланганлик даражасини ва унинг сабабларини аниқ билиш имконига эга бўлади”,-дейилади хабарда.

Коронавирусга чалинганлар сони 64 мингдан ошди

Расман даволаниш кўрсаткичи 95 фоизни ташкил этмоқда.

Соғлиқни сақлаш вазирлигининг 22 октябрда маълум қилишича, сўнгги бир сутка ичида 304 кишида коронавирус аниқланди ва 355 нафар бемор тузалди.


Бу билан 21 октябрь ҳолатига кўра,коронавирусга чалинганлар сони 64216 нафарга етди. Улардан 61423 нафари соғайиб, даволаниш кўрсаткичи 95 фоизни ташкил этмоқда.


Вазирлик бир суткада коронавирусга чалинган 2 нафар бемор вафот этиб, жами кўрсаткич расман 536 нафар бўлганини билдирди.


Айни пайтда тиббиёт муассасаларида даволанаётган 2 257 нафар бемордан 290 нафари оғир, 79 нафари эса ўта оғир аҳволда.

Махсус поездлар билан Россиядан 9 минг чоғли ўзбекистонликни юртига қайтариш режаланмоқда

Иллюстратив сурат.

Жорий йилнинг октябрь ойи охири ва ноябрь ойи бошларида Волжский-Тошкент йўналиши бўйлаб қатнайдиган 9 та махсус йўловчи поезди Россиянинг Волгоград вилоятидан Ўзбекистонга йўл олади. Бу ҳақда Интерфакс агентлиги “Волгабўйи темир йўли” матбуот хизматидан олинган маълумотларга таянган ҳолда хабар қилди.

Поездлар Волжский станциясидан 22, 23, 25, 26, 28, 29 ва 31 октябрь ҳамда 1 ва 2 ноябрь кунлари маҳаллий вақт билан соат 21:57 да жўнайди. 20 та вагондан иборат поездлар 938 нафар йўловчини ташишга мўлжаллангани ва Россия ҳудудида ҳеч қаерда тўхтамай кетиши айтилмоқда.

Қайд этилишича, мазкур поездларга чипталарни йўловчилар Ўзбекистон фуқароси эканини тасдиқловчи ҳужжатларни кўрсатиб, исталган темирйўл кассасидан сотиб олишлари мумкин.

Аввалроқ Россия транспорт вазирлиги ва “Россия темир йўллари” ширкати ўзбекистонликларни Россиядан олиб чиқиб кетиш учун 25, 29 сентябрь ва 1, 5, 8, 11, 12, 15, 18 октябрь кунлари Волжский-Тошкент йўналиши бўйлаб ўнта махсус поезд рейси ташкил қилгани, бу поездларда умумий ҳисобда Ўзбекистонга 11 мингдан зиёд муҳожир қайтгани хабар қилинганди.

Бундан ташқари, сентябрь ойи бошидан бошлаб Ростов вилоятидан махсус поездларда Россиянинг турли жойларидан келган 8 мингдан зиёд ўзбекистонлик муҳожир юртига йўлланган.

Мирзиёев АҚШ генерали билан ҳарбий-техник ҳамкорлик масалаларини муҳокама қилди

Ўзбекистон президенти Шавкат Мирзиёев ва АҚШ Қуролли кучлари Марказий қўмондонлиги қўмондони генерал Кеннет Маккензи, Тошкент, 2020 йил 20 октябри.

Президент Шавкат Мирзиёев 20 октябрь куни Ўзбекистонга амалий ташриф билан келган АҚШ Қуролли кучлари Марказий қўмондонлиги қўмондони генерал Кеннет Маккензини қабул қилган.

Президент матбуот хизмати маълумотига кўра, суҳбат чоғида Ўзбекистон-АҚШ муносабатлари ва минтақавий кун тартибининг долзарб масалалари муҳокама қилинган, хавфсизлик ва барқарорликка таҳдидлар ҳамда глобал хатарларга қарши курашиш мавзуларига алоҳида эътибор қаратилган. Шунингдек, Афғонистонда тинчлик жараёнини қўллаб-қувватлаш ҳамда бу мамлакатнинг иқтисодий тикланишига амалий кўмак кўрсатиш юзасидан фикр алмашилган.

Учрашув пайтида икки томонлама ҳарбий ва ҳарбий-техник ҳамкорлик масалалари ҳам кўриб чиқилган.

Қайд этилишича, генерал Маккензи Қўшма Штатлар икки мамлакат ўртасидаги стратегик шерикликни мустаҳкамлаш, кенг кўламли ҳамкорликни кенгайтириш борасида қатъий эканини таъкидлаган.

Ташқи савдо айланмаси тақрибан 3 миллиард 760 миллион долларга камайди

Жорий йилнинг январь-сентябрь ойларида Ўзбекистоннинг ташқи савдо айланмаси 27 миллиард 490 миллион 100 минг АҚШ долларини ташкил этган. Бу 2019 йилнинг шу даврига нисбатан 3 миллиард 757 миллион 900 минг АҚШ долларига (ёки 12 фоизга) камдир. Бу маълумотлар Давлат статистика қўмитаси томонидан ёйинланган ТСАга оид ҳисоботда акс этган.

Қайд этилишича, 2020 йилнинг 9 ойи ичида ташқи савдо айланмасида экспорт ҳажми 12 миллиард 471 миллион 300 минг АҚШ долларига (6 фоизга қисқарган), импорт ҳажми эса 15 миллиард 18 миллион 900 минг АҚШ долларига (16,5 фоизга қисқарган) етди.

Бугунги кунда Ўзбекистон жаҳоннинг 160 дан ортиқ мамлакати билан савдо алоқаларини амалга ошириб келяпти. Давстатқўм маълумотларига кўра, ташқи савдо айланмасининг 16,8 фоизлик ҳиссаси Хитойга, 14,8 фоизи – Россия Федерациясига, 7,3 фоизи – Қозоғистонга, 5,8 фоизи – Жанубий Кореяга, 5,2 фоизи – Туркияга, 2,4 фоизи – Қирғизистонга, 2,1 фоизи эса Германияга тўғри келади.

Ташқи иқтисодий фаолият бўйича 20 та йирик ҳамкор-давлат орасидан бешта давлатда фаол ташқи савдо баланси кузатилган, хусусан, Афғонистон (539 миллион 600 минг АҚШ доллари), Қирғизистон (461 миллион 500 минг АҚШ доллари), Тожикистон (219 миллион 400 минг АҚШ доллари) ва Эрон (38,3 млн. АҚШ доллари) шулар жумласидандир.

“Қолган 16 та давлат билан пассив ташқи савдо баланси сақланиб қолмоқда”, дейилади Давлат статистика қўмитаси ҳисоботида.

Туркманистондан Ўзбекистонга электр энергияси етказиб берилаётган тармоқда авария содир бўлди

Иллюстратив сурат.

Туркманистон энергетика тизимига қарашли 500 кВли “Сердар-Мари ГРЭС” деб номланувчи юқори кучланишли электр тармоғи 21 октябрь куни тонгги соат 06:52 да фавқулодда ўчган.

“Ўзбекистон миллий элекр тармоқлари” акциядорлик жамияти ахборот хизмати маълумотига кўра, ушбу ҳаво тармоғи орқали Ўзбекистонга 750 МВтгача электр энергияси импорт қилинаётган эди.

Ҳаво тармоғида содир бўлган носозлик туфайли аварияга қарши автоматиканинг ишлаши оқибатида Ўзбекистон энергетика тизимидаги истеъмолчилар вақтинча тармоқдан узилган.

“Тонгги соат 7:00 дан бошлаб электр станциялардаги мавжуд резерв қувватларни ошириш орқали тармоқдан узилган истеъмолчиларга кучланиш бериш бўйича зарур чоралар кўрилмоқда”, дейилади “Ўзбекистон МЭТ” хабарномасида.

Қайд этилишича, ҳозирги пайтда Туркманистон энергетика тизими мутахассислари ҳаво тармоғини қайта ишга қўйиш учун созлаш ишларини олиб боришмоқда.

Сенат аъзолари қимматбаҳо металларга оид қонунни рад этишди

Олий Мажлис Сенати биноси.

Ўзбекистон Олий Мажлиси Сенатининг саккизинчи ялпи мажлисида “Қимматбаҳо металлар ва қимматбаҳо тошлар тўғрисида”ги қонун сенаторлар томонидан рад этилди. Бу ҳақда парламент юқори палатаси ахборот хизмати маълум қилди.

Қайд этилишича, мажлисда мазкур қонун Сенат қўмитаси, тегишли вазирлик ва идоралар мутахассислари ва экспертлар томонидан кўриб чиқилиши жараёнида унинг айрим моддалари қўйиладиган талабларга жавоб бермаслиги аниқланган.

Хусусан, ушбу қонуннинг 12-моддаси бешинчи ва 25-моддаси олтинчи хатбошиларини “Банклар ва банк фаолияти тўғрисида”ги қонунининг 5-моддасига мувофиқлаштириш мақсадга мувофиқлиги билдирилган.

Сенаторлар давлатнинг қимматбаҳо металларни саноат усулида қазиб олишни амалга оширувчи корхоналар фаолиятига аралашувини камайтириш мақсадида қонуннинг тегишли моддалари нормаларини қайта кўриб чиқиш ва 15-моддаси талабларини амалдаги қонунчилик ҳужжатлари нормаси билан мувофиқлаштириш зарурлигини таъкидлаганлар.

Яна бошқа айрим камчиликларни эътиборга олган ҳолда, Сенат аъзолари “Қимматбаҳо металлар ва қимматбаҳо тошлар тўғрисида”ги қонунни рад этиш ҳақида қарор қабул қилганлар.

Президент: Ўзбек тили деярли 50 миллион киши сўзлашадиган йирик тилга айланмоқда

Ўзбек оқсоқоллари.

Президент Шавкат Мирзиёев ўзбек тилига давлат тили мақоми берилган кун муносабати билан Ўзбекистон халқига табрик йўллади.


Президент матбуот хизматида эълон қилинган табрик матнида айтилишича, “ҳозирги вақтда ер юзида ўзбек тилида сўзлашувчилар сони қарийб 50 миллион кишини ташкил этиши унинг дунёдаги йирик тиллардан бирига айланиб бораётганидан далолат беради”.


Президентнинг билдиришича, бугунги кунда хорижий давлатлардаги 65 та олий ўқув юртида ўзбек тили ва адабиёти ўрганилмоқда.


“Куни кеча Афғонистон Ислом Республикасида Ўзбек тили кунига бағишланган байрам тадбирлари биринчи марта давлат миқёсида нишонланганини мамлакатимиз жамоатчилиги, бутун ўзбек халқи катта мамнуният ва хурсандчилик билан олқишлади”, - дейилади президент табригида.


Шавкат Мирзиёев 2020 йилнинг 10 апрель куни «Ўзбек тили байрами кунини белгилаш тўғрисида»ги қонунни имзолаганди.

Қонунга асосан, ҳар йили 21 октябрь Ўзбек тили байрами куни сифатида нишонланади.

Янги фармон: Амалдорлар ўзбек тилини билиши шарт

Хорижликларга ўзбек тилини ўргатиш бўйича дарсликлардан бири.

2021 йил 1 апрелдан давлат амалдорларининг ўзбек тилида расмий иш юритиш даражаси аниқланади ҳамда масъул лавозимларга тайинланадиган шахслар учун давлат тилини билиш бўйича даража сертификатлари жорий этилади.

Бу борадаги меъёр президент 20 октябрда имзолаган «Мамлакатимизда ўзбек тилини янада ривожлантириш ва тил сиёсатини такомиллаштириш чора-тадбирлари тўғрисида"ги фармонда белгилаб қўйилди.

Фармон билан 2020-2030 йилларда ўзбек тилини ривожлантириш ва тил сиёсатини такомиллаштириш концепцияси тасдиқланди.

Концепциянинг асосий йўналишларига асосан 2025 йилгача давлат мактабгача таълим тизимида ўзбек тилли гуруҳлар қамровини 72 фоизга, 2030 йилгача эса 80 фоизга етказиш, 2030 йилгача мактабларда ўқув йиллари учун таянч ўқув режаларида она тили фанини ўқитиш кўламини ҳафтада 84 соатдан 110 соатгача ошириш режалаштирилган.

ОТМда ўзбек тили кафедралари сонини 2025 йилгача 120 тага, 2030 йилгача эса 140 тага етказилади. Бундан ташқари лотин ёзувига асосланган ўзбек алифбосида «Ўзбекистон миллий қомуси» жилдларини нашр этиш босқичма-босқич кўпайтирилади.

Вазирлар Маҳкамаси ҳузуридаги Ўзбек тилини ривожлантириш жамғармаси маблағлари ҳисобидан ўзбек тилидан жаҳоннинг етакчи хорижий тилларига ва хорижий тиллардан ўзбек тилига таржима қилувчи компьютер дастури яратилади. Шунингдек, 15 та лингвистик, соҳавий-терминологик, изоҳли луғатлар яратиш назарда тутилган.

Президент: Ўзбек тили деярли 50 миллион киши сўзлашадиган йирик тилга айланмоқда

Президент Шавкат Мирзиёев ўзбек тилига давлат тили мақоми берилган кун муносабати билан Ўзбекистон халқига табрик йўллади.

Президент матбуот хизматида эълон қилинган табрик матнида айтилишича, “ҳозирги вақтда ер юзида ўзбек тилида сўзлашувчилар сони қарийб 50 миллион кишини ташкил этиши унинг дунёдаги йирик тиллардан бирига айланиб бораётганидан далолат беради”.

Президентнинг билдиришича, бугунги кунда хорижий давлатлардаги 65 та олий ўқув юртида ўзбек тили ва адабиёти ўрганилмоқда.

“Куни кеча Афғонистон Ислом Республикасида Ўзбек тили кунига бағишланган байрам тадбирлари биринчи марта давлат миқёсида нишонланганини мамлакатимиз жамоатчилиги, бутун ўзбек халқи катта мамнуният ва хурсандчилик билан олқишлади”, - дейилади президент табригида.

Шавкат Мирзиёев 2020 йилнинг 10 апрель куни «Ўзбек тили байрами кунини белгилаш тўғрисида»ги қонунни имзолаганди.

Қонунга асосан, ҳар йили 21 октябрь Ўзбек тили байрами куни сифатида нишонланади.

Жорий йилнинг 9 ойида аҳоли реал даромадлари камайди

2019 йилда ўзбекистонликларнинг реал даромади 6,5 фоизга ўсганди.

Жорий йилнинг январидан сентябригача бўлган 9 ойи ичида аҳоли даромади 2019 йилнинг шу даврига нисбатан 0,3 фоизга пасайган. Бу ҳақда Давлат статистика қўмитаси ҳисоботида маълум қилинди.


Статистиканинг билдиришича, 2020 йилнинг тўққиз ойида ялпи ички маҳсулот 0,4 фоизга ўсган, 2019 йилнинг шу даврида эса бу кўрсаткич 5,9 фоизни ташкил қилган. Мана шу ҳолат аҳоли даромадларининг озайишига сабаб бўлган.


Spot нашрининг хабар беришича, 2019 йилда ўзбекистонликларнинг реал даромади 6,5 фоизга ўсганди.


“2020 йилнинг тўққиз ойи давомида аҳоли жон бошига тўғри келадиган энг юқори ўртача номинал даромад Тошкент шаҳрида қайд этилган — 20 миллион сўм. Бу кўрсаткич Навоий вилоятида 16 миллион сўм, Бухоро вилоятида 12 миллион сўм бўлган. Энг паст кўрсаткичлар Қорақалпоғистон (7,7 миллион сўм), Фарғона вилояти (7,9 миллион сўм) ва Наманган вилоятида (8,3 миллион сўм) кузатилган”,-дейилади хабарда.

Наманган солиқ бошқармаси тадбиркорларга “пахта солиғи” солинаётганини рад этди

“Жорий йилги пахта мавсуми учун ҳеч қандай тадбиркордан пул талаб қилинмаган, аксинча юртимизда тадбиркорликни ривожлантиришга қаратилган сиёсатга жавобан вилоятда ишбилармонлик муҳитини кучайтириш ҳамда тадбиркорларнинг бизнесини ривожлантиришда ўз амалий ёрдамини бериб келмоқда”.

Наманган вилоят солиқ бошқармаси Озодлик радиосида 15 октябрь куни ““Пахта солиғи”: Тадбиркорлардан 6 миллион сўмгача пул йиғилмоқда” сарлавҳали мақолага мана шундай жавоб қайтарди.


Солиқ бошқармаси раддиясида вилоятда тадбиркорликнинг қўллаб-қувватланиши ортидан сўнгги 9 ой ичида бизнес субъектлари сони уч мингга кўпайган. “Хулоса қилиб айтганда бугун солиқ идоралари ходимлари тадбиркорларга кўмакчи сифатида ўз вазифаларини олиб боришмоқда”,-дейилади раддияда.

Озодлик радиосида 15 октябрь куни эълон қилинган мақолада наманганлик тадбиркорлар пахта терими учун 5-6 миллион сўмдан пул йиғилаётганидан шикоят қилишганди.

Тадбиркорларнинг айтишларича, пахта учун пул йиғиш жараёни ИИБ ва солиқ ходимлари томонидан амалга оширилмоқда.


Айни пайтда бутун мамлакат бўйлаб бюджет ташкилотлари ходимларини пахта теримига мажбуран жалб қилиш ҳолатлари давом этаётгани кузатилади.

Давлат меҳнат инспекцияси Озодлик радиосига пахта мавсумида мажбурий меҳнат давом этаётганини тасдиқлади.

Коронавирусга чалинганлар сони 64 мингга яқинлашди

Даволаниш кўрсаткичи 95 фоизни ташкил этмоқда.

Соғлиқни сақлаш вазирлигининг билдиришича, сўнгги бир сутка ичида 305 кишида коронавирус аниқланди ва 351 нафар бемор соғайди.


20 октябрь ҳолатига кўра, Ўзбекистонда коронавирусга чалинганлар сони 63912 кишига етди. Улардан 61068 нафари соғайиб, даволаниш кўрсаткичи 95 фоизни ташкил этмоқда.


Бир кун ичида 3 нафар коронавирусга чалинган бемор вафот этиб, жами кўрсаткич расман 534 нафарга етди.


Айни пайтда тиббиёт муассасаларида даволанаётган 2 310 нафар бемордан 292 нафари оғир, 81 нафари эса ўта оғир аҳволда.

Интернет тезлиги бўйича Ўзбекистон яна 2 поғона юқорилади

Ўзбекистон Интернет тезлиги бўйича жорий йил сентябрь ойи натижаларига кўра август ойига нисбатан яна 2 поғонага юқорилаган. Бу ҳақда Ўзбекистон Республикаси Ахборот технологиялари ва коммуникацияларини ривожлантириш вазирлиги “Ookla” ширкатининг Speedtest.net хизмати маълумотларига таянган ҳолда билдирган.

Аниқланган Интернет тезлиги бўйича Ўзбекистон 176 та давлатлар қаторида 96-ўринни эгаллаган. Шу кунда мамлакатда тезлик 30,5 Мбит/секундни ташкил қилмоқда. Бу ўтган йилнинг шу даврига (112-ўрин – 19,91 Мбит/с) нисбатан 10 Мбит/секундга кўпдир.

Мобил интернет тезлиги бўйича ҳам Ўзбекистон август ойига нисбатан 1 поғонага (125-ўрин), ўтган йил шу даврига (131-ўрин) нисбатан эса 6 та поғонага кўтарилган. Шу кунда мобил Интернет бўйича тезлиги мамлакатда 13,54 Мбит/секундни ташкил қилмоқда.

Ўзбекистоннинг олтин-валюта захираси бир ойда 1 миллиард 150 миллион долларга камайди

Иллюстратив сурат.

Ўзбекистонда шу йил 1 октябрь ҳолатига кўра олтин-валюта захирасининг умумий ҳажми 33 миллиард 460 миллион долларни ташкил этди. Ўтган ой мазкур захира ҳажми 34 миллиард 610 миллион долларни ташкил қилган.

Ўзбекистон Марказий банки маълумотларига кўра, захиранинг катта қисми олтин шаклида (18 миллиард 599 миллион доллар) ва хорижий валютада (14 миллиард 487 миллион доллар) сақланади.

МБ қайдига кўра, 19 октябрга келиб олтиннинг бир унцияси нархи 1911,56 АҚШ долларини ташкил этмоқда.

Олтин-валюта захираси, халқ тили билан айтганда, ҳар бир мамлакатнинг “қора кун”га асралган мулки бўлиб ҳисобланади.

Аввалроқ Ўзбекистон жорий йилнинг январь-август ойлари оралиғида рекорд даражада – 5 миллиард 800 миллион долларлик олтин сотгани ҳақида хабар қилган эдик.

Россия-Қозоғистон чегарасида 250 чоғли ўзбекистонлик йиғилиб қолди

Россия-Қозоғистон чегарасидаги назорат-ўтказиш масканларидан бири.

Россия билан Қозоғистон чегарасининг Қараўзек назорат-ўтказиш маскани яқинида 130 автомобилда 250 чоғли ўзбекистонлик йиғилиб қолган. Бу ҳақда Астрахань вилояти губернатори Александр Шарикин раислигида 19 октябрь куни маҳаллий расмийлар ва ўзбек диаспораси вакиллари иштирокида ўтказилган мажлисда билдирилган.

Астрахань вилояти губернатори матбуот хизматининг маълум қилишича, тахминлардан бирига кўра меҳнат муҳожирларига атайлаб Қозоғистон ҳудуди орқали автотранспортда ватанига ўтиб кетиш имкони борлиги ҳақида ёлғон маълумот беришган. Ваҳоланки, чегарадан қонунга мувофиқ равишда ўтишнинг йўли фақат махсус рейс билан Москва, Ростов ёки Санкт-Петербургдан махсус авиарейс билан учиш ва Волгоград вилоятидаги Волжская станциясидан поездда кетишдир.

Хабарномада Қараўзек орқали Қозоғистонга ўтишга уринаётган муҳожирларнинг кўпи пойтахт Москва ва марказий Россиянинг бошқа шаҳарларидан келишгани айтилади.

Россия Ташқи ишлар вазирлигининг Астрахань вилоятидаги вакили ТИВнинг Ўзбекистон элчихонасига тегишли нота йўллаш ниятида эканини билдирган. Роспотребнадзор, ички ишлар идоралари ва маҳаллий расмийларга тартиб-интизомни сақлаш ва эпидемиологик вазиятни ёмонлашувига йўл қўймаслик топширилган.

“Бундан ташқари, Астрахань вилояти ҳудудида меҳнат муҳожирларини ноқонуний яшаш пунктини барпо этиш уринишларининг олдини олиш учун барча зарур чоралар кўрилган”, дейилади хабарномада.

arbuztoday.ru нашрининг ёзишича, россиялик чегарачилар ўзбекистонликлар ва уларнинг автомобилларини ўтказиб юборишга тайёр, бироқ Қозоғистон томони COVID-19 пандемияси туфайли чегарани ёпиб қўйган. Нашр манбаси ўзбекистонлик муҳожирлар Астрахань вилоятига “узунқулоқ” гапларга ишониб келиб олишган.

“Гап шундаки, бир неча кун аввал, суҳбатдошимизнинг айтишича, Қозоғистонга Россия томонидан 5-10 тадан автомобиль ўтказиб турилган. Бу ҳақда чегарадан ўтиб кетганлар ўзларининг дўстларига хабар қилишган. Ўша 5-10 машина чегарадан қандай ўтиб кетганига оид савол очиқ қолмоқда”, дейилади мақолада.

Қозоғистон чегара тартибини юмшатганига оид ёлғон маълумотлар сабабли ўтган ёз Россия ҳудудида юзлаб одам йиғилиб қолганди. Улардан бир қисми поезд ва автобусларда ватанига олиб кетилгунига қадар чодирларга яшашга мажбур бўлишган.

Экспорт ҳажми йил бошидан бери 1,1 миллиард долларга қисқарди

Тошкентдаги Марказий банк биноси.

Жорий йилнинг ўтган 9 ойида Ўзбекистонда экспорт ҳажми 2019 йилнинг шу даврига нисбатан 1,1 миллиард долларга қисқариб, 11,8 миллиард долларга тенг бўлди (ўтган йилнинг январь-сентябрь ойларида бу кўрсаткич 12,9 миллиард долларга тенг бўлган). Бу ҳақда Ўзбекистон Марказий банки “2020 йилнинг 9 ойи якуни бўйича тўлов баланси жорий операциялари ҳисобининг дастлабки кўрсаткичлари” шарҳида баён қилган.

МБ бу йилги экспорт ҳажми қисқаришини жаҳон бозорларида энергия ресурслари нархининг тушиши, шунингдек коронавирус пандемияси ортидан жаҳон иқтисодиёти ўсиш суръатларининг секинлашишига боғлаган.

Айни пайтда 2020 йилнинг январь-сентябрь ойларида товарлар ва хизматлар импорти ўтган йилнинг шу даврига (19,5 миллиард доллар) нисбатан 3,4 миллиард долларга қисқариб, 16,1 миллиард долларни ташкил этган.

МБ маълумотларига кўра, савдо балансининг манфий сальдоси 2019 йил 9 ойига нисбатан 35 фоизга яхшиланиб, 4,3 миллиард долларни ташкил этган.

Дастлабки ҳисоб-китобларга кўра, 2020 йилнинг 9 ойи учун тўлов балансининг жорий операциялар ҳисоби дефицити 2019 йилнинг 9 ойига нисбатан 63 %га камайиб, 663 млн. долларни ташкил қилди.

Ушбу ҳолат импорт ҳажмининг экспорт ҳажмига нисбатан юқори суръатларда қисқариши, халқаро пул ўтказмаларининг деярли ўтган йил даражасида сақланиб қолиши ва олтин нархининг жахон бозорида ўсиши каби омиллар билан изоҳланади”, дейилади Марказий банк шарҳида.

“Ўзбек тили байрами куни” дам олиш куни ўлароқ белгиланганига оид хабарлар рад этилди

Ўзбек тили байрами ҳисобланмиш 21 октябрни шу йил апрелида қабул қилинган қонунга мувофиқ дам олиш куни сифатида белгиланганига оид хабар ёлғон ва ҳақиқатга тўғри келмайди. Бу ҳақда Ахборот ва оммавий коммуникациялар агентлигига қарашли Antifake.uz Телеграм-канали маълумот тарқатди. Аввалроқ ижтимоий тармоқларда мазкур кунни дам олиш куни ўлароқ белгиланганига оид хабарлар тарқалган эди.

Қайд этилишича, “Ўзбек тили байрами кунини белгилаш тўғрисида”ги Ўзбекистон Республикаси Қонунида 21 октябрни дам олиш куни деб белгилаш қайд этилмаган.

Адлия вазирлигига қарашли “Ҳуқуқий ахборот” Телеграм-канали эса мамлакат Меҳнат кодексида қайд этилган ишланмайдиган кунлар рўйхатини келтиради:

  • 1 январь – Янги йил;
  • 8 март – Хотин-қизлар куни;
  • 21 март – Наврўз байрами;
  • 9 май – Хотира ва қадрлаш куни;
  • 1 сентябрь – Мустақиллик куни;
  • 1 октябрь – Ўқитувчи ва мураббийлар куни;
  • 8 декабрь – Конституция куни;
  • Рўза ҳайит (Ийд ал-Фитр) диний байрамининг биринчи куни;
  • Қурбон ҳайит (Ийд ал-Адҳа) диний байрамининг биринчи куни.

“Ўзбек тили байрами кунини белгилаш тўғрисида”ги қонун президент Шавкат Мирзиёев томонидан 2020 йил 10 апрель куни имзоланган. Ҳужжат Олий Мажлис Қонунчилик палатаси томонидан 2020 йил 23 мартда қабул қилинган, Сенат томонидан 24 март куни маъқулланган.

“Ўзбекистон Республикасининг давлат тили тўғрисида”ги қонун 1989 йил 21 октябрида қабул қилинган эди. Мазкур қонунда Ўзбекистонда ягона давлат тили сифатида ўзбек тили тан олиниши белгиланган.

ОАВ: Абхазияда Ўзбекистонга қайта олмаётган юзлаб муҳожир кўчада тунамоқда (ВИДЕО)

Абхазиядаги муҳожирлар: Чегаралар ёпиқ - чиқиб кетолмаяпмиз!
Илтимос кутинг

Айни дамда медиа-манба мавжуд эмас

0:00 0:06:53 0:00
Бевосита линк

Абхазия-Россия чегарасида юзлаб ўзбекистонлик муҳожир ватанига қайта олмай, кўчада яшашга мажбур бўлмоқда. Ўзбекистон Ташқи ишлар вазирлиги ва Россиядаги элчихона ватандошларнинг мурожаатларини эътиборсиз қолдирмоқда. Бу ҳақда “Кун уз” Абхазиядаги ўзбек муҳожирларга таянган ҳолда хабар берди.


“Сурхондарёлик Ренат Юсуповнинг хабар беришича, Абхазияда айни пайтда икки мингга яқин Ўзбекистон фуқароси мавжуд. Улар бу ерга Россия орқали ишлашга келишган. Пандемия туфайли чегаралар ёпилгач, Ўзбекистон фуқаролари шу ерда қолиб кетишган ва умид билан карантин чекловлари бекор қилинишини кутишган”,-дейилади хабарда.


Нашрнинг ёзишича, Ташқи ишлар вазирлиги Абхазияда қолиб кетган 400га яқин ўзбекистонлик октябрь ойи бошида ватанига қайтарилишини билдирган. Аммо орадан 19 кун ўтган бўлса ҳамки бу ваъда бажарилмаяпти.


Абхазия ҳудудида қолиб кетган ватандошлар Ўзбекистоннинг Ростов ва Москва шаҳридаги консулхоналарига мурожаат қилишган. Аммо дипломатик ваколатхоналар муҳожирларнинг мурожаатларига “тайинли жавоб бермаган”.


“Давлат бизни бепул олиб кетсин демаяпмиз, чартер рейс учун қўлимизда пулларимиз бор. Фақат Абхазиядан Россия ҳудудига ўтиб олсак бўлди”,-демоқда мухожирлар.


Маълум бўлишича, муҳожирлар Ўзбекистонга қайтиш учун Россия ҳудудига ўтишлари керак. Айни пайтда эса чегарани кесиб ўтишга фақат Россия ва Абхазия фуқароларига рухсат берилган.


Озодлик радиоси 28 сентябрь куни карантин чекловлари туфайли Абхазияда қолиб кетган ўзбек муҳожирлари Ўзбекистонга транзит йўли очиб беришни сўрашаётгани тўғрисида хабар берган эди.

Крипто-фирибгарга 1,7 миллион долларга алданиб қолганлар пикет ўтказди

Бош прокуратура биноси.

International Consulting Group платформаси фаолиятидан зарар кўрган бир гуруҳ фуқаро 18 октябрь куни Бош прокуратуранинг қабулхонаси олдида пикет уюштирди.


Бош прокуратуранинг 19 октябрда расман билдиришича, пикетга чиққанлардан International Consulting Group раҳбарлари Алексей Менг ва А.Молотягин устидан жами 33 та мурожаат қабул қилинган.


Мурожаатларида улар International Consulting Group платформасига сармоя киритгани ва фирибгарлик ҳаракатлари оқибатида моддий зарар кўрганликларини билдирганлар.


Бош прокуратура А.Менг ва бошқаларга нисбатан Ўзбекистон Республикаси Жиноят кодексининг 168-моддаси 4-қисми “а” банди билан қўзғатилган жиноят иши ҳозирда Тошкент шаҳар ИИББ ҳузуридаги Тергов бошқармаси иш юритувида эканини ва бу иш Бош прокуратура назоратига олинганини маълум қилган.


Аввалроқ World Crypto Capital ширкати раҳбари бўлган ўзбекистонлик 29 ёшли Алексей Менг International Consulting Group платформасини ташкил қилиб, фирибгарлик йўли билан 2 мингдан ортиқ фуқародан жами 1 миллион 700 минг долларни сармоя сифатида жалб қилгани хабар қилинган эди.


Алексей Менг ва А.Молотягин халқаро қидирувга берилган. Жалб қилинган пул маблағларини ўзлаштириш учун Алексей Менг ва унинг шериклари 2019 йилнинг декабрь ойида компания фаолиятини тўхтатган ва Ўзбекистондан чиқиб кетган.

Алишер Навоий ордени ва ижод мактаби таъсис этилади

Алишер Навоийга Беларус пойтахти Минскда ўрнатилган ёдгорлик.

Ўзбекистонда Алишер Навоий таваллудининг 580 йиллиги кенг нишонланади ва унинг номидаги орден таъсис этилади. Бу борада президент Шавкат Мирзиёев “Буюк шоир ва мутафаккир Алишер Навоий таваллудининг 580 йиллигини кенг нишонлаш тўғрисида”ги қарорни 19 октябрда имзолади.


Қарорга асосан, Алишер Навоий ҳаёти ва ижодини кенг ўрганиш ҳамда тарғиб қилиш мақсадида Алишер Навоий номидаги халқаро жамоат фонди ташкил этилади.


Алишер Навоий ижодини ўрганиш ва оммалаштиришга улкан ҳисса қўшган Ўзбекистон ва хорижий давлатлар фуқароларини ҳамда илмий-ижодий муассасаларини тақдирлаш мақсадида Алишер Навоий ордени таъсис этилади.


Қарорда Алишер Навоийнинг хорижий давлатларда сақланаётган қўлёзмаларининг факсимиле нусхаларини Ўзбекистонга олиб келиш чораларини кўриш ҳам белгилаб қўйилди.


Тошкент шаҳрида 2021 йилда Алишер Навоий номидаги ижод мактаби ташкил этилади. 2021 йил охирига қадар Ўзбекистон Миллий кутубхонасида Алишер Навоий асарлари ҳамда навоийшунослик фани бўйича амалга оширилган илмий тадқиқотларнинг электрон платформаси яратилади.


2021 йил ноябрь ойининг биринчи ўн кунлигида Навоий шаҳрида «Алишер Навоий ижодий меросининг башарият маънавий-маърифий тараққиётидаги ўрни» мавзусидаги халқаро илмий-амалий конференция ташкил этилади.

Давомини ўқинг

Кўрмай қолган бўлсангиз

XS
SM
MD
LG