Линклар

Шошилинч хабар
18 январ 2022, Тошкент вақти: 18:57

Халқаро хабарлар

АҚШ “Шимолий оқим – 2” бўйича янги санкциялар жорий қилди

АҚШ Давлат департаменти 22 ноябрь куни “Шимолий оқим – 2” газ қувури қурилишида иштирок этаётган ширкатга қарши санкция жорий этилганини эълон қилди.

Янги санкция нишони Кипрда рўйхатган олинган Transadria ширкати ва унга қарашли Marlin кемаси бўлди. Мазкур кемадан газ қувури қурилишида фойдаланилган.

Санкцияларга оид маълумот Давлат департаменти томонидан санкциялар тўғрисидаги қонунларнинг бажарилишига оид Конгрессга йўлланган ҳисоботда акс этган. Давлат котиби Энтони Блинкен баёнотида ҳозирги пайтга келиб АҚШ “Шимолий оқим – 2” газ қувури қурилишига алоқадор саккиз киши ва 17 та кемага нисбатан санкция жорий этилгани айтилган.

Америкалик қонун чиқарувчилар чақириғига қарамай, Жо Байден маъмурияти “Шимолий оқим – 2” оператори бўлган ширкатга қарши санкция жорий қилишдан бош тортмоқда. Бу қарорни Оқ уй “Шимолий оқим – 2” ишга туширилишидан манфаатдор бўлган Германия билан орани бузмаслик зарурлиги билан изоҳлаяпти.

“Шимолий оқим – 2” қурилишига қарши чиқишда давом этаркан, биз газ қувури етказиши мумкин бўлган хатарни камайтириш мақсадида Германия, бошқа иттифоқчилар ва ҳамкорлар билан биргаликда ишлаяпмиз”, дейилган Энтони Блинкен баёнотида.

Кун янгиликлари

"Мен нафақахўрман". Назарбоев ҳеч қаёққа кетмагани ва элита орасида бўлиниш йўқлигини айтди (ВИДЕО)

Қозоғистонда 2 январда бошланган норозилик намойишлари ва оммавий тартибсизликлардан бери жамоатчиликка кўриниш бермаган собиқ президент Нурсултон Назарбоев 18 январь куни видеомурожат билан чиқди.

У ўз мурожаатида Нур-Султонда эканини ва мамлакат элитаси ўртасида ҳеч қандай конфликт мавжуд эмаслигини айтди.

-Мен 2019 йилда президентлик ваколатини Қасим-Жомарт Тоқаевга ўтказиб бердим. Ўшандан бери пенсионерман. Айни пайтда мамлакат пойтахти Нур-Султондаман ва ҳеч қаерга кетганим йўқ. Президент Қасим-Жомарт Тоқаев ҳокимиятнинг тўлиқ ваколатларига эга. У Хавфсизлик кенгаши раисидир. Тез орада у “Нур Отан” партияси раислигига сайланади. Шунинг учун мамлакат элитаси орасида ҳеч қандай конфликт ёки қарама-қаршилик мавжуд эмас. Бу борадаги миш-мишлар мутлақо асоссиздир,-деди Назарбоев.

Ўз нутқида собиқ президент Қасим-Жомарт Тоқаев сиёсатини қўллаб-қувватлаш лозимлиги тўғрисида ҳам гапирди.

Президентликдан кетганидан сўнг Назарбоев Хавфсизлик кенгаши раиси лавозимини сақлаб қолган эди. Қозоғистондаги норозиликлар ортидан у бу лавозимни тарк этганини билдирган.

Айрим таҳлилчилар Қозоғистондаги воқеаларни Тоқаев билан Назарбоевга яқин одамлар ўртасидаги элиталараро кураш сифатида баҳолаган эди.

Шимолий Корея йил бошидан бери тўрт марта ракета синовини ўтказди

Сўнгги ракеталар Шимолий Корея пойтахти Пхеньян яқинидаги Сунан халқаро аэропорти ҳудудидан отилган.

Шимолий Корея яна иккита бошқарилувчи тактик ракета синовини ўтказди. Бу ҳақда Шимолий Корея Марказий телеграф агентлиги хабар берди. Хабарда айтилишича, ракеталар Корея ярим ороли шарқида жойлашган денгиздаги мўлжалга аниқ бориб урилган.

Жанубий Корея ва Япония 17 январь куни Шимолий Корея бу билан йил бошидан бери тўртинчи марта ракета синовини ўтказгани тўғрисида маълум қилди. Жанубий Корея ҳарбийларининг билдиришича, сўнгги ракеталар Шимолий Корея пойтахти Пхеньян яқинидаги Сунан халқаро аэропорти ҳудудидан отилган.

14 январда Шимолий Корея поезддан туриб ракета синовини амалга оширган эди. 5 ва 11 январь кунлари товушдан гипертез ракеталар синалган.

Шимолий Корея ракета ва ядровий дастурлари туфайли АҚШ ва БМТ санкциялари остида қолмоқда. Январь ойининг бошида Шимолий Корея етакчиси Ким Чен Ин “мамлакат ўз ҳарбий салоҳиятини мустаҳкамлашда давом этади”, деб баёнот берган.

Олмаотада митинглар бошланганидан то шу кунгача уч мингга яқин норози қўлга олинди

Олмаота манзараси.

Олмаотада митинглар бошланганидан то шу кунгача ўтган 16 кун мобайнида 2748 киши қўлга олинди. Уларнинг барчаси ноқонуний намойишларда иштирок этиш ва мародёрликда айбланмоқда. Бу ҳақда Новости агентлиги шаҳар комендатураси тезкор штабига таянган ҳолда хабар берди.

Билдирилишича, қўлга олинганлардан 131 қурол ва 4179 та ўқ-дори мусодара қилинди.

18 январь ҳолатига кўра, мамлакатда қанча одам қўлга олингани тўғрисида аниқ маълумот йўқ. Тахминан ўн мингдан ортиқ норози ушлангани айтилмоқда.

Оғир ва ўта оғир жиноятлар бўйича 695 та жиноят иши қўзғатилди, мазкур ишлар бўйича 695 кишига айблов билдирилди, яна 85 киши жиноятларда гумонланиб ҳибсга олинди.

Бош прокурор катта ёрдамчиси Азамат Саргазин жиноят ишларидан 44 таси террорчилик, 15 таси қотиллик, 6 таси ҳокимиятни куч билан босиб олишга чақириқ моддалари асосида қўзғатилган.

The New York Times: Россия Киев ва Львовдан дипломатлар оиласини эвакуация қила бошлади

Россиянинг Киевдаги элчихонаси.

Россиянинг Киева ва Львовдаги консулхонаси дипломатларининг оилалари Украина ҳудудидан эвакуация қилина бошланди. Бу ҳақда The New York Times Украина Хавфсизлик хизматининг юқори лавозимли расмийсига таянган ҳолда хабар берди.

Манба Россия дипломатларининг хотинлари ва болаларидан иборат 18 кишилик гуруҳ Украинани 5 январда тарк этганини айтган. Унга кўра, кейинги кунларда яна 30 киши Россиянинг Киевдаги элчихонаси ва Львовдаги консулхонасидан чиқиб кетган.

АҚШ ҳукумати расмийси нашрга Вашингтон эвакуация тўғрисидаги маълумотга олдиндан эга бўлгани тўғрисида айтди.

Украина расмийси эса Россия элчихонасидаги одамлар сонининг қисқартирилиши “қисман пропоганда, қисман яқинлашиб келаётган конфликтга тайёргарлик ёки қисман ҳийла, ёки бирданига ҳар учала сценарий бўлиши эҳтимол”,-деб билдирган.

Айни пайтда Вашингтон Россия президенти Владимир Путин Украинага бстириб кириш тўғрисида аниқ қарорга келмаган деб ҳисоблайди, дейилади мақолада.

Қирғизистонда коррупцияда гумонланган Давлат божхона хизмати раиси ҳибсга олинди

Адилет Қубаничбеков

Қирғизистон Миллий хавфсизлик давлат қўмитаси (МХДҚ) 17 январь куни Давлат божхона хизмати (ДБХ) раиси Адилет Қубаничбеков коррупцияга алоқадорликда гумонланиб, қўлга олинганини очиқлади, дея хабар қилди Озодликнинг қирғиз хизмати.

Қўмита қайдича, “божхона идораларида раҳбарият ва бўлим бошлиқлари алоқадор кенг кўламли коррупция мавжудлиги ҳақида маълумот олинган”.

МХДҚ Давлат божхона хизмати раҳбарлари импорт билан шуғулланувчи хусусий ширкатлар манфаатини ҳимоя қилгани, улар учун имтиёли шароит яратгани ва пора эвазига уларнинг молларини божхона назоратидан яширганини урғулаган.

“Бундан ташқари, божхона хизмати раҳбарлари аффилланган ширкатлар томонидан ташқи иқтисодий фаолият субъектларига кўрсатиладиган хизматлар нархларини асоссиз равишда ошириб келмоқда”, дейилган қўмита хабарномасида.

Шулардан келиб чиққан ҳолда, 17 январь куни “Коррупция” моддаси бўйича жиноят иши қўзғатилиб, иш доирасида ДБХ раиси Адилет Кубаничбеков ҳибсга олиниб, вақтинча сақлаш изоляторига жойлаштирилган.

40 ёшли тадбиркор Адилет Қубаничбеков 2021 йил октябрида Давлат божхона қўмитасига раҳбар этиб тайинланган эди.

Қирғизистонда божхона хизмати энг коррупциялашган тузилмалардан бири бўлиб ҳисобланади.

Туркманистонда карантин чоралари кескинлашди: бозорлар ёпилди, ҳаракат чекланди

Ашхободдаги бекатда автобус кутаётган қизлар, 2021 йил декабри (иллюстратив сурат)

Расмийлари мамлакатда коронавирус йўқлигини иддао қилиб келаётган Туркманистонда яна кучайтирилган карантин тартиби жорий этилди.

Озодликнинг туркман хизмати хабарига кўра, чекловлар жорий қилинганидан биринчи бўлиб Ашхобод аҳолиси хабардор бўлган. 15 январдан эътиборан пойтахтдаги буюм бозорлари, савдо марказлари, театрлар, концерт заллари, ресторанлар, сартарошхоналар ва бошқа хизмат кўрсатиш муассасалари ёпилган. Фақат озиқ-овқат дўконлари ишлаб турибди.

Айни чеклов чоралари мамлакатнинг бошқа ҳудудлари, хусусан, Балқан, Лебап ва Марв вилоятларида ҳам амал қилмоқда.

Озодликнинг марвлик суҳбатдоши вилоятга кириш ва чиқиш чеклаб қўйилганини айтган. Унга кўра, “карантин бир баҳона, холос, расмийлар одамларнинг ғалаён кўтаришидан хавфсирашиб, шунақа қилишяпти”.

Turkmen.news сайти 15 январь куни Касалликлар тарқалишига қарши фавқулодда комиссия қарори деб ишонилаётган ҳужжат нусхасини эълон қилган. Унда 23 банддан иборат чеклов қоидалари келтирилган. Бундан ташқари, чегараолди ҳудудлар аҳолисининг вилоят марказларига, бошқа туман ва вилоятларга бориши 1 февралгача чекланган. 15 январдан 1 февралгача Ашхободдан вилоят марказларига фақат битта авиақатнов амалга оширилиши белгиланган.

Мустақил нашрлар Туркманистонда COVID-19 анчадан бери мавжудлиги ва кўп одамларнинг ўлимига сабаб бўлгани ҳақида ёзмоқда. Октябрь ойида Озодлик мамлакат Соғлиқни сақлаш вазирлигидаги манбасидан олинган маълумотга таянган ҳолда, пандемия бошланганидан бери мамлакатда коронавирус туфайли 25 мингдан зиёд киши вафот этганини хабар қилган эди.

Туркманистон президенти Гурбангули Бердимуҳамедов аввалроқ ЖССТнинг Европа шуъбаси мудири Ҳанс Клюге билан учрашувда мамлакатда коронавирус мутлақо йўқлигини яна бир карра таъкидлаган. Айни пайтда у 70 фоиздан ортиқ аҳоли эмланганини қўшимча қилган.

Германия бош дипломати: Россиянинг Украинага муҳтамал тажовузи “Шимолий оқим-2”га таъсир этади

Германия ташқи ишлар вазири Анналена Бербок

Россия Украинага қарши кенг кўламли ҳарбий ҳаракатларни бошлаган тақдирда “катта товон” тўлайди. Хусусан, унинг иқтисодий, стратегик ва сиёсий манфаатлари жиддий зиён кўради. Германия ташқи ишлар вазири Анналена Бербок Киевда украиналик ҳамкасби Дмитрий Кулеба билан музокаралардан сўнг ана шундай баёнот берди.

Бербок дипломатик музокаралар Россия-Украина муносабатларидаги кескинликни юмшатишнинг бирдан-бир йўли эканлигини айтган. У Украинанинг ҳудудий яхлитлигини қўллаб-қувватлашини билдирган. Айни пайтда вазир ГФР ҳукумати Киевга қурол-аслаҳа етказиб бермаслик қарорини ўзгартирмаслигини урғулаган.

Россиядан Болтиқ денгизи туби орқали Германияга тортилган “Шимолий оқим-2” газ қувури ҳақида тўхталаркан, вазир уни сертификатлаш вақтинча тўхтатилгани, чунки газ қувури Европа ҳуқуқ меъёрларига мувофиқ эмаслигини айтган.

Газ қувурини фақат тижорат лойиҳаси деб ҳисобловчи қатор немис сиёсатчиларидан фарқли ўлароқ, Бербок унинг геостратегик жиҳатлари ҳам борлигини айтган ҳамда Россия Украинага тажовуз қилган тақдирда, Германия ва унинг ҳамкорлари Кремлга нисбатан “адекват чоралар” кўришига ваъда берган. Бироқ вазир лойиҳадан буткул воз кечиш тўғрисида лом-мим демаган.

Бербок Германия коалицион ҳукуматида газ қувурига қарши позицияда турган “Яшиллар” партиясини тамсил этади.

Германияда Россия билан муносабатлар сўнгги пайтларда жиддий баҳс мавзусига айланган. Хавфсизлик ва халқаро алоқалар соҳасидаги 73 нафар эксперт ҳукумат ва парламентга очиқ хатида Берлинни Москвага нисбатан қаттиққўл сиёсат юритишга чақирган.

Германия ТИВ раҳбари Киевдан сўнг Москвага боради – бу унинг декабрь ойи бошида лавозимга ўтирганидан бери Россияга илк ташрифи бўлади.

Қозоғистон: Тоқаев Назарбоевнинг жиянини МХҚ раисининг муовини лавозимидан четлатди

Самат Абиш (ў) амакиси Нурсултон Назарбоев (ч) билан, Остона, 2014 йил 6 майи

Қозоғистоннинг собиқ президенти Нурсултон Назарбоевнинг жияни Самат Абиш Миллий хавфсизлик қўмитаси раисининг биринчи ўринбосари вазифасидан озод қилинди. Қозоғистон президенти Қасим-Жомарт Тоқаевнинг бунга оид фармойиши 17 январь куни Оқўрда сайтида эълон қилинди.

Бу кўпчилик Тоқаев билан Назарбоевга яқин одамлар ўртасидаги элиталараро кураш деб ҳисоблаётган ушбу воқеалар манзарасида Қозоғистон МХҚда рўй берган навбатдаги шов-шувли ишдан олишдир.

8 январь куни МХҚ собиқ раиси Карим Масимов давлатга хиёнатда гумонланиб, ҳибсга олингани хабар қилинган эди. 13 январь куни МХҚ матбуот хизмати унинг ҳокимиятни куч билан босиб олишда гумонланаётганини очиқлаган. Масимовнинг икки собиқ ўринбосари ҳам айни гумон билан қамоққа олинган.

43 ёшли Самат Абиш қўмита раисининг биринчи ўринбосари лавозимини 2015 йилдан бери эгаллаб турган эди, унгача қарийб уч йил раис ўринбосари бўлган. Абиш 2000 йилдан бери миллий хавфсизлик тизимида ишлаган.

Карим Масимов қўлга олингани маълум бўлганидан сўнг маҳаллий ОАВлар ўз манбаларига таяниб, Самат Абиш ҳам ҳибсга олингани ҳақида хабар қилган, бироқ бу маълумот тасдиқланмаган. 14 январь куни МХҚ матбуот хизмати Самат Абиш 13 январдан меҳнат таътилига чиққанини билдирган.

Собиқ президентнинг укаси Сатибалди Назарбоевнинг ўғли бўлмиш Самат Абиш 2017 йилда амакиси – Нурсултон Назарбоев қўлидан генерал-лейтенант погонларини олган.

Европа Иттифоқи Россияни Навальнийни “зудлик билан” озод этишга чақирди

Алексей Навальний Москвадаги Шереметьево аэропортида ҳибсга олинишидан бир неча дақиқа аввал, 2021 йил 17 январи

Алексей Навальний қамоққа олинганига бир йил тўлиши муносабати билан Европа Иттифоқи ташқи сиёсат маҳкамаси раҳбари Жозеф Боррель номидан мурожаатнома ёйинланиб, унда Россия ҳукумати мухолифатчи Навальнийни ҳамда унинг Уфадаги штаби собиқ раҳбари, ҳозирда ҳибсда сақланаётган Лилия Чанишевани “зудлик билан ва сўзсиз” озод қилишга чақирилган.

“Европа Иттифоқи Навальнийнинг судга тортилишини ва унга ўқилган ҳукмни очиқчасига сиёсий буюртма деб атайди”, дейилган мурожаатномада. Шунингдек, ЕИ мухолифатчининг “Новичок” жанговар кимёвий моддаси билан заҳарланиши бўйича тергов ўтказишга чақирган.

17 январь куни маълум бўлишича, шу ой охиригача Алексей Навальнийга нисбатан очилган янги жиноят иши судга оширилади: унда мухолифатчи молиявий товламачилик ва судья Вера Акимовани ҳақорат қилганликда айбланган. Барча жиноят ишлари бўйича Навальний жами 15 йилгача қамоқда қолиши мумкин.

Навальний заҳарланиши ортидан Германияда даволаниб, роппа-роса бир йил муқаддам – 2021 йилнинг 17 январь куни Москвага қайтганидан бери қамоқда қолмоқда: у дастлаб ҳибсда сақланган бўлса, кейинроқ 2014 йилги жиноят иши (бу ишни Европа суди ғайриҳуқуқий деб топган) доирасида колонияга йўлланган.

Навальний қамоқда ўтирган бир йил давомида Россия ҳукумати у қурган тузилмаларни изчиллик билан йўқ қилган: сиёсатчининг штаблари ва у ташкил қилган Коррупцияга қарши кураш фонди “экстремистик ташкилотлар” деб топилган. Бу ташкилотларнинг ўнлаб аъзоси ё қамоқда, ё хорижга чиқиб кетишга мажбур бўлган. Навальнийнинг ўзига қарши яна бир неча жиноят иши очилган.

Ғарб мамлакатлари Навальнийнинг таъқиб этилишига жавобан Россияга жиддий санкциялар қўллаш билан таҳдид қилишган, лекин пировардида мухолифатчининг заҳарланишида гумондорлар ўлароқ кўрилаётган бир неча жисмоний шахс ва ташкилотга нисбатан санкциялар жорий этиш билан кифояланишган.

Навальний ўзининг заҳарланишида президент Владимир Путинни айблаб чиққан. Кремль бу айбловни рад этиб келади.

Қозоғистоник фаол Абишев қамоқдан чиққанидан уч ой ўтгач вафот этди

Кенжебек Абишев 2018 йилда қамалган эди.

Қозоғистонлик таниқли ҳуқуқ фаоли Кенжебек Абишев қамоқдан озод этилганидан уч ой ўтгач, 55 ёшида вафот этди.

Фаолнинг турмуш ўртоғи Гулмира Абишева Озодлик радиоси қозоқ хизматига эри 17 январь куни эрталаб юрак ҳуружидан ўлгани ҳақида билдирди. Абишевнинг юрак ҳуружидан вафот этгани тўғрисида “Тез ёрдам” врачлари хулоса берган.

Абишев ва унинг икки ҳамкори 2018 йилда Қозоғистонда тақиқланган “Қозоғистон демократик танлови” партиясига аъзо бўлгани ортидан “жиҳодга тайёргарлик кўриш” айблови билан 7 йилга қамалган эди. Кейинроқ унинг қамоқ муддати 8 ойга қисқартирилганди.

Ўзига билдирилган айбловни судда тан олмаган фаол 2021 йилнинг октябрида муддатидан олдин озодликка чиқарилган эди. У қамоқда ўзига чиқарилган ҳукм ва ҳибсдаги ноинсоний шароитларга норозилик сифатида очлик эълон қилганди.

Лукашенко Украина чегарасида Россия билан ҳамкорликда ҳарбий машғулот ўтказилишини билдирди

Беларус президенти Лукашенко аскарлар олдида нутқ сўзламоқда. 2022 йилнинг 15 январи.

Жорий йилнинг февралида Беларусь Польша ва Украина чегараларида Россия билан ҳамкорликда ҳарбий машғулотларни ўтказади. Бу ҳақда президент Александр Лукашенко 17 январь куни маълум қилди.

Унга кўра, Украина Беларусь билан чегарадош ҳудудларга ўз аскарларини жамлаётгани ташвиш уйғотган.

Лукашенкога кўра, қўшма ҳарбий машқлар ўтказиш масаласи Россия президенти Владимир Путин билан ўтган йилнинг декабрида келишилган. 17 январь куни эса бу машғулотларнинг мақсади ва вазифаси белгиланган.

Ҳозирча машғулотлар айнан қайси саналарда ўтказилиши маълум эмас. Ҳарбий машғулотлар “Иттифоқчилар қатъияти -2022” деб номланган.

Ғарб давлатлари разведкасига кўра, Россия Украина билан чегараларига камида юз минг аскарни олиб келган. Кремль матбуот котиби Дмитрий Песков бу маълумотни инкор этмади. Аммо у журналистларга берган интервьюсида Украина билан чегараларга рус аскарларининг тўпланаётгани Россия Украинага ҳужум қилишни режалаштираётганини англатмаслигини таъкидлади.

Қирғиз депутати: “Мен президентга ўхшаб солярка ташимаганман. Китоб ўқиганман”

Қирғизистон мухолифати лидерларидан бири Адахан Мадумаров.

Қирғиз парламентидаги “Бутун Қирғизистон” фракцияси лидери Адахан Мадумаров Бош прокуратурага сўроқ бериб чиққанидан сўнг журналистларнинг саволларига жавоб берди. У президент Садир Жапаров ўзи ҳақида гапирган гапларга муносабат билдирар экан, қуйидагиларни айтди:

“Мен Садир Жапаров бош прокурор, суд бўлиб қолганини шу кунгача билмаган эканман. У бир вақтнинг ўзида терговчи бўлиб, барча кишиларнинг ҳаракатларига баҳо бермоқда. Буни маданиятсизлик ва ўта саводсизлик сифатида ҳисоблаш керак. Давлат раҳбари бироз китоб қараб, ўқиб қўйиши лозим. Жиноятчи деб фақат суд ҳукм чиқаради. Ўзлари шундай йўллар билан улғайган одамлар “халқнинг ҳаммаси менга ўхшайди”, деб ўйласа керак. Мен у йигитдан фарқли ўлароқ солярка ташиб улғайган эмасман. Мен банкларни босиб олиб катта бўлмаганман. Мен отамнинг, улуғ кишиларнинг тарбиясини олиб, китоб ўқиб катта бўлганман”, -деди Мадумаров.

Адахан Мадумаров 2009 йилда Хавфсизлик кенгаши котиби бўлиб турган вақтда қирғиз-тожик чегарасига оид протоколни имзолагани ортидан гувоҳ сифатида 17 январда Бош прокуратурага сўроқ берди. Амалдаги ҳокимият мазкур протокол Қирғизистон миллий манфаатларига зид равишда имзоланганини айтиб келади.

17 январь куни “Вечерний Бишкек” нашрига интервью берган президент Садир Жапаров Мадумаров имзолаган протоколни “давлатга хиёнат” тарзида сифатлаган.

Адахан Мадумаров имзолаган протоколга асосан 5 гектар ер Тожикистонга 49 йилга ижарага берилган. Мадумаров бу протокол юридик кучга эга эмаслигини, унга нисбатан сиёсий босим уюштирилаётганини билдирган.

Давлатга хиёнатда айбланаётган Украина собиқ президенти Порошенко Киевга қайтди

Порошенко ўтган йилнинг декабрида Украинадан Польшага чиқиб кетган эди.

Украина собиқ президенти Пётр Порошенко ўзига билдирилган давлатга хиёнат айбловининг асоссизлигини исботлаш мақсадида Польша пойтахти Варшавадан Киевга қайтди. У мазкур айбловни сиёсий буюртма сифатида қабул қилишини билдирган.

“Биз бу ерга Порошенкони ҳимоя қилиш учун эмас, Украинани ҳимоя қилиш учун йиғилдик. Биз Украина кучли эканини ва Путин агрессиясига қарши тура олишини исботлашимиз шарт”,-деди у Киев аэропортига ўзини кутиб олиш учун келган юзлаб тарафдорлари олдида қилган чиқишида.

Порошенко ўтган йилнинг декабрида Украинадан Польшага чиқиб кетган эди. Украина Давлат тергов бюроси 56 ёшли собиқ президентга чақирув қоғозини топширмоқчи бўлганини, аммо у чақирув қоғозини қабул қилиб олишни рад этганини билдирган эди.

Пётр Порошенкога нисбатан 2014-2015 йилларда Донбассдаги россияпараст сепаратчилардан кўмир сотиб олиш ҳолати бўйича “Давлатга хиёнат” моддаси асосида жиноят иши очилганди.

Айни пайтда Порошенко “Европа бирдамлиги” мухолифат партияси лидери ва бу партиядан парламент депутати ҳисобланади.

Чимкентда фаоллар январь воқеалари бўйича жамоатчилик комиссиясини тузишди

Январь воқеалари бўйича жамоатчилик комиссиясини тузган чимкентлик фаоллар гуруҳи, 2022 йил 16 январи

Қозоғистоннинг Чимкент шаҳрида 16 январь куни фаоллар жорий ой бошида мамлакатда юз берган воқеалар юзасидан мустақил комиссия тузилганини эълон қилишди. Улар мамлакат раҳбариятини сиёсий ислоҳотлар ўтказишга ва фуқароларнинг тинч йиғилишларига тўсқинлик қилмасликка чақиришган.

Қарийб 20 кишидан иборат фаоллар гуруҳи 14 январь куни январь воқеаларини тафтиш қилиш бўйича мустақил комиссия тузган олмаоталик жамоатчилик фаоллари ташаббусини қўллаб-қувватлашини билдирган. Олмаота комиссияси қўлга олинганлар, бедарак йўқолганлар, ярадорлар ва ўлдирилганлар ҳақида маълумот йиғиш ҳамда жабрланганлар ҳуқуқларини ҳимоя қилишни ўзининг асосий вазифалари ўлароқ белгилаган.

Чимкентлик фаоллар, прокуратура 225 киши қурбон бўлганини эълон қилган бўлса-да, шаҳарлар бўйича алоҳида маълумот йўқлиги, исм-фамилиялар очиқланмаганига эътибор қаратишган.

Чимкент комиссиясига етти киши раисдош этиб сайланган. Фаоллар бир киши раис этиб белгиланган тақдирда унга босим ўтказишлари муқаррарлигини таъкидлашмоқда.

Комиссия президент Қасим-Жомарт Тоқаев, БМТ ва халқаро ҳуқуқбонлик ташкилотларига мурожаатнома билан чиқиб, унда январь воқеаларини диққат билан тергов қилишга, қўлга олинган фаолларнинг қийноққа солинганига оид маълумотларни ўрганишга, талончилик ва бузғунчилик қилмаган фуқароларни озод этишга, кучишлатар идоралар фаолиятига баҳо беришга чақирган.

“Чимкентда Эргали Қулбаев, Нурлибай Татаев, Карим Ҳайдарбеков, Молдабой Садибеков каби фаоллар жиноий тергов доирасида ушланган. Биз январь воқеалари вақтида улар қаерда бўлишганини биламиз. Чунончи Қулбаев безорилик қилмаган, ҳеч қаерга ўт қўймаган, аксинча, бунақа бебошликка қарши бўлган. Қўлимизда видео ва аудиодалиллар мавжуд”, деган комиссия аъзоси Габит Оразимбетов.

Комиссия аъзолари орасида юристлар ва адвокатлар бор.

Аввалроқ халқаро ҳуқуқбонлик ташкилотлари Қозоғистонда январь ойи бошида кузатилган воқеалар ҳамда қўлга олинганлар тақдири ҳақида маълумот беришда шаффофликнинг йўқлиги юзасидан бир неча бор ташвиш билдирган эдилар.

Назарбоевнинг куёви Кулибаев тадбиркорлар палатаси раиси лавозимидан кетди

Тимур Кулибаев

Қозоғистон собиқ президенти Нурсултон Назарбоевнинг куёви Тимур Кулибаев 17 январь куни “Атамекен” тадбиркорлар палатаси раёсати раиси ваколатларини топширганини очиқлади, дея хабар қилди Озодликнинг қозоқ хизмати.

Миллиардер Кулибаевнинг мазкур мурожаати палата сайти орқали ёйинланган. У 2013 йил сентябридан бери эгаллаб келган раислик лавозимидан нима сабабдан кетганини очиқлаган эмас.

Икки кун муқаддам Назарбоевнинг бошқа икки куёви республика миқёсидаги ширкатлардаги лавозимларидан кетган эди. 15 январь куни “Самрук-Қазина” жамғармаси “ҚазТрансОйл” ширкати раиси Димаш Досанов ҳамда “Қазахгаз” ширкати раиси Қайрат Шарипбаев вазифаларидан бўшатилгани ҳақида маълумот тарқатган.

Қайрат Шарипбаев Назарбоевнинг тўнғич қизи Дариғанинг эри экани айтилади. Димаш Досанов эса Назарбоевнинг кенжа қизи Алиянинг турмуш ўртоғидир. Кулибаев собиқ президентининг ўртанча қизи Динарага уйланган. Кулибаевлар жуфтлиги Марказий Осиёдаги энг бадавлат кишилардан бўлиб ҳисобланади – эр-хотин Forbes журналининг миллиардер рўйхатига киришади.

54 ёшли Тимур Кулибаев Қозоғистонда нефть-газ саноати соҳасидаги энг нуфузли кишилардан бири бўлиб келган. У KAZENERGY нефть-газ ташкилотлари ҳамда энергетика мажмуаси ассоциациясини бошқариб келади. Бундан ташқари, у Россиянинг “Газпром” ширкати директорлар кенгаши аъзоси, Миллий олимпия қўмитаси раиси ҳамда Қозоғистон бокс федерацияси раҳбари бўлиб ҳисобланади.

Ўтган ҳафта Назарбоевнинг халафи бўлмиш президент Қасим-Жомарт Тоқаев мамлакатда юзага келган “норозилик вазияти” учун масъулиятни ҳукумат ва “КазМунайГаз” билан биргаликда “Казахгаз” ширкати зиммасига ҳам юклаган.

Суюлтирилган газ нархи кескин ошишига қарши Қозоғистон ғарбида 2 январь куни бошланган норозилик чиқишлари кейинроқ мамлакатнинг бошқа ҳудудларига ҳам ёйилиб, қатор шаҳарларда тартибсизлик ва қон тўкилишига олиб келган. Озодликнинг қозоқ хизмати хабарига кўра, айрим экспертлар Қозоғистондаги январь воқеалари замирида президент Тоқаев ва Назарбоев тарафдорларининг ҳокимият учун ички кураши ётганига оид тахминларни олға сурмоқдалар.

Собиқ президент Нурсултон Назарбоев ўтган йилнинг 28 декабридан буён оммага кўриниш бергани йўқ. У мамлакатда кузатилган кенг кўламли норозилик чиқишлари юзасидан ҳеч қанақа изоҳ берган эмас. Элбошининг матбуот котиби иддаосига кўра, Назарбоев Қозоғистонни тарк этгани йўқ, у пойтахтда бўлиб, Хавфсизлик кенгаши раҳбари ваколатини президент Тоқаевга топшириш қарорини ҳам шахсан ўзи қабул қилган.

Давомини ўқинг

XS
SM
MD
LG