Линклар

Шошилинч хабар
02 июн 2020, Тошкент вақти: 23:13

Ўзбекистон хабарлари

Мустақиллик куни муносабати билан 65 маҳбус афв этилди

Иллюстратив сурат.

Президент Шавкат Мирзиёев Мустақилликнинг 28 йиллиги муносабати билан 65 нафар маҳкумни афв этиш тўғрисидаги фармонни имзолади.

Расмий хабарда айтилишича, афв этилган маҳбуслардан 39 нафари тақиқланган ташкилотларнинг аъзолари бўлгани учун қамалган одамлардир.

Фармонда белгиланишича, 17 нафар маҳбусга белгиланган жазо тўлиқ бекор қилинди, 13 нафар маҳбус жазони ўташдан шартли равишда озод этилди, 20 нафар маҳбусга белгиланган жазо енгилроғига алмаштирилди, 14 нафар маҳбуснинг жазо муддатлари қисқартирилди, 1 нафар маҳбус озодликдан маҳрум қилиш жазосидан озод этилди.

Афв этилганлар орасида 60 ёшдан ошган бир одам ва 4 нафар аёл бор.

Кун янгиликлари

Сўконғич бош врач ишдан олинди

Иллюстратив сурат.

Қўл остидаги ходимларни ўз кабинетида бўралатиб сўккан Тошкент вилояти Санитария -эпидемиология осойишталик маркази бош врачи Бахтиёр Болтабоев ўз вазифасидан озод этилди. Бу ҳақда Соғлиқни сақлаш вазирлиги ўз Телеграм-канали орқали маълумот тарқатди.

Вазирликнинг маълум қилишича, ижтимоий тармоқларда Б.Болтабоев ходимларини ўз кабинетида сўкаётганига оид видео тарқалганидан кейин ССВ ҳузуридаги Санитария–эпидемиологик осойишталик агентлиги томонидан хизмат текшируви ўтказилган ҳамда унинг қўл остидаги ходимлари билан ўта қўпол ва ахлоқий меъёрларга тўғри келмайдиган тарздаги суҳбати муҳокама қилиниб, қонунчиликда белгиланган тартибда тегишли чора кўрилган.

“Бош врач Соғлиқни сақлаш вазирининг биринчи ўринбосари, мазкур агентлик директори Баҳодир Юсупалиевнинг тегишли бўйруғи билан ўз вазифасидан озод этилди”, дейилади хабарномада.

Ёшларни оилавий ҳаётга тайёрлаш марказлари ташкил этилади

Салом бераётган ўзбек келини.

Ўзбекистонда Маҳалла ва оилани қўллаб-қувватлаш вазирлиги, Ўзбекистон Ёшлар иттифоқининг туман (шаҳар) маҳалла ва оилани қўллаб-қувватлаш бўлимлари тузилмасида юридик шахс мақомига эга бўлмаган Ёшларни оилавий ҳаётга тайёрлаш марказлари ташкил этилиши кутилмоқда. Ҳукуматнинг бунга оид қарори лойиҳаси 2 июнь куни Норматив-ҳуқуқий ҳужжатлар лойиҳалари муҳокамаси порталига жойланди.

Лойиҳага мувофиқ, қуйидагилар мазкур марказларнинг асосий вазифалари этиб белгиланган:

  • замонавий оиланинг намунали шаклини ҳамда “Оила – муқаддас”, “Соғлом оила – соғлом жамият”, “Оила жамият ва давлат ҳимоясида” ва “Фаровон оила – жамият равнақининг асоси” концептуал ғояларини никоҳланувчиларнинг онгига сингдириб бориш;
  • никоҳланувчи шахсларни оилавий-ҳуқуқий муносабатлар, оилавий ҳаёт психологияси, оила иқтисоди ва бюджети, репродуктив саломатлик асослари, маънавий-ахлоқий қадриятларни мустаҳкамлаш масалалари бўйича тизимли тайёрлашни йўлга қўйиш;
  • никоҳланувчи шахсларда оилавий қадриятларни сақлаш, оилаларда соғлом маънавий-ахлоқий муҳитни яратиш ҳамда ибратли ота-она бўлиш кўникмаларини шакллантиришда кўмаклашиш;
  • машғулотлар, назарий-амалий курслар, маҳорат сабоқлари, давра суҳбатлари, семинар-тренингларни илғор ижобий хорижий тажрибаларни инобатга олиб, ўқув жараёнига энг сўнгги илмий-услубий технологиялар ва реклама-ахборот усулларини жорий этган ҳолда ташкил этиш;
  • турмуш қуриш олдидан Марказларда ўқитилган ёш оилаларнинг ҳолатини ҳар томонлама ўрганиш ва мониторинг натижаларидан келиб чиқиб, ўқувларни янада такомиллаштириб мувофиқлаштириб бориш.

Қарор билан “Ёшларни оилавий ҳаётга тайёрлаш марказлари тўғрисида”ги низом тасдиқланиши кўзда тутилган.

Хотин-қизларни ва оилани қўллаб-қувватлаш жамоат фонди маблағлари, “Маҳалла” хайрия жамоат фондига ҳар йили ўтказиладиган умумхалқ хайрия хашаридан тушадиган тушумлари, Ўзбекистон Ёшлар иттифоқи маблағлари, туман (шаҳар) маҳаллий бюджетларининг қўшимча манбалари, юридик ва жисмоний шахсларнинг ҳомийлар хайриялари, халқаро ташкилотлар грантлари ҳамда қонун ҳужжатлари билан тақиқланмаган бошқа манбалар тузилажак марказлар фаолиятини молиялаштириш манбалари этиб белгиланган.

Қарор юзасидан муҳокама шу йил 17 июнигача давом этади.

Сардобаликларга кўмак учун йўлланган ҳарбийлар доимий манзилларига қайтишди

Сардоба тошқини туфайли вайрон бўлган уйни тозалаётган ҳарбийлар, Сирдарё вилояти, 2020 йил май ойи.

Сув тошқини оқибатларини бартараф этиш мақсадида Сирдарё вилояти Сардоба туманига сафарбар қилинган Ўзбекистон Мудофаа вазирлиги Марказий ҳарбий округи қўшинлари 1 июнь куни колонна билан Самарқанд, Жиззах ҳамда Каттақўрғон гарнизонларига қайтарилди. Бу ҳақда Марказий ҳарбий округ матбуот хизмати маълумот тарқатди.

Қайд этилишича, тошқин рўй берган жойга 2 май куни етиб борган ҳарбий хизматчилар қарийб бир ой давомида табиий офатдан азият чеккан аҳолига кўмак кўрсатган.

Хусусан, улар “Қўрғонтепа”, “Дўстлик” ва “Юртдош” маҳалларидаги 2148 та хонадонда тозалаш-таъмирлаш ва уйларни қайта тиклаш ишларини бажарганлар, хонадон эгалари учун вақтинчалик чодирлар ҳамда тандир ва ўчоқ қуриб берганлар.

Сирдарё вилоятидаги Сардоба сув омборида 1 май куни юз берган техноген фалокат туфайли яқин-атрофдаги аҳоли уйларини сув босган, тошқин оқибатида 6 киши ҳалок бўлган. Сардоба, Оқолтин, Мирзаобод туманларидаги 24 та аҳоли пунктидан 90 мингга яқин киши эвакуация қилинган.​

Ўзбекистонда солиқ тўловчилар сафига Huawei ҳам қўшилди

Huawei Ўзбекистонда ихтиёрий равишда ҚҚС тўловчиси сифатида рўйхатдан ўтган хорижий ширкатлар қаторига қўшилди.

Давлат солиқ қўмитасига қарашли tax.uz сайти қайдига кўра, Huawei Services (Hong Kong) Co., Limited ширкати 1 июнь куни рўйхатдан ўтган.

Аввалроқ Google, Facebook, Apple, Netflix, Samsung, Яндекс каби ширкатлар Ўзбекистонда ҚҚС тўловчиси сифатида рўйхатга олинганди.

Ўзбекистонда 2020 йил бошидан жисмоний шахсларга хизматларни электрон шаклда тақдим этадиган хориж компаниялари учун қўшилган қиймат солиғи тўлаш тартиби жорий этилганди. Бу каби ширкатларни рўйхатга олиш учун ДСҚ томонидан махсус хизмат – Интернет-компанияларнинг ҚҚС-офиси – tax.uz сайти яратилган.

Айни пайтда ҚҚС-офисида рўйхатдан ўтган хорижий ширкатлар сони 14 тага етган.

Жаҳон савдо ташкилоти билан ишлаш бўйича комиссия тузилди

Ўзбекистонда Жаҳон савдо ташкилоти билан ишлаш бўйича идоралараро комиссия тузилди. Norma.uz маълумотига кўра, 28 май куни ҳукумат "Жаҳон савдо ташкилоти билан ишлаш бўйича Идоралараро комиссия тўғрисидаги низомни тасдиқлаш ҳақида" қарор қабул қилган.

Мазкур комиссия, қарорга мувофиқ, Ўзбекистоннинг ЖСТга аъзо бўлиши бўйича ишларни мувофиқлаштирувчи ва йўналишларни белгилайдиган коллегиал орган ҳисобланади.

Низом билан Идоралараро комиссиянинг вазифалари ва функциялари, таркиби, фаолиятини ташкил этиш ва ишлаш тартиби белгиланган.

Идоралараро комиссиянинг асосий вазифалари ўлароқ қуйидагилар белгиланган:

  • ЖСТ Котибиятига ёки ЖСТга аъзо мамлакатларга келгусида юбориш учун Идоралараро комиссияга кўриб чиқиш учун тақдим этилган ҳужжатларни келишиш ва тасдиқлаш;
  • ЖСТ қоидалари ва тамойилларига мувофиқлаштириш ва уйғунлаштириш мақсадида Идоралараро комиссия аъзолари ва соҳага оид ишчи гуруҳларнинг Ўзбекистон Республикаси қонун ҳужжатларига зарур ўзгартириш ва қўшимчалар киритиш тўғрисидаги таклифларини келишиш;
  • ЖСТ билан ишлаш бўйича музокаралар гуруҳи билан биргаликда стратегик масалалар бўйича, шу жумладан, Ўзбекистоннинг ЖСТга кириши шартлари, шунингдек, ЖСТ аъзоси бўлган мамлакатлар билан икки томонлама, кўп томонлама ва ҳар тарафлама савдо музокаралари жараёнидаги келишувлар ва шартномалар бўйича Ўзбекистоннинг умумий позициясини ишлаб чиқиш.

Идоралараро комиссия ўз фаолиятини йиғилишлар шаклида амалга оширади, улар бир йилда камида икки марта ўтказилади. Идоралараро комиссия йиғилишларига материалларни тайёрлаш унинг Котибияти – Инвестициялар ва ташқи савдо вазирлигининг ЖСТ билан ҳамкорликни мувофиқлаштириш бошқармаси томонидан амалга оширилади. Кўриладиган масалалар бўйича қарорлар комиссия аъзолари томонидан очиқ овоз бериш орқали кўпчилик овоз билан қабул қилинади.

Идоралараро комиссия ҳукуматга ўтказилган йиғилиш якунлари бўйича ҳисобот киритади.

Саид Аҳмаднинг юз йиллиги муносабати билан сериал суратга олинди

Беш қисмли сериал 8-12 июнь кунлари Ўзбекистондаги 11та телеканалда намойиш этилади.

"Ўзбеккино" Миллий агентлигининг 1 июнда хабар беришича, Ўзбекистон Қаҳрамони, Ўзбекистон Халқ ёзувчиси Саид Аҳмад таваллудининг 100 йиллиги муносабати билан "Сабр-у садоқат" номли сериални суратга олди.

Беш қисмли сериал 8-12 июнь кунлари Ўзбекистондаги 11та телеканалда намойиш этилиши маълум қилинди. “Ўзбеккино”нинг маълум қилишича, “ушбу махсус лойиҳа “Саид билан Саида” фильмига киритилмай қолган янги саҳналар билан бойитилди”.

“Киносериал 1950 йилдан 1955 йилгача ёзувчи ва унинг рафиқаси ҳаётидаги ҳақиқий воқеаларга асосланган бўлиб, унда севги ва садоқат, инсон руҳиятининг куч-қудрати ва ҳар доим яхшиликнинг ёмонлик устидан ғолиб эканлиги тараннум этилади”, - дейлади расмий хабарда.

Май ойида энг қиммат палов Тошкентда, энг арзони Наманганда бўлди

Энг арзон палов Наманганда бўлиб, бир порцияси 11 571 сўм.

Давлат статистика қўмитаси май ойи учун “палов индекси” тўғрисидаги маълумотларни эълон қилди.

Ўзбекистон бўйича энг арзон палов Наманганда бўлиб, бир порцияси 11 571 сўм, бир килоси 80 997 сўм туради. Палов нархи бўйича Сурхондарё иккинчи ўринда - порцияси 11 800 сўм, килоси 82 600 сўм.

Учинчи ўринда Қорақалпоғистон ва Навоий вилоятлари. Бу икки ҳудудда ошнинг порцияси 13 минг, килоси эса 91 мингдир.

Энг қиммат палов Тошкент шаҳрида. Бу ерда бир порция ошни 17 750 сўмга, бир килосини эса 124 250 сўмга сотиб олиш мумкин.

Хоразм, Андижон, Тошкент, Сирдарё вилоятларида бир порция паловни 14 минг сўмдан 14 800 сўмгача, бир кило ошни 98 мингдан 103 минг сўмгача сотиб олиш мумкин.

Фарғона, Самарқанд, Қашқадарё, Жиззах ва Бухоро вилоятларида ошнинг бир порцияси 15 166 сўмдан 16 667 сўмгача, килоси эса 106 минг 162 сўмдан 116 минг 669 сўмгача.

Маълумотларнинг шаклланиши жараёнида фақатгина танлаб олинган умумий овқатланиш муассасалари (Ош марказлари)даги паловнинг ўртача нархлари ҳисобга олинган бўлиб, ресторан ва чойхоналардаги нархлар инобатга олинмаган.

Ўзбекистон Республикаси Давлат статистика қўмитаси Ахборот хизмати 10 январда “Палов индекси” маълумотларини шакллантирилиш жорий этилаётгани тўғрисида хабар қилган эди.

Ҳар бир ҳудуд (мамлакат)нинг ўзига хос “хусусиятлари”ни инобатга олиб, Европанинг аксарият мамлакатларида “Big-Mak индекси”, Россия Федерациясида “Оливье индекси” маълумотлари шакллантирилади. Ўзбекистонда энг оммавий таом – “Палов индекси” маълумотларини шакллантириш бошланган.

Коронавирусга чалинганлар сони 3 718 нафарга етди

Ҳозирда касалхоналарда 844 нафар бемор даволанмоқда.

Соғлиқни сақлаш вазирлиги 2 июнь соат 10:00 ҳолатига кўра, Ўзбекистонда коронавирус инфекцияси қайд этилганлар сони 3 718 нафарга етганини билдирди. Бу 1 июнь соат 23:00 ҳолатидагидан 16 нафарга кўп.

“Янги касалланиш ҳолатларининг 12 нафари Карантин марказидаги (барчаси Қозоғистон орқали юртимизга кириб келган) фуқаролар орасида, 2 нафари Тошкент шаҳри Яшнобод туманидаги аҳоли орасида, қолган 2 нафари Наманган ва Тошкент вилоятларига хориждан кириб келган халқаро юк ташувчи автомашина ҳайдовчиларида аниқланган”,- дейилади хабарда.

Айни пайтда коронавирус инфекциясига чалинган 2859 нафар бемор соғайган, 15 бемор вафот этган.

Ҳозирда касалхоналарда 844 нафар бемор даволанмоқда. Улардан 9 нафари оғир, 2 нафари эса ўта оғир аҳволда.

Карантинга ёпилган Китоб туманида бемор коронавирусдан ўлгани рад этилди

Китоб тумани ҳудуди тўлиқ карантинга ёпилган.

Соғлиқни сақлаш вазирлиги Китоб туманида коронавирусда гумонланган бемор Covid-19дан эмас, ёндош касалликдан ўлгани ҳақида 1 июнда маълум қилди. Аммо шунга қарамай Китоб тумани ёпиқлигича қолмоқда.

Вазирлик баёнотида айтилишича, 1963 йилда туғилган фуқаро Н.О., 9 май куни Қозоғистондан Ўзбекистонга қайтган ва Тошкент вилоятидаги Карантин марказига тиббий кузатувга олинган. 10 май куни у коронавирусда гумонланиб Яккасарой туман тиббиёт бирлашмаси терапия бўлимига пневмония ташхиси билан ётқизилган.

Ўтказилган диагностик тахлиллардан сўнг беморда Covid-19 инфекцияси аниқланмаган. Бундан аввал у жигар циррози ташхиси билан даволанган.

“Бемор 29 май куни Китоб туман тиббиёт бирлашмаси шошилинч тиббий ёрдам бўлимига олиб келинган. Коронавирус инфекциясига олинган тахлил унда гумон натижани қайд этгани боис суртма намуналари 31 май куни ўрнатилган тартибга кўра, махсус лабораторияга юборилган. Шу куни у ўтказилган реанимацион муолажаларга қарамасдан вафот этган”, - дейилади хабарда.

Вазирликнининг билдиришича, коронавирусга гумонланган марҳум билан мулоқотда бўлган барча фуқаролар эҳтиёт чораси сифатида стационар ва уй карантинига олинган. Китоб туман ҳудуди тўлиқ карантинга ёпилган.

“Шу йилнинг 31 май куни юборилган суртма намуналарини такрор текширув натижаларига кўра, марҳум беморда коронавирус инфекцияси аниқланмади. Демак, бир ой ичида ўтказилган иккинчи бор диагностик тахлил ҳам Н.О. “Covid-19” инфекциясига чалинмаганлигини кўрсатган. У ёндош касалликлар туфайли вафот этганлиги маълум бўлди. Шундай бўлса-да, қатъий санитария қоидаларига кўра, карантинга олинган фуқаролар маълум муддат тиббий кузатувда бўлишади”, - дейилади хабарда.

Бухорода 2 июндан бошлаб карантин чоралари қатъийлаштирилди

Шофиркон ҳамда Ғиждувон туманлари ичида шахсий автотранспорт воситалари ҳаракатланиши тўхтатилади.

Бухоро вилоятида коронавирусга қарши кураш доирасида карантин чоралари қатъийлаштирилди.

Вилоят ҳокимлигининг билдиришича, 2 июндан бошлаб номаълум муддатга Шофиркон ҳамда Ғиждувон туманлари ичида шахсий автотранспорт воситалари ҳаракатланиши тўхтатилади. Юк ташувчи, қишлоқ хўжалигида жалб қилинган ҳамда махсус рухсатномали (стикерли) автотранспорт воситалари бундан мустасно

Бухоро шаҳрига бошқа туман ва шаҳарлардан келган автомашиналарнинг кириб чиқишига, юк ташувчи, қишлоқ хўжалигида жалб қилинган ҳамда стикерли автомашиналардан ташқари, соат 07:00 дан 10:00гача ва17:00-20:00гача рухсат берилади.

Вилоят ҳудудида соат 22:00дан 06:00гача шахсий автотранспорт воситаларининг заруратсиз (иш юзасидан, озиқ-овқат маҳсулотлари, дори-дармон воситаларига бўлган эҳтиёж ва шунга ўхшаш зарур ҳоллар бундан мустасно) ҳаракатланиши чекланади;

Навоий вилоятининг чегарадош ҳудудлари орқали фуқаролар ва транспорт воситаларининг кириб-чиқишини қатъий карантин талаблари асосида амалга оширилади.

Вилоят ҳудудига кириб келаётган халқаро юк ташувчи маҳаллий ҳайдовчилар постларнинг ўзида карантинга олинади. Сартарошхоналар, такси хизматлари ва истироҳат боғлари айрим чекловларга амал қилган ҳолда мижозларга хизмат кўрсатишда давом этади.

Uzbekistan airways 1-7 июнда муҳожирларни олиб келиш учун яна 9та қатновни амалга оширади

Новосибирск аэропортида чартер рейсга рўйхатдан ўтаётган ўзбекистонлклар. 23 май, 2020 йил.

Транспорт вазирлиги хориждаги ўзбекистонликларни ватанга олиб келиш учун жорий ҳафтада амалга ошириладиган чартер рейслар жадвалини эълон қилди.

Жадвалга асосан Uzbekistan airways Туркия, Россия, БАА ва Миср Араб Республикаси шаҳарларига жами 9та қатновни амалга ошради.

1 июнь. Тошкент – Истанбул – Тошкент

2 июнь. Тошкент – Москва – Тошкент

3 июнь. Тошкент – Шаржа – Тошкент

3 июнь. Тошкент – Москва – Тошкент

4 июнь. Тошкент – Санкт-Петербург – Тошкент

5 июнь. Тошкент – Москва – Тошкент

6 июнь. Қоҳира – Тошкент – Қоҳира

6 июнь. Тошкент – Новосибирск – Тошкент

7 июнь. Тошкент – Санкт-Петербург – Тошкент

Транспорт вазирлигининг билдиришича, тасдиқланган чартер рейслар жадвалига мувофиқ 25-31 май кунлари амалга оширилган 8 та қатнов орқали Россия ва Туркиядан жами 2118 нафар ўзбекистонлик олиб келинган.

Президент Шавкат Мирзиёев май ойининг ўрталарида ўтган йиғилишлардан бирида Ўзбекистонга хориждан 39 минг ватандош олиб келинганини, яна 12 минг ўзбекистонлик олиб келинишини айтган эди.

Мирзиёев статистик маълумотларни таҳлил қилишда 20 йил аввалги дастурдан фойдаланилаётганини танқид қилди

Ўзбекистон президенти Шавкат Мирзиёев.

Ўзбекистонда статистик кузатув маълумотларининг ярми қоғоз шаклида тўпланмоқда. Уларни таҳлил қилишда 20 йил аввал жорий этилган дастурий таъминотдан фойдаланилмоқда. Бу ҳақда президент Шавкат Мирзиёев миллий статистика соҳасини такомиллаштириш чора-тадбирлари бўйича 1 июнь куни ўтказилган йиғилишда билдирди.

Президент матбуот хизмати маълумотига кўра, йиғилишда ҳудудлар ва тармоқлар статистикасини ўзаро мувофиқ шакллантириш, уларни ягона халқаро статистика тизими билан уйғунлаштириш масалалари муҳокама қилинган.

Ишсизликни аниқлашни Халқаро меҳнат ташкилоти стандартларига тўлиқ мослаштириб, сўров ўтказиш тартибини такомиллаштириш ва қамровни кенгайтириш зарурлиги таъкидланган.

Соғлиқни сақлаш тизимида касалликларни даволаш харажатлари бўйича халқаро ҳисоб механизми жорий этилиши белгиланган. Мирзиёевга кўра, бусиз тиббий суғуртани амалиётга киритиб бўлмайди.

Йиғилишда Вазирлар Маҳкамаси, Давлат статистика қўмитасига таълим, қишлоқ хўжалиги, ташқи савдо, транспорт, қурилиш, экология, туризм ва яна қатор соҳалар статистикасини халқаро стандартларга мувофиқлаштириш бўйича “йўл харитаси” ишлаб чиқиш вазифаси қўйилган.

Давлат идораларининг статистикани шакллантириш жараёнини аудит қилиш бўйича ҳам кўрсатма берилган.

Жаҳон маълумот базаларида Ўзбекистоннинг тармоқ индикаторлари тўлиқ акс этмагани ачинарли ҳол экани урғуланиб, шу муносабат билан мутасаддиларга меҳнат, энергетика, қишлоқ хўжалиги, таълим каби соҳалар бўйича халқаро базаларда мамлакат кўрсаткичларини тўкис акс эттириш юзасидан топшириқлар берилган.

Бундан ташқари, йиғилишда солиқ ва статистика идоралари ўртасида автоматлашган ахборот алмашинувини йўлга қўйиш орқали инфляцияни ҳисоблаш харажатларини кескин қисқартириш мумкинлиги таъкидланган.

Шундан келиб чиқиб, тармоқнинг моддий-техника базасини мустаҳкамлаш ҳамда дастурий таъминотни янгилаш, солиқ, меҳнат, молия соҳаларида статистик маълумотларни йиғиш ва қайта ишлашнинг интеграциялашган тизимини жорий этиш вазифаси қўйилган.

Ш. Мирзиёев йиғилиш чоғида аҳолини рўйхатга олиш статистикани шакллантиришда асосий манба экани, бунга ҳозирдан пухта тайёргарлик кўриш кераклигини ҳам урғулаган.

Қайд этилишича, мустақиллик йилларида Ўзбекистонда аҳолини рўйхатга олиш ўтказилмаган. Президентнинг 2019 йил 5 февралидаги фармонида 2022 йилда аҳолини рўйхатга олиш ўтказилиши белгиланган эди. Жорий йил 16 мартида эса “Аҳолини рўйхатга олиш тўғрисида”ги қонун қабул қилинган.

ИИВ ўз ходимининг косонлик йигитга нисбатан қонунга зид равишда куч ишлатганини тан олди

Ўзбекистон Ички ишлар вазирлиги Қашқадарё вилояти Ички ишлар бошқармаси ходимининг Косон тумани турғунига нисбатан қонунга зид равишда жисмоний куч ишлатганини эътироф этди. Бу эътироф ижтимоий тармоқларда тарқаган видеоёзувга нисбатан ИИВнинг Телеграм-каналида ёйинланган расмий муносабатида акс этган. Видеода куч ишлатар тузилма ходими косонлик йигитнинг қорнига тепганини кўриш мумкин.

Вазирлик қайдича, жорий йил 30 май куни соат тахминан 21.40 ларда Қашқадарё вилояти Косон туманида “аҳолининг карантин қоидаларига амал қилишини назорат қилиш мақсадида ўтказилган тунги рейд чоғида туманнинг Ниҳол МФЙда жойлашган “Ниҳол Саидбарака” савдо дўкони ёнида Қашқадарё вилояти ИИБ тезкор вазифаларни бажарувчи сафарбар отряди ходими қонунда белгиланган вазифасидан четга чиқиб, шу МФЙда яшовчи 1992 йилда туғилган Х.М.га нисбатан ноқонуний равишда куч ишлатиб, уни шаъни ва қадр-қимматига путур етказган”.

ИИВ ҳозирда ҳолат юзасидан хизмат текшируви тайинлангани, шу асосда “тадбир иштирокчилари”дан ҳар бирининг хатти-ҳаракатига қонуний баҳо берилишини билдирган.

Ижтимоий тармоқда тарқалган видеода косонлик йигитга қўл кўтарган шахснинг Миллий гвардия ходими экани айтилганди. Аммо Миллий гвардия ўз канали орқали тарқатган билдирувида видеодаги кишининг МГ ҳарбий хизматчиси эмаслиги аниқланганини баён этган.

МБ доллар ва евронинг расмий курсини оширишда давом этмоқда

Ўзбекистон Марказий банки жорий йил 2 июндан валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси ўтган ҳафтага нисбатан 9 сўм 1 тийинга қимматлаб, 10 минг 148 сўм 31 тийинни ташкил этади (ўтган ҳафта 10 минг 139 сўм 30 тийин бўлган).

Евронинг расмий курси эса олдинги курсга нисбатан 210 сўм 75 тийинга кўтарилиб, 11 минг 262 сўм 59 тийинга тенг бўлади (ўтган ҳафта 11 минг 51 сўм 84 тийин эди).

Ўтган ҳафта МБ долларнинг расмий курсини 9 сўм 74 тийинга, евроникини эса 96 сўм 72 тийинга оширган эди.

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

ЎзМТРКнинг собиқ раҳбари Қирғизистонга элчи этиб тайинланди

Хуршид Мирзоҳидов

Расмий Тошкент Хуршид Мирзоҳидовни Ўзбекистоннинг Қирғизистондаги фавқулодда ва мухтор элчиси этиб тайинлади.

ТИВ маълумотига кўра, янги элчи 2020 йил 30 май куни Бишкекка етиб борган.

Қайд этилишича, Х. Мирзоҳидов бунга қадар Ахборот технологиялари ва коммуникацияларини ривожлантириш вазири ва Транспорт вазирлиги ҳузуридаги Автомобиль йўллари қўмитаси раисининг ўринбосари лавозимларида ишлаган. У 2017 йил февралидан августигача ЎзМТРК раиси сифатида ҳам фаолият юритган.

ТИВ Сўхдаги можарони “маҳаллий даражадаги ҳодиса” деб атади

Ўзбекистон Ташқи ишлар вазирлиги биноси.

Ўзбекистон Ташқи ишлар вазирлиги ўзбек-қирғиз чегарасининг “Чашма” участкасида юз берган можарога “маҳаллий даражадаги ҳодиса”, дея баҳо берди. Бу ҳақда вазирликнинг ўз Телеграм-канали орқали 1 июнь куни ёйинлаган хабарномасида айтилади.

Вазирлик қайдича, 2020 йил 31 май куни содир бўлган “воқеа сабабларини икки томон расмий шахслари ўрганиши шуни кўрсатдики, “Чашма” булоғининг ариқларини биргаликда тозалаш пайтида юзага келган баҳслашув натижасида икки мамлакатнинг айрим фуқаролари ўртасида можаро келиб чиққан”.

Ҳодиса натижасида икки томондан ҳам жабрланганлар борлигини эътироф этган ТИВ уларга зарур тиббий ёрдам кўрсатилганини қўшимча қилади.

Хабарномада икки мамлакатнинг чегарадош вилоятлари раҳбарларининг музокаралари натижасида вазият тўлиқ назоратга олингани, томонлар бундан кейин олдиндан келишувсиз тозалаш ишларини олиб бормасликка келишиб олгани урғуланади.

“Чашма” булоғи Ўзбекистон Республикаси ва Қирғизистон Республикаси аҳолисини ичимлик ва суғориш суви билан таъминлайди. Ўзаро манфаатларни инобатга олган ҳолда “Чашма” булоғидан биргаликда фойдаланиш тўғрисида келишув мавжуд”, дейилади ТИВ хабарномасида.

1 июнь куни Ўзбекистон бош вазири А. Арипов ва Қирғизистон бош вазирининг биринчи ўринбосари Қ. Бўрўнов ўртасида бўлиб ўтган учрашув ҳақида тўхталган вазирлик у ерда икки томонлама ҳамкорликка оид кенг кўламли масалалар муҳокама қилингани, “трансчегаравий ҳамкорликни ривожлантириш ва чегарада юзага келадиган муаммоларни дўстлик, яхши қўшничилик ва стратегик шериклик руҳида, шунингдек, Ўзбекистон Республикаси ва Қирғизистон Республикаси ўртасида 2017 йил 6 октябрида имзоланган Чегара ҳудудида ишонч чоралари бўйича Битим қоидаларига мувофиқ ҳал қилиш тўғрисида келишувга эришилгани”ни маълум қилди.

Ўзбек дипломатларига кўра, ҳукумат раҳбарлари яқин вақт ичида Иқтисодий ҳамкорлик бўйича ҳукуматлараро комиссия йиғилиши ва Ўзбекистон Республикасининг чегарадош вилоятлари ҳокимлари ва Қирғизистон ҳукуматининг чегараолди ҳудудларидаги ваколатли вакиллари кенгашини ўтказишга келишиб олганлар.

Аввал хабар қилганимиздек, 31 май куни Ўзбекистоннинг Фарғона вилояти Сўх тумани ва Қирғизистоннинг Боткен вилояти Қадамжой тумани турғунлари орасида жанжал юз бериб, икки мамлакат фуқаролари бир-бирларини тошбўрон қилганлар. Можаро чоғида ўнлаб одам жароҳатланган.

Сеулдан Тошкентга яна қарийб 9,5 тонна инсонпарварлик ёрдами йўлланди

Иллюстратив сурат.

Ўзбекистонда Covid-19 тарқалиши олдини олиш бўйича халқаро ҳамкорлик доирасида мамлакатнинг Сеулдаги элчихонаси томонидан жалб этилган 97 минг 240 доллар миқдоридаги инсонпарварлик ёрдами 1 июнь куни Тошкентга етиб боради.

Бу ҳақда хабар қилган “Дунё” ахборот агентлигига кўра, гуманитар ёрдам рўйхатидан замонавий шприцли насослар, 15 минг қадоқда антисептик воситалар, 12 дона тиббий кровать ва автоматик механизмга эга бўлган кўп функцияли кўрпалар жой олган.

Инсонпарварлик ёрдами“Uzbekistan Airways” авиаширкатининг чартер юк рейси орқали жўнатилган.

Хабарга мувофиқ, яқин кунлар ичида тахминан 66 минг доллар миқдордаги ана шундай гуманитар ёрдам чартер юк рейси ташкил этилгандан сўнг Ўзбекистонга юборилиши кўзда тутилмоқда.

Коронавирусга қарши кураш бўйича халқаро ҳамкорлик доирасида Жанубий Кореядан Ўзбекистонга аввал ҳам бир неча бор гуманитар ёрдам юборилгани ҳақида аввал хабар қилган эдик.

Арипов ва Бўрўнов чегарада учрашишди

Ўзбек ва қирғиз мулозимларининг чегара масканидаги сўзлашуви, 2020 йил 1 июни.

Ўзбекистон ва Қирғизистон ҳукумати икки давлат чегарасида юз берган можаро юзасидан биргаликда текширув ўтказади. Бу ҳақдаги келишувга 1 июнь куни Боткен вилоятидаги “Чечме” назорат-ўтказиш масканида (Ўзбекистон томони "Чашма" НЎП) учрашган Ўзбекистон бош вазири Абдулла Арипов ҳамда Қирғизистон бош вазирининг биринчи ўринбосари Қубатбек Бўрўнов ўртасида эришилган.

Қирғизистон ҳукумати матбуот хизмати маълумотига кўра, Арипов ва Бўрўнов “ҳодиса юзасидан таассуф билдиришиб, вазиятни изга солиш учун биргаликда чора кўриш, эскалацияга йўл қўймаслик ва чегараолди ҳудудидаги тарангликни кетказиш бўйича фикрларини билдиришган”.

Ўзбекистоннинг Фарғона вилояти Сўх тумани ва Қирғизистоннинг Боткен вилояти Қадамжой тумани турғунлари орасида 31 май куни жанжал юз бериб, икки мамлакат фуқаролари бир-бирларини тошбўрон қилганлари ҳақида Озодлик аввалроқ хабар қилган. Якшанба куни юз берган можаро чоғида ўнлаб одам жароҳатлангани айтилган.

Коронавирусга чалинганлар сони 3662 кишига етди

Ҳозирда касалхоналарда 810 нафар бемор даволанмоқда.

Соғлиқни сақлаш вазирлигининг билдиришича, 1 июнь соат 10:00 ҳолатига кўра, Ўзбекистонда коронавирус инфекцияси қайд этилганлар сони камида 3662 нафарни ташкил этмоқда. Бу 31 май соат 23:00даги кўрсаткичдан 39 кишига кўпдир.

“Янги касалланиш ҳолатларининг 24 нафари Карантин марказидаги (Россиянинг Москва, Санкт-Петербург ва Қозон шаҳарлари ҳамда Қозоғистон Республикасидан келган) фуқаролар орасида, 10 нафари Тошкент шаҳрида (шундан 4 нафари аҳоли орасида), 1 нафари Наманган вилоятида карантинда бўлган фуқаролар орасида, 2 нафари Сирдарё вилоятига, яна 2 нафари эса Россиядан Тошкент вилоятига чегара пост орқали кириб келган халқаро юк ташувчи автомашина ҳайдовчиларида аниқланган”, - дейилади расмий хабарда.

Айни пайтда коронавирус инфекциясига чалинган 2837 нафар бемор соғайди, 15 бемор вафот этди.

Ҳозирда касалхоналарда 810 нафар бемор даволанмоқда. Улардан 8 нафар бемор оғир, 1 нафар бемор эса ўта оғир аҳволда.

Ўзбекистонда масофадан бошқариладиган артиллерия қуроли синовдан ўтказилмоқда (ФОТОГАЛЕРЕЯ)

“Nona” ўзиюрар артиллерия техникаси ва қуроли янгитдан модернизация қилинди.

Масофадан бошқариладиган артиллерия қуроли синовдан ўтказилаётгани тўғрисида Мудофаа вазирлиги хабар берди.

“Марказий ҳарбий округ ҳудудидаги “Каттақўрғон” дала ўқув майдонида мудофаа вазири томонидан илгари сурилган “Ташаббускор ғоялар” асосидаги такомиллаштирилган жанговар техника ва қуроллар устида синовлар олиб борилмоқда”, - дейилади расмий билдирувда.

Хабарда таъкидланишича, “Каттақўрғон” дала ўқув майдони Ўзбекистондаги энг катта полигон ҳисобланади.

Билдирилишича, изланишлар натижасида БТР-80 техникасига 120 миллиметрли “Nona” ўзиюрар артиллерия техникаси ва қуроли янгитдан модернизация қилинди. Занжирли артиллерия техникаси шинали зирҳли техникага алмаштирилди.

“Натижада тезлик соатига 25 километрдан 80 километрга ошди. Ҳаракатланиш давомида нишонларни яксон қилиши кўрсаткичи сезиларли даражада юқорилагани кузатилди. Ҳозирда Мудофаа вазирлиги ва ҳарбий округ артиллериячилари томонидан техника ва қуролни жанговар имкониятлари ўрганилмоқда”, - дейилади хабарда.

Бундан ташқари “Бўрон” дея ном берилган “GM-21 MK” русумли КамАЗ ва “Урал” техникасига ўрнатилган 122 миллиметрли “ДМ-21” маркали ўзиюрар артиллерия тўп-ракетасини масофадан бошқариш ва отиш ишлари синовдан ўтказилмоқда.

1 июнга ўтар кечаси 77 киши коронавирусга чалингани хабар қилинди. 9 беморнинг аҳволи оғир (ИНФОГРАФИКА)

Коронавирусга чалинган 77 кишининг 38 нафари Навоий вилоятида аниқланган.

Соғлиқни сақлаш вазирлигининг билдиришича, 31 май соат 23:00 ҳолатига кўра,коронавирусга чалинганлар сони расман 3623 нафарга етди.

“Бугун мамлакатимизда коронавирус инфекцияси қайд этилган 77 ҳолатнинг 38 нафари Навоий вилоятидаги карантин муассасаларида тиббий кузатувда бўлган фуқаролар орасидан тасдиқланди. Шунингдек, 34 нафари карантин муассасаларида, 4 нафари (Бухоро вилоятида 3, Тошкент шаҳри 1) аҳоли орасидан ва 1 нафари халқаро юк ташувчи автомашина ҳайдовчисида аниқланди”, - дейилади хабарда.

Вазирлик кун давомида 54 нафар бемор соғайиб, реабилитацияга кузатилгани ҳақида ҳам маълум қилди.

Расмий хабарда таъкидланишича, айни пайтгача касалликка чалинган 3623 нафар бемордан 2837 нафари соғайиб, даволаниш даражаси 78 фоизни ташкил этмоқда. 771 нафар бемор 7 ҳудуддаги тиббиёт муассасаларида даволанмоқда. Улардан 8 нафари оғир, 1 нафари эса ўта оғир аҳволда.

Шу кунгача жами 416 118 нафар фуқаро карантинга олиниб, уларнинг 369 113 нафари карантиндан чиқарилган.

Ҳозирда уй карантинида 25 862 нафар, стационар карантинда эса 21 143 нафар фуқаро тиббий кузатувда бўлиб турибди.

Ўзбекистон Омбудсмани ИИВ тергов ҳибсхоналарида қийноқлар мавжудлигини тан олди

Ҳозиргача Ички ишлар вазирлиги бу хабарга бирон бир муносабат билдирмади.

Олий Мажлиснинг инсон ҳуқуқлари бўйича вакили (Омбудсман) Улуғбек Муҳаммадиев 29 май куни Бош прокуратурада ўтган брифингда маҳбусларга нисбатан қийноқ ИИВ тергов ҳибсхонларида содир этилишини тан олди. Бу ҳақда “Кун уз” 31 май куни хабар берди.

Омбудсман қийноқлар юзасидан келиб тушган мурожаатларга изоҳ берар экан:

“Бу ҳолатлар жазони ижро этиш муассасасида эмас, Ички ишлар вазирлигининг тергов тизими билан боғлиқ бўлган. Асосий қисми – 80-90 фоизи Ички ишларнинг тергов тизими билан боғлиқ бўлган мурожаатлар”,- деб айтган.

Айни пайтда Омбудсман йил давомида қийноқларга солингани тўғрисида арз қилган маҳбуслар ва маҳкумлар сони ҳақида аниқ рақамларни айтмаган.

Шу билан бир қаторда, Ички ишлар вазирлиги бошқарма бошлиғи Жамшид Султонов Омбудсманнинг сўзларини тасдиқлаган ҳолда, 2019 йилда қийноққа солиш бўйича жазони ижро этиш муассасаларининг бирорта ходими жавобгарликка тортилмаганини қўшимча қилди.

Унга кўра, бу ҳолат жазони ижро этиш муассасаларида қийноқлар деярли йўқлигини тасдиқлайди.

“Маҳкумлар томонидан қийноққа солиш бўйича Омбудсманга юборилган мурожаатларнинг жуда оз қисми уларнинг жазо муддатини ўташ даври билан боғлиқ. 2019 йилда маҳкумларни қийноққа солиш ёки тазйиқ ўтказиш билан боғлиқ ҳолат бўйича жазони ижро этиш тизими, жазони ижро этиш муассасасининг бирорта ходими жавобгарликка тортилмади”, - деб айтган расмий.

Жамшид Султоновнинг таъкидлашича, қийноқлар борасида йилдан йилга маҳкумлар томонидан мурожаатлар сони кескин кўпайгани “маҳкумларнинг ҳуқуқий онги ва маданияти ошиши билан ҳам боғлиқ”.

“Жазони ижро этиш муассасаларида ҳар биттасида омбудсман қутиси, прокурор қутиси жойлаштирилган, лекин мурожаат қилинмас эди. Бунинг сабаблари кўп бўлган, уларнинг асосийси маҳкумларда мурожаат қилган билан унинг ижобий ечим топишига ишонч бўлмаган. Сўнгги йилларда олиб борилган ишлар натижасида мурожаатлар сони ҳам кўпайяпти, зарур ҳолларда жазони ижро этиш тизими кўрмаётган ёки тергов, суд органларида эътиборидан четда қолаётган масалаларга эътибор бериб, улар келгусида содир этилмаслиги бўйича ишлар амалга ошириляпти”, деб айтган Жамшид Султонов.

Бош прокуратурада ўтган брифингда ИИВ ҳибсхоналарида қийноқлар мавжудлиги айтилган бўлсада, ҳозиргача Ички ишлар вазирлиги бу хабарга бирон бир муносабат билдирмади.

Ўзбекистон-Қирғизистон чегарасидаги жанжалда камида 41 одам жароҳатлангани айтилди

Қирғизистон Соғлиқни сақлаш вазирлиги 1 июнга ўтар кечаси Ўзбекистоннинг Сўх вилояти Чашма қишлоғидаги чегара ҳудудида чиққан жанжал оқибатида жароҳатланган 25 нафар фуқаро Ҳайдаркон шаҳар касалхонасига олиб келинганини билдирди.

Касалхонага олиб келинган қирғизистонликларнинг 4 нафари касалхонага ётқизилган, улардан икки нафарининг аҳволи оғир. Қолганларга тиббий ёрдам кўрсатилгач, уйларига қайтишга рухсат берилган.

Аввалроқ Озодликка можаро ҳақида хабар берган сўхликлардан бири жанжал оқибатида 16 нафар ўзбекистонлик турли жароҳатлар билан касалхонага ётқизилганини билдирган эди. Аммо Ўзбекистон ҳукумати ҳозиргача бу маълумотни расман тасдиқламади ва рад ҳам этмади.

Бундан ташқари Ўзбек-Қирғиз чегарасидаги вазиятни икки давлат ҳамкорликда назорат қилишга келишиб олган.

Бу борада 31 май куни Ўзбекистон ва Қирғизистон маҳаллий ҳокимиятлари расмийлари учрашувида қарор қабул қилинди.

Музокарада Ўзбекистон томонидан Фарғона вилоят ҳокими Шуҳрат Ғаниев ва Сўх туман ҳокими иштирок этган. Қирғизистон томонидан эса ҳукуматнинг Боткен вилоятидаги мухтор вакилининг биринчи ўринбосари Жаркинбай Максутов ва Қадамжой тумани ҳокими қатнашган.

Қадамжой тумани ҳокими Алгинбай Имаровнинг Озодлик радиоси қирғиз хизматига айтишича, учрашувда томонлар чегарадаги вазиятни ҳамкорликда барқарорлаштириш масаласини муҳокама қилган. Шу мақсадда Ўзбекистон ва Қирғизистон ҳуқуқ-тартибот тузилмалари ҳамкорлиги режаси ишлаб чиқилган.

"Ўрикзор"даги сотувчининг ўғли ва қизида ҳам вирус аниқланди

Соғлиқни сақлаш вазирлигининг маълум қилишича, бир неча кун олдин “Ўрикзор” савдо мажмуасининг коронавирусга чалинган сотувчисининг ўғли ва қизида ҳам айни инфекция аниқланган.

Вазирлик сўнгги кунларда Самарқанд, Навоий, Тошкент вилоятлари қатори Тошкент шаҳридан ҳам аҳоли орасида коронавирус инфекциясига чалинганлар сони кун сайин ошиб бораётганини билдирди.

Вазирликнинг маълум қилишича, 30 майга қадар пойтахтимизда коронавирус инфекцияси аниқланган 11 фуқаронинг барчаси аҳоли орасидан касалликни юқтириб олган.

"Касалланиш кўрсаткичлари шу темпда ўсиб борса эпидемия авж олиш хавфи янада кучаяди. Бу эса аҳолидан янада ҳушёр бўлиб, ўзи ва яқинлари саломатлигига ўта масъулият билан ёндашишларини талаб этмоқда".

"Зарурат юзасидан кўчага чиқиб, уйга келганингизда ҳам қўлингизни совунлаб, қайта-қайта ювинг. Қўл бериб саломлашиш, қучоқ очиб кўришишдан тийилиш лозим. Энг муҳими, ижтимоий масофани сақланг, жамоат ва одамлар тўпланган жойлардан узоқроқ юринг, доимо тиббий ниқоб тақиб юришни унутманг", деб огоҳлантирди вазирлик.

Шахсий машинада вилоятлараро қатновга 1 сентябргача рухсат берилмайди

Махсус комиссиянинг 30 май куни эълон қилинган қарори билан 1 сентябргача шахсий автотранспорт воситаларининг вилоятлараро ҳаракатланишига рухсат берилмайдиган бўлди.

Бунда Тошкент шаҳридан Тошкент вилоятига ҳамда Тошкент вилоятидан Тошкент шаҳрига кириб-чиқиш мустасно қилинди.

Махсус комиссиянинг Ўзбекистонда карантин муддатини 15 июнга қадар узайтириш ҳамда айрим ҳудудларда карантин чораларини кучайтириш қарори шу йилнинг 26 май куни ўтказилган видеоселектор йиғилишидан сўнг қабул қилинди.

Ушбу йиғилишда президент Ш. Мирзиёев кейинги кунларда аксарият ҳудуд ва корхона раҳбарлари, фуқаролар карантин чораларининг юмшатилганини “касаллик тугади” деб, нотўғри қабул қилаётгани ҳақида гапирди.

Президент, айниқса, бозорлар, савдо комплекслари, банкларда ижтимоий масофага амал қилмаслик, кўча-кўйда тиббий ниқоб тақмаслик ҳолатлари кўпаяётгани ҳамда бундай салбий ҳолатлар касалликни аниқлаш, олдини олиш ва даволаш учун қилинаётган барча ҳаракатларни йўққа чиқариши мумкин, деб танқид қилганди.

Сўнгги бир ҳафта ичида коронавирусга чалинган янги шахсларнинг аҳоли орасидан аниқланиш ҳоллари кўпаймоқда.

Расмий баёнотлардан маълум бўлишича, вирус Самарқанд, Навоий, Бухоро, Наманган ва Тошкент шаҳарларида аҳоли орасидан аниқланмоқда.

31 май соат 10:00 ҳолатига кўра, Ўзбекистонда инфекцияга чалинганлар сони 3584, тузалганлар 3 минг кишига яқин, 14 бемор вафот этди.

Ўзбекистонда карантин муддати 15 июнгача узайтирилди. Мамлакат бўйлаб ижтимоий масофани сақлаш, ниқоб тақиш, дезинфекция мажбурий бўлиб қолмоқда.

Дунёда эса вирус юқтирганлар расмий сони 6 миллион 80 мингдан ошди, ўлганлар сони эса 369 мингдан ошиқ, тузалганлар 2 миллион 575 мингдан ошиқ.

Давомини ўқинг

Кўрмай қолган бўлсангиз

XS
SM
MD
LG