Сурияда ҳукуматга қарши кечаётган қуролли ҳаракатларда иштирок этаётган Ўзбекистон фуқароси Давлат Тиллабердиев қидирувга берилди. Бу ҳақда Qalampir.uz нашри Ички ишлар вазирлиги маълумотига таянган ҳолда хабар қилди.

Д. Тиллабердиев 1995 йилда Жиззах шаҳрида туғилган. Давлат хавфсизлик хизмати ҳамда вилоят Ички ишлар бошқармаси ҳамкорлигида ўтказилган тезкор-қидирув тадбирлари натижасида ушбу шахс Туркияда халқаро террористик ташкилот таъсирига тушгани, 2019 йилнинг сентябрь ойида айланма йўллар орқали Сурияга кетгани аниқланган.

Ҳуқуқ идоралари қайдича, ўша йили Тиллабердиев мазкур давлат ҳудудида “Тавҳид ва жиҳод катибаси” халқаро террорчилик ташкилотининг Ҳавон ҳарбий базасида махсус тайёргарликдан ўтиб, Дамашқ ҳукуматига қарши қуролли ҳаракатларда иштирок эта бошлаган.

Мазкур шахс Ўзбекистон Жиноят кодексининг 155-2-моддаси (террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш), 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) ҳамда 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) бўйича айбланмоқда.

Ўтган ҳафта Сурияда Туркия билан алоқаси борлиги айтиладиган “Ҳайъат Таҳрир уш-Шом” террор гуруҳи ва бошқалар дохил исломий гуруҳлар президент Башар Асад назорати остидаги Сурия армияси ва унга иттифоқдош бўлган эронпараст гуруҳларнинг Ҳалаб шаҳри ғарбидаги позицияларига кенг кўламли ҳужум бошлаган.

Қуролли тўқнашувлар чоғида жиҳодчилар ҳукумат армиясининг стратегик жиҳатдан муҳим нуқталари ва аҳоли пунктларини эгаллаб олишган. Ҳужумларга жавобан Сурия армияси россиялик ҳарбийлар билан биргаликда қуролли гуруҳлар позицияларига зарба бериш учун авиацияни ишга солган.

Содир бўлаётган воқеалар сўнгги йилларда Сурияда кузатилаётган фуқаролар урушининг энг йирик эскалациясига айланиши мумкин.

Тошкент шаҳри Миробод туманидаги 214- ва 65-мактабларда вирусли гепатит билан касалланиш ҳолатлари қайд этилди. Бу ҳақда Санитария-эпидемиологик осойишталиги ва жамоат саломатлиги қўмитасининг Тошкент шаҳри бош бошқармаси маълум қилди.

https://t.me/toshsanepid/18091

Шу муносабат билан ушбу таълим масканларида Санэпидқўмнинг Миробод тумани бўлими мутахассислари томонидан эпидемиологик текшириш ва санитария назорати ўтказилган.

Текширувда мактабларнинг санитария ҳолати талабга жавоб бермаслиги аниқланган ва камчиликлар юзасидан мактаб раҳбариятига нисбатан маъмурий баённома тузилган.

Жорий йил сентябрь ойида Яшнобод туманидаги, октябрь ойида эса Бектемир туманидаги мактабларда ҳам ушбу юқумли хасталик рўйхатга олинганди.

Вирусли гепатит А, B, C, D ва E каби беш асосий турга бўлинади. Халқ орасида “сариқ касаллиги” номи билан аталадиган гепатит “А” жигарнинг жароҳатланиши билан кечади ва ўта юқумлидир.

Гепатит А ва E ифлосланган сув ва озиқ-овқат орқали, B, C ва D турлари эса қон ва тана суюқликлари орқали тарқалади, C кўпинча сурункали бўлиб, цирроз ва жигар саратонига олиб келади.

Ўзбекистонда B ва C гепатити кенг тарқалган.

БМТ ўрганишларига қараганда, 2016 йилда мамлакатда тахминан 2,5 миллион нафар гепатит B ва 1,3 миллион нафар гепатит C беморлари борлиги аниқланган.

https://news.un.org/ru/story/2021/07/1407172

Ўзбекистонда 2021 йилда гепатит C вирусига қарши кураш бўйича миллий дастур ишга туширилган. Ундан кўзланган мақсад 2030 йилга келиб республикада ушбу вирус билан касалланиш даражасини нолга туширишдир.

Озодлик аввалроқ вирусли гепатитга қарши вакцина қимматлашининг ижтимоий, иқтисодий оқибатларини таҳлил қилганди.

Ўзбекистон президенти Шавкат Мирзиёев 4 декабрь куни Тошкенда Халқаро атом энергияси агентлиги (ХАЭА) бош директори Рафаэль Гроссини қабул қилди.

Президент матбуот хизмати ахборотига кўра, учрашув якунида тинч атом соҳасини ривожлантириш бўйича кўп қиррали ҳамкорликни кенгайтириш юзасидан қўшма “йўл харитаси”ни қабул қилиш юзасидан келишувга эришилган.

Халқаро агентлик дастурлари доирасида юқори малакали кадрлар тайёрлаш, ядро энергетикаси, қишлоқ хўжалиги, сувдан фойдаланиш, соғлиқни сақлаш, экология соҳаларида истиқболли лойиҳаларни амалга ошириш ҳамкорликнинг устувор йўналишлари экани таъкидланган.

Маълум бўлишича, 5 декабрь куни Самарқанд шаҳрида соҳадаги етакчи хорижий экспертлар иштирокида Атом энергиясидан фойдаланиш масалалари бўйича халқаро конференция бўлиб ўтади.

Халқаро атом энергияси агентлиги БМТ қошида 1957 йилда жаҳон давлатларига атом энергиясидан тинчлик йўлида фойдаланиш мақсадида ташкил этилган.

Ўзбекистон 1994 йилдан буён мазкур тузилмага аъзо. Ўттиз йил мобайнида ушбу ташкилотнинг техник кўмагида 40 дан ортиқ қўшма лойиҳа амалга оширилган.

Маълумот ўрнида: Ўзбекистон жорий йил июнь ойида “Росатом” давлат корпорацияси билан кичик қувватли АЭС қурилишига доир ҳужжатни имзолаган. 330 МВт қувватга эга станция (ҳар бири 55 МВт қувватга эга олтита реактор) Жиззах вилоятида (Тузкон кўли) барпо этилади.

Бир неча йил аввал МАГАТЭ экспертлари Ўзбекистонда бўлган ва мамлакатда ядровий энергетика дастурини амалга ошириш ишларини комплексли равишда баҳолаган эди.

Жорий йилнинг 23 ноябрь куни бўлиб ўтган ҳукумат мажлисида Шавкат Мирзиёев томонидан Давлат хавфсизлик қўмитаси раиси лавозимидан бўшатилган Абдусалом Азизов президентининг ижтимоий-сиёсий, диний-маърифий ва ёшлар масалалари бўйича маслаҳатчисининг ёшлар масалалари бўйича ўринбосари лавозими этиб тайинланган. Бу ҳақда президент матбуот котиби Шерзод Асадов маълум қилди.

Генерал Азизовнинг ДХХ раиси лавозимидан олинишини Озодлик манбалари шу йилнинг 26 октябрь куни Қибрай туманида президент администрацияси собиқ мулозими Комил Алламжоновга уюштирилган суиқасд билан боғлашган.

64 яшар Абдусалом Азизов Шавкат Мирзиёев ҳокимиятга келганидан буён ДХХнинг ишдан олинган учинчи раҳбаридир. Ички ишлардан чиққан Азизов 2019 йил февралида ДХХ раиси этиб тайинланган ва бу лавозимда 5 йилдан кўпроқ ишлаган.

Президент матбуот котиби Шерзод Асадов ёйинлаган хабарномада Шавкат Мирзиёевнинг фармонлари асосида бошқа қатор мулозимларнинг муайян лавозимларга тайинлангани ёки ишдан олингани ҳам билдирилган. Улар орасида аввал адлия вазири лавозимида ишлаган Русланбек Давлетов ҳам бор.

Вазирликдан сўнг президентнинг ижтимоий-сиёсий ривожланиш масалалари бўйича маслаҳатчиси лавозимида ишлаб келаётган Мирзиёевнинг янги фармони билан президентнинг ижтимоий-сиёсий, диний-маърифий ва ёшлар масалалари бўйича маслаҳатчиси лавозимига тайинланган. Шундан келиб чиқилса, ДХХнинг собиқ раиси эндиликда собиқ адлия вазирига муовинлик қилади.

Ўзбекистон криптоактивларни қабул қилиш бўйича глобал индексда Марказий Осиё ва Кавказда биринчи, дунёда эса ўттиз учинчи ўринни эгаллади. RISE Research компанияси томонидан Freedom Horizons, KPMG Caucasus and Central Asia, Heemera, “Остона” халқаро молия маркази, Қозоғистон Миллий тўлов корпорацияси ва Mastercard компанияси ҳамкорлигида ўтказилган тадқиқот шундан далолат беради.

Рақамли молиявий активлар бозорини ўрганиш бўйича тадқиқотда қайд этилишича, Ўзбекистон ёш, технологик жиҳатдан саводхонлиги юқори аҳоли улуши ортиб бораётгани эвазига марказлашмаган молияни қабул қилиш бўйича глобал рейтингда сезиларли ўсишга эришган.

2023 йилда мамлакатда 512,3 минг фуқаро (умумий аҳолининг 1,46 фоизи) криптоактивларга эгалик қилган.

Жорий йил октябрь ҳолатига кўра, мамлакатдаги криптосаноатда 15 та лицензияга эга хизмат кўрсатувчи провайдер (2 криптобиржа, 3 криптодепозитарий ва 10 криптодўкон) мавжуд. Уларнинг айланмаси 1 миллиард доллардан ошган. 2022 йилдан буён давлат бюджетига тушумлар ҳажми эса 3,6 миллион доллардан кўпроқни ташкил этган.

Gazeta.uz нашрининг аниқлик киритишича, глобал криптовалютани қабул қилиш индекси турли мамлакатларда аҳоли ва корхоналар криптовалюталардан кундалик операциялар, инвестициялар ва бошқа молиявий мақсадларда қанчалик фаол фойдаланаётганини тушунишга ёрдам беради. Индекс турли омиллар таҳлилига асосланади ва мамлакатларнинг криптовалюта иқтисодиётидаги иштирокини қиёсий акс эттириш мақсадида тузилади.

Эслатиб ўтамиз, Ўзбекистон резидентлари криптоактивларга фақат мамлакатда лицензияланган провайдерлар орқали эгалик қилиши мумкин. Криптоактивларнинг ноқонуний айланмаси учун эса жавобгарлик жорий этилган. Ушбу ҳуқуқбузарлик учун жаримадан тортиб 5 йилгача қамоқ жазоси кўзда тутилган.

Мамлакатда бир неча киши ноқонуний криптовалюта олди-сотдисида айбланиб, маҳкамага тортилгани маълум.

Тошкент шаҳрида катта миқдорда қарзи бор йирик истеъмолчиларни совуқ сув таъминотидан узиш бошланди.

Жумладан, пойтахтдаги “Ипподром” бозори тармоқдан узилган. “Тошкент шаҳри сув таъминоти” АЖ матбуот хизмати ахборотига кўра, бозорнинг совуқ сув бўйича умумий қарзи 220 миллион сўмни ташкил этади.

Пойтахт сувсозлари ўз вақтида тўлов қилмаган кўп қаватли хонадонлар ҳам таъминотдан маҳрум этилишидан огоҳлантирган.

Расмий статистикага кўра, Ўзбекистонда истеъмолчиларнинг ичимлик сувдан қарздорлиги 1 трлн сўмни ташкил этмоқда. Шундан 740,5 млрд сўм жисмоний, қолгани эса юридик истеъмолчилар ҳиссасига тўғри келади.

Озодлик аввалроқ Ўзбекистон пойтахтида истеъмолчиларнинг сувдан умумий қарздорлиги 200 миллиард сўмга етгани ҳақида хабар қилган эди.

Ўзбекистон 2030 йилга қадар 2 миллион гектардан ортиқ деградацияга учраган ерларни тиклаши керак. Бу масалага Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов Саудия Арабистони пойтахти Ар-Риёд шаҳрида COP16 конференцияси доирасида ўтказилган молиявий сафарбарлик бўйича вазирлар мулоқотида тўхталган.

“Охирги 5 йил давомида биз барқарор ер бошқаруви ва ўрмонларни барпо этиш бўйича ташаббусларга бир миллиард доллардан ортиқ маблағ ажратдик. Ушбу саъй-ҳаракатларга қарамай, бутун дунё бўйлаб молиялаштиришдаги камчиликлар сақланиб қолмоқда. Ушбу амбицияларни кенгайтириш учун мустаҳкам молиялаш механизмлари ва инновацион ҳамкорлик керак”, дея иқтибос келтирган Азиз Абдуҳакимовдан Gazeta.uz нашри.

Вазир эътирофича, деградацияга учраган ерларни тиклаш ва қурғоқчиликка чидамлиликни ошириш катта молиявий ресурс талаб қилади. Бу эса кўпинча республика бюджетида кўзда тутилган маблағдан ошиб кетади.

Ўзбекистон ҳукумати мулозими бу борада халқаро молиялаштиришни осонлаштирадиган мустаҳкам механизм ва инновацион ҳамкорлик катта аҳамиятга эга эканини таъкидлаб, узоқ муддатли экологик фойда келтирадиган лойиҳалар учун грантларни кўпайтириш, яшил облигацияларни кенгайтириш, маблағлардан фойдаланиш, ариза бериш ва тасдиқлаш жараёнларини соддалаштиришни таклиф қилган.

Абдуҳакимов қайдича, “Ўзбекистон халқаро молиялаштиришни самарали бошқариш борасидаги салоҳиятини аллақачон намоён этган. Бунга халқаро молия институти билан ҳамкорлик натижасида Оролбўйи минтақасида ўрмонзорларни барпо этиш бўйича муваффақиятли лойиҳалар амалга оширилиб, деградацияга учраган ерлар инсонлар ва табиат учун фойдали экотизимларга айлантирилгани мисолдир”.

Озодлик жорий йил 24 сентябрь куни Ўзбекистон президенти “Чанг бўронларига қарши курашиш ва атмосфера ҳавоси сифатини яхшилаш бўйича биринчи навбатдаги чора-тадбирлар тўғрисида”ги қарорни имзолагани ҳақида хабар қилган эди.

Ҳужжатга мувофиқ, атроф-муҳитни муҳофаза этиш чораларини кучайтириш доирасида масъулларга келгуси беш йил ичида Тошкент шаҳри ва вилоятида 441 гектар “яшил белбоғ”, “яшил боғлар” ташкил қилиш мажбурияти юкланган.

Тошкент халқаро аэропортиданоқулай об-ҳаво шароити (туман) туфайли 3 декабрь оқшомидан бошлаб самолётларни қабул қилишда чекловлар жорий этилган. Бу ҳақда Uzbekistan Airports компанияси матбуот хизмати маълумот тарқатди.

Қуйидаги рейслар Самарқанддаги муқобил аэродромга йўналтирилган:

• Фарғона–Тошкент йўналиши бўйича Silk Avia авиакомпанияси (US402);

• Бишкек–Тошкент йўналиши бўйича Uzbekistan Airways авиакомпанияси (HY778);

• Сургут–Тошкент йўналиши бўйича UTair авиакомпанияси (UTA-709);

• Дубай–Тошкент йўналиши бўйича Centrum Air авиакомпанияси (MFX-352).

Uzbekistan Airways авиакомпаниясининг Грозний–Тошкент йўналишидаги HY9702 рейси эса Бухородаги аэродромга йўналтирилган.

Об-ҳаво шароити ёмонлашгани сабабли Тошкент халқаро аэропортида вақтинчалик чекловлар 4 декабрь куни тонгги 05:30 дан бошлаб яна давом этган. Хусусан, Uzbekistan Airways авиаширкатининг Льеж - Тошкент йўналишидаги HY3174 рейси Бухоро муқобил аэропортига йўналтирилган.

Маълумот ўрнида: 25 ноябрь куни об-ҳаво шароити ёмонлашгани сабабли Фарғона аэропортида, 1 декабрь куни эса Наманган халқаро аэропортида ҳаво кемаларини қабул қилишга вақтинчалик чеклов жорий этилган, рейслар муқобил аэродромларга йўналтирилган эди.

Жанубий Кореяда ҳарбий ҳолат эълон қилиниши муносабати билан Ўзбекистоннинг Сеулдаги элчихонаси ушбу давлатдаги ватандошларга шахсий хавфсизлик чораларини кўришни тавсия қилди.

“Бугунги кунда мамлакатда юзага келаётган ички сиёсий вазиятдан келиб чиққан ҳолда, барчангиздан Жанубий Кореяда турли хил митинглар ва намойишларда иштирок этмасликка, одамлар гавжум жойларга бормасликка, ўзингизнинг шахсий хавфсизлигингиз ва соғлиғингизни эҳтиёт қилишга чақириб қоламиз”, дейилган дипломатик ваколатхона баёнотида.

Элчихона зарурат туғилган ҳолатларда +82 10 3213 4505 ёки +82 10 2909 4334 телефон рақамига мурожаат қилиш мумкинлигини эслатган.

Озодлик 3 декабрь куни Жанубий Корея президенти Юн Сок Ёль мамлакатда ҳарбий ҳолат жорий этгани ҳақида хабар қилган эди. У мазкур тадбирни конституциявий тузумни шимолий кореяпараст кучлардан ҳимоя қилиш истаги билан изоҳлаган.

Таркибига президент Юн Сок Ёль ҳам кирган ҳукмрон партия вакиллари ҳарбий ҳолат жорий этишга оид қарорни нотўғри деб аташган. Мухолифатдаги Демократик партия эса мазкур қарорни Конституцияга зид эканини урғулаган.

3 декабрь оқшомида ошиғич равишда йиғилган Жанубий Корея парламенти президентнинг ҳарбий ҳолатга доир қарорини бекор қилишни ёқлаб овоз берган.

Reuters агентлиги хабарига кўра, парламент ва жамоатчилик босими остида президент Юн Сок Ёль Вазирлар Маҳкамасининг навбатдаги йиғилишида ҳарбий ҳолатни бекор қилишга ваъда берган.

Швейцария прокуратураси бадавлат мижозларга хизмат кўрсатишга ихтисослашган Lombard Odier банкини оғирлаштирувчи шартлар билан пул ювишда айблади, деб ёзди Financial Times нашри.

Расмийларга кўра, банк бир неча йил давомида Ўзбекистон биринчи президенти Ислом Каримовнинг тўнғич қизи Гулнора Каримованинг жиноий фаолиятини яширишга кўмаклашиш бўйича “ҳал қилувчи рол”лардан бирини ўйнаган.

Прокуратура тахминича, 2023 йил сентябрида айблов эълон қилинган Каримова йирик миқдордаги пул маблағларини ўзлаштириб, уларни Швейцариядаги “Офис” дея танилган ташкилот орқали ювган. Гулнора Каримованинг ўзи мазкур айбловларни рад этган.

Lombard Odier банкининг собиқ ходимига ҳам айблов эълон қилинган. Прокуратура бу ишни 2016 йилдан буён юритиб келмоқда.

Гулнора Каримова 2015 йилнинг 18 декабрида Тошкент шаҳар судининг ҳукми билан 10 йилга, 2020 йилнинг 18 мартида эса янги очилган жиноят иши доирасида 13 йилга озодликдан маҳрум қилинганди. У айни пайтда жазо муддатини Тошкент вилоятининг Зангиота туманида жойлашган аёллар колониясида ўтамоқда.

Ўзбекистонлик тикувчи ва тадбиркор Дилором Йўлдошева 2024 йилда ВВСнинг дунёдаги илҳомлантирувчи ва нуфузли 100 аёл рўйхатига киритилди.

ВВС махсус лойиҳаси муаллифларига кўра, Йўлдошева икки йил аввал йиғим-терим мавсумида содир бўлган бахтсиз ҳодиса туфайли икки оёғидан айрилган.

Шунга қарамай, у умидсизликка тушмаган. У янги иш ўрганиш ва ўзбекистонлик ёш аёлларга пул топишда ёрдам бериш мақсадида ўзининг тикувчилик бизнесини очган.

Тадбиркорлик асослари билан танишган деновлик Дилором Йўлдошева кейинроқ 40 дан зиёд аёлни тикувчиликка ўргатган. Бир неча ойдан кейин унинг ширкати анча ўсган, у ишчилар ва мактаб ўқувчилари учун кийим-кечак тикиш бўйича шартномалар тузган.

“Ўшандан буён унинг бизнеси фақат ўзи учунгина эмас, бошқа ўнлаб аёллар учун ҳам даромад манбаига айланган”, дея қайд этишган лойиҳа муаллифлари.

ВВС “100 аёл” лойиҳасининг бу йилги мавзуси “барқарорлик” бўлган.

Рўйхатда Нобель тинчлик мукофоти лауреати Надя Мурад, актриса Шэрон Стоун, қўшиқчи Рэй, рассом Трейси Эмин, иқлим ўзгаришига қарши кураш фаоли Аденике Оладосу, ёзувчи Кристина Ривера Гарса ва бошқа машҳур исмларга дуч келиш мумкин. Бироқ унга президентнинг қизи Саида Мирзиёева ёки Сенат раиси Танзила Норбоева дохил Ўзбекистонда нуфузли деб топилган 40 нафар аёлнинг биронтаси киритилган эмас.

Дилором Йўлдошевадан аввал ВВС “100 аёл” рўйхатига Қаршидаги 2-мактаб-интернати ўқитувчиси Муҳаббат Шарапова (2017 йил) киритилган эди.

2025 йилдаги ёшлар Осиё ўйинлари Ўзбекистонда эмас, Баҳрайнда ўтказиладиган бўлди. Бу ҳақда Осиё Олимпия кенгаши матбуот хизмати маълумот тарқатди. https://oca.asia/news/5716-oca-approves-bahrain-to-host-asian-youth-games-2025-after-uzbekistan-withdraws.html

Қайд этилишича, ООК ижроия кенгашининг 2 декабрдаги мажлисида Ўзбекистон Миллий Олимпия қўмитаси Тошкентдаги Олимпия шаҳарчаси қурилиши кўзланган муддатда якунланмагани учун ўзбек расмийлари 2025 йил сентябрига режаланган Осиё ўйинларини ўтказа олмасликлари ҳақида хат йўллагани маълум бўлган.

ООК бош директори Ҳусайн ал-Мусаллам 2025 йилдаги ёшлар Осиё ўйинлари 2026 йилда Дакарда ўтказиладиган ёшлар Олимпия ўйинлари билан боғлиқ экани, шунинг учун ҳам кейинги йилдаги ўйинларни ортга суриб бўлмаслигини билдирган.

Бу орада Баҳрайн Олимпия қўмитаси 2025 йилги Осиё ўйинларини ўтказишга тайёрлигини билдирган ва шу тариқа мазкур спорт тадбири Баҳрайнда ўтказиладиган бўлган.

Айни пайтда Ўзбекистон Миллий Олимпия қўмитаси томонидан бу борада тарқатилган хабарномада “пандемиядан кейинги чекловлар сабабли Олимпия шаҳарчаси қурилиши учун зарур воситалар етказиш жараёнида узилишлар кузатилгани ва фойдаланишга топшириш муддати кечикишини инобатга олган ҳолда Ўзбекистон томони ООКдан мусобақани яна бир йилга суришни сўрагани”, бироқ “Олимпия спорт турларидаги беллашувлар келгусида Дакар-2026 ўсмирлар ёзги Олимпия ўйинларига саралаш вазифасини бажариши назарда тутилгани боис ООК III ёшлар Осиё ўйинлари 2025 йилда ташкил этилиши муҳимлигини билдиргани” урғуланган.

“Шу туфайли ООК III ёшлар Осиё ўйинлари мезбонлигини Баҳрайнга топширди ва Ўзбекистонга Ислом бирдамлиги ўйинлари ёки Жанг санъати ва ёпиқ иншоотлардаги Осиё ўйинлари каби катталар миқёсидаги йирик комплекс тадбирларни ўтказишга тайёргарлик кўришни тавсия қилди”, дейилган МОК хабарномасида.

Қўшма Штатлар Молия вазирлигининг Хорижий активларни назорат қилиш бошқармаси (OFAC) Хоразм вилоятидаги меҳрибонлик уйида тарбияланувчиларни зўрлаган масъул мансабдорларга қарши санкциялар жорий қилди.

АҚШ Молия вазирлиги хабарномасида қайд этилишича, санкция рўйхатига Урганчдаги болалар уйининг собиқ мудираси Юлдуз Худайбергенова, Хоразм вилояти адлия бошқармасининг собиқ бошлиғи Ойбек Машарипов ва Янгиариқ тумани фавқулодда вазиятлар бошқармасининг собиқ бошлиғи Анвар Курязов киритилган. Улар одам савдоси ва гендер зўравонлик, хусусан давлатга қарашли меҳрибонлик уйида тарбияланувчи қизларга нисбатан жинсий зўравонликда айбланган.

Мазкур шахсларга нисбатан чекловлар Халқаро қулликка қарши кураш куни муносабати билан жорий этилган. Санкциялар киритилиши бу одамларнинг АҚШдаги ёки америкаликлар тасарруфи ёки назорати остида бўлган мол-мулклари музлатилишини англатади. Шунингдек, уларга нисбатан АҚШ Давлат департаменти томонидан киритилган виза чекловлари ҳам жорий қилинади.

Урганчдаги меҳрибонлик уйида тарбияланувчи қизлар 10 ой давомида давлат мулозимлари дохил турли эркаклар томонидан жинсий зўравонликка дучор қилинганлари ҳақида Озодлик аввалроқ бир неча бор хабар қилган.

2022 йил сентябрида мазкур иш Хива тумани судида кўриб чиқилган ва Меҳрибонлик уйи мудираси Юлдуз Худойбергенова Ўзбекистон Жиноят кодексининг 135-моддаси (Одам савдоси), 167-моддаси (Ўзлаштириш ёки растрата йўли билан талон-торож қилиш) ва 209-моддаси (Мансаб сохтакорлиги) билан айбдор деб топилиб, 5 йил 6 ой муддатга озодликдан маҳрум этилган.

Адлия ва Фавқулодда вазиятлар бошқармалари раҳбарлари эса ЖКнинг 128-моддаси (Ўн олти ёшга тўлмаган шахс билан жинсий алоқа қилиш) билан 1,5 йилга озодликдан чекланди. Декабрь ойида Хоразм вилояти суди апелляция инстанцияси биринчи инстанция суди ҳукмини ўз кучида қолдирган.

Мулозимларга берилган жазонинг енгиллиги Ўзбекистон жамоатчилиги орасида норозилик уйғотган. Бунинг ортидан 2023 йил ноябрида иш қайта кўриб чиқилиб, Машарипов ва Курязов уч йилга озодликдан маҳрум этилган.

Ўзбекистон ва Бирлашган Араб Амирликлари дипломатлари ўзбекистонлик фуқароларнинг БАА ҳудудига кириши билан боғлиқ вазиятни муҳокама қилишган. Бу ҳақда Ўзбекистон Ташқи ишлар вазирлиги матбуот хизмати маълумот тарқатди.

ТИВ хабарномасига мувофиқ, 2 декабрь куни ташқи ишлар вазирининг биринчи ўринбосари Бахромжон Аълоев БААнинг Ўзбекистондаги элчиси Саид Матар ал-Қамзийни қабул қилган.

Учрашувда икки мамлакат ўртасидаги сиёсий, савдо-иқтисодий ва инвестициявий алоқаларни ривожлантириш масалаларидан ташқари “сўнгги кунларда Ўзбекистон фуқароларининг Бирлашган Араб Амирликлари ҳудудига киришларида кузатилаётган қийинчиликлар билан боғлиқ вазият бўйича” фикр алмашилган.

“Мавжуд ҳолатни имкон қадар қисқа муддатларда ҳал қилиш бўйича тегишли чора-тадбирлар кўришга келишиб олинди”, дейилган вазирлик хабарномасида.

Аввалроқ Озодлик 30 ноябрь куни Тошкентдан Абу Дабига учиб борган 31 нафар ўзбекистонлик эркак БАА ҳудудига киритилмагани, улар аэропортдан ҳам чиқарилмай, бир суткадан кейин ортга қайтариб юборилгани ҳақида хабар қилган эди.

Мазкур ҳодисадан сўнг ижтимоий тармоқларда муайян ёшдаги ўзбекистонлик эркакларнинг БАА ҳудудига кириши тақиқланганига оид тахминлар илгари сурилган.

Абу Даби аэропортида ўзбекистонликларнинг ушлаб қолиниши ва сўроққа тутилиши БАА ҳудудида яҳудий руҳонийси Цви Коган ўлдирилиши ортидан рўй берган.

Ўтган ҳафта Бирлашган Араб Амирликлари Ички ишлар вазирлиги исроиллик раввин ўлимида гумонланган уч ўзбекистонлик қўлга олинганини маълум қилганди.

БАА ИИВ баёнотига кўра, қотилликда гумонланаётганларнинг исми Олимбой Тоҳирович, Азизбек Комилович ва Маҳмуджон Абдураҳим бўлиб, улардан икки нафари 28 ёшда, яна бири эса 33 ёшдадир.

Жанубий Кореяда ноқонуний юрган ўзбекистонликлар учун “яшил йўлак” орқали мамлакатдан чиқиб кетиш муддати 2025 йилнинг 31 январигача узайтирилди. Бу ҳақда Ўзбекистон Миграция агентлиги маълум қилди.

“Яшил йўлак” лойиҳаси муддати 30 ноябрь куни тугаши лозим эди. Миграция агентлигининг Сеулдаги ваколатхонаси ва Корея Адлия вазирлиги ўртасида ўтказилган музокаралар якунида мазкур муддатни узайтиришга келишилган.

Корея қонунчилигига мувофиқ, мамлакатда ноқонуний ишлаб, яшаб юрган шахслар қуйидаги миқдорда жарима тўлайди:

• 1 ойдан кам бўлса 1 миллион вон (716 доллар);

• 1 ойдан 3 ойгача 1,5 миллион вон (1074 доллар);

• 3 ойдан 6 ойгача 2 миллион вон (1432 доллар);

• 6 ойдан 1 йилгача 4 миллион вон (2864 доллар);

• 1 йилдан 2 йилгача 7 миллион вон (5012 доллар);

• 2 йилдан 3 йилгача 10 миллион вон (7160 доллар);

• 3 йилдан 5 йилгача 20 миллион вон (14321 доллар);

• 5 йилдан 7 йилгача 25 миллион вон (17902 доллар);

• 7 йилдан кўп бўлса 30 миллион вон (21482 доллар).

Миграция агентлиги қайдича, кўрсатилган муддат ичида Кореяни ихтиёрий тарк этган ноқонуний муҳожирлар жаримадан озод этилади ва кейинчалик Кореяга қайта кириши енгиллашади.

Белгиланган муддатдан сўнг Жанубий Кореяда қолганларга нисбатан эса катта миқдорда жарима (ҳар бир ой учун 2000 доллар) ва мамлакатга қайта киришга тақиқ қўлланади.

Аввалроқ миграция идораси Корея Республикасида 92 минг нафар ўзбекистонлик қонуний, 9000 нафари эса ноқонуний тарзда яшаб келаётганини маълум қилганди.

Сеул ҳукумати муайян давлат фуқароларининг 10 фоизидан ортиқ қисми ноқонуний мақомда бўлса, ўша давлат фуқароларига виза чеклови жорий этади.

Озодлик Корея Республикаси президенти Юн Сок Ёлнинг жорий йил июнида Ўзбекистонга давлат ташрифи якунида йигирмага яқин ҳужжат, жумладан, Малакали ва профессионал кадрлар тайёрлаш бўйича ҳамкорлик тўғрисида меморандум имзолагани, давлат раҳбарлари музокараларида меҳнат миграциясига доир таклифлар кўриб чиқилгани ҳақида хабар қилган эди.

Озодлик журналистларининг Жанубий Кореяда юрган ўзбеклар ҳаёти ҳақида ҳикоя қилувчи фильмини қуйида томоша қилишингиз мумкин: