тел: +420 2 2112 2397 Skype: assadrskype
Email: sadriddin61@gmail.com Facebook: Sadriddin Ashurov
Бухоро вилоятининг Жондор туманида аҳолини ижтимоий ва иқтисодий қўллаб-қувватлаш мақсадида президент қарори билан берилган 10 сўтихлик томорқа ерлар ҳокимият томонидан олиб қўйиляпти. Озодликка боғланган жондорликлар бу ерларга эккан буғдой, беда каби кузги экинлари ҳайдаб ташланиш арафасида эканидан арз қилди.
Самарқанд шаҳридаги Сартепа мавзеси Хўжасоат маҳалласида яшовчи юзга яқин аҳоли 5 ноябрь куни мавзедан ўтадиган автомобил йўлини тўсиб қўйди. Одамлар уч кун электр энергияси ва газ берилмаганига қарши ўз норозилигини шу тарзда ифода этди.
Ҳинд қўшиқларини ҳам эр, ҳам аёл овозида, пақир ва тоғораларни чалиб, қойилмақом ижро этиб танилган тожикистонлик ўзбек “Боймурод Жимми” Санкт-Петербургда рус аёлига уйланди. Расмий никоҳдан ўтган келин-куёвлар тўйни шаҳардаги муҳташам ресторанлардан бирида ўтказди.
Тошкент шаҳар Қўйлиқ мавзесида жойлашган мардикор бозорида 2 ноябрь куни милиция ходимлари ва мардикорлар ўртасида жанжал чиқди. Озодлик манбаларига кўра, бу жанжалга миршабларнинг прописка текшируви баҳонасида вилоятдан келган мардикорларни ушлаб¸ улардан яна пул ундириш ҳаракати сабаб бўлган.
Қирқ кунлик пахта теримидан 25 октябрь куни қайтган Гулистон Давлат университети талабалари ва ўқитувчилар 2 ноябрдан яна пахтага ҳайдалди. Улар ҳар куни шаҳар атрофидаги пахтазорга автобусларда ташилмоқда. Пахта деярли қолмагани боис, талабалар кун давомида терган пахта 5-10 килограммдан ошмаяпти.
Сўнгги пайтларда Россияда меҳнат муҳожирларига, айниқса ўзбекистонликларга нисбатан олиб борилаётган сиёсат ўзбек мардикорлари олдига икки йўл танловини қўйди. Бири - қандай йўл билан бўлмасин Россияда қолиб ишлаш, иккинчиси - Россияни ташлаб, Ўзбекистонга қайтиш ёки муҳожирлик учун бошқа давлатни танлаш. Чоршанба, 6 ноябр куни соат 21.05 да ўтказиладиган Озодликнинг "Баҳс майдони"га ана шу икки хил қарашдаги меҳнат муҳожирларини таклиф этамиз.
Ўзбекистон вилоятларида аҳолининг газ, электр ва коммунал хизматлар учун қарзини ундириш учун қаттиқ чоралар кўришга киришилди. Баъзи вилоятларда ишчи-хизматчилар қарздорлик йўқлиги ҳақидаги маълумотнома кўрсатилмагунча ойлик маошлар берилмаслиги ҳақида огоҳлантириляпти.
Наманган вилоятидаги Чуст туманида 18 октябр куни 21 ёшли Сардор Нуриддинов ва 17 ёшли Шамсия Расулжон қизи ўзини осди. Марҳумлар қолдирган мактубга кўра, уларга бирга бўлишга имкон беришмагани учун ҳам ўз жонларига қасд қилган.
Беш йил муддатга озодликдан маҳрум этилган ғаллаороллик маҳалла фаоли 75 ёшли Набижон (Тўрабой) Жўрабоев суд ҳукми устидан шикоят аризаси ёзишдан воз кечди. Умр йўлдошининг айтишича, Набижон Жўрабоевнинг юқори суд идораларининг адолатли ҳукм чиқаришига ишончи тугаб, хафсаласи пир бўлган.
Андижон Давлат университетининг 3-босқич талабаси Зулфира Аҳмедова ва унинг онасини пахта теримига ёлланган мардикор пичоқлади. Зулфира воқеа содир бўлган жойда ҳалок бўлди, унинг онаси эса касалхонага ётқизилди. Озодликнинг ҳуқуқ-тартибот органларидаги манбасига кўра, теримчи мардикор пахтадан қайтгандан сўнг, Зулфира Аҳмедовадан келишилган пулини ололмагач, унинг жонига қасд қилган.
Наманган Давлат университетининг 4-курс талабаси пахта мавсумининг навбатдаги қурбони бўлди. 29 сентябрь куни рўй берган ҳодиса ҳақидаги хабарни Озодлик 18 октябрь куни тасдиқлатди. Озодликнинг ҳуқуқ-тартибот идораларидаги ишончли манбасидан олган маълумотга кўра, 4-курс талабаси Нуриддин Холдоровни курсдоши уриб ўлдириб қўйган.
“Бирдамлик” халқ ҳаракатининг Жиззах вилояти етакчиси, фермер Алиқул Саримсоқов уч йиллик шартли қамоқ жазосига ҳукм қилинди. Алиқул Саримсоқовни туҳмат ва ҳақорат қилишда айблаб, Жиззах вилоятининг Зомин тумани ҳокими судга берган. Туман ҳокимининг ғайриқонуний ишлари ҳақида юқори идораларга шикоятлар ёзган ва уларни Интернетда эълон қилган Алиқул Саримсоқов айбни бўйнига олмаган.
Озодликнинг чоршанба, 16 октябр куни, Тошкент вақти билан соат 21.00 да бошланган BahsOnline дастурига Тожикистонда қурилиши бошланган Роғун ГЭСи қурилиши тарафдорлари ва бунга қарши бўлганларни таклиф этдик. Хўш, Роғун ГЭСи, Ўзбекистон ҳукумати иддао қилаётганидек, Марказий Осиёга экологик фалокат олиб келадими ёки Тожикистон ҳукумати даъво қилаётганидек, минтақа учун фойдали бўладими? Сизнингча, ким ҳақ?
Қорақалпоғистон Республикасининг Тўрткўл ва Қонликўл туманларида мактаб ўқувчилари кун оралаб пахта теримига сафарбар этилмоқда. Бу ҳақда хабар берган Озодлик манбаларига кўра, пахта теримига мактабларнинг юқори синф ўқувчилари чиқарилмоқда. Бироқ Қорқалпоғистон Халқ таълими вазирлиги буни инкор этмоқда.
Жиззахда содир бўлган Душанбе-Конибодом йўналишидаги йўловчи поезд ҳалокатига жавобгарликни Ўзбекистон томони ўз зиммасига олган. Бу ҳақда хабар берган Озодлик радиоси тожик хизматига кўра, поезд ҳалокати сабабларини текширган ўзбек-тожик қўшма комиссияси шундай хулосага келган.
Қўқон шаҳридаги мактаблар ўқитувчилари уйма-уй юриб аҳолинининг газ, электр энергияси ва коммунал хизматлардан қарздорлигини аниқлаш ва ундиришга сафарбар этилди. Қўқонлик ўқитувчиларнинг Озодликка хабар беришича, бу "сафарбарлик" шаҳар ҳокимининг мактаб директорларига берган оғзаки буйруғи асосида бошланган.
Сурхондарё вилояти, Қизириқ тумани ҳокими фермерни кам пахта топширганликда айблаб, онасини сўкди, калтаклаб-бўғди. Калтакланган фермернинг отаси кампирини етаклаб ҳокимнинг олдига келган-да “мана шу кампир сен сўккан улимни (ўғлимнинг) энаси бўлади, шуни сўкканмидинг, мана олиб келдим, қўлингдан келса “қил” деган. Фермернинг отаси ҳокимни урмоқчи бўлганида уни ажратиб олишган.
Жиззах вилоятининг Дўстлик туманида пахта тераётган сурхондарёлик 31 яшар мардикор тутқаноғи тутиб, пахтазорда ўлиб қолди. Озодликнинг ишончли манбалардан олган хабарига кўра, бу мардикор йигитни Тошкентдаги 49-поликлиника дўхтири ўз ўрнига ёллаб, пахта теримига жўнатган. Пул ишлаш истаги устун бўлган мардикор йигит эса касалини яширган.
Сирдарёнинг Мирзаобод туманида милиция, ҳокимият ва электр тармоғи идораси вакиллари уйма уй юриб, пахтага чиқмаган хонадонлар электр симларини кесиб кетмоқда. Озодлик боғланган расмийлар бу хабарни тасдиқлай туриб¸ тадбирнинг “электр энергиясидан қарздорлик”ка барҳам бериш мақсадида амалга оширилаëтганини иддао қилди.
Навоий кон-металлургия комбинати тасарруфидаги конда ғайриқонуний гуруҳлар олтин қазимоқда. Озодлик манбаларининг иддаосига кўра, "бу гуруҳларга маҳаллий расмийлар, милиция ва прокуратура раҳбарлари ҳомийлик қилмоқда". Озодлик Қорақўтан олтин конида 3 йилдан бери давом этаётган ғайриқонуний олтин қазиш жараёнини ўрганишга ҳаракат қилди.
Давомини ўқинг
