Линклар

Шошилинч хабар
01 июн 2023, Тошкент вақти: 12:53

Ўзбекистон хабарлари

Минск аэропортида Uzbekistan Airways самолёти қўниш йўлакчасидан чиқиб кетди

Иллюстратив сурат.

Минск аэропортида 17 январь куни маҳаллий вақт билан соат 11:45 ларда Тошкент-Минск рейсини амалга ошираётган Uzbekistan Airways самолёти қўниш йўлакчасидан чиқиб кетди.

Минск аэропорти матбуот хизматининг билдиришича, Uzbekistan Airways самолёти Беларус Миллий аэропортига муваффақиятли қўнган. Аммо қўниш йўлакчасидан бурилиш пайтида бошқарув йўқолиб, самолёт йўлакдан чиқиб кетган.

Uzbekistan Airways самолёти бортида 115 йўловчи бўлган. Дастлабки маълумотларга қараганда йўловчилар орасида жабрланганлар йўқ. Самолётга ҳам зиён етмаган.

Минск аэропорти матбуот хизматининг Тошкент вақти билан соат 15:28 даги хабарида таъкидланишича, воқеа содир бўлган жойда авария-қутқарув хизмати ишламоқда.

Мазкур воқеа ортидан Минск аэропортидаги айрим рейсларни қабул қилиш ва учириш вақти ўзгариши мумкинлиги қайд этилган.

Кун янгиликлари

Ўзбекистон Шимолий Кореянинг космик ракета учирганига хавотир билдиргани айтилмоқда

Шимолий Корея учирган ракета кўп ўтмай денгизга қулаган.

Ўзбекистондаги интернет нашрлар Ташқи ишлар вазирлиги Шимолий Кореянинг космик ракета учирганига хавотир билдиргани тўғрисида хабар бермоқда. Бироқ Ташқи ишлар вазирлигининг расмий сайтида, ижтимоий тармоқлардаги расмий саҳифаларида, ЎзА миллий агентлиги сайтида бу борада маълумот берилмаган.

Маҳаллий нашрлар вазирлик матбуот котиби Ахрор Бурхоновга тегишли экани айтилаётган ва 180 дан ортиқ обуначиси бўлган Фейсбукдаги саҳифага таянган ҳолда бу ҳақда маълум қилди.

Ахрор Бурхонов Фейсбук саҳифасига жойлаштирилган баёнотда “Ўзбекистон Республикаси Ташқи ишлар вазирлиги 31 май куни Шимолий Корея томонидан ташувчи космик ракета учирилганидан хавотир билдиради. Ушбу ҳолат Корея ярим оролидаги кескинликнинг янада кучайишига олиб келади”, дейилади.

Баёнот давомида Ўзбекистон БМТ Хавфсизлик Кенгаши резолюцияларидан келиб чиқадиган мажбуриятларга мувофиқ оммавий қирғин қуролларининг барча турларини синовдан ўтказишдан бош тортилиши тарафдори экани қайд этилади.

“Ўзбекистон томони бундан кейин ҳам умумий фаровонлик ва тараққиёт йўлида Корея ярим оролида хавфсизликни таъминлаш бўйича фаол қадамларни қатъий қўллаб-қувватлайди", — дейилади Ахрор Бурхоновга тегишли экани айтилаётган Фейсбук саҳифасига жойлаштирилган баёнотда.

31 май куни Шимолий Корея ўзининг биринчи космик разведка ракетасини учиргани, аммо у кўп ўтмай денгизга қулагани хабар қилинган. Шимолий Корея ракета қулаганини тасдиқлаган. Жанубий Корея армияси эса денгиздан ракета қолдиқларини топган.

Шимолий Корея ракетанинг нега қулагани сабаблари аниқланганидан сўнг яна бир парвозни амалга оширишини билдирмоқда.

БМТ Бош котиби Антониу Гутерриш Шимолий Кореянинг бу ҳаракатини қоралаган ва Корея ярим оролидаги вазиятни кескинлаштирмаслик учун музокараларни жонлантиришни таклиф қилган.

Янги Тошкентни қуриш учун 19,7 минг гектар ер ажратилди

Янги Тошкентни қуриш ташаббусини 2021 йилнинг 31 августида президент Шавкат Мирзиёев кўтарган эди.

Тошкент вилоятининг Юқори Чирчиқ ва Ўрта Чирчиқ туманларидан Янги Тошкент учун 19 минг 729,4 гектар ер ажратилди. Вилоят Кадастр агентлигининг маълум қилишича, унинг 12,9 минг гектари қишлоқ хўжалиги ерларидир.

Расман билдирилишича, қурилиш учун ажратилган ерлардан шу кунгача 772 субъект фойдаланиб келаётган эди. Жумладан, қишлоқ хўжалик ерлари 242 та фермер хўжалигига, 49 та ёрдамчи хўжаликлар ва иссиқхоналарга, 100 та деҳқон хўжалигига тегишли бўлган.

Янги Тошкентни қуриш ташаббусини 2021 йилнинг 31 августида президент Шавкат Мирзиёев кўтарган эди. Мирзиёевнинг режасига кўра, Янги Тошкент Тошкент вилоятида Чирчиқ ва Қорасув дарёлари оралиғига қурилиши лозим. Янги Тошкентга пойтахтдаги давлат идоралари кўчирилади, Тошкент шаҳри эса “яшил ҳудуд”га айлантирилади.

Янги Тошкент лойиҳаси доирасида 20 минг гектар ерда 1 миллион аҳоли учун турар-жой бинолари, жумладан, биринчи босқичда 60 минг кишига мўлжалланган кўп қаватли уйлар, 30 та мактаб, 20 та болалар боғчаси, касалхона ва 5 та поликлиника қурилиши назарда тутилган.

АҚШга бормоқчи бўлган ўзбекистонликлар 17 июндан эътиборан виза учун кўпроқ ҳақ тўлайди

Иллюстратив сурат

АҚШнинг Тошкентдаги элчихонаси виза талаби билан мурожаат қиладиган ўзбекистонликлар учун маъмурий тўлов миқдори ўзгарганини эълон қилди.

Элчихона телеграм канали орқали тарқатилган хабарномага мувофиқ, АҚШ туристик виза тоифасига ҳамда петиция талаб этмайдиган ноиммиграцион виза турлари бўйича мурожаат этувчилар жорий йилнинг 17 июнидан бошлаб аввалгидек 160 доллар эмас, балки 185 доллардан ҳақ тўлайдилар.

Петиция асосида бўлган (H, L, O, P, Q ва R) виза тоифаларига мурожаат этувчилар учун маъмурий тўлов миқдори 190 АҚШ долларидан 205 АҚШ долларига кўтарилади”, дейилган АҚШ элчихонаси хабарномасида.

Аргентинадаги ЖЧда исроиллик тенгдошларига ютқазган ўзбекистонлик ёш футболчилар чемпионатни тарк этишди

Иллюстратив сурат

Ўзбекистон терма жамоаси 20 ёшгача футболчилар ўртасида (U-20) Аргентинада бўлиб ўтаётган жаҳон чемпионатини тарк этди.

Аргентинадаги Мальвинас Архентинас стадионида 30 май куни нимчорак финал доирасида Исроил терма жамоасига қарши майдонга тушган ўзбекистонлик футболчилар 0:1 ҳисобида рақибларига ютқазишди.

Кечаги ўйин ғолибига айланган исроиллик ёш футболчилар 3 июнь куни бўлиб ўтадиган Бразилия ва Тунис терма жамоалари ўртасидаги ўйин ғолиби билан чорак финалда куч синашади.

Ижтимоий тармоқларнинг ўзбек сегментида ўзбекистонлик ёш футболчиларнинг Аргентинадаги жаҳон чемпионатида ўтказган ўйинларидан ҳафсаласи пир бўлганлик мазмунида кўплаб изоҳлар қолдирилмоқда.

Айни пайтда Ўзбекистон терма жамоасининг ЖЧда нимчорак финал босқичига етиб бора олгани-да катта муваффақият эканини урғулаётганлар сонини ҳам кам деб бўлмайди.

Расман: Озодбек Назарбековга тегишли МЧЖ таъсисчиси ўзгартирилди

Маданият ва туризм вазири Озодбек Назарбековга тегишли бўлган “Коба санъат мажмуаси” МЧЖси таъсисчиси ўзгартирилди. Коррупцияга қарши курашиш агентлигининг 30 майда билдиришича, бу иш “қонунчиликка зид ҳолатни бартараф этиш” мақсадида амалга оширилган.

Агентликнинг билдиришича, Озодбек Назарбеков 2016 йил 16 мартда давлат рўйхатидан ўтказилган “Коба санъат мажмуаси”нинг 100 фоизлик улушига эгалик қилган ва ягона таъсисчиси бўлган. Бу эса амалдаги қонунчиликка зиддир.

Агентлик Вазирлар Маҳкамасининг 1992 йил 6 мартдаги “Тадбиркорлик фаолияти билан шуғулланиш тақиқланган мансабдор шахсларнинг рўйхати тўғрисида”ги қарори ва “Тадбиркорлик фаолияти эркинлигининг кафолатлари тўғрисида”ги қонуннинг 4-моддасига асосан давлат органларидаги мансабдор шахсларга тадбиркорлик фаолияти билан шуғулланиш тақиқланганини эслатган.

Ўзбекистонда кўплаб давлат амалдорлари бевосита ёки билвосита тадбиркорлик билан шуғулланиб келаётгани тўғрисида ижтимоий тармоқларда тез-тез хабарлар пайдо бўлади.

Озодбек Назарбековнинг ҳам тадбиркорлик билан шуғулланиши тўғрисидаги маълумотлар дастлаб ижтимоий тармоқлар фойдаланувчилари томонидан эълон қилинган. Коррупцияга қарши курашиш агентлигининг мазкур баёноти ҳам ижтимоий тармоқлардаги хабарлар ортидан пайдо бўлди.

Қашқадарё вилоят ММТБ 9 ёшли бола зўрланмаганини иддао қилмоқда

Иллюстратив сурат.

Қашқадарё вилоят Мактабгача ва мактаб таълими бошқармаси 30 май куни кечқурун Косон туманидаги мактаблардан бирида юқори синф ўқувчилари 9 ёшли ўғил болани жинсий зўрлагани тўғрисидаги хабарни инкор қилди.

Расмий билдирувда қайд этилишича, 11 май куни кундузи соат 15:16 чамасида мактабнинг 5-синф ўқувчилари спортзалда “ўзларининг қўлларида бўлган ўйинчоқ резинка илон билан” 3-синф ўқувчиларининг 4 нафарини қўрқитган. Шундан сўнг “кийимларини ечтириб, уларнинг бир нафарининг баданига, жумладан, белидан пастки қисмига ҳам урган”.

Бошқарма“ҳозирги кунда тиббий экспертиза хулосасининг тоза чиққани ҳақида шифокорлар оғзаки маълумот бергани ва унинг тасдиғи келгусида очиқланиши ҳақида маълумот берилган”и, ўқувчининг онаси эса “боласини тиббий экспертиза қилдирмасдан турли сўзларни бошқа ОАВ вакилларига айтган”ини қайд этган.

Озодлик радиосининг "Мигрант медиа" лойиҳаси 30 май куни кечқурун “Қашқадарёда мактаб ўқувчилари 9 ёшли болани зўрлаганликда гумон қилинмоқда” сарлавҳали видеони эълон қилган эди.

Видеода зўрлангани айтилаётган боланинг онаси воқеадан 4 кун ўтгачгина хабар топганини ва зудлик билан мактаб маъмурияти ҳамда ички ишлар органларига мурожаат қилганини айтган. Болага нисбатан суд-тиббий экспертизаси эса орадан икки ҳафта ўтганидан кейин амалга оширилган.

Мактаб директори мактаб спортзалида учинчи синф ўқувчиларига нисбатан зўравонлик ҳолати содир этилганидан ўз вақтида хабардор бўлмаганини айтган. Косон туман ички ишлар бўлими расмийлари бу масалада дастлабки текширув ишлари олиб борилаётганини тасдиқлаган.

Озодлик сайти ва ижтимоий тармоқларида кечқурун тарқатилган видеога Қашқадарё вилоят Мактабгача ва мактаб таълими бошқармасининг бу муносабати орадан уч соат ўтгач - 30 май куни кеч соат 22:17 да эълон қилинди. Бошқарманинг иддао қилишича, бу воқеа “масъуллар иштирокида мактаб раҳбарлари, ўқувчиларнинг ота-оналари, маҳалла фаоллари ва ИИБ ходимлари иштирокида ўрганилган".

Мирзиёев ЎзЛиДеПдан президентликка номзод ўлароқ кўрсатилди

Ўзбекистоннинг амалдаги президенти Шавкат Мирзиёев 2016 ва 2021 йилларда ўтказилган президент сайловларида ҳам ЎзЛиДеПдан номзод ўлароқ кўрсатилган эди

Ўзбекистон Либерал-демократик партияси амалдаги президент Шавкат Мирзиёевни муддатидан илгари президент сайловига номзод ўлароқ кўрсатди. Партия матбуот хизмати маълумотига кўра, президент сайловига номзод кўрсатиш ЎзЛиДеПнинг 30 май куни Тошкент шаҳрида бўлиб ўтган XI съездида амалга оширилган.

Съездда президентликка номзод Шавкат Мирзиёев сайлов дастурининг асосий йўналишлари билан таништирган.

Мирзиёев ўз дастурининг ҳар бир инсонга ўз салоҳиятини рўёбга чиқариш учун муносиб шароит яратиш, одамларни ҳаётдан рози қилиш учун барқарор иқтисодий ўсишни таъминлаш, сув ресурсларини тежаш ва атроф-муҳитни муҳофаза қилиш, қонун устуворлигини таъминлаш, халқ хизматидаги давлат бошқарувини ташкил этиш ҳамда Янги Ўзбекистон хавфсиз ва тинчликсевар давлат каби бешта мақсаддан иборат эканини очиқлаган.

Хабарномада съезд қарори билан партия қонунда белгиланган тартибда Ўзбекистон президентлигига ўз номзодини рўйхатга олишни сўраб Марказий сайлов комиссиясига мурожаат этиши қайд этилган.

Ўзбекистонда муддатидан илгари президент сайлови жорий йилнинг 9 июлига белгиланган. Таҳлилчилар 40 кундан сўнг ўтказилажак натижаси олдиндан маълум сайловда катта фарқ билан Мирзиёев ғалаба қозонишига шубҳа қилишаётгани йўқ.

Аввалроқ “Миллий тикланиш” партияси президент сайлови бўйича Шавкат Мирзиёев номзодини қўллаб-қувватлашини билдирган. Айни пайтда “Адолат” партияси Робахон Маҳмудовани, Халқ демократик партияси Улуғбек Иноятовни, Экологик партия эса Абдушукур Ҳамзаевни президентликка номзод қилиб кўрсатган.

ЎМИ ижтимоий тармоқлар орқали жума табриги йўллаш тақиқлаганига оид хабарларни рад этди

Ўзбекистонда ижтимоий тармоқлар орқали жума табрикларини тарқатишга рухсат этилган. Бу ҳақда маълумот тарқатган Ўзбекистон мусулмонлари идораси матбуот хизмати ўз хабарномасида ЎМИнинг расмий веб-сайтлари, масжид-мадрасалар, иқтидорли имом-хатибларнинг сайт ва ижтимоий тармоқ саҳифаларини мутолаа қилиш ҳамда улардаги маълумотларни яқинларига улашиш мумкинлигини урғулаган.

Диний идора қайдича, ижтимоий тармоқлардаги жума табриги, Қуръон оятлари, пайғамбар ҳадислари, мамлакат уламолари ва имом-домлаларининг мавъизаларини тарқатиш мумкин эмаслигига оид иддао асоссиз.

2021 йил 5 июлдаги “Ўзбекистон Республикасининг Виждон эркинлиги ва диний ташкилотлар тўғрисида”ги қонунига асосан эътиқод эркинлиги кафолатланган. Шунга кўра, фуқаролар динга эътиқод қилиш, диний расм-русумлар ва маросимларни ўтказиш ҳамда ўз динининг таълимотларини ўрганиш ҳақ-ҳуқуқига эгадир”, дейилган хабарномада ўзбекистонлик мусулмонлар “расмий, ишончли ижтимоий тармоқлардаги диний-маърифий мазмундаги барча маълумотларни мутолаа қилишлари ҳамда яқинларига улашишлари мумкин”лиги урғуланади.

ЎМИ мусулмонлар фойдаланиши мумкин бўлган ресурслар қаторида “расмий ва етакчи электрон манбалар рўйхати”ни келтирган. Бунинг баробарида Диний идора “экстремистик ғояларни ҳар қандай шаклда – хоҳ жума табриги бўлсин, хоҳ бошқача атрибут ёки сурат шаклида бўлсин – тарқатиш, сақлаш ва фойдаланиш қонунан таъқиқланган”идан огоҳлантирган ҳамда аввалроқ Олий суднинг Ўзбекистонда тақиқланган экстремистик сайт ва ижтимоий тармоқлардаги профиль, канал ва гуруҳлар рўйхати борлигини эслатган.

Айни пайтда хабарномада ЎМИ томонидан тавсия этилган расмий манбалар рўйхатида бўлмаган, Олий суднинг тақиқланган сайт, гуруҳ ва профиллар рўйхатига ҳам кирмаган сайт ёки профиллардаги диний контентдан фойдаланиш мумкин ёки эмаслигига аниқлик киритилмаган. Шундан келиб чиққан ҳолда, хабарномадан ўзбекистонлик мусулмонларга диний блогерлар ёки алоҳида имомлар тарқатаётган контентдан фойдаланиш мумкин ёки эмаслиги англашилмай қолган.

Аввалроқ Ўзбекистонда танишларига нашида йўллагани учун бир неча нафар ёш йигитнинг судланиб, қамалгани қайд этилган, бу ҳолат ортидан ижтимоий тармоқларда қандай диний контент тарқатиш мумкин ёки эмаслиги, бу каби чекловлар диний эркинликни кафолатловчи қонунларга нақадар мувофиқлиги юзасидан баҳс-мунозаралар келиб чиққан эди.

Қашқадарёда икки блогер ва бир журналист 5 суткага қамалди

Иллюстратив сурат.

Қашқадарё вилоят жиноят ишлари бўйича Шаҳрисабз шаҳар суди блогерлар А. Абдуллаев, М. Музаффаров ва Nasaf News сайти раҳбари У. Каримовни майда безориликда айбдор деб топди. Суд қарори билан уларнинг ҳар бири 5 суткага қамалди.

Расман билдирилишича, 29 май куни соат 10:20 ларда Шаҳрисабз шаҳар ИИБ ЙҲХБ биноси олдига автомашинада келган А. Абдуллаев, М. Музаффаров ва У. Каримов "ЙҲХБ бошлиғи Ф. Янгибоевда шубҳа уйғотган". У блогерлар олдига чиқиб, ҳужжатларни сўраган. А. Абдуллаев машина ўзига тегишли эканини айтиб, бошлиққа паспортини кўрсатган, аммо машинаси ҳужжатларини кўрсатишдан “бош тортган”.

Шундан кейин Янгибоев автомашинани жарима майдонига жойлаштирмоқчи бўлганида, “А. Абдуллаев, М. Музаффаров ва У. Каримов ИИБ ходимларига нисбатан қўполлик қилиб, уларга ҳурматсизлик ва беписандлик қилиб, уларга сенсираб мурожаат қилиб, жанжал қила бошлаган”.

Суднинг иддао қилишича, улар воқеа жойига етиб келган Шаҳрисабз шаҳар ИИБ бошлиғининг ўринбосари Ж. Рауповни ҳам “фуқаролар олдида обрўсизлантирганлар”.

Бу уч киши ўша куниёқ ушланиб, уларнинг иши судга оширилган ва жиноят ишлари бўйича Шаҳрисабз шаҳар суди блогерларга 5 суткадан қамоқ жазоси белгилаган.

Ушбу воқеа юзасидан ҳозирча мустақил манбалар ҳеч қандай муқобил ахборот тарқатган эмас. Қамалган блогерларнинг ўзлари ва яқинлари ҳам суднинг бу қарорига муносабат билдирмади.

27 май куни Қашқадарё вилояти Яккабоғ туманида блогер Элмурод Одилов ҳам Маъмурий жавобгарлик кодексининг 183-моддаси (майда безорилик) ва 198-моддаси (ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилиш) 1-қисми билан 15 суткага қамалганди.

Маҳаллий нашрларнинг ёзишича, блогер Яккабоғ тумани ҳокими ўринбосари Фозил Хидиров пилла омборхонасида ўтказаётган йиғилишни ёритишга урингани ортидан қўлга олинган.

Мазкур йиғилишда Хидиров ёшлар етакчиларига бир ойлик ҳарбий хизматга шартнома пулини тўлаган ҳолда бир кишини жалб қилишга буйруқ берган. Бу ишни амалга оширмаганлар ишдан бўшатилишини айтган.

Хоразм суди: 3-синф ўқувчиларига шилқимлик қилган ўқитувчига “энг қаттиқ жазо берилди”

Хоразм вилоят суди Nemolchi.uz лойиҳасининг Хонқа туманидаги мактаблардан бирида 3-синф ўқувчиларига шаҳвоний шилқимлик қилган ўқитувчига ўта енгил жазо белгилангани тўғрисидаги норозилигига жавоб қайтарди.

Хоразм вилоят судлари матбуот хизматининг билдиришича, Жиноят ишлари бўйича Хонқа туман судининг 2023 йил 25 май кунги қарорига асосан, 3-синф ўқувчилари С.К., ва М.Э.,ларга дарс пайтида шахвоний шилқимлик қилган 1962 йилда туғилган рус тили ўқитувчиси Б.Р.,га МЖтКнинг 41¹-моддаси 1-қисми билан 5 сутка маъмурий қамоқ жазоси тайинланган.

Расмий муносабатда таъкидланишича, мазкур модда асосида айбланувчига базавий ҳисоблаш миқдорининг 2 бараваридан 5 бараваригача миқдорда жарима ёки 5 суткагача муддатга маъмурий қамоқ жазоси назарда тутилган.

“Жиноят ишлари бўйича Хонқа туман суди томонидан ҳуқуқбузар Б.Р.га мазкур модда санкциясида назарда тутилган максимал жазо, яъни 5 сутка маъмурий қамоқ жазоси тайинланган”, дейилади вилоят суди баёнотида.

Nemolchi.uz 27 май куни Хонқа туман судининг бу қарорига телеграм канали орқали норозилик билдирган эди. Nemolchi.uz лойиҳаси судда мазкур иш нотўғри квалификация қилинган, деган нуқтаи назарни олға сурмоқда.

“Бундай жиноятлар ЖК 129-моддаси 2-қисми "б", "в" ва "ж" бандлари билан квалификация қилиниши лозим. Бунинг учун жазо эса 3 йилдан 5 йилгача озодликни чеклаш ёки ўқитувчилик фаолияти билан шуғулланишни тақиқлаган ҳолда 3 йилдан 5 йилгача озодликдан маҳрум қилишни назарда тутиши керак”, дейилади Nemolchi.uz баёнотида.

Ёқилғи-энергетика ресурсларидан фойдаланишни назорат қилиш учун прокурорлар сони кўпайтирилди

Президент Шавкат Мирзиёевнинг 26 майдан кучга кирган ёқилғи-энергетика ресурсларидан фойдаланишни назорат қилиш тўғрисидаги фармонига асосан прокуратура ходимлари сони 755 нафарга кўпайтирилди. Фармон Қонунчилик маълумотлари миллий базасида эълон қилинди.

Фармонга асосан, прокуратура ходимлари сони ёқилғи-энергетика ресурсларидан фойдаланиш устидан назоратни амалга оширишини таъминлаш мақсадида кўпайтирилмоқда. Жумладан, прокуратура бошқарув ходимлари сони 691 нафарга кўпайтирилади. Бу билан прокуратура бошқарув ходимлари ҳозирги 4195 дан 4886 нафарга етади.

Бош прокуратурада прокурор-терговчилар сони 64 нафарга оширилади ва жами 316 нафарни ташкил қилади. Бундан ташқари яна битта бош прокурор ўринбосари лавозими жорий этилади.

Мазкур фармон билан 1 сентябрдан ёқилғи-энергия соҳасида кузатилаётган ҳуқуқбузарликларни фотосуратга ва видеога олиб Энергетика вазирлигининг интернетдаги махсус ахборот тизимига юборганларга пул мукофоти берилади. Фармонда пул мукофотининг миқдори белгилаб берилмаган.

Чилонзордаги ички ишлар бўлимида 21 ёшли йигит ҳалок бўлди

Иллюстратив сурат.

Тошкент шаҳар Чилонзор туман ИИО ФМБга 22 май куни олиб келинган 21 ёшли сурхондарёлик йигитнинг ўлими юзасидан прокуратура текширув ўтказмоқда, деб билдирди 29 май куни Бош прокуратура матбуот котиби Ҳаёт Шамсутдинов.

Ички ишлар вазирлигининг 29 майда маълум қилишича, Ҳ.Т., исмли фуқаро шубҳали кўрингани учун 22 май куни эрталаб Чилонзор тумани ИИО ФМБга олиб келинган ва унинг ёнидан 53,52 грамм наша топилган. Мазкур ҳолат юзасидан Ҳ.Т.,га нисбатан жиноят иши қўзғатилган.

Вазирлик билдирувида 22 май куни тахминан соат 18.50 ларда Ҳ.Т., ҳожатхонага киришга рухсат сўрагани ва 4-қаватдаги ҳожатхона деразасидан “пастга сакраши натижасида бош ва тана қисмидан турли жароҳатлар олган”и қайд этилади.

Касалхонага ётқизилган йигитга “бош мия ёпиқ жароҳати, бош мия лат ейиши, бош суягини синиши, тана аъзоларининг гематомаси ташхиси қўйилган. 29 май куни Ҳ.Т., касалхонада вафот этган”.

Kun.uz йигитнинг яқинига таянган ҳолда, унинг исми Ҳафизуллоҳ Турғунбоев эканини аниқлади. Марҳумнинг яқини нашрга берган суҳбатида Ҳафизуллоҳ Турғунбоев ўзини “4-қаватдаги ҳожатхона деразасидан ташлаганига ишонмаслиги”ни айтган:

“Ҳафизуллоҳ танасининг бирорта ҳам қисми – на оёғи ва на қовурғаси синган бўлган, балки фақатгина юзи ва бош қисмида жароҳат излари бўлган. Наҳотки 4-қаватдан тушиб кетган инсонни ҳаттоки қўли ҳам синмаса. Бундан ташқари, ИИБ ходимлари унинг оёғи синганини айтганди.

Ҳафизуллоҳнинг гавдаси ҳам каттагина эди, у қандай қилиб ҳожатхона ойнасидан сиғиб кетиши мумкинлигига ҳам ҳайронман. Боз устига ҳожатхона ички ишлар биносида бўлса. Шифокорлардан қандайдир шубҳангиз борми, десам, фикримни фақат судда айтаман, дейишди”,
деган марҳумнинг яқини Kun.uz сайтига.

Ўзбекистон Қирғизистон билан чегарадаги деворни бузди

Ижтимоий тармоқларда тарқалган видеодан скриншот.

Ўзбекистон Қирғизистон билан чегарадаги деворни бузгани тўғрисида Қирғизистон Чегара хизматига таянган ҳолда Бишкекдаги Kaktus.media нашри хабар қилди.

Аввалроқ ижтимоий тармоқларда Ўзбекистон икки давлат чегарасига 2010 йилда бир томонлама қурилган деворни бузаётгани тўғрисидаги видео пайдо бўлган эди. Қирғизистон Чегара хизматининг билдиришича, мазкур видео Жалолобод ва Андижон вилоятлари ўртасидаги “Бекобод-Хонобод” чегара пунктида тасвирга олинган.

Хабарда айтилишича, мазкур девор “Бекобод-Хонобод” чегара пункти фаолиятини қайта тиклаш мақсадида бузилган. “Тез кунларда бу чегара пункти очилади. Қирғизистон томони мазкур пунктдан аҳолини ўтказишни амалга оширишга тайёр”, деб билдирган Чегара хизмати.

Бундан ташқари Ўш ва Андижон вилоятлари ўртасидаги “Қорасув” ва “Қорабағиш” чегара назорат ўтказиш пунктлари фаолияти ҳам тикланиши режалаштирилмоқда.

Хабарда таъкидланишича, бу чегара назорат ўтказиш пунктларини очиш масаласи икки давлат ҳукуматлари томонидан бир неча йиллардан бери муҳокама қилиб келинаётган эди.

Ўзбекистон томони ҳозирча “Бекобод-Хонобод” чегара пунктидаги девор бузилгани, “Қорасув” ва “Қорабағиш” пунктлари ҳам очилиши юзасидан расман маълум қилмади.

29 май куни Озодлик Самарқандда Ўзбекистон ва Қирғизистон ҳукумат делегациялари давлат чегараси демаркацияси бўйича норматив-ҳуқуқий ва техник ҳужжатларни тасдиқлашгани тўғрисида хабар берган эди.

Ўзбекистон билан Қирғизистон ўртасидаги 1314 километрли чегара чизиғи тўлиқ аниқлаб бўлинган. 2022 йил ноябрида Тошкент ва Бишкек чегара бўйича 30 йилдан буён давом этиб келаётган баҳсларга нуқта қўйилганини билдиришган.

Ўзбекистон ва Қирғизистон делегациялари чегара демаркациясига оид ҳужжатларни тасдиқлашди

Ўзбек-қирғиз чегарасидаги ўзбекистонлик чегарачилар (архив сурати)

Самарқандда Ўзбекистон ва Қирғизистон ҳукумат делегацияларининг ўзбек-қирғиз чегараси демаркацияси бўйича музокаралари бўлиб ўтди, дея маълумот тарқатди Қирғизистон Вазирлар Маҳкамаси матбуот хизмати.

Қайд этилишича, қўшма демаркацион комиссиянинг илк йиғилишида чегаранинг айрим участкаларидаги биргаликдаги дала тадқиқотлари натижалари муҳокама этилган.

Қирғизистон ҳукумати маълумотига кўра, учрашув якунида томонлар давлат чегараси демаркацияси бўйича норматив-ҳуқуқий ва техник ҳужжатларни тасдиқлашган.

Ўзбекистон билан Қирғизистон ўртасидаги чегара 1314 километрга узанган. 2022 йил ноябрида Тошкент ва Бишкек чегара бўйича 30 йилдан буён давом этиб келаётган баҳсларга нуқта қўйилганини билдиришган. Томонлар чегаранинг аниқланмаган 312 километри (15%) бўйича ўзаро муросавий битимга келишган.

Ўшанда ҳар икки мамлакат парламентлари Ўзбекистон билан Қирғизистон ўртасидаги чегаранинг айрим участкалари делимитациясига оид шартнома ҳамда Андижон (Кампиробод) сув омбори тўғрисидаги битимни ратификация қилиш тўғрисидаги қонун лойиҳаларини маъқуллашган, шундан сўнг икки мамлакат президентлари мазкур қонунларни имзолашган.

Ўзбекистон президенти Шавкат Мирзиёев жорий йил январь ойида давлат ташрифи билан Бишкекка келганида у билан қирғизистонлик ҳамкасби Садир Жапаров ўртасида Давлат чегарасининг алоҳида участкалари тўғрисидаги шартноманинг ратификация ёрлиқларини алмашилган.

Икки давлат ўртасида чегара бўйича тузилган битимнинг Андижон сув омбори остидаги ерларни бошқа участкаларга алмаштириш йўли билан Ўзбекистонга берилиши Қирғизистондаги қатор жамоатчилик фаоллари норозилигига сабаб бўлган. Бу норозилик ортидан қўзғатилган жиноят иши доирасида мамлакатда 30 чоғли сиёсатчи ва фаол ҳибсга олинган.

Украинада ҳалок бўлган яна бир ўзбекистонликнинг жасади ватанига келтирилди

Февраль ойида Озодлик Москва вилоятида "Вагнер" ХҲШ сафида жанг қилганлар дафн этилган қабристонни топган эди. Бу ерда Украина урушида ўлган марказий осиёликлар ҳам дафн этилган.

Украинадаги урушда Россия томонида жанг қилган 23 ёшли ўзбекистонлик Ш. Тожибоевнинг жасади ватанига келтирилди. Бу ҳақда Ўзбекистон Давлат хавфсизлик хизмати маълум қилди. Айрим маҳаллий нашрларнинг ёзишича, Тожибоев Наманган вилоятининг турғуни бўлган.

ДХХ тарқатган видеода Тожибоевнинг онаси ногирон бўлган ўғли оиласини боқиш учун Россияга иш излаб кетишга мажбур бўлгани тўғрисида гапириб берди. Онанинг айтишича, Тожибоев наркотик савдосида айбланиб қамоқда жазо муддатини ўтаётганида мажбурий равишда Украинадаги урушга олиб кетилган. Сўнгги марта она ўғли билан ўтган йилнинг 10 сентябрида телефон орқали гаплашган.

Онанинг видеода айтишича, у ўғлининг жасадини ўзи бориб олиб келган. Жасаднинг фақат белдан юқори қисми сақланиб қолган.

Ш. Тожибоев Украинадаги урушда ҳалок бўлган ягона ўзбекистонлик эмас. Февралда Озодлик Самарқанд вилояти Булунғур туманига Украинада ўлган икки нафар ўзбек йигитининг жасади олиб келингани тўғрисида хабар берган.

Март ойида ДХХ Қорақалпоғистоннинг Элликқаъла туманида туғилган Ўзбекистон фуқароси Россиядаги қамоқхонада жазо муддатини ўтаётганида Украина урушига жалб қилингани ва унинг ҳалок бўлгани ҳақида маълум қилган.

Майнинг бошларида Британия Мудофаа вазирлиги Россия ҳукумати марказий осиёлик меҳнат мигрантларини Украина урушига ёллаётгани тўғрисидаги маълумотларни эълон қилган эди. Олдинроқ эса «Вагнер» хусусий ҳарбий ширкати қамоқхоналарда ётган маҳкумларни ҳам урушга ёллаётгани тўғрисида хабарлар берилган.

Давомини ўқинг

XS
SM
MD
LG